Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JUNE 2015

 WALA SHIHILƐ HE SANE

Gboshinii ko ni Ehi Shi Kɛyashi Yinɔ ni ji Kpawo Nɔ

Gboshinii ko ni Ehi Shi Kɛyashi Yinɔ ni ji Kpawo Nɔ

Mɛi wieɔ akɛ mi nɔ fɛɛ nɔ tamɔ mitsɛ. Migbɔmɔtso, mihiŋmɛi, kɛ bɔ ni mihe yɔɔ ŋmɔlɔ fɛɛ tamɔ lɛ. Shi eshi nɔ kroko hu—weku gboshinii ko ni yinɔi kpawo ená he sɛɛ. Hã magba bo.

Mi kɛ Ataa miikase wɔweku lɛ yinɔsane he nii

Yɛ January 20, afi 1815 lɛ, afɔ miblematsɛ Thomas1 * Williams yɛ Horncastle yɛ England. Afii enyɔ sɛɛ lɛ emami gbo, no hewɔ lɛ epapa ni atsɛɔ lɛ John Williams lɛ ji mɔ ni kwɛ lɛ kɛ enyɛmimɛi etɛ lɛ. John tsɔɔ Thomas kapintɛ nitsumɔ, shi Thomas hu miisumɔ ni ekase nɔ kroko.

Nakai beiaŋ lɛ mɛi babaoo bɔi sɔlemɔyaa yɛ England. No mli lɛ,shiɛlɔ John Wesley etse ehe kɛje Church of England lɛ he ni eyato jamɔ kuu kroko ni atsɛɔ lɛ Society of Methodists lɛ shishi, ni amɛwoɔ mɛi hewalɛ ni amɛkase Biblia lɛ akɛ aŋkroaŋkro, ni amɛyatsɔɔ mɛi Nyɔŋmɔ he sane. Wesley tsɔɔmɔi lɛ gbɛ shwa oookɛɛ la ni miisha koo, ni Williams weku lɛ mɔ etsɔɔmɔi lɛ amli kpɛŋŋ. Thomas batsɔ shiɛlɔ yɛ Wesley sɔlemɔ lɛ mli, ni ejɛ esuɔmɔ mli ekɛ ehe hã akɛ ebaaya eyashiɛ yɛ maŋ sɛɛ yɛ South Pacific. Yɛ July afi 1840 lɛ, ekɛ eŋa Mary,2 ni ekpee lɛ ehee lɛ tee Lakeba Island, * yɛ Fiji, ni no mli lɛ mɛi ni yeɔ gbɔmɔloo ji mɛi ni yɔɔ jɛmɛ.

AMƐHI MƐI NI YEƆ GBƆMƆLOO ATEŊ

Yɛ klɛŋklɛŋ afii ni Thomas kɛ Mary kɛhi Fiji lɛ mli lɛ, amɛkɛ shihilɛi ni jaraa babaoo kpe. Amɛye bei babaoo yɛ he ko ni hiɛ gbeleko tsɔ yɛ, ni hulu tsoɔ gbaŋgbaŋ yɛ jɛmɛ. Amɛkɛ shihilɛi gbeyeigbeyei hu kpe—tai ni yaa nɔ yɛ wekui amli, yei okulafoi ni agbeɔ, kɛ gbɔmɔlooyeli—ni mɛi babaoo ni yɔɔ jɛmɛ lɛ booo sane toi. Hela mɔ Mary kɛ ekromɔ binuu John, ni shwɛ fioo ni kulɛ amɛgboi. Yɛ afi 1843 lɛ, Thomas ŋma akɛ: “Mitsui kumɔ yɛ mimli. . . . Mihao, ni mifee yeyeeye.” Shi fɛɛ sɛɛ lɛ, lɛ kɛ Mary fɛɛ damɔ shihilɛ lɛ naa, ejaakɛ hemɔkɛyeli ni amɛyɔɔ yɛ Yehowa Nyɔŋmɔ mli lɛ waje amɛ.

Shi akɛni Thomas ekase kapintɛ nitsumɔ hewɔ lɛ, ebafee klɛŋklɛŋ mɔ ni ma tsui ni yɔɔ Yuropa lɛ eko yɛ Fiji. Bɔ ni tsu lɛ yɔɔ fɛo sɔŋŋ hewɔ lɛ, egbalaa Fijibii ni yɔɔ maŋ lɛ mli lɛ ajwɛŋmɔ. Be ni eshwɛ fioo ni abaagbe tsu lɛ naa lɛ, Mary fɔ binuu ni ji enyɔ nɔ, ni awo lɛ Thomas Whitton3 Williams, ni lɛ ji miblematsɛ diɛŋtsɛ.

