Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  November 2014

 KASEMƆ AMƐHEMƆKƐYELI LƐ | YOSEF

‘Te Aaafee Tɛŋŋ Mafee Efɔŋ Kpeteŋkpele ni Tamɔ Nɛkɛ?’

‘Te Aaafee Tɛŋŋ Mafee Efɔŋ Kpeteŋkpele ni Tamɔ Nɛkɛ?’

YOSEF mu waa be ni enu fɔfɔii ni egba kɛ tsei krokomɛi ni kwɛ̃ɔ yɛ nu hiɛ lɛ aŋma lɛ. Jarayelɔi komɛi ni kɛ amɛkooloi nyiɛ lɛ kɛlɛ miiya, amrɔ nɛɛ amɛmiifo mli kɛmiitsɔ Nilo faa babaoo ni bua shi lɛ jɔɔ mli gbɛ. Feemɔ hii komɛi ni kɛ amɛ-afukpɔŋɔi nyiɛ faa ko he kɛmiiya Mizraim maŋ kroko mli, ní bei komɛi lɛ anaa faa naa loofɔji srɔtoi miifiliki kɛmiiya kɛmiiba yɛ jɛmɛ lɛ he mfoniri yɛ ojwɛŋmɔŋ okwɛ. Shi kome ekoŋŋ lɛ, Yosef susu eshĩa ni yɔɔ Hebron gɔji lɛ anɔ, ní kɛ he ni enyiɛ lɛ jekɛmɔ aaashɛ shitoi ohai abɔ lɛ he; amrɔ nɛɛ eyɛ he kroko kwraa.

Feemɔ aduji ni miifo sa ni miibolɔ yɛ amitsrɔbi kɛ agbamitsei ni yɔɔ jɛmɛ lɛ anɔ lɛ he mfoniri okwɛ. Yɛ Yosef gbɛfaŋ lɛ, etamɔ nɔ ni shishinumɔ ko kwraa bɛ wiemɔ ni mɛi ni amɛkɛkpeɔ lɛ wieɔ lɛ mli. Ekolɛ ebɔ mɔdɛŋ akɛ ebaanu nibii ni amɛwieɔ lɛ ekomɛi ashishi. Ekolɛ, ebɔ mɔdɛŋ akɛ ekase. Eyiŋ fɛɛ lɛ, ekuŋ esɛɛ kɛbaŋ shĩa dɔŋŋ.

No mli lɛ, Yosef ji gbekɛ nuu ni eye afii 17 loo 18 pɛ moŋ, shi ekɛ shihilɛ ko ni kɛ́ mɛi ni edara po kɛkpe lɛ, amɛnaŋ lɛ mlɛo lɛ kpe. Lɛ diɛŋtsɛ enyɛmimɛi lɛ ye ehe awuŋa akɛni lɛ ji mɔ ni amɛpapa sumɔɔ waa lɛ hewɔ, shwɛ fioo kulɛ, amɛgbe lɛ. No najiaŋ lɛ, amɛhɔ̃ɔ lɛ amɛhã jarayelɔi nɛɛ. (1 Mose 37:2, 5, 18-28) Bianɛ ni jarayelɔi lɛ kɛ otsii abɔ efã gbɛ lɛ, ekã shi faŋŋ akɛ amɛbaaná miishɛɛ waa ejaakɛ amɛbɛŋkɛ maŋ ni amɛbaafee shika yɛ lɛ, ni ji he ni amɛbaahɔ̃ɔ Yosef kɛ amɛjarayeli nibii lɛ yɛ lɛ. Te Yosef aaafee tɛŋŋ ekpee nijiaŋwujee kɛ tsui kuumɔ shihilɛ ni eyaje mli nɛɛ naa lɛ? Ni ŋmɛnɛ lɛ, kɛ́ wɔkɛ shihilɛ mli naagbai kɛ nijiaŋwujee kpe lɛ, te wɔɔfee tɛŋŋ wɔkpee naa koni amɛkafite wɔhemɔkɛyeli lɛ? Nibii babaoo yɛ ni wɔbaakase yɛ Yosef he.

