Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 26

“Nyɛteŋ Mɔ Ko Yiwala Tɔ̃ŋ”

“Nyɛteŋ Mɔ Ko Yiwala Tɔ̃ŋ”

Beni Paulo kɛ lɛlɛ yaasha shi lɛ, ejie hemɔkɛyeli ni da kpo, ni edɔ mɛi ahe

Edamɔ Bɔfoi lɛ Asaji 27:1–28:10 lɛ nɔ

1, 2. Mɛɛ gbɛ Paulo baafã, ni mɛɛ saji ekolɛ ebaasusu he?

PAULO kã he eesusu Festo wiemɔ lɛ he, ejaakɛ nakai wiemɔ lɛ baasa eshihilɛ he waa wɔsɛɛ. Amralo Festo kɛɛ lɛ akɛ: “Kaisare ŋɔɔ nɔŋŋ oootee.” No mli lɛ Paulo eye afii enyɔ yɛ tsuŋwoohe, ni no hewɔ lɛ gbɛ kakadaŋŋ ni akɛ lɛ baafã kɛya Roma lɛ baaha kɛ́ hooo kwraa lɛ etsake kɔɔyɔɔ lɛ mli fioo. (Bɔf. 25:12) Shi akɛni Paulo efã gbɛ yɛ ŋshɔ hiɛ aahu hewɔ lɛ, ele akɛ amɛbaanyɛ amɛkɛ naagbai hu akpe. Ekolɛ gbɛ ni amɛbaafã kɛtsɔ ŋshɔ hiɛ koni eyapue yɛ Kaisare hiɛ lɛ baaha ebi ehe saji komɛi ni yɔɔ hiɛdɔɔ.

2 Paulo ‘ena nɔ̃ yɛ ŋshɔ hiɛ’ shii abɔ, ekɛ lɛlɛ eyasha shi shii etɛ, ni eye jenamɔ kɛ jetsɛremɔ po yɛ ŋshɔ hiɛ. (2 Kor. 11:25, 26) Agbɛnɛ hu, gbɛfãa nɛɛ tamɔŋ gbɛi srɔtoi ni efã beni eji maŋsɛɛ shiɛlɔ lɛ, ejaakɛ no mli lɛ ejeee gboklɛfonyo. Amrɔ nɛɛ Paulo miifã gbɛ kɛmiijɛ Kaisarea kɛmiiya Roma akɛ gboklɛfonyo, ni gbɛ lɛ jekɛ waa—ejekɛ fe kilomitai 3,000. Ani ebaanyɛ eyashɛ shweshweeshwe? Kɛ́ enyɛ eyashɛ po lɛ, ani abaabu lɛ fɔ́? Kaimɔ akɛ, nɔyelɔ ni yɔɔ hewalɛ fe fɛɛ yɛ Satan je lɛ mli yɛ nakai beaŋ lɛ ji mɔ ni baakojo lɛ.

3. Mɛni Paulo tswa efai shi akɛ ebaafee, ni mɛni wɔbaasusu he yɛ yitso nɛɛ mli?

3 Yɛ nibii fɛɛ ni okane yɛ Paulo he lɛ anaa lɛ, ani osusuɔ akɛ ehiɛnɔkamɔ tã, ni efee shwɛm yɛ nɔ ni kã ehiɛ lɛ hewɔ? Enyɛŋ ebalɛ nakai kɔkɔɔkɔ! Ele akɛ ekɛ shihilɛi ni mli wawai baakpe, shi eleee bɔ ni ebaaba lɛ eha. Mɛni hewɔ esa akɛ nibii ni enyɛŋ etsĩ amɛnaa lɛ aha efee yeyeeye, ní no aha miishɛɛ ni ekɛtsuɔ eshiɛmɔ nitsumɔ lɛ atã? (Mat. 6:27, 34) Paulo le akɛ Yehowa miisumɔ ni ekɛ hegbɛ fɛɛ hegbɛ ni ebaaná lɛ atsu nii kɛshiɛ Nyɔŋmɔ Maŋtsɛyeli lɛ he sanekpakpa lɛ etsɔɔ mɛi fɛɛ ní maŋ nɔyelɔi po fata he. (Bɔf. 9:15) Paulo tswa efai shi akɛ ekɔɔɔ he eko nɔ̃ shihilɛ ni ekɛbaakpe lɛ, ebaatsu nitsumɔ ni akɛwo edɛŋ lɛ kɛyagbe naa. Ani jeee nakai wɔ hu wɔtswa wɔfai shi akɛ wɔbaafee? Belɛ, nyɛhaa wɔnyiɛa Paulo sɛɛ beni efãa gbɛ ni sa kadimɔ waa yɛ ŋshɔ hiɛ nɛɛ, koni wɔkwɛ gbɛ nɔ ni enɔkwɛmɔnɔ lɛ he baanyɛ aba sɛɛnamɔ kɛha wɔ.

