Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 5

‘Esa Akɛ Wɔbo Nyɔŋmɔ Toi’ Akɛ Nɔyelɔ

‘Esa Akɛ Wɔbo Nyɔŋmɔ Toi’ Akɛ Nɔyelɔ

Bɔfoi lɛ kpɛ yiŋ ko ni bafeɔ nɔkwɛmɔnɔ kɛhaa anɔkwa Kristofoi fɛɛ

Edamɔ Bɔfoi lɛ Asaji 5:12–6:7 lɛ nɔ

1-3. (a) Mɛni hewɔ akɛ bɔfoi lɛ eba Akuashɔŋ lɛ hiɛ lɛ, ni mɛni tuuntu he sane lɛ fɛɛ kɔɔ? (b) Mɛni hewɔ wɔmiisumɔ waa ni wɔle bɔ ni bɔfoi lɛ fee amɛnii beni Akuashɔŋ lɛ wo amɛhe gbeyei lɛ?

AKUASHƆŊ lɛ kojolɔi lɛ amli efu, ni amɛmiihe amɛjwa! Yesu bɔfoi lɛ damɔ saneyelihe wulu nɛɛ, ni akɛ amɛ miiye sane. Mɛni amɛfee? Osɔfonukpa ni atsɛɔ lɛ Yosef Kaiafa, ni eji Akuashɔŋ lɛ sɛinɔtalɔ lɛ kɛ hiŋmɛitsuu bi bɔfoi lɛ akɛ: “Ani jeee kita wɔwo nyɛ dikadika akɛ nyɛkatsɔɔ nii yɛ nɛkɛ gbɛ́i nɛɛ anɔ lɛ?” Kaiafa mli efu aahu akɛ esumɔɔɔ ni etsɛɔ gbɛ́i ni ji Yesu lɛ po. Etee nɔ ekɛɛ akɛ: “Ni naa, nyɛha Yerusalem eyi obɔ kɛ nyɛtsɔɔmɔ lɛ, ni nyɛmiitao akɛ nyɛkɛ nɛkɛ nuu nɛɛ lá lɛ baa wɔnɔ.” (Bɔf. 5:28) Nɔ ni etaoɔ ekɛɛ lɛ yɛ faŋŋ: Nyɛkpaa shiɛmɔ—kɛ́ jeee nakai lɛ nyɛbaana nɔ ko nyɛsa nyɛnaa!

2 Mɛni bɔfoi lɛ baafee agbɛnɛ? Nyɔŋmɔ ji mɔ ni fã Yesu ni ekɛ nitsumɔ wo amɛdɛŋ akɛ amɛshiɛ. (Mat. 28:18-20) Ani bɔfoi lɛ baashe gbɔmɔ gbeyei ni amɛkpa shiɛmɔ? Aloo amɛbaaná ekãa kɛdamɔ shi shiŋŋ ni amɛya nɔ amɛshiɛ? Sane lɛ fɛɛ ji akɛ: Nyɔŋmɔ kɛ gbɔmɔ lɛ, namɔ toi amɛbaabo? Bɔfo Petro fiteee be kwraa, edamɔ bɔfoi lɛ fɛɛ anajiaŋ kɛwie. Esheee gbeyei, ni ekɛ ewiemɔ lɛ hu lɔgɔɔɔ shi.

3 Ákɛ anɔkwa Kristofoi lɛ, wɔmiisumɔ waa ni wɔle bɔ ni bɔfoi lɛ fee amɛnii beni Akuashɔŋ lɛ wo amɛhe gbeyei lɛ. Wɔ hu akɛ nitsumɔ ewo wɔdɛŋ akɛ wɔshiɛ. Wɔ hu abaanyɛ ate shi awo wɔ beni wɔtsuɔ nitsumɔ ni Nyɔŋmɔ kɛwo wɔdɛŋ nɛɛ. (Mat. 10:22) Ekolɛ shitee-kɛwolɔi baabɔ mɔdɛŋ ni amɛgu wɔnitsumɔ lɛ loo amɛtsĩ naa. Mɛni wɔbaafee? Kɛ́ wɔsusu nɔ ni bɔfoi lɛ fee, kɛ nɔ ni ha akɛ amɛ tee Akuashɔŋ lɛ hiɛ koni ayaye amɛsane lɛ he lɛ, ebaaye ebua wɔ waa. *

‘Yehowa Bɔfo Bagbele Shinaai Lɛ’ (Bɔfoi lɛ Asaji 5:12-21a)

4, 5. Mɛni hewɔ Kaiafa kɛ Sadukifoi lɛ ye bɔfoi lɛ ahe awuŋa lɛ?

