Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 11

‘Amɛyimɔ Obɔbɔ Kɛ Miishɛɛ Kɛ Mumɔ Krɔŋkrɔŋ’

‘Amɛyimɔ Obɔbɔ Kɛ Miishɛɛ Kɛ Mumɔ Krɔŋkrɔŋ’

Nɔ ni Paulo feɔ kɛ́ ekɛ shitee-kɛwolɔi ní booo wiemɔ lɛ toi kpe

Edamɔ Bɔfoi lɛ Asaji 13:1-52 lɛ nɔ

1, 2. Mɛni ji nɔ ni sa kadimɔ waa yɛ gbɛ ni Barnaba kɛ Saulo baafa lɛ he, ni mɛɛ gbɛ nɔ amɛnitsumɔ lɛ baaye abua kɛha Bɔfoi lɛ Asaji 1:8 lɛ aba mli?

EJI miishɛɛ gbi kɛha Antiokia asafo lɛ. Yɛ gbalɔi kɛ tsɔɔlɔi ni yɔɔ biɛ lɛ fɛɛ sɛɛ lɛ, mumɔ krɔŋkrɔŋ lɛ hala Barnaba kɛ Saulo koni amɛkɛ sanekpakpa lɛ aya hei ni yɔɔ shɔŋŋ. * (Bɔf. 13:1, 2) Eji anɔkwale akɛ, awo hii ni sa gbɛ pɛŋ koni amɛyashiɛ yɛ maŋsɛɛ. Shi nakai beaŋ lɛ, amɛtee hei ni akpɛlɛ sanekpakpa lɛ nɔ yɛ jɛmɛ momo. (Bɔf. 8:14; 11:22) Shi agbɛnɛ lɛ, abaatsu Barnaba kɛ Saulo—kɛ Yohane Marko, mɔ ni baafee amɛsɔɔlɔ lɛ—kɛya hei ni mɛi pii nuko sanekpakpa lɛ.

2 Aaafee afii 14 ni tsɔ hiɛ lɛ, Yesu kɛɛ esɛɛnyiɛlɔi lɛ akɛ: “Nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔf. 1:8) Barnaba kɛ Saulo ni ahala amɛ koni amɛsɔmɔ akɛ maŋsɛɛ shiɛlɔi lɛ baaye abua koni Yesu gbalɛ wiemɔi lɛ aba mli! *

Ajie Amɛ ‘Kɛha Nitsumɔ Lɛ’ (Bɔfoi lɛ Asaji 13:1-12)

3. Mɛni haa gbɛfãa kakadaŋŋ feɔ nɔ ni wa waa yɛ klɛŋklɛŋ afii 100 lɛ mli lɛ?

3 Ŋmɛnɛ lɛ, yɛ tsɔji kɛ kɔɔyɔŋ lɛji ahewɔ lɛ, mɛi baanyɛ amɛfã gbɛ kɛya shɔŋŋ yɛ ŋmɛlɛtswaa kome loo enyɔ mli. Ebɛ lɛ nakai yɛ klɛŋklɛŋ afii 100 Ŋ.B. Yɛ nakai beaŋ lɛ, kɛ́ aafã gbɛ lɛ, nyiɛmɔ anyiɛɔ titri, ni bei pii lɛ anyiɛɔ kɛtsɔɔ hei ni yɔɔ dokoidokoi. Gbi kome gbɛ nyiɛmɔ aaafee kilomitai 30, ni tɔlɛ yɛ mli waa diɛŋtsɛ! * No hewɔ lɛ, eyɛ mli akɛ Barnaba kɛ Saulo kɛ miishɛɛ kpá nitsumɔ ni akɛwo amɛdɛŋ lɛ gbɛ moŋ, shi ekã shi faŋŋ akɛ amɛyɔse akɛ ebaabi hiɛmiamɔ kɛ hekɛ-afɔleshaa.—Mat. 16:24.

4. (a) Mɛni kudɔ Barnaba kɛ Saulo halamɔ lɛ, ni te amɛnyɛmimɛi héyelilɔi lɛ fee amɛnii yɛ amɛhalamɔ lɛ he amɛha tɛŋŋ? (b) Mɛɛ gbɛ nɔ wɔbaanyɛ wɔfi mɛi ni akɛ sɔɔmɔ hegbɛi woɔ amɛdɛŋ lɛ asɛɛ?

