Emli Saji

 

Kuku

Hiɛkpamɔ

 2

Nyɔŋmɔ Wiemɔ Lɛ Mli Jwetrii

 3

Kasemɔ Bɔ Ni Ashiɛɔ Jogbaŋŋ

 4

Hii Shi Akɛ Kristofonyo

 5

Kpee Lɛ Naamuu Wiemɔ

 6

Okɛ Ojwɛŋmɔ Ama Nikanemɔ Kɛ Nitsɔɔmɔ Nɔ

 7

Ŋaawoo

 8

Be

 9

Be Ni Kpokpaa Nɔkwɛlɔ Lɛ Eba

 10

Otsi Ni Abaaya Kpokpaa Nɔ Kpee Loo Kpokpaa Wulu Nɔ Kpee

 11

Otsi Ni Abaaye Kaimɔ Lɛ

 12

Wɔshiɛmɔ Kɛ Wɔshihilɛ Kpee Lɛ Nɔkwɛlɔ

 13

Wɔshiɛmɔ Kɛ Wɔshihilɛ Kpee Lɛ Sɛinɔtalɔ

 14

Onukpai Akuu Lɛ Saji Ahe Gbɛjianɔtolɔ

 15

Ŋaawolɔ Ni Yeɔ Ebuaa

 16

Skul Nifeemɔi Yɛ Asa Ni Ji Enyɔ Loo Etɛ Lɛ Nɔ

 17

Vidioi

 18

1. Wɔshiɛmɔ Kɛ Wɔshihilɛ Akɛ Kristofoi kpee lɛ mli nifeemɔi yɛ Wɔshiɛmɔ Kɛ Wɔshihilɛ Akɛ Kristofoi​—Kpee Nifeemɔ Wolo lɛ mli, ni ehe gbɛtsɔɔmɔi hu ni nyiɛ sɛɛ nɛɛ. Esa akɛ awo shiɛlɔi fɛɛ hewalɛ ni amɛkɛ amɛhe awo skul nifeemɔi lɛ amli. Abaanyɛ ahã mɛi krokomɛi ni baa asafoŋ kpee daa lɛ kɛ amɛhe awo skul nifeemɔi lɛ amli kɛ́ amɛkpɛlɛɔ Biblia lɛ mli tsɔɔmɔi lɛ anɔ, ni amɛbaa amɛjeŋ yɛ Biblia mli shishitoo mlai lɛ hu anaa.​—be bf. 282.

 2. Hiɛkpamɔ: Ekaye fe minitii 3. Daa otsi lɛ, kɛ́ alá ni asɔle kɛje kpee lɛ shishi lɛ, Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ baatee nyɛmimɛi lɛ amiishɛɛ shi kɛhã nifeemɔi ni baaya nɔ yɛ kpee lɛ shishi lɛ, ni ebaatsĩ sanebimɔ ni yɔɔ Wɔshiɛmɔ Kɛ Wɔshihilɛ Kpee Lɛ Hetoo Wolo lɛ mli lɛ hu tã.

 3. Nyɔŋmɔ Wiemɔ Lɛ Mli Jwetrii:

  • Wiemɔ: Minitii 10. Atsɔɔ wiemɔ ni abaahã lɛ saneyitso kɛ emli otii enyɔ loo etɛ komɛi ni esa akɛ awie he lɛ yɛ Wɔshiɛmɔ Kɛ Wɔshihilɛ Kpee Nifeemɔ Wolo lɛ mli. Esa akɛ asafoŋ onukpa ko loo asafoŋ sɔɔlɔi lɛ ateŋ mɛi ni le nitsɔɔmɔ jogbaŋŋ lɛ ahã wiemɔ nɛɛ. Kɛ́ abaaje Biblia mli wolo ko kanemɔ shishi yɛ otsi ko mli lɛ, abaajie vidio ko ni baawie nakai Biblia mli wolo lɛ he. Wielɔ lɛ baagbala jwɛŋmɔ kɛya otii komɛi ni yɔɔ vidio lɛ mli ni kɔɔ saneyitso lɛ he lɛ anɔ yɛ ewiemɔ lɛ mli. Ni esa akɛ ewie otii ni yɔɔ nifeemɔ wolo lɛ mli lɛ hu ahe. Agbɛnɛ hu, akɛni ato mfonirii kɛ Ŋmalɛ mli otii ni fata he lɛ ahe gbɛjianɔ koni ehã anu otii ni yɔɔ wiemɔ lɛ mli lɛ ashishi jogbaŋŋ hewɔ lɛ, esa akɛ wielɔ lɛ kɛ mfonirii lɛ kɛ Ŋmalɛ mli otii nɛɛ atsu nii, bɔ ni be baaŋmɛ gbɛ.

