Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ FEBRUARY 2015

 SANE KO NÍ ODASEFONYO KO KƐ MƆ KO GBA

Mɛni Hewɔ Esa akɛ Opɛi Biblia lɛ Mli?

Mɛni Hewɔ Esa akɛ Opɛi Biblia lɛ Mli?

Sane ni nyiɛ sɛɛ nɛɛ ji nɔkwɛmɔnɔ ni tsɔɔ sane ko ní Yehowa Odasefonyo ko kɛ mɔ ko baagba. Ŋɔɔ lɛ akɛ Odasefonyo ko ni atsɛɔ lɛ Brian kɛ nuu ko ni atsɛɔ lɛ Eric lɛ ekpe.

BIBLIA LƐ—YINƆSANE NI JA

Eric: Ole nɔ ko, minyaaa jamɔ he tsɔ. No hewɔ lɛ, efeee mi akɛ wɔbaanyɛ wɔgba sane babaoo.

Brian: Eŋɔɔ minaa akɛ ohã mile nakai. Shi, atsɛɔ mi Brian. Ni bo hu?

Eric: Eric.

Brian: Eric, eŋɔɔ minaa akɛ mikɛ bo ekpe.

Eric: Mi hu nakai.

Brian: Kɛ́ mabi bo lɛ, ani oda yɛ shĩa ni asumɔɔ Nyɔŋmɔjamɔ yɛ mli?

Eric: Hɛɛ. Shi be ni mishi shĩa kɛtee kɔleji lɛ, mikpa sɔlemɔ yaa.

Brian: Nakai? Mɛni okase yɛ kɔleji lɛ?

Eric: Adesai ashihilɛi ahe nikasemɔi kɛ yinɔsane. Misumɔɔ yinɔsane he nikasemɔ waa—taakɛ ole lɛ, shihilɛ mli ni adesai etsɔmɔ kɛbashi bianɛ.

Brian: Yinɔsane he nikasemɔ baanyɛ afee nɔ ni yɔɔ miishɛɛ waa. Taakɛ ekolɛ ole lɛ, Biblia lɛ ji yinɔsane he wolo. Ani Biblia lɛ fata woji ni okase yinɔsaji ahe nii yɛ mli he?

Eric: Dabi. Mile akɛ Biblia lɛ ji wolo kpakpa, shi misusuko he pɛŋ akɛ eji yinɔsane he wolo.

Brian: Miina akɛ oji mɔ ko ni baasumɔ ni ekɛ mɛi asusu nii ahe. Kɛ́ oyɛ minitii fioo ko lɛ, masumɔ matsɔɔ bo nibii komɛi ni tsɔɔ akɛ Biblia lɛ ji yinɔsane he wolo ni ja.

Eric: Gbɛ kã. Shi mibɛ Biblia.

Brian: Naagba bɛ. Manyɛ matsɔɔ bo kɛjɛ minɔ lɛ mli. Klɛŋklɛŋ nɔ lɛ yɛ 1 Kronika yitso 29, kuku 26 kɛ 27. Jɛmɛ kaneɔ akɛ: “Bɔ ni David, Ishai bi lɛ, ye Israel muu lɛ fɛɛ nɔ maŋtsɛ nɛ. Be ni ekɛye Israel nɔ ji afii nyɔŋmai ejwɛ: eye maŋtsɛ afii kpawo yɛ Hebron, ni eye afii nyɔŋmai etɛ kɛ etɛ yɛ Yerusalem.”

Eric: Mɛni enɛ kɔɔ yɛ yinɔsane ni ja he?

Brian: Be ko ni eho lɛ, mɛi ni wieɔ amɛshiɔ Biblia lɛ wie akɛ Maŋtsɛ David jeee mɔ ko ni ehi shi pɛŋ.

Eric: Nakai? Mɛni hewɔ mɛi baaje enɛ he ŋwane?

Brian: Yɛ Biblia lɛ sɛɛ lɛ, odaseyelii fioo ko pɛ yɔɔ ni tsɔɔ akɛ eji mɔ ko ni hi shi diɛŋtsɛ. Shi yɛ afi 1993 mli lɛ, shitsalɔi komɛi yana blema tɛ ko, ni nɔ ni aŋma yɛ nɔ lɛ shishinumɔ ji, “David We.”

Eric: Naakpɛɛ sane.

