Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 15

‘Amɛwo Asafoi Lɛ Ahewalɛ’

‘Amɛwo Asafoi Lɛ Ahewalɛ’

Nɔkwɛlɔi gbɛfalɔi yeɔ amɛbuaa asafoi lɛ koni amɛhe awa yɛ hemɔkɛyeli lɛ mli

Edamɔ Bɔfoi lɛ Asaji 15:36–16:5 lɛ nɔ

1-3. (a) Namɔ ji mɔ hee ni fata Paulo he kɛfãa gbɛ lɛ, ni mɛɛ gbɔmɔ nɛkɛ eji? (b) Mɛni wɔbaakase yɛ yitso nɛɛ mli?

BENI bɔfo Paulo kɛ oblanyo fioo ko nyiɛ gbɛi dokoidokoi ní kamɔ maji lɛ ateŋ lɛ nɔ kɛyaa lɛ, ekwɛ oblanyo lɛ gãa ni esusu nɔ ni ebaatsu wɔsɛɛ lɛ he. Atsɛɔ oblanyo nɛɛ Timoteo. No mli lɛ Timoteo yɛ eblahiiaŋ, ni ekolɛ eye aaafee afii 20. Beni amɛyaa amɛhiɛ fiofio yɛ amɛgbɛfãa ni ji klɛŋklɛŋ nɔ̃ kwraa nɛɛ mli lɛ, belɛ Timoteo kɛ shĩa teŋ miijekɛ. Beni hulu nyɔɔ shi lɛ, amɛtswa Listra kɛ Ikoniom amɛfɔ̃ amɛ sɛɛ. Mɛɛ shihilɛ amɛkɛbaayakpe? Akɛni enɛ ji gbɛ ni ji enyɔ ni Paulo fãa akɛ maŋsɛɛ shiɛlɔ hewɔ lɛ, ele shihilɛi ni amɛbaanyɛ amɛkɛkpe. Ele akɛ amɛkɛ osharai kɛ naagbai babaoo baakpe. Ani oblanyo fioo ni fata ehe nɛɛ baanyɛ adamɔ naagbai nɛɛ anaa?

2 Paulo yɛ hekɛnɔfɔɔ yɛ Timoteo mli, fe bɔ ni ekolɛ oblanyo fioo ni baa ehe shi nɛɛ diɛŋtsɛ po naa ehe. Nibii komɛi ni tee nɔ etsɛko tsɔ lɛ ha Paulo na akɛ ehe miihia waa ni ená mɔ ko ni sa ni ekɛfã gbɛ lɛ. Paulo le akɛ nitsumɔ ni amɛbaayatsu—asafoi lɛ asaramɔ kɛ amɛhewalɛwoo—lɛ baabi ní ekɛ mɔ ni baafata ehe kɛfã gbɛ lɛ afi shi shiŋŋ, ní amɛjwɛŋmɔ hu afee ekome. Mɛni hewɔ ekolɛ Paulo nu he nakai lɛ? Eeenyɛ efee akɛ enɛ jɛ béi ni kɛ mligbalamɔ ba ekɛ Barnaba teŋ lɛ hu hewɔ.

3 Yɛ yitso nɛɛ mli lɛ, wɔbaakase gbɛ ni hi fe fɛɛ ni esa akɛ atsɔ nɔ asaa béi lɛ he saji babaoo. Kɛfata he lɛ, wɔbaakase nɔ hewɔ ni Paulo hala Timoteo akɛ ehefatalɔ gbɛfalɔ lɛ, ni wɔbaanu nitsumɔ ni he hiaa waa ni mɛi ni sɔmɔɔ akɛ nɔkwɛlɔi gbɛfalɔi ŋmɛnɛ lɛ tsuɔ lɛ shishi jogbaŋŋ.

