Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 9

“Nyɔŋmɔ Jeee Mɛi Ahiɛaŋkwɛlɔ”

“Nyɔŋmɔ Jeee Mɛi Ahiɛaŋkwɛlɔ”

Kristofoi lɛ shiɛ amɛha Jeŋmajiaŋbii foolɔi lɛ

Edamɔ Bɔfoi lɛ Asaji 10:1–11:30 lɛ nɔ

1-3. Mɛɛ ninaa ajie lɛ kpo atsɔɔ Petro, ni mɛni hewɔ esa akɛ wɔnu ninaa lɛ shishi lɛ?

YƐ AFI 36 Ŋ.B. gbo beaŋ lɛ, no mli lɛ Petro yɛ Yopa ni ji maŋ ni meelei yakpelekeɔ yɛ jɛmɛ lɛ mli, ni eesɔle yɛ shĩa ko ni yɔɔ ŋshɔ lɛ naa gbɛ lɛ yiteŋ, yɛ hulu ni tsoɔ hɛrɛbii lɛ nɔ. Gbii saŋŋ nɛ ní eyato nakai shĩa lɛ. Shĩa nɛɛ ni eyato lɛ tsɔɔ akɛ ehiɛɛɛ adesai krokomɛi ahe jwɛŋmɔ fɔŋ. Atsɛɔ shĩatsɛ lɛ Simon, ni eji wolokpoolɔ, ni jeee Yudafonyo fɛɛ Yodafonyo baato mɔ ko ni tsuɔ nitsumɔ ni tamɔ nɛkɛ lɛ ŋɔɔ. * Ni kɛlɛ, etsɛŋ ni Petro baakase nɔ ko ni he hiaa waa ni baatsɔɔ akɛ Yehowa kwɛɛɛ hiɛaŋ.

2 Beni Petro sɔleɔ lɛ, efee tamɔ nɔ̃ enyɔ enɔ. Nɔ ni ena yɛ ninaa lɛ mli lɛ baanyɛ agba Yudafonyo fɛɛ Yudafonyo naa. Ashĩ nɔ ko tamɔ mama kɛjɛ ŋwɛi kɛkpeleke shi, ni kooloi ni Mla lɛ tsɔɔ akɛ amɛhe tseee lɛ yɛ mli. Akɛɛ Petro akɛ egbe ni eye, shi eto he akɛ: “Miyeko nɔ ko ni buleɔ mɔ loo nɔ ko ni he tseee dã.” Akɛɛ lɛ shii etɛ sɔŋŋ akɛ: “Nɔ ni Nyɔŋmɔ etsuu he lɛ, kaabu lɛ akɛ bulemɔnɔ.” (Bɔf. 10:14-16, Ga Biblia hee) Ninaa nɛɛ ha Petro yiŋ futu lɛ, shi etsɛɛɛ ni ena nibii anaa faŋŋ.

3 Mɛni ji Petro ninaa lɛ shishi? Ehe miihia ni wɔnu ninaa lɛ shishi, ejaakɛ etsɔɔ bɔ ni Yehowa naa adesai ehaa lɛ he anɔkwa sane ko. Ákɛ anɔkwa Kristofoi lɛ, ja wɔna mɛi taakɛ Nyɔŋmɔ naa amɛ lɛ dani wɔbaanyɛ wɔye Nyɔŋmɔ Maŋtsɛyeli lɛ he odase kɛmɔ shi. Bɔni afee ni wɔnu Petro ninaa lɛ shishi lɛ, nyɛhaa wɔpɛia nibii ni sa kadimɔ waa ni tee nɔ ni kɔɔ ninaa lɛ he lɛ amli wɔkwɛa.

“Ekpaa Nyɔŋmɔ Fai Daa” (Bɔfoi lɛ Asaji 10:1-8)

4, 5. Namɔ ji Kornelio, ni mɛni ba beni esɔleɔ lɛ?

4 Petro leee kwraa akɛ asomoaŋ yɛ gbi ni tsɔ hiɛ lɛ mli lɛ, Nyɔŋmɔ jie ninaa ko hu kpo etsɔɔ nuu ko ni atsɛɔ lɛ Kornelio ni yɔɔ Kaisarea yɛ kooyigbɛ ni kɛ Yopa jekɛmɔ aaafee kilomitai 50 lɛ. Kornelio ji Roma  asraafoi-oha-atsɛ, ni “Nyɔŋmɔ jálɔ ni.” * Eji mɔ ko ni kwɛɔ eweku jogbaŋŋ, ejaakɛ “ekɛ ewe lɛ fɛɛ sheɔ Nyɔŋmɔ gbeyei.” Kornelio jeee mɔ ko ni etsake kɛbatsɔ Yudafonyo; eji Jeŋmajiaŋnyo foolɔ. Ni kɛlɛ, ejieɔ musuŋtsɔlɛ kpo etsɔɔ Yudafoi ohiafoi lɛ, ni efeɔ amɛ ejurɔ pii. Nuu ni hiɛ tsui kpakpa nɛɛ ‘kpaa Nyɔŋmɔ fai daa.’—Bɔf. 10:2.