4 Kaimɔ akɛ klɛŋklɛŋ kwraa beni afã amɛ akɛ amɛkpa shiɛmɔ lɛ, Petro kɛ Yohane ha hetoo akɛ: “Wɔnyɛŋ akɛ ja wɔwie nii ni wɔna kɛ nii  ni wɔnu lɛ.” (Bɔf. 4:20) Beni amɛshi Akuashɔŋ lɛ hiɛ sɛɛ lɛ, Petro kɛ Yohane, kɛ bɔfoi krokomɛi ni eshwɛ lɛ tee nɔ amɛshiɛ yɛ sɔlemɔwe lɛ. Bɔfoi lɛ fee okadii wuji, ni ekomɛi ji, amɛtsa helai ni amɛfamɔ daimonioi. Amɛfee enɛ yɛ “Salomo ablanaa lɛ nɔ,” ni ji ablanaa ni awo yiteŋ, ni yɔɔ sɔlemɔwe lɛ bokagbɛ, he ni Yudafoi lɛ buaa amɛhe naa yɛ lɛ. Eeenyɛ efee akɛ Petro hɔ̃ɔŋ kɛkɛ po tsa mɛi! Mɛi ni atsa amɛ lɛ ateŋ mɛi babaoo kpɛlɛ anɔkwale lɛ nɔ. Enɛ hewɔ lɛ, “mɛi ni heɔ Nuŋtsɔ lɛ nɔ yeɔ, hii kɛ yei babaoo, bafata amɛhe.”—Bɔf. 5:12-15.

5 Kaiafa kɛ ejamɔŋbii ni ji Sadukifoi lɛ ye bɔfoi lɛ ahe awuŋa, ni amɛha awo amɛ kpabuŋ. (Bɔf. 5:17, 18) Mɛni hewɔ Sadukifoi lɛ ahiɛ dɔ nakai lɛ? Sadukifoi lɛ heee gbohiiashitee lɛ amɛyeee shi bɔfoi lɛ miitsɔɔ akɛ atee Yesu shi. Bɔfoi lɛ kɛɛ ja mɔ ko ehe Yesu nɔ eye dani abaahere eyiwala, shi Sadukifoi lɛ miishe gbeyei akɛ kɛ́ amɛŋmɛ gbɛ ni mɛi lɛ kpɛlɛ Yesu nɔ akɛ amɛ-Hiɛnyiɛlɔ lɛ, Romabii lɛ baagbala amɛ toi. (Yoh. 11:48) Ebɛ naakpɛɛ mɔ akɛ Sadukifoi lɛ bɔ mɔdɛŋ waa akɛ amɛbaatsĩ bɔfoi lɛ anaa!

6. Namɛi ji mɛi titri ni haa awaa Yehowa tsuji ayi ŋmɛnɛ, ni mɛni hewɔ esaaa akɛ enɛ feɔ wɔ naakpɛɛ lɛ?

6 Ŋmɛnɛ hu lɛ, mɛi titri ni haa awaa Yehowa tsuji ayi ji jamɔŋ hiɛnyiɛlɔi. Bei pii lɛ, nɛkɛ mɛi nɛɛ bɔɔ mɔdɛŋ amɛnyɛɔ amraloi lɛ kɛ adafitswaahei lɛ anɔ koni atsĩ wɔshiɛmɔ nitsumɔ lɛ naa. Ani esa akɛ enɛ afee wɔ naakpɛɛ? Dabi. Wɔshɛɛ sane lɛ kpaa apasa jamɔ he mama. Kɛ́ mɛi ni hiɛ tsui kpakpa lɛ kpɛlɛ Biblia mli anɔkwalei lɛ anɔ lɛ, amɛyeɔ amɛhe kɛjɛɔ hemɔkɛyelii kɛ nifeemɔi ni kɛ Biblia lɛ kpãaa gbee lɛ ahe. (Yoh. 8:32) Belɛ ebɛ naakpɛɛ mɔ akɛ jamɔŋ hiɛnyiɛlɔi lɛ yeɔ wɔhe awuŋa ni amɛnyɛɔ wɔ.

7, 8. Mɛɛ hewalɛ ekã shi faŋŋ akɛ Yehowa bɔfo lɛ famɔ lɛ ná yɛ bɔfoi lɛ anɔ, ni mɛɛ sane esa akɛ wɔbi wɔhe?

