Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 18

‘Amɛtao Nyɔŋmɔ Sɛɛgbɛ, Ni Amɛaana Lɛ’

‘Amɛtao Nyɔŋmɔ Sɛɛgbɛ, Ni Amɛaana Lɛ’

Paulo kɛ etoibolɔi lɛ susu nibii ni amɛkpɛlɛɔ nɔ lɛ ahe kɛje shishi, ni etsake ewiemɔ lɛ koni ekɔ amɛhe

EDAMƆ BƆFOI LƐ ASAJI 17:16-34 LƐ NƆ

1-3. (a) Mɛni hewɔ bɔfo Paulo hao waa yɛ Ateene lɛ? (b) Kɛ́ wɔkase Paulo nɔkwɛmɔnɔ lɛ, mɛni no baanyɛ aha wɔfee?

PAULO ehao waa. No mli lɛ, eyɛ Ateene, yɛ Hela he ni Socrates, Plato, kɛ Aristotle tsɔɔ nii yɛ tsutsu ko lɛ. Ateenebii lɛ sumɔɔ nyɔŋmɔjamɔ waa. Akɛni amɛjáa nyɔŋmɔi pii hewɔ lɛ, he fɛɛ he kwraa ni Paulo baakwɛ lɛ enaa wɔji ní ebɔle lɛ—yɛ sɔlemɔtsui amli, maŋjaranɔ, kɛ gbɛjegbɛi lɛ ahe. Paulo le bɔ ni Yehowa, anɔkwa Nyɔŋmɔ lɛ buɔ wɔŋjamɔ ehaa. (2 Mose 20:4, 5) Bɔfo anɔkwafo nɛɛ nyaŋeɔ wɔji tamɔ bɔ ni Yehowa nyaŋeɔ amɛ lɛ nɔŋŋ!

2 Nɔ ni Paulo na beni eshɛ jara lɛ nɔ lɛ ha enaa kpɛ ehe waa. Ena nyɔŋmɔ ni atsɛ́ɔ lɛ Herme lɛ he amagai ni ashɔ̃ amɛ tamɔ nuutso lɛ babaoo ní ato amɛnaa srɛnɛɛ yɛ jara lɛ kooyi-anaigbɛ, ni amɛbɛŋkɛ agbó wulu lɛ naa. Jarayelihe lɛ eyi tɔ kɛ gbatsũi. Te Paulo ni yɔɔ ekãa lɛ aaafee tɛŋŋ eshiɛ etsɔɔ mɛi ni jáa wɔji waa tamɔ nɛkɛ lɛ? Ani ebaaye ehenumɔi anɔ ní etao saji ni etoibolɔi lɛ kpɛlɛɔ nɔ ní ekɛ no aje eshiɛmɔ lɛ shishi? Ani ebaanyɛ eye ebua amɛteŋ mɛi komɛi koni amɛtao anɔkwa Nyɔŋmɔ lɛ sɛɛgbɛ ní amɛna lɛ?

3 Wiemɔ ni Paulo kɛ hii woloŋlelɔi ni yɔɔ Ateene lɛ wie, taakɛ abɔ he amaniɛ yɛ Bɔfoi lɛ Asaji 17:22-31 lɛ tsɔɔ akɛ enaa tse, ele ŋaa, ni ehiɛ kã shi, ni esa akɛ wɔkase lɛ. Kɛ́ wɔkase nɔkwɛmɔnɔ ni Paulo fee lɛ, wɔbaanyɛ wɔkase nibii babaoo ni tsɔɔ bɔ ni wɔɔfee wɔtao saji ni wɔtoibolɔi lɛ kpɛlɛɔ nɔ ní wɔkɛ no aje wɔshiɛmɔ lɛ shishi, ní wɔye wɔbua amɛ koni amɛsusu nii ahe.

Etsɔɔ Nii “yɛ Jara lɛ Nɔ” (Bɔfoi lɛ Asaji 17:16-21)

4, 5. Beni Paulo yɔɔ Ateene lɛ nɛgbɛ eyashiɛ yɛ, ni mɛɛ toibolɔi ni sane wa ebaashiɛ eha amɛ?

4 Paulo tee Ateene aaafee afi 50 Ŋ.B. beni efãa gbɛ ni ji enyɔ akɛ maŋsɛɛ shiɛlɔ lɛ. * Beni Paulo mɛɔ koni Sila kɛ Timoteo ajɛ Beroia aba lɛ, ‘ekɛ Yudafoi ni yɔɔ kpeehe lɛ yayiyii’ taakɛ efɔɔ feemɔ lɛ. Etee “jara lɛ nɔ” hu ejaakɛ jɛmɛ ji he kroko ní ebaanyɛ ena Ateenebii ni amɛjeee Yudafoi lɛ yɛ, koni eshiɛ etsɔɔ amɛ. (Bɔf. 17:17) Ateene jara lɛ yɛ Acropolis gɔŋkpɔ lɛ kooyi-anaigbɛ,  ni edalɛ shɛɔ hɛktai enumɔ loo nɔ̃. Jeee nihɔɔmɔ kɛ nihemɔ pɛ yaa nɔ yɛ jarayelihe nɛɛ; eji maŋjaranɔ hu. Wolo ko tsɔɔ akɛ jɛmɛ “ajɛɔ akwraa maŋ lɛ, ni atsuɔ shika he saji kɛ kusumii nifeemɔi ni kɔɔ maŋ lɛ he lɛ fɛɛ ahe nii yɛ jɛmɛ.” Ateenebii lɛ buaa amɛhe naa yɛ jɛmɛ ni amɛgbaa jeŋ nilee he saji.