  •   Pɛimɔ Ŋmalɛi Lɛ Amli Jogbaŋŋ: Minitii 8. Nifeemɔ nɛɛ ji sanebimɔ kɛ hetoo, esaaa akɛ akpaa hiɛ, ni esaaa akɛ amuɔ naa hu. Asafoŋ onukpa ko loo asafoŋ sɔɔlɔi lɛ ateŋ mɛi ni le nitsɔɔmɔ jogbaŋŋ lɛ baatsu he nii. Bɔ ni saji otii ejwɛ lɛ eko fɛɛ eko kɔɔ nyɛsafo lɛ he ehãa lɛ ji nɔ ni baatsɔɔ be falɛ ni wielɔ lɛ kɛbaatsu eko fɛɛ eko he nii. Shi esa akɛ ebi saji lɛ fɛɛ. Agbɛnɛ hu, ebaakwɛ kɛji ehe miihia ni akane ŋmalɛi ni yɔɔ klɛŋklɛŋ sanebimɔi enyɔ lɛ anaa lɛ mli kukuji lɛ fɛɛ lo. Esaaa akɛ mɛi ni baahã sanebimɔi lɛ ahetoo lɛ wieɔ fe sɛkɛŋsii 30.

  • Biblia Kanemɔ: Ekaye fe minitii 4. Esa akɛ nyɛmi nuu ko atsu skul nifeemɔ nɛɛ he nii. Skulnyo lɛ baakane ŋmalɛ ni akɛhã lɛ lɛ, ni esaaa akɛ ekpaa hiɛ loo emuɔ naa. Nɔ ni kpee lɛ sɛinɔtalɔ lɛ baagbala ejwɛŋmɔ kɛya nɔ titri ji bɔ ni ebaawa skulbii lɛ ni amɛkane nii jogbaŋŋ, amɛkane lɛ bɔ ni abaanu shishi, amɛkane lɛ kɛ naatselɛ, amɛmamɔ saji otii anɔ mi jogbaŋŋ, amɛle be ni esa akɛ amɛwó amɛgbee nɔ kɛ be ni esa akɛ amɛba lɛ shi, amɛle hei ni esa akɛ amɛmi amɛsɛŋ nu yɛ, kɛ agbɛnɛ hu, ni amɛkane nii tamɔ bɔ ni agbaa sane.

  4. Kasemɔ Bɔ Ni Ashiɛɔ Jogbaŋŋ: Ekaye fe minitii 15. Ato kpee lɛ fã nɛɛ he gbɛjianɔ ni eye ebua wɔ fɛɛ koni wɔsaa wɔhe kɛhã shiɛmɔ nitsumɔ lɛ, ni agbɛnɛ hu, ehã wɔshiɛ ni wɔtsɔɔ nii jogbaŋŋ fe bɔ ni wɔfeɔ bianɛ lɛ. Esa akɛ skulbii ni baafee klɛŋklɛŋ sanegbaa kɛ sɛɛkuukɛsaramɔi lɛ adamɔ shiɛmɔ wiemɔi ni yɔɔ Wɔshiɛmɔ Kɛ Wɔshihilɛ Kpee Nifeemɔ Wolo lɛ baafa 1 lɛ nɔ amɛtsu amɛnifeemɔi lɛ ahe nii. Shiɛlɔi baanyɛ akpɛ amɛyiŋ kɛji amɛkɛ wolo loo vidio ko ni fata Nibii Ni Wɔkɛtsuɔ Nii Kɛtsɔɔ Mɛi Nii lɛ ahe lɛ baatsu nii loo amɛkɛtsuŋ nii. Wɔshiɛmɔ Kɛ Wɔshihilɛ Kpee Nifeemɔ Wolo lɛ tsɔɔ be pɔtɛɛ kɛhã skulbii anifeemɔi lɛ eko fɛɛ eko, ni bei komɛi lɛ, nifeemɔ wolo lɛ kɛ gbɛtsɔɔmɔi krokomɛi hu baahã. Kɛ́ skulnyo lɛ tsu enifeemɔ lɛ he nii egbe naa, ni be ni ahã lɛ lɛ eko eshwɛ lɛ, ehe ehiaaa ni ekɛ saji krokomɛi afata he koni ekɛye be ni eshwɛ lɛ. Skulbii anifeemɔi komɛi yɛ ni kɛ́ amɛsaa amɛhe jogbaŋŋ lɛ, amɛbaagbe naa ni loloolo lɛ eshwɛ miniti kome loo nɔ ni fa fe nakai po. Abaanyɛ ahã asafoŋ onukpai hu skul nifeemɔi.

  • Shiɛmɔ Wiemɔ He Vidioi: Nyɔɔŋ fɛɛ nyɔɔŋ nɔ lɛ, abaajie shiɛmɔ wiemɔ he vidioi otsi otsi kɛyashi abaajie fɛɛ. Vidioi nɛɛ baatsɔɔ bɔ ni afeɔ klɛŋklɛŋ sanegbaa lɛ, klɛŋklɛŋ sɛɛkuukɛsaramɔ lɛ, kɛ sɛɛkuukɛsaramɔ ni ji enyɔ lɛ ahãa. Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ ji mɔ ni baatsu enɛ he nii.