4 Shi mɛni hewɔ mumɔ krɔŋkrɔŋ lɛ ha afã Barnaba kɛ Saulo ‘kɛha  nitsumɔ lɛ’? (Bɔf. 13:2) Biblia lɛ etsɔɔɔ. Nɔ ni wɔle ji akɛ mumɔ krɔŋkrɔŋ lɛ ni kudɔ hii nɛɛ ahalamɔ lɛ. Nɔ ko nɔ ko bɛ ni tsɔɔ akɛ gbalɔi kɛ tsɔɔlɔi ni yɔɔ Antiokia lɛ kpoo yiŋkpɛɛ nɛɛ. Yɛ no najiaŋ lɛ, amɛfi amɛhalamɔ lɛ sɛɛ. Bo lɛ susumɔ bɔ ni Barnaba kɛ Saulo baanu he amɛha beni amɛna akɛ amɛnyɛmimɛi Kristofoi lɛ yeee awuŋa, shi moŋ “amɛhi ŋmaa ni amɛsɔle, ni amɛkɛ amɛniji ŋmɛlɛ amɛnɔ ni amɛwo amɛ gbɛ” lɛ he okwɛ. (Bɔf. 13:3) Esa akɛ wɔ hu wɔfi mɛi ni akɛ sɔɔmɔ hegbɛi woɔ amɛdɛŋ ní asafoŋ onukpai lɛ fata he lɛ asɛɛ. Nɔ̃ najiaŋ ni wɔɔye mɛi ni náa hegbɛi nɛɛ ahe awuŋa lɛ, esa akɛ ‘wɔbu amɛ naakpa diɛŋtsɛ yɛ suɔmɔ mli, yɛ amɛnitsumɔ lɛ hewɔ.’—1 Tes. 5:13.

5. Tsɔɔmɔ bɔ ni atsu shiɛmɔ nitsumɔ lɛ aha yɛ Kipro ŋshɔkpɔ lɛ nɔ.

5 Beni Barnaba kɛ Saulo nyiɛ kɛshɛ Seleukia, ni ji lɛjiadaamɔhe ni bɛŋkɛ Antiokia lɛ, amɛkɛ lɛlɛ fã gbɛ aaafee kilomitai 200 kɛtee Kipro ŋshɔkpɔ lɛ nɔ. * Akɛni Barnaba jɛ Kipro hewɔ lɛ, ŋwanejee ko bɛ he akɛ eyɛ he miishɛɛ akɛ ekɛ sanekpakpa lɛ baaya ayaha mɛi ni yɔɔ jɛmɛ lɛ. Beni hii nɛɛ yashɛ Salami, ni ji maŋ ko ni yɔɔ ŋshɔkpɔ lɛ bokagbɛ lɛ, amɛfiteee be kwraa. Amrɔ lɛ nɔŋŋ, “amɛjaje Nyɔŋmɔ wiemɔ lɛ yɛ Yudafoi lɛ akpeehei lɛ.” * (Bɔf. 13:5) Amɛfã gbɛ kɛjɛ Kipro maŋ lɛ naagbee hé kome  kɛtee enaagbee hé kroko, ni ekã shi faŋŋ akɛ amɛshiɛ yɛ maji wuji ni yɔɔ gbɛ lɛ nɔ lɛ amli. Ekolɛ he gbɛ ni maŋsɛɛ shiɛlɔi nɛɛ tsɔ lɛ ha amɛnyiɛ nɔ ni miihe ashɛ kilomitai 220!

6, 7. (a) Namɔ ji Sergio Paulo, ni mɛni hewɔ Bar-Yesu je enijiaŋ wui koni ekabo sanekpakpa lɛ toi lɛ? (b) Mɛɛ gbɛ nɔ Saulo ku Bar-Yesu shitee-kɛwoo lɛ naa?

6 Yɛ klɛŋklɛŋ afii 100 lɛ mli lɛ, no mli lɛ Kipro ji maŋ ko ni emli eyi obɔ kɛ apasa jamɔ. Barnaba kɛ Saulo na enɛ faŋŋ beni amɛshɛ Pafo ní yɔɔ ŋshɔkpɔ lɛ anaigbɛ lɛ. Beni amɛshɛ jɛmɛ lɛ, amɛna “Yudanyo ŋkunyaayelɔ kɛ amale gbalɔ ko ni atsɛɔ lɛ Bar-Yesu, mɔ ni kɛ amralo Sergio Paulo ni ji nuu hiɛshikalɔ lɛ yɔɔ lɛ.” * Yɛ klɛŋklɛŋ afii 100 lɛ mli lɛ, kɛ́ Romabii ni le nii waa ni nuɔ saji ni mli wawai ashishi—tamɔ “nuu hiɛshikalɔ” Sergio Paulo po—baakpɛ yiŋ ko ni yɔɔ hiɛdɔɔ lɛ, bei pii lɛ amɛyaa ŋkunyaayelɔ loo ŋulamiiaŋkwɛlɔ ko ŋɔɔ kɛha yelikɛbuamɔ. Shi kɛlɛ, Sergio Paulo ná Maŋtsɛyeli shɛɛ sane lɛ he miishɛɛ, ni “eetao akɛ ebo Nyɔŋmɔ wiemɔ lɛ toi.” Sane nɛɛ eŋɔɔɔ Bar-Yesu, mɔ ni enitsumɔ hewɔ lɛ atsɛɔ lɛ akɛ Elima, ni eshishi ji “Ŋkunyaayelɔ” lɛ naa kwraa.—Bɔf. 13:6-8.

