Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 YITSO ETƐ

Mɛni Hewɔ Nyɔŋmɔ Bɔ Adesai?

Mɛni Hewɔ Nyɔŋmɔ Bɔ Adesai?

1. Mɛni hewɔ Nyɔŋmɔ bɔ gbɔmɛi adesai?

YIŊTOO kpakpa ko hewɔ Nyɔŋmɔ bɔ gbɔmɛi. Ebɔ Adam, ni ji klɛŋklɛŋ nuu lɛ, kɛ Hawa, ni ji klɛŋklɛŋ yoo lɛ, koni amɛhi abɔɔ fɛfɛo ko mli. Ebɔ amɛ ni amɛfɔ, ni amɛsaa shikpɔŋ lɛ nɔ hei krokomɛi ni eshwɛ lɛ koni etsɔ paradeiso, ni agbɛnɛ hu, amɛkwɛ kooloi lɛ anɔ.​—1 Mose 1:28; 2:8, 9, 15; kwɛmɔ Wiemɔi Komɛi Amligbalamɔ 6.

2. (a) Te wɔfeɔ tɛŋŋ wɔleɔ akɛ Nyɔŋmɔ baafee nɔ ni ekpɛ eyiŋ akɛ ebaafee lɛ? (b) Mɛɛ gbɔmɛi nɛkɛ Nyɔŋmɔ sumɔɔ ni amɛhi shikpɔŋ lɛ nɔ? Ni eesumɔ ni amɛhi nɔ kɛyashi mɛɛ be?

2 Kɛ́ okwɛ lɛ, ani be ko baashɛ ni wɔbaahi paradeiso mli yɛ shikpɔŋ lɛ nɔ? Yehowa kɛɔ wɔ akɛ: “Mi miwie, ni mi nɔŋŋ mahã eba mli.” (Yesaia 46:9-11; 55:11) Hɛɛ, Yehowa baafee nɔ ni ekpɛ eyiŋ akɛ ebaafee lɛ, ni nɔ ko nɔ ko etsĩŋ enaa. Yehowa kɛɛ nɔ ko hewɔ ebɔ shikpɔŋ lɛ, “ebɔɔɔ lɛ efolo.” (Yesaia 45:18) Eesumɔ ni mɛi ahi shikpɔŋ lɛ nɔ fɛɛ. Shi mɛɛ gbɔmɛi nɛkɛ Nyɔŋmɔ sumɔɔ ni amɛhi shikpɔŋ lɛ nɔ, ni eesumɔ ni amɛhi nɔ kɛyashi mɛɛ be? Biblia lɛ kɛɔ akɛ: “Jalɔi [loo mɛi ni boɔ Nyɔŋmɔ toi] lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”​Lala 37:29; Kpojiemɔ 21:3, 4.

3. Akɛni helai mɔmɔɔ gbɔmɛi ni amɛgboiɔ hewɔ lɛ, mɛɛ saji enɛ hãa mɛi biɔ?

3 Shi ŋmɛnɛ lɛ, helai mɔmɔɔ gbɔmɛi ni amɛgboiɔ. Gbɔmɛi kɛ amɛhe nɔɔ ni amɛgbegbeɔ amɛhe. Ekã shi faŋŋ akɛ, jeee nɛkɛ ji bɔ ni Nyɔŋmɔ to eyiŋ akɛ shihilɛ  afee. No hewɔ lɛ, mɛni ba? Mɛni hewɔ shihilɛ lɛ efite nɛkɛ? Biblia lɛ pɛ baanyɛ atsɔɔ wɔ.

NYƆŊMƆ HENYƐLƆ KO

4, 5. (a) Namɔ tsɔ onufu nɔ ekɛ Hawa wie yɛ Eden abɔɔ lɛ mli lɛ? (b) Te feɔ tɛŋŋ ni mɔ ko ni ale lɛ akɛ eyeɔ anɔkwa lɛ batsɔɔ julɔ?

4 Biblia lɛ kɛɔ akɛ, Nyɔŋmɔ yɛ henyɛlɔ ko ni atsɛɔ lɛ “Abonsam kɛ Satan.” Satan tsɔ onufu nɔ ekɛ Hawa wie yɛ Eden abɔɔ lɛ mli. (Kpojiemɔ 12:9; 1 Mose 3:1) Ehã efee tamɔ nɔ ni onufu lɛ ni wieɔ lɛ.​—Kwɛmɔ Wiemɔi Komɛi Amligbalamɔ 7.