  • Klɛŋklɛŋ Sanegbaa: Nyɛmi nuu loo nyɛmi yoo ko baanyɛ atsu skulbii anifeemɔ nɛɛ he nii. Kɛ́ nyɛmi nuu miitsu nifeemɔ nɛɛ he nii lɛ, esa akɛ eyelikɛbualɔ lɛ afee nyɛmi nuu loo ewekunyo, ni kɛ́ nyɛmi yoo ni lɛ, esa akɛ eyelikɛbualɔ lɛ afee nyɛmi yoo loo ewekunyo. Skulnyo lɛ kɛ eyelikɛbualɔ lɛ baanyɛ ata shi loo amɛdamɔ shi. Esa akɛ skulnyo lɛ aŋa eyelikɛbualɔ lɛ taakɛ aŋaa mɛi yɛ he ni nyɛyɔɔ lɛ. Esa akɛ edamɔ shiɛmɔ wiemɔ lɛ nɔ etsu enifeemɔ lɛ he nii.

  • Klɛŋklɛŋ Sɛɛkuukɛsaramɔ: Nyɛmi nuu loo nyɛmi yoo ko baanyɛ atsu skulbii anifeemɔ nɛɛ he nii. Kɛ́ nyɛmi nuu miitsu nifeemɔ nɛɛ he nii lɛ, esa akɛ eyelikɛbualɔ lɛ afee nyɛmi nuu, ni kɛ́ nyɛmi yoo ni lɛ, esa akɛ eyelikɛbualɔ lɛ afee nyɛmi yoo. (km 5/97 bf. 2) Skulnyo lɛ kɛ eyelikɛbualɔ lɛ baanyɛ ata shi loo amɛdamɔ shi. Esa akɛ skulnyo lɛ afee enifeemɔ lɛ tamɔ nɔ ni eku esɛɛ eyaasara mɔ ko ni jie miishɛɛ kpo yɛ klɛŋklɛŋ sanegbaa lɛ mli. Esa akɛ edamɔ shiɛmɔ wiemɔ ni yɔɔ Wɔshiɛmɔ Kɛ Wɔshihilɛ Kpee Nifeemɔ Wolo lɛ mli lɛ nɔ etsu enifeemɔ lɛ he nii.

  • Sɛɛkuukɛsaramɔ Ni Ji Enyɔ: Nyɛmi nuu loo nyɛmi yoo ko baanyɛ atsu skulbii anifeemɔ nɛɛ he nii. Kɛ́ nyɛmi nuu miitsu nifeemɔ nɛɛ he nii lɛ, esa akɛ eyelikɛbualɔ lɛ afee nyɛmi nuu, ni kɛ́ nyɛmi yoo ni lɛ, esa akɛ eyelikɛbualɔ lɛ afee nyɛmi yoo. (km 5/97 bf. 2) Skulnyo lɛ kɛ eyelikɛbualɔ lɛ baanyɛ ata shi loo amɛdamɔ shi. Esa akɛ skulnyo lɛ afee enifeemɔ lɛ tamɔ nɔ ni eku esɛɛ eyaasara mɔ ko ni jie miishɛɛ kpo yɛ klɛŋklɛŋ sɛɛkuukɛsaramɔ lɛ mli. Esa akɛ edamɔ shiɛmɔ wiemɔ lɛ nɔ etsu enifeemɔ lɛ he nii.

  •   Biblia Mli Nikasemɔ: Nyɛmi nuu loo nyɛmi yoo ko baanyɛ atsu skulbii anifeemɔ nɛɛ he nii. Kɛ́ nyɛmi nuu miitsu nifeemɔ nɛɛ he nii lɛ, esa akɛ eyelikɛbualɔ lɛ afee nyɛmi nuu, ni kɛ́ nyɛmi yoo ni lɛ, esa akɛ eyelikɛbualɔ lɛ afee nyɛmi yoo. (km 5/97 bf. 2) Skulnyo lɛ kɛ eyelikɛbualɔ lɛ baanyɛ ata shi loo amɛdamɔ shi. Esa akɛ afee lɛ tamɔ nɔ ni akɛ mɔ ko miifee Biblia mli nikasemɔ ni ashɛ kuku ko nɔ. Ehe ehiaaa ni skulnyo lɛ akpa enifeemɔ lɛ hiɛ loo emu naa, ja wiemɔ su ni etsuɔ he nii lɛ biɔ ni efee nakai. Ehe ehiaaa ni akane kukuji ni yɔɔ nifeemɔ lɛ mli lɛ fɛɛ, shi kɛ́ mɔ ko fee nakai lɛ, naagba bɛ he. Esa akɛ ana gbɛi ni atsɔɔ nɔ atsɔɔ nii jogbaŋŋ yɛ nifeemɔ lɛ mli.

  • Wiemɔ: Esa akɛ ahã nyɛmi nuu ko atsu nifeemɔ nɛɛ he nii, ni ehã lɛ akɛ wiemɔ etsɔɔ asafo lɛ.

