Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2015

 WALA SHIHILƐ HE SANE

Yehowa Ehã Mi Babaoo Fe bɔ ni Mikpaa Gbɛ

Yehowa Ehã Mi Babaoo Fe bɔ ni Mikpaa Gbɛ

Be ni miye afii 17 lɛ, nibii ni oblahii kɛ oblayei tiuɔ sɛɛ titri ji nɔ ni hé mijwɛŋmɔ fɛɛ. Nibii ni minyaa he waa ji nanemɛi kɛbɔɔ, seremɔ, kɛ bɔɔlutswaa. Shi gbi ko gbɛkɛ lɛ, mishihilɛ tsake kwraa. Mikɛ moto yaná oshara, ni mikumɔ kɛjɛ mikuɛ aahu kɛyi shi. Kɛjɛ be ni miná oshara nɛɛ, aaafee afii 30 eho, ni mika saa mli afii pii.

Mida yɛ ŋshɔnaa maŋtiase ko ni atsɛɔ lɛ Alicante, ni yɔɔ Spain bokagbɛ lɛ mli. Mibɛ weku shihilɛ kpakpa ko, no hewɔ lɛ, be ni miji oblanyo lɛ, bei pii lɛ mihiɔ gbɛjegbɛi anɔ titri. No mli lɛ asaa lɔletai yɛ wɔshĩa lɛ masɛi. Mi kɛ nuu ko ni atsɛɔ lɛ José María, ni tsuɔ nii yɛ jɛmɛ lɛ fee naanyo. Eji mɔ ko ni sumɔɔ gbɔmɔ, ni enáa deka ehãa mi fe miwekumɛi po. Kɛ́ shihilɛ lɛ mli bawa lɛ, efeɔ tamɔ nyɛmi diɛŋtsɛ kɛhãa mi—eji naanyo kpakpa, eyɛ mli akɛ no mli lɛ eye mi onukpa afii 20 sɔŋŋ.

No mli lɛ, José María kɛ Yehowa Odasefoi lɛ ebɔi Biblia lɛ kasemɔ. Mibayɔse akɛ esumɔɔ Ŋmalɛi lɛ waa, ni bei pii lɛ, egbaa mi Biblia mli anɔkwalei komɛi. Mijɛɔ bulɛ mli miboɔ lɛ toi, shi mikɛ hiɛdɔɔ susuuu nɔ ni ewieɔ lɛ he. Akɛni miji oblanyo hewɔ lɛ, nibii krokomɛi ehe mitsui fɛɛ. Shi amrɔ nɛɛ, mishihilɛ miiba ebatsake.

OSHARA KO NI TSAKE MISHIHILƐ

Misumɔɔɔ ni mawie oshara ni miná lɛ he tsɔ. Nɔ ni nɔŋŋ ni makɛɛ ji, miye kwashiai asane, ni miyakwɛɛɛ mihe nɔ jogbaŋŋ. Yɛ gbi kome pɛ mli lɛ, mishihilɛ tsake kwraa. Kulɛ miji oblanyo ni yɔɔ hewalɛ waa, shi shi kome be ni mihɛleɔ shi lɛ, mikumɔ ni mikã helatsamɔhe. Ekpakpa ko dani minyɛ minu shihilɛ mli ni miyaje lɛ shishi. Mibi mihe shii abɔ akɛ, ‘Mɛni hewɔ esa akɛ makã he mahi wala mli?’

José María basara mi, nɔŋŋ kɛkɛ ni eto gbɛjianɔ koni Yehowa Odasefoi ni yɔɔ asafo ni bɛŋkɛ he miyɔɔ lɛ abasara mi yɛ helatsamɔhe lɛ. Bɔ ni amɛbasara mi shii abɔ lɛ ta mitsuiŋ waa. Be ni mihe wa mi fioo ni ajie mi kɛtee he kroko yɛ helatsamɔhe lɛ mli nɔŋŋ lɛ, mibɔi Biblia lɛ kasemɔ. Mibale nɔ hewɔ ni mɛi piŋɔ ni amɛgboi, kɛ nɔ hewɔ ni Nyɔŋmɔ eŋmɛ gbɛ ni nibii fɔji baa lɛ. Agbɛnɛ hu lɛ, mibale shi ni Nyɔŋmɔ ewo kɛhã wɔsɛɛ, akɛ shikpɔŋ lɛ nɔ fɛɛ baayi obɔ kɛ adesai ni eye emuu, ni mɔ ko mɔ ko ekɛŋ kɔkɔɔkɔ akɛ: “Migbɔjɔ [loo mihe miiye, NW].” (Yesaia 33:24) Kpaako kwraa mináa hiɛnɔkamɔ kpakpa ko yɛ mishihilɛ mli.

