“KƐ NƆ ko yɛ ni manyɛ mafee lɛ, bo lɛ ha male kɛkɛ.” Nɛkɛ ji bɔ ni wɔteŋ mɛi pii kɛɔ naanyo loo wekunyo ni agbo yɛ enɔ ehee lɛ. Oo, anɔkwale wɔwieɔ lɛ. Wɔbaafee nɔ fɛɛ nɔ ni wɔkɛye wɔbua. Shi ani mɔ ni agbo yɛ enɔ lɛ tsɛɔ wɔ ni ekɛɔ akɛ: “Misusu nɔ ko ni nyɛbaanyɛ nyɛfee ni nyɛkɛye nyɛbua mi lɛ he”? Jeee be fɛɛ be ebaa lɛ nakai. Eyɛ faŋŋ akɛ, ehe miihia ni wɔfee he nɔ ko kɛ́ wɔmiisumɔ ni wɔye wɔbua ni wɔshɛje mɔ ni yeɔ ŋkɔmɔ lɛ mii lɛɛlɛŋ.

Biblia mli abɛbua ko kɛɔ akɛ: “Wiemɔ ni awie yɛ be ni sa mli lɛ, etamɔ shika akutui yɛ jwiɛtɛi kpanyai amli.” (Abɛi 15:23; 25:11) Ŋaalee yɛ le ni ooole nɔ ni esa akɛ owie kɛ nɔ ni esaaa akɛ owieɔ lɛ mli, kɛ nɔ ni esa akɛ ofee kɛ nɔ ni esaaa akɛ ofeɔ lɛ mli. Naa Ŋmalɛ mli ŋaawoi fioo ko ni mɛi komɛi ni agbo ashi amɛ lɛ ena akɛ eyeɔ ebuaa.

Nɔ ni Obaafee . . .

Bo sane toi: Yakobo 1:19 kɛɛ akɛ, feemɔ “oya kɛ ninumɔ.” Nibii ni yeɔ ebuaa fe fɛɛ ni obaanyɛ ofee lɛ ateŋ ekome ji ni okɛ mɔ ni agbo ashi lɛ lɛ aye ŋkɔmɔ kɛtsɔ esane toiboo nɔ. Ekolɛ ehe baahia ni mɛi ni agbo ashi amɛ lɛ awie amɛ suɔlɔ ni egbo lɛ he, yɛ lɔle mli oshara ni ba, loo hela ni gbe lɛ lɛ he, loo ni amɛwie amɛ henumɔi kɛjɛ beni agbo kɛbaa lɛ he. No hewɔ lɛ bi akɛ: “Ani ooosumɔ ni owie he?” Ha amɛkpɛ amɛyiŋ yɛ he. Oblanyo ko ni kaiɔ beni etsɛ gbo lɛ kɛɛ akɛ: “No ye ebua mi jogbaŋŋ beni mɛi krokomɛi bi nɔ ni ba ni no sɛɛ lɛ amɛbo mi toi jogbaŋŋ lɛ.” Okɛ tsuishitoo kɛ henumɔ su abo sane lɛ toi yɛ be mli ni onuuu he diɛŋtsɛ akɛ esa akɛ okɛ hetooi loo okɛ ehe tsabaa komɛi aha. Ha amɛ hegbɛ ni amɛwie nɔ fɛɛ nɔ ni amɛaasumɔ akɛ amɛkɛ bo agba he sane.

Ha amɛna nɔmimaa: Ha amɛna nɔmimaa akɛ amɛ́fee bɔ fɛɛ bɔ ni amɛaanyɛ (loo nɔ fɛɛ nɔ ni ole akɛ eji anɔkwale ni ja hu). Ha amɛna nɔmimaa akɛ bɔ ni amɛnuɔ he amɛhaa​—ni ji awerɛhoyeli, mlifu, fɔyeli, loo henumɔ kroko lɛ​—jeee nɔ ni efɔɔɔ kaa kwraa. Gbaa amɛ mɛi krokomɛi ni ole akɛ amɛye gbele ni tamɔ nɛkɛ nɔ yɛ omanyeyeli mli lɛ ahe saji. Abɛi 16:24 kɛɔ akɛ, “naajɔlɛ wiemɔi” ni tamɔ nɛkɛ lɛ “haa wui náa hewalɛ.”​—1 Tesalonikabii 5:11, 14.

