Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Sɔrɔto-feemɔ ni Kã Jamɔi Ateŋ lɛ he Kaa

Sɔrɔto-feemɔ ni Kã Jamɔi Ateŋ lɛ he Kaa

Akɛ tsɔɔlɔ lɛ, okɛ kaa ko ni tsɔɔlɔi ni hi shi yɛ afii ohai abɔ ni eho lɛ amli lɛ kɛkpeee tsɔ lɛ miikpe​—sɔrɔto-feemɔ ni kã jamɔi ateŋ.

NƆ NI baa yɛ bei pii amli yɛ Teŋgbɛ Afii lɛ fɛɛ mli ji akɛ, mɛi ni yɔɔ maŋ kome mli lɛ hiɔ jamɔ kome mli. Nyɛsɛɛ nɛɛ po, yɛ afii ohai 19 lɛ naagbee mli lɛ, no mli lɛ jamɔi wuji fioo ko pɛ yɔɔ Europa: Katolik jamɔ kɛ Protestant jamɔ ni yɔɔ anaigbɛ lɛ, Ortodɔks jamɔ kɛ Islam jamɔ ni yɔɔ bokagbɛ lɛ, kɛ Yuda jamɔ. Ŋwanejee ko bɛ he akɛ, sɔrɔto-feemɔ lɛ egbɛ eshwa waa ŋmɛnɛ yɛ Europa kɛ je lɛŋ he fɛɛ he. Ato jamɔi ni aleee hu amamɔ shi, akɛ nɔ ni maŋbii lɛ diɛŋtsɛ ateŋ mɛi komɛi ekpɛlɛ nɔ loo mɛi ni fã kɛbahi maŋ lɛ mli kɛ abobalɔi lɛ kɛba.

No hewɔ lɛ, wɔnaa Moslembii, Buddhabii, kɛ Hindubii pii yɛ maji tamɔ Australia, Britain, France, Germany, kɛ United States mli ŋmɛnɛ. Yɛ nakai beaŋ nɔŋŋ lɛ, akɛ Kristofoi lɛ, Yehowa Odasefoi kɛ ekãa miisɔmɔ yɛ maji ni fa fe 239 nɔ. Amɛyi fa fe 150,000 yɛ maji wuji komekomei 14 mli.​—Kwɛmɔ akrabatsa ni ji, “ Yehowa Odasefoi Jamɔ ni Yɔɔ Jeŋ Fɛɛ” lɛ.

Sɔrɔto-feemɔ ni ka jamɔi ateŋ yɛ maŋ lɛ mli lɛ baanyɛ eha tsɔɔlɔ lɛ kɛ kaai akpe. Akɛ nɔkwɛmɔ nɔ lɛ, ekolɛ abaatee sanebimɔi komɛi ni he hiaa lɛ ashi yɛ gbijurɔyelii ni ale waa lɛ ahe: Ani esa akɛ anyɛ nikaselɔ fɛɛ nikaselɔ nɔ awo gbijurɔyeli lɛ mli​—ni jamɔ mli ni eyɔɔ lɛ kɔɔɔ he eko? Ekolɛ mɛi ni fa enaŋ tɔ̃mɔ ko kwraa yɛ gbijurɔyelii ni tamɔ nɛkɛ he. Shi kɛlɛ, ani esaaa akɛ anaa bulɛ ahaa wekui ni faaa lɛ asusumɔi lɛ hu? Ni nɔ kroko hu yɛ ni fata he ni esa akɛ asusu he: Yɛ maji ni mla lɛ gbalaa jamɔ kɛ Maŋ lɛ mli, ni akɛ jamɔ mli nitsɔɔmɔ fataaa nɔ ni akaseɔ lɛ he lɛ, ani mɛi komɛi enaŋ akɛ gbijurɔyelii ni tamɔ nɛkɛ ni aaafee lɛ mla yɛ skul lɛ efeŋ nɔ ni kɛ ehe kpaŋ gbee?

