Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MARCH 2015

 WALA SHIHILƐ HE SANE

Jairo kɛ Ehiŋmɛi Esɔmɔɔ Nyɔŋmɔ

Jairo kɛ Ehiŋmɛi Esɔmɔɔ Nyɔŋmɔ

Feemɔ ohe mfoniri ni onyɛɛɛ ogbɔmɔtso lɛ he nɔ ko kwraa ofee akɛ ohiŋmɛi kɛkɛ pɛ onyɛɔ otsɔmɔɔ. Minyɛmi nuu Jairo yɛ mɔbɔ shihilɛ ni tamɔ nakai mli. Fɛɛ sɛɛ lɛ eyɛ miishɛɛ yɛ shihilɛ mli. Dani matsɔɔ bo nɔ ni hãa eyɔɔ miishɛɛ lɛ, hã magba bo eshihilɛ mli sane.

Afɔ Jairo kɛ hela ko ni atsɛɔ lɛ spastic quadriplegia, ni ji hela ni atsɛɔ lɛ cerebral palsy lɛ henɔ ko. * Enɛ hewɔ lɛ, enyɛɛɛ egbɔmɔtso lɛ he nɔ ko nɔ ko efee. E-ansɔ lɛ nyɛɛɛ ekɛ egbɔmɔtso lɛ mli nibii lɛ ashara jogbaŋŋ, no hewɔ lɛ eniji kɛ enaji dɔrɔɔ basabasa bɔ ni enyɛɛɛ he nɔ ko kwraa efee. Bei komɛi lɛ bɔ ni Jairo gbɔmɔtso lɛ tsirɛɔ ehe basabasa hewɔ lɛ, enyɛɔ epilaa ehe. Mɛi ni bɛŋkɛ lɛ lɛ hu baanyɛ apila kɛ́ amɛhiɛ bɛ amɛhe nɔ. Mɔbɔ sane ji akɛ, bei pii lɛ esa akɛ afimɔ eniji kɛ enaji akpɛtɛ shwiili ni etaa mli lɛ koni ekapila ehe loo mɛi krokomɛi.

EPIŊ WAA BE NI EDAA LƐ

Jairo piŋ waa be ni edaa lɛ. Be ni ená nyɔji etɛ lɛ, nɔ bɔi enɔ nyɔɔ. Bei pii lɛ, Awo fuaa lɛ waa ni ekɛ lɛ woɔ foi kɛyaa helatsamɔhe kɛ susumɔ po akɛ egbo.

Bɔ ni Jairo niji kɛ enaji fɔɔ shɔ̃ɔ lɛ hewɔ lɛ, sɛɛ mli lɛ, eniji kɛ enaji fɛɛ tsɔmɔ afã. Be ni ená afii 16 lɛ, epila egboŋ ni ehe bahia ni afee lɛ opireshɛŋ wulu ko. Mikaiɔ bɔ ni Jairo kɛ̃mɔɔ daa gbɛkɛ be ni eyafee opireshɛŋ lɛ eba lolo.

Jairo hela lɛ hewɔ lɛ, ebiɔ ni daa gbi lɛ afee nɔ fɛɛ nɔ ahã lɛ, tamɔ kɛ́ ebaaye nii, ebaawo atade loo ebaawɔ. Awo kɛ Ataa ji mɛi titri ni tsuɔ nibii nɛɛ. Eyɛ mli akɛ esa akɛ afee nɔ fɛɛ nɔ ahã Jairo moŋ, shi wɔfɔlɔi kɛɔ lɛ be fɛɛ be akɛ, jeee adesai pɛ baanyɛ aye abua lɛ, shi Nyɔŋmɔ hu baanyɛ aye abua lɛ.

WƆNA GBƐ NI WƆBAATSƆ NƆ WƆKƐ LƐ AWIE

Wɔfɔlɔi ji Yehowa Odasefoi, ni kɛjɛ be ni Jairo ji abifao beebe lɛ, amɛkaneɔ Biblia lɛ amɛhãa lɛ. Amɛle akɛ nɔ ni hãa mɔ náa miishɛɛ yɛ eshihilɛ mli ji, ní ekɛ Nyɔŋmɔ baabɔ naanyo. Jairo bɛ gbɔmɔtsoŋ hewalɛ kwraa, ni ekpokpoɔ be fɛɛ be, shi wɔfɔlɔi le akɛ ebaanyɛ ená hiɛnɔkamɔ kɛhã wɔsɛɛ. Shi bei pii lɛ amɛjwɛŋmɔ feɔ amɛ enyɔɔnyɔ kɛ́ Jairo nuɔ nibii ni amɛtsɔɔ lɛ yɛ Biblia lɛ mli lɛ shishi.