5 Mɛi ni Paulo yaashiɛ eha amɛ yɛ jara lɛ nɔ lɛ asane wa waa. Epikuromɛi kɛ Stoamɛi, ni ji kui srɔtoi enyɔ ni amɛkase jeŋ nilee shi amɛkɛ amɛhe kpãaa gbee lɛ fata etoibolɔi lɛ ahe. * Epikuromɛi lɛ heɔ amɛyeɔ akɛ wala ba trukaa. Amɛsusumɔ yɛ shihilɛ he lɛ fɛɛ ji akɛ: “Ehe ehiaaa ni ashe Nyɔŋmɔ gbeyei; Piŋmɔ ko bɛ gbele mli; Abaanyɛ aná shihilɛ kpakpa; Abaanyɛ adamɔ efɔŋfeemɔ naa.” Stoamɛi lɛ tsɔɔ akɛ esa ákɛ akɛ nilee kɛ jwɛŋmɔ atsu saji ahe nii, ni amɛheee amɛyeee akɛ Nyɔŋmɔ ji Mɔ ko ni yɔɔ diɛŋtsɛ. Epikuromɛi lɛ kɛ Stoamɛi lɛ fɛɛ heee gbohiiashitee ni Kristo kaselɔi lɛ tsɔɔ lɛ amɛyeee. Eyɛ faŋŋ akɛ susumɔi ni kui enyɔ nɛɛ hiɛ lɛ kɛ anɔkwa Kristofoi atsɔɔmɔi ní nɔ kwɔlɔ ní Paulo shiɛɔ lɛ kpãaa gbee kwraa.

6, 7. Te Hela woloŋlelɔi lɛ ekomɛi fee amɛnii yɛ Paulo tsɔɔmɔ lɛ he amɛha tɛŋŋ, ni mɛɛ shihilɛ ni tamɔ nakai nɔŋŋ wɔkɛkpeɔ ŋmɛnɛ?

6 Te Hela woloŋlelɔi lɛ fee amɛnii yɛ Paulo tsɔɔmɔ lɛ he amɛha tɛŋŋ? Mɛi komɛi tsɛ́ lɛ “naafuutsɛ,” ni Hela wiemɔ ni amɛkɛtsu nii lɛ tsɔɔ “mɔ ko ni kɔlɔɔ dumɔwui.” (Bɔf. 17:18) Woloŋlelɔ ko wie Hela wiemɔ nɛɛ he akɛ: “Shishijee mli lɛ akɛ wiemɔ nɛɛ tsɛ́ loofɔlɔ bibioo ko ni kpaa shi ekɔlɔɔ abele, ni sɛɛ mli lɛ akɛtsɛ́ mɛi ni loɔ niyenii fufuji kɛ nibii krokomɛi ni atsi ashwie jara lɛ nɔ lɛ. Shi yɛ sɛɛ mli kwraa lɛ, ebatsɔ agwaseaŋ wiemɔ ní akɛtsɛ́ɔ mɔ fɛɛ mɔ ni buaa saji ni he ehiaaa anaa, titri lɛ mɔ ko ni nyɛɛɛ etsara wiemɔi lɛ jogbaŋŋ.” No hewɔ lɛ, nɔ ni nakai woloŋlelɔi lɛ taoɔ amɛtsɔɔ ji akɛ Paulo leee nii, ni eewie saji ni atã awo enaa kɛkɛ. Ni kɛlɛ, taakɛ wɔbaana yɛ sɛɛ mli lɛ, Paulo haaa gbɛ́i ni awo lɛ, kɛ jɛmɔ ni ajɛ lɛ nɛɛ agba enaa.

7 Wɔkɛ shihilɛ ni tamɔ nakai nɔŋŋ kpeɔ ŋmɛnɛ. Ákɛ Yehowa Odasefoi lɛ, bei pii lɛ mɛi woɔ wɔ gbɛ́i ni amɛjɛɔ wɔ yɛ wɔtsɔɔmɔi ni jɛ Biblia lɛ mli lɛ ahewɔ. Ákɛ nɔkwɛmɔnɔ lɛ, woloŋlelɔi komɛi tsɔɔ akɛ sutsakemɔ tsɔɔmɔ lɛ ji anɔkwale, ni amɛmaa nɔ mi veveeve akɛ esa akɛ mɔ fɛɛ mɔ ni hiɛ kã shi lɛ akpɛlɛ nɔ. Nɔ ni amɛtaoɔ amɛtsɔɔ ji akɛ, mɛi ni heee nakai tsɔɔmɔ lɛ amɛyeee lɛ, kwashiai ji amɛ. Kɛ́ wɔshiɛ nɔ ni Biblia lɛ tsɔɔ lɛ wɔha mɛi, ni wɔgbala amɛjwɛŋmɔ kɛtee bɔ ni ato adebɔɔ nibii ahe gbɛjianɔ jogbaŋŋ aha lɛ nɔ lɛ, woloŋlelɔi nɛɛ haa mɛi buɔ wɔ akɛ wɔji ‘mɛi ni kɔlɔɔ dumɔwui.’ Shi wɔhaaa no agba wɔnaa. Yɛ no najiaŋ lɛ, wɔkɛ ekãa wieɔ kɛ́ wɔmiifã wɔhemɔkɛyeli akɛ Bɔlɔ ko ni yɔɔ nilee, ni ji Yehowa Nyɔŋmɔ ji mɔ ni bɔ nibii ni wala yɔɔ amɛmli ni yɔɔ shikpɔŋ lɛ nɔ lɛ he lɛ.—Kpoj. 4:11.

8. (a) Te mɛi ni nu Paulo shiɛmɔ lɛ ateŋ mɛi komɛi fee amɛnii amɛha tɛŋŋ? (b) Mɛni kpalamɔ ni akpala Paulo kɛtee Areopago lɛ baanyɛ atsɔɔ? (Kwɛmɔ shishigbɛ niŋmaa ni yɔɔ baafa 142 lɛ.)

