Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MAY 2015

 SANEYITSO LƐ MLITSƆƆMƆ | ANI NAAGBEE LƐ EBƐŊKƐ?

“Naagbee Lɛ”—Mɛni Etsɔɔ?

“Naagbee Lɛ”—Mɛni Etsɔɔ?

Kɛ́ onu wiemɔ ni ji, “Naagbee lɛ ebɛŋkɛ!” lɛ, mɛni baa ojwɛŋmɔ mli? Ani nɔ ni baa ojwɛŋmɔ mli ji, mɔ ko ni damɔ wiemɔ kpoku nɔ ní ehiɛ Biblia yɛ edɛŋ, ní ekɛ hiɛdɔɔ miishiɛ, ní ekɛ eniji miimamɔ saji anɔ mi? Aloo nɔ ni baa ojwɛŋmɔ mli ji, mɔ ko ni hiɛ Biblia yɛ edɛŋ ni edamɔ lɔle gbɛ toi ni eebolɔ kɛmiishiɛ naagbee lɛ? Susumɔi ni tamɔ nɛkɛ lɛ baanyɛ ahã mɛi komɛi atsui aye, ebaanyɛ ehã mɛi komɛi ahiɛ afee amɛ yaa, ni ebaanyɛ efee mɛi komɛi hu ŋmɔlɔ.

Biblia lɛ kɛɔ akɛ: “Naagbee lɛ baaba.” (Mateo 24:14) Atsɛɔ naagbee be lɛ hu akɛ, ‘Nyɔŋmɔ gbi wulu lɛ’ kɛ “Harmagedon.” (Kpojiemɔ 16:14, 16) Eji anɔkwale akɛ, jamɔi babaoo ehã mɛi ayiŋ efutu amɛ yɛ sane nɛɛ he, ni mɛi pii hu hiɛ susumɔi gbeyeigbeyei ni tsɔɔ akɛ hiɛnɔkamɔ ko bɛ. Shi Biblia lɛ etsɔɔ naagbee lɛ mli faŋŋ—etsɔɔ nɔ ni naagbee lɛ ji kɛ nɔ ni ejeee. Nyɔŋmɔ Wiemɔ lɛ hu yeɔ ebuaa wɔ ni wɔnaa faŋŋ akɛ, naagbee lɛ ebɛŋkɛ. Nɔ ni fe fɛɛ lɛ, etsɔɔ wɔ bɔ ni wɔɔfee wɔná yibaamɔ! Shi klɛŋklɛŋ lɛ, hã wɔjaje susumɔi komɛi ni ejaaa ni ahiɛ yɛ sane nɛɛ he, ní wɔkwɛ nɔ ni naagbee lɛ ji diɛŋtsɛ. Mɛni Biblia lɛ tsɔɔ akɛ “naagbee lɛ” ji diɛŋtsɛ?

 NƆ NI NAAGBEE LƐ JEEE

  1. NAAGBEE LƐ ETSƆƆƆ AKƐ AKƐ LA NI MIITSO GRIGRI BAAKPÃTÃ SHIKPƆŊ LƐ HIƐ.

    Biblia lɛ kɛɔ akɛ: “[Nyɔŋmɔ] oŋɔ shikpɔŋ lɛ oto eshishitoo nii lɛ anɔ, koni ekahoso gbi ko gbi ko.” (Lala 104:5) Ŋmalɛ nɛɛ kɛ ŋmalɛi krokomɛi maa nɔ mi kɛhãa wɔ akɛ, Nyɔŋmɔ fiteŋ shikpɔŋ lɛ, ni eŋmɛŋ gbɛ ni afite lɛ kɔkɔɔkɔ!Jajelɔ 1:4; Yesaia 45:18.