Hii amɛmasɛi daa: Hii amɛmasɛi daa, jeee yɛ klɛŋklɛŋ gbii fioo lɛ ni nanemɛi kɛ wekumɛi babaoo eba lɛ mli pɛ, shi nyɔji abɔ komɛi po sɛɛ beni mɛi krokomɛi eku amɛsɛɛ amɛtee amɛdaa gbi nitsumɔi amli lɛ. Ojieɔ ohe kpo nɛkɛ akɛ oji “naanyo kpakpa” ni damɔɔ naanyo ko masɛi yɛ “haomɔ” be mli. (Abɛi 17:17, NW) Teresea ni ebi gbo yɛ lɔle oshara mli lɛ tsɔɔ mli akɛ: “Wɔnanemɛi lɛ kwɛ ni  amɛto wɔ gbɛkɛnaashi nibii ahe gbɛjianɔ koni wɔ kome wɔkafite be babaoo tsɔ yɛ shia. No ye ebua wɔ ni wɔdamɔ shoo ni wɔhe aaafee lɛ naa.” Afii komɛi asɛɛ lɛ, be kaimɔ daa afi, tamɔ yookpeemɔ loo gbi ni mɔ lɛ gbo lɛ baanyɛ afee be ni kɛ nɔnyɛɛ baa mɛi ni agbo ashi amɛ lɛ anɔ. Mɛni hewɔ okadiii nakai gbii lɛ yɛ okalanda nɔ bɔni afee ni kɛ́ nakai gbi lɛ shɛ yɛ afi mli lɛ, onyɛ ohi amɛmasɛi, kɛ ehe miihia, koni oha amɛ miishɛjemɔ ni yeɔ buaa?

Kɛ oyoo akɛ nɔ ko he miihia lɛɛlɛŋ lɛ, kaamɛ ni abi bo dã​—tsɔ hiɛ otsu he nii yɛ gbɛ ni sa nɔ

Tsɔ hiɛ oŋɔ hegbɛ lɛ ni okɛto gbɛjianɔ ni sa: Ani ehe baahia ni ayatsu nibii komɛi ahe nii yɛ maŋ lɛ mli? Ani ehe miihia ni mɔ ko akwɛ gbekɛbii lɛ anɔ? Ani he ni nanemɛi kɛ wekumɛi baato he miihia? Nɔ ni baa bei pii yɛ gbii nɛɛ amli ji akɛ mɛi ni agboɔ ashiɔ amɛ lɛ haoɔ aahu akɛ amɛleee nɔ ni ehe hiaa ni amɛfee po, aahu ni amɛaakɛɛ mɛi krokomɛi nɔ ni amɛaafee ni amɛkɛye amɛbua. No hewɔ lɛ kɛ́ oyoo akɛ nɔ ko he miihia lɛɛlɛŋ lɛ, kaamɛ ni abi bo dã; tsɔ hiɛ otsu he nii. (1 Korintobii 10:24; okɛto 1 Yohane 3:17, 18 he.) Yoo ko ni ewu gbo kaiɔ akɛ: “Mɛi pii kɛɛ akɛ, ‘Kɛ nɔ ko yɛ ni manyɛ mafee lɛ, ha male.’ Shi minaanyo kome ko biii. Amrɔ nɔŋŋ ni etee sɛɛtsu lɛ mli, ejie saanɔbo lɛ, ni efɔ mamai ni nibii ka mli beni egbo lɛ ahe. Minaanyo yoo kroko hu wo goga, nu, kɛ nibii ni akɛshaa nii ahe ni esha kuntu ni ha tsu lɛ mli lɛ fã gbɛ ni miwu lɛ shwe eshwie nɔ lɛ nɔ. Otsii fioo komɛi asɛɛ lɛ, asafoŋ onukpai lɛ ateŋ mɔ ko basara mi trukaa ni ewo enitsumɔ atade ni ehiɛ enitsumɔ dadei ni ekɛɛ, ‘Miheɔ miyeɔ akɛ nɔ ko yɛ ni ehe miihia ni asaa. Mɛni éfite?’ Kwɛ bɔ ni mitsui nya nakai nuu lɛ he miha akɛ esaa shinaa ni tsotsoro shi ni ekpa afa lɛ, ni esaa sarawa hewalɛ kpãai lɛ ahe nɔ ko ni kpɔɔ lɛ ekpɛtɛ shi!”​—Okɛto Yakobo 1:27 he.

