Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 25

“Mikɛ Misane Lɛ Miiha Kaisare Yeli”

“Mikɛ Misane Lɛ Miiha Kaisare Yeli”

Paulo fã sanekpakpa lɛ he, ni ekɛfee nɔkwɛmɔnɔ eha wɔ

Edamɔ Bɔfoi lɛ Asaji 25:1–26:32 lɛ nɔ

1, 2. (a) Mɛɛ shihilɛi amli Paulo yaje? (b) Mɛɛ sane esa akɛ wɔbi yɛ Paulo sane lɛ ní ekɛyaha Kaisare yeli lɛ hewɔ?

BENI Paulo yɔɔ Kaisarea lɛ, hiŋmɛi hi ehe waa. Beni eku esɛɛ etee Yudea yɛ afii enyɔ ni tsɔ hiɛ lɛ mli lɛ, yɛ gbii fioo komɛi amli lɛ, kɛ́ hooo kwraa lɛ, Yudafoi lɛ ka shii etɛ sɔŋŋ akɛ amɛbaagbe lɛ. (Bɔf. 21:27-36; 23:10, 12-15, 27) Ehenyɛlɔi lɛ yeee omanye, shi loloolo lɛ amɛnijiaŋ ejeee wui. Beni Paulo yɔse akɛ abaanyɛ aŋɔ lɛ awo amɛdɛŋ ekoŋŋ lɛ, ekɛɛ Roma Amralo Festo akɛ: “Mikɛ misane lɛ miiha Kaisare yeli.”—Bɔf. 25:11.

2 Ani Yehowa fĩ yiŋ ni Paulo kpɛ akɛ ekɛ esane lɛ miiha Roma nɔyelɔ lɛ yeli lɛ sɛɛ? Akɛni wɔmiiye Nyɔŋmɔ Maŋtsɛyeli lɛ he odase kɛmiimɔ shi yɛ naagbee be nɛɛ mli hewɔ lɛ, ehe miihia waa ni wɔná sanebimɔ nɛɛ hetoo. Ehe miihia ni wɔle kɛji esa akɛ wɔkase Paulo nɔkwɛmɔnɔ lɛ, ní ‘wɔfã sanekpakpa lɛ he, ní wɔma nɔ mi.’—Fil. 1:7.

“Kaisare Kojomɔ Sɛi lɛ Hiɛ Midamɔ Nɛɛ” (Bɔfoi lɛ Asaji 25:1-12)

3, 4. (a) Mɛni hewɔ Yudafoi lɛ bi koni akɛ Paulo aba Yerusalem lɛ, ni te fee tɛŋŋ ni Paulo yi ná wala lɛ? (b) Mɛɛ gbɛ nɔ Yehowa tsɔɔ eyeɔ ebuaa etsuji ni yɔɔ ŋmɛnɛ lɛ, taakɛ eye ebua Paulo lɛ?

3 Beni Festo bɔi Yudea nɔ yeli akɛ Roma amralo lɛ sɛɛ gbii etɛ lɛ, etee Yerusalem. * Beni eyɔɔ jɛmɛ lɛ, osɔfonukpai lɛ kɛ Yudafoi lɛ anukpai lɛ bafolɔ Paulo naa amɛha lɛ akɛ etɔ̃ waa. Amɛle akɛ mɛi ni hala Festo akɛ amralo lɛ miikpa gbɛ akɛ eha toiŋjɔlɛ ahi amɛ kɛ Yudafoi lɛ fɛɛ ateŋ. No hewɔ lɛ, amɛbi koni Festo afee nɔ ko eha amɛ: Eha akɛ Paulo aba Yerusalem koni akojo lɛ yɛ jɛmɛ. Shi jwɛŋmɔ fɔŋ ko hɔ amɛnibimɔ lɛ sɛɛ. Nakai henyɛlɔi lɛ etsɔ̃ ŋaa koni kɛ́ akɛ Paulo jɛ Kaisarea kɛmiiba Yerusalem lɛ, amɛgbe lɛ. Festo kpoo amɛnibimɔ lɛ ni ekɛɛ akɛ: “Nyɛhaa nyɛteŋ hiɛnaanɔbii lɛ kɛ mi ayaa jɛi [Kaisarea], ni kɛ sane fɔŋ ko yɛ nuu lɛ he lɛ, ní amɛkɛɛ.” (Bɔf. 25:5) Enɛ ha Paulo yi ná wala ekoŋŋ.

