Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 1

‘Nyɛyaa Ni Nyɛyafea Kaselɔi’

‘Nyɛyaa Ni Nyɛyafea Kaselɔi’

Bɔfoi lɛ Asaji lɛ hiɛkpamɔ kɛ bɔ ni ekɔɔ wɔgbii nɛɛ ahe

1-6. Gbaa niiashikpamɔ ko ni tsɔɔ akɛ Yehowa Odasefoi shiɛɔ yɛ shihilɛi srɔtoi babaoo amli.

YEHOWA ODASEFONYO oblayoo fioo ko ni atsɛɔ lɛ Rebecca ni yɔɔ Ghana lɛ kɛfee oti ni ma ehiɛ akɛ ebaashiɛ etsɔɔ mɛi ni yɔɔ he ni eyaa skul yɛ lɛ. Ehiɛɔ asafo lɛ woji yɛ eskul baagi lɛ mli be fɛɛ be. Kɛ́ amɛha breki lɛ, ebɔɔ mɔdɛŋ koni eye eskulbii lɛ odase. Rebecca kɛ eklasbii lɛ saŋŋ eje Biblia mli nikasemɔ shishi.

2 Gbɛgbalɔi enyɔ komɛi ni yɔɔ Madagascar ŋshɔkpɔ lɛ nɔ, ní kɛ Afrika bokagbɛ ŋshɔ lɛ naa jekɛɛɛ tsɔ lɛ fɔɔ nyiɛmɔ kilomitai 25 beni hulu miitso waa kɛyaa akrowa ko ni etse ehe banee. Amɛkɛ mɛi babaoo ni yɔɔ wiemɔ lɛ he miishɛɛ yafeɔ Biblia mli nikasemɔi yɛ jɛmɛ.

3 Odasefoi komɛi jɛ maji srɔtoi 15 anɔ amɛyafata Odasefoi ni yɔɔ Paraguay lɛ ahe kɛkpɛ lɛlɛ bɔni afee ni anyɛ ayashiɛ atsɔɔ mɛi ni yɔɔ Paraguay kɛ Paraná fai lɛ anaa lɛ. Amɛkpɛ lɛlɛ lɛ tamɔ tsũ bɔ ni mɛi 12 baanyɛ ahi mli. Maŋtsɛyeli shiɛlɔi ni yɔɔ ekãa kɛ lɛlɛ nɛɛ etsu nii ni amɛgbɛ sanekpakpa lɛ amɛshwã hei ni kulɛ anyɛŋ aya jɛmɛ.

4 Odasefoi ni yɔɔ Alaska ni ji maŋ ni yɔɔ Kooyigbɛ Shɔŋŋ lɛ ŋɔɔ hegbɛ krɛdɛɛ ko kɛshiɛɔ amɛhaa shisharalɔi ni baa jɛmɛ yɛ hulutsoo beaŋ lɛ. Kɛ́ jɛmɛ bɔi dɔɔ lɛ, meele wuji ni ewo gbɔi ni jɛ maji srɔtoi anɔ baa jɛmɛ, ni maŋbii ni ji Odasefoi lɛ yadamɔɔ he ni meelei lɛ bakpelekeɔ yɛ lɛ, ni amɛkɛ asafo lɛ woji fɛfɛji ni akala yɛ wiemɔi srɔtoi babaoo amli tsɔɔ gbɔi lɛ. Yɛ nakai kpokpaa lɛ nɔ nɔŋŋ lɛ, Odasefoi taa kɔɔyɔŋ lɛlɛ mli kɛyaa akrowai ni etse amɛhe banee lɛ amli ni amɛyashiɛɔ sanekpakpa lɛ amɛhaa mɛi ni wieɔ Aleut, Athabascan, Tsimshian, kɛ Klinket wiemɔi lɛ.

5 Odasefonyo ko ni atsɛɔ lɛ Larry, ni yɔɔ Texas, yɛ U.S.A. lɛ kɛ helatsɛmɛi akwɛmɔhe ni ji eshihilɛhe lɛ fee eshikpɔŋkuku krɛdɛɛ. Eyɛ mli akɛ Larry eka helatsɛmɛi ashwiili mli yɛ oshara ko ni ba enɔ lɛ hewɔ moŋ, shi etaaa shi efolo. Ejajeɔ Maŋtsɛyeli shɛɛ sane lɛ etsɔɔ mɛi, ni egbaa amɛ Biblia mli hiɛnɔkamɔ ni eyɔɔ akɛ kɛ́ Maŋtsɛyeli lɛ ba lɛ ebaanyiɛ ekoŋŋ lɛ.—Yes. 35:5, 6.

