Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 4

“Jeee Woloŋlelɔi Kɛ Nilelɔi Komɛi Ji Amɛ”

“Jeee Woloŋlelɔi Kɛ Nilelɔi Komɛi Ji Amɛ”

Bɔfoi lɛ fee shiŋŋ, ni Yehowa jɔɔ amɛ

Edamɔ Bɔfoi lɛ Asaji 3:1–5:11 lɛ nɔ

1, 2. Mɛɛ naakpɛɛ nɔ ko Petro kɛ Yohane fee yɛ sɔlemɔwe lɛ shinaa lɛ naa?

SHWANE hulu lɛ miisha asafo babaoo lɛ, ni jɛmɛ efee kotsokotso. Kristo kaselɔi lɛ kɛ Yudafoi ni kɛ amɛjamɔ lɛ shwɛɛɛ lɛ miibote sɔlemɔwe lɛ kpo lɛ nɔ. Etsɛŋ ni ‘sɔlemɔ be lɛ’ baashɛ. * (Bɔf. 2:46; 3:1) Petro kɛ Yohane fata asafo babaoo lɛ he kɛmiitsɔ sɔlemɔwe lɛ shinaa ni atsɛɔ lɛ Shinaa Fɛfɛo lɛ mli, ni akɛ akɔɔble ni kpɛlɛɔ ni aná kɛjɛ Korinto ehà shinaai nɛɛ ahe. Sanegbai ni yaa nɔ kɛ mɛi anajiashishi gbɛɛmɔi eha jɛmɛ efee hoo, shi nuu ko ni ji obubuafo kɛjɛ enyɛ musuŋ tɔ̃ɔ lɛ miibolɔ waa kɛmiiba nii yɛ mɛi adɛŋ.—Bɔf. 3:2; 4:22.

2 Beni nuu obubuafo lɛ na akɛ Petro kɛ Yohane ebɛŋkɛ lɛ lɛ, ebolɔ kɛba shika taakɛ efɔɔ feemɔ lɛ. Bɔfoi lɛ wa amɛdamɔ shi, ni nuu lɛ dɔ ehiŋmɛi eto amɛnɔ ejaakɛ esusu akɛ ebaaná nɔ ko yɛ amɛdɛŋ. Petro kɛɛ lɛ akɛ: “Jwiɛtɛi kɛ shika lɛ mibɛ eko; shi nɔ ni miyɔɔ lɛ, no miŋɔhaao nɛɛ: Yesu Kristo, Nazarenyo lɛ, gbɛ́i amli lɛ, tee shi ni onyiɛ!” Feemɔ bɔ ni asafo babaoo lɛ ahe jɔ̃ amɛhe beni Petro mɔ nuu ni enyiɛko pɛŋ lɛ nine mli ni nuu lɛ huru edamɔ shi lɛ he mfoniri okwɛ! (Bɔf. 3:6, 7) Te nuu lɛ baanu he eha tɛŋŋ beni atsa lɛ ní ekwɛ enaji ní ebɔi enaji lɛ faamɔ klɛŋklɛŋ kwraa lɛ? Ebɛ naakpɛɛ mɔ akɛ ebɔi tuumɔ, ni ebolɔ kɛ Nyɔŋmɔ yijiemɔ!

3. Mɛɛ nikeenii ni nɔ bɛ nuu obubuafo lɛ kɛ asafo babaoo lɛ ná?

3 Asafo ni naa ekpɛ amɛhe lɛ sha foi kɛtee Petro kɛ Yohane ŋɔɔ yɛ Salomo ablanaa lɛ nɔ. Be ko lɛ Yesu damɔ he nɛɛ nɔŋŋ etsɔɔ mɛi anii, shi agbɛnɛ lɛ Petro damɔ jɛmɛ eeha amɛle nɔ ni naakpɛɛ nii ni tee nɔ lɛ tsɔɔ diɛŋtsɛ. (Yoh. 10:23) Eŋɔ nikeenii ko ni fe shika kɛ jwiɛtɛi eha asafo babaoo lɛ kɛ nuu obubuafo ni atsa lɛ lɛ. Nikeenii nɛɛ jeee tsamɔ ni nuu nɛɛ ná lɛ pɛ kɛkɛ. No ji hegbɛ ni amɛná akɛ amɛtsake amɛtsui, ní agbe amɛhe eshai lɛ, ní amɛbatsɔmɔ Yesu Kristo, ni ji “Wala Lumɔ” ni Yehowa ehala lɛ lɛ sɛɛnyiɛlɔi.—Bɔf. 3:15.