7 Beni bɔfoi lɛ yɔɔ tsuŋwoo mli ni amɛmiimɛ ni aye amɛsane lɛ, ekolɛ amɛsusu akɛ amɛhenyɛlɔi lɛ baawa amɛyi ní amɛgbe amɛ. (Mat. 24:9) Shi nyɔɔŋ lɛ, nɔ ko ni akpaaa gbɛ ba—‘Yehowa bɔfo bagbele tsũ lɛ shinaai lɛ.’ * (Bɔf. 5:19) Kɛkɛ ni bɔfo lɛ kɛ gbɛtsɔɔmɔ krɛdɛɛ ko ha amɛ akɛ: ‘Nyɛyadamɔa sɔlemɔwe lɛ ni nyɛyaa nɔ nyɛjajea.’ (Bɔf. 5:20) Ekã shi faŋŋ akɛ nakai famɔ lɛ wo Yesu bɔfoi lɛ hewalɛ akɛ nɔ ni no mli lɛ amɛfeɔ lɛ ja. Ekolɛ bɔfo lɛ wiemɔi lɛ hu wo amɛ hewalɛ koni amɛkã he amɛfi shi shiŋŋ ekɔɔɔ he eko nɔ ni baaba. Bɔfoi lɛ kɛ hemɔkɛyeli ni mli wa kɛ ekãa ‘yiŋ leebi maŋkpa amɛtee sɔlemɔwe lɛ amɛyatsɔɔ nii.’—Bɔf. 5:21.

8 Esa akɛ wɔteŋ mɔ fɛɛ mɔ abi ehe akɛ, ‘Kɛ́ miyaje shihilɛ ni tamɔ nɛkɛ mli lɛ, ani manyɛ maná hemɔkɛyeli kɛ ekãa ni he hiaa lɛ koni mikɛshiɛ?’ Le ni wɔle akɛ bɔfoi lɛ fiɔ nitsumɔ ni he hiaa fe fɛɛ, ni ji ‘Maŋtsɛyeli  sanekpakpa lɛ he odase ni wɔyeɔ kɛmɔɔ shi’ lɛ sɛɛ, ni amɛtsɔɔ wɔ gbɛ hu lɛ woɔ wɔ hewalɛ waa.—Bɔf. 28:23; Kpoj. 14:6, 7.

“Esa akɛ Aboɔ Nyɔŋmɔ Moŋ Toi Fe Gbɔmɛi” (Bɔfoi lɛ Asaji 5:21b-33)

‘Ni amɛkɛ amɛ ba ni amɛkɛ amɛ badamɔ Akuashɔŋ lɛ hiɛ.’—Bɔfoi lɛ Asaji 5:27

9-11. Te bɔfoi lɛ here fãmɔ ni Akuashɔŋ lɛ fã amɛ akɛ amɛkpa shiɛmɔ lɛ nɔ amɛha tɛŋŋ, ni mɛɛ gbɛ nɔ enɛ bafeɔ nɔkwɛmɔnɔ kɛhaa anɔkwa Kristofoi?

9 Agbɛnɛ lɛ, Kaiafa kɛ Akuashɔŋ lɛ mli kojolɔi lɛ efee klalo akɛ amɛbaaye bɔfoi lɛ asane lɛ. Akɛni saneyelihe lɛ leee nɔ ni eba hewɔ lɛ, amɛtsu koni ayaŋɔ bɔfoi lɛ ni yɔɔ kpabuŋ lɛ kɛba. Kwɛ bɔ ni mɛi ni atsu lɛ anaa kpɛ amɛhe ha beni amɛna akɛ ‘aŋa kpabuŋ lɛ naa kpɛŋŋ, ni bulɔi lɛ hu damɔ shinaai lɛ anaa,’ shi bɔfoi lɛ bɛ tsũ lɛ mli lɛ. (Bɔf. 5:23) Etsɛɛɛ ni sɔlemɔwe lɛ asafoiatsɛ lɛ ná le akɛ bɔfoi lɛ eku sɛɛ amɛba sɔlemɔwe lɛ, ni amɛmiiye Yesu Kristo he odase—nɔ tuuntu hewɔ ni ayawo amɛ kpabuŋ lɛ! Oya nɔŋŋ ni asafoiatsɛ lɛ kɛ etsulɔi lɛ yiŋ kɛtee sɔlemɔwe lɛ, ni amɛyakpala amɛ kɛtee Akuashɔŋ lɛ hiɛ.