  2. NAAGBEE LƐ JEEE NƆ KO NI BAABA KƐKƐ NI ATOKO HE GBƐJIANƆ.

    Biblia lɛ tsɔɔ akɛ, ato be kɛhã naagbee lɛ—Nyɔŋmɔ eto be pɔtɛɛ ko ní lɛ baaba. Wɔkaneɔ akɛ: “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ tete loo Bi lɛ tete leee, ja Tsɛ lɛ. Nyɛyaa nɔ nyɛkwɛa, nyɛyaa nɔ nyɛshia kpe, ejaakɛ nyɛleee be ni ato lɛ.” (Marko 13:32, 33) Eyɛ faŋŋ akɛ, Nyɔŋmɔ (“Tsɛ lɛ”) yɛ “be” pɔtɛɛ ko ni ‘eto’ ní ekɛ naagbee lɛ baaba.

  3. JEEE ADESAI LOO TƐI KOMƐI NI ETSERƐ KƐJƐ ŊWƐINIIAŊ JI NƆ NI KƐ NAAGBEE LƐ BAABA.

    Mɛni kɛ naagbee lɛ baaba? Kpojiemɔ 19:11 lɛ kɛɔ akɛ: “Mina ni agbele ŋwɛi naa, ni naa! okpɔŋɔ yɛŋ ko. Ni mɔ ni ta nɔ lɛ, atsɛɔ lɛ Anɔkwayelɔ kɛ Anɔkwafo.” Kuku 19 lɛ kɛfataa he akɛ: “Ni mina kooloo awuiyelɔ lɛ kɛ shikpɔŋ lɛ nɔ maŋtsɛmɛi lɛ kɛ amɛtai lɛ ní abua amɛnaa ní amɛkɛ mɔ ni ta okpɔŋɔ lɛ nɔ lɛ kɛ eta lɛ yaawu.” (Kpojiemɔ 19:11-21) Eyɛ mli akɛ nibii ni awie he yɛ biɛ lɛ babaoo ji okadifeemɔŋ nibii moŋ, shi wɔbaanyɛ wɔkɔ nɔ ni ŋmalɛ nɛɛ tsɔɔ lɛ sɛɛ: Nyɔŋmɔ baatsu ŋwɛibɔfoi ata ko koni amɛyakpãtã ehenyɛlɔi lɛ ahiɛ.

Nɔ ni Biblia lɛ wieɔ yɛ naagbee lɛ he lɛ ji sane kpakpa, jeee sane gbonyo

NƆ NI NAAGBEE LƐ JI

  1. ADESAI ANƆYELII ANAAGBEE.

    Biblia lɛ tsɔɔ mli akɛ: “Nyɔŋmɔ ní yɔɔ ŋwɛi lɛ aaatee maŋtsɛyeli [nɔyeli] ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ  ahãŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpãtã amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” (Daniel 2:44) Taakɛ wɔwie kɛtsɔ hiɛ yɛ oti 3 lɛ mli lɛ, abaakpãtã “shikpɔŋ lɛ nɔ maŋtsɛmɛi lɛ kɛ amɛtai lɛ” ní baabua “amɛnaa ní amɛkɛ mɔ ni ta okpɔŋɔ lɛ nɔ lɛ kɛ eta lɛ” ayawu lɛ ahiɛ.Kpojiemɔ 19:19.

  2. TAI, YIWALƐ NIFEEMƆI, KƐ JALƐ SANE NI AYEEE NAAGBEE.

    “[Nyɔŋmɔ hãa] tai asɛɛ foɔ kɛyaa shikpɔŋ lɛ naagbeehei lɛ.” (Lala 46:10) “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.” (Abɛi 2:21, 22) “Naa! Miifee nibii fɛɛ ehee.”Kpojiemɔ 21:4, 5.