Yɛ afi 1843 lɛ, Thomas, onukpatsɛ lɛ ye ebua kɛtsɔɔ Yohane Sanekpakpa lɛ shishi kɛtee Fijian mli, ni enɛ ji nitsumɔ ko ni wa waa kɛhã lɛ. * Shi eji mɔ ko ni kaseɔ mɛi kɛ amɛkusumii ahe nii waa, ni enyɛɔ ekpáa nii ashi hu waa. Eŋmala nibii ni ekase yɛ Fijibii lɛ ahe lɛ ewo ewolo ni ji, Fiji  and the Fijians (1858) lɛ mli, ni eji Fijibii ni hi shi yɛ afi 1800 afii lɛ amli lɛ ayinɔsane he wolo ko ni nɔ bɛ.

Be ni Thomas kɛ afii 13 etswia shi yɛ Fiji lɛ, hela bamɔ lɛ, kɛkɛ ni ekɛ eweku lɛ fã kɛtee Australia. Be ni Thomas kɛ afii babaoo esɔmɔ akɛ osɔfo ni he esa waa lɛ, egbo yɛ Ballarat, yɛ Victoria, yɛ afi 1891.

“SHIKA TSURU” YƐ ANAIGBƐ

Yɛ afi 1883 lɛ, Thomas Whitton Williams kɛ eŋa Phoebe,4 kɛ amɛweku bibioo lɛ fã kɛyahi Perth, yɛ Western Australia. No mli lɛ amɛbi ni ji enyɔ nɔ ni atsɛɔ lɛ Arthur Bakewell 5 Williams, ni ji miblematsɛ ni tsa nɔ lɛ, eye afii nɛɛhu.

Be ni Arthur ye afii 22 lɛ, eyatsu nii yɛ Kalgoorlie, ni ji maŋ ko ni atsaa shika tsuru yɛ mli, ni kɛ Perth jekɛmɔ ji kilomitai 600 lɛ. Be ni eyɔɔ jɛmɛ lɛ, ekane wolo ko ni International Bible Students, taakɛ atsɛɔ Yehowa Odasefoi yɛ nakai beiaŋ, lɛ kala lɛ. Eshɛɔ Zion’s Watch Tower lɛ hu eko yɛ nakai beiaŋ. Akɛni Arthur nyã nibii ni ekane lɛ ahe waa hewɔ lɛ, ekɛ mɛi krokomɛi bɔi he sanegbaa, ni ebuaa mɛi anaa koni amɛkase Biblia lɛ. Nakai kuu fioo lɛ mli ajɛ ni ato Yehowa Odasefoi ni yɔɔ Western Australia ŋmɛnɛ lɛ shishi.

Arthur gba eweku lɛ hu nibii ni ekaseɔ lɛ he sane. Arthur tsɛ, Thomas Whitton fĩ bɔ ni Arthur kɛ Biblia Kaselɔi lɛ bɔɔ lɛ sɛɛ, shi no sɛɛ etsɛɛɛ lɛ, Thomas Whitton gbo. Enyɛ Phoebe, kɛ enyɛmimɛi yei, Violet kɛ Mary, hu batsɔmɔ Biblia Kaselɔi. Violet batsɔ be fɛɛ sɔɔlɔ, loo daa gbɛgbalɔ. Arthur wie akɛ, Violet ji “gbɛgbalɔ ni yɔɔ ekãa fe fɛɛ, ni he esa waa ni aná yɛ Western Australia.” Eeenyɛ efee akɛ Arthur miijie nii amli, shi anɔkwa, ekãa ni Violet kɛshiɛ lɛ ná Williams wekutɔkpãa ni tsa nɔ kɛba lɛ nɔ hewalɛ waa.