10 Taakɛ atsɔɔ mli yɛ yitso nɛɛ shishijee gbɛ lɛ, jamɔŋ hiɛnyiɛlɔi ni mli efu waa lɛ wo bɔfoi lɛ kita akɛ amɛkpa shiɛmɔ. Te bɔfoi lɛ here nɔ amɛha tɛŋŋ? Petro damɔ bɔfoi lɛ anajiaŋ ni ekɛ ekãa ha hetoo akɛ: “Esa akɛ aboɔ Nyɔŋmɔ moŋ toi fe gbɔmɛi.” (Bɔf. 5:29) Bɔfoi lɛ kɛ enɛ fee nɔkwɛmɔnɔ amɛha anɔkwa Kristofoi fɛɛ yɛ yinɔi fɛɛ amli. Kɛ́ adesai ni yeɔ nɔ lɛ fã akɛ akafee nɔ ni Nyɔŋmɔ taoɔ, loo amɛbi ni afee nɔ ni Nyɔŋmɔ hiɔ lɛ, no lɛ esaaa akɛ aboɔ amɛ toi, ejaakɛ amɛteke husu ni Nyɔŋmɔ efo eha amɛ lɛ. No hewɔ lɛ, yɛ wɔbei nɛɛ amli lɛ, kɛ́ “hegbɛi ni yeɔ nɔ lɛ” gu wɔshiɛmɔ nitsumɔ lɛ, wɔnyɛŋ wɔkpa nitsumɔ ni Nyɔŋmɔ kɛwo wɔdɛŋ akɛ wɔshiɛ sanekpakpa lɛ. (Rom. 13:1) No najiaŋ lɛ, wɔbaatao gbɛi anɔ ni wɔɔtsɔ wɔkɛ hiɛshikamɔ aye Nyɔŋmɔ Maŋtsɛyeli lɛ he odase kɛmɔ shi.

11 Ebɛ naakpɛɛ akɛ hetoo ni bɔfoi lɛ kɛha lɛ ha kojolɔi ni ehao lɛ amli fu waa ni ehiii he nɔ ko feemɔ. Amɛtswa amɛfai shi akɛ “amɛaagbe” bɔfoi lɛ. (Bɔf. 5:33) Agbɛnɛ lɛ, ebafee faŋŋ eha bɔfoi lɛ, ni ji odasefoi ni yɔɔ ekãa nɛɛ akɛ abaagbe amɛ. Shi naa, etsɛŋ kwraa amɛbaaná yelikɛbuamɔ ni amɛkpaaa gbɛ!

 “Nyɛnyɛŋ Nyɛfite” (Bɔfoi lɛ Asaji 5:34-42)

12, 13. (a) Mɛɛ ŋaa Gamaliel wo enanemɛi lɛ, ni mɛni amɛfee? (b) Mɛɛ gbɛ nɔ Yehowa baanyɛ atsɔ afã ewebii lɛ ahe ŋmɛnɛ, ni kɛ́ eŋmɛ gbɛ ni ‘wɔna amanehulu yɛ jalɛ hewɔ lɛ,’ mɛni hewɔ wɔsheŋ gbeyei lɛ?

12 Gamaliel, ni eji “mla tsɔɔlɔ ni maŋ lɛ buɔ lɛ lɛ” wie. * Ekã shi faŋŋ akɛ enanemɛi mlalelɔi lɛ buɔ lɛ waa ejaakɛ eyɛ amɛnɔ hewalɛ, ni “efa ákɛ akɛ bɔfoi lɛ aje kpo fioo.” (Bɔf. 5:34) Gamaliel tsĩ kui komɛi ni jie amɛhiɛ kpo ni sɛɛ mli beni amɛhiɛnyiɛlɔi lɛ gboi lɛ amɛgugui lɛ atã, ni ekɛɛ saneyelihe lɛ akɛ amɛná tsui amɛha bɔfoi ní amɛ-Hiɛnyiɛlɔ Yesu gbo etsɛko lɛ, ní amɛkɛ amɛ aye yɛ mlihilɛ mli. Gamaliel kɛ amɛ susu nii ahe, ni ekɔne amɛyiŋ ekɛɛ akɛ: “Nyɛŋmɛɛa nɛkɛ gbɔmɛi nɛɛ ahe ni nyɛkadia amɛsɛɛ; ejaakɛ kɛ́ gbɔmɛi adɛŋ nɛkɛ yiŋtoo nɛɛ loo nɛkɛ nitsumɔ nɛɛ jɛ lɛ, ebaafite; shi kɛ́ Nyɔŋmɔ dɛŋ ejɛ lɛ, nyɛnyɛŋ nyɛfite; koni nyɛkabafee nyɛhe tamɔ mɛi ni kɛ Nyɔŋmɔ wuɔ.” (Bɔf. 5:38, 39) Kojolɔi lɛ bo eŋaawoo lɛ toi. Fɛɛ sɛɛ lɛ, amɛha ayi bɔfoi lɛ, ni amɛwo amɛ kita akɛ “amɛkawie yɛ Yesu gbɛ́i lɛ anɔ, ni amɛŋmɛɛ amɛhe.”—Bɔf. 5:40.