  3. JAMƆI NI YEEE NYƆŊMƆ KƐ ADESAI ANƆKWA LƐ ANAAGBEE.

    “Gbalɔi lɛ gbaa amale gbalɛi, ni nɔ ni amɛkɛɔ osɔfoi lɛ no osɔfoi lɛ feɔ. . . . Shi kɛji naagbee be lɛ shɛ lɛ, te nyɛbaafee tɛŋŋ?” (Yeremia 5:31, Ga Biblia hee) “Mɛi babaoo baakɛɛ mi yɛ nakai gbi lɛ nɔ akɛ: ‘Nuŋtsɔ, Nuŋtsɔ, ani jeee bo ogbɛ́i lɛ mli wɔgba yɛ, ni ogbɛ́i lɛ mli wɔfãmɔ daimonioi yɛ, ni ogbɛ́i lɛ mli wɔtsu hewalɛ nitsumɔi babaoo yɛ?’ Ni no lɛ makɛɛ amɛ akɛ: ‘Mileee nyɛ! Nyɛjea minɔ nyɛyaa, nyɛ mɛi ni nyɛtsuɔ mlatɔmɔ nitsumɔi!’”Mateo 7:21-23.

  4. MƐI NI FIƆ JEŊ GBƐJIANƆTOO NI YƆƆ AMRƆ NƐƐ SƐƐ, NÍ AMƐHÃA SHIHILƐ LƐ MLI WOƆ WU LƐ ANAAGBEE.

    Yesu Kristo wie akɛ: “Agbɛnɛ, enɛ ji nɔdaamɔnɔ kɛhã kojomɔ: akɛ la lɛ eba je lɛ mli, shi gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ, efɔji ni.” (Yohane 3:19) Biblia lɛ wieɔ hiɛkpatamɔ ko ni ba je lɛ fɛɛ nɔ yɛ blema, yɛ nuu anɔkwafo Noa gbii lɛ amli lɛ he. “Akɛ nu afua kpãtã je ni yɔɔ nakai beiaŋ lɛ hiɛ. Shi ŋwɛi kɛ shikpɔŋ ni yɔɔ amrɔ nɛɛ, nakai wiemɔ lɛ nɔŋŋ nɔ atsɔ akɛ amɛ to hã la, ni akɛ amɛ eto kɛyashi kojomɔ kɛ mɛi ni ebuuu Nyɔŋmɔ lɛ ahiɛkpatamɔ gbi lɛ nɔ.”2 Petro 3:5-7.

Kadimɔ akɛ, akɛ ‘kojomɔ kɛ hiɛkpatamɔ gbi’ ni kã wɔhiɛ lɛ to “je” ni akpãtã hiɛ yɛ Noa gbii lɛ amli lɛ he. Mɛɛ je hiɛ akpãtã lɛ? Akpãtãaa shikpɔŋ lɛ ni wɔyɔɔ nɔ lɛ hiɛ; shi moŋ “mɛi ni ebuuu Nyɔŋmɔ lɛ”—ni ji Nyɔŋmɔ henyɛlɔi lɛ—‘ahiɛ akpãtã’ lɛ. Nakai nɔŋŋ hu yɛ Nyɔŋmɔ ‘kojomɔ gbi’ ni kã wɔhiɛ lɛ mli lɛ, abaakpãtã mɛi ni jeɔ gbɛ amɛfeɔ amɛhe Nyɔŋmɔ henyɛlɔi lɛ ahiɛ. Shi abaabaa Nyɔŋmɔ nanemɛi lɛ ayi, taakɛ abaa Noa kɛ eweku lɛ yi lɛ.Mateo 24:37-42.

Kwɛ bɔ ni shikpɔŋ lɛ nɔ shihilɛ baaŋɔɔ ahã, be ni Nyɔŋmɔ ejie nibii kɛ mɛi fɛɛ ni hãa efɔŋfeemɔ yaa nɔ lɛ kɛtee lɛ! Eyɛ faŋŋ akɛ, nɔ ni Biblia lɛ wieɔ yɛ naagbee lɛ he lɛ ji sane kpakpa, jeee sane gbonyo. Fɛɛ sɛɛ lɛ, ekolɛ obaabi akɛ: ‘Ani Biblia lɛ tsɔɔ wɔ be ni naagbee lɛ baaba? Ani naagbee lɛ ebɛŋkɛ? Te mafee tɛŋŋ maná yibaamɔ lɛ?’