Brian: Mɔ kroko hu ni Biblia lɛ tsĩ etã ni mɛi je he ŋwane akɛ ehi shi ji, Pontio Pilato, ni ji amralo ni ye nɔ yɛ Yesu beaŋ. Atsĩ etã yɛ Luka yitso 3 kuku 1 lɛ afata nɔyelɔi ni ye nɔ yɛ ebeaŋ lɛ ekomɛi ahe.

Eric: Hɛɛ, mina. Ekɛɛ akɛ “be ni Pontio Pilato ji Yudea amralo, Herode ji kpokpaa nɔyelɔ yɛ Galilea.”

Brian: Nakai. Afii pii ni eho nɛ lɛ, nilelɔi komɛi je ŋwane akɛ Pontio Pilato jeee mɔ ko ni hi shi  diɛŋtsɛ. Shi aaafee afii 50 nɛ lɛ, ana tɛ ko yɛ Middle East ni akpɛ egbɛ́i yɛ nɔ.

Eric: Hmm. Minuko saji nɛɛ pɛŋ.

Brian: Eŋɔɔ minaa akɛ mi kɛ bo miigba enɛɛmɛi ahe sane.

Eric: Yɛ anɔkwale mli lɛ, miyɛ bulɛ kɛhã Biblia akɛ wolo ko ni aŋma, shi misusuko he pɛŋ akɛ ebaanyɛ ekɔ wɔgbii nɛɛ ahe. Yinɔsane ni ja baanyɛ ahi mli, shi minaaa akɛ ehe yɛ sɛɛnamɔ yɛ wɔbei nɛɛ amli.

BIBLIA LƐ—BLEMA WOLO SHI EBE HOKO

Brian: Mɛi babaoo baakpɛlɛ sane nɛɛ nɔ. Shi mikɛ amɛ kpaaa gbee. Nɔ hewɔ lɛ ji akɛ: Nibii ni he hiaa adesai kɛjɛ blema lɛ tsakeko; amɛkã he amɛji hiamɔ nii. Akɛ nɔkwɛmɔnɔ lɛ, niyenii, atade, kɛ wɔɔhe ji wɔhiamɔ nii kɛjɛ blema tɔ̃ɔ. Agbɛnɛ hu, kɛjɛ blema tɔ̃ɔ lɛ, wɔsumɔɔ ni wɔkɛ mɛi agba sane ni wɔná weku shihilɛ ni yɔɔ miishɛɛ. Anɔkwa wɔ fɛɛ wɔnyaa nibii nɛɛ ahe, aloo jeee nakai?

Eric: Nakai.

Brian: Biblia lɛ baanyɛ aye abua wɔ ni wɔtsu enɛɛmɛi fɛɛ he nii. Wɔbaanyɛ wɔwie akɛ eji blema wolo, shi ebe hoko.

Eric: Mɛni otsɔɔ?

Brian: Hã mawie lɛ yɛ gbɛ kroko nɔ: Shishitoo mlai ni yɔɔ Biblia lɛ mli lɛ ahe yɛ sɛɛnamɔ waa ŋmɛnɛ, taakɛ amɛji be ni aŋma Biblia lɛ afii ohai abɔ ni eho lɛ.

Shishitoo mlai ni yɔɔ Biblia lɛ mli lɛ ahe yɛ sɛɛnamɔ waa ŋmɛnɛ, taakɛ amɛji be ni aŋma Biblia lɛ afii ohai abɔ ni eho lɛ

Eric: OK. Yɛ mɛɛ shihilɛi amli nɛkɛ?

Brian: Biblia mli shishitoo mlai baanyɛ aye abua wɔ yɛ shihilɛi tamɔ; bɔ ni esa akɛ aŋmɛ pɛpɛɛpɛ yɛ shika saji amli, weku shihilɛ ni yɔɔ miishɛɛ, loo bɔ ni aaafee atsɔ naanyo kpakpa. Kɛ́ wɔkɛ wolo nɛɛ mli gbɛtsɔɔmɔi lɛ tsu nii lɛ, wɔbaaye omanye. Shi tamɔ ole lɛ, ŋmɛnɛ lɛ, ebɛ mlɛo kwraa akɛ mɔ ko aaatsu esɔ̃ akɛ wu kpakpa kɛ weku yitso lɛ he nii, aloo jeee nakai?

Eric: Hɛɛ, mikɛ bo kpãa gbee. Mi kɛ miŋa hi shi aaafee afi nɛ, shi jeee be fɛɛ be wɔnaa yaa bɛlɛ kome mli.

