Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ DECEMBER 2015

 SANEYITSO LƐ MLITSƆƆMƆ | OBAANYƐ ONU BIBLIA LƐ SHISHI

Wolo ni Abaanyɛ Anu Shishi

Wolo ni Abaanyɛ Anu Shishi

Biblia lɛ ji wolo ni etsɛ waa. Afii enyiɛ eye? Aje Biblia lɛ ŋmaa shishi aaafee afii 3,500 ni eho nɛ, yɛ Middle East. Ni tsɔɔ akɛ, abɔi Biblia lɛ ŋmaa yɛ Chinabii odehei aweku ni etsɛ fe fɛɛ ni ale yɛ yinɔsane mli lɛ beiaŋ, aaafee afii akpe dani aje Buddha jamɔ shishi yɛ India.—Kwɛmɔ akrabatsa ni yitso ji, “ Biblia lɛ He Anɔkwa Saji” lɛ.

Biblia lɛ kɛ shihilɛ mli sanebimɔi ni he hiaa fe fɛɛ lɛ ahetoo ni hãa mɔ tsui nyɔɔ emli lɛ hãa

Dani wolo ko baanyɛ aye abua mɛi lɛ, esa akɛ mɛi ni kaneɔ lɛ ana akɛ ehe yɛ sɛɛnamɔ, ni amɛbaanyɛ amɛnu shishi hu. Nakai pɛpɛɛpɛ Biblia lɛ ji. Ekɛ shihilɛ mli sanebimɔi ni he hiaa fe fɛɛ lɛ ahetoo ni hãa mɔ tsui nyɔɔ emli lɛ hãa.

Akɛ nɔkwɛmɔnɔ lɛ, ani obi ohe pɛŋ akɛ, ‘Mɛni hewɔ wɔyɔɔ shihilɛ mli?’ Adesai ebi nakai sane lɛ afii akpei abɔ, ni amɛkã he amɛmiibi lolo. Kɛ̃lɛ, anaa hetoo lɛ yɛ Biblia lɛ mli klɛŋklɛŋ wolo, ni ji Mose Klɛŋklɛŋ Wolo lɛ, klɛŋklɛŋ yitsei enyɔ lɛ amli. Yɛ nakai yitsei lɛ amli lɛ, Biblia lɛ wieɔ “shishijee mli”—afii akpekpe toi akpei abɔ ni eho nɛ—be ni wɔjeŋ muu lɛ fɛɛ, ni ŋulami kushai, ŋulamii, kɛ wɔshikpɔŋ lɛ fɛɛ fata he lɛ ba shihilɛ mli lɛ he. (1 Mose 1:1) Etsɔɔ bɔ ni fee ni ato shikpɔŋ lɛ he gbɛjianɔ koni anyɛ ahi nɔ, bɔ ni fee ni nibii ni wala yɔɔ amɛmli lɛ ba shihilɛ mli, kɛ bɔ ni fee ni adesa ba shihilɛ mli, ni etsɔɔ yiŋtoo hewɔ ni Nyɔŋmɔ fee nibii nɛɛ fɛɛ.

AŊMA KONI ANU SHISHI

Biblia lɛ kɛ ŋaawoi ni baaye abua wɔ ni wɔtsu naagbai ni wɔkɛkpeɔ yɛ shihilɛ mli lɛ ahe nii lɛ hãa wɔ. Ewaaa akɛ abaanu ŋaawoi ni yɔɔ Biblia lɛ mli lɛ ashishi. Wɔbaanyɛ wɔkɛɛ nakai yɛ yiŋtoi enyɔ ahewɔ.

Klɛŋklɛŋ lɛ, bɔ ni aŋma Biblia lɛ yɛ faŋŋ, tɛ̃ɛ, ni ekanemɔ waaa. Yɛ nɔ najiaŋ ni akɛ wiemɔi ni alé loo anuuu shishi baatsu nii kɛŋma lɛ, akɛ wiemɔi ni abaanyɛ anu shishi tsu nii. Akɛ wiemɔi ni wɔkɛtsuɔ nii yɛ wɔdaa gbi shihilɛ mli etsɔɔ saji ni amɛshishinumɔ wala lɛ amli.

