Megan: Hɛloo Shirley. Eŋɔɔ minaa waa akɛ nyɛsɛɛ otsi lɛ oba Yesu Kristo gbele lɛ Kaimɔ lɛ. * Te ona nifeemɔ lɛ tɛŋŋ?

Shirley: Ni miba lɛ, miná miishɛɛ, shi yɛ anɔkwale mli lɛ, minuuu nibii ni awie lɛ ekomɛi ashishi. Mile akɛ mɛi babaoo buɔ Yesu fɔmɔgbi ni ayeɔ yɛ Blonya beaŋ lɛ akɛ ehe miihia kwraa fe egbele lɛ kaimɔ lɛ. Ofainɛ, ani obaanyɛ ogbala nɔ hewɔ ni ehe miihia ni akai Yesu gbele lɛ mli ekoŋŋ ohã mi?

Megan: Lɛɛlɛŋ, mɛi babaoo yeɔ Blonya. Shi Yehowa Odasefoi nuɔ he akɛ ehe miihia ni akai Yesu gbele lɛ. Kɛ́ oyɛ be fioo lɛ, masumɔ ni matsɔɔ bo nɔ hewɔ.

Shirley: Ofainɛ miyɛ be fioo.

Megan: Ojogbaŋŋ, Yehowa Odasefoi kaiɔ Yesu gbele lɛ, ejaakɛ efã esɛɛnyiɛlɔi lɛ ni amɛfee nakai. Susumɔ nɔ ni ba yɛ gbi gbɛkɛ ni enɔ jetsɛremɔ lɛ Yesu gbo lɛ he okwɛ. Ani okaiɔ akɛ ekɛ esɛɛnyiɛlɔi anɔkwafoi lɛ ye niyenii krɛdɛɛ ko?

Shirley: Ootsɔɔ Naagbee Gbɛkɛ Niyenii lɛ?

Megan: Nakai pɛpɛɛpɛ. Atsɛɔ lɛ hu akɛ, Nuŋtsɔ lɛ Gbɛkɛ Niyeli. Be ni amɛyeɔ nii lɛ nakai gbɛkɛ lɛ, Yesu kɛ famɔi ni yɔɔ faŋŋ hã amɛ. Ofainɛ obaasumɔ ni okane nɔ ni ekɛɛ amɛ ni aŋma yɛ Luka 22:19 lɛ?

Shirley: OK. “Agbɛnɛ hu, ekɔ aboloo, eda shi, ekumɔ mli, ni ekɛhã amɛ ekɛɛ: ‘Enɛ damɔ shi kɛhã migbɔmɔtso, ni abaaŋɔ ahã yɛ nyɛhewɔ lɛ. Nyɛyaa nɔ nyɛfea enɛ kɛkaia mi.’”

Megan: Oyiwaladɔŋŋ. Kadimɔ nɔ ni Yesu kɛɛ amɛfee lɛ yɛ kuku lɛ naagbee; ekɛɛ amɛ akɛ: “Nyɛyaa nɔ nyɛfea enɛ kɛkaia mi.” Ni be ni Yesu kɛɔ ekaselɔi lɛ akɛ amɛkai lɛ lɛ, etsɔɔ amɛ nɔ tuuntu ni esa akɛ amɛkai yɛ ehe. Ewie akɛ ekɛ ewala baahã yɛ esɛɛnyiɛlɔi lɛ ahewɔ. Yesu wie nɔ ko ni tamɔ nakai nɔŋŋ taakɛ aŋma yɛ Mateo 20:28 lɛ. Jɛmɛ kɛɔ akɛ: “Gbɔmɔ Bi lɛ baaa koni asɔmɔ lɛ, shi eba sɔɔmɔ moŋ, koni ebaŋɔ ewala ehã akɛ kpɔmɔnɔ kɛkpɔ̃ mɛi babaoo lɛ.” Yɛ kukufoo mli lɛ, no hewɔ ni Yehowa Odasefoi buaa amɛhe naa daa afi kɛyeɔ Yesu gbele lɛ he gbi jurɔ lɛ—koni amɛkɛkai Yesu wala ni ekɛhã akɛ kpɔmɔnɔ lɛ. Adesai fɛɛ ni boɔ lɛ toi lɛ baanyɛ aná naanɔ wala kɛtsɔ egbele lɛ nɔ.