5 Namɔ ji Satan Abonsam? Ani nakai Nyɔŋmɔ bɔ lɛ? Dabi! No mli lɛ, eji bɔfo ko ni yɔɔ ŋwɛi be ni Nyɔŋmɔ bɔ shikpɔŋ lɛ ehã Adam kɛ Hawa lɛ. Ŋwɛibɔfo nɛɛ ni tsake ni ebatsɔ Abonsam lɛ. (Hiob 38:4, 7) Shi te fee tɛŋŋ eba lɛ nakai? Susumɔ enɛ he okwɛ. Te feɔ tɛŋŋ ni mɔ ko ni ale lɛ akɛ eyeɔ anɔkwa lɛ batsɔɔ julɔ? Afɔɔɔ mɔ ko akɛ julɔ. Shi kɛ́ mɔ lɛ shwe akɛ ená nɔ ko ni jeee enɔ, ni etee nɔ esusu nakai nii lɛ he lɛ, shwelɛ ni eyɔɔ akɛ enine ashɛ nakai nii lɛ nɔ lɛ mli baawa. Enɛ hewɔ lɛ, kɛ́ hegbɛ ko gbele nɔŋŋ lɛ, ebaakɔ nakai nii lɛ. Kɛkɛ lɛ, ebatsɔ julɔ.​—Kanemɔ Yakobo 1:13-15; kwɛmɔ Wiemɔi Komɛi Amligbalamɔ 8.

6. Te fee tɛŋŋ ni ŋwɛibɔfo ko batsɔ Nyɔŋmɔ henyɛlɔ lɛ?

6 Nakai eba lɛ yɛ ŋwɛibɔfo ni wɔwieɔ ehe nɛɛ gbɛfaŋ. Be ni Yehowa bɔ Adam kɛ Hawa lɛ, ekɛɛ amɛ akɛ ‘amɛfɔ ní amɛyi afa, ni amɛyi shikpɔŋ lɛ nɔ obɔ.’ (1 Mose 1:27, 28) Eeenyɛ efee akɛ, ŋwɛibɔfo nɛɛ kɛɛ ehe akɛ, ‘Gbɔmɛi nɛɛ fɛɛ baanyɛ ajá mi, moŋ fe nɔ ni amɛbaajá Yehowa!’ Yehowa pɛ esa akɛ ajá, shi bɔfo nɛɛ shwe akɛ mɛi ajá lɛ. Akɛni etee nɔ esusu enɛ he waa hewɔ lɛ, shwelɛ ni ená akɛ ajá lɛ moŋ fe Nyɔŋmɔ lɛ, mli bawa. No hewɔ lɛ, emale etsɔɔ Hawa ni elaka lɛ. (Kanemɔ 1 Mose 3:1-5.) Enɛ ni efee lɛ hã ebatsɔ Satan Abonsam, ni ebatsɔ Nyɔŋmɔ henyɛlɔ.

7. (a) Mɛni hewɔ Adam kɛ Hawa gboi lɛ? (b) Mɛni hewɔ wɔgbɔlɔɔ ni wɔgboiɔ lɛ?

 7 Adam kɛ Hawa booo Nyɔŋmɔ toi, ni amɛyaye tso yibii ni Nyɔŋmɔ kɛɛ amɛkaye lɛ eko. (1 Mose 2:17; 3:6) Nɔ ni amɛfee lɛ ji esha, no hewɔ lɛ, sɛɛ mli lɛ, amɛgboi, tamɔ bɔ ni Yehowa kɛɛ amɛ lɛ pɛpɛɛpɛ. (1 Mose 3:17-19) Akɛni Adam kɛ Hawa bii fɛɛ ebatsɔmɔ eshafeelɔi hewɔ lɛ, amɛ hu amɛgboiɔ. (Kanemɔ Romabii 5:12.) Bɔ ni afee ni wɔnu nɔ hewɔ ni wɔkɛɔ akɛ Adam kɛ Hawa bii fɛɛ batsɔmɔ eshafeelɔi lɛ shishi lɛ, hã wɔsusu nɔkwɛmɔnɔ ko he wɔkwɛ. Ŋɔɔ lɛ akɛ, ooshã blodo yɛ tsɛnsi ko ni he eboda mli. Te blodo lɛ ni oshãa lɛ baafee tɛŋŋ? Ehe baaboda tamɔ bɔ ni tsɛnsi lɛ he eboda lɛ nɔŋŋ. Be ni Adam gbo Nyɔŋmɔ nɔ toi lɛ, Adam batsɔ eshafeelɔ. Ni akɛni wɔ fɛɛ wɔjɛ Adam mli hewɔ lɛ, wɔ hu wɔtsɔmɔ eshafeelɔi. Etamɔ tsɛnsi lɛ kɛ blodo lɛ sane lɛ pɛpɛɛpɛ. Ni akɛni wɔ fɛɛ wɔtsɔmɔ eshafeelɔi hu hewɔ lɛ, wɔ hu wɔgbɔlɔɔ ni wɔgboiɔ.​—Romabii 3:23; kwɛmɔ Wiemɔi Komɛi Amligbalamɔ 9.