Be ni Jairo ji gbekɛ lɛ, be ko lɛ Ataa bi lɛ akɛ, “Jairo ofainɛ, obaanyɛ okɛ mi awie?” Ni ekɛfata he akɛ, “Kɛ́ oosumɔ mi lɛɛlɛŋ lɛ, okɛ mi baawie!” Be ni Ataa kpaa lɛ fai koni kɛ́ hooo lɛ, ewie nɔ kome pɛ lɛ, Jairo hiŋmɛiiaŋ kpala nu. Eyɛ mli akɛ ebɔ mɔdɛŋ ni etsɔɔ bɔ ni enuɔ he ehãa moŋ, shi enyɛɛɛ ewie, ni esɛ̃ mli kɛkɛ eshiɔ. Edɔ Ataa waa akɛ ehã  Jairo fó. Shi nɔ ni Jairo fee lɛ tsɔɔ akɛ enu nɔ ni Ataa wie lɛ shishi. Naagba lɛ ji akɛ, enyɛɛɛ ewie.

No sɛɛ etsɛɛɛ lɛ, wɔfɔlɔi lɛ na akɛ, bei komɛi lɛ Jairo tsɔmɔɔ ehiŋmɛi oyayaayai kɛ́ eetao ni afee nɔ ko ahã lɛ. Edɔɔ Jairo waa akɛ enyɛɛɛ egbala bɔ ni enuɔ he ehãa lɛ mli etsɔɔ. Shi kɛ́ mifɔlɔi nu nɔ ni Jairo kɛ ehiŋmɛi tsɔɔ lɛ shishi ni amɛfee nɔ ni etaoɔ lɛ amɛhã lɛ pɛ lɛ, obaana ni eeŋmɔ. Ekɛ nakai feemɔ kɛɔ akɛ, oyiwaladɔŋŋ.

Yoo ko ni le bɔ ni atsɔɔ mɛi ni nyɛɛɛ awie lɛ anii lɛ tsɔɔ akɛ, kɛ́ wɔmiibi lɛ sane ni esa akɛ ehã hetoo hɛɛ loo dabi lɛ, wɔhole wɔniji enyɔ lɛ fɛɛ nɔ. Ninejurɔ lɛ damɔ shi kɛhã hɛɛ, ni abɛku lɛ damɔ shi kɛhã dabi. Niji lɛ ateŋ nɔ ni ebaakwɛ lɛ hãa wɔnaa nɔ ni etaoɔ etsɔɔ lɛ.

BE KO NI SA KADIMƆ WAA YƐ JAIRO SHIHILƐ MLI

Shii etɛ yɛ afi mli lɛ, Yehowa Odasefoi feɔ kpeei bibii kɛ kpeei wuji, ni ajɛɔ Biblia lɛ mli ahãa wiemɔi. Be fɛɛ be kɛ́ aahã wiemɔ ni ato he gbɛjianɔ kɛhã mɛi ni abaabaptisi lɛ, Jairo náa miishɛɛ waa. Be ni Jairo ye afii 16 lɛ, Ataa bi lɛ akɛ, “Jairo, ani obaasumɔ ni abaptisi bo?” Amrɔ nɔŋŋ lɛ, ekwɛ Ataa ninejurɔ ni ekɛtsɔɔ akɛ eesumɔ ni abaptisi lɛ. Kɛkɛ ni Ataa kɛfata he akɛ, “Ani owo Nyɔŋmɔ shi yɛ sɔlemɔ mli akɛ obaasɔmɔ lɛ kɛya naanɔ?” Shi kome ekoŋŋ lɛ, Jairo kwɛ Ataa ninejurɔ. Wɔna faŋŋ akɛ, Jairo ejɔɔ ewala nɔ ehã Yehowa momo.

