Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 10

‘Yehowa Wiemɔ Lɛ Tee Nɔ Eshwere’

‘Yehowa Wiemɔ Lɛ Tee Nɔ Eshwere’

Ahere Petro, ni yiwaa nyɛɛɛ atsĩ sanekpakpa lɛ naa ní ekagbɛ eshwã

Edamɔ Bɔfoi lɛ Asaji 12:1-25 lɛ nɔ

1-4. Mɛɛ shihilɛ ni jaraa Petro kɛkpe, ni kɛ́ bo ni lɛ te obaanu he oha tɛŋŋ?

AŊA dade agbó wulu lɛ yi awo Petro, ni agbó nɛɛ ŋamɔ lɛ jije waa. Awo lɛ kɔsɔŋkɔsɔ ni Roma bulɔi enyɔ nyiɛ ebiɛ-kɛ-biɛ, ni amɛkpala lɛ amɛyawo lɛ tsuŋ. Eye ŋmɛlɛtswai babaoo, loo ekolɛ gbii babaoo po yɛ tsuŋwoohe lɛ ní eleee nɔ ni abaafee lɛ. Nɔ pɛ ni enaa ji gbogboi, dadei, ekɔsɔŋkɔsɔi lɛ, kɛ bulɔi ni yɔɔ etsuŋwoohe lɛ.

2 Nɔ ni akpɛ mli akɛ abaafee Petro lɛ naa wa waa. Maŋtsɛ Herode Agripa I etswa efai shi akɛ ebaaha agbe Petro. * Yɛ anɔkwale mli lɛ, kɛ́ aye Hehoo lɛ agbe naa lɛ, abaajie Petro aha maŋ lɛ, ni gbe ni abaagbe lɛ lɛ baaha maŋbii lɛ aná miishɛɛ waa diɛŋtsɛ. Jeee ehe gbeyei kɛkɛ awoɔ lɛ, abaagbe lɛ lɛɛlɛŋ. Etsɛko tsɔ ni nɔyelɔ nɛɛ nɔŋŋ ha agbe Yakobo, ní lɛ hu eji Yesu kaselɔ taakɛ Petro hu ji lɛ.

3 Beni shɛ gbɛkɛ ni enɔ jetsɛremɔ lɛ ato akɛ abaagbe Petro lɛ, mɛni ba ejwɛŋmɔ mli beni eyɔɔ tsuŋwoohe ni ewo duŋ lɛ mli lɛ? Ani eba ejwɛŋmɔ mli akɛ afii komɛi ni eho lɛ, Yesu gba akɛ abaafimɔ lɛ, ní akpala lɛ kɛya ní jeee esuɔmɔnaa—ní ayagbe lɛ? (Yoh. 21:18, 19) Ekolɛ Petro susu akɛ nakai be lɛ eshɛ.

4 Kɛ́ bo ji Petro lɛ, te obaanu he oha tɛŋŋ? Mɛi babaoo anijiaŋ baaje wui ni amɛbaanu he akɛ hiɛnɔkamɔ ko kwraa bɛ. Shi ani shihilɛ ko yɛ ni kɛ́ Yesu Kristo sɛɛnyiɛlɔ anɔkwafo ko yaje mli lɛ, enaŋ hiɛnɔkamɔ ko kwraa lɛɛlɛŋ? Mɛni wɔbaanyɛ wɔkase kɛjɛ bɔ ni Petro kɛ enanemɛi Kristofoi lɛ fee amɛnii amɛha beni amɛkɛ yiwaa nɛɛ kpe lɛ mli? Nyɛhaa wɔkwɛa.

‘Amɛhiɛ Sɔlemɔ Mli Waa Diɛŋtsɛ’ (Bɔfoi lɛ Asaji 12:1-5)

5, 6. (a) Mɛni hewɔ Maŋtsɛ Herode Agripa I tutua Kristofoi asafo lɛ, ni mɛɛ gbɛ nɔ etsɔ efee nakai? (b) Mɛni hewɔ Yakobo gbele lɛ gbá asafo lɛ naa waa lɛ?