7 Bar-Yesu te shi ewo Maŋtsɛyeli shɛɛ sane lɛ. Yɛ anɔkwale mli lɛ, gbɛ pɛ ni ebaanyɛ etsɔ nɔ ebu gbɛhe ni nɔ kwɔ ni ehiɛ akɛ Sergio Paulo ŋaawolɔ lɛ he ji ní “ekpale amralo lɛ kɛjɛ hemɔkɛyeli lɛ he.” (Bɔf. 13:8) Shi Saulo taŋ shi ekwɛ ni ŋkunyaayelɔ ko afite wiemɔ lɛ he miishɛɛ ni Sergio Paulo ená lɛ. No hewɔ lɛ, mɛni Saulo fee? Amaniɛbɔɔ lɛ kɛɛ akɛ: “Ni Saulo, mɔ ni atsɛɔ lɛ Paulo hu, ni Mumɔ krɔŋkrɔŋ eyi lɛ obɔ lɛ, kwɛ [Bar-Yesu] gãa ni ekɛɛ: O abonsam bi ni shishiumɔ kɛ kutumpɔo fɛɛ eyio obɔ, bo jalɛ fɛɛ henyɛlɔ; aso ofɔ̃ɔɔ Nuŋtsɔ [Yehowa] gbɛ̀i trɔmɔɔi lɛ akɔdɔmɔ? ni agbɛnɛ naa, Nuŋtsɔ [Yehowa] nine kã onɔ, ni oooshwila ni onaŋ hulu kɛyashi be ko. Ni amrɔ lɛ nɔŋŋ afua kɛ duŋ banyɔ enɔ, ni egbugbuu shi eetao mɛi  amɔ enine mli ayajie lɛ gbɛ.” * Mɛni jɛ naakpɛɛ nifeemɔ nɛɛ mli kɛba? “Amralo lɛ, beni ena nɔ ni afee lɛ, ehé eye, ni ehe jɔ̃ ehe yɛ Nuŋtsɔ [Yehowa] tsɔɔmɔ lɛ hewɔ.”—Bɔf. 13:9-12.

Kɛ́ ate shi awo wɔ lɛ, wɔkɛ ekãa fãa anɔkwale lɛ he, taakɛ Paulo fee lɛ

8. Mɛɛ gbɛ nɔ wɔbaanyɛ wɔkase ekãa ni Paulo jie lɛ kpo lɛ ŋmɛnɛ?

8 Paulo haaa Bar-Yesu awo ehe gbeyei. Nakai nɔŋŋ esaaa akɛ wɔsheɔ shitee-kɛwolɔi ni bɔɔ mɔdɛŋ akɛ amɛfite mɛi ni yɔɔ Maŋtsɛyeli shɛɛ sane lɛ he miishɛɛ lɛ ahemɔkɛyeli lɛ agbeyei. Shi esa akɛ wɔha ‘wɔwiemɔ he aba nyam daa, ni ŋoo ahi mli.’ (Kol. 4:6) Ni yɛ nakai beaŋ nɔŋŋ lɛ, esaaa akɛ wɔhaoɔ fe nine yɛ naagbai ni baanyɛ aba lɛ ahewɔ aahu akɛ, wɔkɛ shɛɛ sane lɛ haŋ mɛi ni yɔɔ wiemɔ lɛ he miishɛɛ lɛ. Nakai nɔŋŋ esaaa akɛ gbeyeishemɔ haa wɔgbalaa wɔhe shi akɛ wɔɔkpa apasa jamɔ ni yaa nɔ ‘ekɔdɔɔ Yehowa gbɛi trɔmɔɔ lɛ,’ taakɛ Bar-Yesu fee lɛ he mama. (Bɔf. 13:10) Nyɛhaa wɔkɛ ekãa ajajea anɔkwale lɛ, ni wɔha mɛi ni hiɛ tsuijurɔ lɛ aná wiemɔ lɛ he miishɛɛ, taakɛ Paulo fee lɛ. Ni eyɛ mli akɛ wɔkɛ wɔhiŋmɛi enaŋ akɛ Nyɔŋmɔ miifi wɔsɛɛ taakɛ ebalɛ yɛ Paulo gbɛfaŋ lɛ moŋ, shi wɔbaanyɛ wɔná nɔmimaa akɛ Yehowa kɛ emumɔ krɔŋkrɔŋ lɛ baatsu nii koni ekɛgbala mɛi ni sa lɛ kɛba anɔkwale lɛ he.—Yoh. 6:44.