Shirley: Minuɔ ni mɛi wieɔ akɛ Yesu gbo koni wɔná wala. Shi yɛ anɔkwale mli lɛ, minuuu nakai sane lɛ shishi jogbaŋŋ.

Megan: Shirley, jeee bo pɛ onuuu shishi. Yesu kpɔ̃mɔ afɔleshaa lɛ ji sane ko ni shishinumɔ bɛ mlɛo. Shi eji anɔkwalei ni yɔɔ Nyɔŋmɔ Wiemɔ  lɛ mli ni yɔɔ miishɛɛ waa lɛ ateŋ ekome. Shi te tɛŋŋ, oyɛ be lolo?

Shirley: Hɛɛ, miyɛ minitii fioo.

Megan: Ojogbaŋŋ. Mikane kpɔmɔnɔ lɛ he saji komɛi etsɛko, ni mabɔ mɔdɛŋ magbala mli mahã bo yɛ gbɛ ni waaa nɔ.

Shirley: OK.

Megan: Bɔ ni afee ni wɔnu kpɔmɔnɔ lɛ shishi lɛ, klɛŋklɛŋ lɛ, ehe miihia ni wɔnu nɔ ni jɛ esha ni Adam kɛ Hawa fee yɛ Eden trom lɛ mli kɛba lɛ shishi. Kɛhã enɛ mligbalamɔ lɛ, ofainɛ hã wɔkane Romabii 6:23 lɛ. Ofainɛ obaasumɔ ni okane?

Shirley: Hɛɛ. Ekaneɔ akɛ: “Esha dɛŋ nyɔmɔwoo ji gbele, shi nɔkeenɔ ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.”

Megan: Oyiwaladɔŋŋ. Hã wɔsusu ŋmalɛ nɛɛ he fioo. Klɛŋklɛŋ lɛ, kwɛmɔ bɔ ni aje kuku lɛ shishi lɛ, ekɛɛ: “Esha dɛŋ nyɔmɔwoo ji gbele.” Enɛ ji mla ni Nyɔŋmɔ wo be ni ebɔ klɛŋklɛŋ adesai lɛ nɔŋŋ—esha dɛŋ nyɔmɔwoo ji gbele. Be ni abɔ gbɔmɔ klɛŋklɛŋ kwraa lɛ, no mli eshafeelɔ ko bɛ. Abɔ Adam kɛ Hawa akɛ mɛi ni eye emuu, ni kulɛ bii ni amɛbaafɔ lɛ fɛɛ baaye emuu. No hewɔ lɛ, kulɛ nɔ ko kwraa bɛ ni baahã mɔ ko agbo. Kulɛ Adam kɛ Hawa kɛ amɛshwiei fɛɛ baahi shi yɛ miishɛɛ mli kɛya naanɔ. Shi taakɛ wɔle lɛ, nibii eyabaaa lɛ nakai, aloo?

Shirley: Hɛɛ. Adam kɛ Hawa ye tso ni agu amɛ yeli lɛ.

Megan: Obɔ mɔdɛŋ. Ni be ni amɛye lɛ—be ni Adam kɛ Hawa gbo Nyɔŋmɔ nɔ toi lɛ—amɛfee esha. Amɛkɛ nakai feemɔ tsɔɔ akɛ, amɛmiisumɔ ni amɛhi shi akɛ mɛi ni yeee emuu loo eshafeelɔi. Yiŋ ni Adam kɛ Hawa kpɛ lɛ baahã amɛ kɛ amɛshwiei fɛɛ ana amanehulu.

Shirley: Te otsɔɔ tɛŋŋ?

Megan: Ekolɛ manyɛ mikɛ nɔkwɛmɔnɔ ko atsɔɔ mli. Ani ole nishãa?

Shirley: Hɛɛ! Misumɔɔ nishãa waa.

