Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 24

“Ha Otsui Anyɔ Omli!”

“Ha Otsui Anyɔ Omli!”

Yudafoi lɛ kpaŋ koni amɛgbe Paulo shi eyabaaa nɔ, ni eyajie enaa etsɔɔ Felike

Edamɔ Bɔfoi lɛ Asaji 23:11–24:27 lɛ nɔ

1, 2. Mɛni hewɔ Paulo hiɛ efeee lɛ yaa akɛ ekɛ yiwaa miikpe yɛ Yerusalem lɛ?

ASHƆ̃ Paulo kɛjɛ mɛi fɔji asafo yuu ko dɛŋ yɛ Yerusalem, ni ayawo lɛ tsuŋ shikome ekoŋŋ. Bɔfo ni yɔɔ ekãa nɛɛ hiɛ efeee lɛ yaa akɛ ekɛ yiwaa miikpe yɛ Yerusalem. Atsɔ hiɛ akɛɛ lɛ akɛ ekɛ “kpãi kɛ amanehului” baakpe yɛ maŋ nɛɛ mli. (Bɔf. 20:22, 23) Ni eyɛ mli akɛ Paulo leee nɔ̃ tuuntu ni baaba enɔ moŋ, shi ele akɛ ebaaya nɔ ena amanehulu yɛ Yesu gbɛ́i lɛ hewɔ.—Bɔf. 9:16.

2 Kristofoi ni ji gbalɔi po ebɔ Paulo kɔkɔ akɛ abaafimɔ lɛ ni abaaŋɔ lɛ awo “jeŋmajiaŋbii lɛ adɛŋ.” (Bɔf. 21:4, 10, 11) Etsɛko tsɔ ni Yudafoi asafo yuu ko tao akɛ amɛgbe lɛ, ni no sɛɛ etsɛɛɛ lɛ, shwɛ fioo ni Akuashɔŋ lɛ ‘atserɛ Paulo mli’ beni amɛtaa saji anaa yɛ ehewɔ lɛ. Amrɔ nɛɛ Roma asraafoi lɛ ewo Paulo tsuŋ, ni etsɛŋ ni ekɛ kai srɔtoi baakpe ni abaafolɔ enaa hu kɛfata he. (Bɔf. 21:31; 23:10) Ekã shi faŋŋ akɛ ehe miihia ni awo bɔfo Paulo hewalɛ ní ashɛje emii!

3. Nɛgbɛ wɔnine shɛɔ hewalɛwoo kɛ miishɛjemɔ nɔ kɛjɛɔ koni wɔya nɔ wɔtsu wɔshiɛmɔ nitsumɔ lɛ?

3 Yɛ naagbee be nɛɛ mli lɛ, wɔle akɛ “mɛi fɛɛ hu ni taoɔ akɛ amɛaahi shi yɛ Nyɔŋmɔjamɔ naa yɛ Kristo Yesu mli lɛ, aaawa amɛyi.” (2 Tim. 3:12) Yɛ be kɛ beaŋ lɛ, hewalɛwoo kɛ miishɛjemɔ he baahia wɔ hu koni wɔya nɔ wɔtsu wɔshiɛmɔ nitsumɔ lɛ. Kwɛ bɔ ni wɔhiɛ sɔɔ jogbaŋŋ akɛ “tsulɔ anɔkwafo kɛ nilelɔ” kuu lɛ tsɔɔ asafo lɛ woji kɛ kpeei ní amɛtoɔ he gbɛjianɔ lɛ anɔ amɛwoɔ wɔ hewalɛ ni amɛshɛjeɔ wɔ mii yɛ be ni sa mli! (Mat. 24:45) Yehowa ema nɔ mi eha wɔ akɛ mɛi ni teɔ shi amɛwoɔ sanekpakpa lɛ yeŋ omanye kɔkɔɔkɔ. Amɛnyɛŋ amɛkpata ewebii lɛ ahiɛ akɛ kuu kɔkɔɔkɔ, ni amɛnyɛŋ amɛtsĩ amɛshiɛmɔ nitsumɔ lɛ hu naa. (Yes. 54:17; Yer. 1:19) Ni bɔfo Paulo hu? Ani awo lɛ hewalɛ koni eya nɔ eye odase kɛmɔ shi yɛ shitee-kɛwoo fɛɛ sɛɛ? Kɛ́ nakai ni lɛ, mɛɛ gbɛ nɔ atsɔ awo lɛ hewalɛ ni ashɛje emii, ni te efee enii yɛ he eha tɛŋŋ?

