Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2015

 KASEMƆ AMƐHEMƆKƐYELI LƐ | DEBORA

“Mite Shi akɛ Nyɛ yɛ Israel”

“Mite Shi akɛ Nyɛ yɛ Israel”

DEBORA kwɛ asraafoi ni ebua amɛhe naa yɛ Tabor Gɔŋ lɛ nɔ lɛ. Emii eshɛ ehe akɛ ena amɛ yɛ jɛmɛ. Be ni je tsɛre lɛ, esusu ekãa ni amɛyɔɔ lɛ, kɛ hemɔkɛyeli ni amɛhiɛnyiɛlɔ Barak yɔɔ lɛ he. Eyɛ mli akɛ amɛyibɔ ji 10,000 moŋ, shi abaaka hemɔkɛyeli kɛ ekãa ni amɛyɔɔ lɛ ŋmɛnɛ. Amɛkɛ amɛhenyɛlɔi komɛi ni yiŋ wa waa, ni yi fá kwraa fe amɛ, ni amɛwaje amɛhe hu fe amɛ lɛ miiya ayawu. Shi fɛɛ sɛɛ lɛ, amɛbabua amɛhe naa yɛ gɔŋ nɛɛ nɔ—titri lɛ, yɛ hewalɛ ni yoo nɛɛ wo amɛ lɛ hewɔ.

Bo lɛ feemɔ Debora he mfoniri, ni kɔɔyɔɔ lɛ miitswa etade lɛ, ni ekɛ Barak miikwɛ bɔ ni jɔɔ ni yɔɔ gɔŋ lɛ shishi lɛ yɔɔ fɛo lɛ. Tabor Gɔŋ lɛ ma shi gojoo, shi eyiteŋ yɛ tɛtrɛɛ. Gɔŋ lɛ kwɔlɛ aaashɛ mitai 400, ni kɛ́ odamɔ eyiteŋ tɛtrɛɛ lɛ nɔ lɛ, onaa Esdraelon Jɔɔ ni kã wuoyi-anaigbɛ lɛ. Kishon Faa lɛ hoɔ kɛtsɔɔ ŋa kpataa ni kã gɔŋ lɛ shishi lɛ nɔ, ni etsɔɔ Karmel Gɔŋ lɛ shishi kɛyaboteɔ Ŋshɔ Wulu lɛ mli. Nakai gbi lɛ leebi lɛ, eeenyɛ efee akɛ nu lɛ emii, shi no mli lɛ nɔ kroko hu miikpɛlɛ yɛ jɛmɛ. No mli lɛ, Sisera ta lɛ miibɛŋkɛ amɛ, ni amɛtawuu nibii lɛ miikpɛlɛ kaŋkaŋ. Amɛji Sisera tabilɔi ni he esa fe fɛɛ—ni amɛhiɛ shwiilii 900, ni eeenyɛ efee akɛ, akɛ kakalai etsɛlɛ dade ni shwiili lɛ tai lɛ yɔɔ he lɛ ahe. Sisera to ni kulɛ ebaafolɔ Israelbii ni bɛ tawuu nibii lɛ eshwie shi tamɔ afolɔɔ jwɛi lɛ!

Debora le akɛ Barak kɛ ehii lɛ miimɛ ni ekɛɛ amɛ nɔ ko. Ani lɛ pɛ ji yoo ni yɔɔ jɛmɛ? Te enu he ehã tɛŋŋ be ni ena akɛ sɔ̃ agbo ni tamɔ nɛkɛ tere lɛ lɛ? Ani ebi ehe nɔ ni efeɔ yɛ jɛmɛ? Dabi! Yehowa, ni ji e-Nyɔŋmɔ lɛ, ekɛɛ lɛ ni eje ta lɛ shishi; ni ekɛɛ lɛ hu akɛ ebaatsɔ yoo ko nɔ ekɛ ta lɛ aba naagbee. (Kojolɔi 4:9) Mɛni wɔbaanyɛ wɔkase kɛjɛ hemɔkɛyeli ni Debora kɛ hii ekãalɔi nɛɛ jie lɛ kpo lɛ mli?