Feemɔ mɔ ni sumɔɔ gbɔfeemɔ: Biblia lɛ kaiɔ wɔ akɛ, “gbɔfeemɔ hu, nyɛhiɛ akakpaa nɔ.” (Hebribii 13:2) Titri lɛ esa akɛ wɔkai ni wɔfee mɛi ni yeɔ ŋkɔmɔ lɛ gbɔ. Ní okɛ ninefɔɔ ní tsɔɔ akɛ “ba be fɛɛ be” aaatsu nii lɛ, too gbi kɛ be pɔtɛɛ ko. Kɛ amɛkpɛlɛɛɛ nɔ lɛ, onijiaŋ akaje wui mra tsɔ.  Ekolɛ hewalɛwoo fioo ko he baahia. Ekolɛ amɛkpɛlɛɛɛ nine ni ofɔ otsɛ amɛ lɛ nɔ ejaakɛ amɛmiishe gbeyei akɛ amɛnyɛŋ amɛye amɛhenumɔi anɔ yɛ mɛi krokomɛi ahiɛ. Aloo ekolɛ amɛaanu fɔbuu loo tɔmɔ he yɛ niyenii kɛ naanyobɔɔ ni amɛaana mli ŋɔɔmɔ yɛ be ni tamɔ nɛkɛ mli lɛ he. Kaimɔ yoo gbɔfeelɔ ni atsɛɔ lɛ Lidia ni atsĩ etã yɛ Biblia lɛ mli lɛ. Beni Lidia tsɛ Luka kɛ mɛi krokomɛi lɛ kɛba eshia lɛ, Luka kɛɛ, “Ehiɛ wɔ aahu ni wɔkpɛlɛ.”​—Bɔfoi lɛ Asaji 16:15.

Too otsui shi ni ona sane shishinumɔ hu: Kaaha nɔ ni mɛi ni agbo ashi amɛ lɛ baakɛɛ kɛtsɔ hiɛ lɛ miifee bo naakpɛɛ. Kaimɔ akɛ, ekolɛ amɛmli baanyɛ afu ni amɛaasusu akɛ amɛye nɔ ko he fɔ́. Kɛ amɛmli fu bo lɛ, ebaabi sanesɛɛkɔmɔ kɛ tsuishitoo kɛ nitsumɔ yɛ ogbɛfaŋ koni okɛ mlifu akawie. Biblia lɛ jieɔ yi akɛ, “nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.”​—Kolosebii 3:12, 13.

Ŋmaa wolo: Nɔ ni akuɔ hiɛ ashwieɔ nɔ bei pii ji sɛɛnamɔ ni yɔɔ wolo ni aŋmaa akɛhaa mɔ kpoo yɛ gbele be mli lɛ he lɛ. Mɛɛ sɛɛnamɔ yɔɔ he? Cindy, ni kansa gbe emami lɛ ha hetoo akɛ: “Minaanyo ko ŋma mi wolo fɛfɛo ko. No ye ebua jogbaŋŋ ejaakɛ minyɛɔ mikaneɔ shii abɔ.” Abaanyɛ aŋma “wiemɔ kuku” awo wolo ni tamɔ nɛkɛ ni akɛwoɔ mɔ hewalɛ lɛ nɔ moŋ, shi esa akɛ ejɛ otsui mli. (Hebribii 13:22) No baanyɛ akɛɛ akɛ osusuɔ ehe, ni okaiɔ mɔ ni egbo lɛ jogbaŋŋ, aloo no baanyɛ atsɔɔ bɔ ni mɔ ni gbo lɛ ná oshihilɛ nɔ hewalɛ waa eha.