“Wɔmiikpee Kɔɔyɔɔ” (Bɔfoi lɛ Asaji 27:1-7a)

4. Mɛɛ lɛlɛ mli Paulo ta kɛje egbɛfãa lɛ shishi, ni namɛi ji nyɛmimɛi ni fata ehe?

4 Aŋɔ Paulo kɛ gboklɛfoi komɛi awo Roma asafoiatsɛ ko ni atsɛ́ɔ lɛ Yulio lɛ dɛŋ, ni Yulio kpɛ eyiŋ akɛ ekɛ amɛ baata guɔyelɔi alɛlɛ ko ni eba Kaisarea  lɛ mli kɛya. Lɛlɛ lɛ jɛ Adramitio lɛjiadaamɔhe ni yɔɔ Asia Bibioo lɛ anaigbɛ ŋshɔ lɛ naa lɛ, ni etsɔ Mitileene, ni ji maŋ ni yɔɔ Lesbos ŋshɔkpɔ lɛ nɔ lɛ. Lɛlɛ nɛɛ baafã kɛtsɔ kooyigbɛ, ni no sɛɛ lɛ ebaadɔ eyi ewo anaigbɛ, ni ebaawa yɛ hei srɔtoi ejie jatsu, ni abaato jatsu hee hu awo mli. Akpɛɛɛ lɛlɛ nɛɛ koni ewo gbɔmɛi, aahu ni akɛaawo gboklɛfoi. (Kwɛmɔ akrabatsa ni ji  “Ŋshɔ Hiɛ Gbɛfãa kɛ Hei ni Atsɔɔ.”) Shi jeee Paulo pɛ ji Kristofonyo ni kɛ gboklɛfoi awuiyelɔi lɛ baafã gbɛ nɛɛ. Nyɛmimɛi hii enyɔ loo nɔ̃ fata ehe—Aristarko kɛ Luka. Yɛ anɔkwale mli lɛ, Luka ji mɔ ni ŋma amaniɛbɔɔ lɛ. Wɔleee kɛji nyɛmimɛi anɔkwafoi enyɔ nɛɛ diɛŋtsɛ wo amɛgbɛfãa lɛ he nyɔmɔ, loo amɛfata Paulo he kɛtee koni amɛsɔmɔ lɛ.—Bɔf. 27:1, 2.

5. Mɛɛ naanyobɔɔ Paulo ná yɛ Zidon, ni mɛni wɔbaanyɛ wɔkase kɛjɛ enɛ mli?

5 Beni lɛlɛ lɛ fã kɛyi kooyigbɛ aaafee kilomitai 110 lɛ, gbi kome sɛɛ lɛ, eyadamɔ Zidon yɛ Siria. Eeenyɛ efee akɛ akɛni Yulio le akɛ Romanyo ji Paulo ni abuko lɛ fɔ́ hewɔ lɛ, ehiɛ lɛ dɔdɔɔdɔ fe gboklɛfoi krokomɛi lɛ. (Bɔf. 22:27, 28; 26:31, 32) Yulio ŋmɛ Paulo gbɛ ni etee enyɛmimɛi Kristofoi lɛ aŋɔɔ yɛ kpete. Ekã shi faŋŋ akɛ nyɛmimɛi hii kɛ yei lɛ fee Paulo gbɔ waa ejaakɛ awo lɛ tsuŋ etsɛ! Ani ole shihilɛi komɛi amli ni obaanyɛ ojie gbɔfeemɔ su kpo yɛ gbɛ ni tamɔ nakai nɔŋŋ nɔ, koni no awo bo hu hewalɛ?—Bɔf. 27:3.

6-8. Mɛɛ nibii tee nɔ yɛ Paulo gbɛfãa lɛ mli kɛjɛ Zidon kɛyashi Knido, ni mɛɛ hegbɛi ekã shi faŋŋ akɛ Paulo ná kɛshiɛ?

6 Beni lɛlɛ lɛ fã yɛ Zidon lɛ, amɛfoŋ yɛ Kilikia ni bɛŋkɛ Tarso, he ni Paulo da yɛ lɛ. Eyɛ mli akɛ Luka etsĩii hei krokomɛi ni amɛyadamɔ lɛ atã moŋ, shi etsɔɔ akɛ ‘amɛmiikpee kɔɔyɔɔ,’ ni enɛ haa wɔnaa akɛ sɛɛ mli lɛ amɛkɛ oshara baakpe. (Bɔf. 27:4, 5) Ni kɛlɛ, eyɛ faŋŋ akɛ Paulo ŋɔɔ hegbɛ fɛɛ hegbɛ ni enáa lɛ kɛshiɛɔ sanekpakpa lɛ. Ŋwanejee ko kwraa bɛ he akɛ eye gboklɛfoi krokomɛi lɛ kɛ mɛi ni yɔɔ lɛlɛ lɛ mli ní amlakui lɛ kɛ asraafoi lɛ fata he lɛ odase, ni eye mɛi ni yɔɔ lɛjiadaamɔhei ni lɛlɛ lɛ yadamɔɔ lɛ hu odase. Ani wɔ hu wɔkɛ hegbɛi ni wɔnáa lɛ tsuɔ nii jogbaŋŋ ni wɔkɛshiɛɔ?

