Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 FÃ 2

Te Ooofee Tɛŋŋ Ole Anɔkwale Ni Kɔɔ Nyɔŋmɔ He Lɛ?

Te Ooofee Tɛŋŋ Ole Anɔkwale Ni Kɔɔ Nyɔŋmɔ He Lɛ?

1, 2. Mɛɛ nɔkwɛmɔnɔ ko tsɔɔ akɛ ehe miihia ni aná tɛ ni afo afɔ̃ shi kɛha jamɔ mli saji anɔkpɛlɛmɔ?

TE WƆƆFEE tɛŋŋ wɔle Nyɔŋmɔ? Ani ehe miihia ni wɔpɛi jamɔi babaoo lɛ atsɔɔmɔi lɛ fɛɛ amli wɔkwɛ? Ehiŋ nakai feemɔ. Kɛji wɔbaanyɛ wɔfee nakai po lɛ, te wɔɔfee tɛŋŋ wɔle nɔ ni ji tsɔɔmɔ ni ja hu?

2 Eka shi faŋŋ akɛ, yɛ susumɔi srɔtoi babaoo ni kɔɔ Nyɔŋmɔ he lɛ fɛɛ hewɔ lɛ, ehe miihia ni wɔná gbɛ ní wɔɔtsɔ nɔ wɔle anɔkwale lɛ, tɛ ko ní afo afɔ̃ shi ni gbɔmɛi baanyɛ akpã gbee yɛ he. Ákɛ nɔkwɛmɔnɔ lɛ: Ŋɔɔ lɛ akɛ naataamɔ ko ete shi yɛ jara lɛ nɔ, yɛ bɔ ni mama ko kɛlɛ ji lɛ he. Mama hɔ̃ɔlɔ lɛ miikɛɛ akɛ mama lɛ kɛlɛ ji mitai etɛ, shi mɔ ni heɔ lɛ susuɔ akɛ eshɛɛɛ nakai. Te aaafee tɛŋŋ ana sane nɛɛ naa? Kɛtsɔ susumɔ nɔ̃ ní akɛaasusu mama lɛ nɔ.

3. Mɛni hewɔ aŋma Biblia lɛ?

3 Ani susumɔ nɔ̃, ni ji tɛ ko ni afo afɔ̃ shi yɛ kɛha jamɔ mli saji anɔkpɛlɛmɔ? Hɛɛ, no ji Biblia lɛ. Nyɔŋmɔ ha aŋma Biblia lɛ koni gbɔmɛi ni yɔɔ he fɛɛ he lɛ anyɛ ale anɔkwale ni kɔɔ ehe lɛ. Ákala ekomekomei akpekpei toi akpei abɔ. Átsɔɔ Biblia muu lɛ fɛɛ loo efãi komɛi ashishi kɛtee wiemɔi ni fa fe 2,100 mli. Mɔ fɛɛ mɔ kɛkɛ baanyɛ akane anɔkwale ni kɔɔ Nyɔŋmɔ he lɛ yɛ lɛ diɛŋtsɛ emaŋ wiemɔ mli.

4. Mɛɛ saji nɛkɛ yɔɔ Biblia lɛ mli?

4 Biblia lɛ ji nikeenii ní jara wa ní jɛ Nyɔŋmɔ ŋɔɔ. Egbálaa nibii ní kulɛ wɔnyɛŋ wɔle kɔkɔɔkɔ lɛ amli ehaa wɔ. Egbaa wɔ mɛi  ni yɔɔ mumɔi ashihilɛhe lɛ ahe saji. Ejieɔ Nyɔŋmɔ susumɔi, esu kɛ baŋ, kɛ eyiŋtoi akpo etsɔɔ wɔ. Egbaa wɔ bɔ ni ekɛ gbɔmɛi ye ha yɛ afii akpei abɔ ní eho lɛ amli lɛ he sane. Ewieɔ nibii ni baaba wɔsɛɛ lɛ ahe. Ni etsɔɔ wɔ bɔ ni wɔɔfee ni wɔle gbɛ ni yaa naanɔ wala mli lɛ.

Nɔ Hewɔ ni Obaanyɛ Ohe Biblia lɛ Oye

5. Mɛɛ nɔkwɛmɔnɔ tsɔɔ akɛ Biblia lɛ kɛ jeŋ nilee kpãa gbee?

5 Wɔyɛ yiŋtoi babaoo ahewɔ ni wɔbaanyɛ wɔhe wɔye akɛ Biblia lɛ ji Nyɔŋmɔ Wiemɔ lɛɛlɛŋ. Yiŋtoo kome ji akɛ, Biblia lɛ kɛ jeŋ nilee kpãa gbee. Yɛ blema beaŋ lɛ, gbɔmɛi ni yɔɔ je lɛŋ fɛɛ lɛ susu akɛ shikpɔŋ lɛ ma nɔ ko nɔ. Ákɛ nɔkwɛmɔnɔ lɛ, yɛ Afrika Anaigbɛ nɛkɛ lɛ, be ko lɛ gbɔmɛi he amɛye akɛ shikpɔŋ lɛ ma onufu ko ní ekota ehe nɔ, ni bɔ ni ekota ehe kɛjwere shi lɛ ekomekomei 3,500 yɛ shikpɔŋ lɛ ŋwɛigbɛ, ni ekomekomei 3,500 hu yɛ shishigbɛ. Ni kɛlɛ, yɛ jeŋ nilee kɛ gbeekpãmɔ naa lɛ, Biblia ŋmalɔ ko ŋma nɔ ni fe afii 3,500 ní eho nɛ akɛ Nyɔŋmɔ ŋɔɔ “shikpɔŋ lɛ etsotsoroɔ shi ni jeee nɔ ko nɔ.”​—Hiob 26:7.