6 Odasefoi komɛi kɛ lɛlɛ fã gbɛ gbii etɛ kɛjɛ Mandalay kɛtee Myanmar kooyigbɛ bɔni afee ni amɛya kpee ni abaafee yɛ jɛmɛ lɛ. Akɛni amɛmiisumɔ ni amɛshiɛ sanekpakpa lɛ hewɔ lɛ, amɛhiɛ asafo lɛ woji yɛ amɛhe ni amɛkɛha gbɛfalɔi krokomɛi ni yɔɔ lɛlɛ lɛ mli lɛ. Be fɛɛ be ni lɛlɛ lɛ baawa yɛ maŋ loo akrowa ko nɔ lɛ, shiɛlɔi ni yɔɔ ekãa nɛɛ yiɔ shi, ni amɛkɛ oyaiyeli  kpaa maŋ lɛ loo akrowa lɛŋ ni amɛhaa woji. Kɛ́ Maŋtsɛyeli shiɛlɔi lɛ ku amɛ sɛɛ lɛ, amɛbaninaa mɛi hei ni ekwɔ lɛlɛ lɛ, ni amɛshiɛɔ amɛhaa amɛ hu.

7. Mɛɛ gbɛi anɔ Yehowa jálɔi tsɔɔ amɛyeɔ Nyɔŋmɔ Maŋtsɛyeli lɛ he odase, ni mɛni ji oti ni ma amɛhiɛ?

7 Nɔkwɛmɔnii fioo nɛɛ tsɔɔ akɛ, Yehowa jálɔi ni yɔɔ ekãa ni yɔɔ jeŋ fɛɛ lɛ ‘miiye Nyɔŋmɔ maŋtsɛyeli lɛ he odase kɛmiimɔ shi.’ (Bɔf. 28:23) Amɛshiɛɔ yɛ shĩa kɛ shĩa, gbɛjegbɛi ahe, kɛ agbɛnɛ hu kɛtsɔ tɛlifoŋ nɔ. Kɛ́ amɛta bɔɔsu mli jio, amɛmiishara shi jio, loo amɛyɛ nitsumɔhe ni amɛmiijɔɔ amɛhe fioo jio lɛ, amɛŋɔɔ hegbɛ fɛɛ hegbɛ ni amɛbaaná lɛ kɛshiɛɔ Nyɔŋmɔ Maŋtsɛyeli lɛ. Amɛtsɔɔ gbɛi srɔtoi anɔ amɛshiɛɔ, shi oti kometoo ma amɛhiɛ, no ji ní amɛshiɛ sanekpakpa lɛ yɛ he fɛɛ he ni amɛbaana mɛi yɛ.—Mat. 10:11.

8, 9. (a) Mɛni hewɔ Maŋtsɛyeli shiɛmɔ nitsumɔ lɛ shweremɔ lɛ yɔɔ naakpɛɛ lɛ? (b) Mɛɛ sanebimɔ esa akɛ wɔsusu he, ni mɛni esa akɛ wɔfee koni wɔná hetoo lɛ?

8 Suɔlɔ ni kaneɔ wolo nɛɛ, ani ofata Maŋtsɛyeli jajelɔi akpekpei abɔ ni amrɔ nɛɛ amɛkɛ ekãa miishiɛ yɛ shikpɔji ni fa fe 235 anɔ lɛ ahe? Kɛ́ nakai ni lɛ, belɛ ofata he ni aatsu Maŋtsɛyeli shiɛmɔ nitsumɔ ni shwereɔ yɛ gbɛ ni yɔɔ miishɛɛ nɔ lɛ! Nɔ ni atsu yɛ jeŋ fɛɛ lɛ yɛ naakpɛɛ waa. Yehowa Odasefoi kɛ gbɛtsiinii wuji kɛ naagbai kpeɔ—nɔyelii tsĩɔ amɛnaa, ni awaa amɛyi—shi fɛɛ sɛɛ lɛ amɛmiiye Nyɔŋmɔ Maŋtsɛyeli lɛ he odase amɛmiitsɔɔ mɛi yɛ jeŋmaji fɛɛ amli kɛmiimɔ shi.