4. (a) Mɛni naakpɛɛnii ni kaselɔi lɛ fee lɛ baaha afee amɛ? (b) Mɛɛ sanebimɔi enyɔ abaaha hetoo?

4 Mɛɛ gbi ni hiɛ kpaŋ nɔ po nɛ! Atsa nuu obubuafo ko, ni amrɔ nɛɛ eenyiɛ.  Mɛi akpei abɔ hu ená hegbɛ akɛ amɛná Nyɔŋmɔ wiemɔ lɛ he anɔkwa nilee, bɔni afee ni amɛnyɛ amɛnyiɛ bɔ ni sa Nyɔŋmɔ hiɛ. (Kol. 1:9, 10) Kɛfata he lɛ, nibii ni tee nɔ nakai gbi lɛ baaha maŋ nɔyelɔi lɛ ate shi awo Kristo anɔkwa sɛɛnyiɛlɔi lɛ, ni amɛbaabɔ mɔdɛŋ akɛ amɛtsĩ amɛnaa koni amɛkatsu Yesu famɔ akɛ ashiɛ Maŋtsɛyeli shɛɛ sane lɛ he nii. (Bɔf. 1:8) Mɛni wɔbaanyɛ wɔkase kɛjɛ su ni Petro kɛ Yohane—ni “jeee woloŋlelɔi kɛ nilelɔi komɛi ji amɛ lɛ”—jie lɛ kpo lɛ, kɛ gbɛi anɔ ni amɛtsɔ amɛye asafo babaoo lɛ odase lɛ mli? * (Bɔf. 4:13) Ni mɛɛ gbɛ nɔ wɔɔtsɔ wɔkase bɔ ni amɛ kɛ kaselɔi krokomɛi lɛ fee amɛnii amɛha beni ate shi awo amɛ lɛ?

Jeee “Wɔ Diɛŋtsɛ Wɔhewalɛ” Naa (Bɔfoi lɛ Asaji 3:11-26)

5. Mɛni wɔkaseɔ kɛjɛɔ bɔ ni Petro kɛ asafo ni naa ekpe shi lɛ wie lɛ mli?

5 Petro kɛ Yohane kɛ asafo babaoo lɛ wie, eyɛ mli akɛ amɛle akɛ etsɛko tsɔ ni amɛteaŋ mɛi komɛi bolɔ kɛfi sɛɛ akɛ asɛŋ Yesu. (Mar. 15:8-15; Bɔf. 3:13-15) Susumɔ ekãa ni Petro jie lɛ kpo beni ejaje faŋŋ akɛ etsa nuu obubuafo lɛ yɛ Yesu gbɛ́i amli lɛ he okwɛ. Petro shiuuu anɔkwale lɛ nɔ. Ejaje faŋŋ etsɔɔ asafo ni naa ekpe shi lɛ akɛ amɛfata he ni agbe Kristo. Petro bɛ hetsɛ̃ ko kwraa kɛha amɛ, ejaakɛ ‘lé ni amɛleee hewɔ ni amɛfee.’ (Bɔf. 3:17) Ekɛ amɛ wie akɛ enyɛmimɛi, ni ewie nibii kpakpai ni Maŋtsɛyeli lɛ baafee lɛ ahe. Kɛ́ amɛtsake amɛtsui ni amɛhe Kristo nɔ amɛye lɛ, amɛbaaná “hejɔɔmɔ yinɔ” kɛjɛ Yehowa ŋɔɔ. (Bɔf. 3:19, 20) Esa akɛ wɔ hu wɔkɛ ekãa ajaje Nyɔŋmɔ kojomɔ ni baa lɛ ní wɔkashiu nɔ ko nɔ. Nakai beaŋ nɔŋŋ lɛ, esaaa akɛ wɔwieɔ kpookpoo ní wɔdɔɔɔ wɔlilɛi mli loo wɔkojoɔ mɛi. Nɔ ni tamɔɔɔ nakai lɛ, esa akɛ wɔna mɛi ni wɔshiɛɔ wɔhaa amɛ lɛ akɛ amɛbaanyɛ amɛbatsɔmɔ wɔnyɛmimɛi, ni wɔwie Maŋtsɛyeli shɛɛ sane lɛ he nibii ni shɛjeɔ mɔ mii lɛ ahe titri taakɛ Petro fee lɛ.

