Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Halamɔ wiemɔ Ga

 YITSO ENYƆ

Biblia Lɛ​—Wolo Ni Jɛ Nyɔŋmɔ Ŋɔɔ

Biblia Lɛ​—Wolo Ni Jɛ Nyɔŋmɔ Ŋɔɔ

1, 2. Mɛni hewɔ wɔbaanyɛ wɔkɛɛ akɛ Biblia lɛ ji nikeenii ko ni nɔ bɛ ni Nyɔŋmɔ kɛhã wɔ lɛ?

KƐ́ ONAANYO ko ke bo nɔ ko lɛ, te onuɔ he ohãa tɛŋŋ? Ohe tswaa shi kɛgbeleɔ naa. Omii shɛɔ ohe waa akɛ onaanyo lɛ esusu ohe, ni odaa lɛ shi.

2 Biblia lɛ ji nikeenii ni jɛ Nyɔŋmɔ ŋɔɔ. Nibii pii yɛ ni kɛjeee Biblia lɛ kulɛ, wɔnyɛŋ wɔle kɔkɔɔkɔ. Akɛ nɔkwɛmɔnɔ lɛ, jeee Biblia lɛ kulɛ, wɔleŋ kɔkɔɔkɔ akɛ Nyɔŋmɔ ji mɔ ni bɔ ŋwɛi, shikpɔŋ lɛ, kɛ klɛŋklɛŋ nuu kɛ yoo lɛ. Shishitoo mlai ni yɔɔ Biblia lɛ mli lɛ baanyɛ aye abua wɔ ni wɔtsu wɔnaagbai ahe nii. Biblia lɛ ni tsɔɔ wɔ bɔ ni Nyɔŋmɔ baafee ehã eyiŋtoo lɛ aba mli, ni ehã shikpɔŋ lɛ nɔ shihilɛ aŋɔɔ. Lɛɛlɛŋ, Biblia lɛ ji nikeenii ko ni nɔ bɛ!

3. Kɛ́ okase Biblia lɛ, mɛni obaana?

3 Kɛ́ okase Biblia lɛ, obaana akɛ Nyɔŋmɔ miisumɔ ni otsɔ enaanyo. Ni kɛ́ otee nɔ okase ehe nii lɛ, obaabatsɔ enaanyo kpaakpa.

4. Te nibii ni awie yɛ Biblia lɛ he lɛ ateŋ nɔ ni onya he waa?

4 Atsɔɔ Biblia lɛ shishi kɛtee wiemɔi ni fa fe 2,800 mli, ni akala akpekpe toi akpei abɔ. Mɛi akpekpe toi akpei abɔ baanyɛ akane Biblia lɛ yɛ amɛ diɛŋtsɛ amɛmaŋ wiemɔ mli. Ni daa otsi lɛ, mɛi akpekpe kome kɛ sɛɛ anine shɛɔ Biblia lɛ eko nɔ! Ŋwanejee ko bɛ he akɛ, wɔnyɛŋ wɔkɛ wolo ko wolo ko ato Biblia lɛ he.

