Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ DECEMBER 2014

 SANEYITSO LƐ MLITSƆƆMƆ | OBAANYƐ OBƐŊKƐ NYƆŊMƆ

Ani Ole Nyɔŋmɔ Gbɛ́i ni Okɛtsuɔ Nii?

Ani Ole Nyɔŋmɔ Gbɛ́i ni Okɛtsuɔ Nii?

Ani oyɛ onaanyo waa ko ni olé egbɛ́i? Enyɛŋ eba lɛ nakai. Yoo ko ni jɛ Bulgaria ni atsɛɔ lɛ Irina lɛ kɛɛ akɛ, “Kɛ́ olé Nyɔŋmɔ gbɛ́i lɛ, onyɛŋ otsɔ enaanyo.” Miishɛɛ sane ji akɛ, taakɛ awie yɛ sane ni tsɔ enɛ hiɛ lɛ mli lɛ, Nyɔŋmɔ miisumɔ ni otsi obɛŋkɛ lɛ. Enɛ hewɔ lɛ, etsɔ Biblia lɛ nɔ ejie ehe shi etsɔɔ bo, ekɛɔ akɛ: “Mi ji Yehowa, migbɛ́i ji no.”Yesaia 42:8.

Nyɔŋmɔ etsɔ Biblia lɛ nɔ ejie ehe shi etsɔɔ bo, ekɛɔ akɛ: “Mi ji Yehowa, migbɛ́i ji no.”Yesaia 42:8

Ani Yehowa gbɛ́i lɛ ni wɔɔle ni wɔkɛaatsu nii lɛ he miihia lɛ? Susumɔ enɛ he: Nyɔŋmɔ gbɛ́i lɛ ni akɛ Hebri niŋmaa okadii ejwɛ eŋma lɛ ni atsɛɔ lɛ Tetragrammaton lɛ jeɔ kpo yɛ Hebri Ŋmalɛi lɛ amli aaashɛ shii 7,000. No ji gbɛ́i ni atsi tã fe fɛɛ yɛ Biblia lɛ mli fɛɛ. Enɛ ji odaseyeli ni tsɔɔ faŋŋ akɛ Yehowa miisumɔ ni wɔle egbɛ́i lɛ ni wɔkɛtsu nii. *

Bei pii lɛ, kɛ́ mɛi enyɔ komɛi le amɛgbɛ́i pɛ kɛkɛ lɛ, naanyobɔɔ eje shishi. Ani ole Nyɔŋmɔ gbɛ́i?

Ekolɛ yɛ enɛ fɛɛ sɛɛ lɛ, mɛi komɛi baanu he akɛ Nyɔŋmɔ yɛ krɔŋŋ ni eji ofe, no hewɔ lɛ bulɛ bɛ mli ákɛ akɛ egbɛ́i lɛ baatsu nii. Eji anɔkwale akɛ, ebafeŋ nɔ ni sa ákɛ akɛ Nyɔŋmɔ gbɛ́i lɛ baatsu nii yɛ gbɛ gbonyo nɔ tamɔ bɔ ni okɛ onaanyo ni bɛŋkɛ bo kpaakpa lɛ gbɛ́i tsuŋ nii yɛ gbɛ gbonyo nɔ lɛ nɔŋŋ. Kɛ̃lɛ, Yehowa miisumɔ ni mɛi ni sumɔɔ lɛ lɛ awo egbɛ́i lɛ hiɛ nyam, ni amɛhã mɛi krokomɛi ale egbɛ́i lɛ. (Lala 69:31, 32; 96:2, 8) Kaimɔ akɛ Yesu tsɔɔ esɛɛnyiɛlɔi lɛ ni amɛsɔle akɛ: “Wɔtsɛ ni yɔɔ ŋwɛi, ogbɛ́i lɛ he atse.” Wɔ hu wɔbaanyɛ wɔtse Nyɔŋmɔ gbɛ́i lɛ he kɛtsɔ le ni wɔɔhã mɛi ale lɛ nɔ. Kɛ́ wɔfee nakai lɛ, ebaahã wɔtsi wɔbɛŋkɛ Nyɔŋmɔ kpaakpa.Mateo 6:9.

Biblia lɛ tsɔɔ akɛ Nyɔŋmɔ boɔ ‘mɛi ni jwɛŋɔ egbɛ́i lɛ he loo amɛbuɔ egbɛ́i lɛ waa lɛ’ atoi waa. (Maleaki 3:16) Yehowa woɔ shi yɛ mɔ ni feɔ nakai lɛ he akɛ: ‘Mɔ ni le migbɛ́i lɛ mabu ehe. Kɛji etsɛ mi lɛ, mahere lɛ nɔ. Mikɛ lɛ aaahi shi yɛ haomɔ mli.’ (Lala 91:14, 15) Kɛji wɔmiisumɔ ni wekukpaa ni bɛŋkɛ kpaakpa akã wɔ kɛ Yehowa teŋ lɛ, no lɛ ehe miihia ni wɔle egbɛ́i lɛ ni wɔkɛtsu nii.

^ kk. 4 Mɔbɔ sane ji akɛ, ajie Nyɔŋmɔ gbɛ́i lɛ kɛjɛ Biblia shishitsɔɔmɔi pii amli yɛ bɔ ni eje kpo shii abɔ yɛ Hebri Ŋmalɛi ni afɔɔ lɛ tsɛmɔ akɛ Kpaŋmɔ Momo lɛ mli lɛ fɛɛ sɛɛ. Nɔ najiaŋ ni amɛkɛ gbɛ́i ni ji Yehowa lɛ baatsu nii lɛ, amɛkɛ gbɛnaa gbɛ́i tamɔ “Nuŋtsɔ” loo “Nyɔŋmɔ” moŋ tsu nii. Kɛ́ ootao enɛ he saji babaoo lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ baafa 195-197 lɛ.