8 Mɛi krokomɛi ni nu Paulo shiɛmɔ lɛ yɛ jara lɛ nɔ lɛ fee amɛnii yɛ gbɛ kroko nɔ. Amɛmu sane naa akɛ: “Etamɔ mɔ ni jajeɔ maŋsɛɛ wɔji ahe sane  etsɔɔ.” (Bɔf. 17:18) Ani eji anɔkwale akɛ Paulo miiwie nyɔŋmɔi hei ahe eeha Ateenebii lɛ? Sane nɛɛ yɛ hiɛdɔɔ waa ejaakɛ etamɔ saji ni akɛfɔ̃ Socrates nɔ, ní adamɔ nɔ agbe lɛ yɛ afii ohai komɛi ni tsɔ hiɛ lɛ mli lɛ ateŋ ekome. Ebɛ naakpɛɛ mɔ akɛ akpala Paulo kɛtee Areopago lɛ, ni abi lɛ koni etsɔɔ tsɔɔmɔi ni Ateenebii lɛ buɔ lɛ akɛ eji tsɔɔmɔ hee lɛ mli. * Te Paulo aaafee tɛŋŋ efã eshɛɛ sane lɛ he yɛ mɛi ni leee Ŋmalɛ lɛ he nɔ ko kwraa nɛɛ ahiɛ?

‘Ataamɛi Ateenebii, Miyoo’ (Bɔfoi lɛ Asaji 17:22, 23)

9-11. (a) Mɛɛ gbɛ nɔ Paulo tsɔ ekɛ saji ni etoibolɔi lɛ kpɛlɛɔ nɔ lɛ je eshiɛmɔ lɛ shishi? (b) Te wɔɔfee tɛŋŋ wɔkɛ Paulo nɔkwɛmɔnɔ lɛ atsu nii yɛ wɔshiɛmɔ nitsumɔ lɛ mli?

9 Kaimɔ akɛ Paulo hao waa yɛ wɔŋjamɔi fɛɛ ní ena lɛ ahewɔ. Ewieee eshiii wɔŋjamɔ nyanyaanya, yɛ no najiaŋ lɛ, eŋmɛ etsui shi. Ekɔ ŋaatɛ eŋmɛ nsɛni mli, ni ebɔ mɔdɛŋ ekɛ saji ni etoibolɔi lɛ kpɛlɛɔ nɔ lɛ je eshiɛmɔ lɛ shishi bɔni afee ni ekɛha amɛyiŋ atsɔ. Eje ewiemɔ lɛ shishi akɛ: ‘Ataamɛi Ateenebii,  miyoo yɛ nibii fɛɛ mli akɛ nyɛjáa wɔji pɛpɛɛpɛ.’ (Bɔf. 17:22) Yɛ gbɛ ko nɔ lɛ, Paulo miikɛɛ amɛ akɛ, ‘Miina akɛ nyɛsumɔɔ nyɔŋmɔjamɔ waa.’ Paulo kɛ nilee tsu nii ni ejie amɛyi akɛ amɛsumɔɔ nyɔŋmɔjamɔ. Eyɔse akɛ mɛi ni apasa hemɔkɛyelii eshwila amɛ lɛ ateŋ mɛi komɛi baanyɛ akpɛlɛ anɔkwale lɛ nɔ. Paulo le akɛ be ko ni eho lɛ, lɛ hu ‘lé ni eleee kɛ hé ni eheee eyeee lɛ hewɔ’ efee nakai lɛ.—1 Tim. 1:13.

10 Paulo kɛ saji ni etoibolɔi lɛ kpɛlɛɔ nɔ lɛ je eshiɛmɔ lɛ shishi, ni etsɔɔ akɛ ekɛ ehiŋmɛi ena odaseyeli ni tsɔɔ akɛ Ateenebii lɛ sumɔɔ nyɔŋmɔjamɔ—etsɔɔ akɛ ena afɔleshãalatɛ ko ni ama aha “Nyɔŋmɔ ni aleko lɛ” lɛ. Wolo ko tsɔɔ akɛ, “efɔɔ kaa akɛ Helabii lɛ kɛ mɛi krokomɛi mamɔɔ afɔleshãalatɛi amɛhaa ‘nyɔŋmɔi ní aleee,’ ejaakɛ amɛsheɔ gbeyei akɛ yɛ nyɔŋmɔi nɛɛ ajamɔ mli lɛ, ekolɛ amɛhiɛ ekpa nyɔŋmɔ ko nɔ, ni emli baafu.” Afɔleshãalatɛ nɛɛ ni Ateenebii lɛ ema lɛ tsɔɔ akɛ amɛkpɛlɛɔ nɔ akɛ Nyɔŋmɔ ko yɛ ní amɛleee lɛ. Paulo kɛ afɔleshãalatɛ nɛɛ tsu nii koni ekɛgbala amɛjwɛŋmɔ kɛya sanekpakpa ni eshiɛɔ lɛ nɔ. Etsɔɔ mli akɛ: “Mɔ ni nyɛleee lɛ ni nyɛjáa lɛ kɛ̃ lɛ, lɛ nɔŋŋ ehe sane mijajeɔ mitsɔɔ nyɛ nɛɛ.” (Bɔf. 17:23) Gbɛ ni Paulo tsɔ nɔ ekɛ amɛ yiyii lɛ yɛ nigii shi emɔ shi waa. Mɛi komɛi folɔ enaa akɛ eeshiɛ nyɔŋmɔ hee ko eetsɔɔ, shi jeee nakai ni. Eetsɔɔ amɛ Nyɔŋmɔ ni amɛleee lɛ lɛ—anɔkwa Nyɔŋmɔ lɛ.