6. Mɛɛ gbɛ nɔ Petro kɛ Yohane jie heshibaa kpo?

6 Bɔfoi lɛ yɛ heshibaa. Amɛŋɔɔɔ naakpɛɛnii ni amɛfee lɛ he yijiemɔ amɛhaaa amɛhe. Petro kɛɛ mɛi lɛ akɛ: “Mɛɛba nyɛkwɛɔ wɔ gãa nɛkɛ, tamɔ nɔ ni wɔ diɛŋtsɛ wɔhewalɛ loo Nyɔŋmɔ jamɔ wɔkɛha mɔ nɛ nyiɛɔ nɛɛ?” (Bɔf. 3:12) Petro kɛ bɔfoi krokomɛi lɛ le akɛ nɔ kpakpa fɛɛ nɔ kpakpa ni amɛbaatsu yɛ shiɛmɔ nitsumɔ lɛ mli lɛ jɛ Nyɔŋmɔ hewalɛ, shi jeee amɛ diɛŋtsɛ amɛhewalɛ. Enɛ hewɔ lɛ, amɛjɛ heshibaa mli amɛkɛ nibii ni amɛtsu lɛ he yijiemɔi fɛɛ ha Yehowa kɛ Yesu.

7, 8. (a) Mɛɛ nikeenii wɔbaanyɛ wɔkɛha mɛi? (b) Mɛɛ gbɛ nɔ shi ni awo akɛ ‘abaato nibii fɛɛ ahe gbɛjianɔ’ lɛ baa mli ŋmɛnɛ?

7 Esa akɛ wɔ hu wɔjie heshibaa ni tamɔ nakai nɔŋŋ kpo yɛ Maŋtsɛyeli shiɛmɔ nitsumɔ lɛ mli. Eji anɔkwale akɛ Nyɔŋmɔ mumɔ lɛ haaa Kristofoi ni yɔɔ ŋmɛnɛ lɛ hewalɛ koni amɛkɛtsa mɛi yɛ naakpɛɛ gbɛ nɔ. Kɛlɛ, wɔbaanyɛ wɔye wɔbua mɛi koni amɛná hemɔkɛyeli yɛ Nyɔŋmɔ kɛ Kristo  mli, ni amɛná nikeenii ni Petro kɛha lɛ nɔŋŋ eko—ákɛ akɛ amɛhe eshai aaafa amɛ, ní amɛná hejɔɔmɔ kɛjɛ Yehowa ŋɔɔ. Daa afi lɛ, mɛi akpei ohai abɔ náa hegbɛ nɛɛ ni amɛbatsɔmɔɔ Kristo kaselɔi ni abaptisi amɛ.

8 Yɛ anɔkwale mli lɛ, wɔyɛ be ni Petro tsɛ́ lɛ akɛ “nibii fɛɛ agbɛjianɔtoo” be lɛ mli. Ato Nyɔŋmɔ Maŋtsɛyeli lɛ shishi yɛ ŋwɛi yɛ afi 1914 kɛwo gbalɛ ni “Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ” obɔ. (Bɔf. 3:21; Lala 110:1-3; Dan. 4:16, 17) No sɛɛ etsɛɛɛ nɔŋŋ lɛ, Kristo bɔi anɔkwa jamɔ ni ato shishi ekoŋŋ yɛ shikpɔŋ lɛ nɔ lɛ nɔ kwɛmɔ. Enɛ eha mɛi akpekpei abɔ ebatsɔmɔ mumɔŋ paradeiso lɛ mlibii, ni amɛji Nyɔŋmɔ Maŋtsɛyeli lɛ shishibii. Amɛshɛ gbɔmɔ momo ni efite lɛ amɛfɔ̃, ni ‘amɛwo gbɔmɔ hee ni abɔ yɛ Nyɔŋmɔ subaŋ nɔ’ lɛ. (Efe. 4:22-24) Jeee adesai anyɛmɔ naa atsuɔ nitsumɔ nɛɛ, shi moŋ Nyɔŋmɔ mumɔ lɛ naa, taakɛ ebalɛ yɛ nuu obubuafo nibalɔ lɛ tsamɔ lɛ gbɛfaŋ lɛ. Esa akɛ wɔfee ekãa ni wɔkɛ Nyɔŋmɔ Wiemɔ lɛ atsu nii jogbaŋŋ kɛtsɔɔ mɛi anii tamɔ bɔ ni Petro fee lɛ. Nyɔŋmɔ hewalɛ naa wɔnyɛɔ wɔyeɔ wɔbuaa mɛi ni amɛbatsɔmɔɔ Kristo kaselɔi, shi jeee wɔ diɛŋtsɛ wɔhewalɛ naa.

