1-3. Mɛɛ saji mɛi fɔɔ bimɔ yɛ mɛi ni egboi lɛ ahe? Ni te jamɔi komɛi hãa sanebimɔi nɛɛ ahetoo tɛŋŋ?

BIBLIA lɛ woɔ wɔ shi akɛ, be ko baaba ni “gbele bɛ dɔŋŋ.” (Kpojiemɔ 21:4) Yɛ Yitso 5 lɛ mli lɛ, wɔkase akɛ, kpɔmɔnɔ lɛ hewɔ lɛ, wɔsɛɛ lɛ, wɔbaanyɛ wɔhi shi kɛya naanɔ. Shi amrɔ nɛɛ, mɛi gboiɔ. (Jajelɔ 9:5) No hewɔ lɛ, sane kome ni mɛi fɔɔ bimɔ ji akɛ, Kɛ́ wɔgboi lɛ, mɛɛ shihilɛ mli wɔyajeɔ?

2 Be ni mɛi fɔɔ nakai sane lɛ bimɔ ji, be ni mɔ ko ni amɛsumɔɔ esane waa lɛ egbo. Ekolɛ amɛbaabi akɛ: ‘Nɛgbɛ etee? Ani eekwɛ wɔ? Ani ebaanyɛ eye ebua wɔ? Ani wɔbaana lɛ ekoŋŋ?’

3 Esoro bɔ ni jamɔ fɛɛ jamɔ hãa sanebimɔi nɛɛ ahetoo ehãa. Jamɔi lɛ ekomɛi tsɔɔ akɛ, kɛ́ ofee ekpakpa ni ogbo lɛ, obaaya ŋwɛi, shi kɛ́ ofee esha lɛ, abaashã bo yɛ hɛl la mli. Mɛi komɛi hu kɛɔ akɛ, kɛ́ ogbo lɛ, obaatsɔ mumɔ ni okɛ owekumɛi ni egboi lɛ baayahi shi. Mɛi krokomɛi hu kɛɔ akɛ, kɛ́ ogbo lɛ, abaakojo bo ni abaafɔ bo ekoŋŋ akɛ gbɔmɔ kroko loo kooloo po.

4. Mɛɛ hemɔkɛyeli kome jamɔi srɔtoi lɛ fɛɛ hiɛ yɛ gbele he?

4 Esoro nɔ ni jamɔ fɛɛ jamɔ tsɔɔ. Shi etamɔ nɔ ni amɛ fɛɛ amɛhiɛ hemɔkɛyeli kome yɛ gbele he. No ji akɛ, amɛ fɛɛ amɛheɔ amɛyeɔ akɛ, kɛ́ mɔ ko gbo lɛ, nɔ ko yɛ emli ni yaa nɔ ehiɔ wala mli. Ani hemɔkɛyeli nɛɛ ja?

 KƐ́ WƆGBOI LƐ, MƐƐ SHIHILƐ MLI WƆYAJEƆ?

5, 6. Kɛ́ wɔgboi lɛ, mɛɛ shihilɛ mli wɔyajeɔ?

5 Yehowa le shihilɛ mli ni wɔyajeɔ kɛ́ wɔgboi. Ekɛɔ wɔ akɛ, kɛ́ mɔ ko gbo lɛ, ebɛ wala mli dɔŋŋ. Mɛi ni egboi lɛ ahiɛ kamɔɔɔ yɛ he ko he ko. * No hewɔ lɛ, kɛ́ mɔ ko gbo lɛ, enyɛŋ enu nii ahe, ni enyɛŋ ekai nɔ ko, ni enyɛŋ ena nii, ni etoi nyɛŋ anu nii, ni enyɛŋ esusu nii ahe dɔŋŋ.

6 Maŋtsɛ Solomon ŋma akɛ, “mɛi ni egboi lɛ leee nɔ ko nɔ ko kwraa.” Gbohii lɛ nyɛŋ asumɔ mɔ ko loo amɛnyɛ mɔ ko, ni “atsuuu nɔ ko, ni akpɛɛɛ yiŋ ko, ni anáaa nilee ko loo hiɛshikamɔ ko yɛ Gbonyobu lɛ mli.” (Kanemɔ Jajelɔ 9:5, 6, 10.) Lala 146:4 lɛ kɛɔ akɛ, kɛ́ mɔ ko gbo lɛ, “eyiŋtoi” loo esusumɔi laajeɔ.

