Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 YITSO 14

“Wɔnaa Efee Ekome”

“Wɔnaa Efee Ekome”

Bɔ ni nɔyeli kuu lɛ mu sane lɛ naa amɛha kɛ bɔ ni no ha asafoi lɛ fee ekome

Edamɔ Bɔfoi lɛ Asaji 15:13-35 lɛ nɔ

1, 2. (a) Mɛɛ sanebimɔi ni yɔɔ hiɛdɔɔ ehe bahia ni nɔyeli kuu ni hi shi yɛ klɛŋklɛŋ afii 100 lɛ mli Kristofoi asafo lɛ mli lɛ atsu he nii? (b) Mɛɛ yelikɛbuamɔ hii nɛɛ ná bɔni afee ni amɛnyɛ amɛmu sane naa yɛ gbɛ ni ja nɔ?

MƆ FƐƐ MƆ efee klalo kɛmiikwɛ nɔ yiŋ ni abaakpɛ. Bɔfoi lɛ kɛ onukpai lɛ yɛ tsũ ko mli yɛ Yerusalem, ni amɛteŋ mɔ fɛɛ mɔ miikwɛ enyɛmi hiɛ ejaakɛ amɛle akɛ be eshɛ ni esa akɛ amɛkpɛ yiŋ ko ni he hiaa waa. Ketiafoo sane lɛ etee sanebimɔi komɛi ni yɔɔ hiɛdɔɔ waa ashi. Ani Kristofoi yɛ Mose Mla lɛ shishi? Ani esa akɛ aha srɔtofeemɔ ko aba Yudafoi ni etsɔmɔ Kristofoi lɛ kɛ Jeŋmajiabii ni etsɔmɔ Kristofoi lɛ ateŋ?

2 Hii ni kwɛɔ asafoi lɛ anɔ lɛ esusu odaseyelii babaoo ahe. Nyɔŋmɔ gbalɛ Wiemɔ lɛ yɛ amɛjwɛŋmɔ mli, ni amɛmiisusu saji ni amɛ diɛŋtsɛ amɛye he odase ni kɔneɔ mɔ yiŋ ni tsɔɔ akɛ Yehowa miikudɔ bɔ ni nibii yaa lɛ ehaa lɛ hu he. Amɛteŋ mɔ fɛɛ mɔ etsɔɔ ejwɛŋmɔ yɛ sane lɛ he jogbaŋŋ. Aná odaseyelii babaoo yɛ sane lɛ he aahu akɛ efee faŋŋ akɛ Yehowa mumɔ lɛ miikudɔ nibii. Ani hii nɛɛ baaŋmɛ gbɛ ni Yehowa atsɔɔ amɛ gbɛ?

3. Kɛ́ wɔpɛi sane ni yɔɔ Bɔfoi lɛ Asaji yitso 15 lɛ mli lɛ, mɛɛ sɛɛ wɔbaanyɛ wɔná?

3 Ebaabi ni amɛná ekãa kɛ hemɔkɛyeli diɛŋtsɛ koni amɛnyɛ amɛkpɛlɛ gbɛtsɔɔmɔ ni mumɔ lɛ kɛhaa yɛ sane nɛɛ mli lɛ nɔ. Nɔ hewɔ ji akɛ, enɛ feemɔ baanyɛ aha hetsɛ̃ ni Yudafoi ajamɔŋ hiɛnyiɛlɔi lɛ yɔɔ kɛha amɛ lɛ mli awa. Ni agbɛnɛ hu, mɛi ni yɔɔ asafo lɛ mli ni amɛtswa amɛfai shi akɛ amɛbaaha Nyɔŋmɔ webii lɛ aku sɛɛ amɛkɛ Mose Mla lɛ abɔi nitsumɔ lɛ baate shi amɛwo amɛ. Mɛni nɔyeli kuu lɛ baafee? Nyɛhaa wɔkwɛa. Kɛ́ wɔmiisusu amaniɛbɔɔ lɛ he lɛ, wɔbaana nɔkwɛmɔnɔ ni nakai hii lɛ fee, kɛ bɔ ni Yehowa Odasefoi a-Nɔyeli Kuu ni yɔɔ ŋmɛnɛ lɛ hu feɔ nakai pɛpɛɛpɛ. Ákɛ Kristofoi lɛ, eji nɔkwɛmɔnɔ ní esa akɛ wɔ hu wɔkase kɛ́ wɔkɛ naagbai miikpe loo wɔmiikpɛ wɔyiŋ.