5 Taakɛ wɔna yɛ wolo nɛɛ yitso ni tsɔ hiɛ lɛ mli lɛ, Jeŋmajiaŋnyo Kornelio kɛ eweku lɛ ní amɛbatsɔmɔ Kristofoi lɛ ji nɔ ko ni ha Kristofoi asafo lɛ ná miishɛɛ waa. Shi ekolɛ egba Yudafoi ni heee yeee lɛ anaa akɛ  Yudafoi ni ebatsɔmɔ Kristofoi lɛ ateŋ mɛi babaoo kɛ mɛi ni jeee Yudafoi lɛ efee ekome kɛmiijá Nyɔŋmɔ agbɛnɛ.

6 Akɛni Herode ji sɔfĩi ŋaalɔ yɛ maŋkwramɔŋ saji amli hewɔ lɛ, ebu enɛ akɛ eji hegbɛ ni ena ni ekɛaaha Yudafoi lɛ asumɔ esane, ni enɛ ha ejie ehiɛ eká Kristofoi lɛ akɛ ebaawa amɛ yi. Ekã shi faŋŋ akɛ, ená ele akɛ beni Yesu Kristo yɔɔ shikpɔŋ lɛ nɔ lɛ, bɔfo Yakobo kɛ lɛ bɔ kpaakpa. No hewɔ lɛ, “ekɛ klante gbe Yohane nyɛmi Yakobo.” (Bɔf. 12:2) Enɛ gba asafo lɛ naa waa! Yakobo fata mɛi etɛ ni na Yesu tsakemɔ lɛ ahe, ni ena naakpɛɛ nibii ni Yesu fee lɛ ateŋ ekomɛi ní bɔfoi krokomɛi lɛ enaaa. (Mat. 17:1, 2; Mar. 5:37-42) Yesu tsɛ́ Yakobo kɛ enyɛmi Yohane akɛ “nugbɔshiimɔ bii” ejaakɛ amɛyɛ ekãa naakpa. (Mar. 3:17) No hewɔ lɛ, beni agbe Yakobo lɛ, bɔfo anɔkwafo ni yɔɔ ekãa ni asumɔɔ esane waa ŋmɛɛ asafo lɛ.

7, 8. Beni awo Petro tsuŋ lɛ, te asafo lɛ fee enii eha tɛŋŋ?

7 Beni Agripa ha agbe Yakobo lɛ, eŋɔɔ Yudafoi lɛ anaa waa, taakɛ Agripa kpa gbɛ lɛ. Enɛ wo lɛ hewalɛ ni ejie ehiɛ eká Petro hu. Taakɛ awie he yɛ shishijee gbɛ lɛ, eha amɔ Petro. Shi eeenyɛ efee akɛ Agripa kai akɛ atsɔ naakpɛɛ gbɛ nɔ ajie bɔfoi lɛ kɛjɛ tsuŋwoo mli pɛŋ, taakɛ wɔna yɛ wolo nɛɛ Yitso 5 lɛ mli lɛ. Enɛ hewɔ lɛ, eha awo Petro kɔsɔŋkɔsɔi awo bulɔi 2 ateŋ, ni bulɔi 16 to naa amɛbu ejwɛjwɛɛjwɛ nyɔɔŋ kɛ shwane bɔni afee ni ekajo foi. Aha bulɔi lɛ le akɛ kɛ́ Petro jo foi lɛ, abaagbe amɛ. Yɛ shihilɛi ni jaraa nɛɛ mli lɛ, mɛni Petro nyɛmimɛi Kristofoi lɛ baanyɛ afee?

