Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MARCH 2015

 SANEYITSO LƐ MLITSƆƆMƆ | YESU KPƆ̃Ɔ WƆ—KƐJƐƆ MƐNI MLI?

Yesu Gbele kɛ Eshitee—Bɔ ni Ehe Yɔɔ Sɛɛnamɔ Kɛhã Bo

Yesu Gbele kɛ Eshitee—Bɔ ni Ehe Yɔɔ Sɛɛnamɔ Kɛhã Bo

“Hemɔ Nuŋtsɔ Yesu nɔ oye ni abaahere oyiwala.”Bɔfoi 16:31.

Bɔfo Paulo kɛ Sila wie wiemɔi ni akaiɔ waa nɛɛ etsɔɔ gboklɛfoi akwɛlɔ ko yɛ Makedonia maŋ ni ji Filipi lɛ mli. Mɛni nakai wiemɔi lɛ tsɔɔ? Bɔ ni afee ni wɔnyɛ wɔnu bɔ ni Yesu mli hemɔkɛyeli ni aaaná lɛ kɛ kpɔ̃mɔ kɛmiijɛ gbele mli lɛ yɔɔ tsakpaa lɛ shishi lɛ, esa akɛ klɛŋklɛŋ kwraa lɛ, wɔnu nɔ hewɔ ni wɔgboiɔ lɛ shishi. Hã wɔsusu nɔ ni Biblia lɛ tsɔɔ lɛ he.

Abɔɔɔ gbɔmɔ ni egbo

“Yehowa Nyɔŋmɔ ŋɔ gbɔmɔ lɛ ni ekɛ lɛ bato Eden trom lɛ mli, koni ehu mli ni ebu he. Ni Yehowa Nyɔŋmɔ wo gbɔmɔ lɛ kita ekɛɛ: Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!”1 Mose 2:15-17.

Nyɔŋmɔ kɛ klɛŋklɛŋ gbɔmɔ ni ji Adam lɛ wo Eden abɔɔ ni ji shikpɔŋ nɔ paradeiso ni kooloi kɛ tsei babaoo yɔɔ mli lɛ mli. Tsei ni woɔ aduawai babaoo ni Adam baanyɛ aye bɔ fɛɛ bɔ ni esumɔɔ yɛ mli. Shi, Yehowa Nyɔŋmɔ tsɔɔ Adam tso pɔtɛ̃ɛ ko ni esaaa akɛ eyeɔ enɔ yibii, ni ebɔ lɛ kɔkɔ akɛ ebaagbo kɛ́ egbo toi.

Ani Adam nu nakai kɔkɔbɔɔ lɛ shishi? Ele nɔ ni ji gbele ejaakɛ kooloi gboiɔ ni enaa. Kɛ́ abɔ Adam ni egbo lɛ, kulɛ kɔkɔbɔɔ ni Nyɔŋmɔ kɛhã lɛ lɛ ebafeŋ nɔ ni shishinumɔ yɔɔ he. No najiaŋ lɛ, Adam yɔse akɛ kɛ́ ebo Nyɔŋmɔ toi ni eyeee nakai tso lɛ nɔ yibii lɛ eko lɛ, ebaahi shi daa—egboŋ.

Mɛi komɛi heɔ yeɔ akɛ tso lɛ damɔ shi kɛhã bɔlɛnamɔ, shi enɛ jeee anɔkwale. Ejaakɛ Yehowa miisumɔ ni Adam kɛ eŋa Hawa ‘afɔ ni amɛyi afa ni amɛyi shikpɔŋ lɛ nɔ obɔ, ni amɛnaanaa nɔ.’ (1 Mose 1:28) Tso diɛŋtsɛ ji nɔ ni agu eyeli lɛ. Yehowa tsɛ lɛ “ekpakpa kɛ efɔŋ lee tso” ejaakɛ edamɔ shi kɛhã hegbɛ ni Yehowa yɔɔ akɛ etsɔɔ adesai nɔ ni hi kɛ nɔ ni ehiii. Eji Adam yeee nakai tso lɛ nɔ yibii lɛ kulɛ, ebaatsɔɔ akɛ ebuɔ e-Bɔlɔ lɛ, ni jeee no pɛ kɛkɛ, shi ehiɛ sɔɔ mɔ ni kɛ nibii babaoo ejɔɔ lɛ lɛ.