5 Aaafee gbɛkɛ ŋmɛji etɛ mli lɛ, Kornelio miisɔle, ni ena yɛ ninaa mli akɛ ŋwɛi bɔfo ko kɛɛ lɛ akɛ: “Osɔlemɔi kɛ nijuji ni ofeɔ lɛ eshɛ ŋwɛi ni ebaafee kaimɔnɔ yɛ Nyɔŋmɔ hiɛ.” (Bɔf. 10:4) Kornelio tsu mɛi kɛtee koni amɛyatsɛ bɔfo Petro kɛba, taakɛ ŋwɛi bɔfo lɛ kɛɛ lɛ akɛ efee lɛ. Kornelio ji Jeŋmajiaŋnyo foolɔ, shi etsɛŋ ni abaagbele shinaa ko ni tsutsu ko lɛ aŋa naa lɛ naa aha lɛ. Etsɛŋ ni abaashiɛ yiwalaheremɔ he shɛɛ sane lɛ atsɔɔ lɛ.

6, 7. (a) Gbaa niiashikpamɔ ko ni tsɔɔ akɛ Nyɔŋmɔ boɔ mɛi ni hiɛ tsui kpakpa ni miitao amɛle lɛ lɛ asɔlemɔi atoi. (b) Mɛni wɔbaanyɛ wɔkɛɛ yɛ nakai niiashikpamɔi lɛ ahe?

6 Ŋmɛnɛ lɛ, ani Nyɔŋmɔ boɔ mɛi ni hiɛ tsui kpakpa ni miitao amɛle lɛ lɛ asɔlemɔi atoi? Susumɔ niiashikpamɔ nɛɛ he okwɛ. Odasefonyo ko ha yoo ko ni yɔɔ Albania lɛ Buu-Mɔɔ lɛ eko, ni emli sane ko wieɔ bii atsɔsemɔ he. * Yoo lɛ kɛɛ Odasefonyo ni tee eŋɔɔ lɛ akɛ: “Ani ole akɛ no mli lɛ miisɔle miiha Nyɔŋmɔ koni eye ebua mi ní matsɔse mibiyei lɛ? Lɛ etsu bo kɛba miŋɔɔ! Sane ni he hiaa mi lɛ pɛpɛɛpɛ okɛbaha mi lɛ!” Akɛ yoo lɛ kɛ ebiyei lɛ bɔi nikasemɔ, ni sɛɛ mli lɛ ewu hu bafata he.

7 Ani niiashikpamɔ nɛɛ ji nɔ ko ni efɔɔɔ kaa? Dabi kwraa! Niiashikpamɔ ni tamɔ nɛkɛ lɛ eba shii abɔ yɛ je lɛŋ hei srɔtoi—ni efa aahu akɛ anyɛŋ akɛɛ akɛ amɛba yɛ heniianaa. Belɛ, mɛni wɔbaanyɛ wɔkɛɛ? Klɛŋklɛŋ lɛ, Yehowa boɔ aŋkroaŋkroi ni hiɛ tsui kpakpa ni taoɔ esɛɛ gbɛ lɛ asɔlemɔi atoi. (1 Maŋ. 8:41-43; Lala 65:3) Nɔ ni ji enyɔ lɛ, ŋwɛi bɔfoi lɛ fiɔ wɔsɛɛ yɛ shiɛmɔ nitsumɔ lɛ mli.—Kpoj. 14:6, 7.

 “Petro Efee Yaa” (Bɔfoi lɛ Asaji 10:9-23a)

8, 9. Mɛni mumɔ lɛ ha Petro le, ni te efee enii yɛ he eha tɛŋŋ?

8 Petro yɛ tsũ lɛ yiteŋ lolo, ni “efee yaa” yɛ ninaa lɛ hewɔ, kɛyashi beni mɛi ni Kornelio tsu lɛ badamɔ agbo lɛ naa. (Bɔf. 10:17) Petro ekɛɛ shii etɛ sɔŋŋ akɛ eyeŋ nii ni Mla lɛ buɔ amɛ akɛ amɛhe tseee lɛ, no hewɔ lɛ ani ebaasumɔ akɛ ekɛ hii nɛɛ aya ni eyabote Jeŋmajiaŋnyo shĩa? Nyɔŋmɔ tsɔ mumɔ krɔŋkrɔŋ lɛ nɔ eha Petro le nɔ ni esa akɛ efee yɛ sane nɛɛ he. Akɛɛ Petro akɛ: “Naa, hii etɛ miitao bo; no hewɔ lɛ tée shi ni okpeleke shi okɛ amɛ aya, ni okaje ŋwane ko, ejaakɛ mi mitsu amɛ.” (Bɔf. 10:19, 20) Ŋwanejee ko kwraa bɛ he akɛ nii ni ashĩ tamɔ mama lɛ he ninaa lɛ saa Petro jwɛŋmɔ koni ebo mumɔ krɔŋkrɔŋ lɛ gbɛtsɔɔmɔi atoi.