‘Ha Wɔku Wɔsɛɛ Wɔyasara Nyɛmimɛi Lɛ’ (Bɔfoi lɛ Asaji 15:36)

4. Mɛni Paulo to eyiŋ akɛ ebaayafee yɛ egbɛfãa ni ji enyɔ akɛ maŋsɛɛ shiɛlɔ lɛ mli?

4 Yɛ yitso ni tsɔ hiɛ lɛ mli lɛ, wɔkase akɛ atsu nyɛmimɛi ejwɛ—Paulo, Barnaba, Yuda, kɛ Sila—koni amɛkɛ yiŋ ni nɔyeli kuu lɛ ekpɛ yɛ ketiafoo sane lɛ he lɛ ayawo asafo ni yɔɔ Antiokia lɛ hewalɛ. Mɛni Paulo fee yɛ no sɛɛ? Ekɛ gbɛfãa hee he gbɛjianɔtoo ko fɔ̃ Barnaba hiɛ, ni ekɛɛ lɛ akɛ: “Ha wɔku wɔsɛɛ wɔyasara wɔnyɛmimɛi lɛ yɛ maŋ fɛɛ maŋ ní wɔjaje  Nuŋtsɔ [Yehowa] wiemɔ lɛ yɛ mli lɛŋ, ni wɔkwɛ bɔ ni amɛyɔɔ.” (Bɔf. 15:36) Paulo etsɔɔɔ akɛ amɛyasara mɛi hei ni etsɔmɔ Kristofoi nɛɛ kɛkɛ, tamɔ bɔ ni asaraa nanemɛi kɛkɛ lɛ. Bɔfoi lɛ Asaji lɛ tsɔɔ yiŋtoo hewɔ ni Paulo fã gbɛ ni ji enyɔ akɛ maŋsɛɛ shiɛlɔ lɛ mli faŋŋ. Klɛŋklɛŋ lɛ, ebaaya nɔ ekɛ mlai ni nɔyeli kuu lɛ ewo lɛ aha asafoi lɛ. (Bɔf. 16:4) Nɔ ni ji enyɔ lɛ, akɛni Paulo ji nɔkwɛlɔ gbɛfalɔ hewɔ lɛ, etswa efai shi akɛ ebaatswa asafoi lɛ ema shi yɛ mumɔŋ, ní eye ebua amɛ ni amɛhe awa yɛ hemɔkɛyeli lɛ mli. (Rom. 1:11, 12) Mɛɛ gbɛ nɔ Yehowa Odasefoi asafo ni yɔɔ ŋmɛnɛ lɛ nyiɛɔ gbɛ ni bɔfoi lɛ je amɛfɔ̃ shi lɛ sɛɛ?

5. Mɛɛ gbɛ Nɔyeli Kuu ni yɔɔ ŋmɛnɛ lɛ tsɔɔ nɔ ekɛ gbɛtsɔɔmɔ kɛ hewalɛwoo haa asafoi lɛ?

5 Ŋmɛnɛ lɛ Kristo tsɔɔ Yehowa Odasefoi a-Nɔyeli Kuu lɛ nɔ etsɔɔ esafo lɛ gbɛ. Hii anɔkwafoi ni afɔ amɛ mu nɛɛ tsɔɔ woji aŋmalamɔ, woji akalamɔ, asafoŋ kpeei, kɛ gbɛi krokomɛi anɔ amɛkɛ gbɛtsɔɔmɔ kɛ hewalɛwoo haa asafoi ni yɔɔ je lɛŋ fɛɛ lɛ. Nɔyeli Kuu lɛ bɔɔ mɔdɛŋ hu koni ekɛ asafo fɛɛ asafo ashara kpaakpa. Amɛtsɔɔ nɔkwɛlɔi gbɛfalɔi anɔ amɛfeɔ nakai. Nɔyeli Kuu lɛ diɛŋtsɛ ehala asafoŋ onukpai akpei abɔ ni sa jogbaŋŋ yɛ je lɛŋ fɛɛ koni amɛsɔmɔ akɛ nɔkwɛlɔi gbɛfalɔi.

6, 7. Mɛni ji nɔkwɛlɔi gbɛfalɔi lɛ anitsumɔi lɛ ekomɛi?