Megan: Wɔŋɔ lɛ akɛ oyahe tsɛnsi hee ni okɛbaashã bodobodo. Onako okɛ tsɛnsi lɛ ashã nii, ni egbee shi ni ehe boda. Kɛ́ okwɛ lɛ, te bodobodoi fɛɛ ni obaashã yɛ tsɛnsi lɛ mli lɛ baafee tɛŋŋ? Onaaa akɛ fɛɛ he baaboda?

Shirley: Hɛɛ, fɛɛ he baaboda.

Megan: Yɛ gbɛ ni tamɔ nakai nɔŋŋ nɔ lɛ, be ni Adam kɛ Hawa gbo Nyɔŋmɔ nɔ toi lɛ, amɛhe “boda” loo amɛto kpa, akɛni amɛfee esha ni amɛyeee emuu dɔŋŋ lɛ hewɔ. Ni akɛni be ni amɛbatsɔmɔ eshafeelɔi lɛ amɛbɔiko fɔmɔ hewɔ lɛ, bii fɛɛ ni amɛbaafɔ lɛ hu baato kpa. Abaafɔ amɛ fɛɛ akɛ eshafeelɔi. Yɛ Biblia lɛ mli lɛ, akɛ wiemɔ ni ji “esha” lɛ tsuɔ nii kɛkɔɔ nɔ ko ni afee, kɛ shihilɛ mli ni afɔ wɔ awo lɛ he. No hewɔ lɛ, be ni Adam kɛ Hawa tɔ̃ lɛ, amɛkɛ amɛshwiei fɛɛ ni wɔ hu—be ni afɔko wɔ po lɛ—wɔfata he lɛ wo esha kɛ emuu ni ayeee ni naagbee lɛ nɔ ni jɛɔ mli baa ji gbele lɛ mli, eyɛ mli akɛ wɔfeko efɔŋ ko. Taakɛ wɔkane yɛ Romabii 6:23 lɛ, esha dɛŋ nyɔmɔwoo ji gbele.

Shirley: Misusuuu akɛ esa akɛ eba lɛ nakai. Mɛni hewɔ esa akɛ adesai fɛɛ apiŋ kɛya naanɔ yɛ esha ni Adam kɛ Hawa fee lɛ hewɔ?

Megan: Osane ja—kulɛ esaaa akɛ ebaa lɛ nakai. Shi sane lɛ yaa shɔŋŋ fe nakai. Akɛni Nyɔŋmɔ yeɔ jalɛ sane hewɔ lɛ, ekpɛ mli akɛ Adam kɛ Hawa agboi yɛ esha ni amɛfee lɛ hewɔ; shi wɔ akɛ amɛshwie lɛ, wɔyɛ hiɛnɔkamɔ. Nyɔŋmɔ to gbɛjianɔ ni baahã wɔje shihilɛ nɛɛ mli. Enɛ hewɔ ni Yesu kpɔmɔ afɔleshaa lɛ he hiaa lɛ. Kwɛmɔ nɔ ni aŋma yɛ Romabii 6:23 lɛ ekoŋŋ. Be ni awie akɛ “esha dɛŋ nyɔmɔwoo ji gbele” lɛ sɛɛ, kuku lɛ tsa nɔ akɛ: “Shi nɔkeenɔ ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.” No hewɔ lɛ, Yesu gbele lɛ hãa wɔnáa hegbɛ koni wɔnyɛ wɔye wɔhe kɛjɛ esha kɛ gbele he. *

Megan: Nɔ kroko hu yɛ ŋmalɛ nɛɛ mli ni he hiaa waa ni masumɔ ni wɔsusu he.

Shirley: Mɛni ji no?

Megan: Kadimɔ akɛ nakai kuku lɛ kɛɔ akɛ: “Nɔkeenɔ ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.” Shi kɛ́ Yesu ji mɔ ni piŋ ni egbo yɛ wɔ hewɔ lɛ, mɛni hewɔ mɔ ni awie akɛ kpɔmɔnɔ lɛ ji “nɔkeenɔ ni Nyɔŋmɔ kɛhãa,” shi jeee “nɔkeenɔ ni Yesu kɛhãa” lɛ? *

Shirley: Hmm. Mileee.

