Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 12

“Mafee Amɛ Jeŋmaŋ Kome”

“Mafee Amɛ Jeŋmaŋ Kome”

EZEKIEL 37:22

NƆ NI ABAAWIE HE: Yehowa wo shi akɛ ebaabua ewebii lɛ anaa; gbalɛ ni kɔɔ tsei enyɔ lɛ ahe lɛ

1, 2. (a) Mɛni ekolɛ ehã mɛi ni aŋɔ amɛ nom lɛ atsui fã lɛ? (b) Mɛni hewɔ amɛbaana nɔ ko ni amɛkpaaa gbɛ kwraa lɛ? (d) Mɛɛ sanebimɔi wɔbaasusu he?

YƐ Nyɔŋmɔ gbɛtsɔɔmɔ naa lɛ, Ezekiel gba gbalɛi srɔtoi etsɔɔ nomii ni yɔɔ Babilon lɛ, ni etsɔ okadii anɔ efee enɛ. Yɛ klɛŋklɛŋ gbalɛ lɛ, kɛ nɔ ni ji enyɔ, kɛ nɔ ni ji etɛ, kɛ ekrokomɛi lɛ amli lɛ, ahã Ezekiel fee nibii komɛi kɛtsɔɔ kojomɔ ni abaakojo mɛi. (Eze. 3:24-26; 4:1-7; 5:1; 12:3-6) Anɔkwa, gbalɛi fɛɛ ni Ezekiel tsɔ okadii ni efee lɛ anɔ egba lɛ ji kojomɔi ni naa wala ni akɛbaaba Yudafoi lɛ anɔ.

2 No hewɔ lɛ, kwɛ bɔ ni mɛi ni aŋɔ amɛ nom lɛ atsui baafã ahã be ni Ezekiel badamɔ shi ekoŋŋ yɛ amɛhiɛ, ni efee klalo akɛ ebaafee okadi kroko hu ni ji gbalɛ lɛ. Ekolɛ amɛshwie amɛyiŋ akɛ: ‘Mɛɛ sane ni kumɔɔ mɔ tsui ekoŋŋ ekɛbaahã wɔ ŋmɛnɛ?’ Shi amɛbaana nɔ ko ni amɛkpaaa gbɛ kwraa. Gbalɛ ni Ezekiel tsɔ okadi ni efee lɛ nɔ egba amrɔ nɛɛ yɛ srɔto kwraa. Eji gbalɛ ni hiɛ shiwoo ni yɔɔ miishɛɛ, shi jeee fɔbuu kojomɔ. (Eze. 37:23) Mɛɛ sane Ezekiel kɛhã nomii lɛ? Te eshishi lɛ? Mɛɛ gbɛ nɔ ekɔɔ Nyɔŋmɔ tsuji ahe ŋmɛnɛ? Hã wɔtao mli wɔkwɛ.

 “Amɛbaatsɔ Tso Kome Yɛ Midɛŋ”

3. (a) Mɛni ‘Yuda tso lɛ’ damɔ shi kɛhã? (b) Mɛni hewɔ akɛɔ akɛ “Efraim tso lɛ” damɔ shi kɛhã wekui nyɔŋma maŋtsɛyeli lɛ?

3 Yehowa fã Ezekiel akɛ ekɔlɔ tsei enyɔ ni eŋma yɛ ekome nɔ akɛ ‘Yuda nɔ,’ ni eŋma yɛ ekroko lɛ hu nɔ akɛ “Yosef, Efraim tso lɛ.” (Kanemɔ Ezekiel 37:15, 16.) Mɛni tsei enyɔ nɛɛ damɔ shi kɛhã? ‘Yuda tso’ lɛ damɔ shi kɛhã Yuda kɛ Benyamin wekui enyɔ maŋtsɛyeli lɛ. Maŋtsɛmɛi ni jɛ Yuda weku lɛ mli lɛ ye wekui enyɔ lɛ nɔ; agbɛnɛ hu, osɔfoi lɛ hu hi Yuda shikpɔŋ lɛ nɔ, ejaakɛ amɛsɔmɔ yɛ sɔlemɔ shĩa lɛ yɛ Yerusalem. (2 Kro. 11:13, 14; 34:30) No hewɔ lɛ, maŋtsɛmɛi ni jɛ David weku lɛ mli lɛ kɛ Levi osɔfoi lɛ hi Yuda maŋtsɛyeli lɛ mli. “Efraim tso lɛ” damɔ shi kɛhã Israel wekui nyɔŋma maŋtsɛyeli lɛ. Mɛni hewɔ akɛɔ akɛ tso nɛɛ ji Efraim tso lɛ? Mɔ klɛŋklɛŋ ni ye wekui nyɔŋma maŋtsɛyeli lɛ nɔ maŋtsɛ ji Yeroboam, ni ejɛ Efraim weku lɛ mli. Sɛɛ mli lɛ, Efraim batsɔ weku ni he gbɛ́i fe fɛɛ yɛ Israel. (5 Mo. 33:17; 1 Maŋ. 11:26) Kadimɔ akɛ, maŋtsɛmɛi ni jɛ David weku lɛ mli lɛ kɛ Levi osɔfoi lɛ fataaa Israel wekui nyɔŋma maŋtsɛyeli lɛ he.

