Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 23

‘Nyɛboa Minaa Ni Mibajie Nɛɛ Toi’

‘Nyɛboa Minaa Ni Mibajie Nɛɛ Toi’

Paulo fã anɔkwale lɛ he yɛ mɛi fɔji asafo yuu srɔtoi kɛ Akuashɔŋ lɛ hiɛ

Edamɔ Bɔfoi lɛ Asaji 21:18–23:10 lɛ nɔ

1, 2. Mɛni ha bɔfo Paulo ba Yerusalem lɛ, ni mɛɛ naagbai ekɛbaakpe?

SHIKOME ekoŋŋ lɛ, Paulo eba Yerusalem! Enyiɛ enɔ gbɛjegbɛi leleoi ni nɔ efee hoo lɛ anɔ. Yehowa kɛ maŋ nɛɛ mli bii etsu nii waa akɛ ewebii yɛ blema fe maŋ fɛɛ maŋ. Kɛ́ hooo kwraa lɛ, emli bii lɛ fɛɛ kɛ nakai sane lɛ shiɔ amɛtsitsi. Paulo le akɛ Kristofoi ni yɔɔ Yerusalem lɛ ateŋ mɛi pii kɛ amɛhiɛ fɔ̃ɔ nakai blema saji lɛ anɔ tuutu, ni no hewɔ lɛ amɛnyɛɛɛ amɛfee tsakemɔi ni baaha amɛkpɛlɛ Yehowa yiŋtoo hee lɛ nɔ yɛ amɛshihilɛ mli. Enɛ hewɔ lɛ, beni Paulo yɔɔ Efeso tɔ̃ɔ lɛ, eyɔse akɛ Kristofoi komɛi yɛ Yerusalem ní amɛnuuu shishi akɛ Yehowa kɛ Yudafoi agbɛjianɔtoo lɛ tsuuu nii dɔŋŋ. Enɛ kɛ heloonaa nibii ni he hiaa yɛ Yerusalem lɛ ji nibii ni tsirɛ lɛ ni eku esɛɛ kɛba maŋ kpeteŋkpele nɛɛ mli lɛ. (Bɔf. 19:21) Eyɛ mli akɛ Paulo le akɛ ebaanyɛ ekɛ oshara akpe yɛ maŋ nɛɛ mli moŋ, shi eku esɛɛ eba.

2 Amrɔ nɛɛ mɛɛ naagbai Paulo kɛbaakpe yɛ Yerusalem? Nɔ̃ kome ji akɛ, Kristofoi lɛ ateŋ mɛi ni ehe saji ni ejaaa ní atã atsɔɔ amɛ lɛ miigba amɛnaa lɛ baate shi amɛwo lɛ. Shi Kristo henyɛlɔi lɛ ji mɛi ni baate shi amɛwo Paulo waa fe fɛɛ. Amɛbaafolɔ enaa, amɛbaayi lɛ, ni amɛbaabɔ mɔdɛŋ akɛ amɛgbe lɛ. Shi basabasafeemɔi nɛɛ hu baaha Paulo aná hegbɛ ni ekɛjie enaa. Heshibaa, ekãa, kɛ hemɔkɛyeli ni ekɛtsu shihilɛi nɛɛ ahe nii lɛ ji nɔkwɛmɔnɔ kpakpa kɛha Kristofoi ni yɔɔ ŋmɛnɛ lɛ. Nyɛhaa wɔsusua saji nɛɛ ahe wɔkwɛa.

“Amɛwo Nyɔŋmɔ Hiɛ Nyam” (Bɔfoi lɛ Asaji 21:18-20a)

3-5. (a) Mɛɛ kpee Paulo tee yɛ Yerusalem, ni mɛni he asusu yɛ nakai kpee lɛ shishi? (b) Mɛni wɔbaanyɛ wɔkase kɛjɛ kpe ni Paulo kɛ asafoŋ onukpai lɛ kpe yɛ Yerusalem lɛ mli?

3 Beni Paulo kɛ enanemɛi lɛ yashɛ Yerusalem lɛ, enɔ jetsɛremɔ lɛ amɛtee amɛyana asafoŋ onukpai lɛ. Atsĩii bɔfoi lɛ ateŋ mɛi ni yɔɔ wala mli yɛ nakai beaŋ lɛ ateŋ mɔ ko tã yɛ amaniɛbɔɔ lɛ mli; ekolɛ no mli lɛ amɛ fɛɛ amɛtee amɛyaasɔmɔ yɛ je lɛŋ hei krokomɛi. Shi kɛlɛ, Yesu nyɛmi Yakobo yɛ jɛmɛ lolo. (Gal. 2:9) Ekã shi faŋŋ akɛ Yakobo ji mɔ ni sɔmɔ akɛ sɛinɔtalɔ beni ‘onukpai lɛ fɛɛ yɔɔ jɛmɛ’ ní amɛkɛ Paulo kpe lɛ.—Bɔf. 21:18.

