Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ OCTOBER 2015

Ani Wɔbaanyɛ Wɔle Mɔ Tuuntu ni Nyɔŋmɔ Ji?

Ani Wɔbaanyɛ Wɔle Mɔ Tuuntu ni Nyɔŋmɔ Ji?

“Anyɛŋ ale mɔ tuuntu ni Nyɔŋmɔ ji.”—Philo ni jɛ Alexandria, ni ji jeŋ nilelɔ ko ni hi shi yɛ klɛŋklɛŋ afi ohã lɛ mli.

“[Nyɔŋmɔ] kɛ wɔteŋ mɔ fɛɛ mɔ teŋ jekɛɛɛ.”—Saul ni jɛ Tarso lɛ kɛ klɛŋklɛŋ afii 100 lɛ mli jeŋ nilelɔi komɛi ni yɔɔ Ateene lɛ miiwie.

TE WIEMƆI enyɔ nɛɛ ateŋ nɔ ni kɛ osusumɔ kpaa gbee lɛ? Mɛi babaoo naa Saul ni jɛ Tarso, ni atsɛɔ lɛ hu akɛ bɔfo Paulo lɛ, wiemɔi nɛɛ akɛ eshɛjeɔ mɔ mii ni esa waa. (Bɔfoi 17:26, 27) Ni wiemɔi ni tamɔ nakai yɛ Biblia lɛ mli. Akɛ nɔkwɛmɔnɔ lɛ, wiemɔi ni Yesu kɛtsu nii yɛ sɔlemɔ ko ni esɔle lɛ mli lɛ hãa wɔnáa nɔmimaa akɛ, esɛɛnyiɛlɔi lɛ baanyɛ abale Nyɔŋmɔ ní amɛnine ashɛ ejɔɔmɔ nɔ.Yohane 17:3.

Shi jeŋ nilelɔi komɛi, tamɔ Philo hiɛ susumɔ kroko kwraa. Amɛtsɔɔ akɛ wɔnyɛŋ wɔle Nyɔŋmɔ kɔkɔɔkɔ, ejaakɛ ejeee mɔ ko ni abaanyɛ ale mɔ tuuntu ni eji. Mɛni ji anɔkwale ni kɔɔ Nyɔŋmɔ he?

Yɛ anɔkwale mli lɛ, Biblia lɛ tsɔɔ akɛ nibii komɛi yɛ ni kɔɔ Nyɔŋmɔ he ni adesai nyɛŋ anu shishi. Akɛ nɔkwɛmɔnɔ lɛ, anyɛŋ ale, asusu, loo anu bei abɔ ni Bɔlɔ lɛ kɛhi shi, bɔ ni ejwɛŋmɔ mli kwɔ hã, kɛ bɔ ni enilee lɛ fa hã lɛ shishi kɔkɔɔkɔ. Nɔ ko kwraa bɛ ni adesai baanyɛ afee ni baahã amɛnu shishi. Kɛ̃lɛ, nibii nɛɛ ni wɔnyɛɛɛ wɔle yɛ Nyɔŋmɔ he lɛ etsĩii wɔnaa ni wɔkale mɔ ni eji. Anɔkwa, kɛ́ wɔjwɛŋ nibii nɛɛ anɔ lɛ, ebaanyɛ eye ebua wɔ ni ‘wɔtsi wɔbɛŋkɛ Nyɔŋmɔ.’ (Yakobo 4:8) Nyɛhãa wɔsusua nibii fioo komɛi ni kɔɔ Nyɔŋmɔ he ni adesai nyɛŋ anu shishi lɛ ahe wɔkwɛa. No sɛɛ lɛ, wɔbaasusu nibii komɛi ni kɔɔ Nyɔŋmɔ he ni wɔbaanyɛ wɔnu shishi diɛŋtsɛ lɛ he.

 Mɛɛ Nibii ni Kɔɔ Nyɔŋmɔ he Wɔnyɛŋ Wɔnu Shishi?