8, 9. (a) Mɛɛ jwɛŋmɔ Satan taoɔ akɛ Adam kɛ Hawa aná yɛ Yehowa he? (b) Mɛni hewɔ Yehowa egbeee Satan kɛ Adam kɛ Hawa amrɔ nɔŋŋ lɛ?

8 Satan te shi ewo Yehowa be ni elaka Adam kɛ Hawa ní ehã amɛgbo Nyɔŋmɔ nɔ toi lɛ. No mli lɛ, eetao ni Adam kɛ Hawa asusu akɛ Yehowa ji amalelɔ kɛ nɔyelɔ fɔŋ, ni etaooo amɛ ekpakpa. Nɔ ni Satan fee lɛ tsɔɔ akɛ, eetao ekɛɛ adesai akɛ, ehe ehiaaa ni Nyɔŋmɔ woɔ amɛ mla ko akɛ enɛ hi loo enɛ ehiii, shi esa akɛ Adam kɛ Hawa diɛŋtsɛ atsɔɔ nɔ ni hi kɛ nɔ ni ehiii. Mɛni Yehowa fee yɛ sane nɛɛ he? Kulɛ, Yehowa baanyɛ agbe Satan kɛ Adam kɛ Hawa fɛɛ koni sane ajɔ. Shi eji efee nakai kulɛ, te wɔbaafee tɛŋŋ wɔle akɛ nɔ ni Satan wie yɛ ehe lɛ ji amale? Kulɛ, wɔleŋ kɔkɔɔkɔ.

 9 No hewɔ lɛ, Yehowa egbeee amɛ amrɔ nɔŋŋ. Moŋ lɛ, eŋmɛ gbɛ ni gbɔmɔ aye lɛ diɛŋtsɛ enyɛmi gbɔmɔ nɔ. Enɛ ni efee lɛ baahã ana faŋŋ akɛ, Satan ji amalelɔ, ni akɛ Yehowa ji mɔ ni le nɔ ni hi kɛhã gbɔmɛi. Wɔbaakase enɛ he nii babaoo yɛ Yitso 11 lɛ mli. Shi bo lɛ, susumɔ nɔ ni Adam kɛ Hawa fee lɛ he ekoŋŋ okwɛ. Ani nɔ ni amɛfee  lɛ ja? Ani kulɛ esa akɛ amɛhe nɔ ni Satan kɛɛ amɛ lɛ amɛye ni amɛgbo Nyɔŋmɔ nɔ toi? Yehowa ji mɔ ni hã amɛ nibii fɛɛ ni amɛyɔɔ lɛ. Ebɔ amɛ akɛ mɛi ni eye emuu, ni ehã amɛ he ko fɛfɛo ni amɛhi, ni ehã amɛ nitsumɔ kpakpa ni amɛtsu. Shi Satan efeko nɔ ko nɔ ko ehãko amɛ. Eji bo ji Adam loo Hawa kulɛ, mɛni obaafee?

10. Mɛɛ hegbɛ wɔteŋ mɔ fɛɛ mɔ yɔɔ ŋmɛnɛ?

10 Ŋmɛnɛ hu lɛ, wɔteŋ mɔ fɛɛ mɔ yɛ hegbɛ akɛ eboɔ Yehowa toi loo eboɔ Satan toi. Kɛ́ wɔbo Yehowa toi lɛ, wɔbaaná wala, ni ebaahã ana akɛ, Satan ji amalelɔ. Agbɛnɛ hu, kɛ́ wɔbo Yehowa toi lɛ, no baatsɔɔ akɛ lɛ ji wɔ-Nɔyelɔ. Ni kɛ́ wɔbo Satan toi lɛ, no hu baatsɔɔ akɛ lɛ ji wɔnɔyelɔ. (Lala 73:28; kanemɔ Abɛi 27:11.) Ŋmɛnɛ lɛ, mɛi fioo pɛ boɔ Nyɔŋmɔ toi yɛ je lɛ mli. Anɔkwa, jeee Nyɔŋmɔ ni yeɔ je lɛ nɔ. Shi kɛjeee Nyɔŋmɔ yeɔ je lɛ nɔ lɛ, belɛ namɔ yeɔ je lɛ nɔ mɔ?