4. Mɛni nɔ ni Ezekiel kɛ tsei enyɔ lɛ fee lɛ feɔ he mfoniri? (Kwɛmɔ mfoniri ni yɔɔ nikasemɔ lɛ shishijee lɛ.)

4 Agbɛnɛ hu, afã Ezekiel akɛ, ekɛ tsei enyɔ lɛ ekome akpɛtɛ ekome he “koni amɛtsɔ tso kome.” Be ni nomii lɛ kwɛɔ Ezekiel, ni amɛnuuu nɔ ni efeɔ lɛ shishi lɛ, amɛbi lɛ akɛ: “Ani okɛŋ wɔ nɔ ni nibii nɛɛ tsɔɔ lo?” Ehã amɛ hetoo akɛ, nɔ ni efeɔ lɛ feɔ nɔ ni Yehowa diɛŋtsɛ baafee lɛ he mfoniri. Yehowa wie yɛ tsei enyɔ lɛ ahe akɛ: “Mafee amɛ tso kome, ni amɛbaatsɔ tso kome yɛ midɛŋ.”​Eze. 37:17-19.

5. Mɛni tsei enyɔ lɛ ni Ezekiel fee lɛ ekome lɛ tsɔɔ? (Kwɛmɔ akrabatsa ni ji “Tsei Enyɔ Lɛ Ni Afee Amɛ Ekome Lɛ.”)

5 No sɛɛ lɛ, Yehowa tsɔɔ nɔ ni tsei enyɔ lɛ ni afee amɛ ekome lɛ tsɔɔ. (Kanemɔ Ezekiel 37:21, 22.) Akɛ Yuda wekui enyɔ maŋtsɛyeli lɛ mli bii ni aŋɔ amɛ nom lɛ kɛ Israel (Efraim) wekui nyɔŋma maŋtsɛyeli lɛ mli bii ni aŋɔ amɛ nom lɛ baaba Israel shikpɔŋ lɛ nɔ, ni amɛbaatsɔ “jeŋmaŋ kome.”​—Yer. 30:1-3; 31:2-9; 33:7.

6. Mɛɛ gbalɛi srɔtoi enyɔ ni kɛ amɛhe kpãa gbee yɔɔ Ezekiel yitso 37 lɛ?

6 Gbalɛi srɔtoi enyɔ ni kɛ amɛhe kpãa gbee ni yɔɔ Ezekiel yitso 37 ni kɔɔ jamɔ krɔŋŋ ni abaasaa ato shishi ekoŋŋ lɛ he lɛ sa kadimɔ waa! Yehowa baahã ana akɛ, eji Nyɔŋmɔ ni hãa ewebii yeɔ amɛhe kɛjeɔ nomŋɔɔ mli (kuku 1-14), ni efeɔ mɛi ni mli egbala hu ekome (kuku 15-28). Sane oti ni taa mɔ tsuiŋ ni yɔɔ gbalɛi enyɔ nɛɛ amli lɛ ji: Yehowa baanyɛ ajie mɛi kɛje nomŋɔɔ mli, ni ebaanyɛ ehã mɛi ni mli egbala hu afee ekome.

Mɛɛ Gbɛ Nɔ Yehowa ‘Bua Amɛnaa’?