“YEHOWA KƐ YOSEF YƐ”

“Ni akɛ Yosef tee Mizraim, ni Farao piafonyo kɛ eblafoi atsɛ Potifar ni ji Mizraimnyo lɛ he lɛ yɛ Ishmaelbii lɛ ni kɛ lɛ ba jɛi lɛ adɛŋ.” (1 Mose 39:1) Biblia mli amaniɛbɔɔ fioo nɛɛ yeɔ ebuaa wɔ ni wɔfeɔ bɔ ni ashwie oblanyo fioo nɛɛ hiɛ shi ahã kɛtsɔ hɔ̃ɔmɔ ni ahɔ̃ɔ lɛ ekoŋŋ lɛ nɔ lɛ he mfoniri. Eji jwetri kɛkɛ! Wɔbaanyɛ wɔsusu Yosef he ni enyiɛ Mizraim piafonyo ko ni ji enuŋtsɔ hee lɛ sɛɛ kɛnyiɛ gbɛjegbɛ ni mɛi etsĩ yɛ nɔ lɛ nɔ kɛmiiya he ni baafee eshĩa hee lɛ.

Shĩa mli shĩa! Yosef enako shĩa tamɔ nɛkɛ pɛŋ. Eda yɛ weku ko ni lɛɔ tooi ni wɔɔ buui amli lɛ mli, akɛni amɛfãa kɛyaa hei kɛ amɛtooi lɛ akwɛmɔ hewɔ lɛ, amɛhiii he kome. Shi, he ni akɛlɛ eba nɛɛ, ji he ni Mizraimbii niiatsɛmɛi tamɔ Potifar lɛ yɔɔ, yɛ shĩai wujiwuji ni asha he fɛfɛo lɛ amli. Mɛi ni tsaa shi amɛtaoɔ blema nibii lɛ bɔ amaniɛ akɛ blema Mizraimbii lɛ sumɔɔ abɔɔ ni yɔɔ haŋtsii ni atswa gbogbo awo he kɛ emli tsei ni hãa hɔŋ, ní nu ni akɛduɔ fɔfɔi kɛ tsei krokomɛi hu yɛ mli lɛ afeemɔ waa. Shĩai lɛ ekomɛi yɛ abɔi yɛ afã gbɛ kwraa, ablanaai ni anyɛɔ ataa jɛmɛ ahereɔ kɔɔyɔɔ yɛ shĩai lɛ amli, samfɛji wujiwuji yɛ tsũi lɛ ahe bɔ ni afee ni kɔɔyɔɔ anyɛ aba tsũi lɛ amli, tsũi pii yɛ shĩai lɛ amli, shĩai lɛ ekomɛi yɛ asai agboi kɛ hei ni ataa ayeɔ nii kɛ tsũi ni tsuji wɔɔ mli.

 Ani bɔ ni shĩa lɛ yɔɔ haŋtsii lɛ hã Yosef ná miishɛɛ? Enyɛŋ eba lɛ nakai. Wɔbaanyɛ wɔwie akɛ, ekolɛ ehe fee shoo. Soro Mizraimbii lɛ awiemɔ, amɛtadewoo kɛ hesaamɔ, ni esoro amɛjamɔ lɛ yɛ enɔ lɛ he. Amɛjáa wɔji srɔtoi babaoo, ni amɛkɛ amɛhe woɔ mumɔi atsɛmɔ nifeemɔi kɛ ashwai anifeemɔi amli, amɛyɛ gbele kɛ shihilɛ ni yaa nɔ yɛ gbele sɛɛ lɛ he miishɛɛ waa. Kɛ̃lɛ, nɔ kome ye ebua Yosef ni enyɛ eye eshoofeemɔ lɛ nɔ. Biblia mli amaniɛbɔɔ lɛ kɛɔ wɔ akɛ: “Yehowa kɛ Yosef yɛ.” (1 Mose 39:2) Ekã shi faŋŋ akɛ, Yosef jɛ etsuiŋ esɔle ehã e-Nyɔŋmɔ lɛ. Biblia lɛ wieɔ akɛ: ‘Yehowa bɛŋkɛ mɛi fɛɛ ni tsɛɔ lɛ lɛ.’ (Lala 145:18) Mɛɛ gbɛ kroko nɔ Yosef tsɔ ebɛŋkɛ e-Nyɔŋmɔ lɛ?

