Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 21

“Miyeee Nyɛteŋ Mɔ Ko Mɔ Ko Lá Yi Sɔ̃”

“Miyeee Nyɛteŋ Mɔ Ko Mɔ Ko Lá Yi Sɔ̃”

Hiɛdɔɔ ni Paulo kɛshiɛ, kɛ ŋaa ni ewo asafoŋ onukpai

Edamɔ Bɔfoi lɛ Asaji 20:1-38 lɛ nɔ

1-3. (a) Tsɔɔmɔ nibii ni ba gbi gbɛkɛ ni Eutiko gbo lɛ. (b) Mɛni Paulo fee, ni mɛni nifeemɔ nɛɛ tsɔɔ yɛ Paulo he?

PAULO yɛ ŋwɛitsu ko nɔ yɛ Troia, ni tsũ lɛ mli etsĩ kɛ gbɔmɛi. Ekɛ nyɛmimɛi lɛ wie be kakadaŋŋ, ejaakɛ enɔ jetsɛremɔ lɛ ebaashi amɛ. Ekã wiemɔ lɛ he kɛyashi nyɔɔŋteŋ. Asu kanei saŋŋ yɛ tsũ lɛ mli, ni eha tsũ lɛ mli edɔ ni ekolɛ no eha lasu eyi jɛmɛ fɛɛ obɔ. Oblanyo ko ni atsɛ́ɔ lɛ Eutiko lɛ tá samfɛlɛ lɛ naa. Beni Paulo wieɔ lɛ, wɔ nyɔ Eutiko nɔ, ni ekpɔ kɛjɛ ŋwɛitsu nsɔɔdoi etɛ lɛ nɔ ebagbee shi!

2 Ekã shi faŋŋ akɛ, akɛni Luka ji tsofafeelɔ hewɔ lɛ, ekolɛ efata mɛi klɛŋklɛŋ ni sha foi kɛtee agbó lɛ naa koni amɛyakwɛ nɔ ni eba oblanyo lɛ nɔ lɛ ahe. Ekã shi faŋŋ akɛ nɔ ni eba Eutiko nɔ lɛ yɛ faŋŋ. “Ayawo lɛ ni egbo.” (Bɔf. 20:9) Shi kɛlɛ, naakpɛɛ nɔ ko ba. Paulo yabu oblanyo lɛ nɔ, ni ekɛɛ mɛi ni ebabua amɛhe naa lɛ akɛ: “Nyɛkafea hoo, ejaakɛ wala yɛ emli.” Paulo tee Eutiko shi kɛba wala mli!—Bɔf. 20:10.

3 Nifeemɔ nɛɛ ha ana akɛ Nyɔŋmɔ mumɔ krɔŋkrɔŋ lɛ yɛ hewalɛ. Anyɛŋ ashwa Paulo yɛ Eutiko gbele lɛ hewɔ. Shi fɛɛ sɛɛ lɛ, Paulo sumɔɔɔ akɛ oblanyo lɛ gbele lɛ afite mɛi amiishɛɛ yɛ nifeemɔ ni he hiaa nɛɛ shishi, loo etɔ̃tɔ̃ mɔ ko nane. Akɛni Paulo tee Eutiko shi hewɔ lɛ, no shɛje asafo lɛ mii, ni ewo amɛ hewalɛ waa koni amɛya nɔ amɛkɛ ekãa atsu amɛsɔɔmɔ nitsumɔ lɛ. Eyɛ faŋŋ akɛ Paulo bu mɛi awala akɛ ejara wa waa. Enɛ kaiɔ wɔ ewiemɔi akɛ: “Miyeee nyɛteŋ mɔ ko mɔ ko lá yi sɔ̃” lɛ. (Bɔf. 20:26) Nyɛhaa wɔsusua bɔ ni Paulo nɔkwɛmɔnɔ lɛ baanyɛ aye abua wɔ yɛ enɛ gbɛfaŋ lɛ he wɔkwɛa.