8 Asafo lɛ le nɔ̃ tuuntu ni esa akɛ amɛfee. Bɔfoi lɛ Asaji 12:5 lɛ kɛɛ akɛ: “Agbɛnɛ atsĩ Petro naa yɛ tsũ lɛŋ moŋ; shi asafo lɛ hiɛ sɔlemɔ mli yɛ Nyɔŋmɔ hiɛ kɛ lɛ hamɔ waa diɛŋtsɛ.” Hɛɛ, amɛjɛ amɛtsuiŋ amɛsɔle kɛ hiɛdɔɔ amɛha amɛnyɛmi ní amɛsumɔɔ lɛ waa lɛ. Yakobo gbele lɛ hako amɛnijiaŋ  aje wui; ni asaŋ ehako amɛbu sɔlemɔ akɛ nɔ ko ni he ehiaaa. Yehowa nyaa sɔlemɔi ahe waa diɛŋtsɛ. Ehaa sɔlemɔi ni kɛ esuɔmɔnaa nii kpãa gbee lɛ ahetoo. (Heb. 13:18, 19; Yak. 5:16) Enɛ ji nɔkwɛmɔnii ni esa akɛ Kristofoi fɛɛ ni yɔɔ ŋmɛnɛ lɛ akase.

9. Mɛni wɔbaanyɛ wɔkase kɛjɛ nɔkwɛmɔnɔ ni Petro nyɛmimɛi Kristofoi lɛ fee yɛ sɔlemɔ he lɛ mli?

9 Ani ole nyɛmimɛi Kristofoi komɛi ni kɛ kai miikpe? Ekolɛ aawa amɛ yi, nɔyelii etsĩ amɛnitsumɔ lɛ naa, loo osharai wuji ekpata amɛnibii ahiɛ. Mɛni hewɔ otsĩii enɛɛmɛi atã yɛ sɔlemɔi ni jɛɔ otsuiŋ lɛ amli? Ekolɛ ole mɛi krokomɛi hu ni kɛ shihilɛi ni mli wawai tamɔ weku mli naagbai, nijiaŋwujee, loo amɛhemɔkɛyeli lɛ he kai komɛi miikpe. Kɛ́ ojwɛŋ nii anɔ dani osɔle lɛ, ekolɛ no baaha ona aŋkroaŋkroi pɔtɛ̃ɛ ni obaanyɛ otsĩ amɛgbɛi atã be mli ni okɛ Yehowa ni ji ‘sɔlemɔ Toibolɔ’ lɛ wieɔ lɛ. (Lala 65:3) Ohiɛ akakpa nɔ akɛ ehe baahia ni nyɛmimɛi hii kɛ yei lɛ hu afee nakai amɛha bo kɛ́ oyaje shihilɛi ni mli wawai amli.

Kɛ́ awo wɔnyɛmimɛi lɛ atsuŋ yɛ amɛhemɔkɛyeli lɛ hewɔ lɛ, wɔsɔleɔ wɔhaa amɛ

‘Nyiɛmɔ Misɛɛ’ (Bɔfoi lɛ Asaji 12:6-11)

10, 11. Mɛɛ gbɛ nɔ Yehowa bɔfo lɛ tsɔ ejie Petro kɛjɛ tsuŋwoohe lɛ?

10 Ani Petro fee yeyeeye yɛ oshara ni ekɛbaakpe lɛ he? Wɔnyɛŋ wɔma enɛ nɔ mi, shi nakai naagbee gbɛkɛ ni Petro ye yɛ tsuŋwoohe lɛ mli lɛ, no mli lɛ ekã asraafoi enyɔ ni hiɛ yɔɔ amɛhe nɔ waa ateŋ, ni ewɔ. Ekã shi faŋŋ akɛ nuu anɔkwafo nɛɛ le akɛ ekɔɔɔ he eko bɔ ni nibii baaya lɛ aha lɛ, Yehowa kwaŋ lɛ kɔkɔɔkɔ. (Rom. 14:7, 8) Yɛ fɛɛ mli lɛ, Petro kpaaa nibii ni yɔɔ naakpɛɛ ni nyiɛ sɛɛ kɛba lɛ agbɛ. Trukaa lɛ, la ko kpɛ yɛ tsuŋwoohe lɛŋ. Ŋwɛi bɔfo ko badamɔ jɛmɛ, ekã shi faŋŋ akɛ bulɔi lɛ enaaa lɛ, ni ekɛ hiɛdɔɔ tsĩɛ Petro. Kɛkɛ ni kɔsɔŋkɔsɔi ni akɛwo eniji—ni ji kɔsɔŋkɔsɔi ni etamɔ nɔ ni anyɛŋ atserɛ mli lɛ—kpɔlɔ shwie shi!