9 Sanebimɔ ni esa akɛ wɔsusu he ji, Mɛni hewɔ gbɛtsiinii ko kwraa, ni shitee-kɛwoo ni Satan kɛbaa lɛ po fata he lɛ nyɛɛɛ atsĩ Maŋtsɛyeli shiɛmɔ nitsumɔ lɛ naa ni ekashwere lɛ? Bɔni afee ni wɔná hetoo lɛ, esa akɛ wɔsusu nibii ni tee nɔ yɛ klɛŋklɛŋ afii 100 Ŋ.B. lɛ ahe. Nɔ hewɔ ji akɛ, ákɛ Yehowa Odasefoi ni yɔɔ ŋmɛnɛ lɛ, wɔmiitsa nitsumɔ ni aje etsumɔ shishi yɛ nakai beaŋ lɛ nɔ.

Nitsumɔ Wulu

10. Mɛɛ nitsumɔ Yesu jɛ etsui muu fɛɛ mli etsu, ni mɛni ele yɛ nitsumɔ nɛɛ he?

10 Yesu Kristo, ni ji Kristofoi asafo lɛ Shishitolɔ lɛ jɛ etsui muu fɛɛ mli eshiɛ Nyɔŋmɔ Maŋtsɛyeli lɛ he sanekpakpa lɛ; ekɛ no fee enitsumɔ kwraa. Be ko lɛ, ekɛɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Yesu le akɛ ekome enyɛŋ egbe nitsumɔ ni eje etsumɔ shishi lɛ naa. Beni egbele lɛ bɛŋkɛɔ lɛ, egba akɛ abaashiɛ Maŋtsɛyeli shɛɛ sane lɛ “atsɔɔ jeŋmaji fɛɛ.” (Mar. 13:10) Shi te aaafee tɛŋŋ atsu nitsumɔ nɛɛ, ni namɛi baatsu?

‘Nyɛyaa ni nyɛyafea jeŋmaji fɛɛ kaselɔi.’—Mateo 28:19

11. Mɛɛ nitsumɔ wulu Yesu kɛwo ekaselɔi lɛ adɛŋ, ni mɛɛ yelikɛbuamɔ amɛbaaná kɛtsu?

11 Beni Yesu gbo ni atee lɛ shi lɛ, ejie ehe kpo etsɔɔ ekaselɔi lɛ ni ekɛ nitsumɔ wulu ko wo amɛdɛŋ akɛ: “No hewɔ lɛ nyɛyaa ni nyɛyafea jeŋmaji  fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛ́i amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyashi jeŋ naagbee lɛ.” (Mat. 28:19, 20) Wiemɔ ni ewie akɛ “mikɛ nyɛ yɛ” lɛ tsɔɔ akɛ ebaaye ebua ekaselɔi lɛ yɛ shiɛmɔ kɛ kaselɔfeemɔ nitsumɔ lɛ mli. Yelikɛbuamɔ ni tamɔ nɛkɛ he baahia amɛ, ejaakɛ Yesu gba akɛ ‘jeŋmaji fɛɛ aaanyɛ amɛ.’ (Mat. 24:9) Shi nɔ kroko hu yɛ ni baaye abua amɛ. Beni eshwɛ fioo ni Yesu baashi kɛya ŋwɛi lɛ, ekɛɛ amɛ akɛ mumɔ krɔŋkrɔŋ lɛ baaha amɛná hewalɛ kɛtsɔmɔ edasefoi “kɛyashi shikpɔŋ lɛ naagbeehei lɛ.”—Bɔf. 1:8.