9 Petro ná ele akɛ Nyɔŋmɔ efã Kornelio koni etsu ni abatsɛ lɛ kɛba, no hewɔ lɛ Petro here tsuji ni ji Jeŋmajiaŋbii lɛ atuu kɛba shĩa lɛ, ‘ni efee amɛ gbɔ.’ (Bɔf. 10:23a) Akɛni Petro boɔ Nyɔŋmɔ toi waa hewɔ lɛ, ebɔi tsakemɔi ni Nyɔŋmɔ miifee koni eyiŋtoi aba mli lɛ anɔkpɛlɛmɔ momo.

10. Mɛɛ gbɛ nɔ Yehowa tsɔɔ etsɔɔ ewebii lɛ agbɛ, ni mɛɛ saji esa akɛ wɔbi wɔhe?

10 Kɛbashi ŋmɛnɛ lɛ, Yehowa miiya nɔ eetsɔɔ ewebii lɛ agbɛ fiofio. (Abɛi 4:18) Eetsɔ emumɔ krɔŋkrɔŋ lɛ nɔ eetsɔɔ “tsulɔ anɔkwafo kɛ nilelɔ” lɛ, kɛ Nɔyeli Kuu ni damɔ tsulɔ lɛ najiaŋ lɛ gbɛ. (Mat. 24:45) Yɛ be kɛ beaŋ lɛ, ajaleɔ bɔ ni wɔnuɔ Nyɔŋmɔ Wiemɔ lɛ shishi wɔhaa lɛ mli, loo afeɔ tsakemɔi yɛ asafo lɛ gbɛjianɔtoi komɛi amli. Esa akɛ wɔbi wɔhe akɛ: ‘Te mifeɔ minii yɛ tsakemɔi nɛɛ ahe mihaa tɛŋŋ? Ani mikpɛlɛɔ gbɛtsɔɔmɔi ni Nyɔŋmɔ mumɔ lɛ kɛhaa yɛ saji nɛɛ amli lɛ anɔ?’

Petro ‘Fã akɛ Abaptisi Amɛ’ (Bɔfoi lɛ Asaji 10:23b-48)

11, 12. Mɛni Petro fee beni eyashɛ Kaisarea lɛ, ni mɛni no mli lɛ ekase momo?

11 Beni ajie ninaa lɛ kpo atsɔɔ Petro sɛɛ lɛ, enɔ jetsɛremɔ lɛ, ekɛ mɛi nɛɛhu—mɛi etɛ ni Kornelio tsu amɛ kɛba lɛ, kɛ “nyɛmimɛi ekpaa” ni ji Yudafoi ni jɛ Yopa lɛ—yi mli kɛtee Kaisarea. (Bɔf. 11:12) Akɛni Kornelio miikpa Petro gbɛ hewɔ lɛ, ebua “ewekumɛi kɛ enanemɛi juji” lɛ anaa kɛkpe—ni ekã shi faŋŋ akɛ Jeŋmajiaŋbii ji amɛ fɛɛ. (Bɔf. 10:24) Beni Petro shɛ shi lɛ, efee nɔ ko ni tsutsu ko lɛ efeŋ: Ebote Jeŋmajiaŋnyo foolɔ shĩa! Petro tsɔɔ mli akɛ: “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ebaa eŋɔɔ; shi mi lɛ, Nyɔŋmɔ etsɔɔ mi akɛ mikatsɛ́ mɔ ko mɔ ni he tseee loo mɔ ni buleɔ mɔ.” (Bɔf. 10:28, Ga Biblia hee) Agbɛnɛ lɛ, Petro ebanu shishi akɛ nɔ ni esa akɛ ekase kɛjɛ ninaa ni ajie lɛ kpo atsɔɔ lɛ lɛ mli lɛ kɔɔɔ niyenii ni sa akɛ aye lɛ pɛ he. Esaaa akɛ ‘etsɛɔ mɔ ko mɔ ni he tseee,’ kɛ́ Jeŋmajiaŋnyo ji mɔ lɛ po.