‘Kpaŋmɔ kɛ Kitakamɔ’ lɛ Yeee Omanye (Bɔfoi lɛ Asaji 23:11-34)

4, 5. Mɛɛ hewalɛwoo kɛ miishɛjemɔ Paulo nine shɛ nɔ, ni mɛni hewɔ enɛ ba yɛ be naa lɛ?

4 Beni ashɔ̃ bɔfo Paulo kɛjɛ Akuashɔŋ lɛ dɛŋ lɛ, awo lɛ hewalɛ ni  ashɛje emii waa nakai nyɔŋ lɛ. Amaniɛbɔɔ ni ajɛ mumɔŋ aŋma lɛ kɛɔ akɛ: “Nuŋtsɔ lɛ badamɔ emasɛi ni ekɛɛ: Paulo, ha otsui anyɔ omli, ejaakɛ bɔ ni oye mihe odase yɛ Yerusalem nɛɛ, ja oyaye odase nakai nɔŋŋ yɛ Roma hu.” (Bɔf. 23:11) Yesu hewalɛwoo wiemɔi nɛɛ ha Paulo ná nɔmimaa akɛ abaahere eyiwala. Ená ele akɛ eyi baaná wala ni ebaaya eyashɛ Roma, ni ebaaná hegbɛ kɛye Yesu he odase yɛ jɛmɛ.

“Amɛteŋ mɛi fe nyɔŋmai ejwɛ ewo lɛ ká.”—Bɔfoi lɛ Asaji 23:21

5 Hewalɛwoo kɛ miishɛjemɔ ni Paulo nine shɛ nɔ lɛ ba yɛ be naa. Enɔ jetsɛremɔ lɛ, Yudafoi ni fa fe 40 “kpaŋ, ni amɛkamɔ amɛhe kitãi akɛ amɛyeŋ nii ni asaŋ amɛnuŋ nɔ ko ja amɛgbe Paulo dã.” Kpaŋ ni Yudafoi nɛɛ ‘kpaŋ kɛ kitã ni amɛkamɔ amɛhe’ nɛɛ tsɔɔ akɛ amɛtswa amɛfai shi waa akɛ amɛbaagbe Paulo. Amɛnu he akɛ kɛ́ amɛnyɛɛɛ amɛtsu amɛkpaŋmɔ lɛ he nii lɛ, loomɔ kã amɛnɔ. (Bɔf. 23:12-15) Ŋaa ni amɛtsɔ̃ ji akɛ osɔfonukpai lɛ kɛ maŋ onukpai lɛ aha akɛ Paulo aku sɛɛ kɛba Akuashɔŋ lɛ hiɛ tamɔ ákɛ esane lɛ mli abaa abatao fitsofitso. Shi kɛ́ akɛ Paulo miiba lɛ, ŋaatsɔlɔi lɛ baawo ká ni amɛbaatũ amɛyi enɔ koni amɛgbe lɛ. Osɔfonukpai lɛ kɛ maŋ onukpai lɛ kpɛlɛ ŋaatsɔɔ nɛɛ nɔ.

6. Te fee tɛŋŋ ni Paulo ná ele ŋaa ni atsɔ̃ akɛ abaagbe lɛ lɛ, ni mɛni oblahii kɛ oblayei ni yɔɔ ŋmɛnɛ lɛ baanyɛ akase kɛjɛ sane nɛɛ mli?