7 Sɛɛ mli lɛ, lɛlɛ lɛ yadamɔ Mira lɛjiadaamɔhe  ni yɔɔ Asia Bibioo lɛ wuoyigbɛ ŋshɔ lɛ naa lɛ. Paulo kɛ mɛi krokomɛi lɛ yafo lɛlɛ kroko yɛ jɛmɛ ní kɛ amɛ baaya Roma ni ji he tuuntu ni amɛyaa lɛ. (Bɔf. 27:6) Nakai beaŋ lɛ, abele ni Romabii lɛ náa lɛ babaoo jɛɔ Egipt, ni no hewɔ lɛ, lɛji ni woɔ abele kɛjɛɔ Egipt lɛ badamɔɔ Mira. Yulio na lɛji nɛɛ ateŋ eko ni ejie asraafoi lɛ kɛ gboklɛfoi lɛ ewo mli. Ekã shi faŋŋ akɛ lɛlɛ nɛɛ da fe nɔ ni amɛta mli kɛba lɛ. Ewo abele babaoo, ni ewo mɛi 276—amlakui, asraafoi, gboklɛfoi, kɛ ekolɛ mɛi komɛi ni miifã gbɛ kɛmiiya Roma—hu kɛfata he. Eyɛ faŋŋ akɛ lɛlɛ ní atsake nɛɛ ha Paulo ná mɛi babaoo ní ebaashiɛ etsɔɔ amɛ, ni ŋwanejee ko bɛ he akɛ ekɛ nakai hegbɛ lɛ tsu nii.

8 No sɛɛ lɛ, lɛlɛ lɛ yadamɔ Knido ni yɔɔ Asia Bibioo lɛ wuoyi-anaigbɛ kwraa lɛ. Kɛ́ kɔɔyɔɔ kpakpa miitswa lɛ, abaanyɛ akɛ lɛlɛ afã nakai gbɛ lɛ gbi kome pɛ. Ni kɛlɛ, Luka bɔ amaniɛ akɛ ‘amɛnyiɛ blɛoo gbii pii, ni ekpakpa ko dani amɛyashɛ Knido ŋɛlɛ nɔ.’ (Bɔf. 27:7a) Kɔɔyɔɔ lɛ eha gbɛfãa lɛ miijara. (Kwɛmɔ akrabatsa ni ji  “Kɔɔyɔɔ ni Tswaa Kɛkpeɔ Mɔ yɛ Mediteranea Ŋshɔ lɛ Hiɛ,” ni yɔɔ baafa 208 lɛ.) Susumɔ bɔ ni mɛi ni yɔɔ lɛlɛ lɛ mli lɛ baafee amɛnii amɛha beni lɛlɛ lɛ kpeɔ kɔɔyɔɔ ni naa wa, ní ŋshɔ lɛ hu efee hamahama lɛ he okwɛ.

“Ahum lɛ Tswaa Wɔ Basabasa Naakpa” (Bɔfoi lɛ Asaji 27:7b-26)

9, 10. Mɛɛ naagbai ba yɛ Kreta niiaŋ?

9 Lɛlɛ kudɔɔtsɛ lɛ to eyiŋ akɛ amɛbaatsa gbɛfãa lɛ nɔ kɛjɛ Knido kɛya anaigbɛ, shi Luka ni na nɔ ni tee nɔ lɛ bɔ amaniɛ akɛ “kɔɔyɔɔ lɛ eŋmɛɛɛ wɔ gbɛ.” (Bɔf. 27:7b) Beni lɛlɛ lɛ bɔi ŋshɔ lɛ kwɔɔ lɛ, ŋshɔkei lɛ ŋmɛ, kɛkɛ ni kooyi-anaigbɛ ahum ko ni naa wa kpala lɛlɛ lɛ kɛtee wuoyigbɛ, ni eeenyɛ efee akɛ no mli lɛ lɛlɛ lɛ hiɛ foi waa. Mra mli lɛ Kipro ŋshɔkpɔ lɛ haaa kɔɔyɔɔ lɛ naa awa tsɔ aha lɛlɛ lɛ, ni nakai nɔŋŋ Kreta ŋshɔkpɔ lɛ hu fee agbɛnɛ. Beni lɛlɛ lɛ ho Salmone tɛsaa lɛ he yɛ Kreta bokagbɛ kwraa lɛ, nibii bahi fioo agbɛnɛ. Mɛni ha ebalɛ nakai? Akɛni lɛlɛ lɛ yaje ŋshɔkpɔ lɛ wuoyigbɛ hewɔ lɛ, kɔɔyɔɔ lɛ naa waaa tsɔ. Kwɛ bɔ ni mɛi ni yɔɔ lɛlɛ lɛ mli lɛ atsui baanyɔ amɛmli aha—yɛ shishijee mli! Shi lɛlɛ lɛ kã he eyɛ ŋshɔ lɛ hiɛ, ni amlakui lɛ le akɛ fɛ̃ibe lɛ miihe ashɛ. Amɛtsui enyɔko amɛmli jogbaŋŋ.

