Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ DECEMBER 2015

 SANEYITSO LƐ MLITSƆƆMƆ | OBAANYƐ ONU BIBLIA LƐ SHISHI

Mɛni Hewɔ Esa akɛ Onu Biblia lɛ Shishi?

Mɛni Hewɔ Esa akɛ Onu Biblia lɛ Shishi?

“Biblia lɛ ji jamɔ he wolo ko ni ale waa. Shi ejeee wolo ni akɛtsuɔ nii yɛ China, ni ehe bɛ sɛɛnamɔ ko kɛhã Chinabii.”—LIN, CHINA.

“Minuuu woji krɔŋkrɔŋi ni wɔkɛtsuɔ nii yɛ Hindu jamɔ lɛ mli lɛ shishi. No hewɔ lɛ, te mafee tɛŋŋ manu Ŋmalɛ Krɔŋkrɔŋ lɛ shishi lɛ?”—AMIT, INDIA.

“Mile Biblia lɛ akɛ eji wolo ko ni etsɛ waa, ni minu akɛ mɛi babaoo yɛ eko. Shi mikɛ mihiŋmɛi enako eko dã.”—YUMIKO, JAPAN.

Mɛi babaoo yɛ je lɛŋ ni buɔ Biblia lɛ waa. Shi ekolɛ emli saji fioo pɛ amɛle, loo amɛlé eko po kwraa. Nakai eji yɛ mɛi akpekpei abɔ ni yɔɔ Asia lɛ agbɛfaŋ, ni nakai nɔŋŋ hu eji yɛ mɛi ni yɔɔ maji ni mɛi babaoo yɔɔ Biblia lɛ eko lɛ anɔ lɛ agbɛfaŋ.

Shi ekolɛ obaabi akɛ, ‘Mɛni hewɔ esa akɛ manu Biblia lɛ shishi?’ Kɛ́ onu nɔ ni wolo krɔŋkrɔŋ nɛɛ kɛɔ lɛ shishi lɛ, ebaaye ebua bo ni ofee nibii ni nyiɛ sɛɛ nɛɛ:

  • Oná miishɛɛ, ni otsui anyɔ omli

  • Onyɛ otsu oweku mli naagbai ahe nii

  • Onyɛ okpee yeyeeyefeemɔ naa

  • Onyɛ okɛ mɛi ahi shi jogbaŋŋ

  • Onyɛ oto oshika he gbɛjianɔ jogbaŋŋ

Bo lɛ susumɔ yoo ko ni atsɛɔ lɛ Yoshiko, ni yɔɔ Japan lɛ he okwɛ. Elé nɔ kwraa ni Biblia lɛ wieɔ he, no hewɔ lɛ ekpɛ mli akɛ lɛ diɛŋtsɛ ebaakane. Mɛni jɛ mli kɛba? Ewie akɛ: “Biblia lɛ eye ebua mi ni miná miishɛɛ yɛ shihilɛ mli, ni ehã miná hiɛnɔkamɔ kɛhã wɔsɛɛ hu,” ni ekɛfata he akɛ: “Agbɛnɛ lɛ mitsui enyɔ mimli.” Amit, ni atsĩ etã kɛtsɔ hiɛ lɛ kpɛ mli akɛ lɛ diɛŋtsɛ ebaakase Biblia lɛ. Ewie akɛ: “Minaa kpɛ mihe waa. Saji ni baanyɛ aye abua mɔ fɛɛ mɔ yɛ Biblia lɛ mli.”

Biblia lɛ ená mɛi akpekpei abɔ shihilɛ nɔ hewalɛ waa. Mɛni hewɔ bo diɛŋtsɛ okaneee koni ona bɔ ni obaanyɛ oná he sɛɛ?