6. Mɛni ji odaseyeli kpele fe fɛɛ ni tsɔɔ akɛ Biblia lɛ jɛ Nyɔŋmɔ ŋɔɔ?

6 Odaseyeli kpele fe fɛɛ ni tsɔɔ akɛ Biblia lɛ jɛ Nyɔŋmɔ ŋɔɔ lɛɛlɛŋ lɛ ji ja, ni saji ni aŋmala yɛ mli ni gbaa wɔsɛɛ be mli saji lɛ ja kɛmɔ shi lɛ. Ákɛ nɔ ni tamɔɔɔ adesai agbalɛi lɛ, Nyɔŋmɔ le wɔsɛɛ be mli saji diɛŋtsɛ; nɔ fɛɛ nɔ ní ekɛɔ lɛ baa mli anɔkwale.

7. Mɛni ji Biblia gbalɛi komɛi ni ba mli yɛ blema beaŋ?

7 Biblia mli gbalɛi ohai abɔ ba mli yɛ blema bei amli. Ákɛ nɔkwɛmɔnɔ lɛ, afii 700 kɛtsɔ hiɛ, ni Biblia lɛ wie yɛ gbɛ ní ja kɛmɔ shi nɔ akɛ abaafɔ́ Yesu yɛ Betlehem maŋ lɛ mli, ni nakai ji bɔ ni eba lɛ. (Mika 5:1; Mateo 2:3-9) Kɛfata gbalɛi krokomɛi babaoo ní kɔɔ Yesu he lɛ ahe lɛ, Biblia lɛ gba efɔ̃ shi hu akɛ oblayoo fro ko baafɔ́ lɛ, ni yɛ naagbee lɛ, abaatsɔɔ esɛɛgbɛ kɛha jwiɛtɛi kukuji 30. Nakai gbalɛi lɛ hu ba mli anɔkwale. Eka shi faŋŋ akɛ adesa ko nyɛŋ agba nibii nɛɛ eshwie shi ní eba mli kɔkɔɔkɔ!​—Yesaia 7:14; Zakaria 11:12, 13; Mateo 1:22, 23; 27:3-5.

8. Mɛɛ Biblia gbalɛi komɛi náa emlibaa ŋmɛnɛ, ni mɛni nɔ mi nibii nɛɛ maa?

8 Biblia gbalɛi babaoo miiná amɛ mlibaa  yɛ wɔbe nɛɛ amli. Amɛteŋ fioo komei ni eba mli nɛ.

  • “Maŋ aaate shi awo maŋ [yɛ tawuu mli], ni maŋtsɛyeli aaate shi awo maŋtsɛyeli; ni shikpɔŋhosomɔi wuji aaaba, ni gbele helai kɛ hɔmɔ baaba hei srɔtoi fɛɛ.”​—Luka 21:10, 11.

  • “Mlakwamɔ aaafa” babaoo.​—Mateo 24:12.

  • “Naagbee gbii lɛ anɔ lɛ . . . gbɔmɛi aaatsɔmɔ hesuɔlɔi, shika suɔlɔi, . . . fɔlɔi anɔ toigbolɔi, . . . mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, . . . henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.”​—2 Timoteo 3:1-5.

Ani okɛ wɔ kpãaa gbee akɛ nɛkɛ nibii nɛɛ miiya nɔ yɛ wɔbei nɛɛ amli? Bɔ ni Biblia gbalɛ ji anɔkwale ní eja pɛpɛɛpɛ hu lɛ tsɔɔ akɛ Biblia lɛ jeee wolo folo ko kɛkɛ. Eji Nyɔŋmɔ Wiemɔ ní jɛ mumɔŋ!​—2 Timoteo 3:16.

Ani Atsake Biblia Lɛ?

9, 10. Mɛni tsɔɔ akɛ Nyɔŋmɔ eŋmɛko adesai agbɛ ní amɛtsake Biblia lɛ?

9 Ŋɔɔ lɛ akɛ oji nitsumɔhe ko ní feɔ guɔyeli nibii lɛ anɔtsɛ, ni oŋmala mlai okpɛtɛ nitsumɔhe lɛ kɛha onitsulɔi lɛ. Kɛ́ henyɛlɔ ko tsake nibii ní oŋmala okpɛtɛ shi lɛ, mɛni obaafee? Ani ojajeŋ nibii ní etsake lɛ? Yɛ nakai gbɛ nɔ nɔŋŋ lɛ, Nyɔŋmɔ eŋmɛɛɛ gbɛ ní gbɔmɛi atsake anɔkwale ni yɔɔ e-Wiemɔ ni ji Biblia lɛ mli lɛ.

10 Mɛi ni eka akɛ amɛaatsake tsɔɔmɔi ní yɔɔ Nyɔŋmɔ Wiemɔ lɛ mli lɛ yeko omanye. Kɛ́ wɔkɛ Biblia ní wɔhiɛ ŋmɛnɛ lɛ to blema Bibliai ní hi shi lɛ ahe lɛ, amɛyeɔ hegbɔ pɛpɛɛpɛ. Enɛ tsɔɔ akɛ Biblia lɛ tsakeko yɛ afii abɔ ní eho lɛ amli.