NAMƆ YEƆ JE LƐ NƆ?

Eji je lɛ mli maŋtsɛyelii nɛɛ fɛɛ jeee Satan nɔ kulɛ, ani ebaakɛɛ Yesu akɛ ekɛbaahã lɛ?

11, 12. (a) Mɛni jeŋ maŋtsɛyelii lɛ ni Satan kɛɛ ekɛbaahã Yesu lɛ hãa wɔnaa? (b) Mɛɛ ŋmalɛi hãa wɔnaa akɛ Satan ji mɔ ni yeɔ je lɛ nɔ?

11 Nɔ ko ni ba be ni Yesu yɔɔ shikpɔŋ lɛ nɔ lɛ hãa wɔnaa akɛ, ele mɔ tuuntu ni yeɔ je lɛ nɔ. Be ko lɛ, Satan kɛ “jeŋ maŋtsɛyelii lɛ fɛɛ kɛ amɛnunyam lɛ tsɔɔ” Yesu. Ni Satan kɛɛ lɛ akɛ: “Mikɛ enɛɛmɛi fɛɛ baahã bo kɛ́ okula shi ojá mi shi kome pɛ.” (Mateo 4:8, 9; Luka 4:5, 6) Bo lɛ susumɔ enɛ he okwɛ, ‘Eji maŋtsɛyelii nɛɛ jeee Satan nɔ kulɛ, ani ebaakɛɛ Yesu akɛ ekɛbaahã lɛ?’ Dabi. Je lɛŋ nɔyelii lɛ fɛɛ lɛ, Satan nɔ ni.

12 Shi ekolɛ obaabi ohe akɛ: ‘Te fee tɛŋŋ ni Satan batsɔ je lɛ nɔyelɔ? Ani jeee Yehowa, Nyɔŋmɔ Ofe lɛ ji mɔ ni bɔ nɔ fɛɛ nɔ?’ (Kpojiemɔ 4:11) Eji anɔkwale akɛ Yehowa ji Nyɔŋmɔ Ofe, shi Yesu tsɛ Satan akɛ “je nɛɛ nɔyelɔ.”  (Yohane 12:31; 14:30; 16:11) Bɔfo Paulo tsɛ Satan Abonsam akɛ “je nɛɛ nyɔŋmɔ.” (2 Korintobii 4:3, 4) Ni bɔfo Yohane hu ŋma akɛ, “jeŋ muu lɛ fɛɛ kã mɔ fɔŋ lɛ hewalɛ mli.”​—1 Yohane 5:19.

MƐNI ABAAFEE JEŊ NI SATAN YEƆ NƆ NƐƐ?

13. Mɛni hewɔ esa akɛ wɔná jeŋ hee lɛ?

13 Fitemɔ sɔŋŋ je nɛɛ yaa nɔ efiteɔ. Ŋmɛnɛ lɛ, ojotswaa kɛ osatofeemɔ kɛ yiwalɛ nifeemɔi kɛ tai miiya nɔ waa yɛ je lɛŋ he fɛɛ he. Adesai nyɛŋ atsu naagbai nɛɛ fɛɛ he nii, ekɔɔɔ he eko bɔ ni amɛbaabɔ he mɔdɛŋ amɛhã. Shi etsɛŋ, Nyɔŋmɔ baakpãtã jeŋ fɔŋ nɛɛ hiɛ yɛ ta ko ni atsɛɔ lɛ Harmagedon lɛ mli, ni ekɛ jeŋ hee ko ni jalɛ baahi mli lɛ baaba.​—Kpojiemɔ 16:14-16; kwɛmɔ Wiemɔi Komɛi Amligbalamɔ 10.

