Bei pii lɛ, kɛ́ ashiɛ Maŋtsɛyeli sane lɛ ahã mɛi yɛ amɛmaŋ wiemɔ mli lɛ, amɛboɔ toi oya. Ekolɛ enɛ hewɔ ni yɛ afi 33 Ŋ.B. Pentekoste gbi lɛ nɔ lɛ, Yehowa to gbɛjianɔ koni “Yudafoi ni sheɔ Nyɔŋmɔ gbeyei ni jɛ jeŋmaji fɛɛ ni yɔɔ ŋwɛi shishi lɛ anɔ lɛ” anu sane kpakpa lɛ yɛ ‘amɛ diɛŋtsɛ amɛmaŋ wiemɔ’ mli lɛ, eyɛ mli akɛ ekolɛ amɛwieɔ wiemɔ kome tamɔ Hebri loo Greek. (Bɔf 2:5, 8) Ŋmɛnɛ lɛ, yɛ hei ni awieɔ wiemɔi srɔtoisrɔtoi yɛ lɛ, ekolɛ asafoi ni feɔ kpeei yɛ wiemɔi srɔtoi amli lɛ ateŋ mɔ fɛɛ mɔ yɛ shikpɔŋkuku yɛ he kome. Te shiɛlɔi ni yɔɔ asafoi ni tamɔ nakai lɛ amli lɛ aaafee tɛŋŋ afee ekome kɛye mɔ fɛɛ mɔ odase, ní ebaaa lɛ akɛ mɛi srɔtoi baaya shĩatsɛ kome too ŋɔɔ shii abɔ, ní no bagba enaa lɛ?

• Nyɛkpea (Abɛ 15:22): Esa akɛ shiɛmɔ nitsumɔ nɔkwɛlɔi lɛ akpe kɛsusu gbɛ ni hi ni amɛ fɛɛ amɛbaatsɔ nɔ amɛshiɛ sane kpakpa lɛ jogbaŋŋ lɛ he. Ekolɛ asafoi ni shiɛɔ yɛ wiemɔ kroko mli ni amɛshikpɔŋkuku lɛ edaaa lɛ, baasumɔ ni kɛ́ nyɛmiishiɛ lɛ, nyɛshi shĩai ni yɔɔ amɛshikpɔŋkuku lɛ mli ni awieɔ amɛwiemɔ lɛ yɛ mli lɛ. Shi kɛ́ amɛshikpɔŋkuku lɛ da waa, ni hei ni amɛshiɛɔ yɛ lɛ yɛ shɔŋŋshɔŋŋ ni amɛnyɛɛɛ amɛtsu fɛɛ mli nii be fɛɛ be lɛ, ekolɛ amɛbaasumɔ ni nyɛya shĩai ni yɔɔ mli lɛ eko fɛɛ eko mli, koni kɛ́ mɔ ko jie miishɛɛ kpo lɛ nyɛhã amɛle. (od 93 kk. 37) Aloo ekolɛ amɛbaabi ni nyɛsafo lɛ awa amɛ kɛtao mɛi ni wieɔ amɛsafo lɛ wiemɔ, ní abaanyɛ akɛ amɛhe saji ahã amɛ lɛ. (km 7/12 5, akrabatsa) Nyɛhãa ehia nyɛjwɛŋmɔŋ akɛ, shĩai komɛi yɛ ni awieɔ wiemɔi ni fa fe ekome yɛ mli. Kɛ́ aato gbɛjianɔ ni atsu shikpɔŋkuku lɛ mli nii kɛmɔ shi lɛ, esa akɛ aye mlai ni kɔɔ bɔ ni sa akɛ akɛ mɛi ahe saji atsu nii ahã lɛ anɔ.

• Nyɛfea ekome kɛtsua nii (Efe 4:16): Okɛ gbɛtsɔɔmɔi fɛɛ ni nyɛshiɛmɔ nitsumɔ nɔkwɛlɔ lɛ kɛbaahã lɛ atsu nii jogbaŋŋ. Ani okɛ mɔ ko ni sumɔɔ ni akɛ lɛ akase nii yɛ wiemɔ kroko mli moŋ fe nyɛsafo lɛ wiemɔ lɛ miikase Biblia lɛ? Kɛ́ oto gbɛjianɔ koni mɔ ko ni yɔɔ asafo loo kuu ko ni bɛŋkɛ ni wieɔ ewiemɔ lɛ mli lɛ kɛ lɛ akase nii lɛ, ekolɛ ebaaya ehiɛ oyayaayai.

• Saamɔ ohe (Abɛ 15:28; 16:1): Kɛ́ oyanina mɔ ko yɛ oshikpɔŋkuku lɛ mli ni wieɔ wiemɔ kroko lɛ, bɔɔ mɔdɛŋ ni oshiɛ sane kpakpa lɛ ohã lɛ. Kɛ́ oosaa ohe kɛhã shiɛmɔ lɛ, kwɛmɔ akɛ mɛɛ wiemɔi awieɔ yɛ oshikpɔŋkuku lɛ mli, ní odaunlodi Bibliai kɛ vidioi ni yɔɔ wiemɔi nɛɛ amli lɛ owo ofoŋ loo tablɛti lɛ nɔ. Obaanyɛ okase ŋamɔi yɛ wiemɔi komɛi amli yɛ JW Language lɛ nɔ.