Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 6

Stefano​—“Duromɔ Kɛ Hewalɛ Eyi Lɛ Obɔ”

Stefano​—“Duromɔ Kɛ Hewalɛ Eyi Lɛ Obɔ”

Nɔ ni wɔkaseɔ yɛ ekãa ni Stefano kɛye odase yɛ Akuashɔŋ lɛ hiɛ lɛ mli

Edamɔ Bɔfoi lɛ Asaji 6:8–8:3 lɛ nɔ

1-3. (a) Mɛɛ shihilɛ ni woɔ mɔ he gbeyei Stefano kɛkpe, shi te efee enii eha tɛŋŋ? (b) Mɛɛ sanebimɔi ahe wɔbaasusu?

STEFANO damɔ kojolɔi lɛ ahiɛ. Hii 71 tara shi kɛjɛ eninejurɔ nɔ kɛyashi ebɛku yɛ asa wulu ko nɔ, ni eeenyɛ efee akɛ asa nɛɛ bɛŋkɛ Yerusalem sɔlemɔwe lɛ. Kojolɔi lɛ, ni ji Akuashɔŋ lɛ anaa ekpe shi koni amɛkojo Stefano. Kojolɔi nɛɛ yɛ gbɛnaa wulu, abuɔ amɛ waa, ni amɛteŋ mɛi babaoo ebuuu Yesu kaselɔ nɛɛ kwraa. Osɔfonukpa Kaiafa ji mɔ ni ha saneyelihe lɛ naa bakpe shi, ni lɛ ji sɛinɔtalɔ beni Akuashɔŋ lɛ kojo Yesu Kristo ní amɛbu lɛ gbele fɔ́ nyɔji fioo komɛi ni eho lɛ. Ani Stefano tsui efa?

2 Bɔ ni ana Stefano hiɛ aha yɛ nɛkɛ be nɛɛ mli lɛ sa kadimɔ waa. Kojolɔi lɛ tsuu amɛhiŋmɛii amɛshwie enɔ, ni amɛna ehiɛ “tamɔ Nyɔŋmɔ bɔfo ko hiɛ.” (Bɔf. 6:15) Ŋwɛi bɔfoi kɛ Yehowa Nyɔŋmɔ shɛɛ sane haa, no hewɔ lɛ amɛhe jɔ, ni amɛsheee nɔ ko gbeyei. Nakai nɔŋŋ Stefano hu fee—ni kojolɔi ni he tsɛ̃ɔ lɛ lɛ po na enɛ. Mɛni ha enyɛ efee kpoo nakai?

3 Kristofoi ni yɔɔ ŋmɛnɛ lɛ baanyɛ amɛkase nii babaoo kɛjɛ sanebimɔ nɛɛ hetoo lɛ mli. Esa akɛ wɔle nɔ hu ni ha Stefano baje shihilɛ nɛɛ mli. Be ko ni eho lɛ, te efã ehemɔkɛyeli lɛ he eha tɛŋŋ? Ni mɛɛ gbɛi anɔ wɔɔtsɔ wɔkase lɛ?

‘Amɛwo Maŋbii lɛ Ayiŋ’ (Bɔfoi lɛ Asaji 6:8-15)

4, 5. (a) Mɛni hewɔ Kristofoi asafo lɛ kɛ Stefano tsu nii waa lɛ? (b) Mɛɛ gbɛ nɔ ‘duromɔ kɛ hewalɛ eyi Stefano obɔ’?

4 Wɔtsɔ hiɛ wɔkase akɛ Stefano ji mɔ ko ni Kristofoi asafo ni ato shishi etsɛko lɛ kɛ lɛ tsu nii waa. Wɔkase yɛ wolo nɛɛ yitso ni tsɔ hiɛ lɛ mli akɛ, beni bɔfoi lɛ taoɔ mɛi koni akɛ nitsumɔ awo amɛdɛŋ lɛ, Stefano fata hii heshibalɔi kpawo ni afamɔ ni miisumɔ ni amɛye amɛbua bɔfoi lɛ ahe. Kɛ́ wɔkwɛ bɔ ni nuu nɛɛ baa ehe shi yɛ duromɔ keenii ni Nyɔŋmɔ kɛduro lɛ lɛ fɛɛ sɛɛ lɛ, wɔhiɛ sɔɔ lɛ waa diɛŋtsɛ. Wɔkaneɔ yɛ Bɔfoi lɛ Asaji 6:8 (Ga Biblia hee) lɛ akɛ, aha Stefano “fee naakpɛɛ nii kɛ okadii wuji” taakɛ bɔfoi lɛ ekomɛi fee lɛ. Ahaa wɔleɔ hu akɛ “duromɔ kɛ hewalɛ eyi lɛ obɔ.” Mɛni enɛ tsɔɔ?