Oblanyo fioo lɛ tswa efai shi akɛ ehaŋ enijiaŋ aje wui, ni ebɔ mɔdɛŋ akɛ ekɛ ehewalɛ fɛɛ baatsu enitsumɔ lɛ. Enɛ hã Yehowa jɔɔ enitsumɔi lɛ anɔ, ni etsɛɛɛ kwraa ni enuŋtsɔ lɛ basumɔ esane. Potifar na akɛ Yehowa, ni ji Yosef maŋbii lɛ a-Nyɔŋmɔ lɛ miijɔɔ etsulɔ fioo nɛɛ, ni ekã shi faŋŋ akɛ jɔɔmɔi nɛɛ kɛ shweremɔ babaoo ba Potifar shĩa lɛ. Fiofio lɛ, Potifar ni ji Yosef nuŋtsɔ lɛ basumɔ esane waa, ni etu nɔ fɛɛ nɔ ni eyɔɔ lɛ ewo oblanyo ni sa nɛɛ dɛŋ.1 Mose 39:3-6.

Yosef fee nɔkwɛmɔnɔ ko ni sa waa ehã oblahii kɛ oblayei ni sɔmɔɔ Nyɔŋmɔ ŋmɛnɛ lɛ. Akɛ nɔkwɛmɔnɔ lɛ, kɛ́ amɛtee skul lɛ, ekolɛ amɛbaayaje shihilɛ ko ni yɔɔ srɔto loo shihilɛ ko ni baahã amɛhiɛ afee amɛ yaa mli bei komɛi, ekolɛ amɛbaana nibii komɛi ni tsɔɔ akɛ hiɛnɔkamɔ bɛ shihilɛ mli loo ní mɛi kɛ amɛhe miiwo mumɔŋ atsɛmɔ nifeemɔi amli. Kɛ́ oyɛ shihilɛ ni tamɔ nɛkɛ mli lɛ, kaimɔ akɛ Yehowa tsakeko. (Yakobo 1:17) Ekã he eyeɔ ebuaa mɛi fɛɛ ni yeɔ lɛ anɔkwa, ní miimia amɛhiɛ koni amɛtsu nii waa yɛ gbɛ ni saa ehiɛ lɛ nɔ. Ejɔɔ amɛ babaoo, ni ebaajɔɔ bo hu.

Amaniɛbɔɔ lɛ kɛɔ wɔ akɛ, no mli lɛ Yosef miida. Oblanyo lɛ batsɔ nuu ní ‘mli ti, ni he yɔɔ fɛo’ hu. Wiemɔi nɛɛ tsɔɔ akɛ oshara miiba, ejaakɛ bei pii lɛ, gbɔmɔtsoŋ hefɛo gbalaa mɛi ajwɛŋmɔ yɛ gbɛ ni esaaa nɔ.

Potifar ŋa lɛ gbala ejwɛŋmɔ kɛtee oblanyo fioo Yosef, ni yeɔ anɔkwa lɛ nɔ

“EBOOO LƐ TOI”

Anɔkwayeli jara wa waa kɛhã Yosef; shi yɛ Potifar ŋa lɛ gbɛfaŋ lɛ, anɔkwayeli jeee nɔ ko. Wɔkaneɔ akɛ: “Enuŋtsɔ ŋa lɛ jie ehiɛ eka Yosef ekɛɛ: Okɛ mi abawɔ!” (1 Mose 39:7) Ani Yosef ka akɛ ebaakpɛlɛ mɔdɛŋ ni yoo wɔŋjalɔ nɛɛ bɔ akɛ ekɛlɛ awɔ lɛ nɔ? Biblia lɛ ewieee nɔ ko ni tsɔɔ akɛ Yosef bɛ henumɔi kɛ shwelɛi ni oblahii náa lɛ eko, ni etsɔɔɔ hu akɛ yoo nɛɛ ni ji piafonyo ni yɔɔ mɛi anɔ hewalɛ, ni yɔɔ nii waa nɛɛ ŋa, ni ahiɛ lɛ fɔfɔɔle lɛ he bɛ fɛo. Ani Yosef susu akɛ enuŋtsɔ lɛ nyɛŋ  ale? Ani esusu heloonaa nibii babaoo ni ebaaná kɛ́ ekɛ yoo lɛ ná bɔlɛ lɛ he?