“Amɛshɛ dade agbó ní kã kɛyaa maŋ lɛŋ lɛ he, ni lɛ diɛŋtsɛ egbele ehe eha amɛ.”—Bɔfoi lɛ Asaji 12:10

 11 Ŋwɛi bɔfo lɛ kɛ famɔi ni yɔɔ tɛ̃ɛ ha Petro akɛ: “Tee shi mramra! . . . Miamɔ ní ofi otokotai lɛ! . . . Ŋɔɔ obo lɛ oke ohe.” Oya ni Petro fee nɔ ni akɛɛ efee lɛ. No sɛɛ lɛ, ŋwɛi bɔfo lɛ kɛɛ lɛ akɛ: ‘Nyiɛmɔ misɛɛ,’ kɛkɛ ni Petro nyiɛ esɛɛ. Amɛje kpo kɛjɛ tsuŋwoohe lɛ, ni amɛho bulɔi ni yɔɔ agbó lɛ naa lɛ ahe, ni amɛdɛkɛ shi kɛtee dade agbó wulu lɛ he. Te amɛaafee tɛŋŋ amɛgbele dade agbó nɛɛ, ní amɛtsɔ mli? Kɛ́ susumɔ ni tamɔ nakai ba Petro jwɛŋmɔ mli po lɛ, etsɛɛɛ ni ena naa. Beni amɛshɛ dade agbó lɛ he lɛ, “lɛ diɛŋtsɛ egbele ehe eha amɛ.” Beni Petro baahɛle shi lɛ, amɛtsɔ dade agbó lɛ mli kɛho ní amɛdamɔ blohu lɛ mli, ni no sɛɛ lɛ enaaa ŋwɛi bɔfo lɛ dɔŋŋ. Petro kome damɔ jɛmɛ, kɛkɛ ni eyɔse akɛ jeee la elaa lɛ. Ajie lɛ lɛɛlɛŋ, ebɛ tsuŋwoohe lɛ dɔŋŋ!—Bɔf. 12:7-11.

12. Kɛ́ wɔsusu bɔ ni Yehowa jie Petro kɛjɛ tsuŋwoohe lɛ he lɛ, mɛni hewɔ ebaanyɛ eshɛje wɔmii lɛ?

12 Kɛ́ wɔsusu Yehowa hewalɛ ni nɔ ko nɔ ko nyɛɛɛ atsĩ naa ní ekɛkpɔ̃ɔ ewebii lɛ he lɛ, ani no eshɛjeee wɔmii? Maŋtsɛ ni wo Petro tsuŋ lɛ yɛ hewalɛ waa ejaakɛ adesa nɔyeli ni yɔɔ hewalɛ fe nɔyelii fɛɛ ni ehi shi pɛŋ lɛ fiɔ esɛɛ. Kɛlɛ, Petro shi nakai tsuŋwoohe lɛ sɔkee! Eji anɔkwale akɛ, Yehowa tsɔɔɔ naakpɛɛ gbɛ nɔ ejieee etsuji lɛ ateŋ mɔ fɛɛ mɔ kɛjɛɛɛ oshara mli. Efeee nakai ehaaa Yakobo; ni asaŋ sɛɛ mli lɛ efeee nakai ehaaa Petro beni wiemɔi ni Yesu wie yɛ Petro he lɛ ba mli lɛ. Kristofoi ni yɔɔ ŋmɛnɛ lɛ kpaaa gbɛ akɛ Yehowa baatsɔ naakpɛɛ gbɛ nɔ ejie amɛ kɛjɛ oshara mli. Shi esa akɛ ehi wɔjwɛŋmɔ mli akɛ Yehowa tsakeko. (Mal. 3:6) Gbele tamɔ tsuŋwoohe ko ní anyɛɛɛ ajie mɛi ni yɔɔ jɛmɛ lɛ, shi etsɛŋ ni Yehowa baatsɔ e-Bi lɛ nɔ ejie adesai akpekpei abɔ ní yɔɔ jɛmɛ lɛ. (Yoh. 5:28, 29) Kɛ́ wɔkɛ kai miikpe ŋmɛnɛ lɛ, shiwoi nɛɛ baanyɛ awo wɔ hewalɛ waa.