4 Yehowa tsɔ Nuŋtsɔ Yesu Kristo nɔ ewaje Paulo yɛ kai fɛɛ ni ekɛkpe  lɛ amli. Kaimɔ akɛ Yesu kɛɛ Paulo yɛ ninaa mli akɛ: “Ha otsui anyɔ omli.” (Bɔf. 23:11) Ŋmɛnɛ lɛ, Nyɔŋmɔ tsuji hu kɛ naagbai kpeɔ, ni mɛi woɔ amɛhe gbeyei. Yehowa ejieee wɔ kɛjɛɛɛ naagba fɛɛ naagba mli, shi ehaa wɔ nilee, ni ewoɔ wɔ hewalɛ koni wɔnyɛ wɔdamɔ naa. Wɔbaanyɛ wɔkpa gbɛ akɛ be fɛɛ be lɛ wɔ-Nyɔŋmɔ ni yɔɔ suɔmɔ lɛ baaha wɔ “hewalɛ ní fá kɛteke nɔ.”—2 Kor. 4:7.

5. Te Festo tsu Paulo sane lɛ he nii eha tɛŋŋ?

5 Gbii komɛi asɛɛ lɛ, Festo ‘ho etá kojomɔ sɛi lɛ nɔ’ yɛ Kaisarea. * Paulo kɛ enaafolɔlɔi lɛ damɔ kojomɔ sɛi lɛ hiɛ. Paulo tsɔɔ akɛ amɛnaafolɔmɔi lɛ bɛ mli ni ekɛɛ akɛ: “Mitɔ̃ko Yudafoi amla ko lɛ asaŋ mitɔ̃ko sɔlemɔwe lɛ loo Kaisare nɔ.” Paulo efeko nɔ fɔŋ ko, ni no hewɔ lɛ esa akɛ aŋmɛɛ ehe. Mɛni Festo baafee? Akɛni eesumɔ ni efee nɔ ni sa Yudafoi lɛ ahiɛ hewɔ lɛ, ebi Paulo akɛ: “Oosumɔ akɛ oya Yerusalem ni miyakojoo yɛ jɛi yɛ nɛkɛ saji nɛɛ ahewɔ lo?” (Bɔf. 25:6-9) Ekã shi faŋŋ akɛ nilee bɛ sane nɛɛ mli! Kɛ́ akɛ Paulo tee Yerusalem lɛ, enaafolɔlɔi lɛ ji mɛi ni baakojo lɛ, ni bɔ fɛɛ bɔ ni fee lɛ amɛbaagbe lɛ. Yɛ nɔ najiaŋ ni Festo aaaye jalɛ sane yɛ sane nɛɛ mli lɛ, efee nɔ ni baahi aha enɔyeli lɛ. Mra mli lɛ, amralo kroko ni atsɛ́ɔ lɛ Pontio Pilato hu fee nɔ ko tamɔ nakai nɔŋŋ yɛ Yesu po gbɛfaŋ. (Yoh. 19:12-16) Ekolɛ kojolɔi ni yɔɔ ŋmɛnɛ lɛ hu baafee nakai nɔŋŋ koni amɛkɛsa nɔyelɔi ahiɛ. No hewɔ lɛ, kɛ́ aaye sane ko ni kɔɔ  Nyɔŋmɔ webii ahe yɛ saneyelihei, ni atsɔ sane hiɛ abu shi lɛ, esaaa akɛ efeɔ wɔ naakpɛɛ.

6, 7. Mɛni hewɔ Paulo kɛ esane lɛ yaha Kaisare yeli lɛ, ni mɛɛ nɔkwɛmɔnɔ ekɛ enɛ fee eha anɔkwa Kristofoi ni yɔɔ ŋmɛnɛ lɛ?

