Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JANUARY 2015

Ani Esa akɛ Wɔsɔle Wɔhã Yesu?

Ani Esa akɛ Wɔsɔle Wɔhã Yesu?

NYƐSƐƐ nɛɛ, niiamlitaolɔ ko bi oblahii kɛ oblayei ni fa fe 800 ni jɛ jamɔi srɔtoi amli lɛ sane, ebi amɛ kɛji amɛheɔ amɛyeɔ akɛ Yesu hãa sɔlemɔi ahetoo. Amɛteŋ mɛi ni fa fe oha mlijaa 60 hã hetoo akɛ amɛheɔ amɛyeɔ akɛ Yesu hãa sɔlemɔi ahetoo. Shi amɛteŋ mɔ kome fo Yesu gbɛ́i lɛ mli, ni eŋma “Nyɔŋmɔ.”

Te osusuɔ tɛŋŋ? Ani esa akɛ wɔsɔle wɔhã Yesu aloo Nyɔŋmɔ? * Kɛhã hetoo lɛ, klɛŋklɛŋ lɛ hã wɔsusu bɔ ni Yesu tsɔɔ ekaselɔi lɛ akɛ amɛsɔle lɛ he.

NAMƆ YESU TSƆƆ WƆ AKƐ WƆSƆLE WƆHÃ?

Yesu tsɔɔ wɔ mɔ ni esa akɛ wɔsɔle wɔhã, ni efee he nɔkwɛmɔnɔ.

Sɔlemɔ ni Yesu sɔle ehã eŋwɛi Tsɛ lɛ ji nɔkwɛmɔnɔ kɛhã wɔ fɛɛ

ENITSƆƆMƆ: Be ni Yesu kaselɔi lɛ ateŋ mɔ kome bi lɛ akɛ, “Nuŋtsɔ, tsɔɔmɔ wɔ sɔlemɔ” lɛ, Yesu hã hetoo akɛ: “Kɛ́ nyɛmiisɔle lɛ, nyɛkɛa akɛ: Wɔtsɛ ni yɔɔ ŋwɛi.” (Luka 11:1, 2) Kɛfata he lɛ, yɛ Yesu Gɔŋ nɔ Shiɛmɔ ni ehe gbɛ́i waa lɛ mli lɛ, ewo etoibolɔi lɛ hewalɛ ni amɛsɔle. Ekɛɛ akɛ: ‘Nyɛsɔlea nyɛhãa nyɛtsɛ lɛ.’ Esaa ema nɔ mi kɛhã amɛ akɛ: “Nyɛtsɛ lɛ le nii ni hiaa nyɛ dani nyɛbiɔ lɛ.” (Mateo 6:6, 8) Yesu kɛɛ ekaselɔi lɛ yɛ gbi gbɛkɛ dani agbe lɛ lɛ nɔ akɛ: “Nɔ fɛɛ nɔ he fai ni nyɛaakpa tsɛ lɛ yɛ migbɛi anɔ lɛ, eeehã nyɛ.” (Yohane 16:23) Eyɛ faŋŋ akɛ Yesu tsɔɔ wɔ ni wɔsɔle wɔhã Yehowa Nyɔŋmɔ, mɔ ni ji e-Tsɛ kɛ wɔ hu wɔ-Tsɛ lɛ.Yohane 20:17.

ENƆKWƐMƆNƆ: Taakɛ bɔ ni Yesu tsɔɔ mɛi krokomɛi ni amɛsɔle lɛ, lɛ diɛŋtsɛ hu esɔle nakai, esɔle akɛ: “Miijie oyi, Ataa, ŋwɛi kɛ shikpɔŋ Nuŋtsɔ.” (Luka 10:21) Yɛ be kroko mli lɛ, “Yesu hole ehiŋmɛii anɔ kɛtee ŋwɛi ni ekɛɛ: Ataa, miidao shi akɛ obo mi toi.” (Yohane 11:41) Ni be ni Yesu heɔ agbo lɛ, esɔle akɛ: “Ataa, odɛŋ mituɔ mimumɔ miwoɔ.” (Luka 23:46) Sɔlemɔ ni Yesu sɔle ehã eŋwɛi Tsɛ, ni ji “ŋwɛi kɛ shikpɔŋ nuŋtsɔ” lɛ, ji nɔkwɛmɔnɔ kɛhã wɔ fɛɛ. (Mateo 11:25; 26:41, 42; 1 Yohane 2:6) Ani nakai ji bɔ ni Yesu mra beaŋ kaselɔi lɛ nu famɔi ni ekɛhã lɛ shishi?