“YAAFÃ TA KƐYA TABOR GƆŊ LƐ NƆ”

Be klɛŋklɛŋ kwraa ni atsĩ Debora tã yɛ Biblia lɛ mli lɛ, awie ehe akɛ “gbalɔyoo.” Nakai gbɛ́i lɛ hãa efeɔ tamɔ esoro Debora yɛ gbɛ ko nɔ, shi jeee lɛ pɛ atsɛ lɛ gbalɔyoo yɛ Biblia lɛ mli. * Debora jeee gbalɔyoo pɛ. Ekã shi faŋŋ akɛ esaa béi ni baa Israelbii lɛ ateŋ lɛ, kɛtsɔ bɔ ni Yehowa susuɔ yɛ sane lɛ he ni ehãa amɛleɔ lɛ nɔ.Kojolɔi 4:4, 5.

Debora hi Efraim gɔji lɛ anɔ yɛ Betel kɛ Rama teŋ. Etaa tɛŋ tso ko shishi ni ekojoɔ Israelbii lɛ yɛ Yehowa gbɛtsɔɔmɔ naa. Nitsumɔ ni Debora tsuɔ lɛ wa waa, shi ehãaa no awo ehe gbeyei. Nitsumɔ ni etsuɔ lɛ he miihia amɛ waa. Sɛɛ mli lɛ, efata mɛi ni akɛ mumɔ tsirɛ amɛ ni amɛfo lala ko lɛ he, ni yɛ lala lɛ mli lɛ ewie bɔ ni Israelbii lɛ yeee Yehowa anɔkwa lɛ he akɛ: “Amɛhala nyɔŋmɔi heei: kɛkɛ ni ta shɛ agbói lɛ anaa.” (Kojolɔi 5:8) Akɛni Israelbii lɛ shi Yehowa ni amɛyasɔmɔ nyɔŋmɔi krokomɛi hewɔ lɛ, Yehowa ŋmɛɛ amɛhe ehã amɛhenyɛlɔi lɛ. Kanaanbii amaŋtsɛ ni atsɛɔ lɛ Yabin lɛ tsɔ etatsɛnukpa ni atsɛɔ lɛ Sisera lɛ nɔ eye amɛnɔ.

Kɛ́ Israelbii lɛ nu gbɛ́i Sisera lɛ po kɛkɛ lɛ, gbeyei mɔɔ amɛ. Kanaanbii lɛ ajamɔ kɛ kusumii lɛ yɛ gbeyei, nibii komɛi ni afeɔ yɛ mli ji gbekɛbii ni  akɛshãa afɔle kɛ ashawo ni afeɔ yɛ sɔlemɔwe lɛ. Te Israelbii lɛ ashihilɛ fee tɛŋŋ be ni Kanaanbii atatsɛnukpa kɛ esraafoi lɛ yeɔ amɛnɔ lɛ? Debora lala lɛ tsɔɔ akɛ, gbɛfãa bawa, ni mɛi ni yɔɔ akrowai amli lɛ hu fɛɛ tã. (Kojolɔi 5:6, 7) Wɔbaanyɛ wɔfee bɔ ni mɛi lɛ teɔ amɛhe yɛ koi lɛ amli kɛ gɔji lɛ anɔ, ni amɛmiishe gbeyei akɛ amɛbaaya ŋmɔ mli loo amɛbaahi akrowai ni atswako gbogboi awoko amɛhe lɛ amli, ni amɛmiishe gbeyei hu akɛ amɛbaafã gbɛ kɛtsɔ gbɛjegbɛi lɛ anɔ koni akatutua amɛ, ashɔ̃ amɛbii yɛ amɛdɛŋ, loo ato amɛyei lɛ kabonaa lɛ he mfoniri yɛ wɔjwɛŋmɔŋ. *