“Wiemɔ Kɛ Tsɔɔmɔ” (Bɔfoi lɛ Asaji 13:13-43)

9. Mɛɛ gbɛ nɔ Paulo kɛ Barnaba fee nɔkwɛmɔnɔ ni sa amɛha mɛi ni nyiɛɔ hiɛ yɛ asafo lɛ mli ŋmɛnɛ?

9 Ekã shi faŋŋ akɛ, tsakemɔ ko ba beni hii lɛ shi Pafo ní amɛfã gbɛ kɛtsɔ ŋshɔ hiɛ kɛtee Perge, ni yɔɔ Asia Bibioo lɛ ŋshɔnaa gbɛ aaafee kilomitai 250 lɛ. Awie kuu nɛɛ he yɛ Bɔfoi lɛ Asaji 13:13 lɛ akɛ, “Paulo kɛ emɛi lɛ.” Wiemɔ nɛɛ tsɔɔ akɛ agbɛnɛ Paulo ji mɔ ni nyiɛ nitsumɔ ni kuu lɛ tsuɔ lɛ hiɛ. Kɛlɛ, nɔ ko bɛ ni tsɔɔ akɛ Barnaba ye Paulo he awuŋa. Yɛ no najiaŋ lɛ, hii enyɔ nɛɛ tsá yaa kɛfee Nyɔŋmɔ suɔmɔnaanii. Paulo kɛ Barnaba fee nɔkwɛmɔnɔ kpakpa amɛha mɛi ni nyiɛɔ hiɛ yɛ asafo lɛ mli ŋmɛnɛ  lɛ. Yɛ nɔ̃ najiaŋ ni Kristofoi aaashi akaŋ kɛtao hiɛnyam lɛ, amɛkaiɔ Yesu wiemɔ akɛ: “Nyɛmimɛi ji nyɛ” lɛ. Yesu kɛfata he akɛ: “Mɔ fɛɛ mɔ ni aaawo ehe nɔ lɛ, aaaba lɛ shi, ni mɔ fɛɛ mɔ ni aaaba ehe shi lɛ, aaawo enɔ.”—Mat. 23:8, 12.

10. Tsɔɔmɔ bɔ ni gbɛfãa kɛjɛ Perge kɛmiiya Antiokia yɛ Pisidia lɛ yɔɔ ha lɛ mli.

10 Beni amɛyashɛ Perge lɛ, Yohane Marko shi Paulo kɛ Barnaba ni eku esɛɛ kɛtee Yerusalem. Atsɔɔɔ nɔ̃ hewɔ ni eshi amɛ trukaa lɛ. Paulo kɛ Barnaba tsa amɛgbɛfãa lɛ nɔ kɛjɛ Perge kɛtee Antiokia ni yɔɔ Pisidia, ni ji maŋ ko ni yɔɔ Galatia kpokpaa lɛ nɔ lɛ. Gbɛfãa nɛɛ bɛ mlɛo kwraa, ejaakɛ Antiokia ni yɔɔ Pisidia lɛ yɛ he ko ni kwɔlɛ shɛɔ mitai 1,100 fe ŋshɔ hiɛ kwɔlɛ. Akɛni hei ni atsɔɔ kɛkwɔɔ gɔŋ nɛɛ yɛ dokoidokoi hewɔ lɛ, eyɛ oshara waa, ni ale hei nɛɛ hu akɛ eji hei ni ojotswalɔi fɔɔ mɛi tutuamɔ yɛ. Enɛɛmɛi fɛɛ asɛɛ lɛ, eeenyɛ efee akɛ Paulo naaa gbɔmɔtsoŋ hewalɛ tsɔ yɛ nakai beaŋ. *

11, 12. Beni Paulo wieɔ yɛ kpeehe lɛ yɛ Antiokia ni yɔɔ Pisidia lɛ, mɛɛ gbɛ nɔ etsɔ etée etoibolɔi lɛ amiishɛɛ shi?