NƆ NI YESU WIE YƐ GBELE HE

Yehowa bɔ gbɔmɛi koni amɛhi shi kɛya naanɔ yɛ shikpɔŋ lɛ nɔ

7. Mɛni he Yesu kɛ gbele to?

7 Be ni Yesu naanyo ko ni esumɔɔ esane waa ni atsɛɔ lɛ Lazaro lɛ gbo lɛ, Yesu kɛɛ ekaselɔi lɛ akɛ: “Wɔnaanyo Lazaro ewɔ.” No mli lɛ jeee wɔ diɛŋtsɛ he Yesu wieɔ lɛ, ejaakɛ sɛɛ mli lɛ, ewie akɛ: “Lazaro egbo.” (Yohane 11:11-14) No hewɔ lɛ, Yesu kɛ gbele to wɔ he. Ekɛɛɛ akɛ Lazaro etee ŋwɛi, loo eyafata ewekumɛi ni egboi lɛ ahe. Ni ekɛɛɛ hu akɛ, aashã lɛ yɛ hɛl la mli, loo asaa afɔ lɛ yɛ he kroko akɛ gbɔmɔ loo kooloo. Moŋ lɛ, be ni Lazaro gbo lɛ, etamɔ nɔ ni wɔ ni tsii enyɔ enɔ. Ŋmalɛi krokomɛi hu kɛ gbele toɔ wɔ ni tsii he. Be ni Stefano gbo lɛ, Biblia lɛ wie akɛ, “ewɔ.” (Bɔfoi 7:60, shishigbɛ niŋmaa)  Bɔfo Paulo hu wie Kristofoi komɛi ni egboi lɛ ahe akɛ, ‘amɛwɔ.’​—1 Korintobii 15:6, shishigbɛ niŋmaa.

8. Ani Nyɔŋmɔ bɔ gbɔmɛi koni amɛgboi wɔsɛɛ? Tsɔɔmɔ mli.

8 Ani Nyɔŋmɔ bɔ Adam kɛ Hawa koni wɔsɛɛ ko lɛ amɛgboi? Dabi! Yehowa bɔ amɛ ni amɛná gbɔmɔtsoŋ hewalɛ kpakpa ni amɛhi shi kɛya naanɔ. Bɔ ni Yehowa bɔ adesai ehã lɛ hewɔ lɛ, amɛshweɔ ni amɛhi shi kɛya naanɔ. (Jajelɔ 3:11) Fɔlɔi sumɔɔɔ ni amɛbii agbɔlɔ ni amɛgboi, ni nakai nɔŋŋ Yehowa hu sumɔɔɔ ni wɔgbɔlɔɔ ni wɔgboiɔ. Shi kɛ́ Nyɔŋmɔ bɔ wɔ ni wɔhi shi kɛya naanɔ lɛ, mɛni hewɔ wɔgboiɔ mɔ?

 MƐNI HEWƆ WƆGBOIƆ?

9. Mɛni hewɔ kulɛ esaaa akɛ Adam kɛ Hawa gboɔ Yehowa famɔ lɛ nɔ toi lɛ?

9 Yehowa kɛɛ Adam yɛ Eden abɔɔ lɛ mli akɛ: “Ye tsei fɛɛ ni yɔɔ abɔɔ lɛ mli lɛ anɔ yibii lɛ bɔ ni osumɔɔ. Shi ekpakpa kɛ efɔŋ lee tso lɛ, kaaye enɔ yibii lɛ eko, ejaakɛ gbi nɔ ni obaaye eko lɛ, bɔ fɛɛ bɔ ni fee lɛ, obaagbo.” (1 Mose 2:9, 16, 17) Nɔ ni Yehowa fã Adam akɛ ekafee lɛ jeee nɔ ko ni wa. Yehowa yɛ hegbɛ akɛ etsɔɔ Adam kɛ Hawa nɔ ni hi kɛ nɔ ni ehiii. Eji amɛbo lɛ toi kulɛ, no baatsɔɔ akɛ amɛbuɔ lɛ ni amɛnaa lɛ akɛ amɛnɔyelɔ. Ni ebaatsɔɔ hu akɛ, amɛhiɛ sɔɔ nibii fɛɛ ni efee ehã amɛ lɛ.