Brian: Nakai pɛpɛɛpɛ. Shi shishitoo mlai komɛi yɛ Biblia lɛ mli ni yeɔ ebuaa. Hã wɔsusu Efesobii yitso 5 lɛ he wɔkwɛ. Hã wɔkane kuku 22, 23, kɛ 28 lɛ. Kɛ́ oosumɔ lɛ, obaanyɛ okane nakai kukuji lɛ.

Eric: OK. Ekaneɔ akɛ: “Ŋamɛi aŋɔ amɛhe awo amɛwumɛi ashishi, tamɔ bɔ ni amɛŋɔɔ amɛhe amɛwoɔ Nuŋtsɔ lɛ shishi lɛ, ejaakɛ wu lɛ ji eŋa lɛ yitso, tamɔ bɔ ni Kristo lɛ hu ji asafo lɛ yitso, ní lɛ nɔŋŋ ji gbɔmɔtso nɛɛ yiwalaherelɔ lɛ.” Kuku 28 lɛ hu kɛɛ: “Yɛ nakai gbɛ nɔŋŋ nɔ lɛ, esa akɛ wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei. Nuu ní sumɔɔ eŋa lɛ, lɛ diɛŋtsɛ ehe esumɔɔ.”

Brian: Mo. Obɔ mɔdɛŋ. Kɛ́ wu kɛ ŋa fɛɛ kɛ ŋaawoo nɛɛ tsu nii lɛ, ani onaaa akɛ kulɛ nibii baaya nɔ jogbaŋŋ yɛ weku lɛ mli?

Eric: Hɛɛ, mikɛ bo kpãa gbee. Shi ekɛɛmɔ waaa tamɔ efeemɔ.

Brian: Eji anɔkwale; mɔ ko mɔ ko yeee emuu. Anɔkwa, Biblia lɛ woɔ wɔ hewalɛ ni wɔfee mɛi ni nuɔ nii ashishi. * Yɛ gbalashihilɛ mli lɛ, esa akɛ wu lɛ kɛ ŋa lɛ fɛɛ afee mɛi ni ŋmɛɔ pɛpɛɛpɛ ni ŋmɛɔ sane he. Mi kɛ miŋa ena akɛ, Biblia lɛ baanyɛ aye abua wɔ koni wɔfee nakai.

Eric: Nilee yɛ mli.

Brian: Yehowa Odasefoi yɛ Wɛb saiti ko ni gbalashihilɛ kɛ weku shihilɛ he saji ni sa jogbaŋŋ yɛ nɔ. Kɛ́ oyɛ minitii fioo lɛ, manyɛ mikɛ nibii ni yɔɔ nɔ lɛ ekomɛi atsɔɔ bo.

Eric: OK. Manyɛ mahã bo minitii fioo.

Brian: Ojogbaŋŋ. Wɛb saiti lɛ adrɛs ji www.jw.org/gaa. Kɛ́ ogbele lɛ, nɔ klɛŋklɛŋ ni obaana nɛ.

Eric: Mfonirii lɛ yɛ fɛo waa.

Brian: Eji mfonirii ni miitsɔɔ shiɛmɔ nitsumɔ ni yaa nɔ yɛ jeŋ fɛɛ lɛ. Ɛhɛ̃ɛ, naa no. Fã nɛɛ hiɛ saneyitso ni ji; “Yelikɛbuamɔ Kɛhã Gbalashihilɛ  Mli Hefatalɔi kɛ Fɔlɔi.” Yɛ nakai yitso lɛ shishi lɛ, obaana saji babaoo ni amɛsɛɛ kɛlɛɛɛ ni wieɔ shihilɛi srɔtoi ahe. Eko yɛ mli ni onyaa he?

Eric: Hɛɛ. “Bɔ ni Aaafee Asaa Gbalashihilɛ mli Béi.” Efeɔ mi akɛ manyɛ mikɛ enɛ atsu nii!

Brian: Sane nɛɛ wieɔ gbɛi ejwɛ komɛi ni abaanyɛ atsɔ nɔ asaa béi lɛ he. Kadimɔ kuku nɛɛ. Ofainɛ, obaasumɔ ni okane?

Eric: Hɛɛ. Ekaneɔ akɛ: “Taakɛ bɔ ni tsui kɛ flufla he hiaa waa koni lá anyɛ atsu nii jogbaŋŋ yɛ gbɔmɔtso lɛ mli lɛ, nakai nɔŋŋ suɔmɔ kɛ bulɛ he hiaa kɛ́ sɛɛnamɔ baaba sanegbaa he yɛ gbalashihilɛ lɛ mli.” Hmm, minya bɔ ni atsɔɔ mli lɛ he waa.