7. Mɛɛ gbɛ nɔ sane ni yɔɔ 1 Kronika 9:2, 3 lɛ maa nɔ mi akɛ “Nyɔŋmɔ nyɛɔ nii fɛɛ efeɔ”?

7 Yɛ adesai asusumɔ naa lɛ, anyɛŋ ahã nomii lɛ aye amɛhe ni amɛfee ekome kɔkɔɔkɔ. * Shi “Nyɔŋmɔ nyɛɔ nii fɛɛ efeɔ.” (Mat. 19:26) Yehowa hã egbalɛ lɛ ba mli. Nom ni Babilonbii lɛ ŋɔ Nyɔŋmɔ webii lɛ ba naagbee yɛ afi 537 D.Ŋ.B., ni no sɛɛ lɛ, aŋkroaŋkroi ni jɛ maŋtsɛyelii enyɔ lɛ fɛɛ amli lɛ ku amɛ sɛɛ kɛba  Yerusalem ni amɛbaye amɛbua kɛto anɔkwa jamɔ shishi ekoŋŋ. Ŋmalɛ lɛ maa enɛ nɔ mi akɛ: “Yuda, kɛ Benyamin, kɛ Efraim, kɛ Manase seshibii lɛ ekomɛi yahi Yerusalem.” (1 Kro. 9:2, 3; Ezr. 6:17) Hɛɛ, Israel wekui nyɔŋma maŋtsɛyeli lɛ mli bii lɛ kɛ Yuda wekui enyɔ maŋtsɛyeli lɛ mli bii lɛ fee ekome, tamɔ bɔ ni Yehowa gba lɛ pɛpɛɛpɛ.

8. (a) Mɛni Yesaia gba? (b) Mɛɛ nibii titrii enyɔ ni sa kadimɔ yɔɔ Ezekiel 37:21 lɛ?

8 Aaafee afii 200 ni tsɔ be nɛɛ hiɛ lɛ, no mli lɛ, gbalɔ Yesaia egba nɔ ni baaba Israel kɛ Yuda nɔ yɛ amɛnomŋɔɔ lɛ sɛɛ. Egba akɛ Yehowa baabua “Israelbii ni egbɛ eshwã lɛ” kɛ “Yudabii ni egbɛ eshwã lɛ anaa kɛjɛ shikpɔŋ lɛ koji ejwɛ lɛ fɛɛ,” ní “Asiria” hu fata he lɛ. (Yes. 11:12, 13, 16) Ni lɛɛlɛŋ, tamɔ bɔ ni Yehowa gba lɛ, ejie “Israelbii lɛ kɛje jeŋmaji fɛɛ” amli. (Eze. 37:21) Kadimɔ nibii enyɔ nɛɛ: Agbɛnɛ, Yehowa tsɛɛɛ nomii lɛ akɛ “Yuda” kɛ “Efraim” dɔŋŋ, shi moŋ etsɛ amɛ “Israelbii lɛ”​—ni ji kuu kome. Kɛfata he lɛ, awie Israelbii lɛ ahe akɛ amɛbaajɛ jeŋmaji srɔtoi amli​—anɔkwa, amɛbaajɛ “he fɛɛ he” kɛba, shi jeee jeŋmaŋ kome pɛ, ni ji Babilon mli.

9. Mɛɛ gbɛ nɔ Yehowa ye ebua nomii ni ku amɛsɛɛ kɛba Israel lɛ koni amɛfee ekome?

9 Be ni nomii lɛ ku amɛsɛɛ kɛba Israel lɛ, mɛɛ gbɛ nɔ Yehowa ye ebua amɛ ni amɛfee ekome? Ehole tookwɛlɔi kpakpai, tamɔ Zerubabel, Osɔfonukpa Yoshua, Ezra, kɛ Nehemia ehã Israel. Agbɛnɛ hu, Nyɔŋmɔ hole Hagai, Zakaria, kɛ Maleaki akɛ gbalɔi ehã amɛ. Hii anɔkwafoi nɛɛ fɛɛ tsu nii waa kɛwo maŋbii lɛ hewalɛ koni amɛkɛ Nyɔŋmɔ gbɛtsɔɔmɔi atsu nii. (Neh. 8:2, 3) Kɛfata  he lɛ, Yehowa ye henyɛlɔi ni tsɔ ŋaa koni akpãtã ewebii lɛ ahiɛ lɛ anɔ kunim kɛbu Israel maŋ lɛ he.​—Est. 9:24, 25; Zak. 4:6.