 Adam gbo ejaakɛ egbo Nyɔŋmɔ nɔ toi

‘Ni Adam lɛ, Nyɔŋmɔ kɛɛ lɛ akɛ: Akɛni oye tso lɛ ni miwoo he kitã lɛ hewɔ lɛ, ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ sũ mli, ejaakɛ emli ajieo kɛjɛ. Ejaakɛ sũ jio, ni sũ mli oooku osɛɛ kɛaatee!’1 Mose 3:17, 19.

Adam ye tso ni agu lɛ yeli lɛ nɔ yibii lɛ. Nɔ ni Adam fee lɛ yɛ hiɛdɔɔ waa. Eji atuatsemɔ, ni tsɔɔ akɛ eje gbɛ eku ehiɛ efɔ̃ nibii kpakpai fɛɛ ni Yehowa efee ehã lɛ lɛ nɔ. Adam kɛ nakai tso lɛ nɔ yibii ni eye lɛ tsɔɔ akɛ ekpoo Yehowa, ni akɛ eesumɔ ni lɛ diɛŋtsɛ eye ehe nɔ, ni nɔ ni baajɛ mli aba pɛ ji amane.

Taakɛ Yehowa wie lɛ, naagbee lɛ Adam gbo. Nyɔŋmɔ “kɛ shikpɔŋ su shɔ̃” Adam, ni ekɛɛ lɛ akɛ ‘ebaaku esɛɛ kɛaatee shikpɔŋ su mli.’ Adam eyaaa nɔ ehiii shi loo ni ebaayahi jeŋ kroko mli. Be ni egbo lɛ, etsɔ nɔ ko ni wala bɛ mli tamɔ su ni ajie lɛ kɛjɛ mli lɛ nɔŋŋ.1 Mose 2:7; Jajelɔ 9:5, 10.

Wɔgboiɔ ejaakɛ wɔjɛ Adam mli

“Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha.”Romabii 5:12.

Nɔ ni jɛ Adam toigbele loo esha lɛ mli lɛ esaaa lɛ pɛ ehe. Nɔ ni Adam ŋmɛɛ be ni etɔ̃ lɛ jeee ni ebaahi shi afii 70 loo 80 kɛkɛ, shi wala mli ni ebaahi kɛya naanɔ lɛ ji nɔ ni ŋmɛɛ lɛ lɛ. Agbɛnɛ hu, be ni Adam tɔ̃ lɛ, emuuyeli ŋmɛɛ lɛ, ni nɔ ni ekɛhã eshwiei fɛɛ ji emuu ni ayeee.

Wɔ fɛɛ wɔji Adam shwiei. Wɔná gbɔmɔtso ni yeee emuu ni feɔ esha kɛkɛ lɛ yɛ naagbee lɛ egbo lɛ kɛjɛ Adam ŋɔɔ, ní jeee wɔsuɔmɔ naa. Paulo tsɔɔ mɔbɔ shihilɛ mli ni wɔyɔɔ lɛ mli jogbaŋŋ. Eŋma akɛ: “Heloŋ gbɔmɔ ji mi, ni ahɔ̃ɔ mi awo esha shishi. Gbɔmɔ ni nii yɔɔ mɔbɔ ji mi! Namɔ baajie mi kɛjɛ gbɔmɔtso ni tsɛɔ nɛkɛ gbele nɛɛ ehãa mi lɛ dɛŋ?” Paulo hã lɛ diɛŋtsɛ esanebimɔ lɛ hetoo, ekɛɛ akɛ: “Shidaa ahã Nyɔŋmɔ kɛtsɔ Yesu Kristo, wɔ-Nuŋtsɔ lɛ nɔ!”Romabii 7:14, 24, 25.

 Yesu kɛ ewala hã koni wɔhi shi kɛya naanɔ

“Tsɛ lɛ tsu e-Bi lɛ akɛ je lɛ Yiwalaherelɔ.”1 Yohane 4:14.