6 Shi Paulo nyɛmi yoo bi ko nu ŋaatsɔɔ nɛɛ he ni eyawó Paulo toi nɔ. Kɛkɛ ni Paulo ha oblanyo lɛ yabɔ Roma asafoiatsɛnukpa Klaudio Lisia. (Bɔf. 23:16-22) Ekã shi faŋŋ akɛ Yehowa sumɔɔ oblahii kɛ oblayei ni tamɔ Paulo nyɛmi yoo bi ní atsiii egbɛ́i tã nɛɛ, ní fooo amɛ diɛŋtsɛ amɛnɔ̃ mli shi moŋ amɛfeɔ ekãa ni amɛkɛ Nyɔŋmɔ webii lɛ ahilɛ-kɛhamɔ yeɔ klɛŋklɛŋ gbɛhe, ni amɛkɛ anɔkwayeli feɔ nɔ fɛɛ nɔ ni amɛbaanyɛ koni Maŋtsɛyeli lɛ he nibii aya hiɛ lɛ.

7, 8. Mɛni Klaudio Lisia fee koni akaye Paulo awui?

7 Beni Klaudio Lisia ni kwɛɔ asraafoi 1,000 nɔ lɛ nu ŋaa ni atsɔ̃ yɛ Paulo he lɛ, amrɔ nɔŋŋ ni efã akɛ asaa bulɔi 470—asraafoi, akplɔiatsɛmɛi, kɛ okpɔŋɔiatsɛmɛi—koni amɛkɛ Paulo ashi Yerusalem nakai gbɛkɛ lɛ nɔŋŋ kɛya Kaisarea shweshweeshwe. Kɛ́ amɛshɛ jɛmɛ lɛ, amɛkɛ Paulo baaha Amralo Felike. * Eyɛ mli akɛ Yudafoi saŋŋ yɛ Kaisarea, ni ji he ni Romabii lɛ jɛɔ amɛkwraa Yudea lɛ moŋ, shi maŋbii ni yɔɔ jɛmɛ lɛ ateŋ tsiimɔ ji Jeŋmajiaŋbii. Toiŋjɔlɛ yɛ Kaisarea, ni jɛmɛ tamɔɔɔ Yerusalem, he ni mɛi babaoo feɔ basabasa, ní amɛsumɔɔɔ jamɔi krokomɛi amlibii hu lɛ. Roma asraafoi ni yɔɔ Yudea lɛ anitsumɔhe yitso ni fe fɛɛ lɛ hu yɛ Kaisarea.

8 Yɛ Roma mla hewɔ lɛ, Lisia ŋma wolo eha Felike ni etsɔɔ lɛ sane lɛ naa. Lisia kɛɛ akɛ beni ená ele akɛ Romanyo ji Paulo lɛ, eyashɔ̃ lɛ yɛ  Yudafoi lɛ adɛŋ koni ‘amɛkagbe lɛ.’ Lisia ŋma akɛ enaaa nɔ ko yɛ Paulo he ni tsɔɔ akɛ ‘esa gbele loo tsuŋwoo,’ shi akɛni awo Paulo he ká hewɔ lɛ, ekɛ lɛ miiha Felike bɔni afee ni Felike abo naafolɔlɔi lɛ atoi ní ebua sane lɛ.—Bɔf. 23:25-30.

9. (a) Mɛɛ gbɛ nɔ atɔ̃ mla naa hegbɛi ni Paulo yɔɔ ákɛ Romanyo lɛ nɔ? (b) Mɛni hewɔ wɔbaanyɛ wɔkɛ mla naa hegbɛi ni wɔyɔɔ akɛ maŋbii lɛ atsu nii lɛ?