Akɛ nɔkwɛmɔnɔ lɛ, Yesu kɛ nɔkwɛmɔnii babaoo ni kɔɔ wɔdaa gbi shihilɛ mli nifeemɔi ahe lɛ tsu nii kɛtsɔɔ mɛi anii, ni eta amɛtsuiŋ. Anaa nɔkwɛmɔnii nɛɛ babaoo yɛ nɔ ni mɛi fɔɔ lɛ tsɛmɔ akɛ Gɔŋ nɔ Shiɛmɔ, ni aŋma yɛ Mateo yitso 5 kɛyashi 7 lɛ mli. Mɔ ko ni wieɔ Biblia lɛ he saji lɛ wie akɛ, eji “shiɛmɔ ni ŋaawoo yɔɔ mli, ni yiŋtoo ni yɔɔ sɛɛ ji, koni ekɛ  gbɛtsɔɔmɔ ahã ni ekudɔ wɔnifeemɔi, shi jeee ni eloo saji ewo wɔyitsoŋ kɛkɛ.” Obaanyɛ okɛ minitii 15 kɛmiimɔ 20 akane nakai yitsei lɛ, ni onaa baakpɛ ohe yɛ bɔ ni Yesu wiemɔi lɛ ashishinumɔ waaa, shi nilee babaoo yɛ mli lɛ he.

Nɔ kroko hu ni hãa Biblia lɛ shishinumɔ feɔ mlɛo ji saji ahe ni ewieɔ lɛ. Ejeee adesã wolo. Moŋ lɛ, taakɛ The World Book Encyclopedia tsɔɔ mli lɛ, eji wolo ni “wieɔ mɛi wuji kɛ mɛi bibii ahe,” ni ewieɔ “shihilɛi amli ni amɛtsɔmɔ lɛ hu he.” Ewaaa akɛ wɔbaanu saji ni kɔɔ mɛi ni hi shi diɛŋtsɛ lɛ ahe kɛ nibii komɛi ni tee nɔ ni abɔ he amaniɛ lɛ shishi ni wɔkase nii kɛjɛ mli.Romabii 15:4.

EYƐ KƐHÃ MƆ FƐƐ MƆ

Dani obaanu wolo ko shishi lɛ, esa akɛ aŋma yɛ wiemɔ ni onuɔ mli. Ŋmɛnɛ lɛ, ekɔɔɔ he eko he ni oyɔɔ loo maŋ nɔ ni ojɛ lɛ, obaanyɛ oná Biblia lɛ yɛ wiemɔ ko ni onuɔ mli. Susumɔ nɔ ni hãa anyɛɔ afeɔ Biblia lɛ yɛ wiemɔi srɔtoi amli lɛ he okwɛ.

Shishitsɔɔmɔ. Aŋma Biblia lɛ klɛŋklɛŋ kwraa yɛ Hebri, Aramaik, kɛ Hela mli. Enɛ hewɔ lɛ, mɛi babaoo nyɛɛɛ akane. Bɔ ni afee ni anyɛ akane Biblia lɛ yɛ wiemɔi krokomɛi amli lɛ, wiemɔ shishitsɔɔlɔi komɛi ebɔ mɔdɛŋ amɛtsɔɔ shishi. Yɛ mɔdɛŋ ni amɛbɔ lɛ hewɔ lɛ, atsɔɔ Biblia muu lɛ fɛɛ loo efã ko shishi kɛtee wiemɔi ni fa fe 2,700 mli. Enɛ tsɔɔ akɛ, kɛ́ aja mli lɛ, mɛi oha mlijaa 90 baanyɛ akane Biblia lɛ fã ko yɛ amɛ diɛŋtsɛ amɛwiemɔ mli.

Ekalamɔ. Aŋmala klɛŋklɛŋ Biblia ni afee lɛ yɛ nibii ni fiteɔ, tamɔ kooloo he wolo kɛ adaa nɔ. Bɔ ni afee ni mɛi ni baa yɛ sɛɛ lɛ anine ashɛ Biblia mli sane lɛ nɔ lɛ, akwɛɔ nɔ ni yɔɔ momo lɛ nɔ akɛ niji ŋmalaa eko. No mli lɛ, amɛjara wala, ni mɛi fioo pɛ nyɛɔ amɛheɔ. Shi kɛjɛ be ni Gutenberg fee tsɔji ni akɛkalaa woji aaafee afii 550 ni eho nɛ lɛ, mɛi babaoo enyɛ ená Biblia lɛ eko. Akɔntaa ko ni abu lɛ tsɔɔ akɛ, ajara Biblia muu lɛ fɛɛ loo efã ko ni fa fe akpekpe toi akpei enumɔ.

Anyɛŋ akɛ jamɔ wolo ko ato Biblia lɛ he yɛ nibii ni awie he nɛɛ gbɛfaŋ. Eyɛ faŋŋ akɛ, Biblia lɛ ji wolo ko ní abaanyɛ anu shishi. Kɛ̃lɛ, ebaanyɛ ewa kɛhã mɛi pii akɛ amɛbaanu shishi. Shi yelikɛbuamɔ yɛ. Nɛgbɛ obaanyɛ oná yelikɛbuamɔ nɛɛ yɛ? Ni te obaaná he sɛɛ tɛŋŋ? Taomɔ hetoo lɛ yɛ sane ni baanyiɛ sɛɛ lɛ mli.