“Shi Kornelio miikwɛ amɛ gbɛ, ni etsɛ́ ewekumɛi kɛ enanemɛi juji kɛkpe.”—Bɔfoi lɛ Asaji 10:24

12 Mɛi fɛɛ ni naa ekpe shi lɛ yɛ nɔ ni Petro yɔɔ kɛɛmɔ lɛ he miishɛɛ waa. Kornelio tsɔɔ mli akɛ: “Wɔ fɛɛ wɔyɛ biɛ yɛ Nyɔŋmɔ hiɛ, koni wɔbo nibii fɛɛ ni Nyɔŋmɔ ekɛɛo eto lɛ atoi.” (Bɔf. 10:33) Kɛ́ mɔ ko ni yɔɔ wiemɔ lɛ he miishɛɛ kɛɛ bo nakai lɛ, te obaanu he oha tɛŋŋ? Petro kɛ wiemɔ ni sa  kadimɔ waa nɛɛ je shishi: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔf. 10:34, 35) Petro ekase akɛ bɔ ni Nyɔŋmɔ kɛ mɛi yeɔ ehaa lɛ damɔɔɔ amɛhewolonɔ su, maŋ nɔ ni amɛjɛ, loo kponɔgbɛ nii kroko ko kwraa nɔ. Petro tee nɔ eye Yesu sɔɔmɔ nitsumɔ lɛ, egbele lɛ, kɛ eshitee lɛ he odase etsɔɔ amɛ.

13, 14. (a) Mɛni sa kadimɔ waa yɛ Kornelio kɛ Jeŋmajiaŋbii krokomɛi lɛ atsakemɔ ni ba yɛ afi 36 Ŋ.B. lɛ he? (b) Mɛni hewɔ esaaa akɛ wɔdamɔɔ kponɔgbɛ nii anɔ wɔkpáa mɛi amli loo wɔkojoɔ amɛ lɛ?

13 Agbɛnɛ lɛ, nɔ ko ni bako pɛŋ ba: “Beni Petro wieɔ nɛkɛ wiemɔi nɛɛ lolo lɛ,” afɔse mumɔ krɔŋkrɔŋ lɛ ashwie nakai ‘jeŋmajiaŋbii lɛ anɔ.’ (Bɔf. 10:44, 45) Enɛ ji be pɛ ni Ŋmalɛ lɛ tsĩ tã akɛ afɔse mumɔ krɔŋkrɔŋ lɛ ashwie mɛi anɔ dani abaptisi amɛ. Akɛni Petro yɔse akɛ enɛ ji okadi ni tsɔɔ akɛ Nyɔŋmɔ ekpɛlɛ nakai Jeŋmajiaŋbii lɛ anɔ hewɔ lɛ, “efã akɛ abaptisi amɛ.” (Bɔf. 10:48) Jeŋmajiaŋbii nɛɛ atsakemɔ ni ba yɛ afi 36 Ŋ.B. lɛ kadi be ni Nyɔŋmɔ kɛ Yudafoi lɛ ye yɛ gbɛ krɛdɛɛ nɔ lɛ naagbee. (Dan. 9:24-27) Akɛni Petro nyiɛ hiɛ kɛye odase yɛ be nɛɛ mli hewɔ lɛ, ekɛ ‘maŋtsɛyeli lɛ naa samfee’ ni ji etɛ ní no ji naagbee nɔ̃ lɛ tsu nii. (Mat. 16:19) Samfee nɛɛ ha Jeŋmajiaŋbii foolɔi lɛ ná hegbɛ akɛ amɛbatsɔmɔ Kristofoi ni akɛ mumɔ efɔ amɛ mu.

14 Ákɛ Maŋtsɛyeli shiɛlɔi ni yɔɔ ŋmɛnɛ lɛ, wɔyɔseɔ akɛ “Nyɔŋmɔ kpaaa gbɔmɛi amli.” (Rom. 2:11) Esuɔmɔnaa nii ji akɛ “ehere gbɔmɛi fɛɛ yiwala.” (1 Tim. 2:4) No hewɔ lɛ, esaaa akɛ wɔdamɔɔ kponɔgbɛ nii anɔ wɔkpáa mɛi amli loo wɔkojoɔ amɛ. Nitsumɔ ni akɛwo wɔdɛŋ ji ni wɔye Nyɔŋmɔ Maŋtsɛyeli lɛ he odase kɛmɔ shi, ni enɛ biɔ ni wɔshiɛ wɔha mɛi fɛɛ ekɔɔɔ he eko maŋ nɔ ni amɛjɛ, amɛpuemɔ, loo jamɔ mli ni amɛyɔɔ.

“Amɛbu Amɛnaa, ni Amɛwo Nyɔŋmɔ Hiɛ Nyam” (Bɔfoi lɛ Asaji 11:1-18)

15, 16. Mɛni hewɔ Kristofoi komɛi ni ji Yudafoi kɛ Petro ná lɛ, ni te egbála nibii ni efee lɛ amli eha tɛŋŋ?