9 Ani nibii ni Lisia ŋmala lɛ yɛ mli anɔkwale? Jeee fɛɛ. Etamɔ nɔ ni eesumɔ ní ana lɛ akɛ eji amralo kpakpa. Jeee le ni ená ele akɛ Paulo ji Romanyo hewɔ eyashɔ̃ lɛ kɛjɛ Yudafoi lɛ adɛŋ. Agbɛnɛ hu, Lisia etsĩii tã akɛ eha ‘awo Paulo kɔsɔŋkɔsɔi enyɔ,’ ni ákɛ sɛɛ mli lɛ efã akɛ “aŋɔ kpelebii atao eyitsoŋ.” (Bɔf. 21:30-34; 22:24-29) No hewɔ lɛ, Lisia tɔ̃ mla naa hegbɛi ni Paulo yɔɔ ákɛ Romanyo lɛ nɔ. Ŋmɛnɛ lɛ, Satan kɛ shitee-kɛwolɔi ni feɔ shɛii yɛ jamɔ he lɛ tsuɔ nii koni ekɛwa wɔ yi, ni abaanyɛ atɔ̃ mla naa hegbɛi ni wɔyɔɔ ákɛ maŋbii lɛ nɔ. Shi bei pii lɛ, Nyɔŋmɔ webii lɛ baanyɛ amɛkɛ mla naa hegbɛi ni amɛyɔɔ akɛ maŋbii lɛ atsu nii ní amɛbi koni mla naa gbɛjianɔtoo ni yɔɔ maŋ ni amɛyɔɔ mli lɛ abu amɛhe, taakɛ Paulo fee lɛ.

“Miná Tsuijurɔ ni Mikɛaajie Minaa” (Bɔfoi lɛ Asaji 23:35–24:21)

10. Mɛɛ saji ni yɔɔ hiɛdɔɔ waa akɛfolɔ Paulo naa?

10 Beni akɛ Paulo yashɛ Kaisarea lɛ, “aŋɔ lɛ ato Herode mɔɔ lɛŋ” kɛyashi beni enaafolɔlɔi lɛ aaajɛ Yerusalem aba. (Bɔf. 23:35) Gbii enumɔ sɛɛ lɛ, amɛbashɛ shi—Osɔfonukpa Anania, otsaamɛ ko ni atsɛ́ɔ lɛ Tertulo, kɛ maŋ onukpai komɛi. Klɛŋklɛŋ lɛ, Tertulo jie Felike yi yɛ nibii ni efeɔ ehaa Yudafoi lɛ ahewɔ, ni efee nakai koni ekɛwo eyiteŋ mlu ní ehiɛ aba nyam yɛ ehiɛ. * No sɛɛ lɛ, Tertulo kɛ sane ni kã shi lɛ lɔgɔɔɔ shi kwraa, ewie Paulo he akɛ eji “mɛi atoigbolɔ, ni etsɛ́ɔ atuatsemɔ ewoɔ Yudafoi fɛɛ ni yɔɔ shikpɔŋ muu lɛ fɛɛ nɔ lɛ mli, ni asaŋ eji Nazaremɛi akuu lɛ naa kpãa, eka sɔlemɔwe lɛ bulemɔ, ni wɔmɔ lɛ.” Yudafoi krokomɛi lɛ ‘ká mli wao ni amɛma nɔ mi akɛ saji nɛɛ yɛ mli nakai.’ (Bɔf. 24:5, 6, 9) Ákɛ mɔ ko aaamu atuatsemɔ mumɔ ewo mɛi amli, enyiɛ kuu ko ni he yɔɔ oshara hiɛ, ni ebule sɔlemɔwe lɛ—ji naafolɔmɔi ni yɔɔ hiɛdɔɔ waa ní abaanyɛ adamɔ nɔ agbe lɛ.

11, 12. Mɛɛ gbɛ nɔ Paulo ha ana faŋŋ akɛ saji ni akɛfolɔɔ enaa lɛ bɛ mli?

11 No sɛɛ lɛ, aŋmɛ Paulo gbɛ koni ewie. Eje shishi akɛ: “Miná tsuijurɔ  ni mikɛaajie minaa.” Eha efee faŋŋ akɛ naafolɔmɔi lɛ bɛ mli kwrakwra. Paulo buleko sɔlemɔwe lɛ, ni asaŋ efeko nɔ ko ni tsɔɔ akɛ eewo mɛi ayiŋ koni amɛtse atua. Ekɛɛ akɛ yɛ anɔkwale mli lɛ eshi Yerusalem “afii pii” nɛ, ni agbɛnɛ lɛ eba koni ekɛ “nikeenii”—onia ni atsu aha Kristofoi ni yeɔ ohia yɛ ekolɛ hɔmɔ kɛ yiwaa hewɔ lɛ—abaha. Paulo ma nɔ mi akɛ dani ebaaya sɔlemɔwe lɛ, no mli lɛ ‘etsuu ehe’ momo, ni ákɛ ekwɛ ehe nɔ jogbaŋŋ koni ená henilee ní “sɔ̃ ko wulaaa lɛ yɛ Nyɔŋmɔ kɛ gbɔmɛi ahiɛ yɛ nibii fɛɛ mli.”—Bɔf. 24:10-13, 16-18.