10 Luka tsɔɔ nɔ tuuntu ni nyiɛ sɛɛ kɛba: ‘Ekpakpa ko dani wɔfoŋ yɛ Kreta kɛba he ko ni atsɛ́ɔ jɛi akɛ Lɛjiadaamɔhe Fɛfɛo lɛ.’ Eyɛ mli akɛ amɛbɛŋkɛ kpete moŋ, shi amɛnaaa lɛ mlɛo akɛ amɛaakudɔ lɛlɛ lɛ. Shi yɛ naagbee mli lɛ, amɛŋmɛ sɛkɛ yɛ ble bibioo ko mli, ni asusuɔ akɛ ble nɛɛ kã he ni ŋshɔkpɔ lɛ dɔɔ kɛyaa kooyigbɛ lɛ tuuntu. Be enyiɛ amɛye yɛ jɛi? Luka tsɔɔ akɛ amɛye “be pii,” shi kɛlɛ amɛbɛ be tsɔ. Yɛ September kɛ October mli lɛ, ŋshɔ hiɛ gbɛfãa yɛ oshara waa.—Bɔf. 27:8, 9.

11. Mɛɛ ŋaa Paulo wo mɛi ni ekɛta lɛlɛ lɛ mli lɛ, ni kɛlɛ mɛɛ yiŋ amɛkpɛ?

11 Akɛni Paulo efã gbɛ kɛtsɔ Mediteranea Ŋshɔ lɛ hiɛ aahu hewɔ lɛ, ekolɛ gbɛfalɔi lɛ ekomɛi bi lɛ ŋaawoo. Paulo wo ŋaa akɛ esaaa akɛ atsa gbɛfãa lɛ nɔ. Kɛ́ atsa gbɛfãa lɛ nɔ lɛ, no lɛ “amanehulu kɛ nilaajemɔ pii”  baaba, ni ekolɛ mɛi komɛi po baagboi. Shi kudɔɔtsɛ lɛ kɛ lɛlɛtsɛ lɛ miisumɔ ni atsa gbɛfãa lɛ nɔ, ekolɛ akɛni amɛnu he akɛ ehe miihia waa ni amɛyadamɔ he ko ni yɔɔ shweshweeshwe lɛ hewɔ. Amɛkɔne Yulio yiŋ, ni amɛteŋ mɛi pii wo ŋaa akɛ afã yɛ jɛi kɛshãra ŋshɔkpɔ lɛ ákɛ aaanyɛ ashɛ Foinike lɛjiadaamɔhe ni kã amɛhiɛ shɔŋŋ lɛ lo. Ekolɛ nakai lɛjiadaamɔhe lɛ da, ni esa jogbaŋŋ bɔ ni aaanyɛ aye fɛ̃ibe lɛ yɛ jɛi. No hewɔ lɛ, beni wuoyigbɛ kɔɔyɔɔ nyarakee ko tswa lɛ, elaka amɛ ni amɛyi mli.—Bɔf. 27:10-13.