5. Mɛni hewɔ wɔbaanyɛ wɔkɛɛ akɛ Biblia lɛ jɛ “Nyɔŋmɔ mumɔ lɛŋ” lɛ?

5 Biblia lɛ jɛ “Nyɔŋmɔ mumɔ lɛŋ.” (Kanemɔ 2 Timoteo 3:16.) Shi ekolɛ, mɔ ko baabi akɛ, ‘Gbɔmɛi ni ŋma  Biblia lɛ, no hewɔ lɛ, mɛni hewɔ akɛɔ akɛ ejɛ Nyɔŋmɔ ŋɔɔ lɛ?’ Biblia lɛ hãa sanebimɔ nɛɛ hetoo akɛ: “Mumɔ krɔŋkrɔŋ lɛ tsirɛ [loo, kudɔ] gbɔmɛi ni amɛwie wiemɔi ni jɛ Nyɔŋmɔ ŋɔɔ.” (2 Petro 1:21) Wɔbaanyɛ wɔkɛ enɛ ato nitsumɔtsɛ ko ni ekɛɛ ewoloŋmalɔ akɛ eŋma wolo kɛyahã mɔ ko lɛ he. Eyɛ mli akɛ, woloŋmalɔ lɛ ni ŋma wolo lɛ moŋ, shi emli wiemɔi lɛ jeee enɔ. Nitsumɔtsɛ lɛ nɔ ni. Nakai nɔŋŋ eji yɛ Biblia lɛ gbɛfaŋ. Nyɔŋmɔ kɛ emumɔ lɛ kudɔ mɛi ni ŋmala lɛ, koni amɛŋmala esusumɔi. No hewɔ lɛ, eyɛ mli akɛ gbɔmɛi ni ŋmala Biblia lɛ moŋ, shi Nyɔŋmɔ wiemɔi ji nɔ ni yɔɔ mli. Enɛ hewɔ lɛ, Biblia lɛ ji “Nyɔŋmɔ wiemɔ” lɛɛlɛŋ.​—1 Tesalonikabii 2:13; kwɛmɔ Wiemɔi Komɛi Amligbalamɔ 2.

 SAJI FƐƐ NI YƆƆ BIBLIA LƐ MLI LƐ JA

6, 7. Mɛni hewɔ wɔbaanyɛ wɔkɛɛ akɛ Biblia lɛ mli woji lɛ fɛɛ wieɔ sane oti kome he lɛ?

6 Akɛ afii 1,600 kɛ sɛɛ ŋma Biblia lɛ. Mɛi ni ŋmala lɛ fɛɛ ehiii shi yɛ be kome too lɛ nɔŋŋ mli. Amɛteŋ mɛi komɛi le woloŋ waa, shi mɛi komɛi hu awoloŋlee faaa. Akɛ nɔkwɛmɔnɔ lɛ, datrɛfonyo ji amɛteŋ mɔ kome. Amɛteŋ mɛi komɛi hu ji okwaafoi kɛ wolɛi kɛ tookwɛlɔi kɛ gbalɔi kɛ kojolɔi kɛ maŋtsɛmɛi. Fɛɛ sɛɛ lɛ, Biblia lɛ mli woji lɛ eko mli sane eteee shi ewooo ekroko mli sane. Ewieee nɔ ko yɛ yitso ko mli ni eyawie nɔ kroko yɛ yitso kroko mli. Emli woji lɛ fɛɛ wieɔ sane oti kome he. *

7 Biblia lɛ mli klɛŋklɛŋ yitsei lɛ hãa wɔnaa bɔ ni fee ni adesai anaagbai lɛ je shishi, ni naagbee yitsei lɛ tsɔɔ wɔ bɔ ni Nyɔŋmɔ baafee etsu nakai naagbai lɛ ahe nii ni ehã shikpɔŋ lɛ atsɔ paradeiso loo abɔɔ fɛfɛo. Biblia lɛ gbaa wɔ adesai ayinɔsane. Ewieɔ nibii ni tee nɔ afii akpei abɔ yɛ adesai ashihilɛ mli yɛ blema lɛ he, ni ehãa wɔnaa akɛ, nɔ fɛɛ nɔ ni Nyɔŋmɔ toɔ eyiŋ akɛ ebaafee lɛ, efeɔ.

8. Tsɔɔmɔ nibii komɛi ni Biblia lɛ ewie ni hãa wɔnaa akɛ saji ni ewieɔ lɛ kɛ anɔkwa saji ni jeŋ shikpalɔi ena lɛ kpãa gbee.