12 Ni kɛlɛ, Paulo gbá mli faŋŋ ekɛɛ akɛ ejáa etsɛmɛi a-Nyɔŋmɔ lɛ yɛ “tsɔɔmɔ ni amɛtsɛ́ɔ lɛ akɛ amale tsɔɔmɔ lɛ” naa. Shi ema nɔ mi akɛ eheɔ “nibii fɛɛ ni aŋma yɛ mla lɛ kɛ gbalɔi lɛ amli lɛ” eyeɔ. Kɛfata he lɛ, etsɔɔ akɛ eyɛ hiɛnɔkamɔ akɛ “gbohiiashitee baaba, ni jalɔi kɛ mɛi ni ejaaa fɛɛ baate shi,” ni nakai hiɛnɔkamɔ lɛ nɔŋŋ enaafolɔlɔi lɛ yɔɔ. No sɛɛ lɛ, Paulo bi koni enaafolɔlɔi lɛ kɛ odaseyeli aba, ekɛɛ akɛ: “Mɛnɛɛmɛi diɛŋtsɛ po, kɛ́ amɛna sane ko ni ejaaa yɛ mihe beni midamɔ akuashɔŋ lɛ hiɛ lɛ, amɛkɛɛ; akɛ ja nɛkɛ wiemɔ kome ni beni midamɔ amɛteŋ ni mibo akɛ: Gbohiiashitee hewɔ nyɛkojoɔ mi ŋmɛnɛ gbi nɛɛ lɛ kɛkɛ.”—Bɔf. 24:14, 15, 20, 21.

13-15. Kɛ́ akɛ wɔ tee maŋ nɔyelɔi ahiɛ lɛ, mɛɛ gbɛ nɔ wɔbaanyɛ wɔkase nɔkwɛmɔnɔ kpakpa ni Paulo fee lɛ koni wɔkɛ ekãa aye odase?

13 Paulo fee nɔkwɛmɔnɔ kpakpa efɔ̃ shi eha wɔ, ni esa akɛ wɔkase lɛ kɛ́ akɛ wɔ tee maŋ nɔyelɔi ahiɛ yɛ wɔjamɔ lɛ hewɔ, ni afolɔ wɔnaa akɛ wɔmiiwo mɛi ayiŋ koni amɛtse atua, loo akɛ wɔji “jamɔ kuu ko ni he yɔɔ oshara lɛ.” Paulo ewieee wiemɔi ni bɛ mli koni ekɛwo nɔyelɔ lɛ yiteŋ mulu tamɔ bɔ ni Tertulo fee lɛ. Paulo fee kpoo, ni ejie bulɛ kpo. Ekɔlɔ  ewiemɔi lɛ jogbaŋŋ, ni ewie anɔkwale wiemɔi ni mli kã shi faŋŋ. Paulo wie akɛ ‘Yudafoi ni jɛ Asia’ ni folɔ enaa akɛ ebule sɔlemɔwe lɛ bɛ kojomɔ sɛi lɛ hiɛ, ni ákɛ yɛ mla naa lɛ, kulɛ esa ákɛ akɛ amɛ abadamɔ ehiɛ koni ebo amɛnaafolɔmɔi lɛ atoi.—Bɔf. 24:18, 19.