6 Eji oti ni ma nɔkwɛlɔi gbɛfalɔi ni yɔɔ ŋmɛnɛ lɛ ahiɛ akɛ amɛná deka amɛha mɛi fɛɛ ni yɔɔ asafoi ni amɛyasaraa amɛ lɛ amli lɛ, ní amɛwo amɛ hewalɛ yɛ mumɔŋ. Mɛɛ gbɛ nɔ amɛtsɔɔ amɛfeɔ enɛ? Amɛkaseɔ nɔkwɛmɔnɔ ni Kristofoi ni hi shi yɛ klɛŋklɛŋ afii 100 lɛ mli, ní Paulo hu fata he lɛ fee lɛ. Paulo wo enaanyo nɔkwɛlɔ lɛ hewalɛ akɛ: “Shiɛmɔ wiemɔ lɛ, kã he, dekã yɛ jio, dekã bɛ jio, kã hiɛ, wo ŋaa, bɔɔ kɔkɔ yɛ tsuishitoo kɛ nitsɔɔmɔ fɛɛ mli. . . . Tsu sanekpakpajajelɔ nitsumɔ lɛ.”—2 Tim. 4:2, 5.

7 Yɛ nakai wiemɔi lɛ anaa lɛ, nɔkwɛlɔ gbɛfalɔ lɛ—kɛ eŋa lɛ, kɛji ebote gbalashihilɛ mli lɛ—fataa shiɛlɔi ni yɔɔ asafo lɛ mli lɛ ahe kɛtsuɔ shiɛmɔ nitsumɔ lɛ fãi srɔtoi lɛ. Nɔkwɛlɔi gbɛfalɔi nɛɛ kɛ hiɛdɔɔ tsuɔ sɔɔmɔ nitsumɔ lɛ, ni amɛhe esa kɛ nitsɔɔmɔ—ni sui nɛɛ náa tooku lɛ nɔ hewalɛ kpakpa. (Rom. 12:11; 2 Tim. 2:15) Ale nɔkwɛlɔi gbɛfalɔi jogbaŋŋ akɛ amɛjɛɔ amɛsuɔmɔ mli amɛkɛ amɛhe shãa afɔle. Amɛjɛɔ amɛsuɔmɔ mli amɛsɔmɔɔ mɛi krokomɛi, ni kɛ́ nugbɔ miinɛ waa jio, hulu miitso waa jio lɛ, amɛfãa gbɛ amɛyasaraa asafoi lɛ, ni amɛyaa hei ni yɔɔ oshara po. (Fil. 2:3, 4) Nɔkwɛlɔi gbɛfalɔi lɛ jɛɔ Biblia lɛ mli amɛhaa wiemɔi hu, ni amɛkɛwoɔ asafo fɛɛ asafo hewalɛ, amɛtsɔɔ amɛ nii, ni amɛwoɔ amɛ ŋaa. Kɛ́ mɛi fɛɛ ni yɔɔ asafo lɛ mli lɛ kwɛ nɔkwɛlɔi gbɛfalɔi nɛɛ ajeŋba, ni amɛkase amɛhemɔkɛyeli lɛ, amɛnáa he sɛɛ waa.—Heb. 13:7.

“Efee Béi” (Bɔfoi lɛ Asaji 15:37-41)

8. Te Barnaba fee enii yɛ Paulo ninefɔ̃ɔ lɛ he eha tɛŋŋ?

8 Barnaba kpɛlɛ sane ni Paulo kɛfɔ̃ ehiɛ akɛ ‘amɛyasara nyɛmimɛi lɛ’  nɔ. Amɛyi enyɔ lɛ amɛfee ekome kɛfã gbɛ pɛŋ, ni amɛle hei ni amɛbaaya lɛ, kɛ mɛi ni amɛbaayasara amɛ lɛ jogbaŋŋ. (Bɔf. 13:2–14:28) No hewɔ lɛ, ákɛ amɛyi enyɔ lɛ amɛaafee ekome kɛtsu nitsumɔ nɛɛ sa jogbaŋŋ, ni nilee hu yɛ mli. Shi naagba ko ba. Bɔfoi lɛ Asaji 15:37 lɛ bɔ amaniɛ akɛ: “Barnaba hiɛ kã nɔ akɛ amɛaaŋɔ Yohane ni atsɛ́ɔ lɛ Marko lɛ amɛfata amɛhe.” Jeee akɛ Barnaba miitsɔɔ esusumɔ kɛkɛ akɛ amɛŋɔ enyɛkwɛ bi Marko amɛfata he kɛfã gbɛ nɛɛ akɛ maŋsɛɛ shiɛlɔi, shi moŋ ‘ehiɛ kã nɔ’ akɛ esa akɛ amɛfee nakai.