“Amɛna Lɛ, ni Amɛnaa Kpɛ Amɛhe” (Bɔfoi lɛ Asaji 12:12-17)

13-15. (a) Beni Petro tee Maria shĩa lɛ te asafoŋbii ni ebakpe yɛ jɛmɛ lɛ fee amɛnii amɛha tɛŋŋ? (b) Yɛ enɛ sɛɛ lɛ, mɛni Bɔfoi lɛ Asaji lɛ gbala jwɛŋmɔ kɛtee nɔ agbɛnɛ, shi te Petro tee nɔ ená nyɛmimɛi hii kɛ yei Kristofoi lɛ anɔ hewalɛ eha tɛŋŋ?

13 Petro damɔ gbɛjegbɛ ni nɔ ewo duŋ lɛ nɔ, ni ekwɛ akɛ nɛgbɛ esa akɛ eya lo. Kɛkɛ ni ekpɛ eyiŋ. Kristofonyo yoo ko ni atsɛɔ lɛ Maria shĩa bɛŋkɛ. Eeenyɛ efee akɛ Maria ji yoo okulafo ní hiɛ edɛŋ saŋŋ, ni eshĩa lɛ da bɔ ni asafo kpeɔ yɛ jɛmɛ. Ebi ji Yohane Marko, ni enɛ ji klɛŋklɛŋ be ni atsĩ Marko, mɔ ni sɛɛ mli lɛ ebatsɔ tamɔ Petro bi lɛ tã yɛ Bɔfoi lɛ Asaji lɛ. (1 Pet. 5:13) Nakai gbɛkɛ lɛ, eyɛ mli akɛ jenamɔ yi ewa moŋ, shi asafoŋbii lɛ ateŋ mɛi babaoo yɛ Maria shĩa lɛ ni amɛkɛ hiɛdɔɔ miisɔle. Ekã shi faŋŋ akɛ amɛmiisɔle koni aŋmɛɛ Petro he—shi amɛkpaaa hetoo ni Yehowa baaha amɛ lɛ gbɛ!

14 Petro shi agbó lɛ, ni agbó nɛɛ kɛmɔ yaa shĩa lɛ kpoteŋ. Tsulɔ oblayoo ko ni atsɛɔ lɛ Roda lɛ ba agbó lɛ he koni ebabo toi. Egbɛ́i lɛ ji Hela gbɛ́i ko ni ale waa, ni eshishi tsɔɔ fɔfɔi henɔ ko ni atsɛɔ lɛ “Rose.” Beni Roda nu Petro gbee lɛ, efee lɛ naakpɛɛ! Miishɛɛ sɔŋŋ naa lɛ, oblayoo nɛɛ gbeleee  agbó lɛ, shi moŋ eshi Petro edamɔ agbó lɛ sɛɛ, ni ejo foi kɛtee shĩa lɛ mli eyakɛɛ asafo lɛ akɛ Petro damɔ agbó lɛ naa. Amɛkɛɛ eeye sɛkɛ, shi no ejeee enijiaŋ wui. Ema nɔ mi veveeve akɛ nɔ ni ewieɔ lɛ ji anɔkwale. Amɛteŋ mɛi komɛi kpɛlɛ nɔ fã kɛ fã, ni amɛkɛɛ akɛ ekolɛ ŋwɛi bɔfo ko ní ebadamɔ Petro najiaŋ ni. (Bɔf. 12:12-15) Yɛ be nɛɛ fɛɛ mli lɛ, Petro tee nɔ eshi agbó lɛ, kɛyashi amɛtee amɛyagbele lɛ.