“Wɔnyɛŋ akɛ Ja Wɔwie” (Bɔfoi lɛ Asaji 4:1-22)

9-11. (a) Te Yudafoi ajamɔŋ hiɛnyiɛlɔi lɛ fee amɛnii yɛ Petro kɛ Yohane shɛɛ sane lɛ he amɛha tɛŋŋ? (b) Mɛni bɔfoi lɛ kpɛ amɛyiŋ akɛ amɛbaafee?

9 Wiemɔ ni Petro ha lɛ, kɛ nuu obubuafo ni atsa lɛ lɛ tuumɔ kɛ ebolɔmɔ lɛ ha jɛmɛ fee hoo. No hewɔ lɛ, sɔlemɔwe lɛ asafoiatsɛ lɛ—mɔ ni ahala ni ekwɛ koni abu sɔlemɔwe lɛ he lɛ—kɛ osɔfoi lɛ sha foi kɛtee jɛmɛ koni amɛyakwɛ nɔ ni yaa nɔ. Ekã shi faŋŋ akɛ hii nɛɛ ji Sadukifoi, ni ji kuu ko ni yɔɔ nii kɛ gbɛnaa yɛ maŋkwramɔ gbɛfaŋ, ni amɛbɔ mɔdɛŋ waa ni amɛha toiŋjɔlɛ ahi amɛ kɛ Romabii lɛ ateŋ, amɛkpoo blematsɛmɛi lɛ amlai ni Farisifoi lɛ sumɔɔ waa lɛ, ni amɛheee gbohiiashitee lɛ amɛyeee. * Beni amɛtee ni amɛyana akɛ Petro kɛ Yohane yɛ sɔlemɔwe lɛ ni amɛkɛ ekãa miishiɛ akɛ atee Yesu shi lɛ, amɛmli fu waa!

10 Shitee-kɛwolɔi ni mli efu waa lɛ wo Petro kɛ Yohane tsuŋ, ni enɔ jetsɛremɔ lɛ amɛkɛ amɛ tee Yudafoi lɛ akojomɔhe wulu lɛ. Maŋ nɔyelɔi nɛɛ bu Petro kɛ Yohane akɛ “jeee woloŋlelɔi kɛ nilelɔi komɛi ji amɛ,” ni ákɛ amɛbɛ hegbɛ ni amɛtsɔɔ nii yɛ sɔlemɔwe lɛ. Amɛyako jamɔ he skul ko ní ehe gbɛ́i. Kɛlɛ, beni saneyelihe lɛ na ekãa kɛ nɔmimaa ni Petro kɛ Yohane kɛwieɔ lɛ, amɛhiɛ fee amɛ yaa. Mɛni ha Petro kɛ Yohane he sa waa nakai lɛ? Yiŋtoo kome ji akɛ “amɛkɛ Yesu hi shi.” (Bɔf. 4:13) Amɛ-Nuŋtsɔ lɛ tsɔɔ nii akɛ mɔ ko ni yɔɔ hegbɛ, shi jeee tamɔ woloŋmalɔi lɛ.—Mat. 7:28, 29.