9. Mɛni hewɔ Paulo emiii nɔ ni Barnaba wie lɛ nɔ lɛ?

9 Shi Paulo ekpɛlɛɛɛ. Mɛni hewɔ? Amaniɛbɔɔ lɛ kɛɛ akɛ: “Paulo lɛ, esusu akɛ esaaa akɛ amɛaaŋɔ [Marko] mɔ ni kpale yɛ amɛsɛɛ yɛ Pamfilia ni ekɛ amɛ eyaaa nitsumɔ lɛ amɛfata amɛhe.” (Bɔf. 15:38) Marko fata Paulo kɛ Barnaba he beni amɛfã gbɛ klɛŋklɛŋ akɛ maŋsɛɛ shiɛlɔi lɛ, shi ekɛ amɛ eyaaa kɛyagbeee naa. (Bɔf. 12:25; 13:13) Beni amɛje gbɛfãa lɛ shishi etsɛɛɛ nɔŋŋ lɛ, Marko shi amɛ yɛ Pamfilia, ni etee shĩa yɛ Yerusalem. Biblia lɛ etsɔɔɔ nɔ̃ hewɔ ni eshi kɛtee shĩa lɛ, shi ekã shi faŋŋ akɛ bɔfo Paulo bu nɔ ni Marko fee lɛ akɛ esaaa kwraa. Ekolɛ Paulo na Marko akɛ eji mɔ ko ni anyɛɛɛ akɛ he afɔ̃ enɔ.

10. Beni Paulo kɛ Barnaba eyakpãaa gbee lɛ mɛni jɛ mli kɛba, ni mɛni amɛfee?

10 Shi Barnaba ekpɛlɛɛɛ doo akɛ ja amɛkɛ Marko tee. Ni Paulo hu kɛɛ ekpɛlɛɛɛ ákɛ akɛ lɛ aya. Bɔfoi lɛ Asaji 15:39 lɛ kɛɛ akɛ: “No hewɔ lɛ efee béi aahu po ni eha amɛgbála amɛmli.” Barnaba ŋɔ Marko efata ehe ni amɛtsɔ̃ lɛlɛ mli kɛtee emaŋ yɛ Kipro ŋshɔkpɔ lɛ nɔ. Paulo kwɛ ehiɛ gbɛ, ni etsa egbɛfãa lɛ nɔ. Amaniɛbɔɔ lɛ kɛɛ akɛ: “Paulo lɛ, efã Sila efata ehe, ni beni nyɛmimɛi lɛ tuu lɛ amɛwo Nyɔŋmɔ duromɔ lɛ dɛŋ lɛ, eyiŋ.” (Bɔf. 15:40) Amɛfã gbɛ ‘kɛtsɔ Siria kɛ Kilikia amɛyawo asafoi lɛ ahewalɛ.’—Bɔf. 15:41.

11. Mɛɛ sui ehe hiaa ni wɔná bɔni afee ni kɛ́ mɔ ko tɔ̃ wɔnɔ lɛ, kpɔ ko akabakã wɔ kɛ lɛ teŋ kwraa?

11 Amaniɛbɔɔ nɛɛ kaiɔ wɔ akɛ wɔ fɛɛ wɔyeee emuu. Aje gbɛ ahala Paulo kɛ Barnaba koni amɛyasɔmɔ akɛ nɔyeli kuu lɛ najiaŋdamɔlɔi krɛdɛi. Eeenyɛ efee akɛ Paulo diɛŋtsɛ po batsɔ nɔyeli kuu lɛ mlinyo. Kɛlɛ, yɛ shihilɛ nɛɛ mli lɛ, Paulo kɛ Barnaba ha emuu ni amɛyeee lɛ ná amɛnɔ hewalɛ. Ani amɛŋmɛ gbɛ ni shihilɛ nɛɛ ha kpɔ ba amɛteŋ kwraa? Eyɛ mli akɛ Paulo kɛ Barnaba yeee emuu moŋ, shi amɛji hii ni baa amɛhe shi ní hiɛ Kristo jwɛŋmɔ lɛ eko. Ŋwanejee ko kwraa bɛ he akɛ, sɛɛ mli lɛ amɛjie nyɛmimɛi asuɔmɔ kpo, ni amɛŋɔfafaa amɛhe. (Efe. 4:1-3) Be ko sɛɛ lɛ, Paulo kɛ Marko fee ekome kɛtsu teokrase nitsumɔi krokomɛi. *Kol. 4:10.