Be ni akɛ Jairo susu saji ahe saŋŋ yɛ Biblia lɛ mli lɛ, ana faŋŋ akɛ enuɔ nɔ ni Kristofoi abaptisimɔ tsɔɔ lɛ shishi. No hewɔ lɛ yɛ afi 2004 lɛ, ehã sanebimɔ ni he hiaa fe sane fɛɛ ni abi lɛ yɛ eshihilɛ mli lɛ hetoo. No ji: “Ani ojɔɔ ohe nɔ ohã Nyɔŋmɔ akɛ obaafee esuɔmɔnaa nii?” Jairo hã sanebimɔ nɛɛ hetoo kɛtsɔ ehiŋmɛi anɔ ni ehole kɛtee ŋwɛi lɛ nɔ. Nakai ji gbɛ ni ato akɛ etsɔ nɔ ekɛɛ hɛɛ. No hewɔ lɛ, abaptisi lɛ akɛ Yehowa Odasefonyo be ni eye afii 17.

EKƐ EJWƐŊMƆ MA NYƆŊMƆ SƆƆMƆ NƆ

Yɛ afi 2011 lɛ, gbɛ kroko gbele kɛhã Jairo ní ebaanyɛ etsɔ nɔ ekɛ mɛi agba sane—kɔmpiuta ni akɛ hiŋmɛi kudɔɔ. Kɔmpiuta nɛɛ nyɛɔ enaa bɔ ni ehiŋmɛi lɛ tsɔmɔɔ lɛ, no hewɔ lɛ ebaanyɛ ekɛ ehiŋmɛi lɛ agbele nibii ni yɔɔ kɔmpiuta lɛ nɔ lɛ. Kɛ́ eetao egbele nɔ ko yɛ nɔ lɛ, etswaa ehiŋmɛi loo ekwɛɔ nɔ ni etaoɔ ekliki lɛ gãa. Afee tao ko ní mfonirii srɔtoi ni damɔ shi kɛhã wiemɔi lɛ ahã Jairo koni eye ebua lɛ ni ekɛ mɛi agba sane. Kɛ́ etswa  ehiŋmɛi yɛ amɛteŋ ekome nɔ lɛ, kɔmpiuta lɛ wieɔ sane ni yɔɔ nɔ lɛ.

Be ni nilee ni Jairo yɔɔ yɛ Biblia lɛ mli yaa hiɛ lɛ, belɛ shwelɛ ni eyɔɔ akɛ eye ebua mɛi krokomɛi koni amɛle Nyɔŋmɔ lɛ hu mli miiwa. Daa otsi kɛ́ wɔweku lɛ miikase Biblia lɛ, ekwɛɔ mi, kɛkɛ lɛ ekwɛ ekɔmpiuta lɛ. Ekɛ nakai feemɔ kaiɔ mi akɛ miŋmala saji ahetoo ní ebaahã kɛ́ atee Kristofoi akpee lɛ miwo ekɔmpiuta lɛ nɔ mihã lɛ.

Kɛ́ wɔtee Kristofoi akpee lɛ, enáa tsui ni ekwɛɔ tao lɛ nɔ, ni etswaa ehiŋmɛi yɛ nibii ni yɔɔ tao lɛ nɔ lɛ ateŋ nɔ ni etaoɔ lɛ nɔ, kɛkɛ lɛ ekɔmpiuta lɛ ewie lɛ bɔ ni mɛi fɛɛ ni yɔɔ jɛmɛ lɛ baanu. Be fɛɛ be ni ebaahã saji ahetoo kɛwo mɛi hewalɛ lɛ, enáa miishɛɛ waa. Alex, oblanyo fioo ni ji Jairo naanyo lɛ wie akɛ, “Be fɛɛ be ni Jairo baahã sane hetoo kɛ́ aakase Biblia lɛ, mináa miishɛɛ waa.”

