Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 AKRABATSA 15A

Nyɛmimɛi Yei Ashawoi Lɛ

Nyɛmimɛi Yei Ashawoi Lɛ

Ezekiel yitso 23 lɛ, wɔnaa bɔ ni Yehowa kɛ dɔlɛ wie eshi ewebii lɛ akɛni amɛyeee lɛ anɔkwa lɛ hewɔ. Nibii pii yɛ yitso nɛɛ mli ni tamɔ nɔ ni awie yɛ yitso 16 lɛ mli lɛ nɔŋŋ. Yitso 16 lɛ kɛ 23 lɛ fɛɛ kɛ maŋbii lɛ to ashawoi ahe. Awie Yerusalem he akɛ enyɛmi yoo onukpa ji Samaria. Yitsei enyɔ lɛ fɛɛ tsɔɔ bɔ ni Yerusalem ni ji gbekɛ lɛ kɔ enyɛmi yoo onukpa lɛ nane yɛ ashawofeemɔ lɛ mli, shi enɔfɔŋfeemɔ lɛ kɛ ejwamaŋbɔɔ lɛ fe enyɛmi yoo onukpa lɛ nɔ lɛ po. Yɛ yitso 23 lɛ mli lɛ, Yehowa wo nyɛmimɛi yei enyɔ nɛɛ gbɛ́i: Ewo onukpatsɛ lɛ, ni ji Samaria lɛ Ohola, ni Samaria ji Israel wekui nyɔŋma maŋtsɛyeli lɛ maŋtiase; ni ewo fiootsɛ lɛ, ni ji Yerusalem lɛ Oholiba, ni Yerusalem ji Yuda maŋtiase. *​—Eze. 23:1-4.

Nibii krokomɛi hu yɛ ni je amɛhe yɛ yitsei enyɔ nɛɛ amli. Nibii nɛɛ ateŋ nɔ ni sa kadimɔ waa lɛ ekomɛi nɛ: Kulɛ, yei nɛɛ ji Yehowa ŋamɛi, shi sɛɛ mli lɛ amɛje esɛɛ ni amɛbatsɔmɔ ashawoi. Agbɛnɛ hu, awo amɛ shi akɛ, hiɛnɔkamɔ ko yɛ kɛhã amɛ. Yitso 23 lɛ ewieee tɛ̃ɛ akɛ, abaakpɔ̃ amɛ moŋ, shi Yehowa wie yɛ yitso nɛɛ mli akɛ: “Mafo ojeŋba sha lɛ kɛ oshawofeemɔ lɛ sɛɛ.” Sane nɛɛ kɛ nɔ ni awie yɛ yitso 16 lɛ mli lɛ kpãa gbee.​—Eze. 16:16, 20, 21, 37, 38, 41, 42; 23:4, 11, 22, 23, 27, 37.

Ani Yei Nɛɛ Feɔ Kristendom He Mfoniri?

Be ko ni eho lɛ, awie yɛ wɔwoji amli akɛ, nyɛmimɛi yei enyɔ ni ji Ohola kɛ Oholiba lɛ feɔ Kristendom he mfoniri, titri lɛ, efãi titrii enyɔ ni ji Katolik kɛ Protɛstant sɔlemɔi lɛ. Shi be ni wɔsɔle ni wɔsusu nii ahe ni wɔtao nii amli jogbaŋŋ lɛ, wɔna akɛ nakai mligbalamɔ lɛ teɔ sanebimɔi komɛi ashi. Ani Yehowa eŋɔ Kristendom akɛ eŋa pɛŋ? Ani Kristendom kɛ Yehowa efee kpaŋmɔ pɛŋ? Dabi kwraa. Be ni Yesu batsɔ “kpaŋmɔ hee” ni Yehowa kɛ mumɔŋ Israel fee lɛ teŋdamɔlɔ lɛ, no mli lɛ, Kristendom bako shihilɛ mli po; agbɛnɛ hu, Kristendom fatako mumɔŋ Israel, ni ji Kristofoi ni afɔ amɛ mu lɛ ahe dã. (Yer. 31:31; Luka 22:20) Yesu bɔfoi lɛ agbele sɛɛ kwraa dani Kristendom ba shihilɛ mli. Eba shihilɛ mli yɛ afi 300 Ŋ.B. afii lɛ amli akɛ amale jamɔ, ni ji “jwɛi lɛ” loo amale Kristofoi ni Yesu wie amɛhe yɛ egbalɛ ni kɔɔ wiiti kɛ jwɛi lɛ he lɛ mli lɛ.​—Mat. 13:24-30.

