Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  July 2015

 SANEYITSO LƐ MLITSƆƆMƆ | BƆ NI OOOFEE OKPEE YEYEEYEFEEMƆ NAA

Yeyeeyefeemɔ yɛ Weku He

Yeyeeyefeemɔ yɛ Weku He

Janet wie akɛ: “Be ni mitsɛ gbo sɛɛ etsɛɛɛ lɛ, miwu kɛɛ mi akɛ eyaná jɔle. No sɛɛ etsɛɛɛ lɛ, ekɛɛɛ wɔ nɔ ko dɔŋŋ, kɛkɛ ni eto enibii fɛɛ, ni eshi mi kɛ wɔbii enyɔ lɛ.” Janet ná nitsumɔ, shi nyɔmɔwoo lɛ faaa bɔ ni ebaanyɛ ekɛkwɛ shĩa lɛ. Ni jeee shika he naagba pɛ ekɛkpe. Ewie akɛ: “Sɔ̃i ni ebalɛ akɛ mikome pɛ matsu he nii lɛ hã mihao ni mifee yeyeeye. Minuɔ he akɛ minyɛɛɛ makwɛ mibii lɛ tamɔ fɔlɔi krokomɛi feɔ lɛ, ni enɛ gbaa minaa waa. Kɛbashi amrɔ nɛɛ po lɛ, kɛ́ misusu nɔ ni ekolɛ mɛi baawie yɛ mi kɛ mibii lɛ ahe lɛ, ehãa mihaoɔ. Ani amɛsusuɔ akɛ ekolɛ mifeee nɔ ni esa akɛ mafee kɛbaa migbala lɛ yi?”

Janet

Sɔlemɔ ye ebua Janet ni enyɛ eye ehenumɔi lɛ anɔ, ni ebaa wekukpãa ni kã ekɛ Nyɔŋmɔ teŋ lɛ yi. Ewie akɛ: “Be ni mifeɔ yeyeeye waa ji gbɛkɛ be ni jeŋ ejɔ, ejaakɛ nakai beiaŋ lɛ, mijwɛŋmɔ kpaa shi waa. Sɔlemɔ kɛ Biblia lɛ kanemɔ ji nɔ ni yeɔ ebuaa mi ni minyɛɔ miwɔɔ. Ŋmalɛ ni misumɔɔ waa ji Filipibii 4:6, 7 lɛ, ni jɛmɛ kɛɔ akɛ: ‘Nyɛkafea yeyeeye yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ní akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ; ni Nyɔŋmɔ toiŋjɔlɛ ni fe niiashishinumɔi fɛɛ lɛ baabu nyɛtsuii kɛ nyɛjwɛŋmɔi ahe.’ Misɔle gbɛkɛgbɛkɛ shii abɔ, ni minu he akɛ Yehowa toiŋjɔlɛ lɛ eshɛje mimii.”

Miishɛjemɔ wiemɔi ni kɔɔ sɔlemɔ he ni Yesu kɛtsu nii yɛ e-Gɔŋ nɔ Shiɛmɔ lɛ mli lɛ kɔɔ shihilɛi fɛɛ ni hãa wɔfeɔ yeyeeye lɛ he. Ewie akɛ: “Nyɛ-Tsɛ lɛ le nibii ni he hiaa nyɛ dani nyɛbiɔ lɛ po.” (Mateo 6:8) Ni ehe miihia ni wɔ bi lɛ. Sɔlemɔ ji gbɛ titri ni wɔbaanyɛ wɔtsɔ nɔ ‘wɔtsi wɔbɛŋkɛ Nyɔŋmɔ.’ Kɛ́ wɔfee nakai lɛ, mɛni jɛɔ mli kɛbaa? Ŋmalɛ lɛ kɛɔ akɛ: “Ebaatsi ebɛŋkɛ nyɛ.”Yakobo 4:8.

Hɛɛ, kɛ́ wɔtsĩ nibii ni hãa wɔfeɔ yeyeeye lɛ atã yɛ sɔlemɔ mli lɛ, wɔhe jɔɔ wɔ; shi jeee no pɛ kɛkɛ. Yehowa, ni ji ‘sɔlemɔ Toibolɔ’ lɛ yeɔ ebuaa mɛi fɛɛ ni kɛ hemɔkɛyeli taoɔ esɛɛgbɛ lɛ. (Lala 65:3) Enɛ hewɔ ni Yesu tsɔɔ esɛɛnyiɛlɔi lɛ ni “amɛsɔle daa ni amɛkaŋmɛɛ  nibii ahe” lɛ. (Luka 18:1) Esa akɛ wɔya nɔ wɔsɔle ni Nyɔŋmɔ atsɔɔ wɔ gbɛ ní eye ebua wɔ, ni wɔná nɔmimaa akɛ hemɔkɛyeli ni wɔyɔɔ yɛ emli lɛ efeŋ efolo kɔkɔɔkɔ. Esaaa akɛ wɔyiŋ feɔ wɔ kɔshikɔshi kɔkɔɔkɔ akɛ eeesumɔ ni eye ebua wɔ, ni ebaafee nakai hu. Kɛ́ ‘wɔsɔleɔ daa ni wɔfɔ̃ɔɔ’ yɛ nɛkɛ gbɛ nɔ lɛ, etsɔɔ akɛ wɔyɛ anɔkwa hemɔkɛyeli.1 Tesalonikabii 5:17.

