Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ FEBRUARY 2015

 SANEYITSO LƐ MLITSƆƆMƆ | BƆ NI OOOFEE ONYA ONITSUMƆ HE

Nitsumɔ ni Wa—Ani Ebe Eho?

Nitsumɔ ni Wa—Ani Ebe Eho?

Nuu ko ni atsɛɔ lɛ Alex lɛ mu waa be ni ewó adeka kroko ewo amɛkɔmpene lɛ tsɔne lɛ mli lɛ. Ebi ehe akɛ, ‘Ani nɛkɛ sɔŋŋ matsu nii yɛ biɛ ni miyaaa mihiɛ? Mɛɛ be kwraa mi hu magba mli? Kɛ́ mita shi ni mitsuuu nɔ ko lɛ, maná miishɛɛ waa yɛ mishihilɛ mli!’

Taakɛ eji yɛ Alex gbɛfaŋ lɛ, ŋmɛnɛ lɛ mɛi babaoo sumɔɔɔ nitsumɔ ni wa. Fitafonyo ko ni atsɛɔ lɛ Aaron lɛ kɛɛ akɛ: “Mɛi pii susuɔ akɛ nitsumɔ ni ‘baa shi’ esaaa amɛ. Jwɛŋmɔ ni amɛhiɛ ji: ‘Mamɔ enɛ mli nakai kɛyashi maná nitsumɔ kpakpa.’”

Mɛni hewɔ mɛi babaoo nuɔ he akɛ esaaa akɛ amɛtsuɔ nitsumɔ ni wa lɛ? Ekolɛ bɔ ni adafitswaa nitsumɔhei wieɔ akɛ shihilɛ “kpakpa” ji, ni mɔ ahi shi yɛ ogbɔjɔ shihilɛ mli lɛ ená amɛnɔ hewalɛ. Oblanyo ko ni atsɛɔ lɛ Matthew ni eji shĩa kwralɔ lɛ kɛɛ akɛ: “Mɛi susuɔ akɛ, kɛ́ ehe miihia ni otsu nii dɛŋdɛŋ dani oná shika lɛ, etsɔɔ akɛ obɛ mli ni ayaa.” Mɔ ko ni atsɛɔ lɛ Shane ní lɛ hu ekwraa skul lɛ kɛ nɔ ni Matthew wie lɛ kpãa gbee. Ewie akɛ: “Amrɔ nɛɛ mɛi sumɔɔɔ ni amɛtsuɔ nii gbi muu fɛɛ, shi amɛsumɔɔ ni ahã amɛ gbi muu nyɔmɔwoo.”

Shi yɛ anɔkwale mli lɛ, mɛi ni yɔɔ nii lɛ ateŋ mɛi babaoo ji mɛi ni tsuɔ nii waa. Nuu ko ni atsɛɔ lɛ Daniel ni eji tsumaa nitsulɔ, ni eye afii 25 lɛ wie akɛ: “Misusuɔ akɛ kɛ́ otsuɔ nii waa lɛ, onáa jɔɔmɔ, titri lɛ kɛ́ otsuɔ yɛ yiŋtoi kpakpai ahewɔ.” Nuu ko ni atsɛɔ lɛ Andre, ni eye afii 23 lɛ hu susuɔ nakai. Ewie akɛ: “Miheɔ miyeɔ akɛ miishɛɛ kɛ ŋɔɔmɔyeli, kɛ nitsumɔ yɛ tsakpaa. Kɛ́ otsuuu nii waa lɛ, onyɛŋ okpa gbɛ akɛ obaaná miishɛɛ ni sɛɛ tsɛɔ—moŋ lɛ ofeɔ shwɛm!”

Mɛni hã mɛi tamɔ Daniel kɛ Andre ná susumɔ ni ja yɛ nitsumɔ he? Kɛ́ wɔɔfo lɛ kuku lɛ, amɛkɛ Biblia mli shishitoo mlai tsuɔ nii yɛ amɛshihilɛ mli. Biblia lɛ ewieee eshiii nitsumɔ ni wa, moŋ lɛ, ewoɔ wɔ hewalɛ ni wɔmia wɔhiɛ kɛtsu nii waa. Biblia lɛ wooo wɔ hewalɛ ni wɔtsu nii pɛ kɛkɛ. Shi etsɔɔ wɔ bɔ ni wɔɔfee wɔnya nɔ ni wɔtsuɔ lɛ he hu.

Mɛɛ Biblia mli shishitoo mlai baanyɛ aye abua bo koni onya nɔ ni otsuɔ lɛ he? Wɔmiiwo bo hewalɛ ni osusu shishitoo mlai fioo komɛi ni awie he yɛ sane ni nyiɛ sɛɛ lɛ mli lɛ ahe.