 5 Eyɛ faŋŋ akɛ Stefano mli hi ni ehe jɔ, ni no haa mɛi nyɛɔ amɛbɛŋkɛɔ lɛ. Bɔ ni ewieɔ lɛ kɔneɔ etoibolɔi lɛ babaoo ayiŋ, ni ehaa amɛyiŋ tsɔɔ akɛ nɔ ni ewieɔ lɛ ji anɔkwale, ni ákɛ kɛ́ amɛbo lɛ toi lɛ amɛbaaná he sɛɛ. Akɛni eŋmɛɔ gbɛ ni Yehowa mumɔ lɛ kudɔɔ lɛ hewɔ lɛ, mumɔ lɛ kɛ lɛ tsuɔ nii, ni no eha hewalɛ eyi lɛ obɔ lɛ. Nɔ najiaŋ ni eeewó ehe nɔ yɛ eduromɔ keenii, kɛ nyɛmɔi ni eyɔɔ lɛ ahewɔ lɛ, ekɛ yijiemɔ lɛ fɛɛ ha Yehowa, ni etsɔɔ akɛ esumɔɔ etoibolɔi lɛ. Belɛ, ŋwanejee ko bɛ he akɛ nii nɛɛ ahewɔ ni mɛi ni teɔ shi amɛwoɔ lɛ lɛ na lɛ akɛ ebaanyɛ ehao amɛ lɛ!

6-8. (a) Mɛɛ saji enyɔ mɛi ni te shi wo Stefano lɛ kɛfolɔ enaa, ni mɛni hewɔ? (b) Mɛni hewɔ Kristofoi ni yɔɔ ŋmɛnɛ lɛ baanyɛ aná Stefano nɔkwɛmɔnɔ lɛ he sɛɛ lɛ?

6 Hii srɔtoi te shi koni amɛkɛ Stefano ataa naa, shi “amɛnyɛɛɛ nilee kɛ mumɔ ni ekɛwieɔ lɛ naa amɛdamɔ.” * Akɛni amɛnyɛɛɛ enaa amɛdamɔ hewɔ lɛ, “amɛyafĩ amɛwo mɛi komɛi anaa” koni amɛbafolɔ Kristo sɛɛnyiɛlɔ ni efeko efɔŋ ko nɛɛ naa. Agbɛnɛ hu, “amɛwo maŋbii lɛ,” maŋ onukpai lɛ, kɛ woloŋmalɔi lɛ “ayiŋ” ni amɛbamɔ Stefano, ni amɛkpala lɛ kɛtee Akuashɔŋ lɛ hiɛ. (Bɔf. 6:9-12) Shitee-kɛwolɔi lɛ folɔ enaa kɛ saji enyɔ, nomɛi ji: Eewie Nyɔŋmɔ kɛ Mose he musubɔɔ wiemɔi. Yɛ mɛɛ gbɛi anɔ?

7 Mɛi ni folɔ Stefano naa lɛ kɛɛ akɛ ewie eshi “hekrɔŋkrɔŋ lɛ,” ni ji sɔlemɔwe ni yɔɔ Yerusalem lɛ, ni no hewɔ lɛ ewie Nyɔŋmɔ he musubɔɔ wiemɔ. (Bɔf. 6:13) Amɛfolɔ enaa akɛ ewie eshi Mose Mla lɛ, ni no hewɔ lɛ ewie Mose he musubɔɔ wiemɔ, ni tsɔɔ akɛ eetsake kusumii ni Mose kɛha amɛ lɛ ahiɛ. Naafolɔmɔi nɛɛ yɛ hiɛdɔɔ waa ejaakɛ Yudafoi ni yɔɔ nakai beaŋ lɛ kɛ sɔlemɔwe lɛ, Mose Mla lɛ mli saji lɛ, kɛ blema saji ni amɛkɛfata Mla lɛ he lɛ shwɛɛɛ kwraa. No hewɔ lɛ, naafolɔmɔ nɛɛ tsɔɔ akɛ Stefano he yɛ oshara, ni esa gbele!