Amɛhi shihilɛ gbeyeigbeyei nɛɛ mli afii 20 sɔŋŋ, kɛyashi Yehowa na akɛ ewebii kuɛŋtilɔi lɛ efee klalo akɛ amɛkɛ egbɛtsɔɔmɔi baatsu nii, loo taakɛ Debora kɛ Barak wie yɛ lala ni akɛ mumɔ tsirɛ amɛ ni amɛfo lɛ mli lɛ, akɛ, “Kɛyashi beyinɔ ni mi, Debora, mite shi, ni mite shi akɛ nyɛ yɛ Israel” lɛ. Wɔleee kɛji Debora, ni ji Lapidot ŋa lɛ ji nyɛ ni yɔɔ bii diɛŋtsɛ, shi nyɛ ni etsɛ ehe lɛ ji mfonirifeemɔŋ wiemɔ. Enɛ tsɔɔ akɛ Yehowa hala Debora koni ebu Israelbii lɛ ahe, taakɛ nyɛ buɔ ebii ahe lɛ. Yehowa hã etsu ayatsɛ Kojolɔ Barak, ni ji nuu ni yɔɔ hemɔkɛyeli waa lɛ kɛba, ni ekɛɛ lɛ ni efã ta eshi Sisera.Kojolɔi 4:3, 6, 7; 5:7.

Debora wo Barak hewalɛ ni edamɔ shi akɛ mɔ ni baakpɔ̃ Nyɔŋmɔ webii lɛ

Yehowa fã Debora ní ekɛɛ Barak akɛ, “Yaafã ta kɛya Tabor gɔŋ lɛ nɔ.” Esa akɛ Barak ahala hii 10,000 kɛjɛ Israel akutsei lɛ enyɔ mli. Debora hã Barak le shi ni Nyɔŋmɔ ewo akɛ ebaakpata Sisera kɛ eshwiilii 900 lɛ ahiɛ lɛ! Nakai sane lɛ hã Barak naa kpɛ ehe. Israelbii lɛ bɛ asraafoi, ni amɛbɛ tawuu nibii hu. Fɛɛ sɛɛ lɛ, Barak kpɛlɛ nɔ akɛ ebaaya ta lɛ—shi ja Debora fata ehe kɛtee Tabor Gɔŋ lɛ nɔ.Kojolɔi 4:6-8; 5:6-8.

Mɛi wieɔ akɛ Barak bɛ hemɔkɛyeli akɛni ebi ni Debora afata ehe lɛ hewɔ, shi enɛ jeee anɔkwale. Ebiii Nyɔŋmɔ ni ehã lɛ tawuu nii pii. No najiaŋ lɛ, Barak na akɛ ehi akɛ mɔ ko ni Yehowa kɛ lɛ miitsu nii lɛ baahi jɛmɛ koni no awo lɛ kɛ ehii hewalɛ. (Hebribii 11:32, 33) Yehowa bo lɛ toi. Eŋmɛ gbɛ ni Debora fata Barak he kɛtee, taakɛ Barak bi lɛ. Shi Yehowa kɛ mumɔ tsirɛ Debora ni egba akɛ, jeee nuu ji mɔ ni baaŋɔ anunyam ni baajɛ ta lɛ mli kɛba lɛ. (Kojolɔi 4:9) Nyɔŋmɔ ekpɛ mli akɛ ebaahã yoo agbe Sisera yitsoŋwalɔ lɛ!

Ŋmɛnɛ lɛ, atsɔɔ yei asane hiɛ abuɔ shi, ayeɔ amɛ awui, ni afeɔ amɛ niseniianii babaoo. Akɛ bulɛ ni Nyɔŋmɔ sumɔɔ ni akɛhã yei lɛ hãaa amɛ. Kɛ̃lɛ, bɔ ni Nyɔŋmɔ naa hii lɛ, nakai nɔŋŋ enaa  yei hu, ni amɛ fɛɛ amɛbaanyɛ amɛná enɔkpɛlɛmɔ. (Romabii 2:11; Galatiabii 3:28) Debora nɔkwɛmɔnɔ lɛ hãa wɔnaa akɛ Nyɔŋmɔ hãa yei hegbɛi komɛi, ni eyɛ hekɛnɔfɔɔ yɛ amɛmli, ni ekpɛlɛɔ amɛnɔ hu. Esaaa akɛ wɔnáa susumɔ gbonyo ni je lɛ hiɛ yɛ yei ahe lɛ eko.