6 Yudafoi lɛ ahiɛ ni Festo sumɔɔ akɛ esa lɛ baanyɛ aha agbe Paulo. No hewɔ lɛ, Paulo kɛ hegbɛ ni eyɔɔ akɛ Romanyo lɛ tsu nii. Ekɛɛ Festo akɛ: “Kaisare kojomɔ sɛi lɛ hiɛ midamɔ nɛɛ, he ni sa akɛ akojoɔ mi yɛ lɛ; Yudafoi lɛ, mitɔ̃ko amɛnɔ, tamɔ bɔ ni ole jogbaŋŋ lɛ. . . . Mikɛ misane lɛ miiha Kaisare yeli.” Kɛ́ mɔ ko kɛɛ ekɛ esane miiha Kaisarea yeli lɛ, bei pii lɛ anyɛɛɛ afo mli. Festo ma enɛ nɔ mi ni ekɛɛ akɛ: “Ní okɛ osane lɛ eha Kaisare yeli nɛɛ, Kaisare ŋɔɔ nɔŋŋ oootee.” (Bɔf. 25:10-12) Paulo kɛ esane lɛ yaha nɔyeli hegbɛ ni fe fɛɛ lɛ yeli, ni ekɛ enɛ fee nɔkwɛmɔnɔ eha anɔkwa Kristofoi ni yɔɔ ŋmɛnɛ lɛ. Kɛ́ shitee-kɛwolɔi bɔ mɔdɛŋ akɛ ‘amɛtsɔ mla nɔ amɛye sane fɔŋ lɛ,’ Yehowa Odasefoi kɛ mla naa gbɛjianɔtoi ni yɔɔ lɛ tsuɔ nii koni amɛkɛfã sanekpakpa lɛ he. *Lala 94:20.

7 Paulo efeko efɔŋ ko, ni awo lɛ tsuŋ nɔ ni fa fe afii enyɔ, shi agbɛnɛ lɛ aha lɛ hegbɛ koni ekɛ esane lɛ aya Roma koni ayaye yɛ jɛmɛ. Shi dani ebaashi kɛya lɛ, nɔyelɔ kroko tao akɛ ena lɛ.

Kɛ́ aye wɔ sane ni ejaaa yɛ mla naa lɛ, wɔbiɔ ni akwɛ mli ekoŋŋ

‘Migbooo Toi’ (Bɔfoi lɛ Asaji 25:13–26:23)

8, 9. Mɛni hewɔ Maŋtsɛ Agripa tee Kaisarea lɛ?

8 Beni Paulo kɛɛ Festo akɛ ekɛ esane lɛ miiha Kaisare yeli lɛ, enɔ gbii komɛi asɛɛ lɛ, Maŋtsɛ Agripa kɛ enyɛmi yoo Bernike ba “amɛbaŋa” Festo akɛni awó lɛ amralo hee lɛ hewɔ. * Yɛ Romabii lɛ abeaŋ lɛ, kɛ́ awó amralo hee ko lɛ, efɔɔ kaa akɛ nɔyelɔi lɛ yaa amɛyaŋaa lɛ. Ekã shi faŋŋ akɛ Agripa miitsɔ ŋamɔ ni eyaŋa Festo lɛ nɔ eebɔ mɔdɛŋ akɛ eha naanyobɔɔ kpakpa abakã amɛ teŋ, koni amɛná he sɛɛ wɔsɛɛ.—Bɔf. 25:13.

9 Festo wie Paulo he sane etsɔɔ Agripa, ni Agripa tao akɛ ebo Paulo toi. Enɔ jetsɛremɔ lɛ, nɔyelɔi enyɔ lɛ ta kojomɔ sɛi lɛ nɔ. Shi wiemɔi ni gboklɛfonyo ni akɛ lɛ ebadamɔ amɛhiɛ lɛ baawie lɛ haŋ ayoo po akɛ amɛwula amɛhe kiŋkãa.—Bɔf. 25:22-27.

10, 11. Mɛɛ gbɛ nɔ Paulo tsɔ ejie bulɛ kpo etsɔɔ Agripa, ni mɛɛ saji ni kɔɔ Paulo tsutsu shihilɛ he eha Agripa le?