Be ni mishi helatsamɔhe lɛ, mitee mihiɛ oyayaayai yɛ Biblia lɛ kasemɔ mli. Afee wheelchair krɛdɛɛ ko ahã mi, ni no ye ebua mi ni minyɛ mitee kpeei ni Yehowa Odasefoi feɔ lɛ eko, ni mikɛ mihe wo shiɛmɔ nitsumɔ lɛ mli. Yɛ November 5, 1988, be ni miye afii 20 lɛ, abaptisi mi yɛ nɔ ko ni akãa mli ajuɔ he mli. Yehowa Nyɔŋmɔ ehã miná jwɛŋmɔ ni ja yɛ shihilɛ he. Shi mɛni manyɛ mafee kɛda lɛ shi?

 MIHÃAA MISHIHILƐ LƐ ATSĨ MINAA

Mitswa mifai shi akɛ mihaŋ mishihilɛ lɛ atsĩ minaa koni mikanyɛ misɔmɔ Yehowa kɛ minyɛmɔ fɛɛ. Miisumɔ ni maya mihiɛ. (1 Timoteo 4:15) Shishijee lɛ, mináaa lɛ mlɛo, ejaakɛ miwekumɛi ekpɛlɛɛɛ hemɔkɛyeli hee ni miná lɛ nɔ. Shi miyɛ nyɛmimɛi hii kɛ yei, ni ji mimumɔŋ nyɛmimɛi. Amɛkwɛɔ koni maya asafoŋ kpeei ni afeɔ lɛ fɛɛ, ni amɛkɛ mi yaa shiɛmɔ hu.

Sɛɛ mli lɛ, ebafee faŋŋ akɛ, esa akɛ afee nɔ fɛɛ nɔ ahã mi. Be ni mi kɛ bei pii etao hei ni akwɛɔ helatsɛmɛi ni tamɔ mi lɛ yɛ lɛ, miná he ko yɛ Valencia maŋtiase lɛ mli, ni eyɛ Alicante kooyi aaafee kilomitai 160. Nɛkɛ he nɛɛ batsɔ mishĩa kwraa.

Eyɛ mli akɛ mika saa mli moŋ, shi mitswa mifai shi akɛ mikɛ mɛi krokomɛi baagba mihemɔkɛyeli lɛ he sane

Eyɛ mli akɛ mika saa mli moŋ, shi mitswa mifai shi akɛ maya nɔ masɔmɔ Yehowa. Mikɛ shika ni ahãa mɛi ni eje kpa kɛ shikai krokomɛi ní mináa lɛ hé kɔmpiuta, ni mihã akɛma misaatso lɛ masɛi. Mihe mobail foŋ hu. Daa leebi lɛ, mɛi ni kwɛɔ mi lɛ ateŋ mɔ ko suɔ mikɔmpiuta kɛ mobail foŋ lɛ ehãa mi. Bɔ ni afee ni manyɛ mikɛ kɔmpiuta lɛ atsu nii lɛ, mikɛ mitsɛŋ kudɔɔ nɔ ni anyɛɔ akɛkudɔɔ nibii ni yɔɔ kɔmpiuta nɔ ni atsɛɔ lɛ joystick ni afee awo he lɛ. Agbɛnɛ hu, miyɛ tso krɛdɛɛ ko ni mikɛ minaabu mɔɔ mli. Tso nɛɛ yeɔ ebuaa mi ni minyɛɔ mitaipiɔ yɛ kɔmpiuta lɛ nɔ, ni minyɛɔ mitswaa mɛi tɛlifoŋ hu.