14 Nɔ ni sa kadimɔ waa ji akɛ Paulo tsimɔɔɔ nibii ni eheɔ eyeɔ lɛ anɔ. Eyɛ mli akɛ gbohiiashitee sane lɛ tee basabasafeemɔ shi beni edamɔ Akuashɔŋ lɛ hiɛ lɛ moŋ, shi ekɛ ekãa saa etĩ hemɔkɛyeli ni eyɔɔ akɛ abaatee gbohii ashi lɛ mli ekoŋŋ. (Bɔf. 23:6-10) Beni Paulo fãa ehe lɛ, ema gbohiiashitee he hiɛnɔkamɔ lɛ nɔ mi. Mɛni hewɔ? Ejaakɛ Paulo miiye Yesu kɛ E-shitee kɛmiijɛ gbohii ateŋ lɛ he odase—ni enɛɛmɛi ji nibii ni ehenyɛlɔi lɛ ekpɛlɛɛɛ nɔ. (Bɔf. 26:6-8, 22, 23) Hɛɛ, gbohiiashitee lɛ—titri lɛ hemɔkɛyeli yɛ Yesu kɛ eshitee lɛ mli lɛ—ji nɔ̃ tuuntu ni kɛ naataamɔ lɛ ba.

15 Taakɛ Paulo fee lɛ, wɔ hu wɔbaanyɛ wɔkɛ ekãa aye odase, ni nɔ ni Yesu kɛɛ ekaselɔi lɛ baanyɛ awo wɔ hewalɛ. Ekɛɛ amɛ akɛ: “Mɛi fɛɛ aaanyɛ nyɛ yɛ migbɛ́i ahewɔ; shi mɔ ni hiɛɔ mli kɛwulaa shi lɛ, aaahere eyiwala.” Ani esa akɛ wɔhao wɔhe akɛ mɛni wɔɔwie? Dabi, ejaakɛ Yesu ma nɔ mi eha wɔ akɛ: “Kɛ́ amɛkpala nyɛ kɛtee amɛyaha lɛ, nyɛkahaoa nyɛhe nyɛtoa yɛ nɔ ni nyɛaawie hewɔ, ni asaŋ nyɛkayea he ŋkɔmɔ; shi moŋ nɔ ni akɛaaha nyɛ yɛ nakai ŋmɛlɛtswaa lɛ nɔ lɛ, no nyɛwiea; ejaakɛ jeee nyɛ nyɛwieɔ lɛ, shi moŋ Mumɔ krɔŋkrɔŋ lɛ ni.”—Mar. 13:9-13.

“Felike She Gbeyei Pam” (Bɔfoi lɛ Asaji 24:22-27)

16, 17. (a) Te Felike ye Paulo sane lɛ eha tɛŋŋ? (b) Mɛni hewɔ ekolɛ Felike she gbeyei pam lɛ, ni kɛlɛ mɛni hewɔ eha atsɛ́ Paulo kpitiokpitio lɛ?

16 Jeee enɛ ji klɛŋklɛŋ be ni Amralo Felike nuɔ Kristofoi ahemɔkɛyelii ahe sane. Amaniɛbɔɔ lɛ kɛɛ akɛ: “Akɛni Felike le nɛkɛ tsɔɔmɔ nɛɛ [“Gbɛ nɛɛ,” NW, ni ji gbɛ́i ni akɛtsɛ́ Kristo kaselɔi lɛ dani ababɔi amɛ tsɛmɔ akɛ Kristofoi lɛ] he sane pɛpɛɛpɛ hewɔ lɛ, etsi amɛ eto, ni ekɛɛ: Kɛji asafoiatsɛnukpa Lisia ba lɛ, makwɛ nyɛsane lɛ maye. Ni efã asafoiatsɛ lɛ akɛ eŋɔ Paulo eto, ni eha ená hejɔlɛ, ni kɛ́ ehe gbɔmɛi miiba lɛ sɔɔmɔ loo saramɔ lɛ ekatsĩ amɛ gbɛ.”—Bɔf. 24:22, 23.