Fatamɔ amɛhe kɛsɔle: Kaabu sɛɛnamɔ ni yɔɔ sɔlemɔi ni okɛ mɛi ni agbo ashi amɛ lɛ aaasɔle ni osɔle oha amɛ hu lɛ akɛ nɔ ko bibioo. Biblia lɛ kɛɛ akɛ: “Jalɔ sɔlemɔ . . . nyɛɔ nii babaoo etsuɔ.” (Yakobo 5:16) Ákɛ nɔkwɛmɔnɔ lɛ, ni amɛaanu ni oodamɔ amɛnajiaŋ oosɔle lɛ baanyɛ aye abua ni amɛba henumɔi gbohii tamɔ fɔyeli nɛkɛ lɛ ashi.​—Okɛto Yakobo 5:13-15 he.

Nɔ ni Esaaa akɛ Ofeɔ . . .

Helatsamɔhe lɛ ni oooya lɛ baanyɛ awo mɔ ni agbo yɛ enɔ lɛ hewalɛ

Kaatsi ohe kɛmiiya sɛɛ akɛni oleee nɔ ni oookɛɛ loo ooofee hewɔ: Ekolɛ wɔɔkɛɛ wɔhe akɛ, ‘Miheɔ miyeɔ akɛ amrɔ nɛɛ ehe baahia ni amɛ kome amɛhi shi.’ Shi ekolɛ anɔkwale lɛ ji akɛ wɔmiitsi wɔhe kɛmiiya sɛɛ akɛni wɔmiishe gbeyei akɛ wɔɔwie loo wɔɔfee nɔ ko ni ejaaa hewɔ. Shi, ní nanemɛi, wekumɛi, loo nanemɛi heyelilɔi aaakpoo mɔ ni agbo ashi lɛ lɛ baaha ehe afee shoo tsɔ fe nine, ni ŋkɔmɔyeli lɛ mli baawa. Kaimɔ akɛ, bei pii lɛ wiemɔi kɛ nifeemɔi ni mlijɔlɛ yɔɔ mli waa lɛ waaa kwraa kɛ nitsumɔ. (Efesobii 4:32) Jɛmɛ ni oyɔɔ lɛ po kɛkɛ baanyɛ afee hewalɛwoo jɛɛhe. (Okɛto Bɔfoi lɛ Asaji 28:15 he.) Beni Teresea kaiɔ gbi ni ebiyoo lɛ gbo lɛ, ekɛɛ akɛ: “Beni shɛɔ ŋmɛlɛtswaa kome lɛ, wɔnanemɛi eyi helatsamɔhe ablanaa lɛ nɔ obɔ; asafoŋ onukpai lɛ fɛɛ kɛ amɛŋamɛi ba jɛmɛ. Yei lɛ ekomɛi anibii ni akɛdɔrɔɔ yitsɔi lɛ yɛ amɛyiteŋ lolo, ni mɛi komɛi po wo amɛnitsumɔ atadei. Amɛŋmɛɛ nɔ fɛɛ nɔ feemɔ he ni amɛba jɛmɛ amrɔ nɔŋŋ. Amɛteŋ mɛi pii kɛɛ amɛleee nɔ ni amɛaakɛɛ, shi no kɔɔɔ he eko, ejaakɛ jɛmɛ po ni amɛyɔɔ lɛ ji nɔ ni he hiaa fe fɛɛ.”

Kaanyɛ amɛnɔ ni amɛkpa ŋkɔmɔyeli: Ekolɛ wɔɔsumɔ wɔkɛɛ akɛ, ‘Kwɛmɔ, kwɛmɔ, mɛni ofeɔ nɛɛ, kaafo.’ Shi ebaahi jogbaŋŋ akɛ aaaha yaafonui lɛ aho. Beni Katherine susuɔ ewu gbele he lɛ, ekɛɛ akɛ, “Misusuɔ akɛ ehe miihia ni aŋmɛ mɛi ni agbo ashi amɛ lɛ gbɛ ni amɛjie amɛhenumɔi akpo.” Tsĩi su ni aaaha okɛɛ mɛi krokomɛi bɔ ni esa akɛ amɛnu nii ahe amɛha lɛ gbɛ. Ni kaasusu akɛ esa akɛ okɛ ohenumɔi atée bɔni afee ni okɛbu  amɛnɔ̃ lɛ he. Yɛ no najiaŋ lɛ, Biblia lɛ jieɔ yi akɛ, “nyɛkɛ mɛi ni foɔ lɛ afoa.”​—Romabii 12:15.