12. Mɛɛ sanebimɔi ni he hiaa esa akɛ wɔná hetoi lɛ, ni mɛni hewɔ ehe hiaa waa ni wɔná hetoi lɛ?

12 Agbɛnɛ lɛ, ehe miihia ni wɔná sanebimɔi komɛi ni he hiaa waa ahetoo: Ani Yesu bɔfoi lɛ kɛ kaselɔi krokomɛi ni hi shi yɛ klɛŋklɛŋ afii 100 lɛ mli lɛ kɛ hiɛdɔɔ tsu nitsumɔ ni akɛwo amɛdɛŋ lɛ? Ani Kristofoi hii kɛ yei ni yi faaa tsɔ nɛɛ ye Nyɔŋmɔ Maŋtsɛyeli lɛ he odase kɛmɔ shi yɛ yiwaa ni naa wa waa ni amɛkɛkpe lɛ fɛɛ sɛɛ? Ani ajɛ ŋwɛi aye abua amɛ, ni Yehowa mumɔ krɔŋkrɔŋ lɛ hu fi amɛsɛɛ yɛ kaselɔfeemɔ nitsumɔ lɛ mli? Sanebimɔi nɛɛ kɛ ekrokomɛi ni tamɔ nakai lɛ ahetoi yɛ Biblia mli wolo ni ji Bɔfoi lɛ Asaji lɛ mli. Ehe miihia waa ni wɔle hetoi lɛ. Mɛni hewɔ? Yesu wo shi akɛ abaaya nɔ atsu nitsumɔ ni ekɛha akɛ atsu lɛ “kɛyashi jeŋ naagbee lɛ.” No hewɔ lɛ, esa akɛ anɔkwa Kristofoi fɛɛ, ní wɔ mɛi ni wɔyɔɔ naagbee be nɛɛ mli lɛ hu fata he lɛ atsu nitsumɔ nɛɛ. Enɛ hewɔ lɛ, wɔmiisumɔ waa ni wɔle nibii ni ba ni aŋmala yɛ Bɔfoi lɛ Asaji lɛ.

Bɔfoi lɛ Asaji lɛ Hiɛkpamɔ

13, 14. (a) Namɔ ŋma Bɔfoi lɛ Asaji lɛ, ni te efee tɛŋŋ ená saji ni eŋmala lɛ? (b) Mɛni he Bɔfoi lɛ Asaji lɛ wieɔ?

13 Namɔ ŋma Bɔfoi lɛ Asaji lɛ? Wolo lɛ diɛŋtsɛ etsĩii mɔ ko gbɛ́i tã akɛ lɛ eŋma, shi eshishijee wiemɔi lɛ feɔ lɛ faŋŋ akɛ mɔ ni ŋma Luka Sanekpakpa lɛ nɔŋŋ ŋma Bɔfoi lɛ Asaji lɛ. (Luka 1:1-4; Bɔf. 1:1, 2) No hewɔ lɛ, yɛ mra beaŋ tɔ̃ɔ lɛ, akpɛlɛ nɔ akɛ Luka, ni eji “tsofatsɛ ni asumɔɔ,” kɛ yinɔsaneŋmalɔ ni he esa waa lɛ ji mɔ ni ŋma Bɔfoi lɛ Asaji lɛ. (Kol. 4:14) Wolo lɛ wieɔ nibii ni tee nɔ, ni hé afii 28, kɛjɛ beni Yesu tee ŋwɛi yɛ afi 33 Ŋ.B. lɛ kɛyashi beni awo bɔfo Paulo tsuŋ yɛ Roma aaafee afi 61 Ŋ.B. lɛ ahe. Beni Luka ŋmaa wolo lɛ, ekɛ wiemɔ ni ji “amɛ” tsu nii, shi yɛ hei krokomɛi lɛ, wiemɔ ni ji “wɔ” ni ekɛtsu nii lɛ tsɔɔ akɛ eyɛ jɛmɛ beni nibii ni ebɔ he amaniɛ lɛ ateŋ babaoo tee nɔ lɛ. (Bɔf. 16:8-10; 20:5; 27:1) Luka ji mɔ ko ni taoɔ nibii amli fitsofitso, ni ekã shi faŋŋ akɛ Paulo, Barnaba, Filipo, kɛ mɛi krokomɛi ni etsĩ amɛgbɛ́i atã lɛ diɛŋtsɛ bɔ lɛ nibii ni eŋmala eshwie shi lɛ.