8 Dɔlɛ sane ji akɛ, bei pii lɛ, jamɔŋbii tsɔ̃ɔ ŋaa ni tamɔ nɛkɛ koni amɛkɛ Nyɔŋmɔ tsuji awo sane mli. Kɛbashi ŋmɛnɛ lɛ, shitee-kɛwolɔi ni ji jamɔŋbii woɔ maŋ hiɛnyiɛlɔi ayiŋ koni amɛwa Yehowa Odasefoi lɛ ayi. Kɛ́ afolɔ wɔnaa, loo atsake wɔwiemɔi ahiɛ lɛ, te esa akɛ wɔfee wɔnii wɔha tɛŋŋ? Wɔbaanyɛ wɔkase enɛ he saji babaoo kɛjɛ Stefano dɛŋ.

Eye “Anunyam Nyɔŋmɔ lɛ” He Odase Kɛ Ekãa (Bɔfoi lɛ Asaji 7:1-53)

9, 10. Te mɛi komɛi ewie amɛshi wiemɔ ni Stefano ha yɛ Akuashɔŋ lɛ hiɛ lɛ amɛha tɛŋŋ, ni mɛni esa akɛ wɔha ehi wɔjwɛŋmɔ mli?

9 Taakɛ atsɔɔ mli yɛ yitso nɛɛ shishijee lɛ, beni Stefano boɔ enaa ni afolɔɔ lɛ toi lɛ, efee kpoo ni ehiɛ fee tamɔ ŋwɛi bɔfo ko hiɛ. Agbɛnɛ Kaiafa kwɛ lɛ, ni ebi lɛ akɛ: “Ani saji nɛɛ yɛ mli nakai lo?” (Bɔf. 7:1) Eshɛ Stefano nɔ akɛ ewie. Ni ewie hu!

 10 Mɛi komɛi ewie amɛshi Stefano wiemɔ lɛ, ni amɛtsɔɔ akɛ, ewiemɔ babaoo lɛ fɛɛ sɛɛ lɛ, ejieee naafolɔmɔi ni akɛshwie enɔ lɛ anaa. Shi yɛ anɔkwale mli lɛ, Stefano fee bɔ ni esa akɛ “wɔfã” sanekpakpa lɛ he lɛ he nɔkwɛmɔnɔ ni sa kadimɔ waa efɔ̃ shi eha wɔ. (1 Pet. 3:15, NW) Ha ehi ojwɛŋmɔ mli akɛ afolɔ Stefano naa akɛ ewie eshi sɔlemɔwe lɛ, ni no hewɔ lɛ ewie Nyɔŋmɔ he musubɔɔ wiemɔ, ni ákɛ ewie eshi Mla lɛ, ni no hewɔ lɛ ewie Mose he musubɔɔ wiemɔ. Stefano wie Israelbii ayinɔi srɔtoi etɛ ahe ni ekɛha hetoo, ni emamɔ otii komɛi anɔ mi jogbaŋŋ. Nyɛhaa wɔsusua yinɔi etɛ nɛɛ ahe ekomekomei wɔkwɛa.

11, 12. (a) Te Stefano kɛ Abraham shihilɛ lɛ tsu nii jogbaŋŋ eha tɛŋŋ? (b) Mɛni hewɔ Stefano tsĩ Yosef tã yɛ ewiemɔ lɛ mli lɛ?

11 Israelbii lɛ ablematsɛmɛi lɛ abeaŋ. (Bɔf. 7:1-16) Stefano wie Abraham, mɔ ni Yudafoi lɛ buɔ lɛ waa yɛ ehemɔkɛyeli lɛ hewɔ lɛ he kɛje ewiemɔ lɛ shishi. Stefano kɛ sane ni he hiaa waa ni amɛkɛ lɛ kpãa gbee yɛ he nɛɛ je ewiemɔ lɛ shishi, ni ekɛɛ akɛ Yehowa ni ji “Anunyam Nyɔŋmɔ lɛ” jie ehe kpo klɛŋklɛŋ kwraa etsɔɔ Abraham yɛ Mesopotamia. (Bɔf. 7:2) Abraham yato gbɔ yɛ Shiwoo Shikpɔŋ lɛ nɔ. No mli lɛ Abraham bɛ sɔlemɔwe loo Mose Mla lɛ. Mɛni hewɔ mɔ ni esa akɛ ama nɔ mi doo akɛ be fɛɛ be lɛ, ja aná sɔlemɔwe, loo mlai dani abaanyɛ aye Nyɔŋmɔ anɔkwa lɛ?

