Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  January 2015

Wumɛi—Nyɛhãa Toiŋjɔlɛ Ahia Nyɛshĩai Amli

Wumɛi—Nyɛhãa Toiŋjɔlɛ Ahia Nyɛshĩai Amli

MƐNI esa akɛ nuu afee koni eŋa anu he akɛ eyɛ shweshweeshwe? Mɛi pii yɛ ni be ni amɛdaraa lɛ, nɔ ni nɔŋŋ ni atsɔɔ amɛ ji, esa akɛ wu aye abua eweku lɛ ni amɛná shika pii. Kɛ̃lɛ, ŋamɛi komɛi yɛ ni amɛyɛ heloonaa nibii babaoo, shi fɛɛ sɛɛ lɛ amɛnuɔ he akɛ asumɔɔɔ amɛ, ni amɛsheɔ gbeyei po. Akɛ nɔkwɛmɔnɔ lɛ, yoo ko ni jɛ Spain ni atsɛɔ lɛ Rosa lɛ wie yɛ nuu ni ekɛhi shi lɛ he akɛ, “Ekɛ mɛi kpɔ̃ji yeɔ jogbaŋŋ, shi yɛ shĩa lɛ, eji wu ni yitsoŋ wa.” Yoo ko ni atsɛɔ lɛ Joy ni jɛ Nigeria lɛ wie akɛ, “Kɛ́ mi kɛ miwu kpaaa gbee yɛ sane ko he lɛ, nɔ ni ekɛɔ ji, ‘Mi ji owu, no hewɔ lɛ esa akɛ ofee nɔ fɛɛ nɔ ni makɛɛ.’”

Te nuu aaafee tɛŋŋ etsu esɔ̃ akɛ wu lɛ he nii yɛ suɔmɔ mli? Mɛni kɛ́ wu fee lɛ, ebaahã toiŋjɔlɛ ahi eshĩa, ni efee he ko ni eŋa baanyɛ awo etsui yɛ?Rut 1:9.

NƆ NI BIBLIA LƐ KƐƆ YƐ HEGBƐ NI WU YƆƆ LƐ HE

Eyɛ mli akɛ yɛ Nyɔŋmɔ hiɛ lɛ, esorooo wu lɛ yɛ ŋa lɛ he moŋ, shi Biblia lɛ kɛɔ akɛ amɛteŋ mɔ fɛɛ mɔ yɛ nɔ ko pɔtɛɛ ni etsuɔ yɛ weku lɛ mli. Romabii 7:2 lɛ kɛɔ akɛ, kɛ́ yoo bote gbalashihilɛ mli pɛ lɛ, ebajeɔ “ewu mla” shishi. Taakɛ yɛ nitsumɔi babaoo amli lɛ, ahalaa mɔ ko ni enyiɛ hiɛ akɛ yitso lɛ, Nyɔŋmɔ ehala wu lɛ hu akɛ ŋa lɛ yitso. (1 Korintobii 11:3) Esa akɛ wumɛi anyiɛ hiɛ yɛ amɛwekui lɛ amli.

Wumɛi, te esa akɛ nyɛkɛ hegbɛ ni Nyɔŋmɔ kɛhã nyɛ lɛ atsu nii tɛŋŋ? Biblia lɛ kɛɔ akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ.” (Efesobii 5:25) Hɛɛ, eyɛ mli akɛ Yesu Kristo boteee gbalashihilɛ mli moŋ, shi enɔkwɛmɔnɔ lɛ baanyɛ aye abua bo ni otsɔ wu kpakpa. Hã wɔkwɛ bɔ ni baafee ni eba lɛ nakai.