11 Saneyelihe lɛ fã bɔfoi lɛ ni amɛkashiɛ kwraa dɔŋŋ. Yɛ Yudafoi lɛ ateŋ lɛ, nɔ ni saneyelihe lɛ baawie lɛ no akɛtsuɔ nii. Yɛ otsii fioo komɛi ni tsɔ hiɛ lɛ amli lɛ, nakai saneyelihe lɛ nɔŋŋ bu Yesu fɔ́ akɛ “esa gbele!”  (Mat. 26:59-66) Ni kɛlɛ enɛɛmɛi haaa Petro kɛ Yohane ashe gbeyei. Petro kɛ Yohane damɔ hii niiatsɛmɛi, ni le woloŋ waa, ni yɔɔ hegbɛ nɛɛ ahiɛ ni amɛkɛ ekãa kɛ bulɛ jaje akɛ: “Kɛ́ eja gbɛ yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛkojoa. Ejaakɛ wɔ lɛ wɔnyɛŋ akɛ ja wɔwie nii ni wɔna kɛ nii ni wɔnu lɛ.”—Bɔf. 4:19, 20.

12. Mɛni baanyɛ aye abua wɔ koni wɔná nɔmimaa ni wɔfee ekãa?

12 Ani onyɛɔ ofeɔ ekãa tamɔ nakai? Kɛ́ oná hegbɛ akɛ oye niiatsɛmɛi, mɛi ni le woloŋ waa, loo mɛi ni yɔɔ hegbɛ ni yɔɔ okutso lɛ mli lɛ odase lɛ, te onuɔ he ohaa tɛŋŋ? Ni kɛ́ owekumɛi, oskulbii, loo mɛi ni okɛtsuɔ nii lɛ ye ohe fɛo yɛ ohemɔkɛyeli lɛ hewɔ hu? Ani osheɔ gbeyei? Kɛ́ nakai ni lɛ, obaanyɛ oye ogbeyeishemɔ lɛ nɔ. Beni Yesu yɔɔ shikpɔŋ lɛ nɔ lɛ, etsɔɔ ebɔfoi lɛ bɔ ni amɛaafee amɛkɛ ekãa kɛ bulɛ afã amɛhemɔkɛyeli lɛ he. (Mat. 10:11-18) Beni atee Yesu shi lɛ, ewo ekaselɔi lɛ ashi akɛ ebaaya nɔ ekɛ amɛ ahi shi “daa kɛyashi jeŋ naagbee lɛ.” (Mat. 28:20) Yesu tsɔɔ ŋmɛnɛŋmɛnɛ beaŋ tsulɔ kuu lɛ nɔ etsɔɔ wɔ bɔ ni wɔɔfee wɔfã wɔhemɔkɛyeli lɛ he. (Mat. 24:45-47; 1 Pet. 3:15) Tsulɔ kuu lɛ feɔ enɛ kɛtsɔ gbɛtsɔɔmɔi ni ekɛhaa wɔ yɛ asafoŋ kpeei ashishi ní eko ji Teokrase Sɔɔmɔ Skul lɛ, kɛ agbɛnɛ hu kɛtsɔ asafo lɛ woji tamɔ Reasoning From the Scriptures lɛ nɔ. Ani oyaa asafoŋ kpeei fɛɛ, ni okaneɔ asafo lɛ woji lɛ hu jogbaŋŋ? Kɛ́ ofee nakai lɛ, obaaná ekãa kɛ nɔmimaa babaoo. Ni taakɛ ebalɛ yɛ bɔfoi lɛ agbɛfaŋ lɛ, obaawie Biblia mli anɔkwalei ni nɔ bɛ ni ona, ni onu lɛ ahe otsɔɔ mɛi, ni ohaŋ nɔ ko kwraa atsĩ onaa.

Wiemɔ Biblia mli anɔkwalei ni nɔ bɛ ni okase lɛ ahe otsɔɔ mɛi ni okaha nɔ ko kwraa tsĩ onaa

‘Amɛhole Amɛgbeei Anɔ Amɛha Nyɔŋmɔ’ (Bɔfoi lɛ Asaji 4:23-31)

13, 14. Kɛ́ wɔkɛ shitee-kɛwoo kpe lɛ mɛni esa akɛ wɔfee, ni mɛni hewɔ?