11 Te wɔɔfee tɛŋŋ wɔkɛ Paulo nɔkwɛmɔnɔ lɛ atsu nii yɛ wɔshiɛmɔ nitsumɔ lɛ mli? Kɛ́ wɔkɛ wɔhiɛ fɔ̃ shi lɛ, wɔbaanyɛ wɔna odaseyeli ko ni tsɔɔ akɛ mɔ ko sumɔɔ nyɔŋmɔjamɔ, ekolɛ wɔbaana nɔ ko ni ewo, loo nɔ ko yɛ etsũ mli loo eshĩa lɛ mli ni tsɔɔ jamɔ mli ni eyɔɔ. Wɔbaanyɛ wɔkɛɛ akɛ: ‘Miina akɛ osumɔɔ nyɔŋmɔjamɔ waa. Miikpa gbɛ akɛ mikɛ mɔ ko ni sumɔɔ nyɔŋmɔjamɔ tamɔ bo baagba sane.’ Kɛ́ wɔtsɔ ŋaa gbɛ nɔ wɔjie mɔ lɛ yi yɛ bɔ ni esumɔɔ akɛ ejá Nyɔŋmɔ waa eha lɛ he lɛ, no baaha wɔnyɛ wɔkɛ lɛ agba saji ni ekpɛlɛɔ nɔ kɛje wɔshiɛmɔ lɛ shishi. Kaimɔ akɛ oti ni ma wɔhiɛ lɛ jeee ni wɔdamɔ mɛi ajamɔŋ hemɔkɛyelii anɔ wɔtsɔ hiɛ wɔkojo amɛ. Wɔnyɛmimɛi héyelilɔi lɛ ateŋ mɛi babaoo yɛ ni beni amɛbatsɔmɔko anɔkwa Kristofoi lɛ, no mli lɛ amɛheɔ apasa jamɔŋ tsɔɔmɔi amɛyeɔ waa.

Bɔɔ mɔdɛŋ ni okɛ otoibolɔi lɛ agba saji ni amɛkpɛlɛɔ nɔ kɛje oshiɛmɔ lɛ shishi

Nyɔŋmɔ ‘Kɛ Wɔteŋ Mɔ Fɛɛ Mɔ Teŋ Jekɛɛɛ’ (Bɔfoi lɛ Asaji 17:24-28)

12. Mɛɛ gbɛ nɔ Paulo tsɔ eha eshiɛmɔ wiemɔ lɛ kɔ etoibolɔi lɛ ahe?

12 Paulo kɛ saji ni etoibolɔi lɛ kpɛlɛɔ nɔ lɛ je eshiɛmɔ lɛ shishi, shi ani ebaanyɛ eya nɔ efee nakai beni eyeɔ amɛ odase lɛ? Akɛni ele ákɛ akɛ Hela jeŋ nilee etsɔse etoibolɔi lɛ, ni amɛleee Ŋmalɛ lɛ hu hewɔ lɛ, etsɔ gbɛi srɔtoi anɔ etsake eshiɛmɔ wiemɔ lɛ mli koni ekɔ amɛhe. Klɛŋklɛŋ kwraa lɛ, etsɔɔ Biblia mli tsɔɔmɔi lɛ, shi etsɛɛɛ Ŋmalɛi lɛ ayisɛɛ tɛ̃ɛ. Nɔ ni ji enyɔ lɛ, eha etoibolɔi lɛ nu he akɛ enuɔ amɛ shishi, ni efata amɛhe, ni bei komɛi lɛ ekɛ wiemɔ ni ji “wɔ” tsuɔ nii. Nɔ ni ji etɛ lɛ, etsɛ́ saji ayisɛɛ kɛjɛ Helabii awoji amli koni ekɛtsɔɔ akɛ aŋmala nibii komɛi ni ewieɔ he lɛ yɛ amɛ diɛŋtsɛ amɛwoji amli. Agbɛnɛ lɛ, nyɛhaa wɔpɛia Paulo wiemɔ ni kanyaa mɔ waa lɛ mli wɔkwɛa. Mɛɛ anɔkwalei komɛi ni he hiaa waa eha ale yɛ Nyɔŋmɔ ni Ateenebii lɛ leee lɛ lɛ he?

13. Mɛni Paulo wie yɛ bɔ ni fee ni je lɛ ba shihilɛ mli lɛ he, ni mɛni ji eshɛɛ sane lɛ shishinumɔ?

 13 Nyɔŋmɔ bɔ jeŋ muu lɛ fɛɛ. Paulo kɛɛ akɛ: “Nyɔŋmɔ ni fee je lɛ kɛ emli nibii fɛɛ, ni ji ŋwɛi kɛ shikpɔŋ Nuŋtsɔ lɛ, ehiii sɔlemɔtsui ni akɛ niji fee mli.” * (Bɔf. 17:24) Je lɛ baaa trukaa. Anɔkwa Nyɔŋmɔ lɛ ji mɔ ni bɔ nibii fɛɛ. (Lala 146:6) Nuŋtsɔ Maŋtsɛ ní bɔ ŋwɛi kɛ shikpɔŋ lɛ tamɔɔɔ Ateena loo wɔji krokomɛi ni amamɔ sɔlemɔtsui, gbatsui, kɛ afɔleshãalatɛi koni akɛwo amɛhiɛ nyam lɛ, ejaakɛ anyɛŋ ato lɛ yɛ sɔlemɔtsui ni akɛ niji fee lɛ amli. (1 Maŋ. 8:27) Paulo shɛɛ sane lɛ shishinumɔ yɛ faŋŋ: Anɔkwa Nyɔŋmɔ lɛ je agbo kwraa fe wɔji ní akɛ niji fee awo sɔlemɔtsui ni akɛ niji mamɔ lɛ amli.—Yes. 40:18-26.