‘Gbalɔi lɛ Awiemɔi lɛ Kɛ Enɛ Yeɔ Egbɔ’ (Bɔfoi lɛ Asaji 15:13-21)

4, 5. Mɛɛ wiemɔi ayisɛɛ Yakobo tsɛ́ kɛjɛ gbalɛi lɛ amli?

4 Bɔfo Yakobo ni ji Yesu nyɛ bi lɛ fɛne egbee. * Eeenyɛ efee akɛ lɛ ji  kpee ni afee yɛ be nɛɛ mli lɛ sɛinɔtalɔ. Etamɔ nɔ ni ewiemɔi lɛ mua yiŋ ni kuu lɛ ekpɛ lɛ fɛɛ naa. Yakobo kɛɛ hii ni naa ekpe shi lɛ akɛ: “Simeon egba bɔ ni Nyɔŋmɔ basara jeŋmaji lɛ tsutsu ko ni ehala amɛteŋ maŋ ko eha egbɛ́i lɛ. Ni gbalɔi lɛ awiemɔi lɛ hu kɛ enɛ yeɔ egbɔ pɛpɛɛpɛ.”—Bɔf. 15:14, 15.

5 Ekã shi faŋŋ akɛ, wiemɔ ni Simeon, loo Simon Petro ha lɛ, kɛ odase ni Barnaba kɛ Paulo ye lɛ ha Yakobo kai ŋmalɛi ni sa ni haa sane ni asusuɔ he lɛ feɔ faŋŋ. (Yoh. 14:26) Beni Yakobo wie akɛ “gbalɔi lɛ awiemɔi lɛ hu kɛ enɛ yeɔ egbɔ pɛpɛɛpɛ” sɛɛ lɛ, etsɛ́ wiemɔi ni yɔɔ Amos 9:11, 12 lɛ ayisɛɛ. Amos Ŋmalɛ lɛ fata Hebri Ŋmalɛi ni afɔɔ amɛ tsɛmɔ akɛ “Gbalɔi lɛ” ahe. (Mat. 22:40; Bɔf. 15:16-18) Obaana akɛ wiemɔi ni Yakobo tsɛ́ yisɛɛ lɛ yɛ srɔto fioo yɛ nɔ ni yɔɔ Amos wolo lɛ mli ŋmɛnɛ lɛ he. Ekã shi faŋŋ akɛ, Yakobo kɛ Septuagint lɛ, ni ji Hebri Ŋmalɛ lɛ ní atsɔɔ shishi kɛtee Hela wiemɔ mli lɛ tsu nii.

6. Mɛɛ gbɛ nɔ Ŋmalɛi lɛ ha sane ni asusuɔ he lɛ fee faŋŋ?

6 Yehowa tsɔ gbalɔ Amos nɔ egba akɛ be ko baashɛ ni E-baatee “David buu” ní egbee shi lɛ shi ema shi, ni enɛ damɔ shi kɛha odehei aweku mli ni abaajɛ aná Mesia Maŋtsɛyeli lɛ. (Ezek. 21:26, 27) Ani shikome ekoŋŋ lɛ Yehowa kɛ heloonaa Yudafoi lɛ pɛ baaye akɛ emaŋ? Dabi. Gbalɛ lɛ kɛfata he akɛ abaafee “jeŋmaji lɛ fɛɛ” ekome akɛ ‘mɛi ni akɛ Nyɔŋmɔ gbɛ́i ewo amɛ.’ Kaimɔ akɛ, etsɛko tsɔ ni Petro ye odase akɛ Nyɔŋmɔ ‘kpaaa niiaŋ yɛ wɔ, ni ji Yudafoi ni etsɔmɔ Kristofoi lɛ, kɛ amɛ, ni ji Jeŋmajiaŋbii ni etsɔmɔ Kristofoi lɛ ateŋ, ni ekɛ hemɔkɛyeli tsuuɔ amɛtsuii ahe.’ (Bɔf. 15:9) Ni tsɔɔ akɛ, Nyɔŋmɔ miisumɔ ni Yudafoi kɛ Jeŋmajiaŋbii fɛɛ abatsɔmɔ Maŋtsɛyeli lɛ niyelɔi. (Rom. 8:17; Efe. 2:17-19) Gbalɛi nɛɛ ateŋ eko kwraa etsɔɔɔ akɛ esa akɛ afolɔ Jeŋmajiaŋbii ni etsɔmɔ Kristofoi lɛ ketia, loo akɛ amɛtsɔmɔ Yudafoi dã.