Mikɛ tso ko nyɛmɔɔ yibɔi ni yɔɔ tɛlifoŋ lɛ nɔ lɛ nɔ ni mikɛtswaa mɛi

Mɛɛ gbɛ nɔ nibii nɛɛ eye ebua mi? Klɛŋklɛŋ kwraa lɛ, ehãa minyɛɔ migbeleɔ jw.org wɛb saiti lɛ, ni minyɛɔ mikɛ Buu-Mɔɔ INTANƐT NƆ WOJIATOOHE lɛ tsuɔ nii. Nibii nɛɛ eye ebua mi waa! Daa gbi lɛ, mikɛ ŋmɛlɛtswai abɔ kaseɔ nii, ni mitaoɔ nii amli yɛ Biblia kasemɔ woji amli bɔ ni afee ni maya nɔ makase Nyɔŋmɔ sui ni nɔ bɛ lɛ ahe nii. Ni be fɛɛ be ni manu shoofeemɔ he loo minijiaŋ baaje wui fioo lɛ, mináa nɔ ko kɛ̃ yɛ wɛb saiti lɛ nɔ ní hãa mináa miishɛɛ.

Mikɔmpiuta lɛ yeɔ ebuaa mi hu ni minyɛɔ miboɔ nibii ni yaa nɔ yɛ asafoŋ kpeei ashishi lɛ toi, ni mikɛ mihe woɔ mli. Minyɛɔ mihãa saji ahetoo, misɔleɔ, mihãa wiemɔ, ni minyɛɔ mikaneɔ Buu-Mɔɔ lɛ mli hu. Eyɛ mli akɛ minyɛɛɛ maya kpeei nɛɛ ashishi moŋ, shi minuɔ he tamɔ nɔ ni miyɛ nyɛmimɛi ni yɔɔ asafo lɛ mli lɛ ateŋ nɔŋŋ.

Tɛlifoŋ kɛ kɔmpiuta ni miyɔɔ lɛ yeɔ ebuaa mi ni mikɛ mihe woɔ shiɛmɔ nitsumɔ lɛ mli. Anɔkwa sane ji akɛ, minyɛɛɛ mayashiɛ yɛ mɛi ashĩai taakɛ Yehowa Odasefoi babaoo feɔ lɛ. Shi no etsiko minaa. Mikɛ dɛŋdadei nɛɛ tsuɔ nii kɛgbaa mɛi krokomɛi mihemɔkɛyeli lɛ he sane. Anɔkwa, minyaa tɛlifoŋ nɔ odaseyeli he aahu akɛ, misafoŋ onukpai lɛ kɛɛ mi ni mikwɛ odase ni ayeɔ yɛ tɛlifoŋ nɔ lɛ nɔ yɛ wɔsafo lɛ mli. Tɛlifoŋ nɔ odaseyeli he gbɛjianɔtoo nɛɛ eye ebua asafoŋ lɛ mli bii ni nyɛɛɛ amɛshi shĩa kɛya shiɛmɔ lɛ waa.

Eefee Biblia mli nikasemɔ

 Shi jeee tɛlifoŋ kɛ kɔmpiuta pɛ yeɔ ebuaa mi yɛ shihilɛ mli. Daa gbi lɛ, minanemɛi basaraa mi. Amɛkɛ amɛwekumɛi kɛ nanemɛi ní miisumɔ ni amɛkase Biblia lɛ baa. Bei pii lɛ, amɛhãa mikwɛɔ nikasemɔ lɛ nɔ po. Bei komɛi lɛ, wekui komɛi basaraa mi, ni amɛhãa mifataa amɛhe kɛfeɔ amɛgbɛkɛ weku jamɔ lɛ. Mináa miishɛɛ waa kɛ́ gbekɛbii lɛ tá misaatso lɛ masɛi ni amɛmiigba mi nɔ hewɔ ni amɛsumɔɔ Yehowa lɛ.

Ekɛ weku ko miifee gbɛkɛ weku jamɔ

Eŋɔɔ minaa waa akɛ mɛi babaoo basaraa mi. Bei pii lɛ, mitsũ lɛ mli yiɔ kɛ nanemɛi, ni amɛteŋ mɛi komɛi jɛ shɔŋŋ. Enɛ feɔ mɛi ni kwɛɔ mi yɛ helatsamɔhe lɛ naakpɛɛ waa, taakɛ ekolɛ obaasusu lɛ. Daa gbi lɛ, midaa Yehowa shi akɛ ehã mi nyɛmimɛi ni tamɔ nɛkɛ.