 Fɔmɔgbii

Saji ashishi ni anuuu yɛ gbijurɔyelii ni tamɔ nɔ ni jamɔ mli nifeemɔi fioo ko yɔɔ mli lɛ ahe lɛ baanyɛ ate shi. Enɛ kɔɔ fɔmɔgbii ni ayeɔ yɛ skul sɔrɔtoi pii amli lɛ he. Eyɛ mli akɛ Yehowa Odasefoi kɛ bulɛ haa hegbɛ ni mɛi krokomɛi yɔɔ akɛ amɛaaye fɔmɔgbii lɛ moŋ, shi ŋwanejee ko bɛ he akɛ, ole jogbaŋŋ akɛ amɛsumɔɔɔ ni amɛkɛ amɛhe woɔ gbijurɔyelii ni tamɔ nɛkɛ lɛ amli. Shi ekolɛ oleee yiŋtoi ahewɔ ni amɛ kɛ amɛbii ekpɛ amɛyiŋ akɛ amɛkɛ amɛhe woŋ gbijurɔyelii nɛɛ amli lɛ.

Le livre des religions (Jamɔi Ahe Wolo Lɛ), ensaiklopedia ni aja waa diɛŋtsɛ yɛ France lɛ, tsɛɔ nɔ ni afɔɔ feemɔ nɛɛ akɛ kusum, ni eto naa efata “je lɛŋ kusumii” lɛ ahe. Eyɛ mli akɛ abuɔ lɛ ŋmɛnɛ akɛ eji je lɛŋ kusum ni yeee awui moŋ, shi fɔmɔ gbijurɔyelii jɛ wɔŋjamɔ mli diɛŋtsɛ.

The Encyclopedia Americana (1991 nɔ lɛ) kɛɛ: “Mizraim, Hela, Roma, kɛ Persia blema je lɛ ye nyɔŋmɔi, maŋtsɛmɛi, kɛ abladei afɔmɔgbii.” Woloŋmalɔi, Ralph kɛ Adelin Linton jie yiŋtoo ni hɔ enɛ sɛɛ lɛ kpo. Amɛŋma yɛ amɛ wolo ni ji The Lore of Birthdays lɛ mli akɛ: “Mesopotamia kɛ Mizraim, hiŋmɛigbelemɔ jɛɛhei lɛ hu ji klɛŋklɛŋ shikpɔji ni hii kai ni amɛwo amɛ fɔmɔgbii ahiɛ nyam yɛ nɔ. Fɔmɔgbii ahe saji ni aŋmalaa atoɔ lɛ he bahia yɛ blema bei amli, titri lɛ akɛni gbi nɔ ni afɔ mɔ lɛ he miihia koni ŋulamiiaŋkwɛlɔi kɛtsɔɔ nɔ ni baaba lɛ hewɔ.” Nɛkɛ ŋulamiiaŋkwɛmɔ ni akɛtsuɔ nii tɛɛ nɛɛ ji sane ko ni mɔ fɛɛ mɔ ni kpooɔ ŋulamiiaŋkwɛmɔ yɛ nɔ ni Biblia lɛ kɛɔ hewɔ lɛ susuɔ he waa diɛŋtsɛ.​—Yesaia 47:13-15.

Belɛ ebɛ naakpɛɛ akɛ, wɔkaneɔ yɛ The World Book Encyclopedia lɛ mli akɛ: “Mra be mli Kristofoi lɛ yeee [Kristo] E-fɔmɔgbi ejaakɛ amɛbuɔ mɔ  fɛɛ mɔ fɔmɔgbiyeli lɛ akɛ wɔŋjalɔi akusum.”​—Kpo 3, baafa 416.