10 Paulo jɛ bulɛ mli eda Maŋtsɛ Agripa shi akɛ eha lɛ hegbɛ koni efã enaa yɛ ehiɛ, ni ekɛɛ akɛ maŋtsɛ lɛ le Yudafoi lɛ akusumii kɛ ŋwanejee saji lɛ fɛɛ jogbaŋŋ. Kɛkɛ ni Paulo wie etsutsu shihilɛ he  akɛ: “Miba mijeŋ yɛ wɔjamɔ lɛ mli kuu ni yɔɔ veveeve fe fɛɛ lɛ naa, akɛ Farisifonyo.” (Bɔf. 26:5) Beni Paulo ji Farisifonyo lɛ, ehiɛ kã nɔ akɛ Mesia lɛ baaba. Amrɔ nɛɛ ni ebatsɔ Kristofonyo lɛ, ekɛ ekãa tsɔɔ akɛ Yesu Kristo ji Mesia ní akɛ be babaoo ekpa lɛ gbɛ lɛ. Hiɛnɔkamɔ ni Paulo kɛ enaafolɔlɔi lɛ fɛɛ yɔɔ—ni ji akɛ Nyɔŋmɔ baaha shi ni ewo amɛtsɛmɛi lɛ aba mli—lɛ hewɔ akojoɔ lɛ ŋmɛnɛ gbi nɛɛ. Paulo niiamlitsɔɔmɔ nɛɛ ha Agripa shwe waa akɛ ebo nɔ ni Paulo yɔɔ kɛɛmɔ lɛ toi. *

11 Paulo wie bɔ ni tsutsu ko lɛ ewaa Kristofoi lɛ ayi waa lɛ he, ni ekɛɛ akɛ: ‘Mi diɛŋtsɛ hu efee mi akɛ esa akɛ mafee nii pii maŋɔku Yesu, Nazarenyo lɛ, gbɛ́i lɛ naa. Miye Kristo sɛɛnyiɛlɔi lɛ ahe sɛkɛ ko ni wa, ni miwaa amɛ yi kɛyaa mɛikpɔji aje tete.’ (Bɔf. 26:9-11) Jeee akɛ Paulo miiwo sane he. Mɛi babaoo le akɛ ewa Kristofoi lɛ ayi waa. (Gal. 1:13, 23) Ekolɛ Agripa bi ehe akɛ: ‘Mɛni ha nuu nɛɛ tsake?’

12, 13. (a) Te Paulo wie gbɛ nɔ ni etsɔ etsake kɛbatsɔ Kristofonyo lɛ he eha tɛŋŋ? (b) Mɛɛ gbɛ nɔ no mli lɛ Paulo ‘miifã ntia eeshi kooloi akpalamɔtso lɛ naa dade lɛ’?

12 Wiemɔi ni Paulo wie kɛnyiɛ sɛɛ lɛ ha nakai sane lɛ fee faŋŋ. Ekɛɛ akɛ: “Mifã gbɛ kɛmiiya Damasko yɛ osɔfonukpai lɛ ahewalɛ kɛ gbɛŋmɛɛ naa, ni shwane fintii, beni minyiɛ gbɛ lɛ nɔ lɛ, maŋtsɛ, mina la ko ni kpɛ́ɔ fe hulu jɛ ŋwɛi babɔle mi kɛ mɛi ni kɛ mi nyiɛ lɛ. Ni beni wɔ fɛɛ  wɔgbeegbee shi lɛ, minu gbee ko kɛ mi wie yɛ Hebri wiemɔ lɛ mli akɛ; Saul, Saul, mɛɛba owaa mi yi? Ewa hao akɛ ooofa ntia oshi kooloi akpalamɔtso lɛ naa dade lɛ. Ni mikɛɛ: Bo namɔŋ, Nuŋtsɔ? Ni Nuŋtsɔ lɛ kɛɛ: Mi Yesu ni owaa lɛ yi lɛ ni.” *Bɔf. 26:12-15.