8 Eyɛ mli akɛ aŋmaaa Biblia lɛ koni wɔkɛkase jeŋ shikpamɔ loo sainsi he nii moŋ, shi nɔ fɛɛ nɔ ni Biblia lɛ wieɔ lɛ kɛ anɔkwa saji ni jeŋ shikpalɔi ena lɛ kpãa gbee. Ni nakai pɛ ji nɔ ni wɔbaakpa gbɛ yɛ wolo ko ni jɛ Nyɔŋmɔ ŋɔɔ lɛ he. Nɔ ko ni maa enɛ nɔ mi ji, mla ko ni awie he yɛ Mose Wolo Ni Ji Etɛ lɛ mli. Nyɔŋmɔ wo Israelbii lɛ mla ko ni baaye abua amɛ koni kɛ́ hela ni tsɛŋeɔ mɔ mɔ amɛteŋ mɔ ko lɛ, ekagbɛ eshwã amɛteŋ. Be ni aŋma sane nɛɛ, no mli lɛ mɔ ko mɔ ko leee akɛ muawai ji nɔ ni hãa helai gbɛɔ eshwãa. Agbɛnɛ hu,  Biblia lɛ tsɔɔ akɛ shikpɔŋ lɛ sɛŋ kɔɔyɔɔ lɛ mli, emaaa nɔ ko nɔ ko nɔ, ni enɛ ji anɔkwale. (Hiob 26:7) Be ko ni eho lɛ, mɛi pii kɛɛ shikpɔŋ lɛ yɛ tɛtrɛɛ. Shi no mli lɛ, Biblia lɛ ewie akɛ eyɛ kokloo.​—Yesaia 40:22.

9. Mɛni tsɔɔ akɛ mɛi ni ŋma Biblia lɛ wieɔ anɔkwale? Ni mɛni enɛ hãa wɔnaa yɛ Biblia lɛ he?

9 Biblia lɛ wieɔ blema saji ahe hu, ni nɔ ni ewieɔ yɛ blema saji nɛɛ ahe lɛ ji anɔkwale. Shi akɛni mɛi ni ŋmalaa blema saji lɛ ateŋ mɛi babaoo ewieee anɔkwale hewɔ lɛ, jeee blema saji ahe nibii fɛɛ ni amɛŋmalaa yɛ woji amli lɛ fɛɛ ji anɔkwale. Akɛ nɔkwɛmɔnɔ lɛ, bei komɛi lɛ, kɛ́ amɛtee ta ni aye amɛmaji lɛ anɔ kunim lɛ, amɛŋmaaa he sane. Shi jeee nakai mɛi ni ŋma Biblia lɛ fee, ejaakɛ be ni maji komɛi ye Israelbii lɛ anɔ kunim lɛ, amɛbɔ he amaniɛ. Agbɛnɛ hu, amɛŋmala amɛ diɛŋtsɛ amɛtɔmɔi ahe saji amɛshwie shi. Akɛ nɔkwɛmɔnɔ lɛ, yɛ Mose Wolo Ni Ji Ejwɛ lɛ mli lɛ, Mose ŋma tɔmɔ ko ni yɔɔ hiɛdɔɔ ni etɔ̃ lɛ, kɛ bɔ ni Nyɔŋmɔ gbala etoi yɛ he lɛ he sane efɔ̃ shi. (4 Mose 20:2-12) Bɔ ni mɛi ni ŋma Biblia lɛ wie anɔkwale lɛ hãa wɔnaa akɛ Biblia lɛ jɛ Nyɔŋmɔ ŋɔɔ. Enɛ hewɔ lɛ, wɔbaanyɛ wɔhe nibii fɛɛ ni Biblia lɛ wieɔ lɛ wɔye.

ŊAAWOI KPAKPAI EYI MLI OBƆ

10. Mɛni hewɔ ŋaawoi ni yɔɔ Biblia lɛ mli lɛ baanyɛ aye abua wɔ ŋmɛnɛ lɛ?

10 Biblia lɛ “jɛ Nyɔŋmɔ mumɔ lɛŋ, ni ehe yɛ sɛɛnamɔ kɛhã nitsɔɔmɔ, kɛhã mɔjajemɔ,” kɛ agbɛnɛ hu “kɛhã nibii ajajemɔ.” (2 Timoteo 3:16) Enɛ tsɔɔ akɛ, ŋaawoi ni yɔɔ Biblia lɛ mli lɛ baanyɛ aye abua wɔ ŋmɛnɛ. Akɛni Yehowa ni bɔ wɔ hewɔ lɛ, ele bɔ ni wɔsusuɔ nii ahe wɔhãa, kɛ bɔ ni wɔnuɔ nii ahe wɔhãa. Ele wɔ jogbaŋŋ po fe bɔ ni wɔ diɛŋtsɛ wɔle wɔhe, ni eesumɔ ni wɔmii ashɛ wɔhe. Ele nibii ni hi hã wɔ, kɛ nibii ni ehiii hãaa wɔ.