15 Beni “amɛna lɛ” damɔ agbó lɛ naa lɛ “amɛnaa kpɛ amɛhe”! (Bɔf. 12:16) Petro kɛɛ amɛ akɛ amɛkpa nyamɔ lɛ, bɔni afee ni egba amɛ nɔ ni tee nɔ, ni ekɛɛ amɛ akɛ amɛyabɔ kaselɔ Yakobo kɛ nyɛmimɛi lɛ amaniɛ, ni no sɛɛ lɛ eje jɛmɛ etee dani Herode asraafoi lɛ akɛɛ akɛ amɛmiiba amɛbatao lɛ. Petro tee he kroko ni yɔɔ shweshweeshwe, ni etee nɔ ekɛ anɔkwayeli sɔmɔ yɛ jɛmɛ. Yɛ be nɛɛ sɛɛ lɛ, atsĩii Petro tã dɔŋŋ yɛ Bɔfoi lɛ Asaji lɛ ja beni ekɛ ehe wo ketiafoo sane lɛ mli koni atsu he nii, taakɛ atsĩ tã yɛ Bɔfoi lɛ Asaji lɛ yitso 15 lɛ pɛ. Bɔfoi lɛ Asaji lɛ gbala jwɛŋmɔ kɛtee nibii ni bɔfo Paulo tsu kɛ gbɛi srɔtoi ni efã lɛ anɔ agbɛnɛ. Shi wɔbaanyɛ wɔná nɔmimaa akɛ he fɛɛ he ni Petro tee lɛ ewaje nyɛmimɛi hii kɛ yei ni yɔɔ jɛmɛ lɛ ahemɔkɛyeli. Beni eshi mɛi ni naa ebakpe shi yɛ Maria shĩa lɛ, ekã shi faŋŋ akɛ no mli lɛ amɛmiinyá waa.

16. Mɛni hewɔ wɔbaanyɛ wɔná nɔmimaa akɛ wɔbaaná miishɛɛ waa yɛ wɔsɛɛ be mli lɛ?

16 Bei komɛi lɛ Yehowa jɔɔ etsuji lɛ kwraa fe bɔ ni amɛkpaa gbɛ, ni enɛ haa amɛnáa miishɛɛ aahu akɛ efeɔ amɛ akɛ amɛmiila. Nakai ji bɔ ni Petro nyɛmimɛi hii kɛ yei Kristofoi lɛ nu he nakai gbɛkɛ lɛ. Ŋmɛnɛ lɛ, ekolɛ nakai nɔŋŋ wɔ hu wɔbaanu he bei komɛi kɛ́ Yehowa jɔɔ wɔ waa. (Abɛi 10:22) Yɛ wɔsɛɛ be mli lɛ, Yehowa jɔɔmɔi lɛ fɛɛ baaba mli ni ebaakpele shikpɔŋ lɛ nɔ fɛɛ. Nibii kpakpai ni ebaafee eha wɔ lɛ baateke nibii fɛɛ ni wɔkpaa gbɛ ŋmɛnɛ lɛ. No hewɔ lɛ, kɛ́ wɔtee nɔ wɔye anɔkwa lɛ, wɔbaaná miishɛɛ waa wɔsɛɛ.

“Nuŋtsɔ [Yehowa] Bɔfo Tswa Lɛ Nɔ̃” (Bɔfoi lɛ Asaji 12:18-25)

17, 18. Mɛni ha awo Herode yiteŋ mulu lɛ?

17 Herode naa kpɛ ehe waa akɛ Petro ejo foi—shi enaa ni kpɛ ehe lɛ jeee kɛ miishɛɛ. Herode fã oya nɔŋŋ koni atao Petro yɛ he fɛɛ he, ni no sɛɛ lɛ eha abibii bulɔi lɛ saji. “Akpala amɛ kɛtee ni ayagbala amɛtoi,” ni eeenyɛ efee akɛ ayagbe amɛ. (Bɔf. 12:19, NW) Ale Herode Agripa akɛ mɔ ko ni musuŋ etsɔɔɔ lɛ ni enaaa mɔbɔ hu. Ani agbala nɔyelɔ ni yitsoŋ wa nɛɛ toi?