17 Gbii komɛi asɛɛ lɛ, Felike kɛ eŋa Drusila, ni ji Yudayoo lɛ ha akɛ Paulo ba, ni ‘amɛbo Kristo nɔ hemɔkɛyeli he sane lɛ toi.’ (Bɔf. 24:24) Shi beni Paulo wie “jalɛ kɛ henɔkwɛmɔ kɛ kojomɔ ni baaba lɛ he lɛ, Felike she gbeyei pam,” ekolɛ akɛni saji nɛɛ gba ehenilee naa yɛ nibii fɔji ni efee yɛ shihilɛ mli lɛ hewɔ. Enɛ hewɔ lɛ, eha akɛ Paulo je ehiɛ, ni ekɛɛ akɛ: “Agbɛnɛ yaa fɛɛ dã; shi kɛ́ miná mihe dekã jiŋŋ, matsɛ́o ekoŋŋ.” No sɛɛ lɛ, Felike tsɛ́ɔ Paulo kpitiokpitio, jeee akɛni eesumɔ ni ekase anɔkwale lɛ hewɔ, shi moŋ akɛni ehiɛ kã nɔ akɛ Paulo baaha lɛ shika koni eŋmɛɛ ehe lɛ hewɔ.—Bɔf. 24:25, 26.

18. Mɛni hewɔ Paulo kɛ Felike kɛ eŋa lɛ wie “jalɛ kɛ henɔkwɛmɔ kɛ kojomɔ ni baaba lɛ” he lɛ?

 18 Mɛni hewɔ Paulo kɛ Felike kɛ eŋa lɛ wie “jalɛ kɛ henɔkwɛmɔ kɛ kojomɔ ni baaba lɛ” he lɛ? Kaimɔ akɛ no mli lɛ amɛmiitao amɛle nɔ ni “Kristo nɔ hemɔkɛyeli” biɔ ni afee. Akɛni Paulo le akɛ amɛbaaa amɛjeŋ jogbaŋŋ, amɛyi wa, ni amɛyeee jalɛ sane hewɔ lɛ, eha amɛle nibii ni esa akɛ mɛi fɛɛ ni batsɔmɔɔ Yesu sɛɛnyiɛlɔi lɛ afee lɛ faŋŋ. Nɔ ni Paulo wie lɛ ha efee faŋŋ akɛ Felike kɛ eŋa lɛ ehiii shi yɛ Nyɔŋmɔ jalɛ shishitoo mlai lɛ anaa kwraa. Kulɛ esa akɛ enɛ aye abua amɛ koni amɛna akɛ adesai fɛɛ baabu amɛsusumɔi, amɛwiemɔi, kɛ amɛnifeemɔi ahe akɔntaa amɛha Nyɔŋmɔ, ni ákɛ kojomɔ ni Felike baakojo Paulo lɛ jeee nɔ ko kwraa kɛ́ akɛto kojomɔ ni Nyɔŋmɔ baakojo amɛ lɛ he. Ebɛ naakpɛɛ mɔ akɛ Felike “she gbeyei pam”!

19, 20. (a) Kɛ́ wɔmiitsu shiɛmɔ nitsumɔ lɛ, te esa akɛ wɔkɛ mɛi ni baafee tamɔ nɔ ni amɛyɛ anɔkwale lɛ he miishɛɛ shi amɛsumɔɔɔ akɛ amɛtsakeɔ amɛshihilɛ lɛ aye aha tɛŋŋ? (b) Mɛni tsɔɔ akɛ Paulo jeee Felike naanyo?

19 Beni wɔtsuɔ shiɛmɔ nitsumɔ lɛ, ekolɛ wɔbaana mɛi ni tamɔ Felike. Ekolɛ, yɛ shishijee mli lɛ amɛbaafee tamɔ nɔ ni amɛyɛ anɔkwale lɛ he miishɛɛ, shi amɛsumɔɔɔ akɛ amɛtsakeɔ amɛshihilɛ koni amɛhi shi yɛ anɔkwale lɛ naa. Esa akɛ wɔkwɛ jogbaŋŋ kɛ́ wɔmiiye wɔmiibua mɛi ni tamɔ nakai. Ni kɛlɛ wɔbaanyɛ wɔjɛ bulɛ mli wɔha amɛle Nyɔŋmɔ jalɛ shishitoo mlai lɛ taakɛ Paulo fee lɛ. Ekolɛ anɔkwale lɛ baaná amɛnɔ hewalɛ. Shi kɛ́ wɔna faŋŋ akɛ amɛsumɔɔɔ akɛ amɛtsake amɛjeŋba gbonyo lɛ, esa akɛ wɔshi amɛ ni wɔtao mɛi ni miisumɔ diɛŋtsɛ akɛ amɛle anɔkwale lɛ.