12 Stefano toibolɔi lɛ buɔ Yosef ní eji Abraham seshinyo lɛ hu waa, shi Stefano kai amɛ akɛ Yosef diɛŋtsɛ nyɛmimɛi, mɛi amli ni ajɛ aná Israel akutsei lɛ, wa Yosef ni ji jalɔ lɛ yi ni amɛhɔɔ lɛ kɛtee nyɔŋyeli mli. Kɛlɛ, Nyɔŋmɔ tsɔ Yosef nɔ ebaa Israel yi yɛ hɔmɔ beaŋ. Ekã shi faŋŋ akɛ Stefano le jogbaŋŋ akɛ nibii komɛi ni ba Yesu Kristo nɔ lɛ tamɔ nɔ ni ba Yosef nɔ lɛ nɔŋŋ, shi bɔni afee ni etoibolɔi lɛ aya nɔ amɛbo lɛ toi lɛ, etsĩii enɛ tã.

13. Mɛɛ gbɛ nɔ Stefano kɛ Mose he sane ni ewie lɛ ha enaa ni afolɔ lɛ hetoo, ni mɛɛ sane oti eha efee faŋŋ yɛ ewiemɔ lɛ mli?

13 Mose beaŋ. (Bɔf. 7:17-43) Stefano wie Mose he babaoo—ni nilee yɛ mli akɛ efee nakai ejaakɛ Akuashɔŋ lɛ mlibii lɛ ateŋ mɛi babaoo ji Sadukifoi, ni amɛkpɛlɛɛɛ Biblia mli wolo ko kwraa nɔ akɛ ja nɔ ni Mose ŋmala lɛ pɛ. Kaimɔ hu akɛ amɛfolɔ Stefano naa akɛ ewie Mose he musubɔɔ wiemɔ. Stefano wiemɔi lɛ ha nakai naafolɔmɔ lɛ hetoo tɛ̃ɛ, ejaakɛ etsɔɔ akɛ eyɛ  bulɛ diɛŋtsɛ kɛha Mose kɛ Mla lɛ. (Bɔf. 7:38) Eha efee faŋŋ akɛ mɛi ni Mose hu bɔ mɔdɛŋ akɛ ehere amɛ lɛ, amɛ nɔŋŋ amɛkpoo lɛ. Amɛkpoo lɛ beni eye afii 40. Nɔ ni fe afii 40 sɛɛ beni eji amɛhiɛnyiɛlɔ lɛ, amɛte shi amɛwo lɛ shii abɔ. * Kɛtsɔ enɛ nɔ lɛ, fiofio lɛ, Stefano ha oti ni yɔɔ esane lɛ mli lɛ fee faŋŋ: Nyɔŋmɔ webii lɛ kpoo mɛi ni Yehowa hala akɛ amɛhiɛnyiɛlɔi lɛ shii abɔ.

14. Mose he sane ni Stefano kɛtsu nii yɛ ewiemɔ lɛ mli lɛ ha mɛɛ otii fee faŋŋ?

14 Stefano kai etoibolɔi lɛ akɛ, Mose gba akɛ abaatee gbalɔ ko ni tamɔ lɛ Mose lɛ shi yɛ Israel. Namɔ baafee nakai gbalɔ lɛ, ni te abaahere lɛ aha tɛŋŋ? Stefano haaa sanebimɔi nɛɛ ahetoo nɔŋŋ, emɛ kɛyashi eyaagbe ewiemɔ lɛ naa. Eha sane oti kroko hu fee faŋŋ: Mose ná le akɛ abaanyɛ aha shikpɔŋ fɛɛ shikpɔŋ afee krɔŋkrɔŋ, taakɛ eji yɛ shikpɔŋ ni Mose damɔ nɔ beni Yehowa kɛ lɛ wie kɛjɛ ŋmeitso ni tsoɔ kɛ la lɛ mli lɛ gbɛfaŋ lɛ. No hewɔ lɛ, ani tsũ kome ko, tamɔ sɔlemɔwe ni yɔɔ Yerusalem lɛ pɛ mli abaanyɛ ajá Yehowa yɛ? Nyɛhaa wɔkwɛa.

15, 16. (a) Mɛni hewɔ ehi akɛ Stefano wie kpeebuu lɛ he yɛ ewiemɔ lɛ mli lɛ? (b) Te Stefano kɛ Salomo sɔlemɔwe lɛ tsu nii yɛ ewiemɔ lɛ mli eha tɛŋŋ?