4 Paulo ŋa asafoŋ onukpai lɛ, ni “egba nibii ni Nyɔŋmɔ tsɔ esɔɔmɔ lɛ nɔ  etsu yɛ jeŋmaji lɛ ateŋ lɛ ekomekome.” (Bɔf. 21:19) Ekã shi faŋŋ akɛ enɛ wo nyɛmimɛi lɛ hewalɛ naakpa. Wɔ hu kɛ́ wɔnu bɔ ni shiɛmɔ nitsumɔ lɛ shwereɔ yɛ maji krokomɛi anɔ lɛ ahe saji lɛ, ewoɔ wɔ hewalɛ naakpa.—Abɛi 25:25.

5 Beni Paulo wieɔ ni eshɛ he ko lɛ, ekã shi faŋŋ akɛ etsĩ onia ni ekɛjɛ Europa kɛba lɛ tã. Eyɛ faŋŋ akɛ suɔmɔ ni nyɛmimɛi ni yɔɔ maŋsɛɛ nɛɛ jie lɛ kpo lɛ ha mɛi ni boɔ Paulo toi lɛ atsui nyɔ amɛmli waa. Amaniɛbɔɔ lɛ tsɔɔ akɛ beni asafoŋ onukpai lɛ nu Paulo wiemɔ lɛ, “amɛwo Nyɔŋmɔ hiɛ nyam”! (Bɔf. 21:20a) Nakai nɔŋŋ hu ŋmɛnɛ lɛ, mɛi ni osharai wuji ninaa amɛ loo amɛyeɔ helai ni mli wawai lɛ atsui nyɔɔ amɛmli waa kɛ́ amɛnyɛmimɛi Kristofoi lɛ ye amɛbua amɛ yɛ be ni sa mli, ní amɛkɛ amɛwiemɔi wo amɛ hewalɛ lɛ.

Mɛi Babaoo Kã He Amɛji “Mla lɛ He Hiɛdɔlɔi” (Bɔfoi lɛ Asaji 21:20b, 21)

6. Mɛɛ naagba aha Paulo le?

6 Asafoŋ onukpai lɛ ha Paulo le akɛ ehe saji ni ejaaa ni agbɛ ashwã lɛ kɛ naagba ko eba Yudea. Amɛkɛɛ akɛ: “Anyɛmi, kwɛmɔ Yudafoi akpei abɔ ni ehé eye nɛɛ; ni amɛ fɛɛ, mla lɛ he hiɛdɔlɔi ji amɛ. Shi abatã ohe sane ahã amɛ, akɛ otsɔɔ Yudafoi ni yɔɔ jeŋmaji lɛ ateŋ lɛ akɛ amɛkwa Mose, ni okɛɔ akɛ amɛkafolɔ amɛbii aketia, ni asaŋ amɛkanyiɛ amɛkusum nii asɛɛ.” *Bɔf. 21:20b, 21.

7, 8. (a) Mɛɛ susumɔ ni ejaaa Kristofoi ni yɔɔ Yudea lɛ ateŋ mɛi pii ná? (b) Mɛni hewɔ susumɔ ni ejaaa ni Yudafoi komɛi ni etsɔmɔ Kristofoi lɛ ná lɛ etsɔɔɔ akɛ amɛji hemɔkɛyeli kwalɔi lɛ?

7 Mɛni hewɔ Kristofoi babaoo kã he amɛji Mose Mla lɛ he hiɛdɔlɔi, be mli  ni nɔ ni fa fe afii 20 eho kɛjɛ beni akɛ nakai Mla lɛ ba naagbee lɛ? (Kol. 2:14) Yɛ afi 49 Ŋ.B. lɛ, bɔfoi lɛ kɛ onukpai lɛ ni kpeɔ yɛ Yerusalem lɛ ŋma wolo amɛyaha asafoi lɛ ni amɛtsɔɔ akɛ ehe ehiaaa ni Jeŋmajiaŋbii héyelilɔi lɛ afolɔ ketia ní amɛye Mose Mla lɛ nɔ. (Bɔf. 15:23-29) Shi nakai wolo lɛ etsĩii Yudafoi héyelilɔi ní amɛteaŋ mɛi babaoo nuuu shishi ákɛ akɛ Mose Mla lɛ ekpa nitsumɔ lɛ tã.