“SHIKPƆŊ LƐ HOSO, NI ŊWƐII TSERE SHWIE SHI”

Barak bua eta lɛ naa. Ebua hii 10,000, ni ji kakalɔi ni baanyɛ amɛkɛ Sisera asraafoi ni he yɔɔ gbeyei lɛ ayawu lɛ naa. Be ni Barak nyiɛ ehii lɛ ahiɛ kɛyaa Tabor Gɔŋ lɛ nɔ lɛ, ená miishɛɛ waa akɛ amɛyɛ nɔ ko ni baahã amɛná ekãa babaoo. Wɔkaneɔ akɛ: “Debora hu kɛ lɛ tee.” (Kojolɔi 4:10) Eka shi faŋŋ akɛ, be ni tabilɔi nɛɛ na akɛ yoo ekãalɔ nɛɛ kɛ amɛ miiya Tabor Gɔŋ lɛ nɔ, ni eesumɔ ni lɛ hu ekɛ ewala awo oshara mli yɛ hemɔkɛyeli ni eyɔɔ yɛ Yehowa Nyɔŋmɔ mli lɛ hewɔ lɛ, ewo amɛ hewalɛ waa!

Be ni Sisera ná ele akɛ Israelbii lɛ efã ta eshi lɛ lɛ, eshashaooo shi kwraa. Kanaanbii lɛ amaŋtsɛmɛi lɛ ekomɛi kɛ Maŋtsɛ Yabin, ni no mli lɛ etamɔ nɔ ni eyɛ hewalɛ fe amɛ fɛɛ lɛ yafee ekome. Kɛkɛ ni Sisera shwiilii lɛ agbɛɛmɔ hã shikpɔŋ lɛ hoso be ni amɛfã kɛtee ŋa kpataa lɛ nɔ lɛ. Kanaanbii lɛ yɛ nɔmimaa akɛ amɛbaakpata Israelbii lɛ ahiɛ yɛ be kukuoo mli.Kojolɔi 4:12, 13; 5:19.

Mɛni Barak kɛ Debora baafee be ni amɛhenyɛlɔi lɛ bɛŋkɛɔ amɛ lɛ? Kɛ́ amɛdamɔ Tabor Gɔŋ lɛ nɔ lɛ, ta lɛ ebawaŋ kɛhaŋ amɛ tsɔ, ejaakɛ ja Kanaanbii lɛ ená he ko ni kã shi shwɛtɛɛ dani amɛbaanyɛ amɛkɛ amɛta shwiilii lɛ anɔ jogbaŋŋ. Shi Yehowa baatsɔɔ Barak bɔ ni ewuu ta lɛ ehã, no hewɔ lɛ emɛ koni Debora kɛ fãmɔ ahã lɛ. Yɛ naagbee lɛ, Debora tsɔɔ lɛ nɔ ni efee. Ekɛɛ Barak akɛ: “Tee shi, ejaakɛ ŋmɛnɛ gbi nɛɛ Yehowa eŋɔ Sisera ewo odɛŋ! Ani jeee Yehowa efã kɛnyiɛ ohiɛ nɛɛ?” No sɛɛ lɛ, wɔkaneɔ akɛ: “Barak kpeleke shi kɛjɛ Tabor gɔŋ lɛ nɔ, ni mɛi akpei nyɔŋma lɛ nyiɛ esɛɛ.”Kojolɔi 4:14. *

