Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  July 2015

Ani Ole?

Ani Ole?

Te akɛ wiɛtɛ tsu nii yɛ blema ahã tɛŋŋ?

Akɛ wiɛtɛ wiɛɔ abele, kɛ ehenɔi koni akɛsha akpaanɔɔ loo bodobodo. Yɛ shĩai pii amli lɛ, eji nɔ ko ni yei loo tsuji kɛtsuɔ nii daa gbi. Yɛ blema lɛ, anuɔ wiɛtɛ gbɛɛmɔ yɛ shĩai amli be fɛɛ be.2 Mose 11:5; Yeremia 25:10.

Blema Ejipt nibii ni atɛŋ kɛ nibii ni ashɔ̃shɔ̃i lɛ hãa wɔnaa bɔ ni akɛtsuɔ nii. Akɛ nɔ ni abaawiɛ lɛ shwieɔ tɛ ni mli ewo bu fioo nɔ; no ji nɔ ni atsɛɔ lɛ wiɛtɛ lɛ. Niwiɛlɔ lɛ kotoɔ wiɛtɛ lɛ hiɛ, ni ekɛ eniji enyɔ lɛ fɛɛ mɔɔ wiɛbi lɛ mli, ni ekɛnyiɛ nɔ ni ewiɛɔ lɛ nɔ kɛyaa kɛbaa yɛ wiɛtɛ lɛ nɔ. Amaniɛbɔɔ ko tsɔɔ mli akɛ, bei pii lɛ, wiɛbi lɛ tsiimɔ shɛɔ kilogram 2 kɛmiimɔ 4. Kɛ́ akɛtswa mɔ ko lɛ, mɔ lɛ baanyɛ agbo.Kojolɔi 9:50-54.

Abele kɛ ehenɔi lɛ awiɛmɔ ji nɔ ko ni he hiaa waa kɛhã wekui yɛ blema aahu akɛ, Biblia mli mla ko gu wiɛ kɛ wiɛbi fɛɛ ni aheɔ akɛ awaba lɛ. Biblia lɛ kɛɔ yɛ 5 Mose 24:6 lɛ akɛ: “Mɔ ko akahe wiɛ kɛ wiɛbi fɛɛ awaba; ejaakɛ kɛ́ efee nakai lɛ, gbɔmɔ wala awaba eheɔ lɛ.”

Mɛni wiemɔ “miinaagbɛ” lɛ tsɔɔ?

Biblia lɛ kɛɔ akɛ, Yesu “kã Tsɛ lɛ miinaagbɛ.” (Yohane 1:18, shishigbɛ niŋmaa) Wiemɔ nɛɛ tsɔɔ akɛ wekukpãa ni yɔɔ gbagbalii kã Yesu kɛ Nyɔŋmɔ teŋ, ni etsɔɔ bɔ ni Nyɔŋmɔ eduro lɛ babaoo hu. Wiemɔ nɛɛ hu tsɔɔ bɔ ni Yudafoi lɛ fɔɔ shitaramɔ yɛ okpɔlɔŋmɛɛ shishi.

Yɛ Yesu beiaŋ lɛ, Yudafoi lɛ kãmɔɔ sai ni aŋmɛ kɛbɔle nɔ ni atoɔ niyenii lɛ amaa nɔ lɛ he lɛ anɔ. Mɛi ni yeɔ nii lɛ kɛ amɛbɛku tsɔleɔ sune, ni amɛyitso yeɔ he gbɛ ni ato niyenii lɛ yɛ lɛ. Bɔ ni amɛkãmɔɔ shi lɛ hãa amɛninejurɔ kamɔɔ shi efolo. Amaniɛbɔɔ ko tsɔɔ mli akɛ, akɛni mɛi ni yeɔ nii lɛ fɛɛ kãmɔɔ shi koŋkoŋ yɛ amɛbɛku nɔ ní mɔ ko kã mɔ kroko masɛi hewɔ lɛ, “mɔ ko yitso bɛŋkɛɔ mɔ kroko lɛ tsitsi, ni no hewɔ awieɔ akɛ ‘mɔ ko kã mɔ ko miinaagbɛ lɛ.’”

Kɛ́ mɔ ko kã wekuyitso ko loo mɔ ko ni eŋmɛ okpɔlɔ miinaa lɛ, abuɔ mɔ lɛ akɛ awo ehiɛ nyam loo ená hegbɛ krɛdɛɛ ko. No hewɔ lɛ, yɛ naagbee Hehoo ni Yesu kɛ ekaselɔi lɛ ye lɛ shishi lɛ, bɔfo Yohane, ni ji “kaselɔ ni Yesu sumɔɔ lɛ lɛ,” ji mɔ ni kã Yesu miinaa. Enɛ hewɔ lɛ, Yohane nyɛ “ekpasa Yesu tsitsi” ni ebi Yesu sane.Yohane 13:23-25; 21:20.