12. Mɛɛ sui esa akɛ nɔkwɛlɔi ni yɔɔ ŋmɛnɛ lɛ akase kɛjɛ Paulo kɛ Barnaba he?

12 Béi ni ba Paulo kɛ Barnaba teŋ shikome nɛɛ etsɔɔɔ akɛ beilɔi ji  amɛ, loo ákɛ efee amɛsu. Ale Barnaba akɛ eji mɔ ko ni tsui mli jɔ ní mli hi—ni bɔfoi lɛ le lɛ nakai aahu akɛ yɛ nɔ najiaŋ ni amɛkɛ egbɛ́i ni ji Yosef aaatsɛ́ lɛ lɛ, amɛwo lɛ gbɛ́i akɛ Barnaba, ni shishi ji “Miishɛjemɔ Bi.” Ale Paulo hu akɛ emli jɔ, ni eyɛ kpoo. (1 Tes. 2:7, 8) Esa akɛ Kristofoi nɔkwɛlɔi fɛɛ ni yɔɔ ŋmɛnɛ, ní nɔkwɛlɔi gbɛfalɔi hu fata he lɛ akase Paulo kɛ Barnaba, ní amɛbɔ mɔdɛŋ amɛba amɛhe shi be fɛɛ be, ní amɛkɛ onukpai krokomɛi ni amɛkɛsɔmɔɔ lɛ, kɛ tooku muu lɛ fɛɛ aye yɛ mlijɔlɛ mli.—1 Pet. 5:2, 3.

‘Atãa Ehe Sane Kpakpa’ (Bɔfoi lɛ Asaji 16:1-3)

13, 14. (a) Namɔ ji Timoteo, ni te fee tɛŋŋ ni Paulo le lɛ? (b) Mɛni ha Paulo ná Timoteo he miishɛɛ waa lɛ? (d) Mɛɛ nitsumɔ akɛwo Timoteo dɛŋ?

13 Gbɛ ni ji enyɔ ni Paulo fã akɛ maŋsɛɛ shiɛlɔ lɛ kɛ lɛ yaje Galatia ni yɔɔ Roma kpokpaa lɛ nɔ lɛ, ni asafoi ni yɔɔ jɛmɛ lɛ ayi faaa. Sɛɛ mli lɛ, “eba Derbe kɛ Listra.” Amaniɛbɔɔ lɛ kɛɛ akɛ: “Ni naa, kaselɔ ko yɛ jɛi ni atsɛɔ lɛ Timoteo, Yudayoo ko ni ehe eye lɛ bi, shi etsɛ lɛ Helanyo ni.”—Bɔf. 16:1. *

14 Ekã shi faŋŋ akɛ Paulo ná ele Timoteo weku lɛ beni efã gbɛ klɛŋklɛŋ kwraa kɛtee nakai kpokpaa lɛ nɔ aaafee afi 47 Ŋ.B. lɛ. Agbɛnɛ lɛ no sɛɛ afii enyɔ loo etɛ beni Paulo ba jɛmɛ nɔ ni ji shii enyɔ nɔ lɛ, ená oblanyo fioo Timoteo he miishɛɛ waa. Mɛni hewɔ? Ejaakɛ ‘nyɛmimɛi lɛ tãa ehe sane kpakpa.’ Jeee nyɛmimɛi ni yɔɔ emaŋ lɛŋ pɛ sumɔɔ esane waa, shi nyɛmimɛi ni yɔɔ hei krokomɛi lɛ hu le lɛ akɛ ebaa ejeŋ jogbaŋŋ. Amaniɛbɔɔ lɛ tsɔɔ akɛ nyɛmimɛi ni yɔɔ Listra kɛ agbɛnɛ hu Ikoniom ni kɛ jɛmɛ jekɛmɔ aaafee kilomitai 30 lɛ tãa ehe sane kpakpa. (Bɔf. 16:2) Mumɔ krɔŋkrɔŋ lɛ kudɔ asafoŋ onukpai lɛ ni amɛkɛ nitsumɔ wulu ko wo oblanyo fioo Timoteo dɛŋ—efata Paulo kɛ Sila he akɛ nɔkwɛlɔi gbɛfalɔi ní eye ebua amɛ.—Bɔf. 16:3.