Israel asraafoi lɛ kɛfoi kpeleke shi kɛtee he ni yɔɔ shwɛtɛɛ lɛ, ni amɛtse kɛtee he ni ta shwiilii ni he yɔɔ gbeyei lɛ yɔɔ lɛ gbɛ. Ani Yehowa fã kɛnyiɛ amɛhiɛ taakɛ Debora wo shi lɛ? Ana nakai sane lɛ hetoo lɛ oya nɔŋŋ. Wɔkaneɔ akɛ, “shikpɔŋ lɛ hoso, ni ŋwɛii tsere shwie shi.” Sisera asraafoi henɔwolɔi lɛ ayiŋ futu amɛ, ni amɛjijaa. Ni nugbɔ bɔi nɛmɔ! Nugbɔ lɛ naa wa aahu akɛ, yɛ be kukuoo mli lɛ, shikpɔŋ lɛ fɛɛ yi kɛ nu. Yɛ nɔ najiaŋ ni kulɛ amɛdade shwiilii lɛ baaye abua amɛ lɛ, efee oshara moŋ kɛhã amɛ. Amɛfũ yɛ ŋmɔtɔ lɛ mli ni ehiii amɛ nɔ ko kwraa feemɔ.Kojolɔi 4:14, 15; 5:4.

Nugbɔ ni nɛɔ lɛ gbaaa Barak kɛ ehii lɛ anaa. Amɛle nɔ hewɔ ni enɛɔ lɛ. Amɛkɔlɔ foi amɛshwie Kanaan asraafoi lɛ asɛɛ. Akɛ Nyɔŋmɔ najiaŋdamɔlɔi lɛ, Israelbii lɛ gbe Sisera asraafoi lɛ fɛɛ. Kishon Faa lɛ yi ni eloo gbohii lɛ fɛɛ eyawo Ŋshɔ Wulu lɛ mli.Kojolɔi 4:16; 5:21.

Taakɛ Debora gba lɛ, Yehowa wuu ehã ewebii lɛ ni ekpata Sisera kɛ esraafoi lɛ ahiɛ

Ŋmɛnɛ lɛ, Yehowa hãaa etsuji aya ta diɛŋtsɛ. Shi ebiɔ ni etsuji awuu mumɔŋ ta. (Mateo 26: 52; 2 Korintobii 10:4) Kɛ́ wɔbo Nyɔŋmɔ toi yɛ je nɛɛ mli lɛ, etsɔɔ akɛ wɔyɛ Nyɔŋmɔ sɛɛ yɛ nakai ta lɛ mli. Ebaabi ni wɔná ekãa, ejaakɛ mɛi ni yɔɔ Nyɔŋmɔ gbɛfaŋ ŋmɛnɛ lɛ kɛ shiteekɛwoo ni naa wa baakpe. Shi Yehowa tsakeko. Eyeɔ ebuaa mɛi ni náa hemɔkɛyeli kɛ hiɛkɛnɔfɔɔ yɛ emli, taakɛ Debora, Barak, kɛ Israel asraafoi lɛ ná yɛ emli lɛ.

‘AJƆƆ LƐ YƐ YEI ATEŊ’

Israelbii lɛ ahenyɛlɔi lɛ ateŋ mɔ kome jo foi—amɛteŋ mɔ ni ehiii fe fɛɛ lɛ! Sisera, ni ji Nyɔŋmɔ webii lɛ ahenyɛlɔ ni fe fɛɛ lɛ jo foi yɛ ta lɛ naa, ni enyiɛ enane nɔ. Ehe fee oya ni ejo foi eshi ehii lɛ ní amɛgboi yɛ ŋmɔtɔ lɛ mli, ni Israel asraafoi lɛ ateŋ mɔ ko enaaa lɛ, ni ewó ehiɛ ewo maji ni toiŋjɔlɛ yɔɔ amɛkɛ amɛteŋ lɛ ateŋ eko nɔ. Ekɛ oyaiyeli jo foi shitoi abɔ, ni akɛni eeshe gbeyei waa akɛ Israel asraafoi lɛ eko baanina lɛ hewɔ lɛ, ewó ehiɛ etere Heber, ni ji Kennyo ni etse ehe kɛje emaŋbii ahe kɛtee wuoyigbɛ ni ekɛ Maŋtsɛ Yabin eyafee kpaŋmɔ ko lɛ shĩa lɛ gbɛ.Kojolɔi 4:11, 17.