Yehowa hãa ewebii lɛ tookwɛlɔi kpakpai koni amɛye amɛbua amɛ ni amɛfee ekome (Kwɛmɔ kuku 9)

10. Mɛni Satan bɔ mɔdɛŋ efee?

10 Kɛ̃lɛ, yɛ nibii ni Yehowa jɛ esuɔmɔ mli efee ehã Israelbii lɛ fɛɛ sɛɛ lɛ, amɛteŋ mɛi babaoo fiii jamɔ krɔŋŋ lɛ sɛɛ. Aŋmala amɛnifeemɔi lɛ yɛ Biblia mli woji ni aŋmala be ni amɛku amɛsɛɛ kɛjɛ nomŋɔɔ mli amɛba lɛ amli. (Ezr. 9:1-3; Neh. 13:1, 2, 15) Anɔkwa, be ni amɛku amɛsɛɛ amɛba lɛ, eshɛɛɛ afii oha ni Israelbii lɛ kplaŋŋ kwraa kɛje jamɔ krɔŋŋ lɛ he aahu akɛ Yehowa kɛɛ amɛ akɛ: “Nyɛkua nyɛsɛɛ kɛbaa miŋɔɔ.” (Mal. 3:7) Be ni Yesu ba shikpɔŋ lɛ nɔ lɛ, Yudafoi ajamɔ lɛ mli egbala ewo kui srɔtoi amli, ni tookwɛlɔi ni yeee anɔkwa lɛ ji amɛhiɛnyiɛlɔi. (Mat. 16:6; Mar. 7:5-8) Satan ye omanye yɛ mɔdɛŋ ni ebɔ koni amɛkanyɛ amɛfee ekome kɛmɔ shi lɛ mli. Shi bɔ fɛɛ bɔ ni fee lɛ, Yehowa gbalɛ akɛ ebaafee amɛ ekome lɛ baaba mli. Yɛ mɛɛ gbɛ nɔ?

“Mitsulɔ David Baatsɔ Amɛmaŋtsɛ”

11. (a) Mɛni Yehowa hã ale yɛ gbalɛ ni kɔɔ ekomefeemɔ lɛ he lɛ he? (b) Mɛni Satan ka ekoŋŋ akɛ ebaafee be ni ashɛ lɛ afɔ̃ shikpɔŋ lɛ nɔ kɛjɛ ŋwɛi lɛ?

11 Kanemɔ Ezekiel 37:24. Yehowa hã ale akɛ, egbalɛ ni tsɔɔ akɛ ebaafee ewebii lɛ ekome lɛ baaba mli kɛmɔ shi be ni ‘etsulɔ David’ ni ji Yesu Kristo lɛ ebɔi nɔyeli yɛ ewebii lɛ ateŋ lɛ, ni enɔyeli nɛɛ je shishi, yɛ afi 1914. * (2 Sam. 7:16; Luka 1:32) Be ni shɛɔ nakai beiaŋ lɛ, akɛ mumɔŋ Israel ni ji mɛi ni afɔ amɛ mu lɛ ebaye Israelbii lɛ anajiaŋ. (Yer. 31:33; Gal. 3:29) Shi kome ekoŋŋ lɛ, Satan ka akɛ ebaafite ekomefeemɔ ni yɔɔ Nyɔŋmɔ webii lɛ ateŋ lɛ, titri lɛ be ni ashɛ lɛ afɔ̃ shikpɔŋ lɛ nɔ lɛ. (Kpo. 12:7-10) Akɛ nɔkwɛmɔnɔ lɛ, be ni Nyɛminuu Russell gbo yɛ afi 1916 lɛ, Satan ka akɛ ebaatsɔ mɛi ni ebatsɔmɔ jamɔkwalɔi lɛ anɔ efite ekomefeemɔ ni yɔɔ mɛi ni afɔ amɛ mu lɛ ateŋ lɛ. Shi etsɛɛɛ kɛkɛ ni nakai jamɔkwalɔi lɛ shi asafo lɛ. Agbɛnɛ hu, Satan hã awo nyɛmimɛi ni nyiɛɔ hiɛ yɛ nakai beiaŋ lɛ tsuŋ, shi no po nyɛɛɛ afite ekomefeemɔ ni yɔɔ Nyɔŋmɔ webii lɛ ateŋ lɛ. Mɛi ni afɔ amɛ mu lɛ ateŋ mɛi ni tee nɔ amɛye Yehowa anɔkwa lɛ hiɛ ekomefeemɔ ni yɔɔ amɛteŋ lɛ mli.