14 Mɛni he Bɔfoi lɛ Asaji lɛ wieɔ? Mra mli lɛ, Luka ŋmala nibii ni Yesu wie, kɛ nibii ni Yesu fee lɛ yɛ e-Sanekpakpa lɛ mli. Shi yɛ Bɔfoi lɛ Asaji lɛ, Luka ŋmala nibii ni Yesu sɛɛnyiɛlɔi lɛ wie kɛ nibii ni amɛfee lɛ. No hewɔ lɛ, Bɔfoi lɛ Asaji lɛ wieɔ gbɔmɛi ni tsu nitsumɔ wulu, eyɛ mli akɛ mɛi bu  akɛ “jeee woloŋlelɔi kɛ nilelɔi komɛi ji amɛ” lɛ ahe. (Bɔf. 4:13) Yɛ kukufoo mli lɛ, wolo ni ajɛ mumɔŋ aŋma nɛɛ tsɔɔ wɔ bɔ ni fee ni ato Kristofoi asafo lɛ shishi kɛ bɔ ni eshwere eha. Bɔfoi lɛ Asaji lɛ tsɔɔ wɔ bɔ ni klɛŋklɛŋ afii 100 lɛŋ Kristofoi lɛ shiɛ amɛha—gbɛi anɔ ni amɛtsɔ amɛshiɛ kɛ bɔ ni amɛtsu lɛ amɛha. (Bɔf. 4:31; 5:42) Etsɔɔ bɔ ni mumɔ krɔŋkrɔŋ lɛ ye ebua ni ashiɛ sanekpakpa lɛ yɛ hei babaoo. (Bɔf. 8:29, 39, 40; 13:1-3; 16:6; 18:24, 25) Bɔfoi lɛ Asaji lɛ gbalaa jwɛŋmɔ kɛyaa Biblia lɛ saneyitso ni kɔɔ Nyɔŋmɔ Maŋtsɛyeli ni Kristo yeɔ nɔ lɛ he lɛ nɔ, ni ehaa wɔnaa akɛ Maŋtsɛyeli shɛɛ sane lɛ shwere yɛ shitee-kɛwoo ni naa wa waa fɛɛ sɛɛ.—Bɔf. 8:12; 19:8; 28:30, 31.

15. Kɛ́ wɔpɛi Bɔfoi lɛ Asaji lɛ mli lɛ, mɛɛ gbɛi anɔ wɔbaaná he sɛɛ?

15 Eji anɔkwale akɛ kɛ́ wɔpɛi Biblia mli wolo ni ji Bɔfoi lɛ Asaji lɛ mli lɛ, ebaaha wɔná miishɛɛ, ni ebaawaje wɔhemɔkɛyeli! Kɛ́ wɔjwɛŋ ekãa kɛ hiɛdɔɔ ni Kristo mra be mli sɛɛnyiɛlɔi lɛ kɛtsu nii lɛ nɔ lɛ, ebaakanya wɔtsui. Ebaawo wɔ hewalɛ koni wɔkase wɔnyɛmimɛi ni hi shi yɛ klɛŋklɛŋ afii 100 lɛ mli lɛ ahemɔkɛyeli lɛ. No baasaa wɔ jogbaŋŋ koni wɔnyɛ wɔtsu nitsumɔ ni akɛwo wɔdɛŋ akɛ ‘wɔya ni wɔyafee kaselɔi’ lɛ. Afee wolo ni okaneɔ amrɔ nɛɛ koni eye ebua bo ni okase Bɔfoi lɛ Asaji lɛ jogbaŋŋ.

Biblia Kasemɔ Wolo ni Baaye Abua Wɔ

16. Mɛɛ yiŋtoi etɛ ahewɔ afee wolo nɛɛ?

16 Mɛni hewɔ afee wolo nɛɛ? Yiŋtoi etɛ ahewɔ ni afee wolo nɛɛ ji (1) koni eha wɔná nɔmimaa akɛ Yehowa miitsɔ emumɔ krɔŋkrɔŋ lɛ nɔ eefi Maŋtsɛyeli shiɛmɔ nitsumɔ kɛ kaselɔfeemɔ nitsumɔ lɛ sɛɛ, (2) koni eha wɔpɛi nɔkwɛmɔnɔ ni Kristo sɛɛnyiɛlɔi ni hi shi yɛ klɛŋklɛŋ afii 100 lɛ mli lɛ fee lɛ mli, ni no aha wɔkɛ hiɛdɔɔ babaoo atsu shiɛmɔ nitsumɔ lɛ fe tsutsu lɛ, kɛ agbɛnɛ hu (3) koni eha bulɛ ni wɔyɔɔ kɛha Yehowa gbɛjianɔtoo lɛ, kɛ bulɛ ni wɔyɔɔ kɛha mɛi ni nyiɛɔ shiɛmɔ nitsumɔ lɛ hiɛ kɛ mɛi ni kwɛɔ asafoi lɛ anɔ lɛ mli awa.