13 Ŋmɛnɛ hu lɛ, Yehowa baanyɛ eha mɛi ni yɔɔ hegbɛ tamɔ Gamaliel afã E-webii lɛ ahe. (Abɛi 21:1) Yehowa baanyɛ ekɛ emumɔ lɛ atsirɛ nɔyelɔi ni yɔɔ hewalɛ, kojolɔi, loo mlawolɔi koni amɛfee nii ni kɛ esuɔmɔnaanii kpãa gbee. (Neh. 2:4-8) Shi kɛ́ eŋmɛ gbɛ ni ‘wɔna amanehulu yɛ jalɛ hewɔ lɛ,’ nibii enyɔ komɛi ahewɔ lɛ, wɔsheŋ gbeyei. (1 Pet. 3:14) Klɛŋklɛŋ lɛ, Nyɔŋmɔ baanyɛ aha wɔ hewalɛ koni wɔnyɛ wɔdamɔ naa. (1 Kor. 10:13) Nɔ ni ji enyɔ lɛ, shitee-kɛwolɔi ‘nyɛŋ afite’ Nyɔŋmɔ nitsumɔ lɛ.—Yes. 54:17.

14, 15. (a) Beni ayi bɔfoi lɛ, te amɛfee amɛnii amɛha tɛŋŋ, ni mɛni hewɔ? (b) Okɛ niiashikpamɔ ko aha kɛtsɔɔ akɛ Yehowa webii lɛ kɛ miishɛɛ damɔɔ yiwaa naa.

14 Ani yi ni ayi bɔfoi lɛ ha amɛnijiaŋ je wui, loo amɛtsake amɛjwɛŋmɔ? Dabi! “Amɛje akuashɔŋ lɛ hiɛ amɛtee kɛ miishɛɛ.” (Bɔf. 5:41) Mɛni hewɔ amɛná “miishɛɛ” lɛ? Ekã shi faŋŋ akɛ jeee piŋmɔ ni amɛnu he yɛ yi ni ayi amɛ lɛ hewɔ. Amɛná miishɛɛ ejaakɛ amɛle akɛ anɔkwa ni amɛye Yehowa, kɛ Yesu ni ji amɛ-Nɔkwɛmɔnɔ lɛ nanemaahei lɛ asɛɛ ni amɛnyiɛ lɛ hewɔ awa amɛyi lɛ.—Mat. 5:11, 12.

15 Kɛ́ wɔna nɔ̃ yɛ sanekpakpa lɛ hewɔ lɛ, wɔkɛ miishɛɛ damɔɔ naa taakɛ wɔnyɛmimɛi ni hi shi yɛ klɛŋklɛŋ afii 100 lɛ mli lɛ fee lɛ. (1 Pet. 4:12-14) Jeee wɔhe gbeyei ni awoɔ, wɔyi ni awaa, loo tsuŋ ni awoɔ wɔ lɛ ji nɔ ni haa wɔnáa miishɛɛ lɛ. Shi wɔtsui nyɔɔ wɔmli waa akɛni wɔhiɛ wɔnɔkwayeli lɛ mli lɛ hewɔ. Susumɔ nɔ ni ba Henryk Dornik, ni awa lɛ yi afii babaoo yɛ yiwalɛ nɔyelii ashishi lɛ nɔ lɛ he okwɛ. Ewie akɛ, yɛ August 1944 lɛ, amralofoi lɛ kpɛ yiŋ akɛ esa ákɛ akɛ lɛ kɛ enyɛmi nuu lɛ aya yiwalɛ nsra ko mli. Shitee-kɛwolɔi lɛ kɛɛ  akɛ: “Anyɛŋ atsɔ̃ amɛyiŋ ni amɛfee nɔ ko. Kɛ́ awa amɛyi lɛ amɛnáa miishɛɛ.” Nyɛminuu Dornik tsɔɔ mli akɛ: “Eyɛ mli akɛ misumɔɔɔ akɛ agbeɔ mi moŋ, shi kɛ́ mina nɔ̃ ni mikɛ ekãa kɛ nuufeemɔ fĩ shi kɛye Yehowa anɔkwa lɛ, mináa miishɛɛ.”—Yak. 1:2-4.