7, 8. (a) Mɛni Yakobo kɛfɔ̃ gwabɔɔ lɛ hiɛ? (b) Te esa akɛ wɔnu Yakobo wiemɔi lɛ ashishi wɔha tɛŋŋ?

7 Yakobo damɔ Ŋmalɛi nɛɛ kɛ odaseyelii ni enu, ní anyɛɛɛ aje he ŋwane lɛ anɔ etee nɔ ekɛ wiemɔi nɛɛ fɔ̃ gwabɔɔ lɛ hiɛ akɛ: “No hewɔ lɛ nɔ ni mikɛɔ ji akɛ akagba mɛi ni eku amɛsɛɛ kɛjɛ jeŋmaji lɛ amli kɛba Nyɔŋmɔ ŋɔɔ lɛ anaa tuutu; shi moŋ aŋma amɛ akɛ amɛhi wɔji anii kɛ ajwamaŋbɔɔ kɛ kooloi ni ashɔtɔ̃ kɛ lá. Ejaakɛ kɛjɛ blema beebe lɛ Mose yɛ mɛi ni shiɛɔ lɛ yɛ maŋ fɛɛ maŋ nɔ, ni daa hejɔɔmɔgbi lɛ akaneɔ ewoji lɛ yɛ kpeehei lɛ.”—Bɔf. 15:19-21.

8 Ani kɛɛmɔ ni Yakobo kɛɛ akɛ “no hewɔ lɛ nɔ ni mikɛɔ ji akɛ” lɛ tsɔɔ akɛ, akɛni ekolɛ lɛ ji kpee lɛ sɛinɔtalɔ hewɔ lɛ ekɛ esusumɔ miifĩ nyɛmimɛi lɛ anɔ, ni lɛ diɛŋtsɛ eejɛ ejwɛŋmɔ mli eetsɔɔ nɔ ni esa akɛ afee? Dabi kwraa! Abaanyɛ atsɔɔ Hela wiemɔ ni atsɔɔ shishi akɛ “nɔ ni mikɛɔ ji akɛ” lɛ hu shishi akɛ “bɔ ni minaa ji akɛ” loo “nɔ ni mikɛfɔ̃ɔ nyɛhiɛ ji akɛ.” Jeee akɛ Yakobo damɔ kuu muu lɛ fɛɛ najiaŋ eekpɛ yiŋ, shi moŋ  edamɔ odaseyelii ni enu kɛ nɔ ni Ŋmalɛ lɛ kɛɔ yɛ sane lɛ he lɛ anɔ ekɛ nɔ ni esa akɛ afee lɛ miifɔ̃ amɛhiɛ.