8 Ani susumɔ ni ejaaa ni nakai Yudafoi héyelilɔi lɛ ná lɛ tsɔɔ akɛ esaaa akɛ akpɛlɛ amɛnɔ akɛ Kristofoi? Dabi. Jeee akɛ tsutsu ko lɛ amɛjá wɔji ni amrɔ nɛɛ amɛmiiya nɔ amɛmiiye nakai wɔŋjamɔ mli kusumii lɛ anɔ. Yehowa ji mɔ ni kɛ Mla ní nakai Yudafoi héyelilɔi lɛ buɔ akɛ ehe hiaa waa lɛ ha. Nɔ ko bɛ nakai mla lɛ mli ni ji daimonioi anifeemɔ loo nifeemɔ ni ejaaa gbɛ. Shi nakai Mla lɛ tsu kpaŋmɔ momo lɛ he nii, ni amrɔ nɛɛ Kristofoi yɛ kpaŋmɔ hee lɛ shishi. Mla kpaŋmɔ lɛ nɔ yeli be eho kɛha anɔkwa jálɔi. Hebri Kristofoi ni ji Mla lɛ he hiɛdɔlɔi lɛ nuuu nibii ashishi jogbaŋŋ ni amɛbɛ nɔmimaa tsɔ yɛ Kristofoi asafo lɛ mli. Esa akɛ amɛtsake amɛsusumɔ ni amɛha ekɛ anɔkwale ni Nyɔŋmɔ jieɔ lɛ kpo fiofio lɛ akpã gbee. *Yer. 31:31-34; Luka 22:20.

“Sane ni Abagba Amɛ yɛ Ohe lɛ Bɛŋ” (Bɔfoi lɛ Asaji 21:22-26)

9. Mɛni Paulo tsɔɔ yɛ Mose Mla lɛ he?

9 Ni saji ni awie yɛ Paulo he akɛ eetsɔɔ Yudafoi ni yɔɔ jeŋmaji lɛ amli akɛ  “amɛkafolɔ amɛbii aketia, ni asaŋ amɛkanyiɛ amɛkusum nii asɛɛ” lɛ hu? Paulo ji jeŋmaji abɔfo, ni eha Jeŋmajiaŋbii lɛ ye yiŋ ní akpɛ akɛ esaaa akɛ Jeŋmajiaŋbii lɛ yeɔ Mla lɛ nɔ lɛ nɔ. Ni eha ana faŋŋ hu akɛ mɔ fɛɛ mɔ ní baabɔ mɔdɛŋ akɛ ekɔne Jeŋmajiaŋbii héyelilɔi lɛ ayiŋ akɛ amɛha afolɔ amɛ ketia kɛtsɔɔ akɛ amɛyɛ Mose Mla lɛ shishi lɛ miitsɔɔ tsɔɔmɔ ní ejaaa. (Gal. 5:1-7) Paulo shiɛ sanekpakpa lɛ etsɔɔ Yudafoi ni yɔɔ maji ni etee mli lɛ amli lɛ hu. Ekã shi faŋŋ akɛ eha amɛteaŋ mɛi ni kpɛlɛ anɔkwale lɛ nɔ lɛ le akɛ Yesu gbele lɛ egu Mla lɛ, ni ákɛ hemɔkɛyeli nɔ adamɔɔ abuɔ mɔ ko jalɔ, shi jeee Mla lɛ nitsumɔi.—Rom. 2:28, 29; 3:21-26.

10. Mɛɛ susumɔ ni ja Paulo ná yɛ Mla lɛ kɛ ketiafoo he?

10 Kɛlɛ, Paulo eteee shi ewooo mɛi ni nu he akɛ esa akɛ amɛkɛ amɛhe awo Yudafoi lɛ anifeemɔi komɛi amli, tamɔ nii ni esaaa akɛ atsuɔ yɛ Hejɔɔmɔ Gbi lɛ nɔ, loo niyenii komɛi ni esaaa akɛ ayeɔ lɛ. (Rom. 14:1-6) Ni agbɛnɛ hu ewooo mla yɛ ketiafoo he. Yɛ anɔkwale mli lɛ, Paulo fo Timoteo ketia, bɔni afee ni Yudafoi lɛ akakpoo Timoteo, ejaakɛ amɛle akɛ etsɛ lɛ Helanyo ni. (Bɔf. 16:3) Ketiafoo ji mɔ aŋkro yiŋkpɛɛ. Paulo kɛɛ Galatabii lɛ akɛ: “Jeee ketiafoo ni nyɛɔ nɔ ko efeɔ, ni jeee foo hu, shi moŋ hemɔkɛyeli ni tsɔɔ suɔmɔ nɔ etsuɔ nii lɛ ni.” (Gal. 5:6) Shi kɛlɛ kɛ́ mɔ ko ha afo lɛ ketia koni ekɛtsɔɔ akɛ eyɛ Mla lɛ shishi, loo esusu akɛ ketiafoo baaha Yehowa akpɛlɛ enɔ lɛ, no tsɔɔ akɛ ebɛ hemɔkɛyeli.