11 Beni Paulo kɛ Barnaba yɔɔ Antiokia ni yɔɔ Pisidia lɛ, amɛtee kpeehe lɛ yɛ Hejɔɔmɔ Gbi lɛ nɔ. Amaniɛbɔɔ lɛ tsɔɔ mli akɛ: “Ni beni akane mla lɛ kɛ gbalɔi lɛ sɛɛ lɛ, kpeehe lɛ onukpai lɛ tsu abakɛɛ amɛ akɛ: Ataamɛi kɛ anyɛmimɛi, kɛji nyɛyɛ wiemɔ kɛ tsɔɔmɔ ko ní nyɛaawie nyɛtsɔɔ mɛi lɛ, nyɛwiea.” (Bɔf. 13:15) Paulo te shi edamɔ shi ni ewie.

12 Paulo kɛ etoibolɔi lɛ bɔi wiemɔ, ni ekɛɛ: “Ataamɛi Israel hii kɛ nyɛ mɛi ni nyɛsheɔ Nyɔŋmɔ gbeyei.” (Bɔf. 13:16) Mɛi ni boɔ Paulo toi lɛ ji Yudafoi kɛ mɛi ni etsɔmɔ Yudafoi. Mɛɛ gbɛ nɔ Paulo tée etoibolɔi ni leee gbɛfaŋnɔ ni Yesu tsuɔ yɛ Nyɔŋmɔ yiŋtoo mli lɛ amiishɛɛ shi? Klɛŋklɛŋ lɛ, Paulo wie Yudafoi amaŋ lɛ yinɔsane he kuku.  Etsɔɔ bɔ ni Yehowa ‘wó maŋ lɛ nɔ beni amɛyato gbɔ yɛ Mizraim shikpɔŋ lɛ nɔ lɛ,’ kɛ bɔ ni beni aŋmɛɛ amɛhe lɛ Nyɔŋmɔ ‘kɛ tsuishitoo hiɛ amɛ yɛ ŋa lɛ nɔ’ afii 40 lɛ. Agbɛnɛ hu, Paulo gba bɔ ni fee ni Israelbii lɛ nyɛ amɛŋɔ Shiwoo Shikpɔŋ lɛ, kɛ bɔ ni Yehowa ‘ja amɛshikpɔŋ lɛ mli eha amɛ, ni etsɔ amɛnɔ̃.’ (Bɔf. 13:17-19) Mɛi komɛi kɛɛ ekolɛ Paulo kɛ wiemɔi nɛɛ ni ewie lɛ miitsɛ Ŋmalɛ mli saji komɛi ni fata Hejɔɔmɔ Gbi lɛ yeli gbɛjianɔtoo lɛ he ni akane lɛ waa kɛtsɔ hiɛ lɛ yisɛɛ. Kɛ́ nakai ji sane lɛ, belɛ enɛ ji nɔkwɛmɔnɔ kroko ni tsɔɔ akɛ Paulo le bɔ ni ‘atsɔ̃ɔ he nɔ fɛɛ nɔ ahaa mɛi fɛɛ.’—1 Kor. 9:22.

13. Te wɔɔfee tɛŋŋ wɔha wɔtoibolɔi lɛ aná wiemɔ lɛ he miishɛɛ?

13 Esa akɛ wɔ hu wɔbɔ mɔdɛŋ koni wɔha mɛi ni wɔshiɛɔ wɔhaa amɛ lɛ aná wiemɔ lɛ he miishɛɛ. Ákɛ nɔkwɛmɔnɔ lɛ, kɛ́ wɔle jamɔ mli ni mɔ ko yɔɔ lɛ, no baanyɛ aye abua wɔ koni wɔhala saji pɔtɛi komɛi ni nakai mɔ lɛ baaná he miishɛɛ. Agbɛnɛ hu, wɔbaanyɛ wɔtsɛ́ ŋmalɛi kɛjɛ Biblia lɛ mli woji ni mɔ lɛ le lɛ amli. Ebaafee nɔ ni hi waa akɛ wɔha mɔ lɛ akane sane lɛ kɛjɛ lɛ diɛŋtsɛ e-Biblia lɛ mli. Taomɔ gbɛi anɔ ni oootsɔ okanya otoibolɔi lɛ koni amɛná he miishɛɛ akɛ amɛaakase Yehowa he nii.

14. (a) Te Paulo je sanekpakpa ni kɔɔ Yesu he lɛ shishi tɛŋŋ, ni mɛɛ kɔkɔ ebɔ amɛ? (b) Te Paulo toibolɔi lɛ fee amɛnii yɛ ewiemɔ lɛ he amɛha tɛŋŋ?