9. Mɛɛ sɛɛnamɔi jɛ nɔ ni Yakobo kɛfɔ̃ gwabɔɔ lɛ hiɛ akɛ afee lɛ mli kɛba?

9 Ani sane ni Yakobo kɛfɔ̃ gwabɔɔ lɛ hiɛ lɛ sa? Ekã shi faŋŋ akɛ esa, ejaakɛ sɛɛ mli lɛ bɔfoi lɛ kɛ onukpai lɛ fɛɛ kpɛlɛ nɔ ákɛ akɛ no atsu nii. Mɛɛ yibii kpakpai jɛ mli kɛba? Nɔ ni akpɛ yiŋ akɛ afee lɛ ‘gbaŋ’ Jeŋmajiaŋbii ni etsɔmɔ Kristofoi lɛ “anaa,” ni tsɔɔ akɛ ewaŋ ehaŋ amɛ, ejaakɛ akɛ Mose Mla lɛ mli taomɔnii lɛ efɔŋ amɛnɔ. (Bɔf. 15:19) Yiŋ ni akpɛ lɛ gbaŋ Yudafoi ni etsɔmɔ Kristofoi lɛ hu ahenilee naa, ejaakɛ amɛkɛ afii babaoo enu “Mose . . . ni daa hejɔɔmɔ gbi lɛ akaneɔ ewoji lɛ yɛ kpeehei lɛ” he sane. * (Bɔf. 15:21) Ekã shi faŋŋ akɛ nɔ ni akpɛ yiŋ akɛ afee lɛ baaha ekomefeemɔ ni yɔɔ Yudafoi ni etsɔmɔ Kristofoi lɛ kɛ Jeŋmajiaŋbii ni etsɔmɔ Kristofoi lɛ ateŋ lɛ mli awa. Nɔ ni fe fɛɛ lɛ, ebaasa Yehowa Nyɔŋmɔ hiɛ, ejaakɛ ekɛ eyiŋtoo kpãa gbee. Ekã shi faŋŋ akɛ gbɛ nɔ ni atsɔ atsu sane ní miihe afite ekomefeemɔ kɛ miishɛɛ ni yɔɔ Nyɔŋmɔ webii asafo muu lɛ fɛɛ mli lɛ sa jogbaŋŋ! Ni mɛɛ nɔkwɛmɔnɔ ni nɔ bɛ po enɛ ji kɛha Kristofoi asafo ni yɔɔ ŋmɛnɛ lɛ nɛkɛ!

Albert Schroeder ní miiha wiemɔ yɛ afi 1998 majimaji ateŋ kpee ko shish

10. Mɛɛ gbɛ nɔ Nɔyeli Kuu ni yɔɔ ŋmɛnɛ lɛ tsɔɔ amɛkaseɔ nɔyeli kuu ni hi shi yɛ klɛŋklɛŋ afii 100 lɛ mli lɛ?

10 Taakɛ atsĩ tã yɛ yitso ni tsɔ hiɛ lɛ mli lɛ, Yehowa Odasefoi a-Nɔyeli Kuu ni yɔɔ ŋmɛnɛ lɛ kɛ amɛhiɛ fɔ̃ɔ Yehowa, ni ji Jeŋ Muu Fɛɛ Maŋtsɛ lɛ, kɛ Yesu Kristo, ni ji asafo lɛ Yitso lɛ nɔ kɛha gbɛtsɔɔmɔ yɛ saji fɛɛ amli, tamɔ bɔ ni nɔyeli kuu ni hi shi yɛ klɛŋklɛŋ afii 100 lɛ mli lɛ fee lɛ. * (1 Kor. 11:3) Mɛɛ gbɛ nɔ amɛtsɔɔ amɛfeɔ nakai? Albert D. Schroeder ni sɔmɔ akɛ Nɔyeli Kuu lɛ mlinyo kɛjɛ afi 1974 kɛyashi egbe eshikpɔŋ nɔ sɔɔmɔ lɛ naa yɛ March 2006 lɛ tsɔɔ mli akɛ: “Nɔyeli Kuu lɛ kpeɔ daa Shɔ, ni amɛsɔleɔ amɛbiɔ Yehowa mumɔ lɛ gbɛtsɔɔmɔ kɛjeɔ kpee lɛ shishi. Amɛbɔɔ mɔdɛŋ waa koni sane fɛɛ sane ni amɛbaatsu he nii, kɛ yiŋ fɛɛ yiŋ ni  amɛbaakpɛ lɛ kɛ Nyɔŋmɔ Wiemɔ ni ji Biblia lɛ akpã gbee.” Milton G. Henschel ni lɛ hu ekɛ afii babaoo sɔmɔ akɛ Nɔyeli Kuu lɛ mlinyo kɛyashi egbe eshikpɔŋ nɔ sɔɔmɔ lɛ naa yɛ March 2003 lɛ hu bi nikaselɔi ni egbe Buu-Mɔɔ Biblia Gilead Skul lɛ klas ni ji 101 lɛ naa lɛ sane ko ni he hiaa waa. Ebi akɛ, “Ani asafo kroko ko yɛ shikpɔŋ nɛɛ nɔ ní e-Nɔyeli Kuu lɛ taoɔ Nyɔŋmɔ Wiemɔ ni ji Biblia lɛ mli dani amɛkpɛɔ yiŋ ni he hiaa?” Hetoo lɛ yɛ faŋŋ.