12. Beni lɛlɛ lɛ shi Kreta lɛ, mɛɛ osharai amɛkɛkpe, ni mɛni amlakui lɛ fee bɔni afee ni amɛhiɛ akakpata?

12 Etsɛɛɛ kɛkɛ ni amɛnaagba lɛ mli wo wu: kooyi-boka “ahum” ko ni naa wa fã bakpee amɛ. Beni amɛyaje ‘ŋshɔkpɔ fioo ko ni atsɛ́ɔ lɛ Kauda’ ní kɛ Lɛjiadaamɔhe Fɛfɛo lɛ jekɛmɔ aaafee kilomitai 65 lɛ sɛɛ lɛ, nibii hi fioo. Shi loloolo lɛ, lɛlɛ lɛ baanyɛ akpala kɛya wuoyigbɛ ní eyagbee Afrika ŋshɔ lɛ naa shia futufutu lɛ mli. Akɛni amlakui lɛ sumɔɔɔ ni ebalɛ nakai hewɔ lɛ, amɛkɛ hiŋmɛitsuu gbala lɛlɛ bibioo ni afĩ awo lɛlɛ lɛ he lɛ amɛwo lɛlɛ lɛ mli. Amɛkɛ hejaramɔ fee enɛ, ejaakɛ nu eyi lɛlɛ bibioo lɛ tɔ. No sɛɛ lɛ, amɛgbo deŋme ni amɛkɛ kpãi kɛ dadei tsɔmɔ lɛlɛ ni amɛta mli lɛ shishi kɛfimɔ ŋmoŋmoloi ni akɛkpɛ lɛlɛ lɛ koni ekagbɛ. Amɛkpa teŋgbɛ abalaa lɛ, ni amɛkɛ hejaramɔ kudɔ lɛlɛ lɛ kɛkpee kɔɔyɔɔ lɛ koni amɛtsɔ ahum lɛ mli. Susumɔ bɔ ni niiashikpamɔ nɛɛ baaha amɛtsui afã lɛ he okwɛ! Ni kɛlɛ, nibii ni amɛfee nɛɛ fɛɛ yeee ebuaaa amɛ, ejaakɛ ‘ahum lɛ tee nɔ etswa’ lɛlɛ lɛ “basabasa naakpa.” Gbi ni ji etɛ lɛ nɔ lɛ, amɛjie lɛlɛ lɛ he nibii amɛshwie, bɔni afee ni lɛlɛ lɛ akashiu.—Bɔf. 27:14-19.

13. Te mɛi ni yɔɔ lɛlɛ ni Paulo ta mli lɛ fee amɛnii amɛha tɛŋŋ beni ahum lɛ tswaa lɛ?

13 Ekã shi faŋŋ akɛ amɛtsui fã waa. Shi Paulo kɛ enyɛmimɛi Kristofoi lɛ yɛ nɔmimaa akɛ amɛyi baaná wala. Mra mli lɛ Paulo ná nɔmimaa kɛjɛ Nuŋtsɔ lɛ dɛŋ akɛ ebaayaye odase yɛ Roma, ni sɛɛ mli lɛ ŋwɛi bɔfo ko ma nakai sane lɛ nɔ mi. (Bɔf. 19:21; 23:11) Ni kɛlɛ ahum lɛ tee nɔ etswa nyɔɔŋnyɔɔŋ kɛ shwaneshwane otsii enyɔ sɔŋŋ. Akɛni nugbɔnɛmɔ lɛ sɛɛ efooo, ni atatu kpii eha hulu lɛ kɛ ŋulamii lɛ ahiɛ hewɔ lɛ, kudɔɔtsɛ lɛ enaaa ehiɛgbɛ nii, ni enyɛɛɛ eyoo he gbɛ ni amɛshɛ, loo he ni amɛyaa lɛ. Efeee amɛ niyeli po. Ekã shi faŋŋ akɛ fɛ̃i, nugbɔnɛmɔ, ŋshɔ hiɛ hela, kɛ gbeyeishemɔ eha amɛdaaŋ egbo.

14, 15. (a) Beni Paulo kɛ mɛi ni kɛ lɛ yɔɔ lɛlɛ lɛ mli lɛ wieɔ lɛ, mɛni hewɔ etsĩ kɔkɔ ni ebɔ amɛ yɛ mra mli lɛ tã lɛ? (b) Mɛni wɔbaanyɛ wɔkase kɛjɛ hiɛnɔkamɔ shɛɛ sane ni Paulo kɛha lɛ mli?

14 Paulo te shi edamɔ shi. Ewie kɔkɔ ni etsɔ hiɛ ebɔ amɛ lɛ he, shi ekɛɛɛ amɛ akɛ, ‘Wɔ́ ekoŋŋ.’ Yɛ no najiaŋ lɛ, nɔ ni eba lɛ diɛŋtsɛ feɔ lɛ faŋŋ akɛ kulɛ esa akɛ amɛbo lɛ toi. Kɛkɛ ni ekɛɛ akɛ: ‘Miiwo nyɛ ŋaa akɛ nyɛná tsui; ejaakɛ nyɛteŋ mɔ ko yiwala tɔ̃ŋ, ja lɛlɛ lɛ kɛkɛ.’ (Bɔf. 27:21, 22) Ekã shi faŋŋ akɛ wiemɔi nɛɛ shɛje etoibolɔi lɛ amii waa! Paulo hu mii shɛ ehe waa akɛ Yehowa kɛ shɛɛ sane ní haa mɔ náa hiɛnɔkamɔ nɛɛ eha lɛ koni ekɛha mɛi ni yɔɔ lɛlɛ lɛ mli lɛ. Esa akɛ wɔkai akɛ Yehowa susuɔ adesa fɛɛ adesa wala  he. Esusuɔ mɔ fɛɛ mɔ he. Bɔfo Petro ŋma akɛ: ‘Yehowa sumɔɔɔ akɛ mɔ ko alaaje, shi moŋ akɛ mɛi fɛɛ atsake amɛtsui.’ (2 Pet. 3:9) Belɛ, kwɛ bɔ ni hiɛdɔɔ yɔɔ he waa akɛ wɔshiɛ Yehowa shɛɛ sane ni haa mɔ náa hiɛnɔkamɔ lɛ wɔtsɔɔ mɛi babaoo bɔ ni wɔɔnyɛ! Adesai awala ni jara wa yɛ Yehowa hiɛ lɛ yɛ oshara mli.