Yehowa Nyɔŋmɔ to gbɛjianɔ ní ebaatsɔ nɔ ejie wɔ kɛjɛ gbele ni ji nɔ ni jɛɔ esha mli kɛbaa lɛ mli. Mɛɛ gbɛ nɔ ebaatsɔ efee nakai? Etsu esuɔmɔ Bi lɛ kɛjɛ ŋwɛi koni abafɔ lɛ akɛ adesa ni eye emuu tamɔ Adam nɔŋŋ. Shi, Yesu “efeee esha ko” tamɔ Adam fee lɛ. (1 Petro 2:22) Akɛni eye emuu hewɔ lɛ, gbele bɛ enɔ hewalɛ ni ebaanyɛ ehi shi kɛya naanɔ akɛ adesa ni eye emuu.

Kɛ̃lɛ, Yehowa ŋmɛ gbɛ ni ehenyɛlɔi lɛ gbe Yesu. Gbii etɛ sɛɛ lɛ, Yehowa tee lɛ shi kɛba wala mli ekoŋŋ akɛ mumɔŋ bɔɔ nɔ koni enyɛ eya ŋwɛi ekoŋŋ. Yesu tee ŋwɛi ni eyapue yɛ Nyɔŋmɔ hiɛ koni adesai aná elá ni ekɛshã afɔle lɛ he sɛɛ koni ekɛkpɔ̃ nɔ ni ŋmɛɛ Adam kɛ eshwiei lɛ. Yehowa kpɛlɛ nakai afɔleshaa lɛ nɔ, ni no baahã mɛi ni náa hemɔkɛyeli yɛ Yesu mli lɛ aná naanɔ wala.Romabii 3:23, 24; 1 Yohane 2:2.

Yesu hã nine shɛ nɔ ni ŋmɛɛ Adam lɛ nɔ. Wɔ hewɔ lɛ, ena amanehulu kɛtee gbele mli koni wɔnyɛ wɔhi shi kɛya naanɔ. Biblia lɛ kɛɔ akɛ: “Yesu . . . na amanehulu kɛtee gbele mli koni yɛ Nyɔŋmɔ duromɔ naa lɛ esa enaa gbele ehã mɔ fɛɛ mɔ.”Hebribii 2:9.

Gbɛjianɔ ni Yehowa to nɛɛ tsɔɔ wɔ nibii pii yɛ ehe. Yehowa jalɛsaneyeli ni nɔ kwɔ lɛ eŋmɛŋ gbɛ koni adesai ni yeee emuu lɛ diɛŋtsɛ akpɔ̃ amɛhe. Kɛ̃lɛ, suɔmɔ kɛ mɔbɔnalɛ ni eyɔɔ lɛ tsirɛ lɛ ni etsɔ gbɛ ni hã nɔ ko wulu ŋmɛɛ lɛ lɛ nɔ eshɛ nakai tamomɔnii lɛ he—ekɛ lɛ diɛŋtsɛ e-Bi koome lɛ hã akɛ kpatamɔ nɔ.Romabii 5:6-8.

Atee Yesu shi kɛjɛ gbohii ateŋ, ni abaatee mɛi krokomɛi hu shi

Atee Kristo shi kɛjɛ gbohii ateŋ akɛ mɛi ni ewɔ yɛ gbele mli lɛ ateŋ klɛŋklɛŋ yibii. Akɛni gbele tsɔ gbɔmɔ nɔ kɛba hewɔ lɛ, gbohiiashitee hu baatsɔ gbɔmɔ nɔ kɛba. Ejaakɛ tamɔ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ hu Kristo lɛ mli lɛ, abaahã mɛi fɛɛ hiɛ akamɔ.”—1 Korintobii 15:20-22.