‘Amɛfamɔ Hii Komɛi ni Amɛtsu Amɛ’ (Bɔfoi lɛ Asaji 15:22-29)

11. Mɛɛ gbɛ nɔ atsɔ aha asafoi lɛ le yiŋ ni nɔyeli kuu lɛ ekpɛ lɛ?

11 Nɔyeli kuu ni yɔɔ Yerusalem lɛ anaa bote bɛlɛ kome mli yɛ ketiafoo sane lɛ he. Shi bɔni afee ni asafoi lɛ afee amɛnii yɛ ekomefeemɔ mli lɛ, esa akɛ aha amɛle yiŋ ní akpɛ lɛ faŋŋ yɛ gbɛ ni woɔ mɔ hewalɛ ní suɔmɔ yɔɔ mli nɔ. Mɛni ji gbɛ ni sa fe fɛɛ ni abaanyɛ atsɔ nɔ afee enɛ? Amaniɛbɔɔ lɛ tsɔɔ mli akɛ: “Esa bɔfoi lɛ kɛ onukpai lɛ kɛ asafo muu lɛ fɛɛ hiɛ akɛ amɛaafamɔ hii komɛi yɛ amɛ diɛŋtsɛ amɛteŋ, ní atsu amɛ kɛ Paulo kɛ Barnaba kɛya Antiokia; amɛji Yuda mɔ ni atsɛɔ lɛ Barsaba hu lɛ, kɛ Sila, nyɛmimɛi lɛ ateŋ onukpai lɛ.” Agbɛnɛ hu, nɔyeli kuu lɛ ŋma wolo amɛfata he kɛtsu hii nɛɛ bɔni afee ni akane yɛ asafoi fɛɛ ni yɔɔ Antiokia, Siria, kɛ Kilikia lɛ amli.—Bɔf. 15:22-26.

12, 13. Mɛɛ nɔ kpakpa jɛ (a) tsu ni atsu Yuda kɛ Sila lɛ mli kɛba? (b) wolo ni nɔyeli kuu lɛ ŋma lɛ mli kɛba?

12 Akɛni Yuda kɛ Sila ji “nyɛmimɛi lɛ ateŋ onukpai” hewɔ lɛ, amɛsa jogbaŋŋ akɛ mɛi ni aaadamɔ nɔyeli kuu lɛ najiaŋ. Hii ejwɛ sɔŋŋ ni atsu lɛ ha efee faŋŋ akɛ amɛbaaa koni amɛbaha ketiafoo sane lɛ hetoo pɛ kɛkɛ, shi moŋ amɛba koni amɛkɛ gbɛtsɔɔmɔ hee ni jɛ nɔyeli kuu lɛ dɛŋ lɛ hu abaha. Kɛ́ ‘hii ni afamɔ’ nɛɛ tee lɛ, amɛbaaha ekomefeemɔ ni mli wa abakã Yudafoi ni etsɔmɔ Kristofoi ni yɔɔ Yerusalem lɛ kɛ Jeŋmajiaŋbii ni etsɔmɔ Kristofoi ni yɔɔ asafoi lɛ amli lɛ ateŋ. Ekã shi faŋŋ akɛ nilee yɛ mli waa akɛ awo hii nɛɛ agbɛ kɛtee, ni etsɔɔ suɔmɔ hu! Ŋwanejee ko bɛ he akɛ eha toiŋjɔlɛ kɛ ekomefeemɔ hi Nyɔŋmɔ webii lɛ ateŋ.

13 Wolo ni aŋma lɛ kɛ ketiafoo sane lɛ he gbɛtsɔɔmɔ ni yɔɔ faŋŋ ha Jeŋmajiaŋbii ni etsɔmɔ Kristofoi lɛ, ni eha amɛle nibii hu ni esa akɛ amɛfee koni Yehowa akpɛlɛ amɛnɔ ní ejɔɔ amɛ. Sane titri ni yɔɔ wolo lɛ mli lɛ kɛɛ akɛ: “Esa Mumɔ krɔŋkrɔŋ lɛ hiɛ ni esa wɔ hu wɔhiɛ akɛ, wɔkɛ jatsu ko akafɔ̃ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji kɛ lá kɛ kooloi ni ashɔ̃tɔ̃ kɛ ajwamaŋbɔɔ; kɛji nyɛhi enɛɛmɛi lɛ, nyɛfee jogbaŋŋ. Nyɛhia shi jogbaŋŋ!”—Bɔf. 15:28, 29.