Kaaye oyai ni owo amɛ ŋaa ni amɛshɛrɛ mɔ ni egbo lɛ atadei loo enibii krokomɛi amɛshwie, beni amɛfeko klalo akɛ amɛaafee nakai: Ekolɛ wɔɔnu he akɛ ebaahi waa akɛ amɛaashɛrɛ nibii fɛɛ ni baaha amɛkai nɔ ni ba lɛ amɛshwie ejaakɛ nomɛi haa ŋkɔmɔyeli lɛ sɛɛ tsɛɔ yɛ gbɛ ko nɔ. Shi wiemɔ ni ji, “Nɔ ni anaaa lɛ, ebaŋ jwɛŋmɔ mli” lɛ tsuŋ nii yɛ biɛ. Ehe baahia ni mɔ ni agbo ashi lɛ lɛ hiɛ akpa mɔ ni egbo lɛ nɔ fiofio. Kaimɔ bɔ ni Biblia lɛ tsɔɔ akɛ blematsɛ Yakob fee enii eha beni aha ehe eye akɛ kooloo awuiyelɔ ko egbe ebinuu bibioo Yosef lɛ. Beni akɛ Yosef atade wuyaa ni lá ekpa mli lɛ batsɔɔ Yakob lɛ, “eye ebi lɛ he ŋkɔmɔ gbii pii. Ni ebihii lɛ kɛ ebiyei lɛ fɛɛ te shi, koni amɛbashɛje emii, shi ekpɛlɛɛɛ miishɛjemɔ.”​—1 Mose 37:31-35.

 Kaakɛɛ akɛ, ‘Nyɛbaanyɛ nyɛfɔ bi kroko’: Yoofɔyoo ko ni ebi gbo lɛ kɛɛ akɛ, “misumɔɔɔ bɔ ni mɛi kɛɔ mi akɛ manyɛ mafɔ bi kroko lɛ.” Ekolɛ amɛhiɛ jwɛŋmɔ kpakpa, shi kɛha fɔlɔ ni yeɔ ŋkɔmɔ lɛ, wiemɔi ni akɛaatsɔɔ akɛ abaanyɛ afɔ eko akɛto gbekɛ ni egbo lɛ najiaŋ lɛ baanyɛ ‘adúmɔ mɔ tamɔ klante.’ (Abɛi 12:18) Anyɛŋ akɛ gbekɛ kome ato gbekɛ kroko najiaŋ kɔkɔɔkɔ. Mɛni hewɔ? Ejaakɛ esoro amɛteŋ mɔ fɛɛ mɔ.

Kaaha eba lɛ akɛ osumɔŋ ni otsĩ mɔ ni egbo lɛ tã: Nyɛ ko kaiɔ akɛ, “Mɛi pii ni ba lɛ etsĩii mibinuu Jimmy gbɛi ata po aloo ni amɛaawie ehe. Esa akɛ makpɛlɛ nɔ akɛ nakai ni amɛfee lɛ dɔ mi fioo.” No hewɔ lɛ kaatsake sane ni agbaa lɛ kɛ́ atsĩ mɔ ni egbo lɛ gbɛi atã. Bi mɔ lɛ kɛ́ ehe miihia ni ewie esuɔlɔ lɛ he. (Okɛto Hiob 1:18, 19 kɛ 10:1 he.) Mɛi ni agbo ashi amɛ lɛ ateŋ mɛi komɛi ahiɛ sɔɔ akɛ amɛaanu ni nanemɛi miiwie mɔ ni egbo lɛ subaŋi krɛdɛɛi komɛi ni ha amɛsumɔ esane lɛ ahe.​—Okɛto Bɔfoi lɛ Asaji 9:36-39 he.