‘Eyi Mli Kɛtee Makedonia’ (Bɔfoi lɛ Asaji 20:1, 2)

4. Mɛɛ shihilɛ ko ni haoɔ mɔ waa Paulo kɛkpe?

4 Taakɛ atsɔɔ mli yɛ yitso ni tsɔ hiɛ lɛ mli lɛ, Paulo kɛ shihilɛ ko ni haoɔ mɔ waa kpe. Shiɛmɔ ni eshiɛ yɛ Efeso lɛ tee gidigidifeemɔ shi. Yɛ anɔkwale mli lɛ, jwiɛtɛiŋaalɔi ní Artemi jamɔ ji nɔ ni haa amɛnáa amɛdaaŋ ŋmaa lɛ fata gidigidifeelɔi lɛ ahe! Bɔfoi lɛ Asaji 20:1 lɛ tsɔɔ mli akɛ: “Beni gidigidifeemɔ lɛ sɛɛ efo lɛ, Paulo tsɛ́ kaselɔi lɛ kɛbakpe ni ewie etsɔɔ amɛ ni eshɛ amɛ, ni eyiŋ kɛmiiya Makedonia.”

5, 6. (a) Be enyiɛ nɛkɛ ekolɛ Paulo ye yɛ Makedonia, ni mɛni efee eha nyɛmimɛi ni yɔɔ jɛmɛ lɛ? (b) Mɛɛ su Paulo tee nɔ ejie lɛ kpo yɛ enanemɛi héyelilɔi lɛ ahe?

 5 Beni Paulo yaa Makedonia lɛ, eyatsɔ Troia lɛjiadaamɔhe lɛ ni eye be ko yɛ jɛmɛ. Paulo hiɛ kã nɔ akɛ Tito ní no mli lɛ atsu lɛ Korinto lɛ baaba ebafata ehe yɛ jɛmɛ. (2 Kor. 2:12, 13) Shi beni efee faŋŋ akɛ Tito baŋ lɛ, Paulo tse mli kɛtee Makedonia, ni ekolɛ eye afi loo nɔ̃ yɛ jɛmɛ ni “ekɛ wiemɔ pii wo amɛ ŋaa.” * (Bɔf. 20:2) Yɛ naagbee lɛ, Tito yafata Paulo he yɛ Makedonia, ni ekɛ bɔ ni Korintobii lɛ fee amɛnii yɛ klɛŋklɛŋ wolo ni Paulo ŋma kɛmaje amɛ lɛ he lɛ he amaniɛbɔɔ kpakpa baha Paulo. (2 Kor. 7:5-7) Enɛ tsirɛ Paulo ni eŋma wolo kroko kɛmaje amɛ, ni wolo nɛɛ ji nɔ ni wɔle amrɔ nɛɛ akɛ 2 Korintobii lɛ.

6 Eji nɔ ni sa kadimɔ waa akɛ Luka kɛ wiemɔi ni ji “wo amɛ ŋaa” kɛ ‘wie etsɔɔ amɛ’ tsu nii kɛtsɔɔ saramɔ ni Paulo yasara nyɛmimɛi ni yɔɔ Efeso lɛ kɛ Makedonia lɛ mli. Wiemɔi nɛɛ haa wɔnaa su diɛŋtsɛ ni Paulo jie lɛ kpo yɛ enanemɛi héyelilɔi lɛ ahe! Paulo tamɔɔɔ Farisifoi ní nyaŋeɔ mɛi foji lɛ, ena tooi lɛ akɛ amɛji enanemɛi nitsulɔi. (Yoh. 7:47-49; 1 Kor. 3:9) Beni ehe bahia ni Paulo kɛ ŋaawoo ni mli wa aha amɛ po lɛ, etee nɔ ejie nakai su lɛ nɔŋŋ kpo.—2 Kor. 2:4.

7. Mɛɛ gbɛ nɔ Kristofoi nɔkwɛlɔi ni yɔɔ ŋmɛnɛ lɛ baanyɛ amɛkase Paulo nɔkwɛmɔnɔ lɛ?

 7 Ŋmɛnɛ lɛ, asafoŋ onukpai kɛ nɔkwɛlɔi gbɛfalɔi bɔɔ mɔdɛŋ akɛ amɛbaakase Paulo nɔkwɛmɔnɔ lɛ. Kɛ́ amɛmiikã mɛi ahiɛ po lɛ, oti ni ma amɛhiɛ ji ní amɛwo mɛi ni yelikɛbuamɔ he ehia amɛ lɛ hewalɛ. Nɔkwɛlɔi bɔɔ mɔdɛŋ diɛŋtsɛ akɛ amɛwo mɛi hewalɛ fe nɔ ni amɛaabu amɛ fɔ́. Nɔkwɛlɔ gbɛfalɔ ko ni yɔɔ niiashikpamɔ waa lɛ wie he yɛ nɛkɛ gbɛ nɔ akɛ: “Wɔnyɛmimɛi hii kɛ yei lɛ ateŋ mɛi ni fa miisumɔ ni amɛfee nɔ ni ja, shi bei pii lɛ amɛnuɔ he akɛ amɛhiɛnɔkamɔi miifee yaka, amɛsheɔ gbeyei, ni amɛnuɔ he hu akɛ amɛnyɛɛɛ amɛye amɛbua amɛ diɛŋtsɛ amɛhe.” Nɔkwɛlɔi baanyɛ amɛfee hewalɛwoo jɛɛhe diɛŋtsɛ kɛha nanemɛi héyelilɔi nɛɛ.—Heb. 12:12, 13.