11, 12. (a) Mɛni ji nibii komɛi ni Yesu wo wɔ ŋaa yɛ he yɛ Mateo yitso 5 kɛyashi yitso 7 lɛ? (b) Mɛɛ nibii krokomɛi ahe Biblia lɛ wieɔ?

 11 Kɛ́ okane Mateo yitso 5 kɛyashi yitso 7 lɛ, obaana ŋaawoi kpakpai ni Yesu kɛhã yɛ bɔ ni wɔbaafee wɔná miishɛɛ yɛ shihilɛ mli, kɛ bɔ ni wɔbaafee wɔsaa wɔkɛ mɛi ateŋ, kɛ bɔ ni asɔleɔ ahãa, kɛ jwɛŋmɔ ni esa akɛ wɔná yɛ shika he lɛ he. Yesu kɛ ŋaawoi nɛɛ hã aaafee afii 2,000 ni eho nɛ, shi amɛhe yɛ sɛɛnamɔ waa kɛhã wɔ ŋmɛnɛ, ni amɛbaanyɛ amɛye amɛbua wɔ.

12 Yɛ Biblia lɛ mli lɛ, Yehowa tsɔɔ wɔ anɔkwa saji komɛi ni atsɛɔ amɛ shishitoo mlai. Shishitoo mlai nɛɛ tsɔɔ wɔ bɔ ni wɔbaafee wɔhã miishɛɛ ahi wɔweku lɛ mli, kɛ bɔ ni wɔbaafee wɔkɛ mɛi ahi shi yɛ toiŋjɔlɛ mli. Agbɛnɛ hu, amɛtsɔɔ wɔ bɔ ni wɔɔfee wɔtsɔmɔ nitsulɔi kpakpai. Shishitoo mlai ni yɔɔ Biblia lɛ mli lɛ baanyɛ aye abua wɔ be fɛɛ be, ekɔɔɔ he eko mɛi ni wɔji, he ni wɔyɔɔ, loo naagbai ni wɔkɛkpeɔ.​—Kanemɔ Yesaia 48:17; kwɛmɔ Wiemɔi Komɛi Amligbalamɔ 3.

GBALƐI FƐƐ NI YƆƆ BIBLIA LƐ MLI LƐ BAABA MLI

Mɛi ni ŋma Biblia lɛ ateŋ mɔ kome ni atsɛɔ lɛ Yesaia lɛ wie akɛ abaaye Babilon nɔ kunim

13. Mɛni Yesaia wie akɛ ebaaba Babilon maŋ lɛ nɔ?

13 Gbalɛi ni yɔɔ Biblia lɛ mli lɛ pii eba mli momo. Akɛ nɔkwɛmɔnɔ lɛ, Yesaia gba akɛ abaakpãtã Babilon maŋ lɛ hiɛ. (Yesaia 13:19) Etsɔɔ gbɛ pɔtɛɛ ni abaatsɔ nɔ aye maŋ lɛ nɔ kunim. Ewie akɛ, abaashi agbói wujiwuji ni yɔɔ maŋ lɛ naa lɛ afɔ̃, ni faa ni hãaa mɛi anyɛ atutua maŋ lɛ hu baamii. Yesaia wie akɛ mɛi ni baatutua Babilon lɛ baaŋɔ maŋ lɛ ni ehe ehiaaa ni amɛwu ta. Yesaia gbalɛ lɛ tsɔɔ nuu ni baaye Babilon nɔ kunim lɛ gbɛ́i po. Atsɛɔ lɛ Koresh.​—Kanemɔ Yesaia 44:27–45:2; kwɛmɔ Wiemɔi Komɛi Amligbalamɔ 4.

