Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2015

 SANEYITSO LƐ MLITSƆƆMƆ | ANI GBOHII LƐ BAANYƐ AHI SHI EKOŊŊ?

Hiɛnɔkamɔ Kɛhã Gbohii Lɛ—Ani Obaanyɛ Ohe Oye?

Hiɛnɔkamɔ Kɛhã Gbohii Lɛ—Ani Obaanyɛ Ohe Oye?

Ani naagba ko yɛ he akɛ mɔ ko baasusu akɛ gbohii lɛ baahi shi ekoŋŋ? Bɔfo Paulo susuuu nakai. Akɛ mumɔ tsirɛ lɛ ni eŋma akɛ: “Kɛ́ wala nɛɛ mli kɛkɛ wɔhiɛ kã Kristo nɔ yɛ lɛ, no lɛ wɔnii yɛ mɔbɔ fe mɛi fɛɛ. Shi agbɛnɛ, atee Kristo shi kɛjɛ gbohii ateŋ akɛ mɛi ni ewɔ yɛ gbele mli lɛ ateŋ klɛŋklɛŋ yibii.” (1 Korintobii 15:19, 20) Paulo ná nɔmimaa akɛ gbohiiashitee lɛ baaba. Yesu shitee lɛ ji nɔ ni ma nɔ mi kɛhã lɛ. * (Bɔfoi 17:31) No hewɔ ni Paulo tsɛ Yesu akɛ “klɛŋklɛŋ yibii” lɛ—lɛ ji klɛŋklɛŋ mɔ ni atee lɛ shi kɛtee naanɔ wala mli. Kɛ́ Yesu ji klɛŋklɛŋ mɔ lɛ, belɛ nilee yɛ mli akɛ wɔbaakpa gbɛ akɛ abaatee mɛi krokomɛi hu shi.

Hiob kɛɛ Nyɔŋmɔ akɛ: “Oootao onine naa nitsumɔ lɛ sɛɛ gbɛ.”Hiob 14:14, 15

Naa yiŋtoo kroko hewɔ ni obaanyɛ oná nɔmimaa yɛ gbohiiashitee lɛ he. Yehowa ji anɔkwa Nyɔŋmɔ lɛ. Biblia lɛ kɛɔ akɛ, “Nyɔŋmɔ . . . nyɛŋ emale.” (Tito 1:2) Yehowa maleko dã, ni emaleŋ hu kɔkɔɔkɔ. Ani ebaawo shi akɛ ebaatee gbohii lɛ ashi, ní efee nibii kɛtsɔɔ akɛ ebaanyɛ ehã eba mli, kɛkɛ ejie ejwɛŋmɔ yɛ nɔ? Enyɛŋ ebalɛ nakai kɔkɔɔkɔ!

Mɛni hewɔ Yehowa eto gbɛjianɔ akɛ ebaatee gbohii ashi wɔsɛɛ lɛ? Esuɔmɔ lɛ hewɔ. Hiob bi akɛ: “Kɛji gbɔmɔ gbo lɛ, ani ehiɛ aaakã ekoŋŋ?” Ni etsa nɔ akɛ: ‘Kulɛ oootsɛ́, ni mahereo nɔ; ni oootao onine naa nitsumɔ lɛ sɛɛ gbɛ.’ (Hiob 14:14, 15) Hiob ná nɔmimaa akɛ e-Tsɛ ni yɔɔ suɔmɔ lɛ baasumɔ ni etee lɛ shi. Ani Nyɔŋmɔ etsake? Biblia lɛ kɛɔ akɛ: “Mi Yehowa lɛ, mitsakeee.” (Maleaki 3:6) Nyɔŋmɔ miisumɔ lolo ni etee gbohii lɛ ashi kɛba wala mli ekoŋŋ, ní amɛyɛ gbɔmɔtsoŋ hewalɛ kpakpa kɛ miishɛɛ. Enɛ ji nɔ ni fɔlɔ ko ni yɔɔ suɔmɔ ni bi egbo lɛ baashwe akɛ efee. Shi yɛ Nyɔŋmɔ gbɛfaŋ lɛ, eyɛ hewalɛ ni ekɛbaafee nɔ ni eshweɔ lɛ.Lala 135:6.