15 Kpeebuu lɛ kɛ sɔlemɔwe lɛ. (Bɔf. 7:44-50) Stefano kai mɛi ni yɔɔ saneyelihe lɛ akɛ beni amako sɔlemɔwe ni yɔɔ Yerusalem lɛ, Nyɔŋmɔ ha Mose fee kpeebuu koni ajá yɛ mli—ni efee lɛ bɔ ni anyɛɔ ayashĩɔ yɛ he kroko. Mɔ ko mɔ ko nyɛŋ akɛɛ akɛ sɔlemɔwe lɛ hi fe kpeebuu lɛ, ejaakɛ Mose diɛŋtsɛ po já Nyɔŋmɔ yɛ mli.

16 Sɛɛ mli beni Salomo ma Yerusalem sɔlemɔwe lɛ, akɛ mumɔ tsirɛ lɛ ni eha sane ko ni he hiaa waa fee faŋŋ yɛ esɔlemɔ lɛ mli. Stefano kɛɛ akɛ, “Ŋwɛinyo lɛ, ehiii tsũi ni akɛ niji fee lɛ amli.” (Bɔf. 7:48; 2 Kron. 6:18) Yehowa baanyɛ ekɛ sɔlemɔwe atsu eyiŋtoi ahe nii, shi jeee jɛmɛ pɛ abaanyɛ ajá lɛ yɛ. Belɛ, mɛni hewɔ mɔ esa akɛ ejálɔi anu he akɛ ja amɛjá lɛ yɛ tsũ ni akɛ niji fee mli dani ebaakpɛlɛ nɔ lɛ? Stefano tsɛ́ wiemɔ yisɛɛ kɛjɛ Yesaia wolo lɛ mli, ni ekɛmu eniiamlitsɔɔmɔ nɛɛ naa jogbaŋŋ akɛ: “Ŋwɛi lɛ, misɛ̃i ni, ni shikpɔŋ lɛ, minaneshi maŋoo ni: Mɛɛ tsũ nyɛaama nyɛha mi mɔ, asaŋ nɛgbɛ ji mihejɔɔmɔhe lɛ? Nuŋtsɔ [Yehowa] kɛɛ; aso jeee minine fee nibii nɛɛ fɛɛ?”—Bɔf. 7:49, 50; Yes. 66:1, 2.

17. Mɛɛ gbɛ nɔ Stefano kɛ wiemɔ ni eha lɛ (a) ha susumɔi ni etoibolɔi lɛ hiɛ lɛ fee faŋŋ (b) ha naafolɔmɔi ni akɛshwie enɔ lɛ ahetoo?

17 Kɛ́ osusu wiemɔ ni Stefano ha yɛ Akuashɔŋ lɛ hiɛ lɛ he kɛbashi he ni wɔshɛ nɛɛ lɛ, ani okpɛlɛɛɛ nɔ akɛ ekɛ hesaa ha efee faŋŋ akɛ mɛi ni folɔɔ enaa lɛ hiɛ susumɔ ni ejaaa? Eha ana akɛ Yehowa tsuɔ eyiŋtoi ahe nii fiofio, etsakeɔ gbɛi anɔ ni etsɔɔ etsuɔ eyiŋtoo he nii lɛ, ni ehiɛɛɛ blema nifeemɔi amli. Mɛi ni maa nɔ mi akɛ sɔlemɔwe fɛfɛo ni yɔɔ Yerusalem lɛ mli esa akɛ ajá yɛ, ni akɛ esa akɛ anyiɛ kusumii kɛ blema saji ni  akɛfata Mose Mla lɛ he lɛ asɛɛ lɛ nuuu nɔ hewɔ ni akɛ Mla lɛ ha, kɛ nɔ hewɔ ni ama sɔlemɔwe lɛ shishi! Yɛ gbɛ ko nɔ lɛ, wiemɔ ni Stefano ha lɛ miibi mɛi ni folɔ enaa lɛ akɛ: Ani jeee Yehowa toi ni nyɛaabo lɛ moŋ tsɔɔ akɛ nyɛyɛ bulɛ kpele kɛha Mla lɛ kɛ sɔlemɔwe lɛ? Sanebimɔ ni he hiaa waa nɛ. Yɛ anɔkwale mli lɛ, Stefano kɛ ewiemɔ lɛ fã lɛ diɛŋtsɛ enifeemɔi lɛ ahe, ejaakɛ ejɛɔ etsui mli fɛɛ eboɔ Yehowa toi.