14, 15. Gbaa bɔ ni fee ni Yesaia gbalɛ lɛ ba mli.

14 Be ni Yesaia wie sane nɛɛ sɛɛ afii 200 lɛ, asraafoi komɛi ba ni amɛbatutua Babilon. Ani ole mɔ ni nyiɛ amɛhiɛ? Lɛ ji Persia maŋtsɛ Koresh. Ni lɛ tuuntu ji mɔ ni Yesaia gba akɛ  ebaaye Babilon nɔ kunim lɛ. Ani gbalɛ lɛ fãi krokomɛi ni eshwɛ lɛ hu ba mli? Hã wɔkwɛ.

15 Gbi gbɛkɛ ni asraafoi lɛ baatutua Babilon maŋ lɛ, no mli lɛ aaye gbi jurɔ ko yɛ maŋ lɛ mli. Gbogboi wuji kɛ faa ni hãaa mɛi anyɛ atutua maŋ lɛ ahewɔ lɛ, maŋbii lɛ nu he akɛ mɔ ko nyɛŋ aye amɛnɔ kunim. Koresh kɛ esraafoi lɛ gba gbɛ  kroko amɛhã faa lɛ, ni eho aahu kɛyashi eba shi bɔ ni abaanyɛ anyiɛ kɛtsɔ mli. Kɛkɛ ni amɛtsɔ mli kɛyashɛ gbogboi lɛ ahe. Shi te amɛbaafee tɛŋŋ amɛbote maŋ lɛ mli? Nakai gbɛkɛ lɛ, ashi agbói lɛ afɔ̃. No hewɔ lɛ, taakɛ Yesaia gba lɛ, asraafoi lɛ ŋɔ maŋ lɛ ni amɛkɛ mɔ ko wuuu ta.

16. (a) Mɛni Yesaia gba yɛ bɔ ni sɛɛ mli lɛ Babilon maŋ lɛ baafee ahã lɛ he? (b) Mɛni tsɔɔ akɛ Yesaia gbalɛ lɛ ba mli?

16 Yesaia gba akɛ sɛɛ mli lɛ: “Mɔ ko mɔ ko ehiŋ [Babilon] mli dɔŋŋ, ni etsɔŋ mɔ ko mɔ ko shihilɛhe yɛ yinɔi fɛɛ amli.” (Yesaia 13:20) Ani gbalɛ nɛɛ ba mli? Hɛɛ, eba mli. Ŋmɛnɛ lɛ, kɛ́ ootao ole he ni no mli lɛ Babilon maŋ lɛ yɔɔ lɛ, obaana yɛ Iraq maŋ lɛ maŋtiase ni atsɛɔ lɛ Baghdad lɛ wuoyi. Jɛmɛ kɛ Baghdad teŋ jekɛmɔ aaafee kilomitai 80. Shi kɛ́ otee jɛmɛ lɛ, nɔ pɛ ni obaana ji tsũ koi, mɔ ko mɔ ko ehiii jɛmɛ. Yehowa kɛ “hiɛkpatamɔ bɔlɔ” ebɛɛ Babilon.​—Yesaia 14:22, 23. *

Babilon tsũ koi lɛ

17. Mɛni hewɔ wɔbaanyɛ wɔhe Nyɔŋmɔ shiwoi fɛɛ wɔye akɛ amɛbaaba mli lɛ?

17 Biblia mli gbalɛi pii eba mli momo, ni enɛ hãa wɔnáa  nɔmimaa akɛ, nibii ni Biblia lɛ egba akɛ ebaaba wɔsɛɛ lɛ hu baaba mli. Akɛ nɔkwɛmɔnɔ lɛ, Yehowa ewo shi akɛ ebaahã shikpɔŋ lɛ atsɔ Paradeiso, ni wɔbaanyɛ wɔhe wɔye akɛ shiwoo nɛɛ baaba mli. (Kanemɔ 4 Mose 23:19.) “Nyɔŋmɔ, mɔ ni nyɛŋ emale lɛ,” ewo wɔ shi kɛjɛ blema tɔ̃ɔ akɛ, wɔbaahi shi kɛya naanɔ, ni enɛ ji wɔhiɛnɔkamɔ.​—Tito 1:2. *