13 Dani Paulo baana ninaa ni yɔɔ naakpɛɛ nɛɛ, no mli lɛ ‘eefa ntia eeshi kooloi akpalamɔtso lɛ naa dade lɛ’ yɛ mfonirifeemɔŋ. Kɛ́ nitsumɔ-kooloo ko miifã ntia eeshi ekpalamɔtso lɛ naa dade piɔpiɔ lɛ, ebaaye ehe awui, ni nakai nɔŋŋ akɛni no mli lɛ Paulo miite shi eewo Nyɔŋmɔ suɔmɔnaa nifeemɔ hewɔ lɛ, eeye ehe awui yɛ mumɔŋ. Yesu ni atee lɛ shi lɛ jie ehe kpo etsɔɔ Paulo beni enyiɛ gbɛ kɛmiiya Damasko, ni no ha nuu ni hiɛ tsui kpakpa shi susumɔ ni ehiɛ lɛ ejaaa lɛ tsake ejwɛŋmɔ.—Yoh. 16:1, 2.

14, 15. Mɛni Paulo wie yɛ tsakemɔi ni efee yɛ eshihilɛ mli lɛ ahe?

14 Eyɛ faŋŋ akɛ Paulo fee tsakemɔi wuji yɛ eshihilɛ mli. Beni ekɛ Agripa wieɔ lɛ ekɛɛ akɛ: “Migbooo nɛkɛ ŋwɛi kpojiemɔ lɛ nɔ toi; shi moŋ mijaje mitsɔɔ mɛi ni yɔɔ Damasko lɛ tsutsu, kɛ mɛi ni yɔɔ Yerusalem kɛ Yudea shikpɔŋ lɛ nɔ fɛɛ, kɛ jeŋmaji lɛ hu, akɛ amɛtsake amɛtsui ni amɛkpale kɛba Nyɔŋmɔ ŋɔɔ ni amɛtsu nii ni sa tsuitsakemɔ.” (Bɔf. 26:19, 20) Paulo kɛ afii babaoo etsu nitsumɔ ni Yesu Kristo kɛwo edɛŋ yɛ nakai shwane fintii ninaa lɛ mli lɛ. Mɛni jɛ mli kɛba? Mɛi ni bo sanekpakpa ni Paulo shiɛ lɛ toi lɛ tsake amɛtsui kɛjɛ jeŋba sha kɛ nibii gbohii ni amɛfeɔ lɛ ahe, ni amɛku amɛsɛɛ kɛba Nyɔŋmɔ ŋɔɔ. Amɛbatsɔmɔ maŋbii  kpakpai, amɛyeɔ mla nɔ, amɛfeee basabasa, ni amɛyeɔ amɛbuaa mɛi krokomɛi hu koni amɛhi shi nakai nɔŋŋ.

15 Shi kɛlɛ, enɛɛmɛi shiii Yudafoi ni teɔ shi amɛwoɔ Paulo lɛ kpu po. Paulo kɛɛ akɛ: “Enɛɛmɛi ahewɔ ni Yudafoi lɛ mɔ mi yɛ sɔlemɔwe lɛ ni amɛka mi gbee. Shi Nyɔŋmɔ yelikɛbuamɔ naa mikɛdamɔ shi kɛbashi ŋmɛnɛ gbi nɛɛ nɔ, ni miyeɔ odase mitsɔɔ mɛi bibii kɛ mɛi wuji nɛɛ.”—Bɔf. 26:21, 22.

16. Mɛɛ gbɛ nɔ wɔɔtsɔ wɔkase Paulo kɛ́ wɔkɛ kojolɔi kɛ nɔyelɔi miiwie wɔhemɔkɛyelii lɛ ahe?

16 Ákɛ anɔkwa Kristofoi lɛ, esa akɛ ‘daa nɛɛ wɔsaa wɔhe wɔto koni wɔfã’ wɔhemɔkɛyeli lɛ he. (1 Pet. 3:15) Kɛ́ wɔmiiwie wɔhemɔkɛyelii lɛ ahe wɔmiitsɔɔ kojolɔi kɛ nɔyelɔi lɛ, ebaafee nɔ ni sa jogbaŋŋ akɛ wɔɔkase gbɛ nɔ ni Paulo tsɔ ekɛ Agripa kɛ Festo wie lɛ. Kɛ́ wɔjɛ bulɛ mli wɔha amɛle bɔ ni Biblia mli anɔkwalei lɛ etsake wɔshihilɛ jogbaŋŋ—wɔ diɛŋtsɛ wɔshihilɛ kɛ mɛi ni kpɛlɛɔ wɔshɛɛ sane lɛ nɔ lɛ hu anɔ̃ lɛ—ekolɛ ebaakanya kojolɔi kɛ maŋ nɔyelɔi nɛɛ atsui.