  5. Hii Shi Akɛ Kristofonyo: Abaalá kɛje fã nɛɛ shishi, ni no sɛɛ lɛ, akɛ minitii 15 baafee nifeemɔ kome loo nifeemɔi enyɔ ni baaye abua wɔ ni wɔkɛ Nyɔŋmɔ Wiemɔ lɛ atsu nii yɛ wɔshihilɛ mli. Kɛ́ atsɔko mɔ pɔtɛɛ ni esa akɛ etsu nifeemɔi nɛɛ eko he nii lɛ, belɛ asafoŋ onukpa ko loo asafoŋ sɔɔlɔi lɛ ateŋ mɛi ni le nitsɔɔmɔ jogbaŋŋ lɛ baatsu nifeemɔi nɛɛ ahe nii. Asafoŋ onukpai pɛ baatsu asafoŋ hiamɔ nii lɛ ahe nii.

  • Asafoŋ Biblia Nikasemɔ: Minitii 30. Esa akɛ asafoŋ onukpai lɛ ateŋ mɛi ni le nitsɔɔmɔ jogbaŋŋ lɛ atsu fã nɛɛ he nii. (Yɛ asafoi ni asafoŋ onukpai lɛ ayi faaa yɛ mli lɛ amli lɛ, abaanyɛ ahã asafoŋ sɔɔlɔi lɛ ateŋ mɛi ni le nitsɔɔmɔ jogbaŋŋ lɛ atsu fã nɛɛ he nii, kɛ́ ehe bahia.) Onukpai akuu lɛ baahala amɛteŋ mɛi ni le nitsɔɔmɔ jogbaŋŋ lɛ koni amɛkwɛ Asafoŋ Biblia Nikasemɔ lɛ nɔ. Esa akɛ mɛi ni akpɛlɛ amɛnɔ akɛ amɛkwɛ nikasemɔ lɛ nɔ lɛ akwɛ nɔ jogbaŋŋ ni akaye be, amɛmamɔ ŋmalɛi ni wieɔ nikasemɔ lɛ mli otii lɛ ahe lɛ anɔ mi, ni amɛhã mɔ fɛɛ mɔ ana bɔ ni ekɛ otii ni akaseɔ lɛ baatsu nii ehã yɛ eshihilɛ mli. Kɛ́ amɛkwɛ gbɛtsɔɔmɔi ni aŋmala ni kɔɔ bɔ ni esa akɛ akwɛ Buu-Mɔɔ Nikasemɔ lɛ nɔ ahã lɛ mli lɛ, amɛbaana saji ni baaye abua amɛ koni amɛkwɛ nikasemɔ lɛ nɔ jogbaŋŋ. Kɛ́ ebaahi lɛ, daa otsi lɛ, atsake mɔ ni kwɛɔ nɔ lɛ kɛ mɔ ni kaneɔ mli lɛ. Kɛ́ Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ bi ni afo nikasemɔ lɛ kuku lɛ, no lɛ, mɔ ni kwɛɔ nɔ lɛ baakwɛ bɔ ni ebaafee ni efee nakai. Ebaanyɛ ehã ashi kukuji lɛ ekomɛi ni akaneee.

  6. Kpee Lɛ Naamuu Wiemɔ: Ekaye fe minitii 3. Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ baatĩ kpee lɛ mli otii komɛi ni nyɛmimɛi lɛ baaná he sɛɛ lɛ amli, kɛ sanebimɔ kɛ ehetoo ni yɔɔ Wɔshiɛmɔ Kɛ Wɔshihilɛ Kpee Lɛ Hetoo Wolo lɛ mli lɛ hu. Esa akɛ etsĩ nibii ni abaafee enɔ otsi lɛ ekomɛi atã, ní sanebimɔ ko ni abaahã hetoo lɛ fata he. Kɛ́ be yɛ lɛ, ebaanyɛ etsĩ skulbii ni yɔɔ nifeemɔ yɛ otsi ni baa lɛ mli lɛ agbɛ́ii tã. Esa akɛ sɛinɔtalɔ lɛ atswa adafii ni he hiaa lɛ, ni ekane lɛtai ni ehe miihia ni akane ahã asafo lɛ yɛ enaamuu wiemɔ lɛ mli, ja akɛ gbɛtsɔɔmɔ pɔtɛɛ kroko ehã. Esaaa akɛ atswaa nibii komɛi ni afeɔ daa lɛ ahe adafi yɛ wiemɔ kpoku lɛ nɔ​—tamɔ kpeei kɛhã shiɛmɔyaa kɛ gbɛjianɔ ni ato kɛhã Maŋtsɛyeli Asa lɛ nɔ saamɔ nɛkɛ​—moŋ lɛ, esa akɛ akɛkpɛtɛ adafitswaa tao lɛ nɔ. Kɛ́ adafitswai loo lɛtai komɛi ni esa akɛ akane lɛ baahã sɛinɔtalɔ lɛ aye fe minitii 3 yɛ enaamuu wiemɔ lɛ mli lɛ, no lɛ, esa akɛ ebi nyɛmimɛi hii ni baatsu fã ni ji Hii Shi Akɛ Kristofonyo lɛ mli nifeemɔi lɛ ahe nii lɛ ni amɛtse amɛbei lɛ anɔ. (Kwɛmɔ  kuku 5 kɛ  9 lɛ.) Akɛ lala kɛ sɔlemɔ baamu kpee lɛ naa.