15 Ekã shi faŋŋ akɛ Paulo shiɛɔ ‘Nyɔŋmɔ shiwoo lɛ he hiɛnɔkamɔ lɛ’ etsɔɔ mɛi ni yɔɔ lɛlɛ lɛ mli lɛ ateŋ mɛi babaoo. (Bɔf. 26:6; Kol. 1:5) Amrɔ nɛɛ ni amɛlɛlɛ lɛ miihe ayasha shi nɛɛ, Paulo baanyɛ eha amɛná hiɛnɔkamɔ ni mli wa akɛ amɛyi baaná wala. Ekɛɛ akɛ: “Nyɔɔŋ nɛŋ lɛ Nyɔŋmɔ . . . bɔfo badamɔ mimasɛi ni ekɛɛ: Kaashe gbeyei, Paulo! ja akɛo yadamɔ Kaisare hiɛ kɛ̃; ni naa, Nyɔŋmɔ eŋɔ mɛi fɛɛ ni kɛo nyiɛ lɛlɛ lɛ mli lɛ ekeo.” Paulo wo amɛ hewalɛ akɛ: “Hewɔ lɛ nyɛnáa tsui, ataamɛi, ejaakɛ miheɔ Nyɔŋmɔ miyeɔ akɛ bɔ ni abakɛɛ mi lɛ, nakai baaba mli. Shi be fɛɛ be ni fee lɛ, wɔɔyasha ŋshɔkpɔ ko nɔ kɛ̃.”—Bɔf. 27:23-26.

“Amɛ Fɛɛ Amɛshɛ Shikpɔŋ Shweshweeshwe” (Bɔfoi lɛ Asaji 27:27-44)

“Eda Nyɔŋmɔ shi yɛ amɛ fɛɛ amɛhiɛ.”—Bɔfoi lɛ Asaji 27:35

16, 17. (a) Mɛɛ hegbɛ Paulo ná kɛsɔle, ni te enɛ ná mɛi lɛ anɔ hewalɛ eha tɛŋŋ? (b) Mɛɛ gbɛ nɔ Paulo kɔkɔbɔɔ lɛ ba mli anɔkwale?

16 Otsii enyɔ sɛɛ beni ahum lɛ ekpala lɛlɛ lɛ aaafee kilomitai 870 lɛ,  amlakui lɛ susu akɛ amɛbɛŋkɛ shikpɔŋ ko, ekolɛ akɛni amɛnu amlii agbɛɛmɔ he lɛ hewɔ. Amɛŋmɛ sɛkɛi yɛ lɛlɛ lɛ sɛɛgbɛ ní ekakplaŋ, koni amɛnyɛ amɛkudɔ lɛlɛ lɛ hiɛ kɛba shikpɔŋ gbɛ akɛ aleenɔ amɛbaanyɛ amɛkɛya kpete lo. Kɛkɛ ni amɛka akɛ amɛbaashi lɛlɛ lɛ, shi asraafoi lɛ eŋmɛɛɛ amɛ gbɛ. Paulo kɛɛ asafoiatsɛ lɛ kɛ asraafoi lɛ akɛ: “Kɛji mɛnɛɛmɛi ehiii lɛlɛ lɛ mli lɛ, no lɛ nyɛyi naŋ wala.” Beni lɛlɛ lɛ ŋmɛ fioo agbɛnɛ lɛ, Paulo kɛɛ amɛ fɛɛ akɛ amɛye nii, ni ema nɔ mi eha amɛ ekoŋŋ akɛ amɛyi baaná wala. Kɛkɛ ni Paulo ‘da Nyɔŋmɔ shi yɛ amɛ fɛɛ amɛhiɛ.’ (Bɔf. 27:31, 35) Paulo kɛ sɔlemɔ ni ejɛ etsuiŋ esɔle nɛɛ fee nɔkwɛmɔnɔ eha Luka, Aristarko, kɛ Kristofoi ni yɔɔ ŋmɛnɛ lɛ. Kɛ́ odamɔ mɛi ahiɛ oosɔle lɛ, ani osɔlemɔ lɛ woɔ amɛ hewalɛ ni eshɛjeɔ amɛ mii?