Megan: Nyɔŋmɔ ji mɔ ni bɔ Adam kɛ Hawa, ni lɛ ji mɔ ni amɛfee esha amɛshi be ni amɛgbo toi yɛ Eden trom lɛ mli lɛ. Ekã shi faŋŋ akɛ be ni eklɛŋklɛŋ bii enyɔ lɛ tse ehiɛ atua lɛ, edɔ lɛ waa. Shi amrɔ nɔŋŋ ni Yehowa tsɔɔ bɔ ni ebaatsu he nii ehã. * Eto eyiŋ akɛ ebaahã emumɔŋ bɔɔnii lɛ eko aba shikpɔŋ lɛ nɔ, ebahi shi akɛ gbɔmɔ ni eye emuu, koni yɛ naagbee lɛ, ekɛ ewala ahã akɛ kpɔmɔnɔ. No hewɔ lɛ, gbɛjianɔ ni ato kɛhã kpɔmɔnɔ lɛ ji nɔkeenɔ ni jɛ Nyɔŋmɔ ŋɔɔ. Nɔ kroko hu yɛ ni tsɔɔ akɛ kpɔmɔnɔ lɛ ji nɔkeenɔ ni jɛ Nyɔŋmɔ ŋɔɔ. Ani osusu bɔ ni Nyɔŋmɔ nu he ehã be ni agbe Yesu lɛ he pɛŋ?

Shirley: Dabi, misusuko he pɛŋ.

Megan: Mina gbekɛbii ashwɛmɔ nii komɛi yɛ shĩa lɛ hiɛ. Efeɔ mi akɛ oyɛ bii, aloo?

Shirley: Hɛɛ, miyɛ bii enyɔ—nuu kome kɛ yoo kome.

Megan: Akɛ́ fɔlɔ lɛ, bo lɛ susumɔ bɔ ni Yehowa Nyɔŋmɔ, ni ji Yesu ŋwɛi Tsɛ lɛ, baanu he ehã be ni agbe Yesu lɛ he okwɛ. Nɔ ni mitsɔɔ ji akɛ, te enu he ehã tɛŋŋ be ni amɔ esuɔmɔ Bi lɛ, aye ehe fɛo, ní amamɔ lɛ atswɛrɛ lɛ? Ni te Tsɛ lɛ nu he ehã tɛŋŋ be ni akala e-Bi lɛ akpɛtɛ tso he, ni ashi lɛ koni epiŋ ni egbo lɛ?

Shirley: Ebaagba enaa waa. Misusu ko he nɛkɛ pɛŋ!

Megan: Anɔkwa, wɔnyɛŋ wɔtsɔɔ bɔ tuuntu ni Nyɔŋmɔ nu he ehã nakai gbi lɛ. Shi wɔle akɛ eyɛ henumɔi, ni wɔle nɔ hewɔ hu ni ehã nibii nɛɛ fɛɛ ba. Agbala sane nɛɛ mli jogbaŋŋ ahã wɔ yɛ Yohane 3:16, ni ji ŋmalɛ ko ni ale waa lɛ. Ofainɛ obaasumɔ ni okane?

Shirley: Hɛɛ. Ekaneɔ akɛ: “Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.”

Megan: Oyiwaladɔŋŋ. Kwɛmɔ ŋmalɛ lɛ shishijee wiemɔi lɛ ekoŋŋ. Ekɛɛ: “Nyɔŋmɔ sumɔ je lɛ.” Suɔmɔ—no ji oti lɛ. Suɔmɔ tsirɛ Nyɔŋmɔ ni etsu e-Bi lɛ kɛba shikpɔŋ lɛ nɔ koni ebagbo ehã wɔ. Hɛɛ, kpɔmɔnɔ lɛ ji suɔmɔ ni fe fɛɛ ni ajie kpo atsɔɔ. Ni no hewɔ Yehowa Odasefoi buaa amɛhe naa daa afi kɛyeɔ Yesu gbele lɛ he gbi jurɔ lɛ. Miheɔ miyeɔ akɛ onu nibii ni wɔsusu he lɛ shishi?

Shirley: Hɛɛ, minu shishi. Oyiwaladɔŋŋ akɛ ogbala mli otsɔɔ mi.