14 Enɛ sɛɛ lɛ, Paulo wie bɔ ni ajɛ Israelbii amaŋtsɛmɛi awekutɔkpãa lɛ mli aná “yiwalaherelɔ ko, Yesu” mɔ ni Yohane Baptisilɔ lɛ tsɔ ehiɛ kɛba lɛ. Kɛkɛ ni Paulo tsɔɔ bɔ ni agbe Yesu kɛ bɔ ni atee lɛ shi kɛjɛ gbohii ateŋ lɛ. (Bɔf. 13:20-37) Paulo kɛɛ akɛ: “No hewɔ lɛ, . . . nyɛnáa nyɛlea, akɛ mɔ nɛɛ nɔŋŋ nɔ atsɔɔ ajajeɔ eshaifaa atsɔɔ nyɛ lɛ . . . Mɔ nɛɛ mli lɛ mɔ fɛɛ mɔ ni heɔ yeɔ lɛ, abuɔ lɛ bem.” Kɛkɛ ni Paulo bɔ etoibolɔi lɛ kɔkɔ akɛ: “Nyɛkwɛa ni ahia, koni bɔ ni awie yɛ gbalɔi lɛ amli lɛ akaba nyɛnɔ akɛ: ‘Nyɛ heguɔgbelɔi, nyɛkwɛa, ni nyɛhiɛ afea nyɛ yaa, ni nyɛlaajea; ejaakɛ mibatsu nitsumɔ ko yɛ nyɛyinɔ, nitsumɔ ko ni kɛ́ mɔ ko gba nyɛ tete lɛ, nyɛheŋ nyɛyeŋ kɔkɔɔkɔ.’” Bɔ ni Paulo toibolɔi lɛ fee amɛnii yɛ ewiemɔ lɛ he lɛ sa kadimɔ waa. Biblia lɛ bɔ amaniɛ akɛ: ‘Mɛi lɛ kpa amɛ fai akɛ amɛbajaje nɛkɛ wiemɔi nɛɛ amɛtsɔɔ amɛ ekoŋŋ yɛ hejɔɔmɔ gbi ni baa lɛ nɔ.’ Kɛfata he lɛ, beni mɛi ní yɔɔ kpeehe lɛ ekpá lɛ, “Yudafoi kɛ Yudafoi ahefatalɔi ní sheɔ Nyɔŋmɔ gbeyei lɛ ateŋ mɛi pii nyiɛ Paulo kɛ Barnaba sɛɛ.”—Bɔf. 13:38-43.

‘Wɔdɔ Wɔyi Kɛtee Jeŋmaji lɛ Aŋɔɔ’ (Bɔfoi lɛ Asaji 13:44-52)

15. Mɛni ba yɛ Hejɔɔmɔ Gbi lɛ nɔ beni Paulo ha ewiemɔ lɛ sɛɛ?

15 Yɛ Hejɔɔmɔ Gbi ni nyiɛ sɛɛ lɛ nɔ lɛ, “shwɛ fioo ni maŋ muu lɛ” fɛɛ ababua amɛhe naa ní amɛbo Paulo toi. Yudafoi komɛi naaa enɛ he miishɛɛ, “ni amɛkɛ wiemɔ kɛ shimɔ kɛ musubɔɔ wiemɔ ku nii ni Paulo wieɔ lɛ anaa.” Paulo kɛ Barnaba kɛ amɛ wie ekãa naa amɛkɛɛ: “Nyɛ tsutsu esa akɛ ajaje Nyɔŋmɔ wiemɔ lɛ atsɔɔ; shi akɛni nyɛkwa wiemɔ lɛ ni nyɛbuuu  nyɛhe akɛ nyɛsa naanɔ wala lɛ hewɔ lɛ, naa, wɔdɔ wɔyi kɛmiiya jeŋmaji lɛ aŋɔɔ. Ejaakɛ nakai Nuŋtsɔ lɛ wo wɔ kita akɛ: ‘Miŋɔo mito akɛ jeŋmaji lɛ ala, koni otsɔ̃ yiwalaheremɔ kɛyashi shikpɔŋ lɛ naagbeehei lɛ.’”—Bɔf. 13:44-47; Yes. 49:6.