MIHIƐ MLI LOLO

Be fɛɛ be ni mɔ ko baabi mi bɔ ni miyɔɔ lɛ, mihãa hetoo akɛ, “Mi nɔŋŋ nɛ, mihiɛ mli lolo!” Shi mile akɛ jeee mi pɛ mi kɛ shihilɛ ni jaraa kpeɔ. Akɛ Kristofoi lɛ, ekɔɔɔ he eko bɔ ni wɔshihilɛ ji loo naagbai ni wɔkɛkpeɔ lɛ, wɔ fɛɛ wɔmiiwu ta—no ji “hemɔkɛyeli lɛ he ta kpakpa lɛ.” (1 Timoteo 6:12) Mɛni eye ebua mi ni minyɛ mikpee shihilɛ ni jaraa nɛɛ naa afii babaoo lɛ? Misɔleɔ daa gbi, ni midaa Yehowa shi akɛ ehã miná miishɛɛ yɛ shihilɛ mli. Ni mibɔɔ mɔdɛŋ mikɛ hiɛdɔɔ sɔmɔɔ Nyɔŋmɔ yɛ minyɛmɔ naa, ni mihãa wɔsɛɛ shihilɛ he hiɛnɔkamɔ lɛ hiɛɔ mijwɛŋmɔ mli.

José María

Bei pii lɛ, mifeɔ bɔ ni jeŋ hee lɛ mli shihilɛ baaji ahã, ní miijo foi ni miitumɔ ekoŋŋ lɛ he mfoniri yɛ mijwɛŋmɔ mli. Bei komɛi lɛ, mi kɛ minaanyo José María—ni lɛ hu eeeye polio lɛ—yeɔ fɛo akɛ mi kɛ lɛ baada foi. Kɛkɛ lɛ, mibi lɛ akɛ: “Namɔ baaye klɛŋklɛŋ gbɛhe.” Ehãa hetoo akɛ: “Ekɔɔɔ he eko mɔ ni baaye klɛŋklɛŋ gbɛhe. Nɔ ni he hiaa ji, ni wɔyashɛ Paradeiso lɛ mli, koni wɔda foi lɛ yɛ jɛmɛ.”

Ekpakpa ko dani minyɛ mikpɛlɛ shihilɛ mli ni miyaje lɛ nɔ. Mi le akɛ be ni mi ji oblanyo lɛ, miye kwashiai asane, ni enɛ ehã miiná nɔ waa. Kɛ̃lɛ, midaa Yehowa shi waa akɛ ekpooo mi. Ehã mi nibii babaoo—nyɛmimɛi hii kɛ yei babaoo, shwelɛ akɛ makã he mahi shi, miishɛɛ ni jɛɔ yelikɛbuamɔ ni mikɛhãa mɛi krokomɛi lɛ mli, kɛ wɔsɛɛ shihilɛ ni yɔɔ miishɛɛ he hiɛnɔkamɔ. Kɛ́ mikɛɛ matsɔɔ bɔ ni minuɔ he mihãa lɛ mli lɛ, nɔ ni nɔŋŋ ni makɛɛ ji, Yehowa ehã mi babaoo fe bɔ ni mikpaa gbɛ.

Ekrokromɛi Hu Nɛ

SANEKPAKPA NI JƐ NYƆŊMƆ ŊƆƆ!

Mɛni Ji Nyɔŋmɔ Yiŋtoo Kɛha Shikpɔŋ Lɛ?

Biblia lɛ tsɔɔ nɔ hewɔ ni Nyɔŋmɔ bɔ shikpɔŋ lɛ, be ni nɔnaa baaba naagbee, kɛ nɔ ni baaba shikpɔŋ lɛ kɛ mɛi ni yɔɔ nɔ lɛ anɔ.

SANEKPAKPA NI JƐ NYƆŊMƆ ŊƆƆ!

Mɛni Ji Sanekpakpa ni Kɔɔ Jamɔ He?

Ani be ko baashɛ ni mɛi fɛɛ bafee ekome kɛja anɔkwa Nyɔŋmɔ koome lɛ?

WOJI KƐ WOJI BIBII

Ani Amanehulu Sɛɛ Baafo Be Ko?

Biblia lɛ kɛɔ akɛ Nyɔŋmɔ nyɛɔ jalɛsane ni ayeee lɛ ni esusuɔ mɛi ahe waa. Mɛni no baanyɛ atsɔɔ kɛha bo?