NAMƆ MRA BEAŊ KASELƆI LƐ SƆLE AMƐHÃ?

Otsii komɛi asɛɛ be ni Yesu ekwɔ kɛtee ŋwɛi lɛ, mɛi ni teɔ shi woɔ ekaselɔi lɛ wa amɛyi ni amɛwo amɛhe gbeyei. (Bɔfoi lɛ Asaji 4:18) Ekã shi faŋŋ akɛ, amɛsɔle kɛbi yelikɛbuamɔ—shi namɔ amɛsɔle amɛhã? “Amɛkɛ jwɛŋmɔ kome hole amɛgbeei anɔ amɛhã Nyɔŋmɔ” ni amɛsɔle koni ‘etsɔ etsulɔ krɔŋkrɔŋ Yesu lɛ gbɛ́i anɔ’ eya nɔ eye ebua amɛ. (Bɔfoi lɛ Asaji 4:24, 30) No hewɔ lɛ, Yesu sɛɛnyiɛlɔi lɛ kɛ gbɛtsɔɔmɔi ni ekɛhã yɛ sɔlemɔ he lɛ tsu nii. Amɛsɔle amɛhã Nyɔŋmɔ, jeee Yesu.

Afii komɛi asɛɛ lɛ, bɔfo Paulo tsɔɔ bɔ ni ekɛ enanemɛi lɛ sɔle amɛhã lɛ mli. Be ni eŋmaa wolo eyahã enyɛmimɛi Kristofoi lɛ, ekɛɛ akɛ: “Wɔdaa Nyɔŋmɔ kɛ wɔ-Nuŋtsɔ Yesu Kristo tsɛ lɛ shi yɛ nyɛhewɔ daa nɛɛ yɛ wɔsɔlemɔi amli.” (Kolosebii 1:3) Paulo ŋma enanemɛi héyelilɔi lɛ hu ni ‘amɛda Nyɔŋmɔ kɛ tsɛ lɛ shi daa yɛ nii fiaa hewɔ yɛ wɔ-Nuŋtsɔ Yesu Kristo gbɛ́i amli.’ (Efesobii 5:20) Wiemɔi nɛɛ hãa wɔnaa akɛ Paulo wo mɛi krokomɛi  hewalɛ ni amɛsɔle amɛhã ‘e-Nyɔŋmɔ kɛ etsɛ lɛ yɛ nii fiaa hewɔ’—shi kɛtsɔ Yesu gbɛ́i amli.Kolosebii 3:17.

Taakɛ mra beaŋ Kristofoi lɛ fee lɛ, wɔbaanyɛ wɔtsɔɔ akɛ wɔsumɔɔ Yesu kɛtsɔ ŋaawoo ni ekɛhã yɛ sɔlemɔ he lɛ ni wɔkɛbaatsu nii lɛ nɔ. (Yohane 14:15) Be ni wɔyaa nɔ wɔsɔleɔ wɔhãa wɔŋwɛi Tsɛ lɛ—ni wɔsɔleɔ wɔhãa lɛ pɛ lɛ,—wɔbaaná nɔmimaa akɛ Yehowa baabo wɔsɔlemɔi lɛ atoi taakɛ Lala 116:1, 2 lɛ tsɔɔ lɛ, jɛmɛ kɛɔ akɛ: ‘Miisumɔ Yehowa, ejaakɛ ebo migbee toi, gbiiabɔ ni mihiɛ kã nɛɛ, lɛ mabolɔ matsɛ.’ *

^ kk. 3 Ŋmalɛi lɛ tsɔɔ akɛ Nyɔŋmɔ kɛ Yesu yeee egbɔ. Kɛhã enɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ yitso 4 lɛ.

^ kk. 11 Kɛ́ Nyɔŋmɔ baakpɛlɛ wɔsɔlemɔi anɔ lɛ, esa akɛ wɔtswa wɔfai shi akɛ wɔbaahi shi yɛ etaomɔ nii lɛ anaa. Kɛhã enɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? lɛ yitso 17 lɛ.

Ekrokromɛi Hu Nɛ

Kɛ́ Misɔle lɛ, Ani Nyɔŋmɔ Baaye Abua Mi?

Ani Nyɔŋmɔ susuɔ wɔnaagbai lɛ ahe lɛɛlɛŋ?

Tsi Obɛŋkɛ Nyɔŋmɔ yɛ Sɔlemɔ Mli

Kɛ́ osɔle lɛ, ani Nyɔŋmɔ boɔ toi? Esa akɛ ole nɔ ni Biblia lɛ tsɔɔ yɛ sɔlemɔ he, koni onyɛ ohã nakai sanebimɔ lɛ hetoo.