15 Ekã shi faŋŋ akɛ Petro yɛ he miishɛɛ waa akɛ eyabɔ nɔ ni tee nɔ lɛ he amaniɛ, no hewɔ lɛ eyiŋ kɛtee Yerusalem. Shi etamɔ nɔ ni anu amaniɛbɔɔ akɛ Jeŋmajiaŋbii lɛ “emɔ Nyɔŋmɔ wiemɔ lɛ mli” lɛ he yɛ Yerusalem dani eyashɛ jɛmɛ. Beni Petro yashɛ shi etsɛɛɛ nɔŋŋ lɛ, ‘mɛi ni jɛ ketiafolɔi lɛ ateŋ lɛ kɛ lɛ ná.’ Egba amɛnaa akɛ Petro etee ‘hii foolɔi aŋɔɔ ni ekɛ amɛ eyaye nii.’ (Bɔf. 11:1-3) Jeee Jeŋmajiaŋbii ni tsake kɛbatsɔmɔ Kristo sɛɛnyiɛlɔi lɛ hewɔ amɛkɛ Petro ná lɛ. Moŋ lɛ, nakai kaselɔi ni ji Yudafoi lɛ miima nɔ mi doo akɛ esa akɛ Jeŋmajiaŋbii lɛ aye Mla lɛ nɔ—ni ebaabi ni afolɔ amɛ ketia—bɔni afee ni amɛjamɔ lɛ asa Yehowa hiɛ. Eyɛ faŋŋ akɛ, ewa kɛha kaselɔi komɛi ni ji Yudafoi lɛ akɛ amɛaakpɛlɛ nɔ akɛ Mose Mla lɛ eba naagbee.

16 Te Petro gbála nibii ni efee lɛ amli eha tɛŋŋ? Bɔfoi lɛ Asaji 11:4-16 lɛ tsɔɔ akɛ, egba nibii ejwɛ ni Nyɔŋmɔ fee: (1) ninaa ni Nyɔŋmɔ jie lɛ kpo etsɔɔ lɛ lɛ (Kuku 4-10); (2) famɔ ni mumɔ lɛ kɛha lɛ lɛ (Kuku 11, 12);  (3) sramɔ ni ŋwɛi bɔfo lɛ yasara Kornelio lɛ (Kuku 13, 14); kɛ (4) mumɔ krɔŋkrɔŋ lɛ ni afɔse ashwie Jeŋmajiaŋbii lɛ anɔ lɛ. (Kuku 15, 16) Petro bi sane ko ni anyɛɛɛ aje he ŋwane kwraa kɛmu naa akɛ: “Agbɛnɛ kɛ́ Nyɔŋmɔ eha amɛ [ni ji Jeŋmajiaŋbii ni heɔ amɛyeɔ lɛ] nakai nɔkeenɔ lɛ [mumɔ krɔŋkrɔŋ lɛ] nɔŋŋ ni eha wɔ [Yudafoi lɛ] ni wɔheɔ Nuŋtsɔ Yesu Kristo lɛ nɔ wɔyeɔ lɛ hu lɛ: mi lɛ, namɔ ji mi ni manyɛ Nyɔŋmɔ naa matsĩ?”—Bɔf. 11:17.

17, 18. (a) Mɛɛ yiŋ nibii ni Petro wie lɛ ha Kristofoi ni ji Yudafoi lɛ kpɛ? (b) Mɛni hewɔ ebaanyɛ efee nɔ ni bɛ mlɛo akɛ wɔɔbaa ekomefeemɔ ni yɔɔ asafo lɛ mli lɛ yi lɛ, ni mɛɛ saji esa akɛ wɔbi wɔhe?

17 Nibii ni Petro wie lɛ nyɛ nakai Kristofoi ni ji Yudafoi lɛ anɔ koni amɛkpɛ yiŋ agbɛnɛ. Ani amɛbaaŋmɛɛ Jeŋmajiaŋbii ahe jwɛŋmɔ fɔŋ ni amɛyɔɔ lɛ he, ní amɛkpɛlɛ Jeŋmajiaŋbii ni abaptisi amɛ etsɛko lɛ anɔ akɛ amɛnyɛmimɛi Kristofoi? Amaniɛbɔɔ lɛ kɛɛ akɛ: “Shi beni [bɔfoi lɛ kɛ Kristofoi krokomɛi ni ji Yudafoi lɛ] nu wiemɔ nɛɛ lɛ, amɛbu amɛnaa, ni amɛwo Nyɔŋmɔ hiɛ nyam amɛkɛɛ: Belɛ jeŋmaji lɛ hu Nyɔŋmɔ eha amɛ tsuitsakemɔ ní akɛaahere amɛyiwala!” (Bɔf. 11:18) Su kpakpa ni amɛjie lɛ kpo nɛɛ baa ekomefeemɔ ni yɔɔ asafo lɛ mli lɛ yi.