Yɛ anɔkwale mli lɛ, wɔnyɛŋ wɔle nibii fɛɛ ni tee nɔ yɛ Yosef jwɛŋmɔ mli. Shi wɔle nɔ diɛŋtsɛ ni yɔɔ etsui mli. Ana enɛ faŋŋ yɛ hetoo ni ekɛhã lɛ mli: “Naa, minuŋtsɔ kwɛɛɛ nɔ ni yɔɔ midɛŋ yɛ shĩa nɛɛ, ni etu nii ni eyɔɔ fɛɛ ewo midɛŋ; mɔ ko mɔ ko bɛ ni fe mi yɛ shĩa nɛɛ, ni ekamaaa mi nɔ ko nɔ ko, akɛ ja bo kɛkɛ, ejaakɛ bo lɛ eŋa jio. Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔŋ?” (1 Mose 39:8, 9) Feemɔ oblanyo lɛ ni ekɛ ekãa miiwie wiemɔi nɛɛ he mfoniri okwɛ. Kɛ́ esusu nɔ ni yoo lɛ taoɔ ni efee lɛ he lɛ, edɔɔ lɛ waa. Mɛni hewɔ?

Taakɛ Yosef kɛɛ lɛ, enuŋtsɔ lɛ heɔ lɛ eyeɔ. Potifar kɛ eshĩa lɛ mli nɔ fɛɛ nɔ ewo Yosef dɛŋ, ja eŋa pɛ. Mɛni hewɔ Yosef baafite hekɛnɔfɔɔ nɛɛ? Enyɛ nakai susumɔ waa. Shi nɔ kroko hu yɛ ni hã enyɛ susumɔ nɛɛ waa lɛ: no ji akɛ, ní ebaafee esha eshi Yehowa e-Nyɔŋmɔ lɛ. Yosef ekase nibii babaoo ni kɔɔ Nyɔŋmɔ susumɔ yɛ gbalashihilɛ kɛ anɔkwayeli yɛ gbalashihilɛ mli lɛ he kɛjɛ efɔlɔi lɛ aŋɔɔ. Yehowa ji mɔ ni fee klɛŋklɛŋ gbalashihilɛ lɛ, ni etsɔɔ esusumɔ faŋŋ yɛ he. No ji akɛ, nuu aaakpɛtɛ eŋa he ni amɛaatsɔ “heloo kome.” (1 Mose 2:24) Nyɔŋmɔ mli fu mɛi ni ka akɛ amɛbaafite mɛi krokomɛi agbala lɛ. Akɛ nɔkwɛmɔnɔ lɛ, shwɛ fioo ni kulɛ akpãta mɛi ni ka akɛ amɛkɛ Abraham ŋa, ni ji Yosef nanakaŋsowa, kɛ Isak ŋa, ni ji Yosef naa awɔ lɛ ahiɛ kwraa. (1 Mose 20:1-3; 26:7-11) Yosef kase nɔ ko kpele kɛjɛ saji nɛɛ amli, no hewɔ lɛ, ekpɛ eyiŋ akɛ efiteŋ mɛi krokomɛi agbala kɔkɔɔkɔ.