14. Mɛni haa Yehowa webii lɛ tsuɔ nii yɛ ekomefeemɔ mli yɛ mligbalamɔi ni yɔɔ je lɛŋ ŋmɛnɛ lɛ fɛɛ sɛɛ?

14 Ŋmɛnɛ lɛ, Yehowa Odasefoi ní yi fa fe 7,000,000 ni yɔɔ asafoi ni fa  fe 100,000 amli yɛ jeŋ fɛɛ lɛ tsɔɔ tsɔɔmɔ kome, ni srɔtofeemɔ ko bɛ amɛnifeemɔi ateŋ. Mɛni haa ekomefeemɔ ni tamɔ nɛkɛ hiɔ amɛteŋ be mli ni yiŋfutumɔ kɛ mligbalamɔi ehe shi waa ŋmɛnɛ yɛ je nɛŋ lɛ? Nɔ titri ni kɛ ekomefeemɔ nɛɛ baa ji akɛ Yesu Kristo, ni ji asafo lɛ Yitso lɛ tsɔɔ Nɔyeli Kuu ni damɔ “tsulɔ anɔkwafo kɛ nilelɔ” lɛ najiaŋ lɛ nɔ ekɛ gbɛtsɔɔmɔ ni yɔɔ faŋŋ haa amɛ. (Mat. 24:45-47) Nɔ kroko hu ni haa amɛfeɔ ekome ji akɛ nyɛmimɛi ni yɔɔ je lɛŋ fɛɛ lɛ jɛɔ amɛsuɔmɔ mli amɛkɛ Nɔyeli Kuu lɛ gbɛtsɔɔmɔ tsuɔ nii.

“Amɛmii Shɛ Amɛhe yɛ Miishɛjemɔ lɛ Hewɔ” (Bɔfoi lɛ Asaji 15:30-35)

15, 16. Mɛni jɛ ketiafoo sane lɛ mli kɛba, ni mɛni ha ebalɛ nakai lɛ?

15 Amaniɛbɔɔ ni yɔɔ Bɔfoi lɛ Asaji lɛ haa wɔleɔ akɛ beni nyɛmimɛi ni awo amɛ gbɛ kɛjɛ Yerusalem lɛ yashɛ Antiokia lɛ, “amɛbabua asafo lɛ naa ni amɛjie wolo lɛ amɛha amɛ.” Te nyɛmimɛi ni yɔɔ jɛmɛ lɛ fee amɛnii yɛ nɔyeli kuu lɛ gbɛtsɔɔmɔ lɛ he amɛha tɛŋ? “Beni amɛkane [wolo] lɛ, amɛmii shɛ amɛhe yɛ miishɛjemɔ lɛ hewɔ.” (Bɔf. 15:30, 31) Agbɛnɛ hu, Yuda kɛ Sila kɛ “wiemɔ babaoo shɛje nyɛmimɛi lɛ amii ni amɛwo amɛ hewalɛ.” Enɛ hewɔ atsɛ́ hii enyɔ lɛ akɛ “gbalɔi” lɛ, taakɛ atsɛ́ Barnaba, Paulo kɛ mɛi krokomɛi lɛ hu akɛ gbalɔi lɛ—ni akɛ wiemɔ nɛɛ tsɛ́ɔ mɛi ni jajeɔ Nyɔŋmɔ suɔmɔnaanii amɛtsɔɔ lɛ.—Bɔf. 13:1; 15:32; 2 Mose 7:1, 2.

16 Eyɛ faŋŋ akɛ Yehowa jɔɔ gbɛjianɔtoo muu lɛ fɛɛ nɔ, ni eha atsu ketiafoo sane lɛ he nii jogbaŋŋ kɛ miishɛɛ. Mɛni ha anyɛ atsu sane lɛ he nii jogbaŋŋ lɛ? Ŋwanejee ko kwraa bɛ he akɛ, ejɛ yelikɛbuamɔ ni mumɔ krɔŋkrɔŋ lɛ kɛha kɛ gbɛtsɔɔmɔ ni yɔɔ faŋŋ ni nɔyeli kuu lɛ damɔ Nyɔŋmɔ Wiemɔ lɛ nɔ amɛkɛha yɛ be ni sa mli lɛ hewɔ. Kɛfata he lɛ, atsɔ suɔmɔ gbɛ nɔ aha asafoi lɛ le yiŋ ni akpɛ lɛ.