14. Mɛɛ gbɛ nɔ Paulo ha ana akɛ adesai ayelikɛbuamɔ he ehiaaa Nyɔŋmɔ?

14 Adesai ayelikɛbuamɔ he ehiaaa Nyɔŋmɔ. Wɔŋjalɔi wulaa amɛwɔji kɛ atadei fɛfɛji, amɛkɛ nikeenii wuji bahaa amɛ, ni amɛhaa amɛ niyenii kɛ dãa—oookɛɛ nɔ ni nakai nibii lɛ ahe miihia wɔji lɛ! Shi ekolɛ Hela jeŋ nilelɔi lɛ ekomɛi ní fata Paulo toibolɔi lɛ ahe lɛ heɔ amɛyeɔ akɛ adesai ayelikɛbuamɔ he ehiaaa nyɔŋmɔ ko. Kɛ́ nakai ni lɛ, belɛ eyɛ faŋŋ akɛ amɛkɛ wiemɔ ni Paulo wie ákɛ “akɛ gbɔmɛi aniji jaaa” Nyɔŋmɔ “tamɔ mɔ ko ni nɔ ko fiɔ lɛ” lɛ kpãa gbee. Hɛɛ, heloonaa nɔ ko nɔ ko bɛ ni adesai baanyɛ amɛkɛha Bɔlɔ lɛ! Yɛ no najiaŋ lɛ, lɛ moŋ ekɛ nibii ni he hiaa adesai lɛ haa amɛ—“wala kɛ mumɔ kɛ nii fɛɛ,” ni hulu, nugbɔnɛmɔ, kɛ sũ ni baa nii fata he. (Bɔf. 17:25; 1 Mose 2:7) No hewɔ lɛ, adesai ayelikɛbuamɔ ko he ehiaaa Nyɔŋmɔ, ni ji mɔ ni kɛ nibii fɛɛ haa adesai lɛ.

15. Te Paulo tsu bɔ ni Ateenebii lɛ buɔ amɛhe akɛ amɛnɔ kwɔlɔ fe mɛi ni jeee Helabii lɛ he nii eha tɛŋŋ, ni mɛɛ sane ko ni he hiaa waa wɔbaanyɛ wɔkase kɛjɛ Paulo nɔkwɛmɔnɔ lɛ mli?

15 Nyɔŋmɔ bɔ gbɔmɔ. Ateenebii lɛ buɔ amɛhe akɛ amɛnɔ kwɔlɔ fe mɛi ni jeee Helabii lɛ. Shi kɛ́ maŋ ko nɔ bii buɔ amɛhe akɛ amɛ nɔ kwɔlɔ fe maŋ kroko nɔ bii, loo ákɛ amɛhewolonɔ su hi fe mɛi krokomɛi anɔ̃ lɛ, no kɛ Biblia  mli anɔkwalei lɛ kpãaa gbee. (5 Mose 10:17) Paulo kɛ nilee kɛ ŋaa tsu sane ni ehe nitsumɔ biɔ ni akwɛ he nɔ jogbaŋŋ nɛɛ he nii. Beni Paulo kɛɛ akɛ, “lá kome [Nyɔŋmɔ] ŋɔfee gbɔmɛi adesai fɛɛ” lɛ, ekã shi faŋŋ akɛ wiemɔi nɛɛ ha etoibolɔi lɛ susu nii ahe jogbaŋŋ. (Bɔf. 17:26) No mli lɛ eewie Mose Klɛŋklɛŋ Wolo lɛ mli sane ni kɔɔ Adam, mɔ nɔ ni adesai fɛɛ tsɔ kɛba shihilɛ mli lɛ he. (1 Mose 1:26-28) Akɛni adesai fɛɛ jɛ gbɔmɔ kome mli hewɔ lɛ, maŋ ko nɔ bii ehiii fe maŋ kroko nɔ bii. Ekã shi faŋŋ akɛ Paulo toibolɔi lɛ fɛɛ nu sane nɛɛ shishi jogbaŋŋ. Wɔkaseɔ sane ko ni he hiaa waa kɛjɛɔ Paulo nɔkwɛmɔnɔ lɛ mli. Eyɛ mli akɛ esa akɛ wɔkɛ ŋaa kɛ hiɛshikamɔ atsu nii yɛ wɔshiɛmɔ nitsumɔ lɛ mli moŋ, shi esaaa akɛ wɔtsĩmɔ Biblia mli anɔkwalei lɛ anɔ akɛni wɔmiitao ni mɛi akpɛlɛ nɔ lɛ hewɔ.

16. Mɛni ji yiŋtoo hewɔ ni Bɔlɔ lɛ bɔ adesai?

16 Nyɔŋmɔ to eyiŋ akɛ adesai abɛŋkɛ lɛ. Kɛji jeŋ nilelɔi ni fata Paulo toibolɔi lɛ ahe lɛ kɛ bei babaoo etaa sane naa yɛ nɔ̃ hewɔ ni adesai yɔɔ shihilɛ mli lɛ he diɛŋtsɛ po lɛ, amɛnyɛɛɛ amɛtsɔɔ mli jogbaŋŋ kɔkɔɔkɔ. Shi Paulo ha yiŋtoo hewɔ ní Bɔlɔ lɛ bɔ adesai lɛ fee faŋŋ, etsɔɔ mli akɛ, “koni amɛtao Nyɔŋmɔ sɛɛgbɛ, akɛ aleenɔ kɛ́ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ fɛɛ mɔ teŋ jekɛɛɛ.” (Bɔf. 17:27) Abaanyɛ ale Nyɔŋmɔ ni Ateenebii lɛ leee lɛ lɛ. Ekɛ mɛi ni sumɔɔ diɛŋtsɛ akɛ amɛle lɛ ní amɛkase ehe nii lɛ ateŋ jekɛɛɛ. (Lala 145:18) Kadimɔ akɛ Paulo kɛ wiemɔ ni ji “wɔ” tsu nii, ni tsɔɔ akɛ lɛ hu efata mɛi ni esa akɛ “amɛtao” Nyɔŋmɔ sɛɛgbɛ ní “amɛgbugbuu shi” amɛtao lɛ lɛ ahe.

