Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JANUARY 2015

Ani Ole?

Ani Ole?

Mɛni wiemɔ “piafonyo” ni akɛtsu nii yɛ Biblia lɛ mli lɛ tsɔɔ?

Piafonyo ko he mfoniri ni Asiriabii kpɛ

Bei komɛi lɛ, wiemɔ nɛɛ baanyɛ akɔ nuu ko ni asa lɛ lɛ he. Yɛ blema lɛ, asaa hii komɛi ní akɛgbala amɛtoi, ni kɛ́ amɔmɔ mɛi komɛi yɛ ta mli loo aŋɔ amɛ nom lɛ, asaa amɛ. Asaa hii ni amuɔ afɔ̃ɔ amɛ nɔ lɛ koni amɛkwɛ yei awe, loo maŋtsɛ ko ŋamɛi ni yɔɔ maŋtsɛwe lɛ nɔ. Akɛ nɔkwɛmɔnɔ lɛ, Hegai kɛ Shaashgaz ni ji piafoi lɛ kwɛ Persia Maŋtsɛ Ahashwerosh, ni asusuɔ akɛ lɛ ji Xerxes I lɛ, ŋamɛi kɛ ehemɛi lɛ anɔ.Ester 2:3, 14.

Shi jeee mɛi fɛɛ ní atsɛ amɛ akɛ piafoi yɛ Biblia lɛ mli lɛ ji mɛi ni asa amɛ. Woloŋlelɔi komɛi kɛɔ akɛ, akɛ wiemɔ nɛɛ tsuɔ nii kɛkɔɔ maŋ onukpai ni ahãa amɛ nitsumɔ yɛ maŋtsɛwe lɛ hu ahe. Etamɔ nɔ ni shishinumɔ nɛɛ naa hewɔ akɛ wiemɔ nɛɛ tsu nii kɛkɔ Ebed-Melek, ni ji Yeremia naanyo lɛ, kɛ Etiopianyo ni atsiii egbɛ́i tã ni sane kpakpa jajelɔ Filipo shiɛ ehã lɛ lɛ he lɛ. Ekã shi faŋŋ akɛ no mli lɛ Ebed-Melek ji maŋ onukpa ni yɔɔ gbɛnaa waa, ejaakɛ enyɛɔ eyaa Maŋtsɛ Zedekia ŋɔɔ tɛ̃ɛ ekɛlɛ yawieɔ. (Yeremia 38:7, 8) Ni awie Etiopianyo ni ‘tee Yerusalem eyajá Nyɔŋmɔ’ lɛ hu he akɛ mɔ ni kwɛɔ jwetri nɔ yɛ maŋnyɛwe lɛ.Bɔfoi lɛ Asaji 8:27.

Mɛni hewɔ tookwɛlɔi ni hi shi yɛ blema lɛ gbalaa gwantɛŋi kɛ abotiai amli lɛ?

Be ni Yesu wieɔ kojomɔ ni baaba wɔsɛɛ lɛ he lɛ, ekɛɛ akɛ: ‘Be ni gbɔmɔ bi lɛ aaaba yɛ enunyam lɛ mli lɛ, eeegbala gbɔmɛi amli taakɛ bɔ ni tookwɛlɔ gbalaa gwaŋtɛŋi kɛ abotiai amli lɛ.’ (Mateo 25:31, 32) Mɛni hewɔ tookwɛlɔi gbalaa tooi nɛɛ amli lɛ?

Bei pii lɛ, akpalaa gwantɛŋi kɛ abotiai fɛɛ kɛfutuɔ, ni ahãa amɛyeɔ nii yɛ hekome yɛ gbi lɛ mli. Kɛ́ shɛ gbɛkɛ lɛ, abuaa amɛnaa awoɔ he ko ni afo he koni akɛbu amɛhe kɛjɛ kooloi awuiyelɔi, julɔi, kɛ fɛ̃i he. (1 Mose 30:32, 33; 31:38-40) Agbalaa tooi srɔtoi enyɔ nɛɛ amli koni akɛbu gwantɛŋi ni he jɔ, titri lɛ gwantɛŋi yei kɛ amɛbii bibii lɛ ahe, koni abotiai ni hiɛ yɔɔ laŋlaŋ lɛ akapila amɛ. Wolo ko (All Things in the Bible) tsɔɔ mli akɛ, tookwɛlɔ lɛ tseɔ gwantɛŋi lɛ kɛjɛɔ abotiai lɛ ahe kɛ́ “eshɛ amɛfɔ beaŋ, kɛ́ aaŋa amɛfufɔ, kɛ agbɛnɛ kɛ́ aaku amɛhe tsɔi.” No hewɔ lɛ, nɔkwɛmɔnɔ ni Yesu kɛtsu nii lɛ damɔ nifeemɔi ni mɛi ni hi shi yɛ blema Israel lɛ fɔɔ namɔ loo amɛfeɔ lɛ nɔ, ejaakɛ alɛɔ tooi waa yɛ jɛmɛ.