Odasefoi naa bei kpakpai ni ayeɔ kɛ miishɛɛ lɛ amli ŋɔɔmɔ

Akɛni sane ni etsɔ hiɛ lɛ yɔɔ jwɛŋmɔ mli hewɔ lɛ, Yehowa Odasefoi ehala akɛ amɛkɛ amɛhe woŋ fɔmɔgbi he gbijurɔyelii amli. Eka shi faŋŋ akɛ, gbekɛ ko fɔmɔ lɛ ji nifeemɔ ni yɔɔ miishɛɛ, ni yɔɔ nyam. Yɛ adebɔɔ su naa lɛ, fɔlɔi fɛɛ nyãa, yɛ be mli ni amɛbii daraa ni amɛyaa hiɛ yɛ afi fɛɛ afi ni hoɔ eyaa lɛ mli lɛ. Yehowa Odasefoi hu nyãa babaoo diɛŋtsɛ yɛ amɛsuɔmɔ ni amɛjieɔ lɛ kpo amɛtsɔɔ amɛ weku kɛ nanemɛi kɛtsɔɔ nikeenii kɛ hiɛtserɛjiemɔ ni anaa mli ŋɔɔmɔ kutuu lɛ nɔ. Shi kɛlɛ, yɛ he ni fɔmɔgbi he gbijurɔyelii jɛ kɛba hewɔ lɛ, amɛsumɔɔ moŋ akɛ amɛaafee nakai yɛ bei krokomɛi amli yɛ afi muu lɛ fɛɛ mli.​—Luka 15:22-25; Bɔfoi lɛ Asaji 20:35.

Blonya

Ayeɔ Blonya yɛ je lɛŋ he fɛɛ he, yɛ maji ni jeee Kristofoi amaji lɛ po mli. Akɛni Kristendom jamɔi lɛ babaoo ekpɛlɛ hejɔɔmɔ gbi nɛɛ nɔ hewɔ lɛ,  eeefee naakpɛɛ sane moŋ akɛ Yehowa Odasefoi ehala akɛ amɛyeŋ. Mɛni hewɔ eyɔɔ nakai?

Taakɛ esaiklopediai pii tsɔɔ faŋŋ lɛ, aje gbɛ ato December 25 ama shi akɛ Yesu fɔmɔgbi koni ekɛ Roma wɔŋjamɔ gbijurɔyeli lɛ aba yɛ be kome mli. Kadimɔ saji ni nyiɛ sɛɛ ni ajaje atsɔɔ, ni jɛ woji sɔrɔtoi ni atsɛɔ saji asɛɛ kɛjɛɔ mli lɛ amli nɛɛ:

“Aleee gbi nɔ ni afɔ Kristo. Sanekpakpai lɛ etsɔɔɔ gbi lɛ loo nyɔŋ nɔ ni afɔ lɛ lɛ.”​—New Catholic Encyclopedia, Kpo III, baafa 656.

“Saturnalia ni yɔɔ Roma lɛ kɛ gbɛ ni atsɔɔ nɔ afeɔ Blonya bei amli kusumii ni akɛyeɔ gbijurɔ lɛ babaoo ba.” ​—Encyclopædia of Religion and Ethics

“Blonya kusumii lɛ babaoo ni yaa nɔ yɛ Europa amrɔ nɛɛ, loo aŋmala ashwie shi kɛjɛ blema bei amli kɛbaa lɛ, jeee Kristofoi akusumii diɛŋtsɛ, shi eji wɔŋjalɔi akusumii ni Sɔlemɔ lɛ ehe loo ekpɛlɛ nɔ. . . . Saturnalia ni yɔɔ Roma lɛ kɛ gbɛ ni atsɔɔ nɔ afeɔ Blonya bei amli kusumii ni akɛyeɔ gbijurɔ lɛ babaoo ba.”​—Encyclopædia of Religion and Ethics (Edinburgh, 1910), ni James Hastings ŋma lɛ, Kpo III, baafai 608-9.

“Áye Blonya aahu yɛ December 25 yɛ Kristofoi asɔlemɔi fɛɛ mli kɛjɛ afii ohai ejwɛ lɛ mli tɔ̃ɔ. No mli lɛ, enɛ ji wɔŋjalɔi lɛ afɛi-be mli gbijurɔyeli ni atsɛɔ lɛ ‘Hulu lɛ Fɔmɔ (Latin, natale)’ lɛ, akɛni hulu lɛ feɔ tamɔ nɔ ni afɔ lɛ ekoŋŋ akɛni gbii lɛ asɛɛ bakɛɔ shikome ekoŋŋ hewɔ. Sɔlemɔ lɛ kpɛlɛ kusum ni ehe gbɛi waa diɛŋtsɛ nɛɛ nɔ yɛ Roma . . . kɛtsɔ shishinumɔ hee ni ekɛha lɛ lɛ nɔ.”​—Encyclopædia Universalis, 1968, (French) Kpo 19, baafa 1375.