18 Ŋmɛnɛ lɛ, akɛni anɔkwa jálɔi “jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” hewɔ lɛ, ebɛ mlɛo akɛ ekomefeemɔ aaahi amɛteŋ daa. (Kpoj. 7:9) Mɛi ni jɛ maji srɔtoi anɔ, ní esoro amɛmaŋ nifeemɔi kɛ bɔ ni atsɔse amɛ aha lɛ yɛ asafoi babaoo amli. Belɛ, esa akɛ wɔbi wɔhe akɛ: ‘Ani mibɛ mɛi pɔtɛ̃ɛ komɛi ahe jwɛŋmɔ fɔŋ ko kwraa? Ani mitswa mifai shi akɛ miŋmɛŋ gbɛ kɔkɔɔkɔ koni nibii ni egbala mɛi ni yɔɔ je lɛŋ lɛ ateŋ lɛ eko—tamɔ maŋhedɔɔ, jaku mli ni mɔ ko jɛ, susumɔ ni ayɔɔ akɛ maŋ ko nɔ bii anifeemɔ hi fe ekroko, kɛ hewolonɔ su—aná bɔ ni mikɛ minyɛmimɛi Kristofoi lɛ yeɔ mihaa lɛ nɔ hewalɛ?’ Beni klɛŋklɛŋ Jeŋmajiaŋbii lɛ batsɔmɔ Kristofoi lɛ sɛɛ afii komɛi lɛ, kaimɔ akɛ nɔ ko ba Petro nɔ. Eha mɛi ahe jwɛŋmɔ fɔŋ ni mɛi komɛi hiɛ lɛ ná enɔ hewalɛ, ni “egbala ehe shi ni etse ehe” kɛjɛ Jeŋmajiaŋbii ni ji Kristofoi lɛ ahe, ni ehe bahia ni Paulo ajaje lɛ. (Gal. 2:11-14) Nyɛhaa wɔkwɛa wɔhe nɔ jogbaŋŋ be fɛɛ be koni wɔkaná jwɛŋmɔ fɔŋ yɛ mɛi ahe.

 “Mɛi Babaoo Hé Ye” (Bɔfoi lɛ Asaji 11:19-26a)

19. Namɛi Yudafoi ni ebatsɔmɔ Kristofoi ni yɔɔ Antiokia lɛ je shishi amɛshiɛ amɛtsɔɔ, ni mɛni jɛ mli ba?

19 Ani Yesu sɛɛnyiɛlɔi lɛ bɔi shiɛmɔ amɛha Jeŋmajiaŋbii foolɔi lɛ? Kadimɔ nɔ ni ba yɛ sɛɛ mli yɛ Antiokia ni yɔɔ Siria lɛ. * Yudafoi babaoo yɛ nakai maŋ lɛ mli, shi hetsɛ̃ bɛ amɛkɛ Jeŋmajiaŋbii lɛ ateŋ tsɔ. No hewɔ lɛ, ewaaa akɛ aaashiɛ atsɔɔ Jeŋmajiaŋbii ni yɔɔ Antiokia lɛ. Biɛ ji he ni Yudafoi komɛi ni ebatsɔmɔ kaselɔi lɛ je shishi amɛshiɛ sanekpakpa lɛ amɛtsɔɔ “Helabii lɛ.” (Bɔf. 11:20) Jeee Helabii ni etsɔmɔ Yudafoi lɛ pɛ amɛshiɛ amɛtsɔɔ, shi moŋ amɛshiɛ amɛtsɔɔ Jeŋmajiaŋbii foolɔi lɛ hu. Yehowa jɔɔ nitsumɔ lɛ nɔ, ni “mɛi babaoo hé ye.”—Bɔf. 11:21.

20, 21. Mɛni Barnaba fee kɛtsɔɔ akɛ eyɔseɔ he ni enyɛmɔ yawaa, ni te wɔɔfee tɛŋŋ wɔtsɔɔ akɛ wɔ hu wɔyɔseɔ he ni wɔnyɛmɔ yawaa beni wɔtsuɔ wɔsɔɔmɔ nitsumɔ lɛ?