17 Beni Paulo sɔle egbe naa lɛ, “amɛ fɛɛ amɛná tsui, ni amɛ hu amɛye nii.” (Bɔf. 27:36) No sɛɛ lɛ, amɛshɛrɛ abele ni lɛlɛ lɛ ewo lɛ amɛshwie ŋshɔŋ, bɔni afee ni lɛlɛ lɛ afee huyɛhuyɛ beni amɛbɛŋkɛɔ kpete lɛ. Beni je tsɛre lɛ, amlakui lɛ folɔ sɛkɛi lɛ, amɛfɛne kudɔɔ lɛ he kpãi lɛ, ni amɛshi abalaa bibioo ko yɛ lɛlɛ lɛ hiɛgbɛ bɔni afee ni amɛnyɛ amɛkudɔ lɛlɛ lɛ kɛyasha shi. Kɛkɛ ni lɛlɛ lɛ hiɛgbɛ yatsɛkɛ shia loo ŋmɔtɔ mli, ni ŋshɔkei lɛ anaawalɛ lɛ jwara bonto lɛ, ni ji lɛlɛ lɛ sɛɛgbɛ lɛ. Asraafoi lɛ ekomɛi ka akɛ amɛbaagbe gboklɛfoi lɛ bɔni afee ni amɛteŋ mɔ ko akajo foi, shi Yulio eŋmɛɛɛ amɛ gbɛ. Efã akɛ mɔ fɛɛ mɔ asere kɛya shikpɔŋ, ni mɛi ni leee seremɔ lɛ abumɔ ŋmoŋmoloi kɛ lɛlɛ koi lɛ anɔ. Nɔ ni Paulo wie lɛ ba mli anɔkwale—mɛi 276 lɛ fɛɛ ayi ná wala. Hɛɛ, “amɛ fɛɛ amɛshɛ shikpɔŋ shweshweeshwe.” Shi mɛɛ shikpɔŋ nɔ amɛyaje nɛɛ?—Bɔf. 27:44.

“Ejurɔ Pii” (Bɔfoi lɛ Asaji 28:1-10)

18-20. Mɛɛ gbɛ nɔ Melita ŋshɔkpɔ lɛ nɔ bii lɛ fee “ejurɔ pii,” ni mɛɛ naakpɛɛ nii Nyɔŋmɔ tsɔ Paulo nɔ efee?

18 Asomoaŋ amɛyaje Melita ŋshɔkpɔ lɛ nɔ yɛ Sicily wuoyigbɛ. (Kwɛmɔ akrabatsa ni ji “ Nɛgbɛ Melita Kã?”) Ŋshɔkpɔ lɛ nɔ bii ni wieɔ maŋsɛɛ wiemɔ  lɛ fee amɛ “ejurɔ pii.” (Bɔf. 28:2) Gbɔi ni edu gbɛ kɛba amɛŋɔɔ nɛɛ ahe efɔ tsɔɔ, ni fɛ̃i eha amɛmiikpokpo, no hewɔ lɛ amɛshɛre la amɛha amɛ koni amɛwere. Eyɛ mli akɛ fɛ̃i miiye ni nugbɔ hu miinɛ moŋ, shi la lɛ ha amɛhe dɔ la. Eha naakpɛɛ nɔ ko hu ba.

19 Paulo fee nɔ ko ni mɔ fɛɛ mɔ baaná he sɛɛ. Ebua lai ŋmɛŋmɛlɛbii anaa ni ekɛwo la lɛ mli. Kɛkɛ ni shinɔ henɔ ko ni atsɛ́ɔ lɛ onaŋka je mli ekpɛtɛ enine he, ni ekɔ̃ lɛ. Melita ŋshɔkpɔ lɛ nɔ bii lɛ susu akɛ nyɔŋmɔi lɛ kɛ enɛ miigbala Paulo toi. *

20 Maŋbii ni na akɛ shinɔ lɛ kɔ̃ Paulo lɛ susu akɛ Paulo ‘aaafuufuu.’ Niiamlitaomɔ wolo ko tsɔɔ akɛ Hela wiemɔ ni akɛtsu nii yɛ biɛ lɛ ji “wiemɔ ko ni datrɛfoi kɛtsuɔ nii.” Akɛni Luka ji “tsofatsɛ ni asumɔɔ lɛ” hewɔ lɛ, ebɛ naakpɛɛ akɛ wiemɔ ni tamɔ nɛkɛ ba ejwɛŋmɔ mli oya nɔŋŋ. (Bɔf. 28:6; Kol. 4:14) Paulo hwanya shinɔ ni ebɔɔ yɔɔ emli waa lɛ ewo la lɛ mli, ni shinɔ lɛ yeee lɛ awui ko.