 “Shwɛ Fioo ni Oha Miyiŋ Atsɔ ni Matsɔ Kristofonyo” (Bɔfoi lɛ Asaji 26:24-32)

17. Te Festo fee enii yɛ wiemɔi ni Paulo kɛfã ehe lɛ he eha tɛŋŋ, ni mɛɛ su ni tamɔ nakai nɔŋŋ mɛi jieɔ lɛ kpo ŋmɛnɛ?

17 Beni nɔyelɔi enyɔ lɛ boɔ Paulo wiemɔi ni kɔneɔ mɔ yiŋ lɛ atoi lɛ, ená amɛnɔ hewalɛ waa. Kadimɔ nɔ ni nyiɛ sɛɛ kɛba lɛ: “Ni beni Paulo jie enaa nɛkɛ lɛ, Festo kɛ gbee walɛ kɛɛ: Paulo, sɛkɛ oyeɔ nɛɛ! Woloŋkasemɔ sɔŋŋ eha oyeɔ sɛkɛ nɛɛ.” (Bɔf. 26:24) Ŋmɛnɛ lɛ, mɛi babaoo feɔ amɛ nii tamɔ bɔ ni Festo fee lɛ nɔŋŋ. Mɛi babaoo buɔ mɛi ni tsɔɔ nɔ ni Biblia lɛ kɛɔ diɛŋtsɛ lɛ akɛ amɛye sɛkɛ. Bei pii lɛ ewaa kɛhaa mɛi ni abuɔ amɛ yɛ je lɛŋ akɛ amɛji nilelɔi lɛ akɛ amɛaakpɛlɛ Biblia mli tsɔɔmɔ ni kɔɔ gbohiiashitee he lɛ nɔ.

18. Mɛɛ hetoo Paulo ha Festo, ni te no ha Agripa fee enii eha tɛŋŋ?

18 Shi Paulo ha amralo lɛ hetoo akɛ: “Miyeko sɛkɛ, Festo jurɔ, shi anɔkwale kɛ hiɛshikamɔ wiemɔi miwieɔ nɛɛ; ejaakɛ maŋtsɛ lɛ ni miwieɔ ekãa naa mitsɔɔ lɛ nɛɛ le saji nɛɛ amli . . . Nto oheɔ gbalɔi lɛ oyeɔ, maŋtsɛ Agripa? Mile akɛ oheɔ oyeɔ.” Agripa to he eha Paulo akɛ: “Shwɛ fioo ni oha miyiŋ atsɔ ni matsɔ Kristofonyo.” (Bɔf. 26:25-28) Agripa wie kɛjɛ etsuiŋ jio, jeee etsuiŋ ejɛ ewie jio lɛ, nɔ ni ewie nɛɛ tsɔɔ akɛ Paulo odaseyeli lɛ ná enɔ hewalɛ waa.

19. Mɛɛ yiŋ Festo kɛ Agripa kpɛ yɛ Paulo he?

19 Kɛkɛ ni Agripa kɛ Festo te shi amɛdamɔ shi kɛtsɔɔ ákɛ, amɛkpa sɛi. “Amɛtee afã ni amɛyawie yɛ amɛteŋ akɛ: Nuu nɛɛ efeko nɔ ko ni sa gbele loo tsuŋwoo. Ni Agripa kɛɛ Festo akɛ: Eji nuu nɛɛ eŋɔko esane lɛ ehako Kaisare yeli kulɛ, aaanyɛ ehe aŋmɛɛ.” (Bɔf. 26:31, 32) Amɛle akɛ nuu ni badamɔ amɛhiɛ lɛ yeee fɔ́. Ekolɛ kɛjɛ nakai beaŋ kɛyaa lɛ, amɛbaaná Kristofoi lɛ ahe jwɛŋmɔ kpakpa.