17. Ŋmɛnɛ lɛ, kɛ́ nɔkwɛlɔi gbɛfalɔi basara asafo lɛ, mɛɛ gbɛ nɔ nitsumɔi ni amɛtsuɔ lɛ ekomɛi tamɔ nɔ ni atsu yɛ klɛŋklɛŋ afii 100 lɛ mli lɛ?

17 Ŋmɛnɛ lɛ nakai nɔŋŋ hu Yehowa Odasefoi a-Nɔyeli Kuu lɛ kɛ gbɛtsɔɔmɔ ni yɔɔ ebe naa haa asafoi fɛɛ ni yɔɔ je lɛŋ lɛ. Kɛ́ amɛkpɛ yiŋ lɛ, amɛtsɔɔ gbɛ ni yɔɔ tɛ̃ɛ nɔ amɛhaa asafoi lɛ leɔ enɛ faŋŋ. Gbɛ kome ni amɛtsɔɔ nɔ amɛfeɔ nakai ji akɛ amɛhaa nɔkwɛlɔi gbɛfalɔi yasaraa asafoi lɛ. Nyɛmimɛi hii nɛɛ kɛ amɛhe shãa afɔle, ni amɛfãa gbɛ kɛjɛɔ asafo kome mli kɛyaa ekroko mli, ni amɛkɛ gbɛtsɔɔmɔ ni yɔɔ tɛ̃ɛ haa asafoi lɛ ni amɛwoɔ amɛ hewalɛ. Taakɛ Paulo kɛ Barnaba fee lɛ, amɛkɛ ŋmɛlɛtswai babaoo tsuɔ sɔɔmɔ nitsumɔ lɛ, ‘amɛtsɔɔ nii ni amɛjajeɔ Yehowa sanekpakpa lɛ, ni mɛi krokomɛi pii hu feɔ nakai.’ (Bɔf. 15:35) Amɛkaseɔ nɔkwɛmɔnɔ ni Yuda kɛ Sila fee lɛ, ni ‘amɛkɛ wiemɔ babaoo shɛjeɔ nyɛmimɛi lɛ amii ni amɛwoɔ amɛ hewalɛ.’

18. Mɛni esa akɛ Yehowa webii lɛ afee koni eya nɔ ejɔɔ amɛ?

18 Ni asafoi lɛ hu? Mɛni baaha asafoi ni yɔɔ je lɛŋ fɛɛ lɛ aya nɔ ahi shi yɛ toiŋjɔlɛ kɛ ekomefeemɔ mli yɛ jeŋ ni mligbalamɔi eyi mli obɔ nɛɛ mli?  Kaimɔ akɛ kaselɔ Yakobo ji mɔ ni ŋma yɛ sɛɛ mli akɛ: “Nilee ni jɛ ŋwɛi lɛ, tsutsu lɛ ehe tse, no sɛɛ lɛ ehe jɔ, ehiɛ ka shi, eboɔ toi . . . Shi jalɛ yibii lɛ, hejɔlɛ mli aduɔ yɛ ahaa mɛi ni feɔ hejɔlɛ nii lɛ.” (Yak. 3:17, 18) Kɛ́ kpee ni afee yɛ Yerusalem lɛ ji nɔ ni yɔɔ Yakobo jwɛŋmɔ mli jio, jeee no jio lɛ, wɔnyɛŋ wɔtsɔɔ. Shi kɛlɛ nibii ni wɔsusu he yɛ Bɔfoi lɛ Asaji lɛ yitso 15 lɛ mli lɛ feɔ lɛ faŋŋ akɛ, ja toiŋjɔlɛ kɛ ekomefeemɔ yɛ Yehowa webii ateŋ dani ebaajɔɔ amɛ.

19, 20. (a) Mɛni feɔ lɛ faŋŋ akɛ toiŋjɔlɛ kɛ ekomefeemɔ hi Antiokia asafo lɛ mli? (b) Mɛni Paulo kɛ Barnaba nyɛ amɛfee agbɛnɛ?