Sɛɛ mli lɛ, Arthur bote gbala mli, ni efã kɛyahi Donnybrook, ni ji maŋ ko ni aduɔ aduawai yɛ mli, yɛ Western Australia. Yɛ ekãa ni ekɛjaje Biblia mli gbalɛi ni kɔɔ afi 1914 * he lɛ hewɔ lɛ, abawo lɛ gbɛ́i yɛ jɛmɛ akɛ “Old Mad 1914!” Shi be ni Jeŋ Ta I fɛ lɛ, hefɛoyeli lɛ sɛɛ fo. Arthur shiɛ ehã mɛi ni baheɔ nii yɛ eshwapo ko ni yɔɔ jɛmɛ lɛ mli lɛ; ekɛ Biblia kasemɔ woji shwieɔ samfɛlɛ lɛ naa. Ekɛ okadi ko hu ma samfɛlɛ lɛ naa ni tsɔɔ akɛ, mɔ fɛɛ mɔ ni baanyɛ atsɔɔ akɛ Triniti tsɔɔmɔ lɛ ja lɛ, ebaahã lɛ pound 100; Triniti tsɔɔmɔ lɛ ji tsɔɔmɔ ko ni Arthur kɛ hiɛdɔɔ kpoo. Mɔ ko mɔ ko nyɛɛɛ abahe shika lɛ.

Kuu ko babɔi kpee yɛ Williams kɛ ebii lɛ ashĩa ni yɔɔ Donnybrook lɛ kɛhã Biblia mli nikasemɔ, ni afeɔ asafoŋ kpeei hu yɛ jɛmɛ. Sɛɛ mli lɛ, Arthur mã Maŋtsɛyeli Asa, loo kpeehe yɛ maŋ lɛ mli—efata klɛŋklɛŋ Maŋtsɛyeli Asai ni amamɔ yɛ Western Australia lɛ he. Be ni Arthur eye afii 70 kɛ sɛɛ po lɛ, ewoɔ kootu kɛ tai, kɛkɛ lɛ ewo ekpɔŋɔ ni atsɛɔ lɛ  Doll lɛ nɔ nii, kɛkɛ eyashiɛ kɛkpa Donnybrook kpokpaa lɛ nɔ fɛɛ.

Bɔ ni Arthur he jɔ ni eyɔɔ kpoo, kɛ ekãa ni ekɛshiɛ lɛ ná ebii lɛ anɔ hewalɛ waa. Ebi yoo Florence6 sɔmɔ akɛ maŋsɛɛ sɔɔlɔ yɛ India. Ebi hii Arthur Lindsay7 kɛ Thomas fɛɛ kɛ be kpalaŋŋ sɔmɔ akɛ asafoŋ onukpai tamɔ lɛ pɛpɛɛpɛ.

APPLE KO NI ATSƐƆ LƐ LADY WILLIAMS

Ale Arthur Lindsay Williams, ni ji minanakaŋsowa lɛ akɛ mɔ ko ni mli hi, ni mɛi sumɔɔ esane waa. Eyɛ mɛi ahe deka, ni ekɛ mɛi yeɔ yɛ bulɛ mli. Eji mɔ ko hu ni he esa waa kɛ tsogbamɔ, ni yɛ afii 12 mli lɛ eye klɛŋklɛŋ gbɛhe shii 18 sɔŋŋ yɛ tsogbamɔ akaŋshii mli.

Shi be ni Arthur binuu Ronald8 (minii) ni eye afii enyɔ lɛ kɛ lema yabã apple tso bibioo ko ni ma weku shĩa lɛ, edɔ lɛ waa. Ronald mami kɛ tako bala tso lɛ he, ni naagbee lɛ ewo apple ko ni ŋɔɔ waa. Abatsɛ apple nɛɛ akɛ Lady Williams apple, ni no mli ajɛ ni aná apple ko ni atsɛɔ lɛ Cripps Pink apple, ni ji apple he nɔ ko ni ale waa yɛ je lɛŋ fɛɛ lɛ.

Sɛɛ mli lɛ, Ronald, loo Gramp, taakɛ mitsɛɔ lɛ lɛ, fee nibii ni he baaba sɛɛnamɔ kɛhã mɛi krokomɛi. Lɛ kɛ minaa kɛ amɛhe hã kɛmamɔ tsui ni Odasefoi mamɔɔ lɛ eko yɛ Australia kɛ Solomon Islands. Amrɔ nɛɛ Gramp miihe ená afii 80, shi eesɔmɔ lolo akɛ asafoŋ onukpa, ni eyeɔ ebuaa kɛmamɔɔ Maŋtsɛyeli Asai yɛ hei ni etse amɛhe banee yɛ Western Australia.