Sisera yashɛ he ni Heber eshi ebuu lɛ yɛ lɛ, ní  etɔ lɛ bliboo. Eyaninaaa Heber yɛ shĩa. Shi eyana Heber ŋa Yael. Sisera susu akɛ yɛ naanyobɔɔ ni yɔɔ Yael wu Heber kɛ Maŋtsɛ Yabin teŋ lɛ hewɔ lɛ, ebɛ naagba. Ekolɛ ebaaa ejwɛŋmɔ mli akɛ esoro susumɔ ni yoo lɛ hiɛ lɛ kwraa yɛ ewu lɛ nɔ lɛ he. Sisera leee Yael jogbaŋŋ! Eyɛ faŋŋ akɛ, Yael na bɔ ni Kanaanbii lɛ ye Israelbii lɛ anɔ dɛŋdɛŋ lɛ; ena hu akɛ esa akɛ ekpɛ eyiŋ yɛ nɔ ni ebaafee he. Kɛ́ ebaaye ebua nuu awuiyelɔ lɛ ni eye ehe aloo ebaafi Yehowa sɛɛ ni egbe nuu ni ji Yehowa webii lɛ ahenyɛlɔ lɛ. Shi mɛni ebaanyɛ efee? Te aaafee tɛŋŋ ni yoo aaaye asraafonyo kpanaku ni tamɔ nɛkɛ lɛ nɔ?

Esa akɛ Yael asusu nɔ ni ebaafee lɛ he oya nɔŋŋ. Ehã Sisera he ko ekã. Sisera wo lɛ shi akɛ, nuu fɛɛ nuu ni baaba ebatao lɛ lɛ, ekawie akɛ eba jɛmɛ. Be ni Sisera kã shi lɛ, ekɛ mama hã enɔ, ni be ni ebi lɛ nu lɛ, ehã lɛ mliki. Etsɛɛɛ nɔŋŋ ni wɔ nyɔ Sisera nɔ. Kɛkɛ ni Yael kɔlɔ dɛŋdadei enyɔ komɛi—ni ji shiŋmilitso kɛ hamlɛ—ni yei ni hiɔ bui amli lɛ kɛfɔɔ nitsumɔ yɛ shĩa, ni amɛle bɔ ni akɛ nibii nɛɛ tsuɔ nii jogbaŋŋ lɛ ehiɛ edɛŋ. Edɛkɛ shi kɛtee he ni Sisera yitso yɔɔ lɛ gbɛ. Amrɔ nɛɛ eeba ebatɔ Yehowa he owele, ni enɛ yɛ gbeyei waa. Ni esa akɛ ehe afee oya kɛtsu saji ahe nii, kɛ́ jeee nakai lɛ ebaafee abalaŋ. Ani esusu bɔ ni nuu nɛɛ efee Nyɔŋmɔ webii lɛ niseniianii afii nyɔŋmai abɔ lɛ he? Aloo esusu hegbɛ ni ená akɛ ebaafi Yehowa sɛɛ lɛ he? Biblia lɛ ewieee he. Nɔ ni wɔle ji, etsu saji ahe nii amrɔ nɔŋŋ. Egbe Sisera!Kojolɔi 4:18-21; 5: 24-27.