BEI ABƆ NI NYƆŊMƆ KƐHI SHI: Biblia lɛ tsɔɔ akɛ, Nyɔŋmɔ yɛ “kɛjɛ naanɔ kɛyaa naanɔ.” (Lala 90:2) Yɛ gbɛ kroko nɔ lɛ, wɔbaanyɛ wɔkɛɛ akɛ Nyɔŋmɔ bɛ shishijee ni ebɛ naagbee. Yɛ adesa susumɔ naa lɛ, “efii ayikulɛ lɛ hu anaŋ naa.”Hiob 36:26.

Bɔ ni onáa he sɛɛ: Nyɔŋmɔ ewo shi akɛ kɛ́ obale mɔ tuuntu ni eji lɛ, ebaahã bo naanɔ wala. (Yohane 17:3) Te aaafee tɛŋŋ sane nɛɛ afee anɔkwale kɛ́ Nyɔŋmɔ ehiii shi kɛyaaa naanɔ lɛ? “Naanɔi a-Maŋtsɛ” lɛ pɛ baanyɛ atsu shiwoo ni tamɔ nɛkɛ lɛ he nii.1 Timoteo 1:17.

NYƆŊMƆ JWƐŊMƆ: Biblia lɛ tsɔɔ akɛ Nyɔŋmɔ ‘jwɛŋmɔ lɛ, anyɛɛɛ mli atao,’ ejaakɛ esusumɔi anɔ kwɔ kwraa fe wɔnɔ lɛ. (Yesaia 40:28; 55:9) No hewɔ lɛ, Biblia lɛ bi akɛ: “Namɔ ebale Yehowa jwɛŋmɔ, ní eeetsɔɔ lɛ nii?”1 Korintobii 2:16.

Bɔ ni onáa he sɛɛ: Nyɔŋmɔ nyɛɔ eboɔ mɛi akpekpei abɔ asɔlemɔi atoi yɛ be kome too mli. (Lala 65:3) Ni kɛ́ afilimata kome po gbee shikpɔŋ lɛ, ele. Ani nibii baanyɛ ayi Nyɔŋmɔ jwɛŋmɔ mli obɔ ni no hewɔ lɛ ejwɛŋmɔ baaje onɔ ni eboŋ osɔlemɔi atoi? Dabi, ejaakɛ ejwɛŋmɔ lɛ husu bɛ he. Nɔ ni fe fɛɛ lɛ, Biblia lɛ kɛɔ akɛ, ‘ojara wa fe afilimatai babaoo’ kɛhã lɛ.Mateo 10:29, 31.

GBƐI NI NYƆŊMƆ TSƆƆ NƆ EFEƆ NII: Biblia lɛ tsɔɔ akɛ, gbɔmɔ nyɛŋ ‘ena nitsumɔ ni Nyɔŋmɔ tsuɔ kɛjɛɔ shishijee kɛyaa naagbee lɛ.’ (Jajelɔ 3:11) Enɛ tsɔɔ akɛ, wɔnyɛŋ wɔle nibii fɛɛ ni kɔɔ Nyɔŋmɔ he lɛ kɔkɔɔkɔ. Anyɛɛɛ nilee ni yɔɔ gbɛ ni Nyɔŋmɔ tsɔɔ nɔ efeɔ nii lɛ mli lɛ “sɛɛ mo aja.” (Romabii 11:33) Kɛ̃lɛ, Nyɔŋmɔ miisumɔ ni ehã mɛi ni miisumɔ ni amɛsa ehiɛ lɛ ale gbɛ ni etsɔɔ nɔ efeɔ enii.Amos 3:7.

Anyɛŋ ale, asusu, loo anu bei abɔ ni Bɔlɔ lɛ kɛhi shi, bɔ ni ejwɛŋmɔ mli kwɔ hã, kɛ bɔ ni enilee lɛ fa hã lɛ shishi kɔkɔɔkɔ

Bɔ ni onáa he sɛɛ: Kɛ́ okaseɔ Biblia lɛ daa lɛ, obaaya nɔ ole Nyɔŋmɔ he nii ni obaale gbɛ ni etsɔɔ nɔ efeɔ nii hu. Enɛ tsɔɔ akɛ wɔbaanyɛ wɔtsi wɔbɛŋkɛ wɔŋwɛi Tsɛ lɛ kpaakpa kɛya naanɔ.