11. Mɛɛ gbɛtsɔɔmɔ asafoŋ onukpai lɛ kɛha Paulo, ni mɛni enɔ yeli baabi? (Kwɛmɔ shishigbɛ niŋmaa lɛ hu.)

11 No hewɔ lɛ, eyɛ mli akɛ Paulo he saji ni atã lɛ ejaaa kwraa moŋ, shi nakai saji lɛ kã he eegba Yudafoi héyelilɔi lɛ anaa. Enɛ ha asafoŋ onukpai lɛ kɛ gbɛtsɔɔmɔ ha Paulo akɛ: “Wɔyɛ hii ejwɛ ní ewo shi; ŋɔɔ amɛ ni okɛ amɛ fɛɛ ayatsuu nyɛhe, ni owo nɔ ni ahaa lɛ oha amɛ, koni amɛshɛ amɛyi, ni mɛi lɛ fɛɛ ana akɛ, sane ni abagba amɛ yɛ ohe lɛ  bɛŋ, shi moŋ bo diɛŋtsɛ tete obaa ojeŋ yɛ mla lɛ naa, ni oyeɔ nɔ.” *Bɔf. 21:23, 24.

12. Mɛɛ gbɛ nɔ Paulo efeee kpɛŋŋ shi moŋ ekpɛlɛ ŋaa ni asafoŋ onukpai ni yɔɔ Yerusalem lɛ wo lɛ lɛ nɔ?

12 Kulɛ Paulo baanyɛ akɛɛ akɛ jeee ehe saji ní ejaaa lɛ ji nɔ ni kɛ naagba lɛ eba, shi moŋ bɔ ni Yudafoi héyelilɔi lɛ ahiɛ dɔɔ Mose Mla lɛ he lɛ ni. Shi eesumɔ ni ebo asafoŋ onukpai lɛ atoi, bei abɔ ni nakai nibii lɛ eteee shi ewooo Nyɔŋmɔ shishitoo mlai lɛ. Mra mli lɛ eŋma akɛ: “Mɛi ni yɔɔ mla shishi lɛ, mitsɔ̃ tamɔ mɔ ko ni yɔɔ mla shishi hu miha amɛ, tsɛ mi diɛŋtsɛ mibɛ mla shishi, beni afee ni minine ashɛ mɛi ni yɔɔ mla shishi lɛ anɔ.” (1 Kor. 9:20) Yɛ shihilɛ nɛɛ mli lɛ, Paulo fee nibii ni asafoŋ onukpai ni yɔɔ Yerusalem lɛ kɛɛ efee lɛ, ni ebatsɔ “mɔ ko ni yɔɔ mla shishi.” Paulo kɛ enɛ fee nɔkwɛmɔnɔ kpakpa eha wɔ ŋmɛnɛ, koni wɔfee nibii ni asafoŋ onukpai lɛ kɛɔ wɔ akɛ wɔfee lɛ, ní wɔkama nɔ mi doo akɛ wɔbaafee nibii ni wɔsumɔɔ.—Heb. 13:17.

Beni Paulo na akɛ ekuuu Ŋmalɛ mli shishitoo mla ko mli lɛ, eŋmɛɛ saji ahe. Ani bo hu ofeɔ nakai?

“Esaaa akɛ Ehiɔ Jeŋ” (Bɔfoi lɛ Asaji 21:27–22:30)

13. (a) Mɛni hewɔ Yudafoi komɛi fee hoo yɛ sɔlemɔwe lɛ? (b) Mɛɛ gbɛ nɔ atsɔ ahere Paulo yiwala?