12. Mɛni hewɔ mɔdɛŋ ni Satan bɔ akɛ ekɛ mligbalamɔ baaba mumɔŋ Israelbii lɛ ateŋ lɛ yeee omanye lɛ?

12 No hewɔ lɛ, nɔ ni tamɔɔɔ nɔ ni ba heloonaa Israel nɔ lɛ, mumɔŋ Israel lɛ nyɛ edamɔ ŋai ni Satan tsɔ koni ekɛ mligbalamɔ aba amɛteŋ lɛ naa. Mɛni hewɔ Satan mɔdɛŋbɔi lɛ yeee omanye lɛ? Ejaakɛ mɛi ni afɔ amɛ mu lɛ fee bɔ fɛɛ bɔ ni amɛbaanyɛ ni amɛye Yehowa taomɔ nii lɛ anɔ. Enɛ hewɔ lɛ, amɛ-Maŋtsɛ Yesu Kristo, mɔ ni miiya nɔ eeye Satan nɔ kunim lɛ miibu amɛhe.​—Kpo. 6:2.

Yehowa Baahã Mɛi Ni Jáa Lɛ Lɛ ‘Afee Ekome’

13. Mɛɛ anɔkwa sane ni he hiaa waa gbalɛ ni kɔɔ tsei enyɔ lɛ ni afee amɛ ekome lɛ he lɛ hãa wɔleɔ yɛ jamɔ krɔŋŋ he?

13 Mɛɛ gbɛ nɔ gbalɛ ni tsɔɔ akɛ abaafee tsei enyɔ lɛ ekome lɛ kɔɔ wɔhe ŋmɛnɛ? Hã ehi ojwɛŋmɔ mli akɛ, oti ni yɔɔ gbalɛ lɛ  mli lɛ tsɔɔ bɔ ni kui srɔtoi enyɔ baafee ekome. Nɔ ni fe fɛɛ lɛ, gbalɛ lɛ tsɔɔ akɛ, Yehowa ji mɔ ni baahã ekomefeemɔ nɛɛ aba. No hewɔ lɛ, mɛɛ anɔkwa sane ni he hiaa waa gbalɛ ni kɔɔ tsei enyɔ lɛ ni afee amɛ ekome lɛ he lɛ hãa wɔleɔ yɛ jamɔ krɔŋŋ he? Yɛ kukufoo mli lɛ, no ji: Yehowa diɛŋtsɛ baahã mɛi ni jáa lɛ lɛ ‘afee ekome.’​—Eze. 37:19.

14. Kɛjɛ afi 1919 lɛ, mɛɛ gbɛ nɔ gbalɛ ni tsɔɔ akɛ abaafee tsei enyɔ lɛ ekome lɛ eba mli yɛ gbɛ ni da nɔ?

14 Kɛjɛ afi 1919 kɛbaa lɛ, atsuu Nyɔŋmɔ webii ahe yɛ mumɔŋ ni amɛbɔi mfonirifeemɔŋ paradeiso lɛ mli botemɔ. Nakai beiaŋ gbalɛ ni tsɔɔ akɛ abaafee tsei enyɔ lɛ ekome lɛ bɔi mlibaa yɛ gbɛ ni da nɔ. Nakai beiaŋ lɛ, mɛi ni abua amɛnaa ni afee amɛ ekome lɛ ateŋ mɛi babaoo yɛ hiɛnɔkamɔ akɛ amɛbaatsɔmɔ maŋtsɛmɛi kɛ osɔfoi yɛ ŋwɛi. (Kpo. 20:6) Yɛ mfonirifeemɔŋ lɛ, mɛi ni afɔ amɛ mu nɛɛ tamɔ tso ni aŋma “Yuda” yɛ nɔ lɛ​—ni Yuda ji jeŋmaŋ ni David weku lɛ mli maŋtsɛmɛi kɛ Levi osɔfoi yɔɔ mli lɛ. Shi sɛɛ mli lɛ, mɛi babaoo ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ bafata mumɔŋ Yudafoi, ni ji Kristofoi ni afɔ amɛ mu nɛɛ ahe. Mɛi nɛɛ tamɔ “Efraim tso lɛ”​—ni ji jeŋmaŋ ni David weku lɛ mli maŋtsɛmɛi kɛ Levi osɔfoi lɛ bɛ mli lɛ. Kui enyɔ nɛɛ fɛɛ feɔ ekome kɛsɔmɔɔ Yehowa yɛ amɛ-Maŋtsɛ kome, Yesu Kristo lɛ shishi.​—Eze. 37:24.