13 Beni aŋmɛɛ Petro kɛ Yohane he lɛ, amrɔ nɔŋŋ ni amɛtee amɛkɛ asafo lɛ yakpe. Amɛkɛ asafo lɛ “hole amɛgbeei anɔ amɛha Nyɔŋmɔ” ni amɛsɔle amɛbi koni amɛná ekãa ni amɛya nɔ amɛshiɛ. (Bɔf. 4:24) Petro le jogbaŋŋ akɛ kɛ́ mɔ ko miibɔ mɔdɛŋ akɛ efee Nyɔŋmɔ suɔmɔnaanii lɛ, nilee bɛ mli akɛ ekɛ ehe aaafɔ̃ lɛ diɛŋtsɛ enyɛmɔ nɔ. Yɛ otsii fioo ni tsɔ hiɛ lɛ amli lɛ, eshwã efɔ̃ lɛ diɛŋtsɛ ehe nɔ ni ekɛɛ Yesu akɛ: “Kɛji mɛi lɛ fɛɛ nane  aaatɔ̃tɔ̃ yɛ ohe lɛ, mi lɛ minane etɔ̃tɔ̃ŋ gbi ko gbi ko.” Ni kɛlɛ, taakɛ Yesu tsɔ hiɛ ewie lɛ, etsɛɛɛ ni Petro ha gbɔmɔ gbeyeishemɔ ná enɔ hewalɛ, ni ekwa enaanyo kɛ etsɔɔlɔ lɛ. Shi Petro kase nii kɛjɛ nɔ ni ba lɛ mli.—Mat. 26:33, 34, 69-75.

14 Jeee ofai shi ni obaatswa lɛ pɛ kɛkɛ baaha oya nɔ otsu nitsumɔ ni akɛwo odɛŋ akɛ oye Kristo he odase lɛ. Kɛ́ shitee-kɛwolɔi bɔ mɔdɛŋ akɛ amɛha oŋmɛɛ ohemɔkɛyeli lɛ he, loo amɛha okpa shiɛmɔ lɛ, feemɔ onii tamɔ Petro kɛ Yohane. Sɔlemɔ ni Yehowa awaje bo. Taomɔ yelikɛbuamɔ kɛjɛ asafo lɛ dɛŋ. Ha asafoŋ onukpai lɛ kɛ mɛi krokomɛi ni edara yɛ mumɔŋ lɛ ale naagbai ni okɛkpeɔ lɛ. Mɛi krokomɛi asɔlemɔ baanyɛ awaje bo waa.—Efe. 6:18; Yak. 5:16.

15. Mɛni hewɔ esaaa akɛ mɛi ni kpa shiɛmɔyaa be ko ni eho lɛ anijiaŋ jeɔ wui lɛ?

15 Kɛ́ be ko ni eho lɛ oha shihilɛ ko ná onɔ hewalɛ ni okpa shiɛmɔ yɛ be ko mli lɛ, onijiaŋ akaje wui. Kaimɔ akɛ, beni Yesu gbo lɛ, bɔfoi lɛ kpa shiɛmɔyaa be kukuoo, shi etsɛɛɛ ni amɛkɛ ekãa bɔi shiɛmɔ ekoŋŋ. (Mat. 26:56; 28:10, 16-20) Yɛ nɔ najiaŋ ni oooha otsutsu tɔmɔi lɛ aha onijiaŋ aje wui lɛ, mɛni hewɔ moŋ okaseee nii kɛjɛɛɛ mli, ni okɛ nibii ni okase lɛ awo mɛi krokomɛi hewalɛ?

16, 17. Mɛni wɔbaanyɛ wɔkase kɛjɛ sɔlemɔ ni Kristo sɛɛnyiɛlɔi lɛ sɔle yɛ Yerusalem lɛ mli?

16 Kɛ́ mɛi ni yɔɔ gbɛnaa wa wɔ yi lɛ, mɛni esa akɛ wɔsɔle wɔbi? Ofainɛ kadimɔ akɛ, kaselɔi lɛ biii ni Yehowa akaha amɛkɛ kai kpe. Amɛle wiemɔ ni Yesu wie akɛ: “Kɛ́ amɛwa mi yi lɛ, amɛaawa nyɛ hu yi” lɛ jogbaŋŋ. (Yoh. 15:20) Nɔ̃ moŋ ni nakai kaselɔi anɔkwafoi lɛ fee ji akɛ, amɛbi Yehowa koni ‘ekwɛ’ amɛhe gbeyei ni shitee-kɛwolɔi lɛ woɔ lɛ. (Bɔf. 4:29) Kaselɔi lɛ susu nii ahe kɛtee shɔŋŋ, ni amɛyoo akɛ amɛyi ni awaa lɛ ji gbalɛ mlibaa. Amɛle akɛ ekɔɔɔ he eko nɔ ni adesai nɔyelɔi foji baawie lɛ, abaafee Nyɔŋmɔ suɔmɔnaanii “yɛ shikpɔŋ lɛ nɔ” taakɛ Yesu tsɔɔ amɛ ni amɛsɔle lɛ.—Mat. 6:9, 10.