Potifar ŋa lɛ nyaaa nɔ ni enu lɛ he kwraa. Bo lɛ feemɔ nyɔŋ nɛɛ he mfoniri okwɛ ni eekpoo enibimɔ lɛ, ni eekɛɛ lɛ po akɛ enibimɔ lɛ ji “efɔŋ kpeteŋkpele”! Fɛɛ sɛɛ lɛ, etee nɔ enyɛ oblanyo lɛ nɔ ni ekɛ lɛ awɔ. Ekolɛ henɔwomɔ kɛ hewoo hã edɔ lɛ waa, ni no hewɔ lɛ ebɔ mɔdɛŋ ni enine ashɛ Yosef nɔ koni ehã edabi lɛ atsɔ hɛɛ. Enɛ hã efee enii tamɔ Satan, mɔ ni ka Yesu lɛ. Satan hu nine nyɛ shi, ni yɛ nɔ najiaŋ ni esa akɛ enijiaŋ aje wui lɛ, ‘eshi lɛ kɛyashi be kroko ni sa.’ (Luka 4:13) No hewɔ lɛ, ehe miihia ni anɔkwafoi atswa amɛfai shi ni amɛhã amɛhiɛ ahi amɛhe nɔ be fɛɛ be. Nakai ji bɔ ni Yosef fee. Eyɛ mli akɛ shihilɛ ni ekɛkpe lɛ tee nɔ “daa nɛɛ” moŋ, shi eŋmɛɛɛ ehe ehãaa. Wɔkaneɔ akɛ: ‘Ebooo lɛ toi.’ (1 Mose 39:10) Kɛ̃lɛ, Potifar ŋa lɛ etswa efai shi akɛ bɔ fɛɛ bɔ ni fee lɛ esa akɛ enine ashɛ Yosef nɔ.

Ehala be ko ni tsuji lɛ ateŋ mɔ ko mɔ ko bɛ shĩa. Ele akɛ Yosef baaba shĩa lɛ mli ni ebatsu nii. Be ni Yosef ba shĩa lɛ mli lɛ, ebɔ mɔdɛŋ ni enine ashɛ enɔ. Emɔ Yosef atade lɛ mli, ni ekpa lɛ fai naagbee nɔ akɛ: “Okɛ mi abawɔ!” Yosef he fee oya. Yosef kɛ ekãa sha ehe kɛjɛ edɛŋ kɛtee sɛɛ—shi lɛ hu emɔ Yosef atade lɛ mli kpɛŋŋ. Yosef je etade lɛ mli, ni eshi ewo edɛŋ. Ni ejo foi eshi lɛ!1 Mose 39:11, 12.

Ekolɛ wɔbaakai ŋaawoo ni jɛ mumɔŋ ni bɔfo Paulo kɛhã lɛ, akɛ: “Nyɛjoa ajwamaŋbɔɔ naa foi!” (1 Korintobii 6:18) Mɛɛ nɔkwɛmɔnɔ ni nɔ bɛ Yosef fee ehã anɔkwa Kristofoi fɛɛ nɛkɛ! Ekolɛ, wɔbaayaje shihilɛ ko ni baahã wɔkɛ mɛi ni bɛ bulɛ kɛhã Nyɔŋmɔ jeŋba he mlai lɛ ashara, shi no etsɔɔɔ akɛ wɔŋmɛ gbɛ ni amɛná wɔnɔ hewalɛ ni wɔkɛ wɔhe awo efɔŋfeemɔ mli. Ekɔɔɔ he eko nɔ ni baajɛ mli aba, esa akɛ wɔjo foi.

Yɛ Yosef gbɛfaŋ lɛ, sane wulu diɛŋtsɛ ji nɔ ni baaba lɛ. Potifar ŋa lɛ baatɔ ehe owele. Oona kɛ onaaa nɔŋŋ lɛ ekɔ enaa ewo tsoŋ, eetsɛ tsuji krokomɛi lɛ ni amɛba shĩa lɛ mli. Ekɛɛ akɛ, kulɛ Yosef miihe ato lɛ kabonaa, shi ni ebɔi bolɔmɔ lɛ ni Yosef jo foi. Ekɛ Yosef atade lɛ to, koni kɛ́ ewu lɛ ba lɛ ekɛfolɔ enaa. Be ni Potifar ba shĩa lɛ, emale etsɔɔ lɛ hu akɛ Yosef ba ni ebato lɛ kabonaa, ni ekɛfata he akɛ, fɛɛ jɛ ewu lɛ ejaakɛ lɛ eyaŋɔ nɛkɛ maŋsɛɛnyo nɛɛ kɛba amɛshĩa lɛ. Te Potifar fee enii ehã tɛŋŋ? Wɔkaneɔ akɛ: “Emli wo la naakpa”! Ehã awo Yosef tsuŋ.1 Mose 39:13-20.