18. Mɛɛ gbɛi anɔ esa akɛ wɔbɔ mɔdɛŋ wɔkase Stefano?

18 Mɛni wɔbaanyɛ wɔkase kɛjɛ wiemɔ ni Stefano ha lɛ mli? Ele Ŋmalɛi lɛ amli jogbaŋŋ. Esa akɛ wɔ hu wɔkɛ hiɛdɔɔ akase Nyɔŋmɔ Wiemɔ lɛ bɔni afee ni wɔnyɛ wɔja “anɔkwale wiemɔ lɛ mli pɛpɛɛpɛ.” (2 Tim. 2:15) Wɔbaanyɛ wɔkase bɔ ni Stefano kɛ bulɛ kɛ hiɛshikamɔ tsu nii lɛ hu. Mɛi ni boɔ lɛ toi lɛ amli efu waa diɛŋtsɛ! Kɛlɛ, ebɔ mɔdɛŋ ekɛ etoibolɔi lɛ wie nibii ni kã amɛtsui nɔ waa ní ekɛ amɛ hiɛ susumɔ kome yɛ he lɛ ahe, ni no ha amɛbo lɛ toi be kplaŋŋ. Agbɛnɛ hu ekɛ amɛ wie yɛ bulɛ mli, ni etsɛ́ hii onukpai ni yɔɔ amɛteŋ lɛ akɛ “ataamɛi.” (Bɔf. 7:2) Esa akɛ wɔ hu wɔkɛ “mlijɔlɛ kɛ gbeyeishemɔ” ashiɛ Nyɔŋmɔ Wiemɔ lɛ mli anɔkwalei lɛ.—1 Pet. 3:15.

19. Mɛɛ gbɛ nɔ Stefano kɛ ekãa jaje Yehowa kojomɔ shɛɛ sane lɛ etsɔɔ Akuashɔŋ lɛ?

19 Shi kɛlɛ, esaaa akɛ wɔsusuɔ akɛ kɛ́ wɔkɛ mɛi wie Nyɔŋmɔ Wiemɔ lɛ mli anɔkwalei lɛ ahe lɛ, ebaagba amɛnaa, ni no hewɔ lɛ wɔshiɛŋ; ni asaŋ esaaa akɛ wɔshiuɔ Yehowa kojomɔ shɛɛ saji lɛ anɔ. Stefano fee nɔkwɛmɔnɔ kpakpa yɛ enɛ gbɛfaŋ. Ŋwanejee ko bɛ he akɛ, ena akɛ saji babaoo ni ekɛgbála nii amli etsɔɔ Akuashɔŋ lɛ shiii kojolɔi ni yitseiaŋ wala nɛɛ kpu po, aahu ni eeetsake amɛjwɛŋmɔ. No hewɔ lɛ, mumɔ krɔŋkrɔŋ lɛ kudɔ lɛ ni ekɛ ekãa kɛɛ amɛ akɛ amɛtamɔ amɛtsɛmɛi ni kpoo Yosef, Mose, kɛ gbalɔi krokomɛi lɛ fɛɛ lɛ nɔŋŋ, ni ekɛ no mu ewiemɔ lɛ naa. (Bɔf. 7:51-53) Yɛ anɔkwale mli lɛ, Akuashɔŋ lɛ mli kojolɔi nɛɛ ji mɛi ni gbe Mesia lɛ, mɔ hu ni Mose kɛ gbalɔi krokomɛi lɛ fɛɛ gba akɛ ebaaba lɛ. Lɛɛlɛŋ, amɛ moŋ amɛtɔ̃ Mose Mla lɛ nɔ fe mɔ fɛɛ mɔ!

“Nuŋtsɔ Yesu, Heremɔ Mimumɔ Lɛ” (Bɔfoi lɛ Asaji 7:54–8:3)

“Beni amɛnu nɛkɛ wiemɔi nɛɛ lɛ, etsurɔ amɛtsuiiaŋ, ni amɛkpe amɛnyanyɔji ashishi amɛshwie enɔ.”—Bɔfoi lɛ Asaji 7:54

20, 21. Te Akuashɔŋ lɛ fee amɛnii yɛ Stefano wiemɔi lɛ ahe amɛha tɛŋŋ, ni mɛɛ gbɛ nɔ Yehowa tsɔ ewo lɛ hewalɛ?

20 Anɔkwalei ni anyɛŋ aje he ŋwane ni Stefano wie lɛ wo kojolɔi lɛ amli la waa. Akɛni amɛhiɛgbele tɔ ejwa hewɔ lɛ, amɛkpe amɛnyanyɔji ashishi amɛshwie Stefano nɔ. Ekã shi faŋŋ akɛ, nuu anɔkwafo nɛɛ yɔse akɛ amɛnaŋ lɛ mɔbɔ, tamɔ bɔ ni amɛnaaa e-Nuŋtsɔ Yesu mɔbɔ lɛ.