 7. Okɛ Ojwɛŋmɔ Ama Nikanemɔ Kɛ Nitsɔɔmɔ Nɔ: Kɛjɛ January 7, 2019 otsi lɛ nɔ kɛyaa lɛ, kɛ́ Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ baajie skulbii lɛ ayi loo ebaawo amɛ ŋaa lɛ, esa akɛ ejɛ Nitsɔɔmɔ broshuɔ lɛ mli efee nakai. Esa akɛ skulnyo fɛɛ skulnyo atsu nikasemɔ ni yɔɔ akrabatsa ni ji () ni yɔɔ asaimɛnt lɛ naagbee yɛ Wɔshiɛmɔ Kɛ Wɔshihilɛ Kpee Nifeemɔ Wolo lɛ mli lɛ he nii. Daa nyɔɔŋ klɛŋklɛŋ otsi lɛ, Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ kɛ toibolɔi lɛ baasusu Nitsɔɔmɔ broshuɔ lɛ mli nikasemɔ kome he. Ato fã ni ji “Kadimɔ He Ni Oshɛ” lɛ he gbɛjianɔ koni skulnyo lɛ diɛŋtsɛ aŋmala mli nii, shi jeee sɛinɔtalɔ lɛ.

   8. Ŋaawoo: Kɛ́ skulbii lɛ ateŋ mɔ fɛɛ mɔ gbe enifeemɔ lɛ naa lɛ, esa akɛ Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ ajɛ Nitsɔɔmɔ broshuɔ lɛ mli ekɛ aaafee miniti kome ajie skulnyo lɛ yi ni ewo lɛ ŋaa hu. Kɛ́ sɛinɔtalɔ lɛ miitsɛ skulnyo ko ni ebafee enifeemɔ lɛ, esaaa akɛ etsĩɔ oti ni ebaawo skulnyo lɛ ŋaa yɛ he lɛ tã. Shi be ni skulnyo lɛ egbe enifeemɔ lɛ naa ni sɛinɔtalɔ lɛ ejie eyi sɛɛ lɛ, ebaanyɛ etsĩ oti ni ebaawo skulnyo lɛ ŋaa yɛ he lɛ tã ni etsɔɔ nɔ hewɔ ni skulnyo lɛ tsu nakai oti lɛ he nii jogbaŋŋ, loo ejɛ mlihilɛ mli etsɔɔ lɛ nɔ hewɔ ni esa akɛ ehã ejwɛŋmɔ ahi nakai oti lɛ nɔ lɛ. Sɛinɔtalɔ lɛ baanyɛ awie nibii krokomɛi hu ni je kpo yɛ nifeemɔ lɛ mli ni esusuɔ akɛ ebaawa skulnyo lɛ loo toibolɔi lɛ ahe. Kɛfata he lɛ, kɛ́ akpa asafoŋ kpee lɛ loo yɛ be kroko mli lɛ, sɛinɔtalɔ lɛ baanyɛ ekɛ skulnyo lɛ pɛ akpe ni ejɛ Nitsɔɔmɔ broshuɔ lɛ loo Sɔɔmɔ Skul wolo lɛ mli ekɛ ŋaawoo kroko ni sa ahã skulnyo lɛ yɛ wiemɔ su ni abi ni etsu he nii lɛ he loo yɛ wiemɔ su kroko he.​—Kɛ́ ootao ole Wɔshiɛmɔ Kɛ Wɔshihilɛ Kpee nɔkwɛlɔ lɛ nitsumɔ, kɛ ŋaawolɔ ni yeɔ ebuaa lɛ nitsumɔ lɛ he saji babaoo lɛ, kwɛmɔ wolo nɛɛ  kuku 13 kɛ  16 lɛ.

    9. Be: Esaaa akɛ nifeelɔi lɛ eko eko yeɔ be, ni esaaa akɛ Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ hu yeɔ be. Kɛ́ skulnyo ko be shɛ lɛ, esa akɛ atsɔ gbɛ ni sa nɔ ahã efo enifeemɔ lɛ nɔ. Kɛ́ nifeelɔi krokomɛi lɛ eko ye be lɛ, no lɛ, esa akɛ ŋaawolɔ ni yeɔ ebuaa lɛ ana lɛ ni ewo lɛ ŋaa. Esa akɛ asafoŋ kpee muu lɛ, ni lalai kɛ sɔlemɔi lɛ fata he lɛ, aye ŋmɛlɛtswaa 1 kɛ minitii 45.