10, 11. (a) Te Satan fee tɛŋŋ ehã Adam kɛ Hawa fee esha? (b) Mɛni hewɔ amɛnyɛŋ amɛshwa mɔ ko yɛ nɔ ni amɛfee lɛ he lɛ?

10 Dɔlɛ sane ji akɛ, Adam kɛ Hawa kpɛ amɛyiŋ akɛ amɛboŋ Yehowa toi. Satan bi Hawa akɛ: “Ani eji anɔkwale akɛ Nyɔŋmɔ kɛɛ nyɛkaye abɔɔ lɛ mli tsei lɛ eko fɛɛ eko yibii?” Hawa hã lɛ hetoo akɛ: “Wɔbaanyɛ wɔye abɔɔ lɛ mli tsei lɛ ayibii lɛ eko. Shi Nyɔŋmɔ wie tso ni ma abɔɔ lɛ teŋ lɛ nɔ yibii lɛ he akɛ: ‘Nyɛkayea eko, dabi, nyɛkataa he; kɛjeee nakai lɛ nyɛbaagboi.’”​—1 Mose 3:1-3.

11 Kɛkɛ ni Satan kɛɛ akɛ: “Nyɛgboiŋ kɔkɔɔkɔ. Ejaakɛ Nyɔŋmɔ le akɛ gbi tuuntu nɔ ni nyɛbaaye eko lɛ, nyɛhiŋmɛii baagbele, ni nyɛbaatsɔmɔ tamɔ Nyɔŋmɔ, nyɛbaale ekpakpa kɛ efɔŋ.” (1 Mose 3:4-6) Satan miitao ni Hawa aná jwɛŋmɔ lɛ akɛ, esaaa akɛ mɔ ko tsɔɔ lɛ nɔ ni hi kɛ nɔ ni ehiii. Satan laka Hawa akɛ, kɛ́ eye aduawa lɛ, egboŋ. No hewɔ lɛ, Hawa ye aduawa lɛ, ni sɛɛ mli lɛ, ehã ewu lɛ eko ni eye. Adam kɛ Hawa le faŋŋ akɛ, Yehowa kɛɛ amɛkaye tso lɛ nɔ yibii lɛ eko. No hewɔ lɛ, be ni amɛye aduawa lɛ, amɛkɛ no tsɔɔ akɛ, amɛkpɛ amɛyiŋ  akɛ amɛboŋ famɔ ni yɔɔ faŋŋ ni ewaaa akɛ abaaye nɔ lɛ toi. Nɔ ni amɛfee lɛ tsɔɔ akɛ, amɛbuuu amɛ-Tsɛ ni yɔɔ ŋwɛi ni sumɔɔ amɛsane lɛ. Anɔkwa, amɛnyɛŋ amɛshwa mɔ ko yɛ nɔ ni amɛfee lɛ he!

12. Mɛni hewɔ nɔ ni Adam kɛ Hawa fee lɛ baadɔ Yehowa waa lɛ?

12 Eyɛ dɔlɛ waa akɛ wɔ-klɛŋklɛŋ fɔlɔi lɛ ebuuu mɔ ni bɔ amɛ lɛ! Kɛ́ obɔ mɔdɛŋ waa okwɛ obi ko, ni sɛɛ mli lɛ, ebooo bo toi, ni eje gbɛ efee nɔ ko ni okɛɛ lɛ akɛ ekafee lɛ, ani edɔŋ bo? Ekã shi faŋŋ akɛ, ebaadɔ bo waa.