21 Ehe bahia ni Stefano aná ekãa kɛdamɔ nɔ ni baaba enɔ lɛ naa, ni ekã shi faŋŋ akɛ ninaa ni Yehowa jɛ mlihilɛ mli ejie lɛ kpo etsɔɔ lɛ lɛ wo lɛ hewalɛ waa. Stefano na Nyɔŋmɔ anunyam lɛ, kɛ Yesu ni edamɔ Nyɔŋmɔ ninejurɔ nɔ! Beni Stefano gbaa kojolɔi lɛ ninaa lɛ, amɛtsimɔ amɛtoii. Mɛni hewɔ? Mra mli lɛ, Yesu kɛɛ nakai saneyelihe lɛ nɔŋŋ akɛ lɛ ji Mesia lɛ, ni akɛ etsɛŋ ni ebaaya eyata e-Tsɛ ninejurɔ nɔ. (Mar. 14:62) Stefano ninaa  lɛ tsɔɔ akɛ Yesu wiemɔ lɛ nyɔŋma shiishi ni. Anɔkwa sane ji akɛ, nakai Akuashɔŋ lɛ kwa Mesia lɛ ni amɛgbe lɛ! Amɛkɛ jwɛŋmɔ kome ke kɛba Stefano nɔ koni ayatswia lɛ tɛi ní egbo. *

22, 23. Mɛɛ gbɛi anɔ Stefano gbo tamɔ e-Nuŋtsɔ lɛ nɔŋŋ, ni mɛɛ gbɛ nɔ Kristofoi ni yɔɔ ŋmɛnɛ lɛ baanyɛ aná hekɛnɔfɔɔ tamɔ Stefano?

22 Stefano gbo tamɔ bɔ ni e-Nuŋtsɔ lɛ gbo lɛ nɔŋŋ—etsui ŋmɛ dɛmm, ekɛ ehe fɛɛ fɔ̃ Yehowa nɔ, ni ekɛ mɛi ni gbe lɛ lɛ ahe ke amɛ. Dani ebaagbo lɛ ekɛɛ akɛ, “Nuŋtsɔ Yesu, heremɔ mimumɔ lɛ,” ni ekolɛ ewie enɛ akɛni ekã he eena yɛ ninaa mli akɛ gbɔmɔ Bi lɛ damɔ Yehowa masɛi lɛ hewɔ. Ŋwanejee ko bɛ he akɛ Stefano le Yesu wiemɔi ni woɔ mɔ hewalɛ nɛɛ: “Miji shitee lɛ kɛ wala lɛ.” (Yoh. 11:25) Naagbee lɛ, Stefano kɛ gbee ni wa sɔle ekɛɛ Nyɔŋmɔ akɛ: “Nuŋtsɔ [Yehowa], kaaŋɔ nɛkɛ esha nɛɛ oŋmɛ amɛnɔ!” Beni ewie enɛ egbe naa lɛ, etsɔ̃ mli ewɔ.—Bɔf. 7:59, 60.

23 No hewɔ lɛ, Stefano batsɔ Kristo sɛɛnyiɛlɔi lɛ ateŋ mɔ klɛŋklɛŋ ni abɔ ehe amaniɛ akɛ egbo akɛni eye Yesu he odase lɛ hewɔ. (Kwɛmɔ akrabatsa ni ji  “Egbo Ejaakɛ Eye Yesu He Odase,” ni yɔɔ baafa 48 lɛ.) Shi dɔlɛ sane ji akɛ jeee lɛ pɛ ji mɔ ni agbe lɛ nakai. Kɛbashi ŋmɛnɛ lɛ, jamɔ he hiɛdɔlɔi, mɛi ni maŋkwramɔŋ nifeemɔi ehe amɛtsui fɛɛ, kɛ shitee-kɛwolɔi ni yitseiaŋ wala lɛ egbe Yehowa tsuji anɔkwafoi komɛi. Shi fɛɛ sɛɛ lɛ, wɔyɛ yiŋtoo ni wɔɔdamɔ nɔ wɔná hekɛnɔfɔɔ tamɔ Stefano. Amrɔ nɛɛ Yesu miiye nɔ akɛ Maŋtsɛ, ni ekɛ hewalɛ kpele ni e-Tsɛ lɛ kɛha lɛ lɛ miitsu nii. Bɔ fɛɛ bɔ ni fee lɛ, ebaatee esɛɛnyiɛlɔi anɔkwafoi lɛ ashi.—Yoh. 5:28, 29.