 10. Be Ni Kpokpaa Nɔkwɛlɔ Lɛ Eba: Be fɛɛ be ni kpokpaa nɔkwɛlɔ lɛ baabasara asafo lɛ, esa akɛ ato nifeemɔi lɛ anaa taakɛ eyɔɔ yɛ Wɔshiɛmɔ Kɛ Wɔshihilɛ Kpee Nifeemɔ Wolo lɛ mli lɛ. Nɔ pɛ ni baatsake ji enɛ: Kpokpaa nɔkwɛlɔ lɛ kɛ minitii 30 ni akɛfeɔ Asafoŋ Biblia Nikasemɔ yɛ kpee lɛ fã ni ji, Hii Shi Akɛ Kristofonyo lɛ shishi lɛ baahã esɔɔmɔ wiemɔ lɛ. Dani kpokpaa nɔkwɛlɔ lɛ baabahã esɔɔmɔ wiemɔ lɛ, Wɔshiɛmɔ Kɛ Wɔshihilɛ Kpee lɛ sɛinɔtalɔ lɛ baatĩ kpee lɛ mli otii komɛi amli, ebaatsĩ nibii ni abaafee enɔ otsi lɛ ekomɛi atã, ebaatswa adafii ni he hiaa, ni ebaakane lɛtai ni he hiaa lɛ, kɛkɛ lɛ, etsɛ kpokpaa nɔkwɛlɔ lɛ. Kɛ́ kpokpaa nɔkwɛlɔ lɛ gbe esɔɔmɔ wiemɔ lɛ naa lɛ, ebaatsɛ lala ni esumɔɔ ni akɛmu kpee lɛ naa. Kɛ́ kpokpaa nɔkwɛlɔ lɛ ba lɛ, esaaa akɛ afeɔ skul nifeemɔi yɛ asai krokomɛi lɛ anɔ yɛ nyɛsafo lɛ wiemɔ mli. Kuu ni feɔ amɛsafoŋ kpeei yɛ wiemɔ kroko mli lɛ baanyɛ afee amɛkpeei lɛ kɛ́ kpokpaa nɔkwɛlɔ lɛ basara asafo ni kwɛɔ amɛnɔ lɛ. Shi esa akɛ kuu lɛ abafata asafo ni kwɛɔ amɛnɔ lɛ he kɛ́ kpokpaa nɔkwɛlɔ lɛ yaahã esɔɔmɔ wiemɔ lɛ.

 11. Otsi Ni Abaaya Kpokpaa Nɔ Kpee Loo Kpokpaa Wulu Nɔ Kpee: Afeee asafoŋ kpee yɛ kpokpaa nɔ kpee loo kpokpaa wulu nɔ kpee otsi lɛ mli. Esa akɛ akase nibii ni abaakase yɛ nakai otsi lɛ mli lɛ akɛ aŋkroaŋkroi loo akɛ weku.

 12. Otsi Ni Abaaye Kaimɔ Lɛ: Kɛ́ Kaimɔ lɛ yagbee otsi lɛ teŋ gbi ko nɔ lɛ, afeŋ Wɔshiɛmɔ Kɛ Wɔshihilɛ Kpee nakai otsi lɛ. Shi esa akɛ afee kpeei kɛhã shiɛmɔyaa yɛ Kaimɔ gbi lɛ nɔ.

  13. Wɔshiɛmɔ Kɛ Wɔshihilɛ Kpee Lɛ Nɔkwɛlɔ: Onukpai akuu lɛ baahala asafoŋ onukpa ko akɛ Wɔshiɛmɔ Kɛ Wɔshihilɛ Kpee lɛ nɔkwɛlɔ. Lɛ ji mɔ ni baakwɛ ni afee asafoŋ kpee nɛɛ jogbaŋŋ, ni akɛ gbɛtsɔɔmɔi nɛɛ atsu nii. Esa akɛ ekɛ ŋaawolɔ ni yeɔ ebuaa lɛ ashãra jogbaŋŋ. Kɛ́ Wɔshiɛmɔ Kɛ Wɔshihilɛ Kpee Nifeemɔ Wolo kɛhã nyɔɔŋ ko ba nɔŋŋ lɛ, Wɔshiɛmɔ Kɛ Wɔshihilɛ Kpee nɔkwɛlɔ lɛ baaja skul nifeemɔi kɛhã nakai nyɔɔŋ lɛ. (Kwɛmɔ  kuku 4 lɛ.) Esa akɛ aŋmala skulbii lɛ anifeemɔi lɛ yɛ Wɔshiɛmɔ Kɛ Wɔshihilɛ Akɛ Kristofoi Kpee Asaimɛnt (S-89) wolo lɛ nɔ ni akɛhã amɛ, kɛhooo kwraa lɛ otsii etɛ, dani be ni amɛkɛbaafee lɛ ashɛ.