20 Yerusalem asafo lɛ wo Barnaba gbɛ kɛtee Antiokia koni eyashiɛ etsɔɔ mɛi ni efee klalo akɛ amɛaabo shɛɛ sane lɛ toi lɛ. Mɛi ni bo sanekpakpa lɛ toi lɛ ayi fa aahu akɛ, ekome enyɛɛɛ eshiɛ etsɔɔ amɛ fɛɛ. Saulo ni ji mɔ ni ajie ato akɛ bɔfo kɛha jeŋmaji lɛ, ji mɔ ni sa fe fɛɛ ni baanyɛ aye abua Barnaba kɛtsu nitsumɔ nɛɛ, aloo jeee nakai? (Bɔf. 9:15; Rom. 1:5) Kɛ́ okwɛ lɛ, ani Barnaba baabu Saulo akɛ mɔ ko ni kɛ lɛ baapele nii ahe? Barnaba efeee nakai, yɛ no najiaŋ lɛ eyɔse he ni enyɛmɔ yawaa. Eŋɔfɔ̃ enɔ ni etee Tarso eyatao Saulo, ni ekɛ lɛ ba Antiokia koni ebaye ebua lɛ. Amɛye afi yɛ jɛmɛ, ni amɛkɛwo kaselɔi ni yɔɔ asafo ni yɔɔ jɛmɛ lɛ mli lɛ hewalɛ.—Bɔf. 11:22-26a.

21 Te wɔɔfee tɛŋŋ wɔtsɔɔ akɛ wɔyɔseɔ he ni wɔnyɛmɔ yawaa beni wɔtsuɔ wɔsɔɔmɔ nitsumɔ lɛ? Enɛ baabi ni wɔkpɛlɛ wɔgbɔjɔmɔi anɔ. Wɔ fɛɛ wɔyɛ nyɛmɔi kɛ hesai srɔtoisrɔtoi. Ákɛ nɔkwɛmɔnɔ lɛ, mɛi komɛi nyɛɔ amɛhaa woji jogbaŋŋ yɛ shiɛmɔ nitsumɔ lɛ mli, shi ewaa kɛhaa amɛ akɛ amɛaafee sɛɛkuu-kɛsaramɔi loo amɛje Biblia mli nikasemɔi ashishi. Kɛ́ oosumɔ ni ohe asa jogbaŋŋ yɛ shiɛmɔ nitsumɔ lɛ fã ko mli lɛ, mɛni hewɔ obiii ni mɔ ko aye abua bo? Kɛ́ bo tsutsu oŋɔ hegbɛ lɛ kɛfee nakai lɛ, oshiɛmɔ nitsumɔ lɛ baawo yibii jogbaŋŋ ni obaaná miishɛɛ waa yɛ sɔɔmɔ nitsumɔ lɛ mli.—1 Kor. 9:26.

Amɛkɛ ‘Nii Maje Koni Akɛfɛne Nyɛmimɛi Lɛ’ (Bɔfoi lɛ Asaji 11:26b-30)

22, 23. Mɛni nyɛmimɛi ni yɔɔ Antiokia lɛ fee kɛtsɔɔ akɛ amɛyɛ nyɛmimɛi asuɔmɔ, ni mɛɛ gbɛ nɔ Nyɔŋmɔ webii ni yɔɔ ŋmɛnɛ lɛ hu tsɔɔ amɛfeɔ nakai nɔŋŋ?

22 Antiokia klɛŋklɛŋ “awo kaselɔi lɛ agbɛ́i akɛ Kristofoi” yɛ Nyɔŋmɔ gbɛtsɔɔmɔ naa. (Bɔf. 11:26b) Gbɛ́i ni Nyɔŋmɔ ekpɛlɛ nɔ nɛɛ sa mɛi ni haa amɛshihilɛ tamɔɔ Kristo nɔ lɛ jogbaŋŋ. Beni Jeŋmajiaŋbii lɛ tsɔmɔɔ Kristofoi lɛ, ani nyɛmifeemɔ ni mli wa baka Yudafoi ni heɔ amɛyeɔ lɛ kɛ Jeŋmajiaŋbii ni heɔ amɛyeɔ lɛ ateŋ? Susumɔ nɔ ni nyɛmimɛi lɛ fee beni  hɔmɔ kpeteŋkpele ko ba yɛ afi 46 Ŋ.B. lɛ he okwɛ. * Yɛ blema lɛ, kɛ́ hɔmɔ ba lɛ, mɛi ni naa nɔ waa ji ohiafoi ni kɛ shika loo niyenii ko kwraa etoko lɛ. Beni hɔmɔ kpeteŋkpele lɛ ba lɛ, niyenii kɛ nibii krokomɛi ahe bahia Yudafoi ni ebatsɔmɔ Kristofoi ni yɔɔ Yudea lɛ, ni ekã shi faŋŋ akɛ amɛteŋ mɛi babaoo ji ohiafoi. Beni nyɛmimɛi ni yɔɔ Antiokia lɛ—ní amɛteŋ mɛi komɛi ji Jeŋmajiaŋbii ni ebatsɔmɔ Kristofoi lɛ—ná amɛle enɛ lɛ, amɛkɛ ‘nii maje koni akɛfɛne’ nyɛmimɛi ni yɔɔ Yudea lɛ. (Bɔf. 11:29) Mɛɛ nyɛmimɛi asuɔmɔ krɔŋŋ po nɛ!