YESU SHIHILƐ—NƆKWƐMƆNƆ NI NƆ BƐ KƐHÃ WUMƐI

Yesu tao akɛ ebaashɛje mɛi krokomɛi amii ni ehã amɛjatsui lɛ afee huyɛɛ. Yesu wo mɛi fɛɛ ni naa amanehulu ni amɛnaagbai lɛ miisu amɛtsui lɛ shi akɛ: “Nyɛbaa miŋɔɔ, . . . ni mahã nyɛ hejɔɔmɔ.” (Mateo 11:28, 29) Bei pii lɛ, etsuɔ amɛnaagbai lɛ ahe nii, ni eyeɔ ebuaa amɛ koni amɛnyɛ amɛbɛŋkɛ Nyɔŋmɔ. Ebɛ naakpɛɛ mɔ akɛ mɛi babaoo nyɛ amɛbɛŋkɛ Yesu, ejaakɛ amɛnu he akɛ ebaanyɛ ehã amɛjatsui lɛ afee huyɛɛ!

 Nɔ ni wumɛi baanyɛ afee kɛkase Yesu. Taomɔ gbɛi ni obaanyɛ otsɔ nɔ oye obua oŋa lɛ kɛtsu nitsumɔi ni eyɔɔ lɛ. Ŋamɛi komɛi nuɔ he tamɔ bɔ ni Rosa nu he, be ni ekɛɛ akɛ: “Mitamɔ abaawa kɛhã miwu lɛ.” Nɔ ni tamɔɔɔ nakai lɛ, nuu ko ni atsɛɔ lɛ Kweku, ni miishɛɛ yɔɔ eweku lɛ mli lɛ wie akɛ: “Bei pii lɛ mibiɔ miŋa nɔ ni manyɛ mafee kɛye mabua lɛ. Akɛni misumɔɔ lɛ hewɔ lɛ, bei pii lɛ miyeɔ mibuaa lɛ kɛtsuɔ shĩa nitsumɔi lɛ.”

Yesu susuɔ mɛi krokomɛi ahe ni enuɔ he ehãa amɛ. Hela ko ni jaraa egba yoo ohiafo ko naa afii 12 sɔŋŋ. Be ni enu Yesu naakpɛɛ nifeemɔi lɛ ahe lɛ, “ekɛɛ akɛ: Kɛji mina etade lɛ he mita kɛkɛ lɛ mihe aaawami.” Hɛɛ, esane ja. Etsi ebɛŋkɛ Yesu, eta etade naamuu lɛ he, ni amrɔ nɔŋŋ lɛ, ehe wa lɛ. Eyɛ mli akɛ eeenyɛ efee akɛ mɛi komɛi ni na nɔ ni tee nɔ lɛ mu sane naa akɛ nɔ ni yoo lɛ fee lɛ ejaaa moŋ, shi Yesu yɔse akɛ ehao. * Ejɛ mlihilɛ mli ekɛɛ lɛ akɛ: “Biyoo . . . ohela  lɛ aaajɔo.” Yesu wooo lɛ hiɛgbele, ni asaŋ ekãaa ehiɛ, moŋ lɛ eyɔse akɛ ehe miiye. Enɛ ni efee lɛ hã ana mɔ ni eji—nuu ni nuɔ he ehãa mɔ.Marko 5:25-34.

Nɔ ni wumɛi baanyɛ afee kɛkase Yesu. Kɛ́ oŋa he tseee lɛ, naa mli ohã lɛ, ni oto otsui shi ohã lɛ. Bɔɔ mɔdɛŋ ni okɛ ohe awo eshihilɛ lɛ mli, ni onu lɛ shishi. Akɛ nɔkwɛmɔnɔ lɛ, nuu ko ni atsɛɔ lɛ Ricardo lɛ kɛɛ akɛ, “Kɛ́ miyɔse akɛ miŋa mli ebɔi fumɔ mramra lɛ, mibɔɔ mɔdɛŋ waa koni mikawie nibii ni baahã emlifu lɛ mli awo wu.”