24. Mɛɛ gbɛ nɔ Saulo tsɔ eye ebua ni agbe Stefano, ni sɛɛ mli lɛ mɛɛ hewalɛ nuu anɔkwafo nɛɛ gbele lɛ ná yɛ mɛi anɔ?

24 Oblanyo ko ni atsɛɔ lɛ Saulo na nibii ni tee nɔ nɛɛ fɛɛ. Efi sɛɛ ni agbe Stefano, ni ebu mɛi ni tswia Stefano tɛi lɛ atadei lɛ ahe po. No sɛɛ etsɛɛɛ lɛ, enyiɛ hiɛ ni awa Yesu sɛɛnyiɛlɔi lɛ ayi waa. Shi Stefano gbele lɛ baaná mɛi babaoo anɔ hewalɛ yɛ gbɛ kpakpa nɔ. Enɔkwɛmɔnɔ lɛ baawaje Kristofoi krokomɛi koni amɛhiɛ mli moŋ kɛyawula shi, ní amɛ hu amɛye kunim nakai nɔŋŋ. Agbɛnɛ hu, Saulo—ní sɛɛ mli lɛ afɔɔ lɛ tsɛmɔ akɛ Paulo lɛ—baashwa ehe waa akɛ eye ebua ni agbe Stefano. (Bɔf. 22:20) Eye ebua ni agbe Stefano, shi sɛɛ mli lɛ eshwa ehe ni ekɛɛ akɛ: “Tsutsu lɛ miji musubɔlɔ kɛ yiwalɔ kɛ mɛi aniseniianifeelɔ.” (1 Tim. 1:13) Eyɛ faŋŋ akɛ Paulo hiɛ kpaaa Stefano kɛ wiemɔ ni taa mɔ tsuiŋ waa ni eha nakai gbi lɛ nɔ. Yɛ anɔkwale mli lɛ, anaa wiemɔ ni Stefano ha lɛ mli saji komɛi yɛ Paulo niŋmai kɛ ewiemɔi lɛ ekomɛi amli. (Bɔf. 7:48; 17:24; Heb. 9:24) Beni be shwie mli lɛ, Paulo nyiɛ hemɔkɛyeli kɛ ekãa he nɔkwɛmɔnɔ ni Stefano, mɔ ni “duromɔ kɛ hewalɛ eyi lɛ obɔ” lɛ fee lɛ sɛɛ jogbaŋŋ kɛmɔ shi. Shi, ani wɔ hu wɔbaafee nakai?

^ kk. 6 Shitee-kɛwolɔi nɛɛ ekomɛi jɛ ‘Libertinomɛi [Mɛi ni eye amɛhe] lɛ akpeehe lɛ.’ Ekolɛ Romabii lɛ ŋɔ amɛ nom be ko ni eho, ni amɛŋmɛɛ amɛhe sɛɛ mli, loo eeenyɛ efee akɛ amɛji nyɔ̃ji ni aŋmɛɛ amɛhe ni amɛtsɔmɔ Yudafoi. Amɛteŋ mɛi komɛi jɛ Kilikia, taakɛ eji yɛ Saulo ni jɛ Tarso lɛ gbɛfaŋ lɛ. Amaniɛbɔɔ lɛ etsɔɔɔ kɛji Saulo fata Kilikiabii ni nyɛɛɛ Stefano naa amɛdamɔ lɛ ahe.

^ kk. 13 Saji komɛi yɛ wiemɔ ni Stefano ha lɛ mli ni anaaa yɛ Biblia lɛ mli he ko dɔŋŋ, ekomɛi ji tsɔsemɔ ni Mose ná yɛ Mizraim, afii ni eye beni ejo foi kɛshi Mizraim, kɛ bei abɔ ni eyaye yɛ Midian.

^ kk. 21 Nɔmimaa ko bɛ ni tsɔɔ akɛ Akuashɔŋ lɛ yɛ hegbɛ yɛ Roma mla naa akɛ amɛfã ni agbe mɔ ko. (Yoh. 18:31) Yɛ fɛɛ mli lɛ, etamɔ nɔ ni jeee saneyelihe lɛ fã akɛ agbe Stefano, shi moŋ mɛi komɛi ni mli efu waa ji mɛi ni kpala Stefano kɛtee ni amɛyatswia lɛ tɛi lɛ.