‘Awo lɛ Ká’ (Bɔfoi lɛ Asaji 20:3, 4)

8, 9. (a) Mɛni tsake gbɛjianɔ ni Paulo to akɛ ebaaya Siria lɛ? (b) Mɛni hewɔ ekolɛ Yudafoi lɛ sumɔɔɔ Paulo sane lɛ?

8 Beni Paulo shi Makedonia lɛ, etee Korinto. * Eye nyɔji etɛ yɛ jɛmɛ, ni no sɛɛ lɛ etsá egbɛfãa lɛ nɔ kɛtee Kenkrea, ni eto gbɛjianɔ koni ewó lɛlɛ yɛ jɛmɛ kɛya Siria. Kɛ́ ejɛ Siria lɛ, ebaanyɛ etse mli kɛya Yerusalem koni ekɛ onia ni atsu lɛ ayaha nyɛmimɛi ni ehia amɛ ni yɔɔ jɛmɛ lɛ. * (Bɔf. 24:17; Rom. 15:25, 26) Shi shihilɛ ko ni akpaaa gbɛ ba, ni enɛ tsake Paulo gbɛjianɔtoo lɛ. Bɔfoi lɛ Asaji 20:3 lɛ bɔ amaniɛ akɛ: ‘Yudafoi lɛ wo lɛ ká’!

9 Ebɛ naakpɛɛ akɛ Yudafoi lɛ sumɔɔɔ Paulo sane, ejaakɛ amɛnaa lɛ akɛ eji hemɔkɛyeli kwalɔ. Mra mli lɛ, Paulo shiɛmɔ lɛ ha Krispo—ní ehé gbɛ́i waa yɛ Korintobii lɛ akpeehe lɛ—tsake kɛbatsɔ Kristofonyo. (Bɔf. 18:7, 8; 1 Kor. 1:14) Be ko hu lɛ, Yudafoi ni yɔɔ Korinto lɛ folɔ Paulo naa yɛ Galio, ní yeɔ amralo yɛ Akaia lɛ hiɛ. Kɛlɛ, Galio na amɛnaafolɔmɔi lɛ akɛ ebɛ mli, ni no hewɔ lɛ etsuuu he nii—ni enɛ wo Paulo henyɛlɔi lɛ amli la waa. (Bɔf. 18:12-17) Ekolɛ Yudafoi ni yɔɔ Korinto lɛ ná amɛle, loo amɛsusu akɛ etsɛŋ ni Paulo baayafo lɛlɛ yɛ Kenkrea ni bɛŋkɛ jɛmɛ lɛ, ni no hewɔ lɛ amɛtsɔ̃ ŋaa akɛ amɛbaawo lɛ aŋtɛo yɛ jɛmɛ. Mɛni Paulo baafee?

10. Ani Kenkrea ni Paulo eyatsɔɔɔ lɛ tsɔɔ akɛ esheɔ nii gbeyei? Tsɔɔmɔ mli.

10 Akɛni Paulo sumɔɔɔ akɛ aye lɛ awui—ni eesumɔ hu ní ebaa onia ni atuu awo edɛŋ lɛ yi hewɔ lɛ—ehala akɛ eyaŋ Kenkrea, yɛ no najiaŋ lɛ eku esɛɛ kɛtsɔ Makedonia. Eji anɔkwale akɛ, eyɛ oshara waa hu akɛ aaatswa nantu kɛfã gbɛ. Yɛ blema beaŋ lɛ, ojotswalɔi fɔɔ aŋtɛowoo yɛ gbɛjegbɛi ahe. Gbɔiatoohei po bɛ shweshweeshwe. Ni kɛlɛ Paulo hala akɛ ebaatsɔ  osharai nɛɛ amli moŋ fe nɔ ni ebaayagbee aŋtɛo ni awo lɛ yɛ Kenkrea lɛ mli. Miishɛɛ sane ji akɛ jeee ekome pɛ efãa gbɛ lɛ. Mɛi ni fata ehe yɛ be nɛɛ mli yɛ emaŋsɛɛ shiɛmɔ he gbɛfãa lɛ mli ji Aristarko, Gaio, Sekundo, Sopatre, Timoteo, Trofimo, kɛ Tihiko.—Bɔf. 20:3, 4.