17 Bɔni afee ni kaselɔi lɛ anyɛ afee Nyɔŋmɔ suɔmɔnaa nii lɛ, amɛsɔle amɛha Yehowa akɛ: ‘Ha otsuji lɛ kɛ ekãa pii ajaje owiemɔ lɛ.’ Mɛni Yehowa fee amrɔ nɔŋŋ? “He ni amɛnaa ebakpe shi yɛ lɛ hoso, ni Mumɔ krɔŋkrɔŋ yimɔ amɛ fɛɛ amɛmli obɔbɔ,  ni amɛkɛ ekãa jaje Nyɔŋmɔ wiemɔ lɛ.” (Bɔf. 4:29-31) Nɔ ko nɔ ko nyɛŋ atsi Nyɔŋmɔ suɔmɔnaanii feemɔ naa. (Yes. 55:11) Kɛ́ efee tamɔ nɔ ni wɔnyɛŋ shihilɛ lɛ he nɔ ko wɔfee, ni mɛi ni teɔ shi amɛwoɔ wɔ lɛ ahe wa akɛ mɛ̃, kɛ́ wɔhole wɔgbeei anɔ wɔsɔle wɔtsɛ́ Nyɔŋmɔ lɛ, wɔyɛ nɔmimaa akɛ Nyɔŋmɔ baaha wɔná hewalɛ pii, ni wɔya nɔ wɔjaje ewiemɔ lɛ kɛ ekãa.

Wɔbaabu Wɔhe Akɔntaa Wɔha ‘Nyɔŋmɔ, Shi Jeee Gbɔmɛi’ (Bɔfoi lɛ Asaji 4:32–5:11)

18. Mɛni asafo ni yɔɔ Yerusalem lɛ mlibii lɛ fee amɛha amɛhe?

18 Etsɛɛɛ ni asafo hee ni ato shishi yɛ Yerusalem lɛ da kɛbatsɔ asafo ni emlibii lɛ ayi fa fe mɛi 5,000. * Eyɛ mli akɛ kaselɔi lɛ jɛ shihilɛi srɔtoi amli moŋ, shi amɛ fɛɛ amɛhiɛ “tsui koome kɛ susuma koome.” Amɛ fɛɛ amɛsusumɔ kɛ amɛjwɛŋmɔ fee ekome. (Bɔf. 4:32; 1 Kor. 1:10) Kaselɔi lɛ sɔle ní Yehowa ajɔɔ amɛmɔdɛŋbɔi lɛ anɔ, shi jeee no pɛ amɛfee. Amɛye amɛbua amɛhe yɛ mumɔŋ, ni kɛ́ ehe bahia ni amɛkɛ heloonaa nibii aye abua amɛhe hu lɛ, amɛfeɔ nakai. (1 Yoh. 3:16-18) Ákɛ nɔkwɛmɔnɔ lɛ, kaselɔ Yosef ni bɔfoi lɛ wo lɛ Barnaba lɛ hɔ̃ɔ eshikpɔŋ, ni ekɛ shika lɛ fɛɛ ha koni akɛye abua mɛi ni jɛ hei shɔŋŋ lɛ ní amɛya nɔ amɛhi Yerusalem be kplaŋŋ bɔni afee ni amɛkase amɛhemɔkɛyeli hee lɛ he nii babaoo.