13 Nibii eyabaaa lɛ jogbaŋŋ yɛ sɔlemɔwe lɛ. Beni eshwɛ fioo ni abaagbe shiwoo gbii lɛ anaa lɛ, Yudafoi ni jɛ Asia lɛ na Paulo, amɛfolɔ enaa akɛ ekɛ Jeŋmajiaŋbii eba sɔlemɔwe lɛ, ni amɛtée basabasafeemɔ shi. Eji Roma asafoiatsɛ nukpa lɛ kɛ ehe wooo nɔ ni tee nɔ lɛ mli kulɛ, amɛbaayi Paulo amɛgbe lɛ. Roma asafoiatsɛ nukpa lɛ mɔ lɛ ni eyawo lɛ tsuŋ. Kɛjɛ nakai gbi lɛ nɔ kɛyaa lɛ, nɔ ni fa fe afii ejwɛ baaho dani abaaŋmɛɛ Paulo he. Kɛlɛ oshara ni baanyɛ aba Paulo nɔ lɛ sɛɛ efoko. Beni asafoiatsɛ nukpa lɛ bi Yudafoi lɛ akɛ mɛni hewɔ amɛtutuaa Paulo lɛ, amɛteŋ mɛi komɛi bolɔ kɛfolɔ enaa, ni mɛi komɛi hu bolɔ ekroko. Hoofeemɔ lɛ haaa asafoiatsɛ nukpa lɛ anu nɔ ko nɔ ko shishi. Shihilɛ lɛ mli bawa aahu akɛ Roma asraafoi lɛ wó Paulo kɛje jɛmɛ. Beni eshwɛ fioo ni Roma asraafoi lɛ kɛ Paulo baabote mɔɔ lɛŋ lɛ, ebi asafoiatsɛ nukpa lɛ akɛ: “Miikpao fai, ha mi gbɛ ni mawie matsɔɔ maŋ lɛ.” (Bɔf. 21:39) Asafoiatsɛ nukpa lɛ kpɛlɛ nɔ, ni Paulo kɛ ekãa fã ehemɔkɛyeli lɛ he.

14, 15. (a) Mɛni Paulo gbala mli etsɔɔ Yudafoi lɛ? (b) Mɛɛ nibii Roma asafoiatsɛ nukpa lɛ fee koni ele nɔ hewɔ ni Yudafoi lɛ amli ewo la waa kɛwo Paulo lɛ?

14 Paulo je ewiemɔ lɛ shishi akɛ: ‘Nyɛboa minaa ni mibajie nɛɛ toi.’ (Bɔf.  22:1) Paulo kɛ asafo lɛ wie yɛ Hebri wiemɔ mli, ni no ha amɛfee diŋŋ. Etsɔɔ amɛ nɔ hewɔ ni amrɔ nɛɛ eji Kristo sɛɛnyiɛlɔ, ni ekɛ ewiemɔ lɛ lɔgɔɔɔ shi. Paulo kɛ ŋaalee tsu nii ni etsĩ nibii komɛi atã ní kɛ́ Yudafoi lɛ miisumɔ lɛ amɛbaanyɛ amɛyatao mli. Gamaliel ní ehe gbɛ́i waa lɛ anaji anaa atsɔse Paulo yɛ, ni ewa Kristo sɛɛnyiɛlɔi lɛ ayi, ni eeenyɛ efee akɛ mɛi ni boɔ lɛ toi lɛ ateŋ mɛi komɛi le enɛ faŋŋ. Shi beni Paulo yaa Damasko lɛ, Kristo ni atee lɛ shi lɛ jie ehe kpo etsɔɔ lɛ yɛ ninaa mli, ni ekɛ Paulo wie. Mɛi ni fata Paulo he kɛfãa gbɛ lɛ na la kpɛmɔ ko, ni amɛnu gbee ko hu, shi amɛnuuu gbee lɛ shishi. (Bɔf. 9:7; 22:9) Ninaa lɛ ha Paulo shwila, ni no sɛɛ lɛ, mɛi ni fata ehe lɛ mɔ enine mli kɛtee Damasko. Beni amɛshɛ jɛmɛ lɛ, nuu ko ni atsɛ́ɔ lɛ Anania ní Yudafoi ni yɔɔ nakai kpokpaa lɛ nɔ lɛ le lɛ jogbaŋŋ lɛ ha Paulo na nii ekoŋŋ yɛ naakpɛɛ gbɛ nɔ.