Gbɛjianɔ ni Yehowa to nɛɛ tsɔɔ wɔ nibii pii yɛ ehe. Yehowa jalɛsaneyeli ni nɔ kwɔ lɛ eŋmɛŋ gbɛ koni adesai ni yeee emuu lɛ diɛŋtsɛ akpɔ̃ amɛhe. Kɛ̃lɛ, suɔmɔ kɛ mɔbɔnalɛ ni eyɔɔ lɛ tsirɛ lɛ ni etsɔ gbɛ ni hã nɔ ko wulu ŋmɛɛ lɛ lɛ nɔ eshɛ nakai tamomɔnii lɛ he—ekɛ lɛ diɛŋtsɛ e-Bi koome lɛ hã akɛ kpatamɔ nɔ.Romabii 5:6-8.

Ŋwanejee ko bɛ he akɛ Yesu hi shi ni egbo, shi mɛni ji odaseyeli ni tsɔɔ akɛ atee lɛ shi kɛjɛ gbohii ateŋ? Odaseyeli ni fe fɛɛ ni tsɔɔ akɛ atee Yesu shi lɛ ji akɛ, ejie ehe kpo etsɔɔ mɛi srɔtoi yɛ hei srɔtoi. Ejie ehe kpo etsɔɔ mɛi ni fa fe 500 yɛ be kome mli. Bɔfo Paulo ŋma enɛ he sane yɛ wolo ni ekɛmaje Korintobii lɛ mli akɛ mɛi ni na nii nɛɛ ekomɛi yɛ wala mli lolo, ni tsɔɔ akɛ amɛbaanyɛ amɛye nɔ ni amɛna kɛ nɔ ni amɛnu lɛ he odase.1 Korintobii 15:3-8.

Nɔ ni sa kadimɔ ji akɛ, be ni Paulo ŋma akɛ Kristo ji mɛi ni abaatee amɛshi lɛ ateŋ “klɛŋklɛŋ yibii” lɛ, no mli lɛ eetsɔɔ akɛ abaatee mɛi krokomɛi hu shi. Yesu diɛŋtsɛ wie akɛ be baaba ni “mɛi fɛɛ ni yɔɔ gbohii akaimɔ bui lɛ amli lɛ . . . baaje kpo.”Yohane 5:28, 29.

 Kɛ́ wɔbaahi shi kɛya naanɔ lɛ, esa akɛ wɔná hemɔkɛyeli yɛ Yesu mli

“Ejaakɛ Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala.”Yohane 3:16.

Biblia mli klɛŋklɛŋ wolo lɛ wieɔ be ni gbele ba shihilɛ mli ni Paradeiso laaje lɛ he. Naagbee wolo lɛ hãa wɔleɔ be ni Nyɔŋmɔ baajie gbele kɛjɛ shihilɛ mli ni ehã shikpɔŋ lɛ atsɔ Paradeiso ekoŋŋ. Kɛkɛ lɛ, adesai baahi shi yɛ miishɛɛ mli kɛya naanɔ. Kpojiemɔ 21:4 lɛ kɛɔ akɛ: ‘Gbele ehiŋ shi dɔŋŋ.’ Bɔ ni afee ni wɔná nɔmimaa akɛ nakai shiwoo lɛ baaba mli lɛ, kuku 5 lɛ wie akɛ: “Wiemɔi nɛɛ yɛ mli, ni anɔkwale ni.” Kɛ́ Yehowa wo shi lɛ enyɛɔ etsuɔ he nii.

Ani oheɔ oyeɔ akɛ “wiemɔi nɛɛ yɛ mli, ni anɔkwale ni”? Kɛ́ nakai lɛ, yaa nɔ okase Yesu Kristo he nii babaoo ni oná hemɔkɛyeli yɛ emli. Kɛ́ ofee nakai lɛ, Yehowa baajɔɔ bo. Jeee akɛ ebaajɔɔ bo bianɛ kɛkɛ, shi obaahi shikpɔŋ ni afee lɛ Paradeiso lɛ nɔ kɛya naanɔ, he ni “gbele bɛ dɔŋŋ, ni asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ” lɛ.

Ekrokromɛi Hu Nɛ

Kpɔmɔnɔ Lɛ—Nyɔŋmɔ Nikeenii ni Fe Fɛɛ

Mɛni ji kpɔmɔnɔ lɛ? Mɛni obaanyɛ ofee koni oná he sɛɛ?