 14. Wɔshiɛmɔ Kɛ Wɔshihilɛ Kpee Lɛ Sɛinɔtalɔ: Daa otsi lɛ, asafoŋ onukpa kome baafee sɛinɔtalɔ kɛhã Wɔshiɛmɔ Kɛ Wɔshihilɛ Kpee muu lɛ fɛɛ. (Kɛ́ abɛ asafoŋ onukpai ni fa bɔ ni sa lɛ, abaanyɛ ahã asafoŋ sɔɔlɔi lɛ ateŋ mɛi ni le nitsɔɔmɔ jogbaŋŋ lɛ atsu nifeemɔ nɛɛ he nii, kɛ́ ehe bahia.) Lɛ ji mɔ ni baahã kpee lɛ hiɛkpamɔ kɛ enaamuu wiemɔi lɛ, ni kɛ́ shiɛmɔ wiemɔ he vidio ko yɛ, loo vidioi ni akɛkpaa Nitsɔɔmɔ broshuɔ lɛ mli nikasemɔi lɛ ahiɛ lɛ eko yɛ lɛ, lɛ ebaakwɛ nɔ. Agbɛnɛ hu, lɛ ji mɔ ni baatsɛ  mɛi ni yɔɔ nifeemɔi lɛ ateŋ mɔ fɛɛ mɔ, ni kɛ́ asafoŋ onukpai lɛ ayi faaa lɛ, no lɛ, ekolɛ ebaabi ni etsu nifeemɔi krokomɛi ahe nii. Kɛ́ agbe nifeemɔ ko naa ni ebaawie lɛ, esa akɛ ehã efee kuku. Onukpai akuu lɛ baahala asafoŋ onukpai lɛ ateŋ mɛi ni le nitsɔɔmɔ jogbaŋŋ lɛ koni amɛsɔmɔ akɛ sɛinɔtalɔi. Abaato naa koni asafoŋ onukpai ni abaahala amɛ akɛ sɛinɔtalɔi lɛ akwɛ kpee lɛ nɔ yɛ be kɛ beiaŋ. Kɛ́ asafoŋ onukpai ni ahala amɛ akɛ sɛinɔtalɔi lɛ ayi faaa lɛ, no lɛ, abaanyɛ ahã Wɔshiɛmɔ Kɛ Wɔshihilɛ Kpee nɔkwɛlɔ lɛ afɔ kpee lɛ nɔ kwɛmɔ akɛ sɛinɔtalɔ fe asafoŋ onukpai krokomɛi ni ahala lɛ. Kɛ́ asafoŋ onukpa ko le nitsɔɔmɔ jogbaŋŋ ni no hewɔ lɛ, ekwɛɔ Asafoŋ Biblia Nikasemɔ lɛ nɔ lɛ, no lɛ, ekolɛ ebaanyɛ esɔmɔ akɛ kpee lɛ sɛinɔtalɔ hu. Shi nyɛfainɛ, nyɛkadia hu akɛ, asafoŋ onukpa ni sɔmɔɔ akɛ sɛinɔtalɔ lɛ nitsumɔi lɛ ateŋ ekome ji, ni ejie mɛi ni feɔ skul nifeemɔi lɛ ayi yɛ nɔ ko ni amɛfee lɛ jogbaŋŋ lɛ he, ni ekɛ ŋaawoo ni baaye abua amɛ lɛ hu ahã amɛ. Sɛinɔtalɔ lɛ nitsumɔ kroko ji, ni ekwɛ ni agbe asafoŋ kpee lɛ naa yɛ be naa. (Kwɛmɔ  kuku 6 kɛ  9 lɛ.) Kɛ́ gbɛ yɛ wiemɔ kpoku lɛ nɔ, ni sɛinɔtalɔ lɛ miisumɔ lɛ, abaanyɛ akɛ maikrofoŋ ama jɛmɛ ahã lɛ, koni edamɔ sɛɛ etsɛ mɔ fɛɛ mɔ ni ebaashɛ enɔ lɛ, bɔ ni afee ni mɔ ni eshɛ enɔ lɛ ayadamɔ wiemɔ okpɔlɔ lɛ sɛɛ. Nakai nɔŋŋ hu kɛ́ ashɛ skulbii lɛ anifeemɔ ni ji Biblia kanemɔ lɛ kɛ kpee lɛ fã ni ji, Kasemɔ Bɔ Ni Ashiɛɔ Jogbaŋŋ lɛ nɔ, ni sɛinɔtalɔ lɛ miisumɔ lɛ, ebaanyɛ eta okpɔlɔ sɛɛ yɛ kpoku lɛ nɔ. Enɛ hãŋ afite be.

 15. Onukpai Akuu Lɛ Saji Ahe Gbɛjianɔtolɔ: Onukpai akuu lɛ saji ahe gbɛjianɔtolɔ lɛ baaja kpee lɛ shishi nifeemɔi lɛ fɛɛ, ja skulbii anifeemɔi lɛ pɛ. Lɛ nɔŋŋ ebaaja mɛi ni baasɔmɔ akɛ sɛinɔtalɔi kɛhã otsi fɛɛ otsi, ni ebaahala amɛ kɛjɛ mɛi ni onukpai akuu lɛ ekpɛlɛ amɛnɔ lɛ ateŋ. Esa akɛ onukpai akuu lɛ saji ahe gbɛjianɔtolɔ lɛ ana Wɔshiɛmɔ Kɛ Wɔshihilɛ Kpee nɔkwɛlɔ lɛ kɛhã skulbii ni ahã amɛ nifeemɔ yɛ nyɔɔŋ lɛ mli lɛ, ni onukpai akuu lɛ saji ahe gbɛjianɔtolɔ lɛ akwɛ koni akɛ kpee lɛ he gbɛjianɔtoo muu lɛ eko akpɛtɛ adafitswaa tao lɛ nɔ.