23 Nakai nɔŋŋ Nyɔŋmɔ webii ni yɔɔ ŋmɛnɛ lɛ hu feɔ. Kɛ́ wɔná wɔle akɛ wɔnyɛmimɛi ni yɔɔ maŋ kroko nɔ, loo mɛi ni yɔɔ maŋ nɔ he ni wɔyɔɔ lɛ eyaje fimɔ mli lɛ, wɔjɛɔ wɔsuɔmɔ mli wɔyeɔ wɔbuaa amɛ yɛ gbɛi srɔtoi anɔ. Nitsumɔhe Nine Ajinafoi Akui ahe feɔ oya kɛtoɔ ajinafoi akui koni amɛkwɛ ni aye abua wɔnyɛmimɛi ni ekolɛ osharai wuji tamɔ lasuogbele, shikpɔŋhosomɔi, kɛ ŋshɔ shishi shikpɔŋhosomɔi ekpata amɛnibii ahiɛ lɛ. Nibii ni afeɔ kɛfɛneɔ mɛi nɛɛ tsɔɔ akɛ wɔji nyɛmimɛi ni efee ekome lɛɛlɛŋ.—Yoh. 13:34, 35; 1 Yoh. 3:17.

24. Mɛɛ gbɛ nɔ wɔɔtsɔ wɔha ana akɛ wɔnuɔ ninaa ni ajie lɛ kpo atsɔɔ Petro lɛ shishi jogbaŋŋ?

24 Ákɛ anɔkwa Kristofoi lɛ, wɔnuɔ ninaa ni ajie lɛ kpo atsɔɔ Petro yɛ tsũ lɛ yiteŋ yɛ Yopa nɔ ni fa fe afii 1,900 ni eho nɛ lɛ shishi jogbaŋŋ. Nyɔŋmɔ ni wɔjáa lɛ lɛ kpaaa gbɔmɛi amli. Eesumɔ akɛ wɔye e-Maŋtsɛyeli lɛ he odase kɛmɔ shi, ni enɛ biɔ ni wɔshiɛ wɔtsɔɔ mɛi ekɔɔɔ he eko hewolonɔ su ni amɛhiɛ, maŋ nɔ ni amɛjɛ, loo gbɛnaa ni amɛyɔɔ. Belɛ, nyɛhaa wɔtswaa wɔfai shi akɛ wɔbaaha mɛi fɛɛ ni miisumɔ ni amɛbo sanekpakpa lɛ toi lɛ aná hegbɛ kɛfee nakai.—Rom. 10:11-13.

Kɛ́ wɔnyɛmimɛi lɛ yaje fimɔ mli lɛ, wɔjɛɔ wɔsuɔmɔ mli wɔyeɔ wɔbuaa amɛ yɛ gbɛi srɔtoi anɔ

^ kk. 1 Yudafoi lɛ ekomɛi ebuuu wolokpoolɔ ejaakɛ mɔ ni tsuɔ nitsumɔ nɛɛ kɛ kooloi ahewolo tsuɔ nii, ni etaa kooloi ni egboi kɛ nibii ni anyaŋeɔ ahe. Akɛni abuɔ wolokpoolɔi akɛ mɛi ni he tseee hewɔ lɛ, aŋmɛɛɛ amɛ gbɛ ni amɛba sɔlemɔwe lɛ, ni esa akɛ he ni amɛtsuɔ nii yɛ kɛ maŋ teŋ ajekɛ kɛ́ hooo kwraa lɛ ninetalɔi 50, loo nɔ ni fa fe mitai 22. Ekolɛ enɛ ji yiŋtoi ahewɔ ni Simon shĩa lɛ “yɔɔ ŋshɔ lɛ naa lɛ” ateŋ ekome.—Bɔf. 10:6.

^ kk. 4 Kwɛmɔ akrabatsa ni ji  “Kornelio kɛ Roma Asraafoi Lɛ,” ni yɔɔ baafa nɛɛ nɔ lɛ.

^ kk. 6 Sane lɛ yitso ji “Ŋaawoo Kpakpa Kɛha Bii Atsɔsemɔ,” ni eje kpo yɛ November 1, 2006 Buu-Mɔɔ baafa 4 kɛyashi 7 lɛ mli.

^ kk. 19 Kwɛmɔ akrabatsa ni ji  “Antiokia ni Yɔɔ Siria,” ni yɔɔ baafa 73 lɛ.

^ kk. 22 Yudafoi ayinɔsaneŋmalɔ Josephus tsɔɔ akɛ “hɔmɔ kpeteŋkpele” nɛɛ ba yɛ Nɔyelɔ Klaudio nɔyeli beaŋ (41-54 Ŋ.B.).