“Amɛbaatsɔ Mimaŋ”

15. Mɛɛ gbɛ nɔ gbalɛ ni yɔɔ Ezekiel 37:26, 27 lɛ miiná emlibaa ŋmɛnɛ?

15 Ezekiel gbalɛ lɛ tsɔɔ akɛ, mɛi babaoo baayafata mɛi ni afɔ amɛ mu lɛ ahe yɛ jamɔ krɔŋŋ mli. Yehowa wie yɛ ewebii lɛ ahe akɛ: “Mahã amɛyi afa” ni “mimama tsũ lɛ baahi amɛnɔ.” (Eze. 37:26, 27; shn.) Saji nɛɛ hãa wɔkaiɔ gbalɛ ko ni bɔfo Yohane gba be ni Ezekiel egbo sɛɛ aaafee afii 700, ni no ji, “mɔ ni ta maŋtsɛ sɛi lɛ nɔ lɛ baalɛɛ emama tsũ lɛ mli” kɛha “asafoku babaoo ko” nɔ. (Kpo. 7:9, 15) Ŋmɛnɛ lɛ, mɛi ni afɔ amɛ mu lɛ kɛ asafoku babaoo lɛ fɛɛ hiɔ shi akɛ jeŋmaŋ kome, amɛji Nyɔŋmɔ webii ni ekɛ emama tsũ lɛ eha amɛnɔ kɛmiibu amɛhe.

16. Mɛni Zakaria gba yɛ ekome ni mumɔŋ Israel kɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ baafee lɛ he?

16 Zakaria, ni efata nomii ni ku amɛsɛɛ kɛba lɛ ahe lɛ hu gba akɛ, mumɔŋ Yudafoi, ni ji Kristofoi ni afɔ amɛ mu lɛ kɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ baafee ekome. Ekɛɛ akɛ, “hii nyɔŋma ni jɛ jeŋmaji lɛ . . . amli lɛ baamɔ Yudanyo kome atade kakadaŋŋ mli” ni amɛbaakɛɛ akɛ: “Wɔkɛ nyɛ baaya, ejaakɛ wɔnu akɛ, Nyɔŋmɔ kɛ nyɛ yɛ.” (Zak. 8:23) Wiemɔ ni ji “Yudanyo kome” lɛ etsɔɔɔ mɔ aŋkro ko, shi moŋ ekɔɔ kuu ko he, ni wiemɔ ni ji “nyɛ” lɛ tsɔɔ nakai, ni ŋmɛnɛ lɛ, mɛi ni afɔ amɛ mu lɛ ateŋ mɛi ni eshwɛ lɛ, loo mumɔŋ Yudafoi lɛ feɔ amɛhe mfoniri. (Rom. 2:28, 29) “Hii nyɔŋma” lɛ damɔ shi kɛhã mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ. “Amɛbaamɔ” mɛi ni afɔ amɛ mu lɛ “mli kpɛŋŋ” ni ‘amɛkɛ amɛ baaya.’  (Yes. 2:2, 3; Mat. 25:40) Wiemɔi ni ji “amɛbaamɔ mli kpɛŋŋ” kɛ “wɔkɛ nyɛ baaya” lɛ tsɔɔ bɔ ni kui enyɔ nɛɛ baafee ekome kɛmɔ shi.