Nibii ni Obaanyɛ Ole

Eyɛ mli akɛ wɔnyɛŋ wɔle nibii komɛi ni kɔɔ Nyɔŋmɔ he moŋ, shi no etsɔɔ akɛ wɔnyɛŋ wɔle lɛ kɔkɔɔkɔ. Saji babaoo yɛ Biblia lɛ mli ni hãa wɔleɔ Nyɔŋmɔ jogbaŋŋ. Susumɔ nɔkwɛmɔnii komɛi ahe:

NYƆŊMƆ GBƐ́I: Biblia lɛ hãa wɔleɔ akɛ Nyɔŋmɔ ehã lɛ diɛŋtsɛ ehe gbɛ́i. Ekɛɔ akɛ: “Mi ji Yehowa, migbɛi ji no.” Nyɔŋmɔ gbɛ́i lɛ jeɔ kpo shii 7,000 sɔŋŋ yɛ Biblia lɛ mli, ni efa fe gbɛ́i fɛɛ gbɛ́i ni yɔɔ Biblia lɛ mli.Yesaia 42:8.

Bɔ ni onáa he sɛɛ: Yesu wie yɛ esɔlemɔ he nɔkwɛmɔnɔ lɛ mli akɛ: “Wɔ-Tsɛ ni yɔɔ ŋwɛi, ogbɛ́i lɛ he atse.” (Mateo 6:9) Ani bo hu obaanyɛ okɛ Nyɔŋmɔ gbɛ́i lɛ atsu ni kɛ́ oosɔle? Yehowa miisumɔ ni ehere mɔ fɛɛ mɔ ni feɔ nibii ni tsɔɔ akɛ eyɛ bulɛ kɛhã egbɛ́i lɛ yiwala.Romabii 10:13.

NYƆŊMƆ SHIHILƐHE: Biblia lɛ tsɔɔ akɛ shihilɛhei enyɔ yɔɔ—shikpɔŋ lɛ, he ni adesai yɔɔ lɛ, kɛ ŋwɛi he ni mumɔŋ bɔɔ nii ni yɔɔ mumɔŋ gbɔmɔtsei lɛ yɔɔ lɛ. (Yohane 8:23; 1 Korintobii 15:44) Bei pii lɛ, akɛ wiemɔ ni ji “ŋwɛi” lɛ tsuɔ nii yɛ Biblia lɛ mli kɛdamɔɔ shi kɛhãa mumɔŋ bɔɔ nii ashihilɛhe. “Ŋwɛi” nɛɛ ji Bɔlɔ lɛ ‘shihilɛhe’ lɛ.1 Maŋtsɛmɛi 8:43.

Bɔ ni onáa he sɛɛ: Oleɔ mɔ pɔtɛɛ ni Nyɔŋmɔ ji. Bɔlɔ lɛ jeee hewalɛ ko ni aleee ni yɔɔ he fɛɛ he ni hiɔ nɔ  fɛɛ nɔ mli. Yehowa ji Mɔ ko ni yɔɔ diɛŋtsɛ ni yɔɔ he ko diɛŋtsɛ. Ni “ateee bɔɔ nɔ ko yɛ ehiɛ.”Hebribii 4:13.

NYƆŊMƆ SUI: Biblia lɛ tsɔɔ akɛ Yehowa yɛ sui ni hãa anyɛɔ abɛŋkɛɔ lɛ. “Nyɔŋmɔ lɛ, suɔmɔ ji lɛ.” (1 Yohane 4:8) Emaleee kɔkɔɔkɔ. (Tito 1:2) Ekwɛɛɛ hiɛiaŋ, enaa mɔbɔ, emusuŋ tsɔɔ lɛ, ni emli fuuu mra. (2 Mose 34:6; Bɔfoi 10:34) Ekolɛ ebaafee mɛi babaoo naakpɛɛ akɛ Bɔlɔ lɛ miisumɔ ni ekɛ mɛi ni yɔɔ bulɛ kɛhã lɛ lɛ abɔ “naanyo.”Lala 25:14, Ga Biblia hee.