19 Agbɛnɛ lɛ ebafee faŋŋ akɛ toiŋjɔlɛ kɛ ekomefeemɔ yɛ Antiokia asafo lɛ mli. Nyɛmimɛi ni yɔɔ Antiokia lɛ kɛ nyɛmimɛi ni jɛ Yerusalem lɛ beee, shi moŋ amɛnya saramɔ ni Yuda kɛ Sila basara amɛ lɛ he waa diɛŋtsɛ, ejaakɛ ‘amɛha amɛtsɛ fioo yɛ jɛi, ni amɛwo amɛ gbɛ yɛ hejɔlɛ mli kɛtee mɛi ni tsu amɛ lɛ aŋɔɔ’ yɛ Yerusalem. * (Bɔf. 15:33) Wɔbaanyɛ wɔná nɔmimaa akɛ nyɛmimɛi ni yɔɔ Yerusalem lɛ hu ná miishɛɛ waa beni hii enyɔ lɛ gba amɛ amɛgbɛfãa lɛ mli amaniɛ lɛ. Yehowa duromɔ naa lɛ, amɛtsu nitsumɔ ni awo amɛgbɛ akɛ amɛyatsu lɛ he nii jogbaŋŋ kɛ miishɛɛ!

20 Paulo kɛ Barnaba tee nɔ amɛhi Antiokia, ni agbɛnɛ lɛ amɛbaanyɛ amɛkɛ amɛnyɛmɔ fɛɛ anyiɛ shiɛmɔ nitsumɔ lɛ hiɛ jogbaŋŋ, tamɔ bɔ ni ŋmɛnɛ lɛ nɔkwɛlɔi gbɛfalɔi feɔ kɛ́ amɛyasara asafoi ni atuu awo amɛdɛŋ lɛ. (Bɔf. 13:2, 3) Yehowa webii lɛ náa enɛ he sɛɛ naakpa! Shi te Yehowa tee nɔ ekɛ shiɛlɔi enyɔ ni yɔɔ ekãa nɛɛ tsu nii eha tɛŋŋ, ni mɛɛ yibii kpakpai amɛwo? Wɔbaana enɛ yɛ yitso ni nyiɛ sɛɛ lɛ mli.

Kristofoi ni yɔɔ ŋmɛnɛ lɛ náa mumɔŋ niyenii ni akɛhaa kɛtsɔ Nɔyeli Kuu lɛ kɛ enajiaŋdamɔlɔi lɛ anɔ lɛ he sɛɛ

^ kk. 4 Kwɛmɔ akrabatsa ni ji  “Yakobo—‘Nuŋtsɔ lɛ Nyɛmi Lɛ,’” ni yɔɔ baafa 112 lɛ.

^ kk. 9 Yakobo kɛ nilee tsu nii ni etsɛ́ Mose niŋmai lɛ asɛɛ, ni jeee Mla lɛ pɛ fata he, shi moŋ bɔ ni Nyɔŋmɔ tsu saji ahe nii eha kɛ nibii ni tsɔɔ E-suɔmɔnaa nifeemɔ ni aŋmala afɔ̃ shi dani aŋma Mla lɛ. Ákɛ nɔkwɛmɔnɔ lɛ, bɔ ni Nyɔŋmɔ buɔ lá, gbalafitemɔ, kɛ wɔŋjamɔ ehaa lɛ jeɔ kpo faŋŋ yɛ Mose Klɛŋklɛŋ Wolo lɛ mli. (1 Mose 9:3, 4; 20:2-9; 35:2, 4) No hewɔ lɛ, Yehowa ha ana shishitoo mlai ni esa akɛ adesai fɛɛ aye nɔ, kɛ́ amɛji Yudafoi jio, Jeŋmajiaŋbii jio.

^ kk. 10 Kwɛmɔ akrabatsa ni ji  “Bɔ ni Ato Nɔyeli Kuu lɛ He Gbɛjianɔ Aha Ŋmɛnɛ,” ni yɔɔ baafa 110 lɛ.

^ kk. 19 Biblia shishitsɔɔmɔi komɛi kɛ wiemɔi komɛi wo kuku 34 lɛ, ni efee tamɔ nɔ ni Sila hala akɛ eeehi Antiokia. (King James Version) Shi etamɔ nɔ ni akɛ nakai wiemɔi lɛ fata he yɛ sɛɛ mli.