18 Ekolɛ Agripa hiɛ gbo akɛni enyɛɛɛ egbe Petro lɛ hewɔ, shi etsɛɛɛ ni nɔ ko ha ebɔi ekɔ̃ɔji anɔ holemɔ ekoŋŋ. Sane ko ni te shi lɛ ha ehenyɛlɔi lɛ ateŋ mɛi komɛi ba koni amɛbakpa hejɔlɛ he fai, ni ekã shi faŋŋ akɛ ehe tswa shi waa koni ehã wiemɔ yɛ asafo babaoo lɛ hiɛ. Luka bɔ amaniɛ akɛ dani Herode baayahã wiemɔ lɛ ‘ewo emaŋtsɛ atade lɛ.’ Yudafoi ayinɔsaneŋmalɔ Josephus ŋma ákɛ akɛ jwiɛtɛi fee Herode atade lɛ, no  hewɔ lɛ, kɛ́ la kpɛ eshwie maŋtsɛ lɛ nɔ lɛ, ekpɛlɛɔ kaŋkaŋ. Kɛkɛ ni maŋtsɛ ni wóɔ ehe nɔ nɛɛ ha wiemɔ. Mɛi ni naa ebakpe shi lɛ wo eyiteŋ mulu kɛ bolɔmɔ akɛ: “Nyɔŋmɔ gbee nɛ, shi jeee gbɔmɔ gbee ni.”—Bɔf. 12:20-22.

19, 20. (a) Mɛni hewɔ Yehowa tswa Herode nɔ̃ lɛ? (b) Mɛɛ gbɛ nɔ gbo ni Herode Agripa gbo trukaa lɛ baanyɛ ashɛje wɔmii lɛ?

19 Anunyam ni tamɔ nɛkɛ lɛ Nyɔŋmɔ nɔ ni, ni eena nɔ ni yaa nɔ lɛ! Herode ná hegbɛ ni ebaanyɛ ekɛfee nɔ ko yɛ sane lɛ he koni oshara akaba enɔ. Kulɛ ebaanyɛ ekã mɛi lɛ ahiɛ, loo kɛ́ hooo po lɛ ekɛ amɛ akakpã gbee. Yɛ no najiaŋ lɛ, eha abɛ nɛɛ ba mli jogbaŋŋ akɛ: “Hewoo nyiɛɔ hiɛkpatamɔ hiɛ.” (Abɛi 16:18) “Ni amrɔ lɛ nɔŋŋ lɛ Nuŋtsɔ [Yehowa] bɔfo tswa lɛ nɔ̃,” ni enɛ ha nuu henɔwolɔ ni fóɔ lɛ pɛ enɔ̃ mli lɛ gbo hiɛshishwiemɔ gbele. “Gɔgɔmii ye [Herode] ni eje jeŋ.” (Bɔf. 12:23) Josephus hu tsɔɔ akɛ atswa Agripa nɔ̃ trukaa, ni ekɛfata he akɛ maŋtsɛ lɛ na akɛ eegbo, akɛni ekpɛlɛ ni mɛi lɛ wo eyiteŋ mulu lɛ hewɔ. Josephus ŋma akɛ Agripa na nɔ̃ gbii enumɔ sɛɛ dani egbo. *

20 Bei komɛi lɛ efeɔ tamɔ nɔ ni efɔŋfeelɔi yeɔ amɛhe, ni agbalaaa amɛtoi yɛ nibii fɔji ni amɛfeɔ lɛ ahe. Esaaa akɛ enɛ feɔ wɔ naakpɛɛ ejaakɛ “jeŋ muu lɛ fɛɛ kã mɔ fɔŋ lɛ mli.” (1 Yoh. 5:19) Kɛlɛ, kɛ́ efee tamɔ nɔ ni agbalaaa efɔŋfeelɔi lɛ atoi lɛ, bei komɛi lɛ Nyɔŋmɔ tsuji anɔkwafoi lɛ haoɔ. Enɛ hewɔ ni saji ni ba nɛɛ shɛjeɔ wɔmii lɛ. Ni tsɔɔ akɛ Yehowa he ni ekɛwo saji amli lɛ kaiɔ etsuji fɛɛ akɛ esumɔɔ jalɛsaneyeli. (Lala 33:5) Etsɛŋ kwraa ni jalɛ sane ni eyeɔ lɛ baaje kpo faŋŋ.