Bɔ ni onáa he sɛɛ: Obaanyɛ otsɔ Yehowa naanyo. (Yakobo 2:23) Kɛkɛ lɛ, kɛ́ oná ole Yehowa sui lɛ, obaanyɛ onu Biblia mli saji lɛ ashishi jogbaŋŋ.

‘TAOMƆ LƐ’

Biblia lɛ hãa wɔleɔ mɔ pɔtɛɛ ni Yehowa Nyɔŋmɔ ji. Ejeee mɔ ko ni anyɛŋ ale lɛ. Anɔkwa, Bɔlɔ lɛ miisumɔ ni ole lɛ. Ewiemɔ ni ji Biblia lɛ woɔ wɔ shi akɛ: ‘Kɛji otao lɛ lɛ, eeehã ona lɛ.’ (1 Kronika 28:9) Kanemɔ Biblia mli saji ni ojwɛŋ nɔ koni onyɛ ole Nyɔŋmɔ. Kɛ́ ofee nakai lɛ, Biblia lɛ woɔ bo shi akɛ, Nyɔŋmɔ ‘baatsi ebɛŋkɛ bo.’Yakobo 4:8.

Kɛ́ okane Biblia lɛ ni okase lɛ, obaale nibii hei ni kɔɔ Nyɔŋmɔ kɛ egbɛi lɛ ahe be fɛɛ be lɛ

Ekolɛ obaabi ohe okɛ, ‘Akɛni minyɛɛɛ male nɔ fɛɛ nɔ ni kɔɔ Bɔlɔ lɛ he hewɔ lɛ, te mafee tɛŋŋ matsɔ enaanyo lɛ?’ Susumɔ enɛ he okwɛ: Ani eji doo akɛ mɔ ko ni naanyo ji datrɛfonyo ni feɔ opireshɛŋ lɛ hu afee datrɛfonyo? Dabida! Datrɛfonyo ni feɔ opireshɛŋ lɛ naanyo lɛ baanyɛ afee mɔ ko ni tsuɔ nitsumɔ kroko kwraa. Kɛ̃lɛ, amɛbaanyɛ amɛtsɔmɔ nanemɛi kpaakpa. Nɔ ni he hiaa titri ji, ni datrɛfonyo lɛ naanyo lɛ baale esui kɛ nibii ni esumɔɔ kɛ nibii ni esumɔɔɔ. Nakai nɔŋŋ obaanyɛ otsɔ Biblia lɛ nɔ ole mɔ pɔtɛɛ ni Yehowa ji—ni enɛ ji nɔ tuuntu ni he hiaa ni ole koni naanyobɔɔ ahi okɛ lɛ teŋ.

Jeee nibii fioo komɛi pɛ Biblia lɛ kɛɔ wɔ yɛ Bɔlɔ lɛ he, moŋ lɛ, ehãa wɔleɔ nibii ni he hiaa koni wɔnyɛ wɔle Nyɔŋmɔ jogbaŋŋ. Ani obaasumɔ ni ole Yehowa Nyɔŋmɔ he nii babaoo? Yehowa Odasefoi kɛ mɛi kaseɔ Biblia lɛ ni amɛheee shika. Wɔmiifɔ̃ bo nine ni ona Odasefoi ni yɔɔ he ni oyɔɔ lɛ, loo oya wɔwɛbsaiti lɛ nɔ, yɛ www.jw.org/gaa.

Ekrokromɛi Hu Nɛ

BUU-MƆƆ

Nyɔŋmɔ Miitao Egbala bo kɛba Eŋɔɔ

Ni kɛ́ oheɔ Nyɔŋmɔ nɔ oyeɔ, shi onuuu he akɛ obɛŋkɛ lɛ hu?

BUU-MƆƆ

Mɛni hãa mɛi babaoo náa susumɔ akɛ Bɔlɔ ko yɛ?

Ani Nyɔŋmɔ bɔ adesai, aloo amɛjɛ kooloi amli?