15 Paulo tee nɔ ewie akɛ beni eku esɛɛ eba Yerusalem ekoŋŋ lɛ, Yesu jie ehe kpo etsɔɔ lɛ yɛ sɔlemɔwe lɛ. Enɛ ni ewie lɛ ha Yudafoi lɛ amli fu waa, ni amɛbolɔ akɛ: “Akɛ nɛkɛ gbɔmɔ aje shikpɔŋ lɛ nɔ! ejaakɛ esaaa akɛ ehiɔ jeŋ.” (Bɔf. 22:22) Asafoiatsɛ nukpa lɛ fã ákɛ akɛ Paulo aya mɔɔ lɛŋ, bɔni afee ni akaye lɛ awui. Akɛni asafoiatsɛ nukpa lɛ etswa efai shi akɛ eetao ele nɔ hewɔ ni Yudafoi lɛ amli ewo la waa kɛwo Paulo hewɔ lɛ, efã akɛ aŋɔ kpelebii ayi lɛ kɛtao eyitsoŋ. Shi Paulo kɛ mla naa hegbɛ ni eyɔɔ lɛ tsu nii ni eha amɛle akɛ eji Romanyo. Nakai nɔŋŋ Yehowa jálɔi ni yɔɔ ŋmɛnɛ lɛ kɛ mla naa hegbɛi ni amɛyɔɔ lɛ tsuɔ nii kɛfãa amɛhemɔkɛyeli lɛ he. (Kwɛmɔ akrabatsai  ni ji  “Roma Mla lɛ kɛ Romabii Lɛ,” ni yɔɔ baafa 184, kɛ  “Saji ni Aye yɛ Ŋmɛnɛŋmɛnɛ Beaŋ,” ni yɔɔ baafa 186 lɛ.) Beni asafoiatsɛ nukpa lɛ nu akɛ Romanyo ji Paulo lɛ, eyɔse akɛ esa akɛ etsɔ gbɛ kroko nɔ ele saji ni etaoɔ akɛ ele lɛ. Enɔ jetsɛremɔ lɛ etsɛ́ Akuashɔŋ lɛ, ni ji Yudafoi lɛ asaneyelihe wulu lɛ kpee, ni ekɛ Paulo badamɔ amɛhiɛ.

“Farisifonyo Ji Mi” (Bɔfoi lɛ Asaji 23:1-10)

16, 17. (a) Tsɔɔmɔ nɔ ni ba beni Paulo kɛ Akuashɔŋ lɛ wie lɛ. (b) Beni ágba Paulo mã lɛ, mɛɛ heshibaa he nɔkwɛmɔnɔ efee?

16 Beni akɛ Paulo badamɔ Akuashɔŋ lɛ hiɛ lɛ, eje shishi efã enaa akɛ: “Ataamɛi kɛ anyɛmimɛi, mi lɛ, henilee kpakpa sɔŋŋ mikɛba mijeŋ yɛ Nyɔŋmɔ hiɛ kɛbashi ŋmɛnɛ gbi nɛɛ.” (Bɔf. 23:1) Ahaaa etsa ewiemɔ lɛ nɔ. Amaniɛbɔɔ lɛ kɛɛ akɛ: “Shi osɔfonukpa Anania lɛ fã mɛi ni damɔ emasɛi lɛ akɛ ágba enaabu mã.” (Bɔf. 23:2) Mɛɛ hiɛgbeji asane nɛ! Ákɛ aaatsɛ Paulo akɛ amalelɔ beni anuko edaaŋ sane lɛ tsɔɔ hetsɛ̃ kpele ni ayɔɔ kɛha lɛ! Ebɛ naakpɛɛ mɔ akɛ Paulo here nɔ akɛ: “Mã kɛ̃ Nyɔŋmɔ aaagbao, bo gbogbo ni asha he! Otá shi ookojo mi yɛ mla lɛ naa, ni osaa ojeɔ mla lɛ sɛɛ ofãa akɛ ágba mi mã?”—Bɔf. 23:3.

17 Mɛi komɛi ni damɔ Paulo masɛi lɛ anaa kpɛ amɛhe—jeee yɛ Paulo mã ni agba lɛ hewɔ, shi moŋ yɛ nɔ ni ewie lɛ hewɔ! Amɛbi lɛ akɛ: “Nyɔŋmɔ osɔfonukpa lɛ ojɛɔ nɛɛ?” Hetoo ni Paulo ha amɛ lɛ tsɔɔ akɛ eji mɔ ko ni baa ehe shi ni ebuɔ Mla lɛ hu, ni kulɛ esa akɛ amɛ hu amɛfee nakai nɔŋŋ. Ekɛɛ akɛ: “Anyɛmimɛi, mileee akɛ osɔfonukpa ni; ejaakɛ aŋma akɛ: ‘Kaawie omaŋ onukpa he efɔŋ.’” * (Bɔf. 23:4, 5; 2 Mose 22:28) Agbɛnɛ lɛ, Paulo tsake nɔ ni ekɛ amɛ yaawie lɛ. Akɛni eyoo akɛ Akuashɔŋ lɛ fã kome lɛ Farisifoi ni, ni fã kroko lɛ Sadukifoi ni hewɔ lɛ, ekɛɛ akɛ: “Ataamɛi kɛ anyɛmimɛi, mi lɛ Farisifonyo ji mi kɛ Farisifonyo bi hu; hiɛnɔkamɔ kɛ gbohiiashitee lɛ hewɔ akojoɔ mi nɛɛ.”—Bɔf. 23:6.