Jairo kɛ ekɔmpiuta ni wieɔ ni ekɛ ehiŋmɛi kudɔɔ lɛ hãa saji ahetoo yɛ Kristofoi akpee shishi, ni ekɛtsuɔ nii hu kɛgbaa mɛi krokomɛi ehemɔkɛyeli lɛ he sane

Jairo kɛ ehiŋmɛi lɛ tsuɔ nii hu kɛgbaa mɛi krokomɛi ehemɔkɛyeli lɛ he sane. Gbɛ kome ni etsɔɔ nɔ efeɔ nakai ji, eklikiɔ mfoniri ni tsɔɔ he ko ni yɔɔ fɛo ni gbɔmɛi srɔtoi kɛ kooloi ni toiŋjɔlɛ yɔɔ amɛteŋ lɛ yɔɔ jɛmɛ lɛ nɔ. Kɛkɛ lɛ, ekɔmpiuta lɛ ewie akɛ: “Hiɛnɔkamɔ ni Biblia lɛ kɛhãa ji akɛ, shikpɔŋ lɛ baatsɔ paradeiso, he ko ni hela kɛ gbele ehiŋ jɛmɛ, Kpojiemɔ 21:4.” Kɛ́ mɔ ni eshiɛɔ ehãa lɛ yɛ he miishɛɛ lɛ, eklikiɔ ekroko hu nɔ, ni no hu wieɔ akɛ, “Ani obaasumɔ ni mikɛ bo akase Biblia lɛ?” Naakpɛɛ sane ji akɛ, wɔnii kpɛlɛ koni ekɛ lɛ akase Biblia lɛ. Eyɛ miishɛɛ waa kɛ́ ookwɛ Jairo ni Odasefonyo kroko fata ehe ni eeye eebua lɛ ni ekɛ Papa Nii miikase Biblia lɛ! Miishɛɛ sane ji akɛ, abaptisi Papa Nii yɛ kpokpaa wulu nɔ kpee ni afee yɛ Madrid yɛ August afi 2014 lɛ.

Jairo skul tsɔɔlɔi lɛ yɔse bɔ ni esumɔɔ Nyɔŋmɔjamɔ lɛ. Amɛteŋ mɔ kome ni atsɛɔ lɛ Rosario lɛ wie akɛ: “Kɛ́ wɔsɛɛ ko ni mikpɛ miyiŋ akɛ maya sɔlemɔ ko lɛ, masumɔ akɛ matsɔ Yehowa Odasefonyo. Mina akɛ Jairo hemɔkɛyeli lɛ ehã etsui enyɔ emli, eyɛ mli akɛ eyɛ shihilɛ ni jaraa mli.”

Jairo náa miishɛɛ waa be fɛɛ be ni makane Biblia mli shiwoo ni kɛɔ akɛ: “Obubuafoi aaatumɔ akɛ ofrote, ni mumui lilɛi hu aaalá kɛ nyamɔ” lɛ mahã lɛ lɛ. (Yesaia 35:6) Eyɛ mli akɛ bei komɛi lɛ enijiaŋ jeɔ wui moŋ, shi bei pii lɛ eyɛ miishɛɛ. Nɔ hewɔ lɛ ji akɛ, Nyɔŋmɔ kɛ enanemɛi Kristofoi lɛ ji mɛi titrii ni he hiaa lɛ yɛ eshihilɛ mli. Bɔ ni eyɔɔ miishɛɛ be fɛɛ be kɛ hemɔkɛyeli ni mli wa ni eyɔɔ yɛ Nyɔŋmɔ mli lɛ ji odaseyeli ni tsɔɔ akɛ, Yehowa sɔɔmɔ hãa mɔ naa miishɛɛ, ekɔɔɔ he eko kɛ oyɛ shihilɛ ni jaraa mli.

^ kk. 5 Cerebral palsy, ni afoɔ lɛ kuku akɛ CP lɛ ji gbɛ́i ni akɛtsɛɔ hela fɛɛ hela ni kɛ́ emɔ jwɛŋmɔ lɛ, ehãaa gbɔmɔtso lɛ fãi komɛi anyɛ atsi amɛhe jogbaŋŋ lɛ. Ebaanyɛ ehã nɔ anyɔ mɔ nɔ, loo ehãŋ anyɛ aye nii jogbaŋŋ, loo anyɛ awie jogbaŋŋ. Helai nɛɛ ateŋ nɔ ni ehiii fe fɛɛ ji Spastic quadriplegia; ebaanyɛ ehã mɔ niji kɛ enaji fɛɛ ashɔ̃, ni ebaanyɛ ehã mɔ lɛ kuɛ hu mli agbɔjɔ.