ŊMƐNƐ lɛ, ojotswaa kɛ tawuu kɛ awuiyeli eyi je lɛŋ fɛɛ. Nibii ni wɔkaneɔ yɛ adafitswaa woji amli, nibii ni wɔnaa yɛ TV nɔ, kɛ nibii ni wɔnuɔ yɛ redio nɔ lɛ tsɔɔ nakai. Bo diɛŋtsɛ hu oyɛ onaagbai. Ekolɛ hela ko miigba onaa, loo mɔ ko ni osumɔɔ esane waa lɛ egbo.

Bi ohe akɛ:

  • Ani nɛkɛ ji bɔ ni Nyɔŋmɔ sumɔɔ ni mi kɛ miweku lɛ shihilɛ afee?

  • Mɛni baanyɛ aye abua mi ni makpee minaagbai lɛ anaa?

  • Ani be ko baaba ni wɔbaaná toiŋjɔlɛ diɛŋtsɛ yɛ shikpɔŋ nɛɛ nɔ?

Biblia lɛ hãa sanebimɔi nɛɛ fɛɛ ahetoo.

 BIBLIA LƐ HÃA WƆLEƆ AKƐ, NYƆŊMƆ BAAFEE NIBII KPAKPAI PII YƐ SHIKPƆŊ LƐ NƆ.

 BƆ NI OBAAFEE ONÁ SAJI NI YƆƆ BIBLIA LƐ MLI LƐ AHE SƐƐ

Ekolɛ, obaasusu akɛ nibii ni wɔwie he yɛ baafai ni tsɔ hiɛ lɛ amli lɛ nyɛŋ aba mli kɔkɔɔkɔ. Shi Nyɔŋmɔ ewo shi akɛ, etsɛŋ kwraa, ebaatsu nibii nɛɛ ahe nii yɛ shikpɔŋ lɛ nɔ, ni Biblia lɛ hãa wɔleɔ gbɛ ni ebaatsɔ nɔ efee nakai.

Agbɛnɛ hu, Biblia lɛ tsɔɔ wɔ nibii ni kɛ́ wɔfee lɛ, ebaahã wɔná miishɛɛ bianɛ. Mɛni ji nibii komɛi ni gbaa onaa? Ani eji shika sane, weku sane, hela ko, loo mɔ ko ni osumɔɔ esane waa ni egbo? Ekɔɔɔ he eko nɔ ni eji lɛ, Biblia lɛ baanyɛ aye abua bo ni onyɛ okpee naa. Ehãa sanebimɔi ni nyiɛ sɛɛ nɛɛ ahetoo, bɔ ni afee ni wɔkaye wɔtsui tsɔ.

 Obɔi wolo nɛɛ kanemɔ, ni no kɛkɛ po tsɔɔ akɛ, oosumɔ ni okase nii kɛjɛ Biblia lɛ mli. Wolo nɛɛ baaye abua bo. Sanebimɔi yɛ wolo lɛ mli kuku fɛɛ kuku he, ni enɛ baaye abua bo ni onu Biblia lɛ shishi jogbaŋŋ. Mɛi akpekpei abɔ náa miishɛɛ waa kɛ́ Yehowa Odasefoi kɛ amɛ miikase Biblia lɛ. Wɔle akɛ bo hu obaaná he miishɛɛ. Yaa nɔ okase Biblia lɛ, ni Nyɔŋmɔ baajɔɔ bo!