“AMƐKƐ GBOKLƐ MIA ENAJI”

Wɔlé bɔ ni Mizraimbii atsuŋwoohei lɛ yɔɔ hã yɛ nakai beaŋ lɛ he nɔ ko tsɔ. Mɛi ni tsaa shi kɛtaoɔ blema nibii lɛ ena tsuŋwoohei nɛɛ ahe nibii komɛi—mɔɔ wujiwuji kɛ amɛmli tsuŋwoohei ni mli ewowoo duŋ kpii. Sɛɛ mli lɛ, Yosef tsɔɔ he ni awo lɛ tsuŋ yɛ nɛɛ mli akɛ “bu,” ni tsɔɔ he ko ni kane kɛ hiɛnɔkamɔ ko kwraa bɛ. (1 Mose 40:15) Biblia mli wolo ni ji Lala lɛ hãa wɔleɔ akɛ, afee Yosef niseniianii komɛi hu: ‘Amɛkɛ gboklɛ mia enaji,  ni awo ekuɛ dade kɔsɔŋkɔsɔ.’ (Lala 105:17, 18) Bei komɛi lɛ, Mizraimbii lɛ kɛ mɛi aniji woɔ amɛsɛɛ ni amɛwoɔ amɛ gboklɛi yɛ amɛnikutsei ahe; mɛi komɛi lɛ akɛ dade kɔsɔŋkɔsɔ ni afee bu awo mli woɔ amɛkuɛ. Kwɛ bɔ ni nifeemɔ nɛɛ baahã Yosef apiŋ ahã—eyɛ mli akɛ efeko nɔ ko ní esa akɛ apiŋ lɛ nakai!

Nɔ ni fe fɛɛ lɛ, jeee be kukuoo ko kɛkɛ enɛ baahe. Amaniɛbɔɔ lɛ kɛɔ akɛ Yosef ‘tee nɔ ehi tsuŋwoohe lɛ.’ Eye afii abɔ yɛ nakai tsuŋwoohe lɛ mli! * Ni Yosef lé akɛ be ko baashɛ po ni abaajie lɛ. Be ni nakai klɛŋklɛŋ gbii ni hã ehiɛ fee lɛ yaa lɛ boteɔ otsii amli, ni otsii lɛ hu boteɔ nyɔji amli lɛ, mɛni ye ebua lɛ koni enijiaŋ akaje wui loo efee shwɛm?

Amaniɛbɔɔ lɛ kɛ hetoo ni woɔ mɔ hewalɛ nɛɛ hãa wɔ akɛ: “Yehowa kɛ Yosef yɛ, ni ena lɛ mɔbɔ.” (1 Mose 39:21) Tsuŋwoohe gbogbo ko, gboklɛ ko, loo tsuŋwoohe ko kɛ emli duŋ kpii ko kwraa bɛ ni baanyɛ atsĩ Yehowa naa koni ekanyɛ ena etsuji amɔbɔ. (Romabii 8:38, 39) Ekolɛ wɔbaanyɛ wɔfee Yosef ní eefɔse ehaomɔi lɛ eeshwie eŋwɛi Tsɛ ni esumɔɔ lɛ waa lɛ hiɛ yɛ sɔlemɔ mli, ní no sɛɛ lɛ, eená toiŋjɔlɛ kɛ tsui ni nyɔɔ mɔ mli ní “miishɛjemɔ fɛɛ Nyɔŋmɔ lɛ” pɛ kɛhãa lɛ he mfoniri yɛ wɔjwɛŋmɔŋ. (2 Korintobii 1:3, 4; Filipibii 4:6, 7) Mɛɛ nɔ kroko Yehowa fee ehã Yosef? Wɔkaneɔ akɛ Yehowa tee nɔ ‘ewo ehiɛ nyam yɛ gboklɛfoi akwɛlɔ lɛ hiɛ.’