11. Mɛni Kristofoi ni yɔɔ ŋmɛnɛ lɛ feɔ koni amɛkɛ amɛhe akawo oshara mli, ni mɛɛ nɔkwɛmɔnɔ Yesu fee yɛ enɛ gbɛfaŋ?

11 Taakɛ Paulo fee lɛ, Kristofoi ni yɔɔ ŋmɛnɛ lɛ hu bɔɔ mɔdɛŋ akɛ amɛfee nibii ni haŋ amɛyaje oshara mli beni amɛtsuɔ amɛshiɛmɔ nitsumɔ lɛ. Kɛ́ amɛyaatsu shikpɔŋkukuji komɛi amli nii lɛ, amɛyaa akɛ kuu, ni kɛ́ hooo kwraa lɛ amɛtsuɔ nii enyɔnyɔɔnyɔ—moŋ fe nɔ ni mɔ kome aaanyiɛ. Ni yɛ yiwaa gbɛfaŋ hu? Kristofoi le akɛ bɔ fɛɛ bɔ ni ji lɛ, abaawa amɛ yi. (Yoh. 15:20; 2 Tim. 3:12) Kɛlɛ, amɛjeee gbɛ amɛkɛ amɛhe wooo oshara mli. Susumɔ nɔkwɛmɔnɔ ni Yesu fee lɛ he okwɛ. Be ko beni shitee-kɛwolɔi komɛi ni yɔɔ Yerusalem lɛ kɔlɔ tɛi ni amɛbaatswia lɛ lɛ, ‘etée ehe, ni eje sɔlemɔwe lɛ etee.’ (Yoh. 8:59) Sɛɛ mli lɛ, beni Yudafoi lɛ kpɛ amɛyiŋ akɛ amɛbaagbe Yesu lɛ, “ejeee faŋŋ enyiɛɛɛ yɛ Yudafoi lɛ ateŋ dɔŋŋ, shi eje jɛi etee shikpɔŋ ko ni kã ŋa lɛ naa lɛ nɔ.” (Yoh. 11:54) Yesu fee nɔ ni ebaanyɛ koni ekɛ ehe akawo oshara mli beni nakai feemɔ eteee shi ewooo nɔ ni Nyɔŋmɔ sumɔɔ akɛ efee lɛ. Kristofoi ni yɔɔ ŋmɛnɛ lɛ hu feɔ nakai nɔŋŋ.—Mat. 10:16.

“Amɛmii Shɛ Amɛhe Naakpa” (Bɔfoi lɛ Asaji 20:5-12)

12, 13. (a) Te Eutiko shitee lɛ ná asafo lɛ nɔ hewalɛ eha tɛŋŋ? (b) Mɛɛ Biblia mli hiɛnɔkamɔ shɛjeɔ mɛi ni yɔɔ ŋmɛnɛ ní amɛsuɔlɔi egboi lɛ amii?

12 Paulo kɛ enanemɛi lɛ fã gbɛ kutuu kɛtsɔ Makedonia, ni eeenyɛ efee akɛ sɛɛ mli lɛ amɛgbála mli. Ekã shi faŋŋ akɛ sɛɛ mli lɛ amɛ fɛɛ amɛyakpe ekoŋŋ yɛ Troia. * Amaniɛbɔɔ lɛ kɛɛ akɛ: “Gbii enumɔ sɛɛ lɛ wɔyashɛ amɛŋɔɔ yɛ Troia.” * (Bɔf. 20:6, Ga Biblia hee) Nakai beaŋ atee oblanyo ni atsɛ́ɔ lɛ Eutiko lɛ shi, taakɛ atsɔɔ yɛ yitso nɛɛ shishijee gbɛ lɛ. Bo lɛ susumɔ miishɛɛ ní nyɛmimɛi lɛ ná beni atee amɛnaanyo Eutiko shi lɛ he okwɛ! Amaniɛbɔɔ lɛ kɛɛ akɛ: “Amɛmii shɛ amɛhe naakpa.”—Bɔf. 20:12.