17, 18. Mɛni hewɔ esa akɛ adesai anu he akɛ amɛbɛŋkɛ Nyɔŋmɔ lɛ, ni mɛni wɔbaanyɛ wɔkase kɛjɛ gbɛ nɔ ni Paulo tsɔ eshɛ etoibolɔi lɛ atsui he lɛ mli?

17 Esa akɛ adesai anu he akɛ amɛbɛŋkɛ Nyɔŋmɔ. Paulo tsɔɔ akɛ Nyɔŋmɔ  hewɔ “wɔhiɛ kamɔ ni wɔtsiɔ wɔhe ni wɔyɔɔ.” Woloŋlelɔi komɛi kɛɔ akɛ Paulo tsɛ́ wiemɔi nɛɛ ayisɛɛ kɛjɛ Epimenides ni jɛ Kreta lɛ lala wiemɔi amli; nuu nɛɛ hi shi yɛ afi 500 D.Ŋ.B. afii lɛ amli ni “eji mɔ ko ni abuɔ lɛ waa yɛ Ateenebii lɛ ajamɔ mli nifeemɔi amli.” Paulo tsɔɔ nɔ kroko hewɔ ni esa akɛ adesai anu he akɛ amɛbɛŋkɛ Nyɔŋmɔ, ni ekɛɛ akɛ: “Nyɛ diɛŋtsɛ nyɛlalatsɛmɛi lɛ ekomɛi hu ekɛɛ akɛ: shi lɛ nɔŋŋ eshwiei ji wɔ hu.” (Bɔf. 17:28) Esa akɛ adesai anu he diɛŋtsɛ akɛ wekukpãa ni bɛŋkɛ kpaakpa kã amɛ kɛ Nyɔŋmɔ teŋ, ejaakɛ lɛ ebɔ klɛŋklɛŋ adesa, mɔ mli ni adesai fɛɛ jɛ lɛ. Bɔni afee ni Paulo ashɛ etoibolɔi lɛ atsui he lɛ, ejɛ nilee mli etsɛ́ sane yisɛɛ tɛ̃ɛ kɛjɛ Hela niŋmai ní ekã shi faŋŋ akɛ etoibolɔi lɛ buɔ waa lɛ amli. * Yɛ Paulo nɔkwɛmɔnɔ lɛ naa lɛ, wɔ hu bei komɛi lɛ wɔbaanyɛ wɔtsɛ́ saji fioo komɛi ayisɛɛ kɛjɛ woji ni wieɔ yinɔsane he, ɛnsaiklopidiai srɔtoi, loo woji krokomɛi ni akpɛlɛɔ nɔ lɛ amli. Ákɛ nɔkwɛmɔnɔ lɛ, kɛ́ wɔtsɛ́ sane ko ni sa yisɛɛ kɛjɛ wolo ko ní abuɔ waa lɛ mli lɛ, no baanyɛ aye abua mɔ ko ní jeee Odasefonyo koni eyiŋ atsɔ akɛ jamɔ gbii juji komɛi jɛ wɔŋjamɔ mli.

18 Kɛjɛ Paulo wiemɔ lɛ shishijee aahu kɛbashi biɛ lɛ, eha ale Nyɔŋmɔ he anɔkwalei ni he hiaa waa, ni etsɔ ŋaa gbɛ nɔ eha ewiemɔi lɛ kɔ etoibolɔi lɛ ahe. Mɛni Paulo taoɔ akɛ Ateenebii ni boɔ lɛ toi lɛ afee yɛ sane ni he hiaa waa nɛɛ he? Eshashaooo shi kwraa, etee nɔ etsɔɔ amɛ nɔ ni esa akɛ amɛfee beni etsaa ewiemɔ lɛ nɔ lɛ.

‘Gbɔmɛi Fɛɛ ní Yɔɔ He Fɛɛ He Atsake Amɛtsui’ (Bɔfoi lɛ Asaji 17:29-31)

19, 20. (a) Mɛɛ gbɛ nɔ Paulo kɛ ŋaa tsu nii ni eha efee faŋŋ akɛ nilee bɛ mli akɛ aaajá wɔji ní akɛ niji fee? (b) Mɛni ehe bahia ni Paulo toibolɔi lɛ afee?

19 Agbɛnɛ lɛ, Paulo efee klalo akɛ ebaawo etoibolɔi lɛ hewalɛ ní amɛfee nɔ ko. Ewie sane ni etsɛ́ yisɛɛ kɛjɛ Hela niŋmai lɛ amli lɛ he ekoŋŋ ni ekɛɛ akɛ: “Shi kɛ́ Nyɔŋmɔ shwiei ji wɔ lɛ, esaaa akɛ wɔsusuɔ akɛ Nyɔŋmɔ su lɛ tamɔ shika loo jwiɛtɛi loo tɛ ko ní gbɔmɔ kɛ eŋaa kɛ ejwɛŋmɔ fee.” (Bɔf. 17:29) Eji anɔkwale akɛ, kɛ́ Nyɔŋmɔ shwiei ji adesai lɛ, belɛ te aaafee tɛŋŋ ní Nyɔŋmɔ su aaatamɔ wɔji ní gbɔmɛi kɛ amɛniji fee lɛ? Ŋaa gbɛ ni Paulo tsɔ nɔ ekɛ amɛ yiyii lɛ feɔ lɛ faŋŋ akɛ nilee bɛ mli akɛ aaajá wɔji ní akɛ niji fee. (Lala 115:4-8; Yes. 44:9-20) Wiemɔ ni Paulo wie akɛ ‘esaaa akɛ wɔsusuɔ . . . ’ lɛ tsɔɔ akɛ Paulo dɔ elilɛi mli koni ewiemɔ lɛ akawo etoibolɔi lɛ amli la.