Sɛɛ mli lɛ, Barak ba Sisera taomɔ. Be ni Yael kɛ Sisera gbonyo lɛ tsɔɔ lɛ ni shiŋmilitso lɛ tsɛkɛ etoi shi lɛ, ena akɛ nɔ ni Debora gba lɛ ni eba mli lɛ. Yoo egbe Sisera, ni ji nuu ekãalɔ lɛ! Mɛi ni wieɔ amɛshiɔ Biblia lɛ kɛ mɛi ni yiŋ etɛ̃ɛɛ amɛ yɛ Biblia lɛ he lɛ ewieee Yael he ekpakpa, shi Barak kɛ Debora nuɔ nɔ ni Yael fee lɛ shishi. Yɛ lala ni akɛ mumɔ tsirɛ amɛ ni amɛfo lɛ mli lɛ, amɛjie Yael yi akɛ ‘ajɔɔ lɛ yɛ yei ateŋ’ yɛ ekãa ni efee lɛ hewɔ. (Kojolɔi 4:22; 5:24) Kadimɔ akɛ, Debora fooo lɛ pɛ enɔ mli. Emli fuuu akɛ akɛ yijiemɔ lɛ ehã Yael; moŋ lɛ, nɔ ni he hiaa lɛ ji Yehowa wiemɔi lɛ ni ená eba mli lɛ.

Amrɔ nɛɛ ni Sisera egbo lɛ, Maŋtsɛ Yabin bɛ Israelbii lɛ anɔ hewalɛ dɔŋŋ. Israelbii lɛ eye amɛhe kɛjɛ Kanaanbii lɛ anɔyeli shishi agbɛnɛ. Amɛtoiŋ jɔ amɛ afii 40. (Kojolɔi 4:24; 5:31) Ajɔɔ Debora, Barak, kɛ Yael yɛ hemɔkɛyeli ni amɛná yɛ Yehowa Nyɔŋmɔ mli lɛ hewɔ! Kɛ́ wɔkase Debora hemɔkɛyeli lɛ, ni wɔhi Yehowa gbɛfaŋ, ni wɔye wɔbua mɛi krokomɛi hu ní amɛfee nakai lɛ, Yehowa baajɔɔ wɔ ni ebaahã wɔye kunim—ni wɔtoiŋ baajɔ wɔ.

^ kk. 7 Gbalɔyei krokomɛi hu ni awie amɛhe ji Miriam, Huldah, kɛ Yesaia ŋa lɛ.2 Mose 15:20; 2 Maŋtsɛmɛi 22:14; Yesaia 8:3.

^ kk. 9 Debora lala lɛ tsɔɔ akɛ, bei pii kɛ́ Sisera kɛ esraafoi lɛ jɛ ta amɛba lɛ, amɛkɛ haanii, ni oblayei fata he lɛ baa, ni bei komɛi lɛ oblayei nɛɛ ayi faa bɔ ni asraafonyo fɛɛ asraafonyo naa fe ekome. (Kojolɔi 5:30) Wiemɔ ni atsɔɔ shishi akɛ “oblayoo” lɛ shishitsɔɔmɔ ŋmiiŋmi ji “fɔmɔ kotoku.” Nakai wiemɔ lɛ hãa wɔnaa akɛ, nɔ titri hewɔ ni amɔmɔɔ yei nɛɛ ji, koni akɛ amɛ afɔ́. Eeenyɛ efee akɛ afɔɔ yei kabonaa too waa.

^ kk. 17 Awie ta nɛɛ he shii enyɔ yɛ Biblia lɛ mli—yɛ yinɔsane ni aŋma yɛ Kojolɔi yitso 4 lɛ mli kɛ lala ni Debora kɛ Barak fo yɛ yitso 5 lɛ mliyɛ yitso 5 lɛ mli lɛ mli. Amaniɛbɔi enyɔ lɛ fɛɛ hãa anuɔ nɔ ni tee nɔ lɛ shishi jogbaŋŋ, saji ni ashi yɛ yitso 4 lɛ mli lɛ je kpo , ni saji ni ashi yɛ yitso 5 lɛ mli hu je kpo yɛ yitso 4 lɛ mli.

Ekrokromɛi Hu Nɛ

“Eji Mɛi ni Taoɔ Esɛɛgbɛ lɛ Anyɔmɔwolɔ”

Mɛɛ hemɔkɛyeli nɛkɛ saa Yehowa hiɛ? Mɛɛ gbɛ nɔ etsɔɔ ejuroɔ mɛi ni kɛ anɔkwayeli jáa lɛ lɛ?