13 Eji anɔkwale akɛ, ŋmɛnɛ lɛ afeee naakpɛɛ nibii ni tamɔ nakai. Ni kɛlɛ gbohiiashitee he hiɛnɔkamɔ ni yɔɔ Biblia lɛ mli lɛ haa mɛi ni suɔlɔi egboi lɛ ‘amii shɛɔ amɛhe naakpa.’ (Yoh. 5:28, 29) Susumɔ sane nɛɛ he okwɛ: Akɛni Eutiko yeee emuu hewɔ lɛ, sɛɛ mli lɛ egbo ekoŋŋ. (Rom. 6:23) Shi mɛi ni abaatee amɛ shi yɛ Nyɔŋmɔ jeŋ hee lɛ mli lɛ baahi shi kɛya naanɔ! Mɛi hu ni ateɔ amɛ shi koni amɛkɛ Yesu aye nɔ yɛ ŋwɛi lɛ náa wala  ní sɛɛ nyɛŋ afo kɔkɔɔkɔ. (1 Kor. 15:51-53) Kristofoi ni yɔɔ ŋmɛnɛ lɛ yɛ yiŋtoo kpakpa ní amɛaadamɔ nɔ amɛha ‘amɛmii ashɛ amɛhe naakpa’—kɛ́ amɛfata mɛi ni afɔ amɛ mu lɛ ahe jio, loo amɛfata “tooi krokomɛi” lɛ ahe jio.—Yoh. 10:16.

“Yɛ Faŋŋ kɛ Shĩa Fɛɛ Shĩa Hu” (Bɔfoi lɛ Asaji 20:13-24)

14. Mɛni Paulo kɛɛ Efeso asafoŋ onukpai lɛ beni ekɛ amɛ kpe yɛ Mileeto lɛ?

14 Paulo kɛ enanemɛi lɛ fã gbɛ kɛjɛ Troia kɛtee Aso, ni no sɛɛ lɛ amɛtee Mitileene, Kio, Samo, kɛ Mileeto. Oti ni ma Paulo hiɛ ji ní eyashɛ Yerusalem yɛ be ni sa mli dani aye Pentekoste Gbi Jurɔ lɛ. Oyai ni eyeɔ akɛ eyashɛ Yerusalem dani Pentekoste gbi lɛ ashɛ lɛ haa wɔnaa nɔ̃ hewɔ ní eyafo lɛlɛ ní tsɔɔɔ Efeso beni ekuɔ esɛɛ lɛ. Shi akɛni Paulo miitao ni ekɛ Efeso asafoŋ onukpai lɛ awie hewɔ lɛ, etsu ni ayakɛɛ amɛ koni amɛfo lɛ yɛ Mileeto. (Bɔf. 20:13-17) Beni amɛbashɛ shi lɛ, Paulo kɛɛ amɛ akɛ: “Nyɛle bɔ ni mitsɔ mikɛnyɛ hi shi be muu lɛ fɛɛ, kɛjɛ klɛŋklɛŋ gbi nɔ ni miba Asia nɛɛ, ni mikɛ heshibaa jwɛŋmɔ fɛɛ kɛ yaafonui pii kɛ kai ni ba minɔ yɛ Yudafoi akáwoi lɛ amli lɛ sɔmɔ Nuŋtsɔ lɛ; bɔ ni mishiuuu nii ni he yɔɔ sɛɛnamɔ ha nyɛ lɛ eko nɔ, ni mijaje mitsɔɔ nyɛ yɛ faŋŋ kɛ shĩa fɛɛ shĩa hu; ní miye tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu  Kristo nɔ hemɔkɛyeli lɛ he odase mitsɔɔ Yudafoi kɛ Helabii fɛɛ lɛ.”—Bɔf. 20:18-21.