“Amɛhã yiwalɛ te shi wo Paulo kɛ Barnaba . . . Ni kaselɔi lɛ yimɔ obɔbɔ kɛ miishɛɛ kɛ Mumɔ krɔŋkrɔŋ.”—Bɔfoi lɛ Asaji 13:50-52

16. Te Yudafoi lɛ fee amɛnii yɛ wiemɔi ni mli wala ni maŋsɛɛ shiɛlɔi lɛ wie lɛ he amɛha tɛŋŋ, ni mɛni Paulo kɛ Barnaba fee yɛ shitee-kɛwoo lɛ he?

16 Jeŋmajiaŋbii ni bo sane lɛ toi lɛ ná miishɛɛ, ni “mɛi abɔ ní ajie ato naanɔ wala lɛ hé ye.” (Bɔf. 13:48) Etsɛɛɛ ni Yehowa wiemɔ lɛ gbɛ eshwã maŋ lɛŋ fɛɛ. Shi esoro bɔ ni Yudafoi lɛ fee amɛnii amɛha kwraa. No hewɔ lɛ, maŋsɛɛ shiɛlɔi lɛ kɛɛ amɛ akɛ, eyɛ mli akɛ amɛ klɛŋklɛŋ awie Nyɔŋmɔ wiemɔ lɛ atsɔɔ moŋ, shi amɛhala akɛ amɛaakpoo Mesia lɛ, no hewɔ lɛ Nyɔŋmɔ fɔbuu kojomɔ baaba amɛnɔ. Yudafoi lɛ wowoo yei ni abuɔ amɛ waa lɛ kɛ hii ni ji hiɛnaanɔbii lɛ ayiŋ “ni amɛhã yiwalɛ te shi wo Paulo kɛ Barnaba, ni amɛshwie amɛ kɛjɛ amɛkpokpai lɛ anɔ.” Mɛni Paulo kɛ Barnaba fee? “Amɛkpokpo amɛnajiashi mulu amɛshwie amɛnɔ, ni amɛyiŋ kɛtee Ikoniom.” Ani enɛ fo Kristojamɔ sɛɛ yɛ Antiokia ni yɔɔ Pisidia lɛ? Dabi kwraa! Kaselɔi ni ashi amɛ yɛ maŋ lɛ mli lɛ ‘tee nɔ amɛyimɔ obɔbɔ kɛ miishɛɛ kɛ Mumɔ krɔŋkrɔŋ.’—Bɔf. 13:50-52.

17-19. Mɛɛ gbɛi anɔ wɔbaanyɛ wɔtsɔ wɔkase nɔkwɛmɔnɔ kpakpa ni Paulo kɛ Barnaba fee lɛ, ni kɛ́ wɔfee nakai lɛ mɛɛ gbɛ nɔ ebaaha wɔná miishɛɛ?

17 Bɔ ni hii anɔkwafoi nɛɛ tee nɔ amɛtsu shiɛmɔ nitsumɔ lɛ yɛ shitee-kɛwoo fɛɛ ni amɛkɛkpe lɛ sɛɛ lɛ haa wɔkaseɔ nɔ ko ni he yɔɔ sɛɛnamɔ waa. Kɛ́ mɛi ni ehe gbɛ́i yɛ je lɛŋ lɛ po bɔ mɔdɛŋ akɛ amɛaatsĩ wɔnaa koni wɔkɛ shɛɛ sane ni wɔhiɛ lɛ akaha lɛ, wɔkpaaa shiɛmɔ. Kadimɔ hu akɛ, beni mɛi ni yɔɔ Antiokia lɛ kpoo shɛɛ sane lɛ, Paulo kɛ Barnaba ‘kpokpo amɛnajiashi mulu amɛshwie.’ Nɔ ni Paulo kɛ Barnaba fee nɛɛ etsɔɔɔ akɛ amɛmli efu maŋbii lɛ. Nifeemɔ nɛɛ tsɔɔ akɛ nɔ ni baaba gbɔmɛi nɛɛ anɔ lɛ he sɔ̃ ko kaaa Paulo kɛ Barnaba nɔ. Maŋsɛɛ shiɛlɔi nɛɛ yɔse akɛ amɛnyɛŋ amɛkudɔ bɔ ni mɛi krokomɛi baafee amɛnii yɛ sanekpakpa lɛ he lɛ. Nɔ ni amɛbaanyɛ amɛkudɔ ji kɛji amɛbaaya nɔ amɛshiɛ. Ni nakai pɛpɛɛpɛ ji bɔ ni amɛfee, ejaakɛ amɛshi kɛtee Ikoniom!