14. Namɔ Nyɔŋmɔ ehala akɛ e-Maŋtsɛyeli lɛ nɔ Maŋtsɛ? Mɛni Biblia lɛ gba yɛ Yesu he?

14 Yehowa ehala Yesu Kristo akɛ eŋwɛi Maŋtsɛyeli, loo nɔyeli lɛ nɔ Maŋtsɛ. Afii akpei abɔ ni eho nɛ ni Biblia lɛ gba akɛ Yesu baafee “Toiŋjɔlɛ Maŋtsɛ,” ni enɔyeli lɛ sɛɛ efoŋ kɔkɔɔkɔ. (Yesaia 9:6, 7) Yesu hã esɛɛnyiɛlɔi lɛ le akɛ, esa akɛ amɛsɔle ni ‘Maŋtsɛyeli lɛ aba, ni afee nɔ ni Nyɔŋmɔ sumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.’ (Mateo 6:10) Yɛ wolo nɛɛ Yitso 8 lɛ mli lɛ, wɔbaana bɔ ni Nyɔŋmɔ Maŋtsɛyeli lɛ baafee ejie je lɛŋ nɔyelii lɛ kɛya. (Kanemɔ Daniel 2:44.) Yɛ Nyɔŋmɔ Maŋtsɛyeli lɛ shishi lɛ, abaasaa shikpɔŋ lɛ nɔ fɛfɛo ni ebaatsɔ Paradeiso.​—Kwɛmɔ Wiemɔi Komɛi Amligbalamɔ 11.

JEŊ HEE LƐ EBƐŊKƐ!

15. Mɛni “shikpɔŋ hee” lɛ damɔ shi kɛhã?

15 Biblia lɛ ewo shi akɛ: “Wɔmiimɛ ŋwɛi hee kɛ shikpɔŋ hee, ni nomɛi amli jalɛ baahi.” (2 Petro 3:13; Yesaia 65:17)  Bei komɛi lɛ, kɛ́ Biblia lɛ kɛ wiemɔ ni ji “shikpɔŋ lɛ” tsu nii lɛ, ekɔɔ mɛi ni yɔɔ shikpɔŋ lɛ nɔ lɛ ahe. (1 Mose 11:1) No hewɔ lɛ, “shikpɔŋ hee” ni jalɛ baahi mli lɛ damɔ shi kɛhã mɛi fɛɛ ni boɔ Nyɔŋmɔ toi ni Nyɔŋmɔ ejɔɔ amɛ lɛ.

16. Mɛni mɛi fɛɛ ni baahi Nyɔŋmɔ jeŋ hee lɛ mli lɛ baaná? Ni mɛni esa akɛ wɔfee koni wɔná naanɔ wala?

16 Yesu wo mɛi fɛɛ ni baahi Nyɔŋmɔ jeŋ hee lɛ mli lɛ shi akɛ, amɛbaaná “naanɔ wala.” (Marko 10:30) Mɛni esa akɛ wɔfee koni wɔná naanɔ wala? Ofainɛ kanemɔ Yohane 3:16 Yohane 17:3 lɛ, ni obaana hetoo lɛ. Agbɛnɛ, hã wɔkwɛ bɔ ni shikpɔŋ lɛ nɔ Paradeiso lɛ mli shihilɛ baafee ahã.

17, 18. Mɛni hãa wɔnaa akɛ toiŋjɔlɛ baahi shikpɔŋ lɛ nɔ he fɛɛ he, ni wɔbaahi shi shweshweeshwe yɛ jeŋ hee lɛ mli lɛ?

17 Efɔŋfeemɔ kɛ tai kɛ mlatɔmɔ kɛ awuiyeli sɛɛ baafo. Nyɔŋmɔ baajie efɔŋfeelɔi fɛɛ kɛje shikpɔŋ lɛ nɔ. (Lala 37:10, 11) Ni “ebaafo tai asɛɛ yɛ shikpɔŋ lɛ nɔ fɛɛ.” (Lala 46:9; Yesaia 2:4) Mɛi pɛ ni baashwɛ yɛ shikpɔŋ lɛ nɔ ji mɛi ni sumɔɔ Nyɔŋmɔ ni amɛboɔ lɛ toi lɛ. Wɔbaaná toiŋjɔlɛ kɛya naanɔ.​—Lala 72:7.

18 Oshãra ko baŋ Yehowa tsuji anɔ. Be ni blema Israelbii lɛ boɔ Nyɔŋmɔ toi lɛ, ebu amɛhe ni amɛhi shi shweshweeshwe. (3 Mose 25:18, 19) Yɛ Paradeiso lɛ mli lɛ, wɔsheŋ mɔ ko mɔ ko loo nɔ ko nɔ ko gbeyei. Wɔbaahi shi shweshweeshwe!​—Kanemɔ Yesaia 32:18; Mika 4:4.