15. Mɛɛ sɛɛnamɔi yɔɔ shĩa kɛ shĩa shiɛmɔ nitsumɔ lɛ he?

15 Ŋmɛnɛ lɛ, wɔbaanyɛ wɔtsɔ gbɛi srɔtoi anɔ wɔshiɛ sanekpakpa lɛ wɔha mɛi. Wɔbɔɔ mɔdɛŋ akɛ wɔya he ni mɛi yɔɔ, tamɔ tsɔji amaamɔhei, gbɛjegbɛi ni mɛi fɔɔ nɔ tsɔmɔ, loo jaji anɔ, taakɛ Paulo fee lɛ. Ni kɛlɛ, shĩa kɛ shĩa shiɛmɔ nitsumɔ lɛ kã he eji gbɛ titri ni Yehowa Odasefoi tsɔɔ nɔ amɛshiɛɔ. Mɛni hewɔ? Yiŋtoo kome ji akɛ, shĩa kɛ shĩa shiɛmɔ nitsumɔ lɛ haa mɛi fɛɛ náa hegbɛ ni sa ní amɛkɛaabo Maŋtsɛyeli shɛɛ sane lɛ toi daa, ni no haa anaa akɛ Nyɔŋmɔ kwɛɛɛ hiɛaŋ. Ehaa ayeɔ abuaa mɛi ni hiɛ tsui kpakpa lɛ hu akɛ aŋkroaŋkroi koni anyɛ atsu amɛhiamɔ nii ahe nii. Kɛfata he lɛ, shĩa kɛ shĩa shiɛmɔ nitsumɔ lɛ haa shiɛlɔi lɛ ahemɔkɛyeli mli waa, ni ehaa amɛmiaa amɛhiɛ yɛ shihilɛ mli. Hɛɛ, nɔ ko ni akɛkadiɔ mɛi ni ji anɔkwa Kristofoi ŋmɛnɛ lɛ ji ekãa ní amɛkɛshiɛɔ “yɛ faŋŋ kɛ shĩa fɛɛ shĩa hu” lɛ.

16, 17. Mɛni Paulo fee kɛtsɔɔ akɛ eyɛ ekãa, ni mɛɛ gbɛ nɔ Kristofoi ni yɔɔ ŋmɛnɛ lɛ kaseɔ enɔkwɛmɔnɔ lɛ?

16 Paulo ha Efeso asafoŋ onukpai lɛ le akɛ eleee osharai ni baaba enɔ kɛ́ eku esɛɛ etee Yerusalem. Ekɛɛ amɛ akɛ: “Shi kɛlɛ mibuuu enɛɛmɛi ekome folo, ni miwala hu mibuuu akɛ ejara wa yɛ mihiɛ, beni afee ni mikɛ miishɛɛ agbe migbɛnyiɛmɔ lɛ kɛ sɔɔmɔ ni miná yɛ Nuŋtsɔ Yesu dɛŋ akɛ miye Nyɔŋmɔ duromɔ sanekpakpa lɛ he odase faŋŋ lɛ naa.” (Bɔf. 20:24) Paulo fee ekãa, ni ehaaa shihilɛ ko kwraa—hela loo shitee-kɛwoo ni naa wa—atsĩ lɛ gbɛ ní ekagbe nitsumɔ ní akɛwo edɛŋ lɛ tsumɔ naa.

17 Kristofoi ni yɔɔ ŋmɛnɛ lɛ hu miaa amɛhiɛ yɛ jaramɔ shihilɛi srɔtoi amli. Maŋ nɔyelɔi etsĩ amɛteŋ mɛi komɛi anaa ni awaa amɛ yi. Amɛteŋ mɛi komɛi hu miimia amɛhiɛ kɛmiidamɔ hela naa. Oblahii kɛ oblayei ni ji Kristofoi lɛ hu kɛ tipɛŋfoi anɔnyɛɛ miikpe yɛ skul. Ekɔɔɔ he eko nɔ̃ shihilɛ ní Yehowa Odasefoi kɛkpeɔ lɛ, amɛfiɔ shi shiŋŋ tamɔ bɔ ni Paulo fee lɛ. Amɛtswa amɛfai shi akɛ ‘amɛbaaye sanekpakpa lɛ he odase kɛmɔ shi.’

“Nyɛlea Nyɛhe Nɔ Kwɛmɔ kɛ Tooku lɛ Fɛɛ” (Bɔfoi lɛ Asaji 20:25-38)