Ekã shi faŋŋ akɛ, ahã gboklɛfoi lɛ nitsumɔ, ni shi kome ekoŋŋ lɛ Yosef tsu nɔ ko, ni ehã Yehowa jɔɔ enitsumɔ lɛ nɔ. Etsu nii waa, ni nitsumɔ fɛɛ nitsumɔ ni akɛbaahã lɛ lɛ, ekɛ enyɛmɔ fɛɛ tsuɔ, ni eshiɔ nɔ ni eshwɛ lɛ ehãa Yehowa. Akɛni Yehowa jɔɔ Yosef hewɔ lɛ, mɛi he lɛ amɛye ni amɛbu lɛ tamɔ eji be ni eyɔɔ Potifar shĩa lɛ nɔŋŋ. Wɔkaneɔ akɛ: “Ni gboklɛfoi akwɛlɔ lɛ tuu gboklɛfoi lɛ ni yɔɔ tsũ lɛŋ lɛ fɛɛ ewo Yosef dɛŋ, ni nɔ fɛɛ nɔ ni afeɔ yɛ jɛi lɛ, lɛ feɔ. Gboklɛfoi akwɛlɔ lɛ kwɛɛɛ nɔ ko nɔ ko ni yɔɔ edɛŋ lɛ; ejaakɛ Yehowa kɛ lɛ yɛ, ni nɔ fɛɛ nɔ ni efeɔ lɛ, Yehowa hãa eshwereɔ.” (1 Mose 39:22, 23) Kwɛ bɔ ni le ni Yosef le akɛ Yehowa miisusu ehe lɛ baahã etsui anyɔ emli ahã!

Yosef tsu nii waa yɛ tsuŋwoo he lɛ, ni Yehowa jɔɔ lɛ

Ekolɛ, jeŋ shihilɛ baanyɛ ekɛ wɔ atswia shi loo abaaye wɔ sane fɔŋ musuŋshãa musuŋshãa, shi kɛ́ eba lɛ nakai lɛ, wɔbaanyɛ wɔkase nii kɛjɛ Yosef hemɔkɛyeli lɛ mli. Kɛ́ wɔsɔleɔ wɔhãa Yehowa be fɛɛ be, wɔyeɔ ekitai lɛ anɔ daa, ni wɔmiaa wɔhiɛ wɔfeɔ nibii ni saa ehiɛ lɛ, wɔ hu wɔbaanyɛ wɔhã Yehowa nɔ ko ni ejɔɔ nɔ. Yɛ nikasemɔi krokomɛi ni kɔɔ Yosef he ni abaasusu he wɔsɛɛ yɛ Buu-Mɔɔ lɛ mli lɛ, wɔbaana bɔ ni Yehowa jɔɔ Yosef babaoo ehã.

^ kk. 23 Biblia lɛ tsɔɔ akɛ Yosef eye aaafee afi 17 loo 18 be ni etee Potifar shĩa lɛ, ni ehi jɛmɛ aahu kɛyashi eda kɛbatsɔ oblanyo—eeenyɛ efee afii fioo komɛi. Be ni ajie lɛ kɛjɛ tsuŋwoo lɛ mli lɛ eye afii 30.1 Mose 37:2; 39:6; 41:46.

Ekrokromɛi Hu Nɛ

BUU-MƆƆ

Ani Okɛ Ohe Baafɔ̃ Nyɔŋmɔ Nɔ?

Ba koni obale Nyɔŋmɔ jogbaŋŋ taakɛ oleɔ onaanyo ni onyɛɔ okɛ ohe fɔ̃ɔ enɔ lɛ, koni ona nɔ̃ hewɔ ni obaanyɛ onaì hekɛnɔfɔ̃ɔ akɛ jeee lɛ ekɛ nɔnaa kɛ jalɛsane ni ayeee lɛ baa lɛ. Kanemɔ koni ona bɔ ni kɛ́ ole Nyɔŋmɔ, ni okɛ lɛ bɔ Naanyo lɛ otsui baanyɔ omli aha