17, 18. Te ato wolo nɛɛ he gbɛjianɔ aha tɛŋŋ, ni mɛɛ nibii yɔɔ wolo nɛɛ mli ni baaye abua bo kɛ́ oofee aŋkro Biblia mli nikasemɔ?

17 Te ato wolo nɛɛ he gbɛjianɔ aha tɛŋŋ? Obaana akɛ, ajara mli awo fãi kpaanyɔ mli, ni eko fɛɛ eko wieɔ Bɔfoi lɛ Asaji lɛ fã ko he. Atooo saneyitsei ni yɔɔ fã fɛɛ fã mli lɛ he gbɛjianɔ koni akɛsusu kukuji ni yɔɔ Bɔfoi lɛ Asaji lɛ ahe ekomekome, shi ato he gbɛjianɔ koni etsɔɔ nibii ni wɔbaanyɛ wɔkase kɛjɛ amaniɛbɔi ni yɔɔ Bɔfoi lɛ Asaji lɛ mli, ní eye ebua wɔ ni wɔna bɔ ni wɔɔfee wɔkɛ nibii ni wɔkase lɛ atsu nii yɛ wɔshihilɛ mli. Yɛ yitso fɛɛ yitso shishijee lɛ, akɛ sane oti ni yɔɔ nakai yitso lɛ mli lɛ ekpa hiɛ, ni atsɔɔ Ŋmalɛ ni abaasusu he kɛjɛ Bɔfoi lɛ Asaji lɛ.

18 Nibii krokomɛi hu yɛ wolo nɛɛ mli ni baaye abua bo kɛ́ oofee aŋkro Biblia mli nikasemɔ. Nifeemɔi ni yɔɔ miishɛɛ ni abɔ he amaniɛ yɛ Bɔfoi lɛ Asaji lɛ ahe mfonirii fɛfɛji ni yɔɔ wolo lɛ mli lɛ baaye abua bo koni beni ojwɛŋɔ Biblia mli amaniɛbɔɔ lɛ nɔ lɛ, ofee nibii ni tee nɔ lɛ ahe  mfoniri yɛ ojwɛŋmɔŋ. Yitsei babaoo hiɛ akrabatsai ni haa oleɔ saji krokomɛi ni baaye abua bo. Akrabatsai lɛ ekomɛi wieɔ mɛi komɛi ni awie amɛhe yɛ Biblia lɛ mli ní esa akɛ wɔkase amɛhemɔkɛyeli lɛ ashihilɛ he. Ekrokomɛi hu wieɔ maji, nibii ni tee nɔ, kusumii, loo mɛi krokomɛi ni atsĩ amɛ tã yɛ Bɔfoi lɛ Asaji lɛ ahe saji komɛi. Ashi gbɛ agbo yɛ baafai lɛ anaabu gbɛ bɔni afee ni onyɛ oŋmala nii yɛ jɛmɛ beni okaseɔ wolo lɛ.