Adam jɛ sũ mli, ni eku esɛɛ kɛtee sũ lɛ mli

13. Be ni Yehowa kɛɛ Adam akɛ ‘ebaaku esɛɛ kɛya sũ mli lɛ,’ no mli lɛ, mɛni etsɔɔ lɛ?

13 Adam kɛ Hawa toigbele lɛ hewɔ lɛ, naanɔ wala ŋmɛɛ amɛ. Yehowa kɛɛ Adam akɛ: “Sũ ji bo, ni sũ mli obaaku osɛɛ kɛya!” (Kanemɔ 1 Mose 3:19.) No hewɔ lɛ, Adam baatsɔ sũ ekoŋŋ, tamɔ nɔ ni ebako shihilɛ mli dã. (1 Mose 2:7) Be ni Adam fee esha lɛ, egbo. Ewala sɛɛ fo.

14. Mɛni hewɔ wɔgboiɔ?

14 Eji Adam kɛ Hawa bo Nyɔŋmɔ toi kulɛ, ŋmɛnɛ lɛ amɛyɛ wala mli lolo. Shi amɛgbo enɔ toi, amɛfee esha amɛshi lɛ, ni sɛɛ mli lɛ, amɛgboi. Esha tamɔ hela fɔŋ ko ni wɔná kɛjɛ wɔ-klɛŋklɛŋ fɔlɔi lɛ aŋɔɔ. Enɛ hewɔ lɛ, afɔ wɔ fɛɛ akɛ eshafeelɔi, ni no hewɔ ni wɔ fɛɛ wɔgboiɔ lɛ. (Romabii 5:12) Shi jeee nakai Nyɔŋmɔ  to akɛ eba lɛ, ebɔɔɔ gbɔmɛi ni amɛgboi. Biblia lɛ tsɛɔ gbele akɛ “henyɛlɔ.”​—1 Korintobii 15:26.

ANƆKWALE LƐ HÃA WƆYEƆ WƆHE

15. Kɛ́ wɔle anɔkwale ni kɔɔ gbohii lɛ ahe lɛ, mɛɛ gbɛ nɔ ebaahã wɔye wɔhe?

15 Kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, ehãa wɔyeɔ wɔhe kɛjɛɔ susumɔi pii ni ejaaa ahe. Biblia lɛ hãa wɔleɔ akɛ, mɛi ni egboi lɛ nuuu piŋmɔ ko he, ni amɛyeee awerɛho hu. Wɔnyɛŋ wɔkɛ amɛ awie, ni amɛ hu amɛnyɛŋ amɛkɛ wɔ awie. Wɔnyɛŋ wɔye wɔbua amɛ, ni amɛ hu amɛnyɛŋ amɛye amɛbua wɔ. Amɛnyɛŋ amɛye wɔ awui, no hewɔ lɛ, esaaa akɛ wɔsheɔ amɛ gbeyei. Shi jamɔi pii kɛɔ akɛ gbohii lɛ yahiɔ he ko, ni akɛ, kɛ́ wɔhã osɔfoi lɛ, loo jamɔŋ hiɛnyiɛlɔi lɛ shika lɛ, amɛbaanyɛ amɛye amɛbua amɛ amɛhã wɔ. Shi kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, mɔ ko mɔ ko nyɛŋ ekɛ enɛ alaka wɔ.

16. Mɛɛ amale ehe shi yɛ jamɔi pii amli?

16 Satan tsɔɔ amale jamɔi anɔ elakaa mɛi, koni amɛsusu akɛ gbohii lɛ yɛ shihilɛ mli lolo. Akɛ nɔkwɛmɔnɔ lɛ, jamɔi komɛi tsɔɔ mɛi akɛ kɛ́ mɔ ko gbo lɛ, nɔ ko fãa yɛ emli ni eyahiɔ he ko. Ani nakai atsɔɔ bo yɛ jamɔ mli ni oyɔɔ lɛ? Aloo atsɔɔ bo nɔ ni Biblia lɛ kɛɔ lɛ? Satan tsɔɔ saji ni tamɔ nɛkɛ lɛ anɔ elakaa mɛi koni amɛkɛ Yehowa akabɔ naanyo.