19. Mɛni hewɔ Yehowa gbe Anania kɛ Safira lɛ?

19 Anania kɛ eŋa Safira hu hɔ̃ɔ amɛshikpɔŋ ni amɛkɛ shika lɛ eko baha asafo lɛ. Amɛkwa amɛfee tamɔ nɔ ni amɛkɛ shika lɛ fɛɛ ebaha; shi amɛkɛ “yinii lɛ fã ko to sɛɛ.” (Bɔf. 5:2) Yehowa tswa amɛ nɔ̃ ni amɛgboi, jeee yɛ shika ni amɛkɛha ni faaa lɛ hewɔ, shi moŋ akɛni amɛhiɛ jwɛŋmɔ gbonyo ni amɛmale hu lɛ hewɔ. ‘Jeee gbɔmɛi amɛmale amɛtsɔɔ, shi Nyɔŋmɔ moŋ.’ (Bɔf. 5:4) Anania kɛ Safira miitao gbɔmɛi ahiɛnyam shi jeee ni amɛsa Nyɔŋmɔ hiɛ, ni amɛfee amɛnii tamɔ osatofoi ni Yesu wie eshi amɛ lɛ.—Mat. 6:1-3.

20. Mɛni wɔkase ni kɔɔ wɔbe kɛ wɔnii ni wɔkɛaasɔmɔ Yehowa lɛ he?

20 Ŋmɛnɛ lɛ, Odasefoi akpekpei abɔ ni feɔ ejurɔ tamɔ kaselɔi anɔkwafoi ni hi shi yɛ Yerusalem, yɛ klɛŋklɛŋ afii 100 lɛ mli lɛ, jɛɔ amɛsuɔmɔ mli amɛtsuɔ onia kɛfiɔ jeŋ muu fɛɛ shiɛmɔ nitsumɔ lɛ sɛɛ. Anyɛɛɛ mɔ ko nɔ ni ekɛ ebe loo eshika afi nitsumɔ nɛɛ sɛɛ. Yɛ anɔkwale mli lɛ, Yehowa sumɔɔɔ ni wɔjɛ ŋkɔmɔyeli loo fimɔ mli wɔsɔmɔ lɛ. (2 Kor. 9:7) Kɛ́ wɔtsu onia lɛ, jeee shika abɔ ni wɔkɛha lɛ Yehowa kwɛɔ, shi moŋ yiŋtoo hewɔ ni wɔkɛha lɛ. (Mar. 12:41-44) Esaaa akɛ wɔsɔmɔɔ Nyɔŋmɔ yɛ wɔ diɛŋtsɛ wɔsɛɛnamɔ loo hiɛnyam taomɔ hewɔ, ní no ha wɔfee wɔnii tamɔ Anania kɛ Safira. No najiaŋ lɛ, nyɛhaa wɔfea wɔnii tamɔ Petro, Yohane, kɛ Barnaba, ni wɔha suɔmɔ krɔŋŋ ni wɔyɔɔ kɛha Nyɔŋmɔ kɛ wɔnaanyo gbɔmɔ lɛ atsirɛ wɔ ni wɔsɔmɔ Yehowa be fɛɛ be.—Mat. 22:37-40.

^ kk. 1 Asɔleɔ yɛ sɔlemɔwe lɛ kɛ́ aasha leebi kɛ gbɛkɛ afɔlei lɛ. Ashaa gbɛkɛ afɔle lɛ “gbɛkɛ ŋmɛji etɛ.”

^ kk. 4 Kwɛmɔ akrabatsa ni ji  “Petro—Wolɛɛnyo ni Batsɔ Bɔfo ni Yɔɔ Ekãa Waa,” ni yɔɔ baafa 30 lɛ, kɛ  “Yohane—Kaselɔ ni Yesu Sumɔɔ lɛ Waa Lɛ,” ni yɔɔ baafa 33 lɛ.

^ kk. 9 Kwɛmɔ akrabatsa ni ji  “Osɔfonukpa lɛ kɛ Osɔfonukpai Lɛ,” ni yɔɔ baafa 34 lɛ.

^ kk. 18 Yɛ afi 33 Ŋ.B. lɛ, eeenyɛ efee akɛ Farisifoi aaafee 6,000 kɛ Sadukifoi fioo ko pɛ yɔɔ Yerusalem. Ekolɛ enɛ ji yiŋtoo kroko hewɔ hu ni amɛnu he waa be fɛɛ be akɛ Yesu tsɔɔmɔi lɛ baaha amɛnɔ agbɔ lɛ.