Kaaye oyai okɛɛ akɛ, ‘No ji nɔ ni hi fe fɛɛ’: Jeee be fɛɛ be mɔdɛŋ ni obɔɔ koni otao nɔ ko ni hi yɛ gbele lɛ he lɛ ‘shɛjeɔ mɛi ni tsui fãa ni yeɔ ŋkɔmɔ lɛ amii.’ (1 Tesalonikabii 5:14) Beni oblayoo ko kaiɔ be mli ni emami gbo lɛ, ekɛɛ akɛ: “Mɛi komɛi kɛɔ akɛ, ‘Enuuu piŋmɔ he’ loo, ‘Kɛ hooo kwraa lɛ ehe ejɔ lɛ.’ Shi misumɔɔɔ ni manu nakai wiemɔi lɛ.” Wiemɔi tamɔ nɛkɛ baanyɛ aha mɛi ni agbo ashi amɛ lɛ anu he akɛ esaaa akɛ amɛyeɔ ŋkɔmɔ aloo akɛ gbele ni ba lɛ fiteee nɔ ko. Shi kɛlɛ, amɛwerɛ eho amɛhe waa diɛŋtsɛ ejaakɛ amɛsuɔlɔ lɛ eshi amɛ etee kwraa.

Ebaahi jogbaŋŋ akɛ okɛŋ akɛ, ‘Mile bɔ ni onuɔ he ohaa’: Ani onuɔ he nakai lɛɛlɛŋ? Ákɛ nɔkwɛmɔnɔ lɛ, ani obaanyɛ ole bɔ ni fɔlɔ ko nuɔ he ehaa diɛŋtsɛ beni ebi egbo lɛ kɛji bo diɛŋtsɛ lɛ obi ko gboko nakai pɛŋ? Ni kɛji obi egbo po diɛŋtsɛ lɛ, kadimɔ akɛ ekolɛ mɛi krokomɛi nuŋ he pɛpɛɛpɛ taakɛ onu he lɛ. (Okɛto Yaafo 1:12 he.) Yɛ gbɛ kroko nɔ lɛ, kɛ́ etamɔ nɔ ni sa jogbaŋŋ lɛ, ekolɛ ehe baaba sɛɛnamɔ akɛ oookɛɛ lɛ bɔ ni ofee ni onyɛ oye ohe kɛjɛ osuɔlɔ lɛ gbele mli. Yoo ko ni agbe ebiyoo na akɛ eji hewalɛwoo beni gbekɛ yoo kroko hu ni egbo lɛ nyɛ kɛɛ lɛ bɔ ni eye ehe kɛjɛ awerɛho lɛ mli yɛ sɛɛ mli lɛ. Yoo nɛɛ wie akɛ: “Gbekɛ yoo ni egbo lɛ nyɛ kɛ wiemɔ ni ji ‘Mile bɔ ni onuɔ he ohaa’ lɛ ejeee ewiemɔ lɛ shishi. Nɔ ni ekɛɛ mi kɛkɛ ji bɔ ni nibii bafee kɛha ni eha mikɛto minɔ lɛ he.”

Ní aaaye abua mɔ ni agbo ashi lɛ lɛ biɔ musuŋtsɔlɛ, sanesɛɛkɔmɔ, kɛ suɔmɔ babaoo yɛ ogbɛfaŋ. Kaamɛ ni mɔ ni agbo yɛ enɔ lɛ ba oŋɔɔ. Kaakɛɛ kɛkɛ akɛ, “Kɛ nɔ ko yɛ ni manyɛ mafee lɛ . . .” Taomɔ nakai “nɔ ko” lɛ bo diɛŋtsɛ, koni otsu he nii yɛ gbɛ ni sa nɔ.

Sanebimɔi fioo ko yɛ lolo: Biblia mli gbohiiashitee hiɛnɔkamɔ lɛ hu? Mɛni ebaanyɛ etsɔɔ kɛha bo kɛ osuɔlɔ ni egbo lɛ? Mɛɛ gbɛ nɔ wɔɔtsɔ wɔna nɔmimaa akɛ eji hiɛnɔkamɔ ni anyɛɔ akɛ he fɔɔ nɔ?