Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Wɔsɛɛ Be Ko Ni Yɔɔ Nyam

Wɔsɛɛ Be Ko Ni Yɔɔ Nyam

Etsɛŋ ni abaajie Satan kɛ daimonioi lɛ fɛɛ kɛjɛ shihilɛ

Satan kɛ edaimonioi lɛ eyaŋ nɔ amɛlakaŋ adesai be babaoo dɔŋŋ. Yehowa eshɛrɛ amɛ kɛjɛ ŋwɛi eshwie momo po. (Kpojiemɔ 12:9) Yɛ wɔsɛɛ be fioo ko mli lɛ, Nyɔŋmɔ baatsu nii ekoŋŋ eshi Satan kɛ edaimonioi lɛ. Bɔfo Yohane kɛɛ yɛ ninaa ko ni jɛ Nyɔŋmɔ ŋɔɔ lɛ mli akɛ: “Ni mina bɔfo kroko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfele lɛ kɛ kɔsɔŋkɔsɔ kpeteŋkpele ko yɛ edɛŋ. Ni emɔ drako lɛ, blema onufu lɛ ni ji diabolo (Abonsam) kɛ Satan lɛ, ni efi lɛ afii akpe, ni eŋɔ lɛ ewo bu kwɔŋkwɔŋ lɛ mli, ni eŋa eyi ni esɔo naa, koni ekashishiu jeŋmaji lɛ dɔŋŋ kɛyashi beyinɔ ni aaagbe afii akpe lɛ naa.” (Kpojiemɔ 20:1-3) Yɛ sɛɛ mli lɛ, abaakpata Abonsam kɛ edaimonioi lɛ ahiɛ kwraa kɛya naanɔ.—Kpojiemɔ 20:10.

Abaakpata gbɔmɛi fɔji ni yɔɔ shikpɔŋ nɔ lɛ hu ahiɛ.—Lala 37:9, 10; Luka 13:5.

 Mɛi ni Egboi lɛ Ahiɛ Baaka Ekoŋŋ!

Gbohii lɛ baaba wala mli ekoŋŋ yɛ shikpɔŋ nɔ

Yɛ be mli ni ajie Satan kɛ daimonioi lɛ kɛjɛ shihilɛ mli sɛɛ lɛ, Yehowa kɛ jɔɔmɔi babaoo baaha adesai. Obaakai akɛ gbohii lɛ bɛ wala mli, amɛbɛ shihilɛ mli kwraa. Yesu kɛ gbele to wɔ he—wɔ ni awɔɔ vii ni alaaa po. (Yohane 11:11-14) Efee nakai ejaakɛ ele akɛ be ko baashɛ ni abaatsĩɛ mɛi fɛɛ ni ewɔ yɛ gbele mli lɛ ahiɛ kɛba wala mli. Ekɛɛ: “Ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui amli lɛ aaanu egbee, ni amɛaaje kpo.”—Yohane 5:28, 29; okɛto Bɔfoi lɛ Asaji 24:15 he.

Akɛ amɛ baaba wala mli yɛ shikpɔŋ nɛɛ nɔ. Yɛ nɔ najiaŋ ni aaatswa adafi akɛ mɛi komɛi egboi lɛ, amaniɛbɔi ni yɔɔ miishɛɛ baaha ale mɛi ni atee amɛ shi kɛba wala mli lɛ ahe sane! Mɛɛ miishɛɛ eeeji nɛkɛ akɛ wɔɔkpee wɔsuɔlɔi atuu kɛjɛ gbohii abui amli kɛba!