“Blonya gbijurɔyeli lɛ hiɛyaa lɛ ba yɛ Sol Invictus (Mithra) he gbijurɔyelii ni wɔŋjalɔi yeɔ lɛ ni ná no nɔ hewalɛ hewɔ. Yɛ gbɛ kroko nɔ lɛ, akɛ December 25, ni ji fɛi-be mli ni hulu lɛ eyashɛ kooyigbɛ shɔŋŋ lɛ, to la ni kpɛ kɛba je lɛ mli kɛtsɔ Kristo nɔ lɛ he, ni no hewɔ lɛ atsɔ nɔ ni Sol Invictus damɔ shi kɛha lɛ aha Kristo.”​—Brockhaus Enzyklopädie, (German) Kpo 20, baafa 125.

Te mɛi komɛi efee amɛnii amɛha tɛŋŋ yɛ be mli ni akaseɔ anɔkwalei ni kɔɔ Blonya he lɛ? The Encyclopædia Britannica kɛɛ: “Ŋleshi puritanbii lɛ gu nyamɔi loo jamɔŋ nifeemɔi fɛɛ yɛ 1644 kɛtsɔ mla ni Maŋ Ajinafoi  Agwabɔɔ lɛ wo lɛ nɔ, kɛ yiŋtoo akɛ no [Blonya] ji wɔŋjalɔi agbijurɔyeli, ni awo mla ni akaye lɛ pii. Charles II tee gbijurɔyeli lɛ shi ekoŋŋ, shi Scotlandbii lɛ kɛ amɛhe kpɛtɛ Puritanbii ajwɛŋmɔ lɛ he.” Mra be mli Kristofoi lɛ yeee Blonya, ni nakai nɔŋŋ ŋmɛnɛ, Yehowa Odasefoi hu yeee loo ni amɛkɛ amɛhe aaawo nifeemɔi ni kɔɔ Blonya he lɛ amli.

Shi, Biblia lɛ wieɔ nikee loo weku loo nanemɛi ni afɔɔ amɛ nine kɛha miishɛɛ niyeli yɛ bei krokomɛi amli lɛ he ekpakpa. Ewoɔ fɔlɔi ahewalɛ ni amɛtsɔse amɛbii koni amɛjɛ amɛtsuiŋ amɛke nii, fe ni amɛaake nii akɛni aakpa gbɛ akɛ aaafee nakai lɛ hewɔ kɛkɛ. (Mateo 6:2, 3) Atsɔɔ Yehowa Odasefoi abii koni amɛhere mɛi ni amɛbu amɛ hu, ni enɛ fata hegbɛ ni mɛi krokomɛi yɔɔ akɛ amɛaaye Blonya ni aaayoo lɛ he. Yɛ nakai gbɛ nɔ hu lɛ, amɛhiɛ sɔɔ kɛ akɛ bulɛ ha yiŋ ni amɛkpɛɔ akɛ amɛkɛ amɛhe woŋ Blonyayelii amli lɛ.

Gbijurɔyelii Krokomɛi

Yehowa Odasefoi hiɛɔ shidaamɔ nɛɛ nɔŋŋ mli yɛ hejɔɔmɔ gbii krokomɛi ni damɔ jamɔ nɔ loo nɔ ni jamɔ he nɔ ko fioo pɛ yɔɔ mli ni baa yɛ skul afi lɛ mli yɛ maji pii anɔ lɛ ahe, tamɔ June gbijurɔyelii ni ayeɔ yɛ Brazil, Epiphany ni ayeɔ yɛ France, Carnival ni ayeɔ yɛ Germany, Setsubun ni ayeɔ yɛ Japan, kɛ Halloween ni ayeɔ yɛ United States lɛ nɛkɛ. Yɛ enɛɛmɛi, loo gbijurɔyelii krokomɛi ni atsiko ta yɛ biɛ lɛ ahe lɛ, eka shi faŋŋ akɛ, fɔlɔi Odasefoi loo amɛbii lɛ baana he miishɛɛ akɛ amɛaaha saji fɛɛ ni ooobi lɛ ahetoo.