Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 AKRABATSA 1A

Mɛni Ji Jamɔ?

Mɛni Ji Jamɔ?

Abaanyɛ atsɔɔ jamɔ shishi akɛ, “bulɛ kɛ suɔmɔ kpo ni ajieɔ atsɔɔ nyɔŋmɔ ko.” Yɛ Biblia lɛ mli lɛ, Hebri kɛ Greek wiemɔi ni atsɔɔ shishi akɛ “já” loo “jamɔ” lɛ baanyɛ atsɔɔ bulɛ ni mli kwɔ ni ajieɔ lɛ kpo atsɔɔ gbɔmɔ loo ŋwɛibɔfo ko loo he shi ni abaa ahãa lɛ. (Mat. 28:9) Abaanyɛ akɛ wiemɔi nɛɛ nɔŋŋ atsu nii kɛ́ aawie jamɔ ni mɔ ko jáa Nyɔŋmɔ loo wɔŋ ko lɛ he. (Yoh. 4:23, 24) He ni akɛ wiemɔi nɛɛ baatsu nii yɛ lɛ ni baatsɔɔ bɔ ni esa akɛ anu shishi ahã.

Yehowa pɛ esa akɛ wɔjá, ejaakɛ lɛ ebɔ nibii fɛɛ, ni lɛ ji Jeŋ Muu Fɛɛ Nɔyelɔ. (Kpo. 4:10, 11) Kɛ́ wɔfee nibii ni tsɔɔ akɛ wɔkpɛlɛɔ nɔ akɛ Yehowa ji Jeŋ Muu Fɛɛ Nɔyelɔ, ni wɔwo egbɛ́i lɛ hiɛnyam lɛ, belɛ wɔmiijá lɛ. (Lala 86:9; Mat. 6:9, 10) Ezekiel wolo lɛ wieɔ nibii enyɔ nɛɛ, ni ji Jeŋ Muu Fɛɛ Nɔyelɔ ni Yehowa ji lɛ, kɛ egbɛ́i lɛ ahe waa diɛŋtsɛ. Akɛ wiemɔ ni ji “Nuŋtsɔ Ofe Yehowa” lɛ tsu nii shii 217 yɛ Ezekiel wolo lɛ pɛ mli, ni akɛ wiemɔ ni ji “nyɛbaaná nyɛle akɛ miji Yehowa” lɛ kɛ ekrokomɛi ni tamɔ nakai lɛ tsu nii shii 55 yɛ mli.​—Eze. 2:4; 6:7.

Nibii ni mɔ ko feɔ lɛ ni hãa anaa mɔ ni ejáa, shi jeee bɔ ni enuɔ he ehãa yɛ mɔ lɛ he lɛ kɛkɛ. No hewɔ lɛ, kɛ́ wɔkɛɛ wɔmiijá Yehowa lɛ, esa akɛ ana yɛ wɔnifeemɔi amli. (Yak. 2:26) Be ni wɔjɔɔ wɔhe nɔ wɔhã Yehowa lɛ, wɔkã lɛ kitã akɛ wɔbaabo lɛ toi yɛ nibii fɛɛ amli ejaakɛ lɛ ji wɔ-Nɔyelɔ, ni wɔbaawo egbɛ́i lɛ hiɛnyam waa. Kɛ́ obaakai lɛ, be ni Yesu hãa Satan hetoo yɛ kaa ni ji etɛ lɛ mli lɛ, etsɔɔ akɛ jamɔ kɛ “sɔɔmɔ krɔŋŋ” yɛ tsakpaa. (Mat. 4:10) Akɛni wɔji Yehowa jálɔi hewɔ lɛ, wɔmiisumɔ ni wɔsɔmɔ lɛ. * (5 Mo. 10:12) Nibii fɛɛ ni wɔfeɔ yɛ Yehowa asafo lɛ mli ni biɔ ni wɔkɛ wɔhe ashã afɔle lɛ ji sɔɔmɔ krɔŋŋ. Mɛni ji nibii nɛɛ ekomɛi?

Wɔkɛ sɔɔmɔ krɔŋŋ hãa Yehowa yɛ gbɛi pii anɔ, ni ehiɛ sɔɔ eko fɛɛ eko waa. Kɛ́ wɔye mɛi odase, wɔtee kpeei yɛ Maŋtsɛyeli Asa lɛ nɔ, ni wɔye wɔbua kɛmamɔ kpeehei ni wɔkura amɛ lɛ, wɔkɛ sɔɔmɔ krɔŋŋ miihã Nyɔŋmɔ. Kɛfata he lɛ, kɛ́ wɔfee weku jamɔ, wɔtsu onia koni akɛye abua nyɛmimɛi ni ehia amɛ loo wɔ diɛŋtsɛ wɔye wɔbua amɛ, wɔkɛ wɔhe hã kɛhã nitsumɔi srɔtoi ni atsuɔ yɛ wɔkpeei wuji lɛ ashishi, loo wɔyasɔmɔ yɛ Betel lɛ, nomɛi hu lɛ, sɔɔmɔ krɔŋŋ ni. (Heb. 13:16; Yak. 1:27) Kɛ́ wɔhã jamɔ krɔŋŋ he hia wɔ fe nibii krokomɛi fɛɛ yɛ wɔshihilɛ mli lɛ, ‘wɔkɛ sɔɔmɔ krɔŋŋ baahã jetsɛremɔ kɛ jenamɔ’ fɛɛ. Eŋɔɔ wɔnaa waa akɛ wɔmiijá Yehowa, wɔ-Nyɔŋmɔ lɛ!​—Kpo. 7:15.

^ par. 5 Abaanyɛ atsɔɔ Hebri wiemɔi ni atsɔɔ shishi akɛ “já” loo “jamɔ” lɛ ateŋ ekome shishi hu akɛ “sɔmɔ.” No hewɔ lɛ, wɔnyɛŋ wɔkɛɛ akɛ wɔmiijá mɔ ko kɛji wɔsɔmɔɔɔ lɛ.​—2 Mo. 3:12, shn.