15, 16. Mɛni ha Timoteo ná gbɛ́i kpakpa lɛ?

15 Mɛni ha Timoteo ná gbɛ́i kpakpa ni tamɔ nakai beni eji oblanyo fioo lɛ? Ani enilee, ehefɛo, loo duromɔ keenii krokomɛi ni eyɔɔ lɛ ahewɔ? Bei pii lɛ enɛɛmɛi ji nibii ni adesai kwɛɔ. Be ko lɛ, gbalɔ Samuel po ha mɔ ko kponɔgbɛ puemɔ ná enɔ hewalɛ yɛ gbɛ ni esaaa nɔ. Shi Yehowa kai lɛ akɛ: “Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!” (1 Sam. 16:7) Jeee nyɛmɔi ni Timoteo yɔɔ lɛ ji nɔ ni ha ená gbɛ́i kpakpa yɛ enyɛmimɛi Kristofoi lɛ ateŋ lɛ, shi moŋ sui kpakpai ni eyɔɔ ní haa anaa mɔ tuuntu ni eji lɛ.

16 Afii komɛi asɛɛ lɛ, bɔfo Paulo wie Kristofoi asui kpakpai ni Timoteo yɔɔ lɛ ekomɛi ahe. Paulo tsɔɔ akɛ Timoteo hiɛ jwɛŋmɔ kpakpa, eyɛ suɔmɔ krɔŋŋ ni haa akɛ he shãa afɔle, ni etsuɔ teokrase nitsumɔi ahe nii  jogbaŋŋ. (Fil. 2:20-22) Ale Timoteo jogbaŋŋ hu akɛ eyɛ hemɔkɛyeli ní “apasa bɛ mli.”—2 Tim. 1:5.

17. Mɛɛ gbɛ nɔ oblahii kɛ oblayei bibii ni yɔɔ ŋmɛnɛ lɛ aaatsɔ akase Timoteo?

17 Ŋmɛnɛ lɛ, oblahii kɛ oblayei bibii pii kaseɔ Timoteo kɛtsɔ sui kpakpai ní amɛbɔɔ mɔdɛŋ akɛ amɛná lɛ nɔ. Enɛ haa amɛnáa gbɛ́i kpakpa yɛ Yehowa kɛ gbɔmɛi ahiɛ, kɛjɛɔ amɛgbekɛbiiashi tɔ̃ɔ po. (Abɛi 22:1; 1 Tim. 4:15) Amɛjieɔ hemɔkɛyeli ni osato bɛ mli kpo, ni tsɔɔ akɛ amɛbaaa jeŋbai enyɔ. (Lala 26:4) Ni enɛ eha oblahii bibii pii ni tamɔ Timoteo lɛ miitsu gbɛfaŋnɔ ko ni hiaa waa he nii yɛ asafo lɛ mli. Ekã shi faŋŋ akɛ kɛ́ amɛbɔi sanekpakpa lɛ shiɛmɔ, ní yɛ be ni sa mli lɛ amɛjɔɔ amɛhe nɔ amɛha Yehowa ni abaptisi amɛ lɛ, ewoɔ mɛi fɛɛ ni sumɔɔ Yehowa ní le amɛ lɛ hewalɛ!

‘Amɛná Hewalɛ yɛ Hemɔkɛyeli lɛ Mli’ (Bɔfoi lɛ Asaji 16:4, 5)

18. (a) Mɛɛ nitsumɔi krɛdɛi Paulo kɛ Timoteo tsu akɛ nɔkwɛlɔi gbɛfalɔi? (b) Mɛɛ gbɛ nɔ asafoi lɛ ná he sɛɛ?

