Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 HII SHI AKƐ KRISTOFONYO

Ná Hesai Pii Yɛ Shiɛmɔ Nitsumɔ Lɛ Mli​—Okɛ Mɛi Agba Saji Ni Baahã Onyɛ Oye Amɛ Odase

Ná Hesai Pii Yɛ Shiɛmɔ Nitsumɔ Lɛ Mli​—Okɛ Mɛi Agba Saji Ni Baahã Onyɛ Oye Amɛ Odase

Yesu nyɛ eye Samaria yoo ko odase be ni enyiɛɛɛ shiɛmɔ nɔ, ejaakɛ ekɛ lɛ gba sane. Te wɔɔfee tɛŋŋ wɔná hesai pii yɛ bɔ ni wɔkɛ mɛi ni wɔkɛkpeko pɛŋ jeɔ sanegbaa shishi wɔhãa lɛ mli?

  • Feemɔ ohiɛ ŋmɔlɔŋmɔlɔ ni okɛ mɛi agba sane. No mli lɛ etɔ Yesu moŋ, shi ebi yoo lɛ nu, ni no kɛkɛ nɔ etsɔ eje sanegbaa lɛ shishi. No hewɔ lɛ, bo hu obaanyɛ oŋa mɔ lɛ kɛje shishi, kɛkɛ lɛ ekolɛ owie kɔɔyɔŋ tsakemɔ lɛ, loo sane ko ni eba lɛ he. Hã ehi ojwɛŋmɔŋ akɛ, nɔ klɛŋklɛŋ ni otaoɔ ofee ji, ni oje sanegbaa shishi. No hewɔ lɛ, wiemɔ nɔ ko ni mɔ lɛ baanya he lɛ he. Kɛ́ efooo odaaŋ lɛ, kaahã egba onaa. Okɛ mɔ kroko agba sane. Bi Yehowa ni ehã oná ekãa.​—Ne 2:4; Bɔf 4:29.

  • Hã ohiɛ ahi ohe nɔ koni kɛ́ hegbɛ ko ba lɛ, onyɛ owie sane kpakpa lɛ he, shi kaaye ohe oyai. Bo lɛ, nyɛgbaa sane lɛ. Kɛ́ oye ohe oyai ni owie sane kpakpa lɛ he lɛ, ekolɛ mɔ lɛ náŋ he miishɛɛ, ni ebaafo sanegbaa lɛ sɛɛ. Kɛ́ onyɛɛɛ oye mɔ lɛ odase ni sanegbaa lɛ ba naagbee po lɛ, kaahã egba onaa. Kɛ́ ewa kɛhã bo akɛ obaawie sane kpakpa lɛ he otsɔɔ mɔ ko lɛ, bo lɛ kasemɔ bɔ ni obaafee okɛ mɛi agba sane ni owieee anɔkwale lɛ he.[Jiemɔ vidio 1 lɛ ni nyɛsusu he.]

  • Bɔɔ mɔdɛŋ ni owie nɔ ko ni kɔɔ ohemɔkɛyeli lɛ he ni baanyɛ ahã ebi bo sane, kɛkɛ lɛ, obaanyɛ otsɔ no nɔ oye lɛ odase. Yesu wie wiemɔi ni hãa mɔ naa kpɛɔ ehe, ni no hã yoo lɛ bibii lɛ saji. Sɛɛ mli be ni ebɔi sane kpakpa lɛ he wiemɔ lɛ, no mli lɛ, saji ni yoo lɛ biɔ lɛ lɛ ahetoo ji nɔ ni ehãa lɛ. [Jiemɔ vidio 2 lɛ ni nyɛsusu he, no sɛɛ lɛ, jiemɔ vidio 3 lɛ ni nyɛsusu he.]