Gbele ji naagba ko ni jaraa waa, shi Nyɔŋmɔ yɛ enaa tsabaa

 Yehowa baahã e-Bi lɛ hewalɛ koni ehã mɛi ni yeɔ awerɛho yɛ amɛsuɔlɔi agbele hewɔ lɛ aná miishɛɛ ni sɛɛ efooo. Ni te Yesu nuɔ he ehãa tɛŋŋ yɛ gbohiiashitee lɛ he? Dani Yesu baatee Lazaro shi lɛ, ena bɔ ni Lazaro nyɛmimɛi yei lɛ kɛ enanemɛi lɛ he jaraa amɛ yɛ Lazaro gbele lɛ hewɔ lɛ, ni ‘ehiŋmɛiiaŋ kpala nu.’ (Yohane 11:35) Be kroko lɛ, Yesu na Nain okulafo ni binuu kome pɛ egbo lɛ. Yesu “musuŋ tsɔ lɛ yɛ ehe, ni ekɛɛ lɛ akɛ: ‘Kpa yaafo.’” Amrɔ nɔŋŋ lɛ, etee yoo lɛ binuu lɛ shi. (Luka 7:13) No hewɔ lɛ, Yesu nuɔ he ehãa mɛi ni suɔlɔi egboi ni amɛyeɔ awerɛho lɛ. Kwɛ miishɛɛ ni ebaaná be ni ehãa awerɛho fɛɛ tsɔɔ miishɛɛ yɛ je lɛ mli fɛɛ lɛ!

Ani oye awerɛho pɛŋ? Ekolɛ obaasusu akɛ gbele ji naagba ko ni abɛ enaa tsabaa. Shi enaa tsabaa yɛ—no ji gbohiiashitee ni Nyɔŋmɔ baatsɔ e-Bi lɛ nɔ ekɛba lɛ. Kaimɔ akɛ Nyɔŋmɔ miisumɔ ni ona nakai tsabaa lɛ. Eesumɔ ni be ni abaatee osuɔlɔi lɛ ashi lɛ, ohi jɛmɛ ni ohere amɛ atuu. Kwɛ miishɛɛ ni obaaná be ni okɛ osuɔlɔi efee ekome kɛmiito nibii ni baahã nyɛhi shi kɛya naanɔ lɛ he gbɛjianɔ, ní mɔ ko gbooo dɔŋŋ lɛ!

Lionel, ni atsĩ etã kɛtsɔ hiɛ lɛ wie akɛ: “Naagbee lɛ, mibakase gbohiiashitee lɛ he nii. Kulɛ ebawa kɛhã mi akɛ makpɛlɛ nɔ, ni miheee mɔ ni tsɔɔ mi miyeee. Shi mi diɛŋtsɛ mikane yɛ Biblia lɛ mli, ni mina akɛ eji anɔkwale! Miimɛ kɛkɛ ni mana minii ekoŋŋ.”

Ani obaasumɔ ni ole babaoo? Yehowa Odasefoi baaná he miishɛɛ akɛ amɛbaatsɔɔ bo kɛjɛ bo diɛŋtsɛ o-Biblia lɛ mli nɔ hewɔ ni amɛyɔɔ nɔmimaa akɛ abaatee gbohii ashi wɔsɛɛ lɛ. *

^ kk. 3 Kɛ́ ootao oná nɔmimaa akɛ atee Yesu shi lɛ, kwɛmɔ The Bible—God’s Word or Man’s? wolo lɛ baafa 78-86, ni Yehowa Odasefoi fee lɛ.

Ekrokromɛi Hu Nɛ

Bɔ ni Ooofee Okpee Ohefatalɔ Gbele Naa

Kɛ́ mɔ ko hefatalɔ gbo lɛ eyɛ dɔlɛ waa, ni dɔlɛ nɛɛ sɛɛ tsɛɔ. Kanemɔ bɔ ni gbohiiashitee he hiɛnɔkamɔ ni yɔɔ Biblia lɛ mli lɛ shɛjeɔ mɔ mii lɛ he sane.

Hiɛnɔkamɔ Diɛŋtsɛ ni Yɔɔ Kɛhã Osuɔlɔi ni Egboi Lɛ

Ani osuɔlɔ ko egbo? Ani obaanyɛ ona amɛ ekoŋŋ? Kanemɔ koni ole nɔ ni Biblia lɛ tsɔɔ yɛ gbohiiashitee he.