18 Paulo kɛ Timoteo fee ekome kɛtsu nii afii babaoo. Ákɛ nɔkwɛlɔi gbɛfalɔi lɛ, nɔyeli kuu lɛ wo amɛ gbɛ ni amɛyatsu nitsumɔi srɔtoi babaoo amɛha amɛ. Biblia lɛ bɔ amaniɛ akɛ: “Beni amɛkpaa maji lɛ anɔ lɛ, amɛkɛ mlai ní bɔfoi lɛ kɛ onukpai lɛ ní yɔɔ Yerusalem lɛ wo lɛ ha amɛ, koni amɛye nɔ.” (Bɔf. 16:4) Ekã shi faŋŋ akɛ asafoi lɛ kɛ gbɛtsɔɔmɔ ni bɔfoi lɛ kɛ onukpai lɛ ni yɔɔ Yerusalem lɛ kɛha amɛ lɛ tsu nii. Nɔ ni jɛ toiboo ni amɛfee lɛ mli kɛba ji akɛ, “asafoi lɛ ná hewalɛ yɛ hemɔkɛyeli mli, ni amɛyi fáa daa nɛɛ.”—Bɔf. 16:5.

19, 20. Mɛni hewɔ esa akɛ Kristofoi abo ‘amɛtsɔɔlɔi lɛ’ atoi lɛ?

19 Nakai nɔŋŋ ŋmɛnɛ lɛ, Yehowa Odasefoi anine shɛɔ jɔɔmɔi anɔ, ejaakɛ amɛjɛɔ heshibaa mli amɛboɔ gbɛtsɔɔmɔi ní amɛnine shɛɔ nɔ kɛjɛɔ ‘amɛtsɔɔlɔi lɛ’ adɛŋ lɛ atoi. (Heb. 13:17) Akɛni je nɛŋ su lɛ miitsake daa nɛɛ hewɔ lɛ, ehe miihia ní Kristofoi abo gbɛtsɔɔmɔi kɛ tsɔsemɔi ni amɛnine shɛɔ nɔ kɛjɛɔ “tsulɔ anɔkwafo kɛ nilelɔ” lɛ dɛŋ lɛ atoi, ní amɛkɛtsu nii amrɔ nɔŋŋ. (Mat. 24:45; 1 Kor. 7:29-31) Kɛ́ wɔfee nakai lɛ, ebaabu wɔhe koni wɔkakpalaŋ kɛmiijɛ anɔkwale lɛ he, ni ebaaha wɔhi shi akɛ mɛi ni eto amɛhe kɛjɛ je nɛɛ he ní he bɛ muji ko.—Yak. 1:27.

20 Eji anɔkwale akɛ, Kristofoi nɔkwɛlɔi ni yɔɔ ŋmɛnɛ, ní Nɔyeli Kuu lɛ mli bii lɛ hu fata he lɛ yeee emuu, taakɛ eji yɛ Paulo, Barnaba, Marko, kɛ asafoŋ onukpai krokomɛi ni hi shi yɛ klɛŋklɛŋ afii 100 lɛ mli ní afɔ amɛ mu lɛ agbɛfaŋ lɛ nɔŋŋ. (Rom. 5:12; Yak. 3:2) Shi akɛni Nɔyeli Kuu lɛ kɛ Nyɔŋmɔ Wiemɔ lɛ tsuɔ nii ŋmiiŋmi ni amɛjeee gbɛ ni bɔfoi lɛ je amɛfɔ̃ shi lɛ nɔ yɛ gbɛ ko kwraa nɔ hewɔ lɛ, amɛtsɔɔ akɛ abaanyɛ akɛ he afɔ̃ amɛnɔ. (2 Tim. 1:13, 14) Enɛ hewɔ lɛ, asafoi lɛ náa hewalɛ ni amɛfiɔ shi shiŋŋ yɛ hemɔkɛyeli lɛ mli.

^ kk. 11 Kwɛmɔ akrabatsa ni ji  “Marko Ná Sɔɔmɔ Hegbɛi Babaoo,” ni yɔɔ baafa 118 lɛ.

^ kk. 13 Kwɛmɔ akrabatsa ni ji  “Timoteo Sɔmɔ ‘yɛ Sanekpakpa lɛ Hewɔ,’” ni yɔɔ baafa 121 lɛ.