Brian: Obɔ mɔdɛŋ kɛ emli kanemɔ. Atsɛ Ŋmalɛ ko yisɛɛ yɛ biɛ. Kɛ́ onyɛ nɔ lɛ, Ŋmalɛ lɛ mli wiemɔi lɛ baaba.

Eric: Hɛɛ, mina. Efesobii 5:33. Ekaneɔ akɛ: “Esa akɛ nyɛteŋ mɔ fɛɛ mɔ asumɔ eŋa tamɔ lɛ diɛŋtsɛ ehe; ni esa akɛ ŋa lɛ aná bulɛ ni mli kwɔ ehã ewu.”

Brian: Ani okadi akɛ aama nɔ ni mɔ fɛɛ mɔ kpaa gbɛ ni afee ahã lɛ lɛ nɔ mi?

Eric: Minuuu nɔ ni otaoɔ otsɔɔ lɛ shishi.

Brian: Eji anɔkwale akɛ, nɔ ni nuu taoɔ nɔŋŋ ji ni eŋa abu lɛ, ni yoo hu, nɔ ni etaoɔ nɔŋŋ ji ni ewu ahã enu he akɛ esumɔɔ lɛ.

Eric: Hɛɛ. Mikɛ bo kpãa gbee.

Brian: Kɛ́ be fɛɛ be lɛ wu lɛ taoɔ gbɛi anɔ ni eeetsɔ ehã eŋa lɛ anu he akɛ esumɔɔ lɛ lɛ, ani efeŋ mlɛo kɛhaŋ eŋa lɛ hu akɛ ebaabu lɛ?

Eric: Efeɔ mi akɛ, kɛ́ akɛ ŋaawoo nɛɛ tsu nii lɛ ebaahi.

Brian: No hewɔ lɛ, eyɛ mli akɛ aŋma Biblia mli sane nɛɛ aaafee afii 2,000 nɛ moŋ, shi ekɛ ŋaawoo ni kɛ́ wu kɛ ŋa kɛtsu nii lɛ ebaahã miishɛɛ aba amɛshihilɛ mli lɛ hãa. Ni kɛ́ mawie nɔkwɛmɔnɔ ni wɔkane kɛtsɔ hiɛ lɛ he ekoŋŋ lɛ, “tsui kɛ flufla” ní hiɛ gbalashihilɛ lɛ ahe baawa.

Eric: Yɛ anɔkwale mli lɛ, milé akɛ saji ni tamɔ nɛkɛ yɛ Biblia lɛ mli.

Brian: Eric, eŋɔɔ minaa akɛ okpɛlɛ nɔ nakai. Masumɔ akɛ mikɛ bo akpe yɛ biɛ ekoŋŋ koni mana osusumɔ yɛ saneyitso bibioo ni ji “Gbɛi Ejwɛ ni Aaatsɔ nɔ Atsu Naagbai Ahe Nii” ni jeɔ kpo yɛ nakai sane lɛ ni yɔɔ wɔ-Wɛb saiti lɛ nɔ lɛ he. *

Eric: OK. Mikɛ miŋa fɛɛ baayakane.

Ani oyɛ Biblia mli sanebimɔ pɔtɛɛ ko ni miigba onaa? Ani oyiŋ etɛ̃ɛɛ bo yɛ Yehowa Odasefoi ahemɔkɛyelii kɛ jamɔŋ nifeemɔi ni amɛkɛ amɛhe woɔ mli lɛ eko he? Kɛ́ nakai lɛ, kaashashao shi akɛ obaabi Yehowa Odasefonyo ko. Ebaaŋɔɔ enaa akɛ ekɛ bo baasusu saji ni tamɔ nakai lɛ ahe.

^ kk. 63 Kɛhã enɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 14 lɛ.

Ekrokromɛi Hu Nɛ

Mɛɛ Gbɛ nɔ Wɔnáa Biblia mli Shishitoo Mlai Ahe Sɛɛ?

Yesu tsɔɔ nɔ hewɔ ni gbɛtsɔɔmɔ he hiaa wɔ kɛ Biblia mli shishitoo mlai enyɔ ni he hiaa titri.

Mɛni Hewɔ Esa akɛ Okase Biblia Lɛ?

Biblia lɛ miiye miibua mɛi akpekpei komɛi ni yɔɔ jeŋ fɛɛ lɛ kɛmiiná shihilɛ mli sanebimɔi titrii lɛ ahetoo. Ani obaasumɔ ni ofata mɛi nɛɛ ahe?