Kɛ́ wɔmiishiɛ wɔmiitsɔɔ jamɔi krokomɛi amlibii lɛ, wɔkɛ amɛ susuɔ nibii ni amɛkpɛlɛɔ nɔ lɛ ahe kɛjeɔ shishi, taakɛ Paulo fee lɛ

18. Mɛni hewɔ Paulo tsɛ́ ehe Farisifonyo lɛ, ni mɛɛ gbɛ nɔ wɔbaanyɛ wɔkɛ mɛi asusu nii ahe yɛ gbɛ ni tamɔ nakai nɔŋŋ nɔ yɛ shihilɛi komɛi amli?

18 Mɛni hewɔ Paulo tsɛ́ ehe Farisifonyo lɛ? Ejaakɛ “Farisifonyo bi” ji lɛ,  ni ejɛ Farisifoi aweku mli. No hewɔ lɛ, mɛi babaoo naa lɛ akɛ eji Farisifonyo. * Shi mɛni hewɔ esa akɛ Paulo atsɛ ehe Farisifonyo be mli ni amɛheee gbohiiashitee amɛyeee lɛ? Amaniɛbɔɔ tsɔɔ akɛ Farisifoi lɛ heɔ amɛyeɔ akɛ kɛ́ gbɔmɔ gbo lɛ esusuma lɛ gbooo, ni akɛ jalɔi asusumai baaba ababla ekoŋŋ. Paulo heee nakai susumɔi lɛ eyeee. Eheɔ gbohiiashitee ni Yesu wie he lɛ eyeɔ. (Yoh. 5:25-29) Ni kɛlɛ, Paulo kɛ Farisifoi lɛ kpãa gbee akɛ wɔsɛɛ lɛ adesai baahi shi ekoŋŋ—shi Sadukifoi ni heee amɛyeee akɛ adesai baahi shi ekoŋŋ wɔsɛɛ lɛ teɔ shi amɛwoɔ enɛ. Kɛ́ wɔmiishiɛ wɔmiitsɔɔ Katolikbii loo Protɛstantbii lɛ wɔbaanyɛ wɔkɛ amɛ asusu nii ahe yɛ gbɛ ni tamɔ nakai nɔŋŋ nɔ. Wɔbaanyɛ wɔkɛɛ amɛ akɛ wɔ hu wɔheɔ Nyɔŋmɔ nɔ wɔyeɔ tamɔ amɛ nɔŋŋ. Eji anɔkwale akɛ, ekolɛ amɛheɔ Triniti lɛ amɛyeɔ, shi wɔ lɛ, wɔheɔ Nyɔŋmɔ ni Biblia lɛ wieɔ ehe lɛ wɔyeɔ. Ni kɛlɛ, wɔkɛ amɛ fɛɛ heɔ wɔyeɔ akɛ Nyɔŋmɔ yɛ.

19. Mɛni hewɔ Akuashɔŋ lɛ mli gba enyɔ lɛ?

19 Nɔ ni Paulo wie lɛ ha Akuashɔŋ lɛ mli gba enyɔ. Amaniɛbɔɔ lɛ kɛɛ akɛ: “Bolɔmɔ babaoo bate shi, ni woloŋmalɔi lɛ ni yɔɔ Farisifoi lɛ agbɛfaŋ lɛ te shi ni amɛbé amɛkɛɛ: Wɔnaaa nɔ ko fɔŋ ko yɛ nɛkɛ gbɔmɔ nɛɛ he; shi kɛji aleee nɔ̃ mumɔ ko loo ŋwɛi bɔfo ko kɛ lɛ ewie lɛ,—.” (Bɔf. 23:9) Akɛni Sadukifoi lɛ heee amɛyeee akɛ ŋwɛi bɔfoi yɛ hewɔ lɛ, kɛɛmɔ ni akɛɛ akɛ aleee nɔ̃ ŋwɛi bɔfo ko kɛ Paulo ewie lɛ wo amɛ mli la fe nine! (Kwɛmɔ akrabatsa ni ji  “Sadukifoi lɛ kɛ Farisifoi Lɛ,” ni yɔɔ shishigbɛ lɛ.) Hoofeemɔ lɛ mli bawa aahu akɛ Roma asafoiatsɛ nukpa lɛ yashɔ̃ Paulo yɛ amɛdɛŋ ekoŋŋ. (Bɔf. 23:10) Kɛlɛ, enɛ etsɔɔɔ akɛ oshara ko nyɛŋ aba Paulo nɔ dɔŋŋ. Mɛni ba enɔ yɛ no sɛɛ? Wɔbaakase no he nii babaoo yɛ yitso ni nyiɛ sɛɛ lɛ mli.