20 Paulo ha amɛle nɔ ni esa akɛ amɛfee lɛ faŋŋ, ekɛɛ akɛ: “Bei ní aleee lɛ [ni ji be ni asusu akɛ Nyɔŋmɔ kpɛlɛɔ adesai ni jáa wɔŋ lɛ anɔ lɛ,] Nyɔŋmɔ eku ehiɛ efɔ̃ nɔ, shi agbɛnɛ lɛ eewo gbɔmɛi fɛɛ ní yɔɔ he fɛɛ he lɛ kita akɛ amɛtsake amɛtsui.” (Bɔf. 17:30) Ekolɛ Paulo toibolɔi lɛ ateŋ mɛi komɛi anaa kpɛ amɛhe akɛ aakɛɛ amɛ akɛ amɛtsake amɛtsui. Shi ewiemɔ ni kanyaa mɔ lɛ fee lɛ faŋŋ akɛ Nyɔŋmɔ hewɔ ni amɛyɔɔ shihilɛ mli lɛ, ni ákɛ amɛbaabu amɛhe akɔntaa amɛha Lɛ. Esa akɛ amɛtao Nyɔŋmɔ sɛɛgbɛ, amɛkase anɔkwale ni kɔɔ ehe lɛ, ní amɛha amɛshihilɛ gbɛ fɛɛ kɛ nakai anɔkwale lɛ akpã  gbee. Enɛ baabi ni Ateenebii lɛ ayɔse akɛ wɔŋjamɔ ji esha, ní amɛtsi amɛhe kɛjɛ he.

21, 22. Mɛɛ wiemɔi ni kanyaa mɔ waa Paulo kɛmu ewiemɔ lɛ naa, ni te wɔnuɔ ewiemɔi lɛ ashishi ŋmɛnɛ wɔhaa tɛŋŋ?

21 Paulo kɛ wiemɔi ni kanyaa mɔ waa nɛɛ mu ewiemɔ lɛ naa: “[Nyɔŋmɔ] eto gbi ko, nɔ̃ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa, akɛni ekɛ hemɔkɛyeli eto mɔ fɛɛ mɔ hiɛ, ejaakɛ etee lɛ shi kɛjɛ gbohii ateŋ lɛ.” (Bɔf. 17:31) Kojomɔ Gbi ko miiba—enɛ ji yiŋtoo ni yɔɔ hiɛdɔɔ hewɔ ni esa akɛ atao anɔkwa Nyɔŋmɔ lɛ sɛɛgbɛ ní ana lɛ lɛ! Paulo tsɛɛɛ Kojolɔ ní ato lɛ gbɛ́i. Yɛ no najiaŋ lɛ, Paulo wie nɔ ko ni sa kadimɔ waa yɛ Kojolɔ nɛɛ he: Ehi shi pɛŋ akɛ gbɔmɔ, agbe lɛ, ni Nyɔŋmɔ tee lɛ shi kɛjɛ gbohii ateŋ!

22 Ŋmɛnɛ lɛ wɔnuɔ sane ni kanyaa mɔ ní Paulo kɛmu ewiemɔ lɛ naa lɛ shishi jogbaŋŋ. Wɔle akɛ Yesu Kristo ní atee lɛ shi lɛ ji Kojolɔ ni Nyɔŋmɔ eto lɛ. (Yoh. 5:22) Wɔle hu akɛ Kojomɔ Gbi lɛ baahe afii akpe, ni eebɛŋkɛ oyayaayai. (Kpoj. 20:4, 6) Wɔsheee Kojomɔ Gbi lɛ gbeyei, ejaakɛ wɔle akɛ ebaaha mɛi ni abaabu amɛ anɔkwafoi lɛ aná jɔɔmɔi babaoo ní wɔjwɛŋmɔ nyɛŋ akpele he. Naakpɛɛ nii ni fe fɛɛ, ni ji Yesu Kristo shitee lɛ, maa nɔ mi akɛ hiɛnɔkamɔ ni wɔyɔɔ akɛ wɔbaaná shihilɛ kpakpa wɔsɛɛ lɛ baaba mli lɛɛlɛŋ!

‘Mɛi Komɛi Hé Amɛye’ (Bɔfoi lɛ Asaji 17:32-34)