20 Wiemɔi ni nyiɛ sɛɛ nɛɛ ha ana nɔ̃ diɛŋtsɛ ni yɔɔ Felike tsui mli: “Afii enyɔ sɛɛ lɛ, Porkio Festo ba baye Felike najiaŋ; ni akɛni Felike miisumɔ akɛ efee nɔ ni sa Yudafoi lɛ ahiɛ hewɔ lɛ, eshĩ Paulo yɛ tsu lɛŋ.” (Bɔf. 24:27) Eyɛ faŋŋ akɛ Paulo jeee Felike naanyo. Felike le akɛ mɛi ni hiɔ shi yɛ “Gbɛ Lɛ” naa lɛ wooo mɛi ayiŋ akɛ amɛtse atua, ni asaŋ amɛjeee maŋjwalɔi hu. (Bɔf. 19:23, NW) Ele hu akɛ Paulo tɔ̃ko Roma mla ko nɔ. Kɛlɛ, Felike eŋmɛɛɛ Paulo he koni ‘ekɛsa Yudafoi lɛ ahiɛ.’

21. Mɛni ba Paulo nɔ beni Porkio Festo batsɔ amralo lɛ, ni mɛɛ wiemɔ tee nɔ ewo Paulo hewalɛ?

21 Bɔfoi lɛ Asaji 24:27 lɛ haa wɔleɔ akɛ beni Porkio Festo baye Felike najiaŋ akɛ amralo lɛ, no mli lɛ Paulo kã he eji gboklɛfonyo. No hewɔ lɛ, maŋ nɔyelɔi srɔtoi ye Paulo sane, ni eko nyiɛ eko sɛɛ. Hɛɛ, ‘akpala’ bɔfo ni yɔɔ ekãa nɛɛ ‘kɛtee maŋtsɛmɛi kɛ lumɛi ahiɛ.’ (Luka 21:12) Taakɛ wɔbaana yɛ sɛɛ mli lɛ, ebaaye nɔyelɔ ni yɔɔ hewalɛ fe fɛɛ yɛ ebeaŋ lɛ odase. Shi yɛ enɛɛmɛi fɛɛ amli lɛ, Paulo hemɔkɛyeli lɛ gbugbaaa kɔkɔɔkɔ. Eyɛ faŋŋ akɛ wiemɔ ni Yesu wie akɛ: “Ha otsui anyɔ omli” lɛ tee nɔ ewo Paulo hewalɛ!

^ kk. 7 Kwɛmɔ akrabatsa ni ji  “Felike—Amralo ni Yeɔ Yudea Nɔ,” ni yɔɔ baafa 193 lɛ.

^ kk. 10 Tertulo da Felike shi yɛ ‘toiŋjɔlɛ babaoo’ ni eha maŋ lɛ ená lɛ hewɔ. Shi anɔkwa sane lɛ moŋ ji akɛ, kɛyashi be mli ni Yudafoi lɛ tsé Roma hiɛ atua lɛ, Felike nɔyeli lɛ moŋ ji nɔ ni kɛ toiŋjɔlɛ baaa Yudea kwraa fe amraloi krokomɛi ni ye nɔ lɛ fɛɛ. Nɔ ni ejaaa kwraa hu ji kɛɛmɔ ni Tertulo kɛɛ akɛ Yudafoi lɛ ‘daa Felike shi babaoo’ yɛ tsakemɔi ni ekɛba lɛ ahewɔ lɛ. Yɛ anɔkwale mli lɛ, Yudafoi babaoo sumɔɔɔ Felike sane kwraa yɛ nɔ̃ ni ehaa amɛnaa, kɛ yiwalɛ gbɛ nɔ ni etsɔ eku amɛtuatsemɔi lɛ anaa lɛ hewɔ.—Bɔf. 24:2, 3.