Yesu kɛ ekaselɔi lɛ gba sane. Yesu kɛ ekaselɔi lɛ, ni amɛji enanemɛi lɛ, gba nibii babaoo ahe sane. Ekɛɛ akɛ: “Nii fɛɛ ni minu yɛ mitsɛ naa lɛ, mitsĩ tã mikɛɛ nyɛ.” (Yohane 15:15) Eji anɔkwale akɛ, bei komɛi lɛ Yesu sumɔ ni lɛ pɛ ehi he ko ni ejwɛŋ nibii anɔ ni esɔle. Shi bei pii lɛ, ekɛ ekaselɔi lɛ gbaa nibii ni yɔɔ etsui mli lɛ ahe sane. Gbi gbɛkɛ dani ni abu lɛ fɔ akɛ efɔŋfeelɔ ni agbe lɛ lɛ, ekɛɛ amɛ yɛ faŋŋ mli akɛ, ‘ehao’ waa. (Mateo 26:38) Be ni Yesu kaselɔi lɛ kɛ amɛnifeemɔ hã enine nyɛ shi po lɛ, Yesu kɛ amɛ efɔ̃ɔɔ sanegbaa.Mateo 26:40, 41.

Kɛ́ nuu ko jwɛŋ Yesu nɔkwɛmɔnɔ lɛ nɔ lɛ, ebaanyɛ eye ebua lɛ ni etsɔ wu kɛ tsɛ kpakpa

Nɔ ni wumɛi baanyɛ afee kɛkase Yesu. Jɛɛ otsuiŋ okɛ oŋa lɛ agba sane. Yoo ko baanyɛ awie akɛ, ewaaa kɛhãaa ewu akɛ ekɛ mɛi aaagba sane, shi kɛ́ eshɛ shĩa pɛ emɔ enaa. Shi kadimɔ bɔ ni yoo ko ni atsɛɔ lɛ Ana lɛ nuɔ he ehãa kɛ́ ewu hã ele nibii ni yɔɔ etsui mli. Ekɛɛ akɛ: “Ehãa minuɔ he akɛ esumɔɔ mi waa, ni minuɔ he akɛ mibɛŋkɛ lɛ kpaakpa.”

Okɛ oŋa lɛ akahi naa kɛ susumɔ lɛ akɛ okɛ miigbala etoi. Yoo ko wie akɛ: “Kɛ́ miwu mli fũ mi lɛ, ekɛ mi ewieee gbii pii. Ehãa minuɔ he akɛ misane ejaaa ni esumɔɔɔ misane.” Shi wu ko ni atsɛɔ lɛ Edwin lɛ bɔɔ mɔdɛŋ akɛ ebaakase Yesu nɔkwɛmɔnɔ lɛ. Ewie akɛ: “Kɛ́ mimli fũ lɛ mijieee saji anaa amrɔ nɔŋŋ, shi mimɛɔ kɛyashiɔ be ni sa, kɛkɛ lɛ wɔwie naagba lɛ he.”

Joy ni atsi etã yɛ sane nɛɛ shishijee gbɛ lɛ ena akɛ, kɛjɛ be ni Yehowa Odasefoi kɛ ewu bɔi Biblia lɛ kasemɔ nɛɛ, efee tsakemɔi. Joy kɛɛ akɛ, “Amrɔ nɛɛ eekase Yesu nɔkwɛmɔnɔ lɛ, no hewɔ lɛ efee tsakemɔi pii, ni eebɔ mɔdɛŋ ni efee wu ni yɔɔ suɔmɔ babaoo.” Gbalashihilɛ mli bii akpekpei abɔ miiná Biblia mli tsɔsemɔ ni tamɔ nɛkɛ lɛ he sɛɛ waa. Ani obaasumɔ ni ofata amɛhe? Obaanyɛ obi Yehowa Odasefonyo ko ni ekɛ bo akase Biblia lɛ yaka.

^ kk. 10 Yɛ Mose Mla lɛ naa lɛ, shihilɛ mli ni yoo nɛɛ yɔɔ hã efee mɔ ni he tseee, ni abaabu mɔ fɛɛ mɔ ni yoo lɛ baata ehe lɛ hu akɛ ehe tseee.3 Mose 15:19, 25.