MIHIƐ SƆ MIGBOSHINII LƐ

Mifɔlɔi, Geoffrey9 kɛ Janice10 Williams bɔ mɔdɛŋ amɛhiɛ gboshinii ni ashi ahã amɛ lɛ mli, ni amɛkɛ Biblia mli shishitoo mlai tsɔse mi12 kɛ minyɛmi yoo Katharine.11 Be ni miná afii 13 lɛ, mi diɛŋtsɛ mikɛ Yehowa fee naanyo. Yɛ Kristofoi akpee ko ni afee lɛ shishi lɛ, John E. Barr, ni fata Yehowa Odasefoi a-Gbɛtsɔɔmɔ Kuu lɛ he lɛ, wo oblahii kɛ oblayei ni yɔɔ toibolɔi lɛ ateŋ lɛ hewalɛ ni ekɛɛ: “Nyɛkafitea hegbɛ ni fe fɛɛ ni nyɛyɔɔ, ni ji hegbɛ ni nyɛná akɛ nyɛbaale Yehowa ni nyɛsumɔ lɛ lɛ.” Nakai gbɛkɛ lɛ, mijɔɔ miwala nɔ mihã Yehowa. Afii enyɔ sɛɛ lɛ, mikɛ mihe wo daa gbɛgbamɔ nitsumɔ lɛ mli.

Ŋmɛnɛ lɛ, mi kɛ miŋa Chloe fɛɛ miisɔmɔ kɛ miishɛɛ akɛ daa gbɛgbalɔi yɛ Tom Price, ni ji maŋ ko ni atsaa jwetrii yɛ mli ni yɔɔ Western Australia lɛ. Wɔkɛ be fã tsuɔ nii koni wɔnyɛ wɔkwɛ wɔhe. Mifɔlɔi kɛ minyɛmi yoo Katharine, kɛ ewu Andrew hu miisɔmɔ akɛ daa gbɛgbalɔi yɛ Port Hedland, ni yɔɔ kooyigbɛ aaafee kilomitai 420 lɛ. Mi kɛ Ataa miisɔmɔ hu akɛ asafoŋ onukpai yɛ wɔsafoi lɛ amli.

Miblematsɛ Thomas Williams kpɛ mli akɛ ebaasɔmɔ Yehowa Nyɔŋmɔ, ni mi ji yinɔi kpawo nɔ yɛ wɔweku lɛ mli. Miblematsɛmɛi lɛ ehiɛ nakai hemɔkɛyeli kɛ sɔɔmɔ lɛ mli aahu kɛbashɛ minɔ. Eŋɔɔ minaa waa akɛ minine shɛ Nyɔŋmɔjamɔ su ni tamɔ nɛkɛ nɔ akɛ gboshinii.

^ kk. 5 Yibɔ lɛ tsɔɔ mɛi ni yɔɔ mfoniri ni nyiɛ sɛɛ mli lɛ.

^ kk. 6 Be ko ni eho lɛ, atsɛɔ lɛ Lakemba Island, ni eyɛ Fiji bokagbɛ, he ko ni atsɛɔ jɛmɛ Lau Group.

^ kk. 10 Maŋsɛɛ sɔɔlɔ John Hunt ji mɔ ni tsɔɔ woji ni yɔɔ Kpaŋmɔ Hee lɛ mli lɛ ateŋ babaoo shishi kɛtee Fijian mli, ni akala yɛ 1847. Nakai shishitsɔɔmɔ lɛ sa kadimɔ waa ejaakɛ Nyɔŋmɔ gbɛ́i, “Jiova” lɛ je kpo yɛ mli yɛ Marko 12:36, Luka 20:42, kɛ Bɔfoi 2:34.

^ kk. 16 Kwɛmɔ saji krokomɛi ni fata he ni yitso ji “Afi 1914—Afi ko ni Sa Kadimɔ yɛ Biblia Gbalɛ Mli” ni yɔɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ mli lɛ, eko eyɛ www.jw.org /gaa.

Ekrokromɛi Hu Nɛ

Mɛɛ Gbɛ nɔ Wɔnáa Biblia mli Shishitoo Mlai Ahe Sɛɛ?

Yesu tsɔɔ nɔ hewɔ ni gbɛtsɔɔmɔ he hiaa wɔ kɛ Biblia mli shishitoo mlai enyɔ ni he hiaa titri.

Mɛni Biblia Akɔntaabuu Tsɔɔ yɛ Afi 1914 lɛ He?

Gbalɛ ni kɔɔ “bei kpawo” lɛ he yɛ Daniel yitso 4 lɛ maa nɔ mi akɛ adesai anɔyeli kɛ jaramɔ be ko baakpe.

Kasemɔ Amɛhemɔkɛyeli Lɛ

Kɛ́ wɔkase hii kɛ yei anɔkwafoi ni hi shi yɛ Biblia beaŋ lɛ ahemɔkɛyeli he nii lɛ te wɔbaafee tɛŋŋ wɔná he sɛɛ lɛ?