19. Mɛni hewɔ wɔbaanyɛ wɔhe wɔye akɛ niyenii baabu yɛ Nyɔŋmɔ jeŋ hee lɛ mli lɛ?

19 Niyenii baabu. “Shikpɔŋ lɛ nɔ baayi kɛ ŋmaa; ebaafa babaoo kɛteke nɔ yɛ gɔji lɛ ayiteŋ.” (Lala 72:16) Yehowa, “wɔ-Nyɔŋmɔ lɛ, baajɔɔ wɔ,” ni “shikpɔŋ lɛ baaba enii.”​—Lala 67:6.

20. Mɛni hãa wɔnaa akɛ shikpɔŋ lɛ baatsɔ paradeiso?

 20 Shikpɔŋ muu lɛ fɛɛ baatsɔ paradeiso. Mɛi baamamɔ tsũi fɛfɛji, ni amɛbaafee abɔi. (Kanemɔ Yesaia 65:21-24; Kpojiemɔ 11:18.) Shikpɔŋ muu lɛ fɛɛ nɔ baafee fɛo tamɔ bɔ ni no mli lɛ Eden abɔɔ lɛ yɔɔ. Yehowa baahã wɔ nibii fɛɛ ni he hiaa wɔ lɛ be fɛɛ be. Biblia lɛ wieɔ ehe akɛ: “Ogbɛɔ odɛŋ ni ohãa nɔ fɛɛ nɔ ni hiɛ kã lɛ tɔɔ kɛ nɔ ni etaoɔ.”​—Lala 145:16.

21. Mɛni hãa wɔnaa akɛ toiŋjɔlɛ baahi gbɔmɛi kɛ kooloi ateŋ?

21 Toiŋjɔlɛ baahi gbɔmɛi kɛ kooloi ateŋ. Kooloi yeŋ gbɔmɛi awui dɔŋŋ. Gbekɛbii po sheŋ kooloi ni yeɔ mɛi awui ŋmɛnɛ lɛ gbeyei.​—Kanemɔ Yesaia 11:6-9; 65:25.

22. Mɛni Yesu baafee ehã mɛi ni bɛ hewalɛ lɛ?

22 Hela mɔŋ mɔ ko dɔŋŋ. Be ni Yesu yɔɔ shikpɔŋ lɛ nɔ lɛ, etsa mɛi pii. (Mateo 9:35; Marko 1:40-42; Yohane 5:5-9) No hewɔ lɛ, Yesu, ni ji Nyɔŋmɔ Maŋtsɛyeli lɛ nɔ Maŋtsɛ lɛ baatsa mɛi fɛɛ ni bɛ hewalɛ lɛ. Mɔ ko mɔ ko ekɛŋ akɛ “mibɛ hewalɛ.”​—Yesaia 33:24; 35:5, 6.

23. Mɛni Nyɔŋmɔ baafee mɛi ni egboi lɛ?

23 Gbohii lɛ baaba wala mli ekoŋŋ. Nyɔŋmɔ ewo shi akɛ, ebaatee mɛi akpekpei abɔ ni egboi lɛ ashi. Biblia lɛ kɛɔ akɛ: “Abaatee jalɔi kɛ mɛi ni ejaaa fɛɛ shi.”​—Kanemɔ Yohane 5:28, 29; Bɔfoi 24:15.

24. Ani obaasumɔ ni ohi Paradeiso? Mɛni hewɔ?

24 Bianɛ lɛ, wɔ eshwɛɔ. Wɔbaanyɛ wɔkpɛ wɔyiŋ akɛ wɔbaakase Yehowa he nii ni wɔsɔmɔ lɛ, aloo wɔbaanyɛ wɔhala akɛ wɔbaafee nɔ ni wɔ diɛŋtsɛ wɔsumɔɔ. Kɛ́ wɔkpɛ wɔyiŋ akɛ wɔbaasɔmɔ Yehowa lɛ, wɔsɛɛ lɛ, ebaajɔɔ wɔ. Be ko lɛ, nuu ko ni miihe agbo lɛ kɛɛ Yesu akɛ ekai lɛ. Yesu wo lɛ shi akɛ: “Obaafata mihe yɛ Paradeiso.” (Luka 23:43) Yɛ yitso ni nyiɛ sɛɛ lɛ mli lɛ, wɔbaakase Yesu Kristo, ni ji mɔ ni Nyɔŋmɔ baatsɔ enɔ ehã eshiwoi lɛ aba mli lɛ he sane.