Ha bɔ ni otsuɔ oshikpɔŋkuku lɛ mli nii lɛ atsɔɔ akɛ ole akɛ be lɛ faaa dɔŋŋ

19. Te esa akɛ wɔpɛi wɔmli wɔha tɛŋŋ yɛ be kɛ beaŋ?

19 Wolo nɛɛ baanyɛ aye abua bo koni okɛ anɔkwayeli apɛi omli. Ekɔɔɔ he eko afii abɔ ni okɛsɔmɔ akɛ Maŋtsɛyeli shiɛlɔ lɛ, ehi akɛ yɛ be kɛ beaŋ lɛ oŋɔ be kɛpɛi oshihilɛ mli okwɛ akɛ mɛɛ nibii okɛyeɔ klɛŋklɛŋ gbɛhe, ni te otsuɔ Kristofoi asɔɔmɔ nitsumɔ lɛ ohaa tɛŋŋ. (2 Kor. 13:5) Bi ohe akɛ: ‘Ani bɔ ni mitsuɔ misɔɔmɔ nitsumɔ lɛ tsɔɔ akɛ miheɔ miyeɔ akɛ be lɛ faaa dɔŋŋ? (1 Kor. 7:29-31) Ani mikɛ hiɛdɔɔ kɛ nɔmimaa miishiɛ sanekpakpa lɛ? (1 Tes. 1:5, 6) Ani mikɛ minyɛmɔ fɛɛ miitsu shiɛmɔ kɛ kaselɔfeemɔ nitsumɔ lɛ?’—Kol. 3:23.

20, 21. Mɛni hewɔ esa akɛ wɔtsu nitsumɔ ni akɛwo wɔdɛŋ lɛ kɛ hiɛdɔɔ lɛ, ni mɛni esa akɛ wɔkpɛ wɔyiŋ akɛ wɔbaafee?

20 Nyɛhaa ehia wɔjwɛŋmɔŋ be fɛɛ be ákɛ akɛ nitsumɔ ni he hiaa ewo wɔdɛŋ—shiɛmɔ kɛ kaselɔfeemɔ nitsumɔ lɛ. Beni je naa ni je tsɛreɔ lɛ, esa akɛ wɔkɛ hiɛdɔɔ babaoo atsu nakai nitsumɔ lɛ fe tsutsu lɛ. Nibii agbɛjianɔtoo nɛɛ naagbee lɛ miibɛŋkɛ oyayaayai. Mɛi babaoo awala yɛ oshara mli fe bei fɛɛ ni eho. Wɔleee mɛi abɔ ni eshwɛ lolo ni ajie ato ni baabo wɔshɛɛ sane lɛ toi. (Bɔf. 13:48) Shi eji wɔsɔ̃ akɛ wɔye wɔbua mɛi nɛɛ dani naagbee lɛ aba.—1 Tim. 4:16.

21 Belɛ ehe miihia waa ni wɔkase Maŋtsɛyeli shiɛlɔi ni kɛ hiɛdɔɔ shiɛ yɛ klɛŋklɛŋ afii 100 lɛ mli lɛ. Ha bɔ ni obaakase wolo nɛɛ jogbaŋŋ lɛ atsirɛ bo koni okɛ hiɛdɔɔ kɛ ekãa babaoo ashiɛ fe tsutsu lɛ. Kɛfata he lɛ, ha ofai shi ni otswa akɛ obaaya nɔ ‘oye Nyɔŋmɔ maŋtsɛyeli lɛ he odase kɛmɔ shi’ lɛ mli awa.—Bɔf. 28:23.

BEI NI HE HIAA WAA NI KRISTOJAMƆ KƐSHWERE YƐ KLƐŊKLƐŊ AFII 100 Ŋ.B.

  1. Afi 33

    Atee Yesu shi

    Yesu kɛ nitsumɔ wo ekaselɔi lɛ adɛŋ akɛ amɛfee kaselɔi

    Afɔse mumɔ krɔŋkrɔŋ lɛ ashwie shi yɛ Pentekoste gbi lɛ nɔ

    Ato Kristofoi asafo lɛ shishi

  2. Aaafee afi 33-34

    Agbe Stefano

    Abaptisi Etiopia piafonyo lɛ

  3. Aaafee afi  34

    Saulo ni jɛ Tarso lɛ batsɔ Kristofonyo

  4. Aaafee afi 34-36

    Saulo shiɛ yɛ Damasko

  5. Aaafee afi 36

    Paulo tee Yerusalem klɛŋklɛŋ kwraa akɛ Kristo sɛɛnyiɛlɔ

    Paulo tee Petro ŋɔɔ yɛ Yerusalem (Gal. 1:18)

  6. Afi 36

    Kornelio batsɔ Kristofonyo

    Klɛŋklɛŋ Jeŋmajiaŋbii batsɔmɔ Kristofoi

  7. Aaafee afi 41

    Aŋma Mateo Sanekpakpa lɛ

    Ajie “ŋwɛi ni ji etɛ lɛ” he ninaa atsɔɔ Paulo (2 Kor. 12:2)