BIBLIA LƐ BAANYƐ AHÃ OSHIHILƐ ATSAKE

18. Mɛni Paulo ŋma yɛ “Nyɔŋmɔ wiemɔ lɛ” he?

18 Wɔna akɛ, wolo ko wolo ko bɛ ni wɔbaanyɛ wɔkɛto Biblia lɛ he. Biblia lɛ mli woji lɛ fɛɛ wieɔ sane oti kome he, ni nibii fɛɛ ni ewie lɛ kɛ anɔkwa saji ni jeŋ shikpalɔi ena lɛ kpãa gbee, ni agbɛnɛ hu, nɔ fɛɛ nɔ ni ewieɔ yɛ blema saji ahe lɛ ji anɔkwale. Agbɛnɛ hu, ŋaawoo ni yɔɔ mli lɛ hi, ni nibii ni egba lɛ babaoo eba mli momo. Shi nɔ kroko hu yɛ ni Biblia lɛ feɔ. Bɔfo Paulo ŋma akɛ: “Nyɔŋmɔ wiemɔ lɛ hiɛ kã ni eyɛ hewalɛ.” Mɛni enɛ tsɔɔ?​—Kanemɔ Hebribii 4:12.

19, 20. (a) Mɛɛ gbɛ nɔ Biblia lɛ baanyɛ aye abua bo ni ona mɔ tuuntu ni oji? (b) Mɛni obaanyɛ ofee kɛda Nyɔŋmɔ shi yɛ Biblia lɛ ni ekɛhã bo lɛ hewɔ?

19 Biblia lɛ baanyɛ ahã oshihilɛ atsake. Ebaanyɛ eye ebua bo ni ona mɔ tuuntu ni oji kɛ nɔ diɛŋtsɛ ni yɔɔ otsui kɛ ojwɛŋmɔ mli. Akɛ nɔkwɛmɔnɔ lɛ, wɔbaanyɛ wɔkɛɛ akɛ wɔsumɔɔ Nyɔŋmɔ. Shi ja wɔkɛ nibii ni Biblia lɛ wieɔ lɛ etsu nii dani wɔbaanyɛ wɔtsɔɔ akɛ wɔsumɔɔ Nyɔŋmɔ lɛɛlɛŋ.

20 Wɔna faŋŋ akɛ, Biblia lɛ jɛ Nyɔŋmɔ ŋɔɔ. Nyɔŋmɔ miisumɔ ni okane, ni okase, ni oná Biblia lɛ he miishɛɛ. Daa Nyɔŋmɔ shi yɛ nikeenii nɛɛ he, ni oya nɔ okase. Kɛ́ ofee nakai lɛ, obaana nɔ hewɔ ni Nyɔŋmɔ bɔ gbɔmɛi adesai. Wɔbaasusu enɛ he fitsofitso yɛ yitso ni nyiɛ sɛɛ lɛ mli.

^ kk. 6 Mɛi komɛi kɛɔ akɛ Biblia lɛ ewieee sane oti kome he. Shi enɛ jeee anɔkwale. Kwɛmɔ wolo ni ji The Bible​—God’s Word or Man’s? ni Yehowa Odasefoi fee lɛ yitso 7 lɛ.

^ kk. 16 Kɛ́ ootao ole saji krokomɛi ni kɔɔ Biblia mli gbalɛi ahe lɛ, kwɛmɔ wolo ni ji Wolo Kɛha Gbɔmɛi Fɛɛ, ni Yehowa Odasefoi fee lɛ baafa 27-29 lɛ.

^ kk. 17 Babilon hiɛkpatamɔ lɛ ji Biblia mli gbalɛi babaoo ni eba mli lɛ ateŋ ekome pɛ. Awie gbalɛi komɛi ni kɔɔ Yesu Kristo he lɛ ahe yɛ Wiemɔi Komɛi Amligbalamɔ 5 lɛ mli.