21. (a) Mɛni ji nibii komɛi ni Luka tsɔɔ mli fitsofitso yɛ emaniɛbɔɔ lɛ fã nɛɛ mli? (b) Mɛɛ naakpɛɛ nibii Paulo fee, ni te enɛɛmɛi ná Melitabii lɛ anɔ hewalɛ eha tɛŋŋ?

21 Nuu niiatsɛ ko ni atsɛ́ɔ lɛ Publio ni yɔɔ shikpɔji lɛ yɛ jɛi niiaŋ. Eeenyɛ efee akɛ lɛ ji Roma maŋ onukpa yɛ Melita. Luka tsɛ́ lɛ ‘ŋshɔkpɔ lɛ nɔ onukpa,’ ni sɛɛ mli lɛ ayana nibii enyɔ komɛi ní aŋmala nakai sabla lɛ nɔŋŋ ashwie nɔ yɛ Melita. Ehere Paulo kɛ enanemɛi lɛ, ni efee amɛ gbɔ gbii etɛ sɔŋŋ. Shi no mli lɛ, Publio tsɛ he miiye. Shikome ekoŋŋ lɛ, Luka tsɔɔ nibii amli fitsofitso kɛmɔ shi. Eŋma akɛ nuu lɛ ‘kã shi kɛ atridii kɛ fɔ-kɛ-lá wamɔ,’ ni tsɔɔ akɛ etsɔɔ nɔ̃ hela tuuntu ni yeɔ nuu lɛ. Paulo sɔle ni ekɛ eniji shwie nuu lɛ nɔ, ni etsá lɛ. Naakpɛɛ nii nɛɛ ná maŋbii lɛ anɔ hewalɛ waa, ni amɛkɛ mɛi krokomɛi ni he yeɔ lɛ ba ni atsá amɛ, ni amɛha Paulo kɛ enanemɛi lɛ nikeenii ni he hiaa amɛ lɛ.—Bɔf. 28:7-10.

22. (a) Te woloŋlelɔ ko wie Luka amaniɛbɔɔ ni kɔɔ gbɛ ni amɛfã kɛtee Roma lɛ he lɛ he eha tɛŋŋ? (b) Mɛni he wɔbaasusu yɛ yitso ni nyiɛ sɛɛ lɛ mli?

22 Paulo gbɛfãa lɛ he saji ni wɔsusu he nɛɛ ja jogbaŋŋ kɛmɔ shi. Woloŋlelɔ ko kɛɛ akɛ: “Luka amaniɛbɔɔ lɛ . . . ji saji ni atsɔɔ mli fitsofitso fe fɛɛ yɛ Biblia muu lɛ fɛɛ mli lɛ ateŋ ekome. Bɔ ni ewie ŋshɔ hiɛ gbɛfãa ni tee nɔ yɛ klɛŋklɛŋ afii 100 lɛ mli lɛ he lɛ ja jogbaŋŋ kɛmɔ shi, ni shihilɛi ni etsɔɔ akɛ eba yɛ Mediteranea Ŋshɔ lɛ bokagbɛ lɛ hu ja aahu” akɛ etamɔ nɔ ni beni saji lɛ miiya nɔ lɛ, no mli lɛ aaŋmala aashwie shi. Eeenyɛ efee akɛ beni Luka kɛ Paulo fãa gbɛ lɛ, no mli lɛ eeŋmala saji lɛ eeshwie shi. Kɛ́ nakai ni lɛ, gbɛfãa ni eshwɛ ni kã amɛhiɛ lɛ baaha ená hegbɛ kɛŋmala saji babaoo. Kɛ́ amɛyashɛ Roma lɛ, mɛni baaba Paulo nɔ? Nyɛhaa wɔkwɛa.

^ kk. 19 Akɛni maŋbii lɛ le onufu henɔ nɛɛ hewɔ lɛ, no tsɔɔ akɛ onaŋkai hi ŋshɔkpɔ lɛ nɔ yɛ nakai beaŋ. Ŋmɛnɛ lɛ, onaŋkai bɛ Melita. Eeenyɛ efee akɛ bɔ ni shihilɛ mli nibii etsake yɛ afii ohai abɔ ni eho lɛ amli lɛ hewɔ ebalɛ nakai. Aloo ekolɛ bɔ ni gbɔmɛi ayi efa yɛ ŋshɔkpɔ lɛ nɔ lɛ eha agbe onaŋkai lɛ fɛɛ.