  8. Aaafee afi 44

    Agabo gba akɛ hɔmɔ baaba

    Agbe Yakobo (Zebedeo bi lɛ)

    Awo Petro tsuŋ, ajie lɛ yɛ naakpɛɛ gbɛ nɔ

  9. Afi 44

    Herode Agripa I lɛ gbo

  10. Aaafee afi 46

    Hɔmɔ ni agba akɛ ebaaba lɛ ba

    Paulo kɛ onia ni atsu kɛha nyɛmimɛi lɛ fɛnemɔ lɛ tee Yerusalem

  11. Aaafee afi 47-48

    Paulo klɛŋklɛŋ gbɛfãa akɛ maŋsɛɛ shiɛlɔ

  12. Aaafee afi 49

    Ketiafoo sane lɛ te shi yɛ Antiokia

    Abɔ gwa yɛ Yerusalem

    Paulo ku Petro naa (Gal. 2:11-14)

  13. Aaafee afi 49-52

    Paulo gbɛfãa ni ji enyɔ akɛ maŋsɛɛ shiɛlɔ

    Barnaba kɛ Marko shiɛ yɛ Kipro

  14. Aaafee afi 49-50

    Klaudio shwie Yudafoi lɛ kɛjɛ Roma

  15. Aaafee afi 50

    Luka yafata Paulo he yɛ Troia

    Paulo na nuu Makedonianyo lɛ yɛ ninaa mli

    Paulo tee Filipi

    Ato Filipi asafo lɛ

    Ato Tesalonika asafo lɛ

    Paulo tee Ateene

  16. Aaafee afi 50-52

    Paulo tee Korinto

    Aŋma 1 Tesalonikabii awolo lɛ

    Aŋma Galatabii awolo lɛ

  17. Aaafee afi 51

    Aŋma 2 Tesalonikabii awolo lɛ

  18. Aaafee afi 52-56

    Paulo gbɛfãa ni ji etɛ akɛ maŋsɛɛ shiɛlɔ

  19. Aaafee afi 52-55

    Paulo tee Efeso

  20. Aaafee afi 55

    Aŋma 1 Korintobii awolo lɛ

    Awo Tito gbɛ kɛtee Korinto

    Aŋma 2 Korintobii awolo lɛ

  21. Aaafee afi 56

    Aŋma Romabii awolo lɛ

    Paulo tée Eutiko shi yɛ Troia

    Paulo kɛ Luka yahi Filipo ŋɔɔ yɛ Kaisarea

    Amɔ Paulo yɛ Yerusalem

  22. Aaafee afi 56-58

    Awo Paulo tsuŋ yɛ Kaisarea

    Aŋma Luka Sanekpakpa lɛ

  23. Aaafee afi 58

    Festo baye Felike sɛɛ

  24. Afi 58

    Paulo kɛ Herode Agripa II lɛ wie

  25. Aaafee afi 59-61

    Paulo klɛŋklɛŋ tsuŋwoo yɛ Roma

  26. Aaafee afi 60-61

    Aŋma Kolosebii awolo lɛ

    Aŋma Efesobii awolo lɛ

    Aŋma Filemon wolo lɛ

    Aŋma Filipibii awolo lɛ

  27. Aaafee afi 60-65

    Aŋma Marko Sanekpakpa lɛ

  28. Aaafee afi 61

    Aŋma Bɔfoi lɛ Asaji lɛ

    Aŋma Hebribii awolo lɛ

  29. Aaafee afi 61-64

    Aŋma 1 Timoteo wolo lɛ

    Ashi Tito yɛ Kreta (Tito 1:5)

    Aŋma Tito wolo lɛ

  30. Dani afi 62 shɛ

    Aŋma Yakobo wolo lɛ

  31. Aaafee afi 62-64

    Aŋma 1 Petro wolo lɛ

  32. Aaafee afi 64

    Aŋma 2 Petro wolo lɛ

  33. Aaafee afi 65

    Awo Paulo tsuŋ nɔ ni ji shii enyɔ nɔ yɛ Roma

    Aŋma 2 Timoteo wolo lɛ

    Tito shi kɛtee Dalmatia (2 Tim. 4:10)

    Agbe Paulo