Wɔshiɛɔ yɛ ‘shĩa kɛ shĩa’ taakɛ bɔfoi lɛ fee lɛ

16. Mɛni bɔfoi lɛ fee kɛtsɔɔ akɛ amɛmiisumɔ ni amɛye odase kɛmɔ shi, ni mɛɛ gbɛ nɔ wɔbaanyɛ wɔtsɔ wɔkase amɛ?

16 Bɔfoi lɛ fiteee be kwraa, amɛbɔi shiɛmɔ nitsumɔ lɛ ekoŋŋ. Amɛsheee gbeyei kwraa, amɛtee nɔ amɛshiɛ ‘Yesu Kristo yɛ sɔlemɔwe lɛ kɛ shĩa kɛ shĩa be fɛɛ be.’ * (Bɔf. 5:42) Shiɛlɔi ni yɔɔ ekãa nɛɛ tswa amɛfai shi akɛ amɛbaaye odase kɛmɔ shi. Kadimɔ akɛ amɛtee mɛi ashĩai amɛyashiɛ, taakɛ Yesu Kristo fa amɛ akɛ amɛfee lɛ. (Mat. 10:7, 11-14) Ŋwanejee ko bɛ he akɛ nakai gbɛ nɔ amɛtsɔ amɛha Yerusalem yi obɔ kɛ amɛtsɔɔmɔ lɛ. Ŋmɛnɛ lɛ, ale Yehowa Odasefoi akɛ gbɛ nɔ ni bɔfoi lɛ tsɔ amɛshiɛ lɛ nɔŋŋ nɔ amɛ hu amɛtsɔɔ amɛshiɛɔ. Kɛ́ wɔshiɛ yɛ shĩa fɛɛ shĩa ni yɔɔ wɔshikpɔŋkuku lɛ mli lɛ, no tsɔɔ akɛ wɔ hu wɔmiisumɔ ni wɔye odase kɛmɔ shi, ní wɔha mɔ fɛɛ mɔ aná hegbɛ akɛ enu sanekpakpa lɛ. Ani Yehowa ejɔɔ wɔshĩa kɛ shĩa nitsumɔ lɛ nɔ? Hɛɛ, ejɔɔ nɔ! Mɛi akpekpei abɔ ekpɛlɛ Maŋtsɛyeli shɛɛ sane lɛ nɔ yɛ wɔnaagbee be nɛɛ mli, ni mɛi nɛɛ ateŋ babaoo nu sanekpakpa lɛ klɛŋklɛŋ kwraa beni Odasefonyo ko tee amɛŋɔɔ yɛ amɛshĩa lɛ.

Hii ni Sa ni Baakwɛ “Nitsumɔ ni He Hiaa” Nɔ (Bɔfoi lɛ Asaji 6:1-6)

17-19. Mɛɛ sane ni nyɛɔ ekɛ mligbalamɔ baa te shi, ni mɛɛ fãmɔ bɔfoi lɛ kɛha koni akɛtsu he nii?

17 Agbɛnɛ sane ko te shi yɛ asafo ni ato shishi etsɛko lɛ mli ni baanyɛ agbɛ asafo lɛ. Mɛni ji sane lɛ? Kaselɔi ni abaptisiɔ amɛ lɛ ateŋ babaoo ji gbɔi ni eba Yerusalem, ni amɛmiitao amɛkase nibii babaoo dani amɛku amɛsɛɛ amɛya he ni amɛjɛ. Kaselɔi ni yɔɔ Yerusalem lɛ jɛ amɛsuɔmɔ mli amɛha shika koni akɛhe niyenii kɛ nibii krokomɛi aha gbɔi lɛ. (Bɔf. 2:44-46; 4:34-37) Yɛ nɛkɛ be nɛɛ mli lɛ, sane ko ba ni ebiɔ ni akɛ nilee kɛ ŋaa atsu he nii. “Hiɛ kpaa” yei okulafoi ni wieɔ Hela lɛ “anɔ yɛ daa  kwɛmɔ [niyeniijaa] lɛ gbɛfaŋ.” (Bɔf. 6:1) Shi yei okulafoi ni wieɔ Hebri lɛ, hiɛ kpaaa amɛnɔ. Belɛ naagba lɛ ji akɛ etamɔ nɔ ni aajie nii amli. Niiamlijiemɔ nyɛɔ ekɛ mligbalamɔ ni yɔɔ hiɛdɔɔ diɛŋtsɛ baa.