NƆ NI HEMƆKƐYELI NI AAANÁ LƐ TSƆƆ DIƐŊTSƐ

Shi mɛni tuuntu ji hemɔkɛyeli? Hemɔkɛyeli tsɔɔ ‘le ni abaale’ Nyɔŋmɔ akɛ mɔ ko ni yɔɔ diɛŋtsɛ. (Yohane 17:3) Wɔfeɔ nakai klɛŋklɛŋ kwraa lɛ, kɛtsɔ Nyɔŋmɔ susumɔi ni yɔɔ Biblia lɛ mli ni wɔkaseɔ lɛ nɔ. Wɔkaseɔ akɛ enaa wɔteŋ mɔ fɛɛ mɔ, ni akɛ, eesumɔ ni eye ebua wɔ. Kɛ̃lɛ, anɔkwa hemɔkɛyeli biɔ babaoo fe le ni wɔɔle nɔ ko yɛ Nyɔŋmɔ he kɛkɛ. Etsɔɔ hu akɛ esa akɛ wɔhã wekukpaa ni bulɛ yɔɔ mli ahi wɔ kɛ lɛ teŋ. Taakɛ eji yɛ naanyobɔɔ ni yaa nɔ yɛ adesai ateŋ lɛ, wekukpaa nɛɛ nyɛŋ aba yɛ gbi kome pɛ mli. Be ni be shwieɔ mli ni wɔkaseɔ ehe nii babaoo lɛ, wɔhemɔkɛyeli lɛ “yaa nɔ edaa,” ni wɔfeɔ “nɔ ni sa ehiɛ” be ni wɔnaa akɛ eeye eebua wɔ lɛ. (2 Korintobii 10:15; Yohane 8:29) Hemɔkɛyeli ni tamɔ nɛkɛ lɛ ji nɔ ni ye ebua Janet ni enyɛ ekpee yeyeeyefeemɔ naa.

Janet kɛɛ akɛ: “Yɛ anɔkwale mli lɛ, na ni mina akɛ Yehowa nine yɛ nɔ fɛɛ nɔ ni mifeɔ lɛ mli lɛ ji nɔ ni hã mihemɔkɛyeli lɛ mli wa waa lɛ. Bei pii lɛ, ayeɔ wɔ sane fɔŋ, ni efeɔ tamɔ nɔ ni wɔnyɛŋ he nɔ ko kwraa wɔfee. Shi sɔlemɔ ni wɔfɔɔ sɔlemɔ lɛ hãa Yehowa jeɔ gbɛ ehãa wɔ be fɛɛ be, ni efeɔ nakai yɛ gbɛ ni mijwɛŋmɔ shɛɛɛ he nɔ. Be fɛɛ be ni mada lɛ shi lɛ, mikaiɔ nibii abɔ ni efee ehã mi lɛ. Be fɛɛ be lɛ eyeɔ ebuaa wɔ, ni efeɔ nakai yɛ be ni sa mli. Kɛfata he lɛ, ehã miná nanemɛi kpakpai, ni ji anɔkwa Kristofoi hii kɛ yei. Amɛyeɔ amɛbuaa mi be fɛɛ be, ni amɛfeɔ nɔkwɛmɔnɔ kpakpa amɛhãa mibii lɛ.” *

Janet kɛɛ akɛ: “Mile nɔ hewɔ ni Yehowa kɛɛ yɛ Maleaki 2:16 lɛ akɛ: ‘Miinyɛ ŋashwiemɔ’ lɛ. Hefatalɔ ni efeko nɔ ko lɛ ji mɔ ni nuɔ he waa akɛ ayeko lɛ anɔkwa. Kɛjɛ be ni miwu shi nɛɛ, afii komɛi eho, shi bei komɛi lɛ minuɔ shoofeemɔ he waa, ni minuɔ he akɛ mihe bɛ sɛɛnamɔ ko. Kɛ́ minu he nakai lɛ, mibɔɔ mɔdɛŋ akɛ mafee nɔ ko kɛye mabua mɔ ko, ni no ji nɔ ni yeɔ ebuaa mi be fɛɛ be.” Akɛni Janet kɛ Biblia mli shishitoo mla ni tsɔɔ akɛ, esaaa akɛ etseɔ ehe lɛ tsuɔ nii hewɔ lɛ, enyɛɔ ebaa eyeyeeyefeemɔ lɛ shi. *Abɛi 18:1.

Nyɔŋmɔ ji “awusãi atsɛ kɛ okulafoi ahebulɔ.”Lala 68:5, Ga Biblia hee

Janet kɛɛ akɛ: “Le ni mile akɛ Nyɔŋmɔ ji ‘awusãi atsɛ kɛ okulafoi ahebulɔ’ lɛ ji nɔ ni shɛjeɔ mimii fe fɛɛ. Ekwaŋ wɔ kɔkɔɔkɔ, taakɛ miwu fee lɛ.” (Lala 68:5, Ga Biblia hee) Janet le akɛ Nyɔŋmɔ kɛ “nibii fɔji” ekaaa wɔ. Moŋ lɛ, ekɛ hiɛshikamɔ ‘hãa mɛi fɛɛ faa,’ ni ehãa wɔ “hewalɛ ni fa kɛteke nɔ” koni wɔnyɛ wɔkɛkpee wɔyeyeeyefeemɔi lɛ anaa.Yakobo 1:5, 13; 2 Korintobii 4:7.

Shi kɛ́ wɔwala eyaje oshara mli ni ehã wɔfee yeyeeye hu?

^ kk. 10 Kɛ́ ootao ona gbɛi krokomɛi ni sa ni obaanyɛ otsɔ nɔ oye yeyeeyefeemɔ nɔ lɛ, kwɛmɔ saji ni je kpo yɛ July 2015 Awake! lɛ mli ni yitso ji, “Are You in Control of Your Life?” lɛ, eko yɛ www.jw.org lɛ nɔ.