21. Mɛni ji sane titri ni yɔɔ Bɔfoi lɛ Asaji yitso 12 lɛ, ni mɛni hewɔ enɛ baanyɛ ashɛje wɔmii ŋmɛnɛ lɛ?

21 Nikasemɔ ko ni woɔ mɔ hewalɛ waa muɔ sane nɛɛ naa akɛ: “Nyɔŋmɔ wiemɔ lɛ shwere ni etee nɔ.” (Bɔf. 12:24) Shiɛmɔ nitsumɔ lɛ shweremɔ he amaniɛbɔɔ nɛɛ kaiɔ wɔ bɔ ni Yehowa ejɔɔ nitsumɔ nɛɛ nɔŋŋ nɔ yɛ wɔgbii nɛɛ amli lɛ. Eyɛ faŋŋ akɛ, amaniɛbɔɔ ni yɔɔ Bɔfoi lɛ Asaji yitso 12 lɛ gbalaaa jwɛŋmɔ kɛyaaa bɔfo ko ni agbe lɛ, kɛ mɔ kroko hu ni ajie lɛ kɛjɛ tsuŋwoo mli lɛ nɔ titri. Egbalaa jwɛŋmɔ kɛyaa Yehowa nɔ, ni etsɔɔ bɔ ni Yehowa haaa mɔdɛŋ ni Satan bɔ akɛ ekpata Kristofoi asafo lɛ hiɛ koni akpa shiɛmɔ nitsumɔ ni akɛ ekãa tsuɔ lɛ aye omanye lɛ. Nakai tutuamɔi lɛ yeee omanye, ni nakai nɔŋŋ mɔdɛŋ fɛɛ ni abɔɔ akɛ atsĩ shiɛmɔ nitsumɔ lɛ naa ŋmɛnɛ lɛ hu yeŋ omanye. (Yes. 54:17) Yɛ nakai beaŋ nɔŋŋ lɛ, bɔ fɛɛ bɔ ni fee lɛ nitsumɔ ni mɛi ni fiɔ Yehowa kɛ Yesu Kristo sɛɛ lɛ fata he kɛtsuɔ lɛ baaye omanye. Ani enɛ jeee sane ni shɛjeɔ mɔ mii? Mɛɛ hegbɛ kpele po wɔná nɛkɛ akɛ wɔfata he ni aagbɛ “Yehowa wiemɔ lɛ” aashwã ŋmɛnɛ!

^ kk. 2 Kwɛmɔ akrabatsa ni ji  “Maŋtsɛ Herode Agripa I,” ni yɔɔ baafa 79 lɛ.

^ kk. 19 Datrɛfonyo ko ni eji woloŋmalɔ hu lɛ ŋma akɛ ekolɛ nɔ ni Josephus kɛ Luka tsɔɔ akɛ efee Agripa lɛ jɛ titiŋtrɔ̃ ni tsĩ emusuŋnii lɛ anaa lɛ hewɔ, ni enɛ nyɛɔ egbeɔ mɔ. Bei komɛi lɛ, mɔ lɛ shweɔ titiŋtrɔ̃i lɛ, loo kɛ́ mɔ lɛ gbo lɛ amɛjeɔ kpo kɛjɛɔ emli. Wolo ko tsɔɔ akɛ: “Akɛni Luka ji datrɛfonyo hewɔ lɛ, enyɛ etsɔɔ nɔ ni ba [Herode] nɔ lɛ mli fitsofitso, ni enɛ haa wɔnaa akɛ gbɛ nɔ ni [Herode] tsɔ egbo lɛ yɛ gbeyei waa.”