  16. Ŋaawolɔ Ni Yeɔ Ebuaa: Kɛ́ ebaahi lɛ, esa akɛ ahã asafoŋ onukpa ko ni le nitsɔɔmɔ jogbaŋŋ, ni etsɔɔ nii be saŋŋ hu atsu sɔ̃ nɛɛ he nii. Ŋaawolɔ ni yeɔ ebuaa lɛ nitsumɔ ji, kɛ́ asafoŋ onukpa ko loo asafoŋ sɔɔlɔ ko tsu nifeemɔ ko he nii egbe naa ni ehe miihia ni awo lɛ ŋaa yɛ nɔ ko he lɛ, ebaana mɔ lɛ ni ewo lɛ ŋaa. Nifeemɔi nɛɛ ekomɛi ji, Wɔshiɛmɔ Kɛ Wɔshihilɛ Kpee lɛ shishi nifeemɔi, maŋshiɛmɔi, kɛ agbɛnɛ hu, Buu-Mɔɔ lɛ loo Asafoŋ Biblia Nikasemɔ lɛ nɔkwɛmɔ loo emli kanemɔ. (Kwɛmɔ  kuku 9 lɛ.) Kɛ́ asafoŋ onukpai ni le nitsɔɔmɔ jogbaŋŋ lɛ ayi fa yɛ asafo lɛ mli lɛ, no lɛ daa afi lɛ, abaanyɛ atsake mɔ ni sɔmɔɔ akɛ ŋaawolɔ ni yeɔ ebuaa lɛ. Jeee be fɛɛ be ehe baahia ni ŋaawolɔ ni yeɔ ebuaa lɛ awo asafoŋ onukpa loo asafoŋ sɔɔlɔ ko ŋaa kɛ́ etsu nifeemɔ ko he nii.

 17. Skul Nifeemɔi Yɛ Asa Ni Ji Enyɔ Loo Etɛ Lɛ Nɔ: Kɛ́ skulbii lɛ ayi fa lɛ, abaanyɛ ahã skulbii krokomɛi nifeemɔi yɛ asa ni ji enyɔ loo etɛ lɛ nɔ. Esa akɛ aná mɔ ko ni le nitsɔɔmɔ jogbaŋŋ ni ewo ŋaa yɛ asa ni ji enyɔ loo etɛ lɛ nɔ, ni kɛ́ ebaahi lɛ mɔ lɛ afee asafoŋ onukpa. Kɛ́ ehe bahia lɛ, abaanyɛ ahã asafoŋ sɔɔlɔ ko ni le nitsɔɔmɔ jogbaŋŋ atsu sɔ̃ nɛɛ he nii. Esa akɛ onukpai akuu lɛ ahala mɛi ni baawo ŋaa yɛ asa ni ji enyɔ loo etɛ lɛ nɔ, ni amɛkpɛ mli kɛji daa otsi lɛ abaatsake mli loo mɔ kome sɔŋŋ ni baawo ŋaa lɛ. Esa akɛ ŋaawolɔ nɛɛ kɛ gbɛtsɔɔmɔi ni yɔɔ  kuku 8 lɛ mli lɛ atsu nii. Kɛji ato skul nifeemɔi ahe gbɛjianɔ yɛ asa ni ji enyɔ loo etɛ lɛ nɔ lɛ, no lɛ, kɛ́ agbe Nyɔŋmɔ Wiemɔ Lɛ Mli Jwetrii lɛ mli nifeemɔ ni ji Pɛimɔ Ŋmalɛi Lɛ Amli Jogbaŋŋ lɛ naa lɛ, esa akɛ mɛi ni yɔɔ nifeemɔ yɛ asa ni ji enyɔ loo etɛ lɛ nɔ lɛ ashi kɛya jɛmɛ. Kɛ́ agbe kpee lɛ fã ni ji Kasemɔ Bɔ Ni Ashiɛɔ Jogbaŋŋ lɛ naa lɛ, esa akɛ amɛbafata asafoŋbii krokomɛi lɛ ahe. Kɛ́ aasusu shiɛmɔ wiemɔ he vidio ko he lɛ, esa akɛ mɛi ni yɔɔ asa ni ji enyɔ loo etɛ lɛ nɔ lɛ ahi jɛmɛ nɔŋŋ ni amɛkwɛ vidio lɛ loo amɛbo sanegbaa lɛ toi, kɛ́ ebaahi nakai feemɔ. Kɛ́ ehiii nakai feemɔ lɛ, no lɛ, esa akɛ ŋaawolɔ lɛ kɛ ilɛtrɔnik tsɔne, tamɔ tablɛt loo laptɔp ajie vidio lɛ etsɔɔ mɛi ni yɔɔ jɛmɛ lɛ ni ekɛ amɛ asusu he.

 18. Vidioi: Abaajie vidioi srɔtoi yɛ asafoŋ kpee nɛɛ shishi. Akɛ vidioi srɔtoi ni abaajie yɛ otsi teŋ kpee lɛ shishi lɛ baawo JW Library app lɛ nɔ, ni abaanyɛ atsɔ ilɛtrɔnik tsɔji srɔtoi anɔ adaunlodi. Kɛ́ ajie shiɛmɔ wiemɔ vidio ko yɛ Wɔshiɛmɔ Kɛ Wɔshihilɛ Kpee lɛ shishi lɛ, no sɛɛ lɛ, abaanyɛ ajie yɛ kpeei kɛhã shiɛmɔyaa ashishi.