18. Mɛni Paulo fee koni ekaye lá yi sɔ̃, ni mɛni esa akɛ Efeso asafoŋ onukpai lɛ afee koni amɛ hu amɛkaye lá yi sɔ̃?

18 No sɛɛ lɛ Paulo wo Efeso asafoŋ onukpai lɛ ŋaa tɛ̃ɛ, ni ekɛɛ amɛ akɛ lɛ diɛŋtsɛ efee enɛɛmɛi ahe nɔkwɛmɔnɔ efɔ̃ shi eha amɛ. Klɛŋklɛŋ lɛ eha amɛle akɛ amɛnaŋ ehiɛ dɔŋŋ. No sɛɛ lɛ ekɛɛ amɛ akɛ: “Miyeee nyɛteŋ mɔ ko mɔ ko lá yi sɔ̃; ejaakɛ mijaje Nyɔŋmɔ yiŋtoo muu lɛ fɛɛ mitsɔɔ nyɛ ni mishiuuu eko nɔ.” Te Efeso asafoŋ onukpai lɛ aaafee tɛŋŋ amɛkase Paulo ní amɛkaye lá yi sɔ̃? Ekɛɛ amɛ akɛ: “Nyɛlea nyɛhe nɔ kwɛmɔ kɛ tooku lɛ fɛɛ ni Mumɔ krɔŋkrɔŋ lɛ ewo nyɛ amɛnɔkwɛlɔi lɛ, koni nyɛlɛ Nyɔŋmɔ asafo lɛ ni ekɛ lɛ diɛŋtsɛ [e-Bi lɛ] lá he lɛ.” (Bɔf. 20:26-28) Paulo bɔ kɔkɔ  akɛ “klaji fulɔi” baabote tooku lɛ mli nigii, ni ‘amɛbaawie nii ni ejaaa, ni amɛaakpala kaselɔi lɛ amɛshwie amɛsɛɛ.’ Mɛni esa akɛ asafoŋ onukpai lɛ afee? Paulo bɔ amɛ kɔkɔ akɛ: “Nyɛsaraa, ni nyɛkaia akɛ afii etɛ sɔŋŋ mikɛ yaafonui efɔ̃ɔɔ nyɛteŋ mɔ fɛɛ mɔ kɔkɔbɔɔ nyɔɔŋ kɛ shwane.”—Bɔf. 20:29-31.

19. Beni shɛɔ klɛŋklɛŋ afii 100 lɛ naagbee gbɛ lɛ, mɛɛ hemɔkɛyeli kwamɔ je kpo faŋŋ, ni mɛni jɛ enɛ mli kɛba yɛ afii ohai abɔ ni nyiɛ sɛɛ kɛba lɛ amli?

19 Beni shɛɔ klɛŋklɛŋ afii 100 lɛ naagbee gbɛ lɛ, no mli lɛ “klaji fulɔi” ejie amɛhe kpo. Aaafee afi 98 Ŋ.B. lɛ, bɔfo Yohane ŋma akɛ: “Antikristoi pii eba. . . . Wɔteŋ amɛjɛ amɛtee, shi kɛlɛ amɛjeee wɔteŋ mɛi komɛi, ejaakɛ wɔteŋ mɛi komɛi ji amɛ kulɛ amɛkɛ wɔ hi shi.” (1 Yoh. 2:18, 19) Beni shɛɔ afi 200 afii lɛ amli lɛ, hemɔkɛyeli kwamɔ ha abaná Kristendom osɔfoi akuu, ni yɛ afi 300 afii lɛ amli lɛ, Nɔyelɔ Constantine ha akpɛlɛ apasa “Kristojamɔ” nɛɛ nɔ yɛ enɔyeli lɛ fɛɛ mli. Akɛni jamɔŋ hiɛnyiɛlɔi lɛ kpɛlɛ wɔŋjamɔ nifeemɔi anɔ, ni amɛkɛ “Kristojamɔ” hà hiɛ hewɔ lɛ, eji anɔkwale akɛ ‘amɛwie nii ni ejaaa.’ Kɛbashi ŋmɛnɛ lɛ, Kristendom tsɔɔmɔi kɛ enifeemɔi haa wɔnaa nɔ ni ejɛ nakai hemɔkɛyeli kwamɔ lɛ mli kɛba.

20, 21. Mɛɛ gbɛ nɔ Paulo tsɔ ekɛ ehe shã afɔle eha enyɛmimɛi lɛ, ni mɛɛ gbɛ nɔ Kristofoi asafoŋ onukpai ni yɔɔ ŋmɛnɛ lɛ baanyɛ atsɔ afee nakai nɔŋŋ?

20 Bɔ ni Paulo ba ejeŋ eha lɛ yɛ srɔto kwraa yɛ bɔ ni mɛi ni baaye tooku lɛ ahe nii yɛ sɛɛ mli lɛ baaba amɛjeŋ amɛha lɛ he. Paulo tsu nii kɛkwɛ ehe bɔni afee ni ekatsɔ jatsu eha asafo lɛ. Jeee sɛɛnamɔ hewɔ esɔmɔ enyɛmimɛi Kristofoi lɛ. Paulo wo Efeso asafoŋ onukpai lɛ hewalɛ koni amɛkɛ amɛhe ashã afɔle amɛha amɛnyɛmimɛi Kristofoi lɛ. Ekɛɛ amɛ akɛ: ‘Nyɛyea nyɛbuaa mɛi ni egbɔjɔ lɛ, ni nyɛkai Nuŋtsɔ Yesu wiemɔi lɛ, akɛ lɛ diɛŋtsɛ ekɛɛ: “Nɔhamɔ mli yɛ jɔɔmɔ fe hemɔ.”’—Bɔf. 20:35.