18 Bɔfoi lɛ, ni no mli lɛ amɛmiisɔmɔ akɛ nɔyeli kuu kɛha asafo ni shwereɔ lɛ, yɔse akɛ ebafeŋ nɔ ni nilee yɔɔ mli akɛ ‘amɛshi Nyɔŋmɔ wiemɔ lɛ ni amɛyasɔmɔ yɛ okpɔlɔi ahe.’ (Bɔf. 6:2) Bɔni afee ni amɛtsu sane nɛɛ he nii lɛ, amɛfã kaselɔi lɛ koni amɛtao hii kpawo “ni Mumɔ krɔŋkrɔŋ kɛ nilee eyi amɛ obɔ” ni bɔfoi lɛ baanyɛ aŋɔ amɛ ato “nitsumɔ ni he hiaa” nɛɛ nɔ. (Bɔf. 6:3) Ehe miihia ni aná hii ni sa ejaakɛ ekã shi faŋŋ akɛ, jeee niyeniijaa, shika nɔkwɛmɔ, nibii ahemɔ, kɛ woji ahe nitsumɔ pɛ amɛbaatsu. Hii fɛɛ ni ahala lɛ hiɛ Hela gbɛ́i, ni eeenyɛ efee akɛ no ha okulafoi ni hiɛ kpa amɛnɔ lɛ kpɛlɛ amɛnɔ. Beni bɔfoi lɛ esusu mɛi nɛɛ ahe amɛgbe naa ní amɛsɔle sɛɛ lɛ, amɛkpɛlɛ hii kpawo lɛ anɔ, ni amɛŋɔ amɛ amɛto “nitsumɔ ni he hiaa” nɛɛ nɔ. *

19 Ani nitsumɔ ni akɛwo hii kpawo ni ahala nɛɛ adɛŋ akɛ amɛkwɛ niyeniijaa lɛ nɔ lɛ tsɔɔ akɛ esaaa akɛ amɛshiɛ sanekpakpa lɛ? Dabi kwraa! Hii ni ahala lɛ ateŋ mɔ kome ji Stefano, mɔ ni baaye odase kɛ ekãa lɛ. (Bɔf. 6:8-10) Filipo hu ji hii kpawo lɛ ateŋ mɔ kome, ni atsɛ́ lɛ akɛ “sanekpakpa shiɛlɔ.” (Bɔf. 21:8) Eka shi faŋŋ akɛ hii kpawo nɛɛ tee nɔ amɛsɔmɔ akɛ Maŋtsɛyeli shiɛlɔi ni yɔɔ ekãa.

20. Mɛɛ gbɛ nɔ Nyɔŋmɔ webii ni yɔɔ ŋmɛnɛ lɛ nyiɛɔ nɔkwɛmɔnɔ ni bɔfoi lɛ fee lɛ sɛɛ?

20 Ŋmɛnɛ lɛ, Yehowa webii lɛ hu nyiɛɔ bɔfoi lɛ anɔkwɛmɔnɔ lɛ sɛɛ.  Esa akɛ mɛi ni abaajie amɛyi ákɛ akɛ asafoŋ nitsumɔi awo amɛdɛŋ lɛ afee mɛi ni kɛ Nyɔŋmɔ he nilee tsuɔ nii, ní amɛnifeemɔ hu tsɔɔ akɛ mumɔ krɔŋkrɔŋ lɛ kɛ amɛ miitsu nii. Yɛ Nɔyeli Kuu lɛ gbɛtsɔɔmɔ naa lɛ, aholeɔ hii ni shɛɔ Ŋmalɛ naa taomɔnii ahe ni amɛsɔmɔɔ akɛ asafoŋ onukpai loo asafoŋ sɔɔlɔi yɛ asafo lɛ mli. * (1 Tim. 3:1-9, 12, 13) Abaanyɛ akɛɛ yɛ mɛi ni shɛɔ taomɔnii lɛ ahe lɛ ahe akɛ, akɛ mumɔ krɔŋkrɔŋ lɛ ehala amɛ. Hii ni tsuɔ nii waa nɛɛ tsuɔ “nitsumɔ ni he hiaa” srɔtoi babaoo. Ákɛ nɔkwɛmɔnɔ lɛ, asafoŋ onukpai lɛ kwɛɔ ni ayeɔ abuaa nyɛmimɛi ni efɔ̃ nɔ yɛ afii amli ní kɛ anɔkwayeli esɔmɔ, ní yelikɛbuamɔ he miihia amɛ lɛɛlɛŋ lɛ. (Yak. 1:27) Asafoŋ onukpai komɛi kwɛɔ Maŋtsɛyeli Asai amaamɔ nɔ, amɛtoɔ kpeei wuji ahe gbɛjianɔ, loo amɛkɛ helatsamɔhei shãraa. Asafoŋ sɔɔlɔi tsuɔ nitsumɔi babaoo ni kɔɔɔ sramɔ nitsumɔ lɛ loo nitsɔɔmɔ he tɛ̃ɛ. Esa akɛ hii ni ahala amɛ nɛɛ fɛɛ atsu nitsumɔi ni Yehowa asafo lɛ kɛwoɔ amɛdɛŋ lɛ, ni agbɛnɛ hu amɛshiɛ Maŋtsɛyeli lɛ he sanekpakpa lɛ, ni ji nitsumɔ ni Nyɔŋmɔ kɛwo wɔdɛŋ lɛ.—1 Kor. 9:16.