^ kk. 6 Akɛni Yudafoi ni etsɔmɔ Kristofoi lɛ ayi fa waa hewɔ lɛ, ekã shi faŋŋ akɛ asafoi babaoo kpeɔ yɛ mɛi ashĩai amli.

^ kk. 8 Afii fioo komɛi asɛɛ lɛ, bɔfo Paulo ŋma Hebribii awolo lɛ, ni etsɔɔ yɛ mli faŋŋ akɛ kpaŋmɔ hee lɛ nɔ bɛ. Eha efee faŋŋ yɛ nakai wolo lɛ mli akɛ kpaŋmɔ hee lɛ haa kpaŋmɔ momo lɛ bafeɔ nɔ ni be eho. Paulo ha Yudafoi ni etsɔmɔ Kristofoi lɛ odaseyelii ni kɔneɔ mɔ yiŋ ní amɛbaanyɛ amɛkɛtsu nii kɛtsɔɔ mɛi ni maa nɔ mi akɛ Mose Mla lɛ be hoko lɛ nii anaa, ni agbɛnɛ hu ekã shi faŋŋ akɛ niiahesusumɔ ni anyɛɛɛ aje he ŋwane ni Paulo kɛtsu nii lɛ waje Kristofoi lɛ ateŋ mɛi ni maa nɔ mi doo akɛ aye Mose Mla lɛ nɔ lɛ ahemɔkɛyeli.—Heb. 8:7-13.

^ kk. 11 Woloŋlelɔi kɛɔ akɛ no mli lɛ hii lɛ ewo Nazirnyo feemɔ he shiwoo. (4 Mose 6:1-21) Eji anɔkwale akɛ no mli lɛ Mose Mla ni nakai hii lɛ damɔ nɔ amɛwo shi lɛ be eho. Ni kɛlɛ, ekolɛ Paulo susu akɛ ejeee tɔmɔ akɛ nakai hii lɛ aaaye shi ní amɛwo Yehowa lɛ nɔ. No hewɔ lɛ, ejeee tɔmɔ akɛ eeewo nɔ ni hii lɛ baaha lɛ eha amɛ, ní ekɛ amɛ aya. Wɔleee nɔ̃ shiwoo tuuntu ní eji, shi bɔ fɛɛ bɔ ni ji lɛ, Paulo ekpɛlɛŋ ni akɛ kooloo ashã afɔle (taakɛ Nazirbii lɛ feɔ lɛ), ejaakɛ ele akɛ no ejieŋ hii lɛ ahe eshai kɛyaŋ. Kristo afɔleshãa ni eye emuu lɛ haaa kooloi ni akɛshãa afɔlei lɛ anyɛ ajie eshai kɛya dɔŋŋ. Wɔleee nɔ ni Paulo yafee lɛ he saji fɛɛ fitsofitso, shi wɔbaanyɛ wɔná nɔmimaa akɛ Paulo ekpɛlɛŋ akɛ ebaafee nɔ ko ni teɔ shi ewoɔ ehenilee.

^ kk. 17 Mɛi komɛi kɛɔ akɛ Paulo enaaa nii jogbaŋŋ, ni no hewɔ eyooo osɔfonukpa lɛ. Loo ekolɛ eshi Yerusalem etsɛ waa, ni no hewɔ lɛ enyɛɛɛ eyoo mɔ ni yeɔ osɔfonukpa agbɛnɛ lɛ. Aloo ekolɛ akɛni mɛi lɛ ayi fa hewɔ lɛ, Paulo nyɛɛɛ ana mɔ tuuntu ni fã akɛ agba lɛ mã lɛ.

^ kk. 18 Yɛ afi 49 Ŋ.B. beni bɔfoi lɛ kɛ onukpai lɛ susuɔ he kɛji esa akɛ Jeŋmajiaŋbii lɛ aye Mose Mla lɛ nɔ lɛ, awie Kristofoi ni naa ekpe shi lɛ ateŋ mɛi komɛi ahe akɛ ‘amɛjɛ Farisifoi lɛ akuu lɛŋ, ni amɛhé amɛye.’ (Bɔf. 15:5) Ekã shi faŋŋ akɛ abuɔ nakai héyelilɔi lɛ lolo yɛ gbɛ ko nɔ akɛ amɛji Farisifoi abii.