18 Ni kaselɔi ni ashi yɛ Antiokia lɛ hu? Eji anɔkwale, amɛyɛ shikpɔŋkuku ni mɛi teɔ shi amɛwoɔ wiemɔ lɛ mli. Shi miishɛɛ ni amɛbaaná lɛ damɔɔɔ mɛi krokomɛi ni baakpɛlɛ sanekpakpa lɛ nɔ lɛ nɔ. Yesu kɛɛ akɛ: “Mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ baaná miishɛɛ.” (Luka 11:28, NW) Ni nakai pɛpɛɛpɛ ji bɔ ni kaselɔi ni hi Antiokia ni yɔɔ Pisidia lɛ tswa amɛfai shi akɛ amɛbaafee.

19 Taakɛ Paulo kɛ Barnaba fee lɛ, nyɛhaa wɔkaia be fɛɛ be akɛ sɔ̃ ni kã wɔnɔ ji ni wɔshiɛ sanekpakpa lɛ. Wɔtoibolɔi lɛ ji mɛi ni baakpɛ amɛyiŋ kɛji amɛbaabo shɛɛ sane lɛ toi loo amɛboŋ toi. Kɛ́ mɛi booo wɔshɛɛ sane lɛ toi lɛ, wɔbaanyɛ wɔkase kaselɔi ni hi shi yɛ klɛŋklɛŋ afii 100 lɛ mli lɛ. Kɛ́ wɔhiɛ sɔ anɔkwale lɛ, ni wɔha mumɔ krɔŋkrɔŋ lɛ kudɔ wɔ lɛ, wɔ hu wɔbaanyɛ wɔná miishɛɛ kɛ́ ate shi awo wɔ po.—Gal. 5:18, 22.

^ kk. 1 Kwɛmɔ akrabatsa ni ji  “Barnaba—‘Miishɛjemɔ Bi,’” ni yɔɔ baafa 86 lɛ.

^ kk. 2 Kɛbashi nakai be lɛ, no mli lɛ aná asafoi momo yɛ Siria Antiokia ni yɔɔ shɔŋŋ—aaafee kilomitai 550 yɛ Yerusalem kooyigbɛ lɛ.

^ kk. 3 Kwɛmɔ akrabatsa ni ji  “Yɛ Gbɛ lɛ Nɔ,” ni yɔɔ baafa 87 lɛ.

^ kk. 5 Yɛ klɛŋklɛŋ afii 100 lɛ mli lɛ, kɛ́ kɔɔyɔɔ lɛ tswa bɔ pɛ ni ataoɔ lɛ, meele baanyɛ efã gbɛ aaafee kilomitai 150 yɛ gbi kome mli. Kɛ́ eyabaaa lɛ nakai lɛ, gbɛfãa lɛ sɛɛ baatsɛ.

^ kk. 5 Kwɛmɔ akrabatsa ni ji  “Yɛ Yudafoi Akpeehei Lɛ,” ni yɔɔ baafa 89 lɛ.

^ kk. 6 Roma Gwabɔɔ lɛ ni yeɔ Kipro maŋ lɛ nɔ. Mɔ ko ni yɔɔ maŋ lɛ mli nɔŋŋ ji mɔ ni kwɛɔ ŋshɔkpɔ lɛ nɔ, ni lɛ ji amralo.

^ kk. 7 Kɛjɛ nɛkɛ be nɛɛ mli kɛyaa lɛ, abɔi Saulo tsɛmɔ akɛ Paulo. Mɛi kɛɛ eŋɔ Roma gbɛ́i nɛɛ koni ekɛwo Sergio Paulo hiɛ nyam. Kɛlɛ, ha ni eha atee nɔ atsɛ́ lɛ Paulo beni eshi Kipro sɛɛ lɛ tsɔɔ akɛ, Paulo ni ji “jeŋmaji abɔfo lɛ” kpɛ eyiŋ akɛ kɛjɛ nakai beaŋ kɛyaa lɛ ekɛ Roma gbɛ́i ni akɛle lɛ lɛ baatsu nii. Eeenyɛ efee hu akɛ ekɛ gbɛ́i Paulo lɛ tsu nii ejaakɛ bɔ ni atsɛɔ e-Hebri gbɛ́i ni ji Saulo lɛ yɛ Hela mli lɛ gbɛɛɔ tamɔ Hela wiemɔ gbonyo ko.—Rom. 11:13.

^ kk. 10 Paulo ŋma wolo ni ekɛmaje Galatabii lɛ yɛ afii babaoo sɛɛ. Paulo ŋma yɛ nakai wolo lɛ mli akɛ: “Heloo gbedemɔ mli mijaje sanekpakpa lɛ yɛ mitsɔɔ nyɛ klɛŋklɛŋ lɛ.”—Gal. 4:13.