23. Te mɛi fee amɛnii yɛ Paulo wiemɔ lɛ he amɛha tɛŋŋ?

23 Mɛi fee amɛnii yɛ gbɛi srɔtoi anɔ yɛ Paulo wiemɔ lɛ he. “Mɛi komɛi ye ehe fɛo” beni amɛnu ní ewie gbohiiashitee lɛ he lɛ. Mɛi komɛi yeee ehe fɛo, shi amɛtsakeee amɛtsui hu, amɛkɛɛ kɛkɛ akɛ: “Wɔɔsaa wɔbo bo toi ekoŋŋ yɛ enɛ hewɔ.” (Bɔf. 17:32) Shi mɛi fioo komɛi fee tsakemɔ, ni awie yɛ amɛhe akɛ: “Hii komɛi kɛ amɛhe kpɛtɛ ehe ni amɛhé amɛye; amɛteŋ mɛi komɛi ji Dionisio, Areopagonyo lɛ hu, kɛ yoo ko ni atsɛɔ lɛ Damari lɛ, kɛ mɛi krokomɛi ni fata amɛhe.” (Bɔf. 17:34) Mɛi feɔ amɛnii yɛ gbɛ ni tamɔ nakai nɔŋŋ nɔ yɛ wɔshiɛmɔ nitsumɔ lɛ he. Mɛi komɛi yeɔ wɔhe fɛo, ni mɛi komɛi hu boɔ wɔ toi shi amɛfeee tsakemɔ ko. Shi kɛlɛ, mɛi komɛi kpɛlɛɔ Maŋtsɛyeli shɛɛ sane lɛ nɔ ni amɛbatsɔmɔɔ héyelilɔi, ni enɛ haa wɔnáa miishɛɛ waa.

24. Mɛni wɔbaanyɛ wɔkase kɛjɛ wiemɔ ni Paulo ha beni akɛ lɛ tee Areopago lɛ hiɛ lɛ mli?

24 Kɛ́ wɔjwɛŋ wiemɔ ní Paulo ha lɛ nɔ lɛ, wɔbaakase nibii babaoo ni tsɔɔ bɔ ni wɔɔfee wɔto wɔshiɛmɔ wiemɔi lɛ anaa ní shishinumɔ aba he, ní ekɔne mɛi ayiŋ, kɛ agbɛnɛ hu bɔ ni wɔɔfee wɔha wɔshiɛmɔ wiemɔ lɛ akɔ wɔtoibolɔi lɛ ahe. Kɛfata he lɛ, wɔbaanyɛ wɔkase bɔ ni esa akɛ wɔkɛ ŋaa atsu nii, ní wɔto wɔtsui shi kɛ́ wɔmiishiɛ wɔmiiha mɛi ni apasa jamɔŋ hemɔkɛyelii eshwila amɛ lɛ. Wɔbaanyɛ wɔkase sane ni he hiaa waa nɛɛ hu: Esaaa akɛ wɔtsĩmɔɔ Biblia mli anɔkwalei lɛ anɔ kɔkɔɔkɔ ákɛ no baaha wɔtoibolɔi lɛ akpɛlɛ nɔ. Kɛ́ wɔkase bɔfo Paulo nɔkwɛmɔnɔ lɛ, wɔbaanyɛ wɔtsɔmɔ tsɔɔlɔi ni he esa jogbaŋŋ yɛ shiɛmɔ nitsumɔ lɛ mli. Kɛfata he lɛ, kɛ́ nɔkwɛlɔi ni yɔɔ asafo lɛ mli lɛ hu kase Paulo nɔkwɛmɔnɔ lɛ, amɛbaatsɔmɔ tsɔɔlɔi ni sa jogbaŋŋ fe tsutsu lɛ. Enɛ baaha wɔ fɛɛ wɔfee mɛi ni sa jogbaŋŋ ní baaye abua mɛi koni ‘amɛtao Nyɔŋmɔ sɛɛgbɛ, ni amɛaana lɛ.’—Bɔf. 17:27.

^ kk. 4 Kwɛmɔ akrabatsa ni ji  “Ateene—Blema He ko ní Shihilɛ Mli Nifeemɔi Hé Shi Waa Yɛ,” ni yɔɔ baafa 142 lɛ.

^ kk. 5 Kwɛmɔ akrabatsa ni ji  “Epikuromɛi kɛ Stoamɛi,” ni yɔɔ baafa 144 lɛ.

^ kk. 8 Areopago lɛ yɛ Acropolis gɔŋkpɔ lɛ kooyi-anaigbɛ, ni eji maŋ onukpai akuu ni yɔɔ Ateene lɛ akpeehe. Wiemɔ ni ji “Areopago” lɛ baanyɛ atsɔɔ kuu lɛ loo gɔŋkpɔ lɛ diɛŋtsɛ. No hewɔ lɛ, woloŋlelɔi komɛi susuɔ ákɛ akɛ Paulo tee nakai gɔŋkpɔ lɛ nɔ loo he ko ni bɛŋkɛ gɔŋkpɔ nɛɛ, ni mɛi krokomɛi hu susuɔ ákɛ akɛ lɛ tee maŋ onukpai akuu lɛ hiɛ yɛ he kroko, ekolɛ yɛ jara lɛ nɔ.

^ kk. 13 Hela wiemɔ ni atsɔɔ shishi akɛ “je lɛ” ji koʹsmos, ni Helabii lɛ kɛ wiemɔ nɛɛ tsuɔ nii kɛ́ amɛmiiwie jeŋ muu lɛ diɛŋtsɛ he. Eeenyɛ efee akɛ akɛni Paulo miitao eya nɔ ewie saji ni etoibolɔi ni ji Helabii lɛ kpɛlɛɔ nɔ yɛ eshiɛmɔ wiemɔ lɛ mli hewɔ lɛ, ekɛ Hela wiemɔ nɛɛ tsu nii yɛ nakai shishinumɔ naa.

^ kk. 17 Paulo tsɛ́ wiemɔi lɛ ayisɛɛ kɛjɛ Aratus ní eji Stoanyo lɛ lala wiemɔ ni kɔɔ ŋulamii ahe ní atsɛɔ lɛ Phaenomena lɛ mli. Wiemɔi ni tamɔ nakai nɔŋŋ jeɔ kpo yɛ Hela niŋmai krokomɛi, tamɔ Hymn to Zeus ní Cleanthes ní eji Stoanyo lɛ ŋma lɛ amli.