17. Mɛɛ gbɛ nɔ Yesu wie ekomefeemɔ ni yɔɔ wɔteŋ ŋmɛnɛ lɛ he?

17 Eeenyɛ efee akɛ Ezekiel gbalɛ ni tsɔɔ akɛ abaafee mɛi ni jáa Nyɔŋmɔ lɛ ekome lɛ ji nɔ ni yɔɔ Yesu jwɛŋmɔŋ be ni etsɛ lɛ diɛŋtsɛ ehe akɛ tookwɛlɔ lɛ. Yesu tsɔɔ mli akɛ egwantɛŋi (mɛi ni afɔ amɛ mu) lɛ kɛ “gwantɛŋi krokomɛi” (mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ) lɛ baatsɔ “tooku kome” yɛ eshishi. (Yoh. 10:16; Eze. 34:23; 37:24, 25) Ekɔɔɔ he eko hiɛnɔkamɔ ni wɔyɔɔ lɛ, ekã shi faŋŋ akɛ Yesu kɛ blema gbalɔi lɛ awiemɔi lɛ hãa wɔnaa nɔ hewɔ ni ekomefeemɔ ni nɔ bɛ yɔɔ wɔteŋ ŋmɛnɛ lɛ! Eyɛ mli akɛ amale jamɔi amli egbala ewo kui babaoo amli moŋ, shi wɔ lɛ, wɔfee ekome yɛ gbɛ ni yɔɔ naakpɛɛ nɔ.

Ŋmɛnɛ lɛ, mɛi ni afɔ amɛ mu lɛ kɛ “gwantɛŋi krokomɛi” lɛ feɔ ekome kɛjáa Yehowa akɛ “tooku kome” (Kwɛmɔ kuku 17)

‘Mijamɔhe Lɛ Yɛ Amɛteŋ Kɛmiiya Naanɔ’

18. Tamɔ bɔ ni Ezekiel 37:28 lɛ tsɔɔ lɛ, mɛni hewɔ ehe miihia waa ni Nyɔŋmɔ webii lɛ afee mɛi ni “fataaa je lɛ he” lɛ?

18 Ezekiel gbalɛ ni tsɔɔ akɛ abaafee mɛi ni jáa Nyɔŋmɔ lɛ ekome lɛ mli naagbee wiemɔi lɛ tsɔɔ nɔ hewɔ ni ekomefeemɔ ni yɔɔ wɔteŋ lɛ sɛɛ efoŋ kɔkɔɔkɔ lɛ. (Kanemɔ Ezekiel 37:28.) Yehowa webii lɛ efee ekome ejaakɛ ejamɔhe lɛ loo jamɔ krɔŋŋ lɛ yɛ “amɛteŋ.” Ni kɛ́ amɛtee nɔ amɛfee krɔŋkrɔŋ loo amɛtsi amɛhe kɛje Satan je lɛ he lɛ, no lɛ, ejamɔhe lɛ baaya nɔ ahi amɛteŋ. (1 Kor. 6:11; Kpo. 7:14) Yesu ma nɔ mi akɛ, ehe miihia ni wɔfee mɛi ni fataaa je lɛ he. Ejɛ etsuiŋ esɔle ehã ekaselɔi lɛ akɛ: “Ataa Krɔŋkrɔŋ, kwɛmɔ amɛnɔ . . . koni amɛfee ekome . . . Amɛfataaa je  lɛ he . . . Okɛ anɔkwale lɛ afee amɛ krɔŋkrɔŋ.” (Yoh. 17:11, 16, 17) Kadimɔ akɛ, Yesu tsɔɔ akɛ kɛji wɔbaafee “ekome” lɛ, no lɛ esa akɛ wɔfee mɛi ni “fataaa je lɛ he.”

19. (a) Mɛni wɔbaanyɛ wɔfee kɛtsɔɔ akɛ, wɔji “mɛi ni kaseɔ Nyɔŋmɔ”? (b) Naagbee gbɛkɛ ni enɔjetsɛremɔ lɛ agbe Yesu lɛ, mɛɛ sane ni he hiaa waa ema nɔ mi yɛ ekomefeemɔ he?

