Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 AKRABATSA 14A

Nɔ Ni Wɔkaseɔ Yɛ Ezekiel Ninaa Ni Kɔɔ Sɔlemɔ Shĩa Lɛ He Lɛ Mli

Nɔ Ni Wɔkaseɔ Yɛ Ezekiel Ninaa Ni Kɔɔ Sɔlemɔ Shĩa Lɛ He Lɛ Mli
EPUEMƆ

Awó Jamɔ Krɔŋŋ Nɔ Gojoo Ni Abu He

Sɔlemɔ shĩa ni Ezekiel na yɛ ninaa lɛ mli lɛ ma “gɔŋ ko ni kwɔ waa nɔ” (1). Ani wɔwó jamɔ krɔŋŋ nɔ gojoo, ni wɔkɛfee nɔ ni he hiaa wɔ fe fɛɛ yɛ wɔshihilɛ mli?

Gbogbo ni bɔle sɔlemɔ shĩa lɛ he kɛkpe lɛ (2) kɛ gbɛ agbo ni kã sɔlemɔ shĩa lɛ kɛ ehe gbogbo lɛ teŋ lɛ (3) kaiɔ wɔ akɛ esaaa akɛ wɔhãa nɔ ko buleɔ jamɔ ni wɔkɛhãa Yehowa lɛ. Ezekiel 42:20 lɛ tsɔɔ akɛ, atswa gbogbo lɛ koni akɛfo “he ni yɔɔ krɔŋkrɔŋ” kɛ “he ni bɛ krɔŋkrɔŋ lɛ” teŋ. Yɛ ŋmalɛ nɛɛ mli lɛ, wiemɔ ni ji “he ni bɛ krɔŋkrɔŋ lɛ” damɔ shi kɛhã daa gbi shihilɛ mli nifeemɔi ni fataaa wɔjamɔŋ nifeemɔi lɛ ahe. Kɛ́ esa akɛ ajie nibii ni tamɔ nɛkɛ lɛ po kɛjɛ jamɔ krɔŋŋ he kɛya sɛɛ shɔŋŋ lɛ, belɛ ani esaaa akɛ Yehowa tsuji jieɔ nifeemɔi ni he tseee loo jeŋba sha kɛjeɔ amɛshihilɛ mli kwraa ŋmɛnɛ?

Naanɔ Jɔɔmɔi

Faa ko miiho kɛmiijɛ sɔlemɔ shĩa lɛ jamɔhe lɛ, ni eyaboteɔ nui babaoo ko mli, ni ehãa gbɔmɛi kɛ nibii hiɔ wala mli ni shikpɔŋ lɛ hu baa nii (4). Wɔbaasusu jɔɔmɔi nɛɛ ahe yɛ wolo nɛɛ Yitso 19 lɛ mli.

Taomɔ Nii Kome Too Kɛhã Mɔ Fɛɛ Mɔ

Kponɔgbɛ agbói ni kwɔlɔ lɛ (5) kɛ mligbɛ agbói lɛ (9) kaiɔ wɔ akɛ Yehowa yɛ jeŋba he mlai ni ja kɛhã mɛi fɛɛ ni taoɔ amɛkɛ amɛhe awo jamɔ krɔŋŋ mli lɛ. Kadimɔ akɛ kponɔgbɛ agbói lɛ adaramɔ tamɔ mligbɛ agbói lɛ nɔŋŋ. Ni enɛ sa jogbaŋŋ, ejaakɛ Yehowa kpaa etsuji fɛɛ gbɛ akɛ amɛshɛ taomɔ nii kome too lɛ nɔŋŋ he, ekɔɔɔ he eko hegbɛi ni amɛyɔɔ loo nɔ ni amɛtsuɔ yɛ esɔɔmɔ lɛ mli.

Niyeli Yɛ Yehowa Okpɔlɔ Lɛ He

Niyelihei lɛ (8) kaiɔ wɔ akɛ, yɛ blema lɛ, afɔlei komɛi yɛ ni kɛ́ maŋbii lɛ kɛba sɔlemɔ shĩa lɛ, amɛnyɛɔ amɛyeɔ eko, no hewɔ lɛ, yɛ gbɛ ko nɔ lɛ, etamɔ nɔ ni amɛkɛ Yehowa miiye nii. Shi esoro bɔ ni Kristofoi ni sɔmɔɔ yɛ mfonirifeemɔŋ sɔlemɔ shĩa lɛ mli ŋmɛnɛ lɛ tsuɔ enɛ he nii, ejaakɛ ashã “afɔle kome” ahã wɔ momo. (Heb. 10:12) Fɛɛ sɛɛ lɛ, wɔyaa nɔ wɔkɛ yijiemɔ afɔlei hãa.​—Heb. 13:15.

Nɔ Ko Ni Nyɔŋmɔ Ema Nɔ Mi

Ekolɛ, wɔbaanu he akɛ, bɔ ni asusu nibii fɛɛ fitsofitso yɛ ninaa lɛ mli lɛ fa tsɔ. Shi nibii nɛɛ ni asusu lɛ tsɔɔ wɔ nɔ ko ni he hiaa waa: Ehãa wɔnáa nɔmimaa akɛ, bɔ ni asusu nibii nɛɛ fitsofitso ni eko eko tsakeee lɛ, nakai nɔŋŋ bɔ fɛɛ bɔ ni fee lɛ, Yehowa yiŋ ni eto akɛ ebaato jamɔ krɔŋŋ shishi ekoŋŋ lɛ baaba mli, etsakeŋ kɔkɔɔkɔ. Eyɛ mli akɛ Ezekiel etsĩii tã akɛ ena gbɔmɛi yɛ eninaa lɛ mli moŋ, shi eŋmala hiɛdɔɔ wiemɔi ni Yehowa kɛ osɔfoi lɛ kɛ lumɛi lɛ kɛ maŋbii lɛ wie lɛ eshwie shi. Enɛ tsɔɔ akɛ, esa akɛ Nyɔŋmɔ tsuji fɛɛ aye etaomɔ nii ni ja lɛ anɔ.