20. Mɛni jɛ maŋ onukpai ni Paulo ye amɛ odase lɛ mli kɛba?

20 Nɔyelɔi ni yɔɔ hewalɛ waa ni awie amɛhe yɛ amaniɛbɔɔ nɛɛ mli lɛ ateŋ mɔ ko ekpɛlɛɛɛ Nyɔŋmɔ Maŋtsɛyeli lɛ he sanekpakpa lɛ nɔ. Ani nilee yɛ mli akɛ bɔfo Paulo yapue yɛ nakai hii lɛ ahiɛ? Hɛɛ, nilee yɛ mli. ‘Kpalamɔ ni akpala Paulo kɛtee maŋtsɛmɛi kɛ lumɛi ahiɛ’ yɛ Yudea lɛ ha aye Roma maŋ onukpai ní kulɛ nine nyɛŋ ashɛ amɛnɔ lɛ odase. (Luka 21:12, 13) Kɛfata he lɛ, shihilɛi ni etsɔ mli lɛ kɛ anɔkwa ni eye yɛ kai amli lɛ wo enyɛmimɛi hii kɛ yei Kristofoi lɛ hewalɛ.—Fil. 1:12-14.

21. Kɛ́ wɔtee nɔ wɔmia wɔhiɛ yɛ Maŋtsɛyeli shiɛmɔ nitsumɔ lɛ mli lɛ, mɛɛ yibii kpakpai ebaanyɛ ewo?

21 Nakai nɔŋŋ eji ŋmɛnɛ. Kɛ́ wɔtee nɔ wɔmia wɔhiɛ yɛ Maŋtsɛyeli shiɛmɔ nitsumɔ lɛ mli yɛ kai kɛ shitee-kɛwoi ni wɔkɛkpeɔ lɛ fɛɛ sɛɛ lɛ, ebaanyɛ ewo yibii kpakpai. Ekolɛ wɔbaaye maŋ onukpai ní kulɛ ebaawa akɛ nine aaashɛ amɛnɔ lɛ odase. Anɔkwayeli ni wɔkɛmiaa wɔhiɛ lɛ baanyɛ awo wɔnyɛmimɛi hii kɛ yei Kristofoi lɛ hewalɛ, ni ebaatsirɛ amɛ koni amɛkɛ ekãa aye Nyɔŋmɔ Maŋtsɛyeli lɛ he odase kɛmɔ shi fe tsutsu lɛ.

^ kk. 3 Kwɛmɔ akrabatsa ni ji  “Roma Amralo Porkio Festo,” ni yɔɔ baafa 199 lɛ.

^ kk. 5 “Kojomɔ sɛi lɛ” ji sɛi ko ni akɛmã kpoku ko nɔ. Kpoku lɛ nɔ ni emã lɛ tsɔɔ akɛ bɔ ni mɔ ni ta nɔ lɛ baabua sane lɛ eha lɛ, no ji naagbee, ni esa akɛ mɔ fɛɛ mɔ kɛtsu nii. Beni Pilato kojoɔ Yesu yɛ saji ni akɛfolɔ enaa lɛ ahewɔ lɛ, eta kojomɔ sɛi nɔ.

^ kk. 6 Kwɛmɔ akrabatsa ni ji  “Ŋmɛnɛŋmɛnɛ Beaŋ Anɔkwa Jamɔ He Saji ni Aye,” ni yɔɔ baafa 200 lɛ.

^ kk. 8 Kwɛmɔ akrabatsa ni ji  “Maŋtsɛ Herode Agripa II,” ni yɔɔ baafa 201 lɛ.

^ kk. 10 Akɛni Paulo ji Kristofonyo hewɔ lɛ, ekpɛlɛ Yesu nɔ akɛ lɛ ji Mesia lɛ. Yudafoi ni kpoo Yesu lɛ na Paulo akɛ eji hemɔkɛyeli kwalɔ.—Bɔf. 21:21, 27, 28.

^ kk. 12 Biblia he nilelɔ ko wie Paulo wiemɔ akɛ eefã gbɛ “shwane fintii” lɛ he akɛ: “Gbɛfalɔ jɔɔ ehe shwane fintii, ni ja ehe miitswa shi waa akɛ eyafee nɔ ko dani enyiɛɔ nakai ŋmɛlɛtswaa lɛ. Enɛ haa wɔnaa akɛ Paulo kɛ hiɛdɔɔ kpele miiya eyawa [Kristofoi] lɛ ayi.”