17. Mɛni hewɔ kɛ́ mɛi kɛɛ akɛ abaashã mɛi yɛ hɛl la mli lɛ, efiteɔ Yehowa gbɛ́i lɛ?

17 Nibii ni jamɔi pii tsɔɔ mɛi yɛ Yehowa he lɛ hãa mɔ naa kpɛɔ ehe waa. Akɛ nɔkwɛmɔnɔ lɛ, jamɔi komɛi kɛɔ akɛ, kɛ́ mɔ ko fee esha lɛ, abaashã lɛ yɛ hɛl la mli kɛya naanɔ. Amale nɛɛ fiteɔ Yehowa gbɛ́i. Yehowa hãŋ mɛi  apiŋ nakai kɔkɔɔkɔ! (Kanemɔ 1 Yohane 4:8.) Kɛ́ mɔ ko bi fee lɛ nɔ ko, ni emɔ gbekɛ lɛ nine ni ekɛwo la mli lɛ, te obaana nakai mɔ lɛ ohã tɛŋŋ? Ani okɛŋ akɛ eyitsoŋ wa waa? Ani obaasumɔ ni okɛ mɔ ko ni tamɔ nakai abɔ naanyo? No hewɔ lɛ, Satan miitao ni wɔna Yehowa akɛ mɔ ko ni yitsoŋ wa, koni wɔ kɛ lɛ akabɔ naanyo!

18. Mɛni hewɔ esaaa akɛ wɔsheɔ gbohii lɛ agbeyei?

18 Jamɔi komɛi kɛɔ akɛ kɛ́ mɛi gboi lɛ, amɛtsɔmɔɔ mumɔi. Amɛkɛɔ akɛ, esa akɛ wɔshe mumɔi nɛɛ gbeyei ni wɔbu amɛ, ejaakɛ kɛ́ wɔfee nakai lɛ, amɛbaasumɔ wɔsane, shi kɛ́ wɔfeee nakai lɛ, amɛbaahao wɔ. Mɛi babaoo heɔ amale nɛɛ amɛyeɔ. No hewɔ lɛ, amɛsheɔ gbohii lɛ gbeyei, ni amɛjáa amɛ moŋ fe ni amɛbaajá Yehowa. Shi tamɔ bɔ ni wɔkase lɛ, mɛi ni egboi lɛ nyɛŋ anu nii ahe dɔŋŋ, ni amɛleee nɔ ko nɔ ko. No hewɔ lɛ, esaaa akɛ wɔsheɔ amɛ gbeyei. Yehowa ji mɔ ni bɔ wɔ, ni lɛ ji anɔkwa Nyɔŋmɔ lɛ. No hewɔ lɛ, lɛ pɛ esa akɛ wɔjá.​—Kpojiemɔ 4:11.

19. Kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, mɛɛ gbɛ nɔ ebaaye ebua wɔ?

19 Kɛ́ wɔle nɔ ni Biblia lɛ kɛɔ yɛ gbohii lɛ ahe lɛ, mɔ ko mɔ ko nyɛŋ alaka wɔ. Enɛ baaye ebua wɔ ni wɔnu nibii kpakpai ni Yehowa ewo shi akɛ ebaafee ehã wɔ ŋmɛnɛ kɛ wɔsɛɛ lɛ ashishi jogbaŋŋ.

20. Mɛni wɔbaakase yɛ yitso ni nyiɛ sɛɛ lɛ mli?

20 Nyɔŋmɔ tsulɔ ko ni hi shi yɛ blema ni atsɛɔ lɛ Hiob lɛ bi akɛ: “Kɛji gbɔmɔ gbo lɛ, ani ebaahi wala mli ekoŋŋ?” (Hiob 14:14) Ani mɔ ko ni egbo lɛ baanyɛ aba wala mli ekoŋŋ? Nyɔŋmɔ ehã sanebimɔ nɛɛ hetoo yɛ Biblia lɛ mli, ni hetoo lɛ shɛjeɔ mɔ mii waa. Wɔbaakase enɛ he sane yɛ yitso ni nyiɛ sɛɛ lɛ mli.

^ kk. 5 Mɛi komɛi heɔ amɛyeɔ akɛ kɛ́ mɔ ko gbo lɛ, esusuma loo emumɔ fãa kɛjeɔ emli ni eyahiɔ he ko. Kɛ́ ootao ole enɛ he saji babaoo lɛ, kwɛmɔ Wiemɔi Komɛi Amligbalamɔ 17 kɛ 18.