‘Nyɔŋmɔ Wiemɔ lɛ Tee Nɔ Eshwere’ (Bɔfoi lɛ Asaji 6:7)

21, 22. Mɛni tsɔɔ akɛ Yehowa jɔɔ asafo ni ato shishi etsɛko lɛ?

21 Yehowa ye ebua asafo ni ato shishi etsɛko lɛ, ni asafo lɛ nyɛ ekpee yiwaa naa, ni etsu naagba ni kulɛ ebaanyɛ ekɛ mligbalamɔ aba lɛ he nii. Ana faŋŋ akɛ Yehowa miijɔɔ asafo lɛ, ejaakɛ wɔkaneɔ akɛ: “Nyɔŋmɔ wiemɔ lɛ shwere, ni kaselɔi lɛ ayi bafá babaoo diɛŋtsɛ yɛ Yerusalem; ni osɔfoi lɛ tete ateŋ mɛi pii boɔ hemɔkɛyeli lɛ toi.” (Bɔf. 6:7) Enɛ ji shweremɔi babaoo ni Bɔfoi lɛ Asaji lɛ bɔ he amaniɛ lɛ ateŋ ekome. (Bɔf. 9:31; 12:24; 16:5; 19:20; 28:31) Ŋmɛnɛ lɛ, kɛ́ wɔnu amaniɛbɔi ni tsɔɔ akɛ Maŋtsɛyeli shiɛmɔ nitsumɔ lɛ miishwere yɛ je lɛŋ hei krokomɛi lɛ, ani ewooo wɔ hewalɛ?

22 Yɛ klɛŋklɛŋ afii 100 Ŋ.B. lɛ, jamɔŋ hiɛnyiɛlɔi ni mli ewo la lɛ kpaaa asafo lɛ yi waa. Yiwaa babaoo nyiɛ gbɛ kɛmiiba. Etsɛɛɛ kwraa ni ajie hiɛ aka Stefano akɛ abaawa lɛ yi waa, taakɛ wɔbaana yɛ yitso ni nyiɛ sɛɛ lɛ mli lɛ.

^ kk. 3 Kwɛmɔ akrabatsa ni ji  “Akuashɔŋ Lɛ—Yudafoi Asaneyelihe Wulu,” ni yɔɔ baafa 39 lɛ.

^ kk. 7 Wiemɔ ni ji ŋwɛi bɔfoi lɛ je kpo aaafee shii 20 yɛ Bɔfoi lɛ Asaji lɛ, ni enɛ ji klɛŋklɛŋ nɔ̃. Mra mli yɛ Bɔfoi lɛ Asaji 1:10 lɛ, awie ŋwɛi bɔfoi ahe akɛ ‘hii ni wo atadei yɛji.’

^ kk. 12 Kwɛmɔ akrabatsa ni ji  “Gamaliel—Abuɔ lɛ Waa yɛ Rabifoi lɛ Ateŋ,” ni yɔɔ baafa 41 lɛ.

^ kk. 16 Kwɛmɔ akrabatsa ni ji  “‘Shĩa kɛ Shĩa’ Shiɛmɔ,” ni yɔɔ baafa 42 lɛ.

^ kk. 18 Eeenyɛ efee akɛ hii nɛɛ shɛ taomɔnii kɛha asafoŋ onukpai lɛ ahe, ejaakɛ “nitsumɔ ni he hiaa” nɛɛ tsumɔ kãaa shi akɔɔɔ. Shi kɛlɛ, Ŋmalɛi lɛ etsɔɔɔ be pɔtɛ̃ɛ ni abɔi hii aholemɔ akɛ asafoŋ onukpai loo nɔkwɛlɔi yɛ Kristofoi asafo lɛ mli.

^ kk. 20 Eyɛ mli akɛ asafo lɛ jie hii kpawo lɛ yi moŋ, shi mɛi diɛŋtsɛ ni hole amɛ ji bɔfoi lɛ.