19 Ŋmalɛ nɛɛ mli pɛ atsɔɔ akɛ Yesu tsɛ Nyɔŋmɔ akɛ “Ataa Krɔŋkrɔŋ.” Yehowa yɛ krɔŋŋ ni eja kɛmɔ shi. Yehowa fã blema Israel akɛ: “Nyɛfea krɔŋkrɔŋ, ejaakɛ miyɛ krɔŋkrɔŋ.” (3 Mo. 11:45) Wɔmiisumɔ ni wɔfee wɔhe “mɛi ni kaseɔ Nyɔŋmɔ” ni wɔbo nakai famɔ lɛ toi yɛ wɔnifeemɔi fɛɛ amli. (Efe. 5:1; 1 Pet. 1:14, 15) Kɛ́ akɛ wiemɔ ni ji “krɔŋkrɔŋ” lɛ tsu nii kɛkɔ adesai ahe lɛ, etsɔɔ akɛ “ajie amɛ ato afã.” No hewɔ lɛ, yɛ naagbee gbɛkɛ ni enɔ jetsɛremɔ lɛ agbe Yesu lɛ, ema nɔ mi akɛ kɛ́ ekaselɔi lɛ tee nɔ amɛtsi amɛhe kɛje je nɛɛ kɛ emli nibii ni hãa mɛi amli gbalaa lɛ ahe lɛ, no lɛ, ekomefeemɔ baahi amɛteŋ daa.

‘Kwɛmɔ Amɛnɔ Yɛ Mɔ Fɔŋ Lɛ Hewɔ’

20, 21. (a) Mɛni hãa wɔkɛ wɔhiɛ fɔ̃ɔ Yehowa nɔ waa akɛ ebaabu wɔhe lɛ? (b) Mɛni otswa ofai shi akɛ obaafee?

20 Ekomefeemɔ ni nɔ bɛ ni yɔɔ Yehowa Odasefoi ni yɔɔ jeŋ fɛɛ lɛ ateŋ ŋmɛnɛ lɛ tsɔɔ faŋŋ akɛ, Yehowa ehã Yesu sɔlemɔ lɛ hetoo. Yesu sɔle akɛ: ‘Kwɛmɔ amɛnɔ yɛ mɔ fɔŋ lɛ hewɔ.” (Kanemɔ Yohane 17:14, 15.) Anɔkwa, Satan nyɛɛɛ afite ekomefeemɔ ni yɔɔ Nyɔŋmɔ webii lɛ ateŋ lɛ, ni enɛ ni wɔle lɛ hãa wɔkɛ wɔhiɛ fɔ̃ɔ Nyɔŋmɔ nɔ waa akɛ ebaabu wɔhe. Yɛ Ezekiel gbalɛ lɛ mli lɛ, Yehowa wie akɛ tsei enyɔ lɛ tsɔ tso kome yɛ edɛŋ. No hewɔ lɛ, Yehowa diɛŋtsɛ etsɔ naakpɛɛ gbɛ nɔ ehã ewebii lɛ efee ekome yɛ enine ni buɔ amɛhe lɛ shishi​—ni Satan nyɛɛɛ he nɔ ko kwraa afee.

21 Belɛ, mɛni esa akɛ wɔtswa wɔfai shi akɛ wɔbaafee? Esa akɛ wɔya nɔ wɔfee bɔ fɛɛ bɔ ni wɔbaanyɛ kɛbaa ekomefeemɔ ni nɔ bɛ ni yɔɔ wɔteŋ amrɔ nɛɛ yi. Mɛɛ gbɛ kome nɔ wɔteŋ mɔ fɛɛ mɔ baanyɛ atsɔ afee nakai? No ji, esa akɛ wɔkɛ wɔhe awo jamɔ krɔŋŋ lɛ mli be fɛɛ be yɛ Yehowa mfonirifeemɔŋ sɔlemɔ shĩa lɛ. Wɔbaasusu nɔ ni jamɔ krɔŋŋ ni tamɔ nɛkɛ lɛ biɔ ni wɔfee lɛ he yɛ yitsei ni nyiɛ sɛɛ lɛ amli.

^ kk. 7 Aaafee afii 200 dani Ezekiel nine baashɛ gbalɛ nɛɛ nɔ lɛ, Asiriabii lɛ baŋɔ wekui nyɔŋma maŋtsɛyeli lɛ mli bii lɛ (“Efraim tso lɛ”) nom.​—2 Maŋ. 17:23.

^ kk. 11 Agbala gbalɛ nɛɛ mli fitsofitso yɛ wolo nɛɛ Yitso 8 lɛ mli.