21 Kristofoi asafoŋ onukpai ni yɔɔ ŋmɛnɛ lɛ kɛ amɛhe shãa afɔle taakɛ Paulo fee lɛ. Mɛi ni akɛ nitsumɔ ewo amɛdɛŋ akɛ ‘amɛlɛ Nyɔŋmɔ asafo lɛ’ jɛɔ tsui krɔŋŋ mli amɛtsuɔ amɛnitsumɔi lɛ, ni amɛtamɔɔɔ Kristendom osɔfoi ní yeɔ asafoŋbii lɛ ahe nii lɛ. Aŋmɛɛɛ henɔwomɔ kɛ anunyam taomɔ gbɛ yɛ Kristofoi asafo lɛ mli, ejaakɛ mɛi ni diɔ “hiɛtaomɔ” sɛɛ lɛ anine baanyɛ shi. (Abɛi 25:27, Ga Biblia hee) Nɔ̃ pɛ ni baanyɛ ajɛ henɔwomɔ mli kɛba ji hiɛgbele.—Abɛi 11:2.

“Amɛ fɛɛ amɛfó naakpa.”—Bɔfoi lɛ Asaji 20:37

22. Mɛni ha Efeso asafoŋ onukpai lɛ sumɔ Paulo sane waa lɛ?

22 Suɔmɔ krɔŋŋ ni Paulo yɔɔ kɛha enyɛmimɛi lɛ ha amɛsumɔ esane waa. Beni ekɛ amɛ yeɔ shɛɛ lɛ, “amɛ fɛɛ amɛfó naakpa, ni amɛgbeegbee Paulo kuɛ nɔ, ni amɛshɔ enaa.” (Bɔf. 20:37, 38) Kɛ́ asafoŋ onukpai lɛ kɛ amɛhe shã afɔle kɛkwɛ tooku lɛ tamɔ bɔ ni Paulo fee lɛ, amɛnyɛmimɛi Kristofoi lɛ ahiɛ sɔɔ amɛ waa, ni amɛsumɔɔ amɛ naakpa. Kɛ́ osusu nɔkwɛmɔnɔ kpakpa ni Paulo fee lɛ he lɛ, ani okpɛlɛŋ nɔ akɛ kɛɛmɔ ní ekɛɛ akɛ, “miyeee nyɛteŋ mɔ ko mɔ ko lá yi sɔ̃” lɛ etsɔɔɔ akɛ eeshwa, loo ákɛ eewo sane he?​—Bɔf. 20:26.

^ kk. 5 Kwɛmɔ akrabatsa ni ji “ Woji ni Paulo Ŋmala Kɛjɛ Makedonia,” ni yɔɔ baafa nɛɛ nɔ lɛ.

^ kk. 8 Eeenyɛ efee akɛ yɛ nɛkɛ be nɛɛ mli beni Paulo yɔɔ Korinto lɛ ni eŋma wolo kɛmaje Romabii lɛ.

^ kk. 8 Kwɛmɔ akrabatsa ni ji “ Paulo Kɛ Onia ni Akɛyaafɛne Nyɛmimɛi lɛ Yaha,” ni yɔɔ baafa 169 lɛ.

^ kk. 12 Etamɔ nɔ ni wiemɔ ni ji “wɔ” ní Luka kɛtsu nii yɛ Bɔfoi lɛ Asaji 20:5, 6 lɛ tsɔɔ akɛ mra mli lɛ Paulo shi lɛ yɛ Filipi, ni no sɛɛ lɛ Paulo banina lɛ yɛ jɛmɛ ekoŋŋ.—Bɔf. 16:10-17, 40.

^ kk. 12 Gbɛ ni amɛfã kɛjɛ Filipi kɛtee Troia lɛ hé amɛ gbii enumɔ. Ekolɛ ahum ni naa wa tswa, ejaakɛ mra mli lɛ, amɛkɛ gbii enyɔ pɛ fã nakai gbɛ lɛ nɔŋŋ.—Bɔf. 16:11.