Nɔ kroko hu ni hãa wɔnaa akɛ Ohola kɛ Oholiba efeee Kristendom he mfoniri lɛ nɛ: Yehowa hã Yerusalem kɛ Samaria ni yeee anɔkwa lɛ ná hiɛnɔkamɔ akɛ kɛ́ amɛtsake amɛgbɛi lɛ, ekɛ amɛ baaku sɛɛ kɛba amɛtsutsu shihilɛ lɛ mli ekoŋŋ. (Eze. 16:41, 42, 53-55) Ani Biblia lɛ tsɔɔ akɛ hiɛnɔkamɔ ko ni tamɔ nakai yɛ kɛhã Kristendom? Dabi! Ebɛ hiɛnɔkamɔ ko dɔŋŋ tamɔ Babilon Kpeteŋkpele lɛ mli jamɔŋ krokomɛi ni eshwɛ lɛ nɔŋŋ.

No hewɔ lɛ, Ohola kɛ Oholiba ni awie amɛhe yɛ Biblia lɛ mli lɛ damɔɔɔ shi kɛhãaa Kristendom. Shi amɛnifeemɔ lɛ yeɔ ebuaa wɔ ni wɔnuɔ sane ko ni he hiaa waa shishi, no ji: bɔ ni Yehowa naa mɛi ni gbeɔ egbɛ́i krɔŋkrɔŋ lɛ he guɔ, ni amɛhiii shi yɛ etaomɔ nii kɛhã jamɔ krɔŋŋ lɛ naa lɛ ehãa. Kristendom yeɔ fɔ waa yɛ enɛ gbɛfaŋ ejaakɛ, esɔlemɔi babaoo lɛ kɛɔ akɛ, amɛmiijá Nyɔŋmɔ ni kɛ Biblia lɛ hã wɔ lɛ. Kɛfata he lɛ, amɛkɛɔ akɛ Yehowa Bi ni esumɔɔ, Yesu Kristo, ji amɛhiɛnyiɛlɔ. Shi amɛmiimale, ejaakɛ amɛkɛɔ akɛ Yesu ji nyɔŋmɔi etɛ ni efee ekome lɛ fã, ni amɛbooo efamɔ ni mli kã shi faŋŋ akɛ amɛfee mɛi ni ‘fataaa je lɛ he’ lɛ toi. (Yoh. 15:19) Akɛni Kristendom yaa nɔ ekɛ ehe woɔ amagajamɔ kɛ pɔlitis mli hewɔ lɛ, ehã ana faŋŋ akɛ, efata “ashawo kpeteŋkpele lɛ” he. (Kpo. 17:1) Ŋwanejee ko bɛ he akɛ, ebaaná haomɔi ni baaba amale jamɔi fɛɛ ni yɔɔ je lɛ mli lɛ anɔ lɛ eko!

^ kk. 3 Gbɛ́ii nɛɛ sa kadimɔ waa. Ohola shishi ji “Emama Tsũ [Ni Ajáa Yɛ Mli]”​—ni eeenyɛ efee akɛ, Yehowa kɛ enɛ miitsɔɔ bɔ ni Israel mamɔ lɛ diɛŋtsɛ ejamɔhei moŋ fe nɔ ni ebaayajá Yehowa yɛ esɔlemɔ shĩa ni yɔɔ Yerusalem lɛ. Oholiba hu shishi ji, “Mimama Tsũ [Ni Ajáa Yɛ Mli] Lɛ Yɛ Emli.” No mli lɛ, Yerusalem ji he ni Yehowa sɔlemɔ shĩa lɛ yɔɔ.